དབྱར་རྩྭ་དགུན་འབུ་

དབྱར་རྩྭ་དགུན་འབུ་ཞེས་པ་ནི་རྩ་ཆེའི་སྨན་རྫས་ཆེས་རིན་ཐང་ཆེན་པོ་ལྡན་པ་ཞིག་ཡིན་ཞིང་།ས་མཐོའི་བོད་དང་རི་བོ་ཧི་མ་ལ་ཡའི་རི་རྒྱུད་བལ་ཡུལ་དང་འབྲས་ལྗོངས་སོགས་ཀྱི་རི་མགོ་སྤང་ལྗོངས་དང་འབྲོག་ས་སོགས་སུ་ཐར་ཐོར་དུ་སྐྱེ་ཡོད།སྨན་རྩྭ་འདི་གཙོ་ཆེ་བ་བོད་ནང་ཁུལ་དུ་སྐྱེ་ཞིང་།དེ་ཡང་སའི་མཐོ་ཚད་ལ་རྒྱ་མཚོའི་ངོས་ནས་རྨིད4300ནས5000ཡོད་པའི་གནས་སུ་སྐྱེ་བ《འཁྲུངས་དཔེ་དྲི་མེད་ཤེལ་གྱི་མེ་ལོང》ནང་གསལ་བོར་བཀོད་ཡོད།དབྱར་རྩྭ་དགུན་འབུ་ནི་དོན་དངོས་ཐོག་དབྱར་ཁ་རྩྭ་དང་དགུན་ཁ་སྲོག་ལྡན་འབུ་ཞིག་ཡིན་ཞིང་།དེ་ཡང《འཁྲུངས་དཔེ་དྲི་མེད་ཤེལ་གྱི་མེ་ལོང》ལས། “ལོ་གཅིག་ལ་སྐྱེ་བའི་རྩྭ་རིགས་ཏེ་ཐོག་མར་དགུན་དུས་འབུ་མེ་ལྕེ་བ་ཕྱེ་ལེབ་རིགས་ཀྱི་འབུ་ཕྲུག་སའི་གཏིང་དུ་ཡོད་པའི་ལུས་ལ་འབུ་ཕྲ་ཞུགས་ནས་ཤི་བའི་ལུས་སླར་ཡང་སྐྱེ་དངོས་ཀྱི་རྩྭ་རུ་གྱུར་ནས་སྐྱེས་པ་ཡིན་པས།ཤ་རྒྱུའི་རྩ་བ་ཕྱི་སེར་ལ་ནང་དཀར་བ་འཕྲེད་གཉེར་དང་ལྡན་པ། མགོ་དང་ཁ་ཡོད་པར་མ་ཟད།ལྟོ་བར་རྐང་ལག་ཆ་བརྒྱད་ཡོད་པ་སོགས་འབུ་ཡི་ལུས་ཇི་ལྟར་བ་ལ།ལྟག་པའི་རྒྱུད་དུ་སྤུ་ཐུང་ནག་ཞིབ་ཐར་ཐོར་ཡོད་པ། ལུས་ཚད་ཕལ་ཆེར་རྨིད0.05ནས0.06ཙམ་ཟིན་པ་སའི་ནང་ཐད་ཀར་ཟུག་པ་དང་།ཟླ5ནས་ཟླ6པར་ས་ངོས་སུ་སྡོང་པོ་རྗ་སྨུག་གམ་ཁམ་ནག་སྟོད་སྦོམ་ཞིང་སྨད་ཕྲ་བ་ནང་ཤ་དཀར་པོ་ཅན།ཁོག་སྟོང་རིང་ཚད་རྨིད0.03ནས0.06ཙམ་ཟིན་པ་མངོན་པ་དེ་འབུ་ལ་རྭ་སྐྱེས་པ་དང་འདྲ་བས་ཕལ་གྱིས་བེའུ་ར་ཞེས་ཟེར་ཡང་དོན་དུ་ཤ་མོའི་རིགས་ཡིན།དེ་རིམ་བཞིན་ཆེ་རུ་རྒྱས་པ་དང་། རྩ་བའི་བཅུད་དམ་ནུས་པ་ཞན་དུ་ཕྱིན་ནས་ཟླ་བ7པ་ཙམ་ནས་ཕལ་ཆེར་རྩ་བ་རུལ་ཏེ་མེད་པར་འགྲོ་བ”སོགས་གསལ་འདུག