གླིང་སྨྱོན། དངོས་མིང་ལ་འབུམ་པ་རྒྱལ་ཟེར་ཞིང་། ཨ་མདོ་རེབ་གོང་གི་མི་ཡིན། ཆུང་ངུའི་དུས་ནས་བོད་ཡིག་གཙོར་བྱས་སློབ་གྲྭ་ཆུང་འབྲིང་འགྲིམས། སྤྱི་ལོ༢༠༠༠ལོར་སྦྱངས་འབྲས་ལེགས་པོ་བླངས་ནས་ནུབ་བྱང་མི་རིགས་སློབ་གྲྭ་ཆེན་མོའི་གློག་ཤུགས་བཟོ་སྐྲུན་སློབ་གླིང་གི་དངོས་སྦྱོང་འཛིན་གྲྭར་རྒྱུགས་འཕྲོད་དེ་དངོས་ལུགས་རིག་པའི་ཕྱོགས་ལ་སློབ་གཉེར་བྱས། སློབ་གསེང་གི་དུས་ཚོད་བེད་སྤྱད་དེ་རྩིས་འཁོར་དང་དྲ་རྒྱའི་ཤེས་བྱར་རང་སྦྱོང་བྱས་ཏེ་བོད་ཡིག་དྲ་ངོས་བཟོ་བར་སྤྲོ་བ་སྐྱེས། ༢༠༠༥ལོར་སློབ་མཐར་ཕྱིན་མ་ཐག་ཀན་སུའུ་བོད་ཡིག་བརྡ་འཕྲིན་ལག་རྩལ་ཀུང་ཟི་རུ་ལོ་ཕྱེད་རིང་ལས་ཀ་གཉེར། སྔ་རྗེས་སུ་གངས་ལྗོངས་གཞོན་ནུའི་གླེང་སྟེགས་དང་མཆོད་མེ་བོད་ཀྱི་རྩོམ་རིག་དྲ་བ་དང། དགེ་ཆོས་དྲ་བ། ན་གཞོན་གསར་བའི་དྲ་བ། བོད་བརྙན་དྲ་བ་སོགས་ཀྱི་ལག་རྩལ་པའི་འགན་འཁུར་ནས་ལེགས་འགྲུབ་བྱུང༌། ད་ལྟ་བོད་ཀྱི་ཆ་འཕྲིན་ལག་རྩལ་དྲ་བའི་འགན་འཛིན་པ་དང་ཀྲུང་གོ་བོད་ཀྱི་དྲ་བའི་བོད་ཡིག་སྡེ་ཚན་ནང་དྲ་ངོས་ཇུས་འགོད་པ་དང་ལག་རྩལ་པའི་འགན་འཁུར་མུས་སུ་མཆིས་སོ།།

གླིང་སྨྱོན།