དབྱར་རྩྭ་དགུན་འབུ་ནི་གནའ་དུས་ནས་ཡོད་པའི་སྨན་རྩྭ་ཞིག་ཡིན་ཡང་།སྤྱི་ཚོགས་ནང་དཔལ་འབྱོར་གྱི་རིན་ཐང་ལྡན་པ་དུས་རབས་ཉི་ཤུ་པའི་དུས་དཀྱིལ་ཙམ་ནས་གཞི་ནས་ཤེས་རྟོགས་དང་དར་སྲོལ་བྱུང་བར་མངོན།དེ་ནས་ལོ་ལྟར་ཕྱི་ཟླ4པ་ནས7པའི་བར་ལ་བོད་རིགས་ཞིང་འབྲོག་མི་མང་ཆེས་མང་པོས་རྩ་ཆེན་སྨན་རྩྭ་འདི་བརྐོ་རུ་རི་ཀླུང་དང་།སྤང་གཤོང་སོགས་ལ་ཉིན་མཚན་བསྒྲིལ་ནས་ཟླ་བ་ཁ་ཤས་རིང་སྐྱོད་ཀྱིན་ཡོད་པ་དང་།ཁྱིམ་ཚང་འགའ་ཤས་ཀྱི་ནང་མི་ཚང་མ་བརྐོ་རུ་འགྲོ་བཞིན་ཡོད།དབྱར་རྩ་དགུན་འབུ་བརྐོ་བ་དང་ཉོ་འཚོང་བྱས་པར་བརྟེན་ནས་བོད་རིགས་འབྱོར་ལྡན་ཆགས་མཁན་གང་མང་བྱུང་ཡོད། དབྱར་རྩ་དགུན་འབུ་ནི་བོད་ཀྱི་ས་གཤིས་བཟང་ས་དང་ཐོན་ཁུངས་ཡོད་ས་མང་ཆེ་བར་ཡོད་པ་དང་།འདི་རྐོ་དུས་སྔོ་ལྗང་ཅན་གྱི་སྤང་གཤོང་མང་པོ་ས་དོང་དྲོས་ཏེ་རང་བྱུང་ཁོར་ཡུག་ལ་གཏོར་སྐྱོན་ཚབས་ཆེན་ཡོང་གི་ཡོད་པ་མ་ཟད།གཞི་རྒྱ་ཆེ་བའི་སྤང་དང་རྩྭ་ཐང་ཆེས་མང་པོ་ཉམས་རྒུད་འགྲོ་ཡི་ཡོད། དཔེར་ན་དབྱར་རྩྭ་དགུན་འབུ་རྐང་གཅིག་རྐོ་དགོས་ན་སྤང་ལ་མི་ཊར་གསུམ་ཙམ་རྐོ་སློག་དགོས་ཀྱི་ཡོད།རྩ་ཆེའི་སྨན་རྩྭ་འདི་རིགས་ཚད་ལས་བརྒལ་བ་སྔོག་འདོན་བྱས་པའི་རྐྱེན་གྱིས་རྩ་སྟོངས་སུ་འགྲོ་བའི་ཉེན་ཁའི་མཚམས་སུ་སླེབས་ཡོད་པ་དང་།ལྷག་པར་དུ་རྨ་ཆུ་དང་། རྫ་ཆུ། འབྲི་ཆུ་གསུམ་གྱི་རྒྱུད་དུ་ཡོད་པའི་དབྱར་རྩྭ་དགུན་འབུ་ནི་ཆེས་ཡག་ཤོས་སུ་བརྩི་བཞིན་ཡོད་ཅིང་།ཆུ་བོ་འདི་གསུམ་གྱི་རྒྱུད་དུ་གནས་པའི་མི་འབུམ་གཅིག་ལྷག་གི་ལོ་རེར་སྨན་རྩྭ་འདི་སྔོག་འདོན་བྱེད་ཀྱི་ཡོད་པས།ཆུ་ལོག་བརྒྱབ་པའི་གནས་ཚུལ་མང་པོ་ཡོང་སྟེ་འགྲོ་བ་མི་གཙོས་པའི་སེམས་ཅན་མང་པོ་འཚོ་གནས་ལ་གནོད་འཚེ་ཡང་ཡོང་གིན་ཡོད།མདོ་དབུས་མཐོ་སྒང་གི་སྐྱེ་ཁམས་ཁོར་ཡུག་ལ་སྲུང་སྐྱོབ་བྱེད་པའི་སྐོར་བརྗོད་པ་ལྷག་བསམ་པདྨ་དཀར་བོའི་ཆུན་པོ་ཞེས་པའི་ནང་གསལ་བ་ལྟར་ན་དབྱར་རྩ་དགུན་འབུ་སྨིན་པའི་དུས་སུ་མཚོ་སྔོན་ཞིང་ཆེན་མཚོ་ལྷོ་ཁུལ་གྱི་ཁྲི་ཀ་རྗོང་སྒོ་མེ་གཡུ་ཚ་སྡེ་བའི་མཐའ་འཁོར་དུ་ཧོང་ཡོན་དང་།ཧོང་ཀྲུང་། ཧྭ་ལུང་གི་ཞིང་པ་རྣམས་ཀྱིས་གུར600ཕུབ་སྟེ་གུར་གཅིག་གི་ནང་ཉུང་མཐར་མི་གྲངས་དྲུག་རེ་ཡོད་པ་དང་།ད་དུང་རྗོང་ཁག་གཞན་ནས་ཡོང་བའི་མི་སོགས་བསྡོམས་པས་ཉིན་རེར་མི་གྲངས་ཆིག་ཁྲི་ལྷག་གིས་སྒོ་མེ་གཡུ་ཚའི་ས་ཐོག་ཏུ་དབྱར་རྩྭ་དགུན་འབུ་རྐོ་རྩྭ་ཐང་ལ་གཏོར་སྐྱོན་གཏོང་གི་ཡོད་པ་སོགས་གསལ་ཡོད། སྐྱེ་ཁམས་རིག་པ་བ་ཚོས་དབྱར་རྩྭ་དགུན་འབུ་བརྐོ་བར་དོ་དམ་མ་བྱས་ན་འབྱུང་འགྱུར་རང་བྱུང་ཁམས་ལ་ད་ལྟ་ལས་ལྷག་པའི་གནས་ཚུལ་ཚབས་ཆེན་ལྷགས་རྒྱུ་ཡིན་པ་ཚོད་དཔག་བྱེད་ཀྱིན་ཡོད།ལྷག་པར་དུ་བོད་རིགས་ནང་ཁུལ་ཡུལ་སྡེ་དང་མི་སྒེར་བར་འཁྲུག་རྩོད་ཀྱི་གནད་དོན་འབྱུང་རྩ་ཞིག་ཀྱང་ཆགས་ཡོད་ལ།དབྱར་རྩྭ་དགུན་འབུ་དེ་གནའ་དུས་སུ་བོད་ཀྱི་སྲོལ་རྒྱུན་སྨན་རྫས་ནང་མ་གཏོགས་བེད་སྤྱོད་མེད་ཅིང་།དེང་དུས་ཚན་རིག་ཤེས་བྱ་འཕེལ་རྒྱས་འགྲོ་བ་དང་བསྟུན།བྱེ་ལུགས་སྨན་དང་བྱུག་རྫས་སོགས་ནང་ཆེས་དགོས་མཁོ་ཆེན་པོ་ཡོད་པར་མ་ཟད།ཕན་ནུས་ཡང་ཚད་མཐོན་པོ་ཡོད་པས།ཁྲོམ་རའི་ཐོག་རིན་གོང་ཇེ་མཐོར་སོང་།མ་འོངས་པར་སྲིད་གཞུང་ནས་སྟོངས་ལ་ཉེ་བའི་སྐྱེ་དངོས་རྩི་ཤིང་སྲུང་སྐྱོབ་ཀྱི་ཁྲིམས་གཞིར་བཟུང་ནས་དབྱར་རྩྭ་དགུན་འབུ་སྔོག་འདོན་ལ་བཀག་འགོག་དོ་དམ་བྱེད་དགོས་པ་དང་།ལྷག་པར་བོད་མི་རྣམས་ཀྱིས་ཀྱང་རང་མི་རིགས་ཀྱི་གོམས་གཤིས་དང་མཐུན་པའི་ཁོར་ཡུག་སྲུང་སྐྱོབ་ལ་འགན་འཁུར་གྱི་ཐོག་ནས་དབྱར་རྩྭ་དགུན་འབུ་སྔོག་འདོན་ལ་ཚོད་འཛིན་བྱེད་དགོས།（མཚོ་སྔོན་པོ་དྲ་བ་ནས།）

དབྱར་རྩྭ་དགུན་འབུའི་ངོ་བོ་དང་ཕན་ནུས་

དེ་ལ་ལོ་ངོ་ལྔ་བརྒྱ་ལྔ་བཅུ་ཙམ་གྱི་ཡར་སྔོན་ལ་ཟུར་མཁར་བ་མཉམ་ཉིད་རྡོ་རྗེ་མཆོག་གིས་གསོ་རིག་མན་ངག་བྱེ་བ་རིང་བསྲེལ་ལས། ཨོཾ་ཨ་ཐ། འཇིག་རྟེན་འདི་ན་ཕུན་ཚོགས་ཀྱི།། བདེ་བ་ཀུན་ལས་རྨད་བྱུང་བ།། འདོད་པའི་ཡོན་ཏན་ཀུན་གྱི་ནི།། སྙིང་བོ་རོ་བཙའི་སྦྱོར་བ་ལ།། བསྟན་བཅོས་ཡན་ལག་བརྒྱད་པ་ལས།། འདམ་བུ་བུར་ཤིང་འཇག་མ་རྩྭ།། དེ་ཡང་དབྱར་རྩྭ་དགུན་འབུ་ཞེས།། ཞེས་གསུངས་སྨན་གྱི་འཁྲུངས་དཔེ་ནི།། རྩ་རི་སྒམ་པོ་ལ་སོགས་ཀྱི།། རི་བོ་དབེན་པའི་ལྗོངས་སུ་སྐྱེ།། དབྱར་དུས་འབུ་ལ་ལོ་མའི་རྩ།།རི་སྒོག་འདབ་མ་འདྲ་བ་ལ།། མེ་ཏོག་ཨ་ལྦ་དར་ལྗང་འདྲ།། རྩ་བ་སྟོན་མཇུག་གོ་སྙོད་འདྲ།། རོ་ནི་མངར་དང་ཅུང་ཟད་བསྐ། ཞུ་རྗེས་མངར་ཞིང་ནུས་བ་སྣུམ།།དྲོ་ཞིང་ཅུང་ཟད་ཡང་དང་ལྡན།།རླུང་འཇོམས་མཁྲིས་པ་སེལ་བྱེད་ཅིང་།། བད་ཀན་མི་སྐྱེ་ངོ་མཚར་སྨན།། ཁྱེད་པར་བྱང་སེམས་རབ་ཏུ་འཕེལ།། ཉེས་མེད་ཡོན་ཏན་རྒྱ་མཚོའི་གཏེར།། དེ་ལ་སྦྱོར་སྡེའི་མན་ངག་ནི།།དུས་སུ་བརྐོས་པའི་རྩ་བ་དེ།།ས་མེད་ཁྲམ་ཁྲུམ་བརྡུངས་པ་ལ།།གཙང་གཡེར་ཞིབ་བཏགས་ཕབས་རྩི་བྲན།། མཆིལ་པའི་ཁོག་པ་བཀང་ལ་བཙོས།། གསེར་མདོག་བཟང་བ་གཅིག་གི་ཕྱེད།། ལུག་གི་འོ་མ་བྲེ་གང་རྣམས།། ལྕགས་སྣོད་ཁུ་བ་རང་ཐིམ་བཙོ།། དེ་ནི་སླར་ཡང་མ་ཚིག་པར།། དལ་བུས་མེ་ཡི་དྲོད་ལ་སྐམ།། རླན་དང་བྲལ་ནས་ཞིབ་པར་བཏགས།། ཁ་ཚ་བཟང་དྲུག་ཕོ་བ་རིས།། གི་ལྦང་དོམ་མཁྲིས་ཆིག་ཐུབ་འབྲུ།། གསང་བ་སྨན་གཅིག་ཐུན་བཟང་རེ།། གངས་སྦལ་བཟང་པོ་རྙེད་ཀྱང་བསྲེ།། ཞིབ་བཏགས་སྦྲང་རྩིའི་རིལ་བུ་ནི།། ལུག་གི་རིལ་མ་ཙམ་དུ་དྲིལ།། ཐོ་རངས་ཨ་རག་གར་ཆང་གཉིས།། གང་འབྱོར་ཀ་ར་སྦྱར་བས་ཕུལ།། ཟླ་གཅིག་བསྟེན་པས་ཆགས་སྤྱོད་དང་།། རྗེན་དང་སྔོ་ངད་རུལ་སུངས་སྤང་།། དཀར་དང་མངར་གསུམ་གསར་བཅུད་བསྟེན།། ཕན་ཡོན་བསམ་གྱིས་མི་ཁྱབ་སྟེ།། ལུས་ཀྱི་ཟུངས་བདུན་རྒྱས་པ་ལ།། ཁྱད་པར་རོ་བཙའི་དོན་མཆོག་བྱེད།། རིགས་རྒྱུད་སྤེལ་དང་བཀྲག་མདངས་རྒྱས།། དབང་པོ་ལྔ་ནི་རྣམ་པར་བཀྲ།། འདི་ལ་ཡོན་ཏན་མཐའ་ཡས་པ།། ཚིག་གི་བརྗོད་པས་ཟད་མཐའ་མེད།། ཉམས་སུ་བླངས་ན་བདེ་ཆེན་གྱི།། ཕྱག་རྒྱ་གར་མཁན་རྣམ་དཔྱོད་ཀྱིས།། མཛེས་མ་འབུམ་གྱི་དགའ་བ་འཕྲོག། ཞལ་གདམས་མཐོང་བརྒྱུད་མེད་པ་ན།། ཇི་ལྟར་འདོད་པའི་འབྲས་མི་སྟེར།། འདི་ན་དད་མོས་ཕན་པ་ཡི།། སེམས་བྲལ་བླུན་པོ་རང་འདོད་དང་།། གྱི་ནའི་གདོན་གྱིས་གཟིར་བ་རྣམས།། སྣོད་མིན་ཧ་ལ་ནག་པོ་སྟེ།། དགེ་ཞིང་གཟུ་བོར་གནས་པ་དང་།། དམ་ཚིག་གཞུང་བཟང་སྐལ་བ་བཟང་།། ཡོད་ན་ཟབ་གནད་འདི་ཡིན་ཞེས།། དྷརྨ་སྭཱ་མིས་བྲིས་འདིའི་དགེས།། འགྲོ་ཀུན་བདེ་བ་མཆོག་ཐོབ་ཤོག། ཤུ་བྷཾ། ཞེས་གསུངས་ཡོད་ཅིང་། བོད་ལྗོངས་ཆབ་མདོ་སྨན་རྩིས་ཁང་གིས་སྤེལ་བའི་འཁྲུངས་དཔེ་དྲི་མེད་ཤེལ་གྱི་མེ་ལོང་དང་ཀྲུང་དབྱང་མི་རིགས་སློབ་གྲྭའི་སློབ་དཔོན་ཆེན་མོ་ཐུབ་བསྟན་ཕུན་ཚོགས་མཆོག་གིས་མཛད་པའི་གངས་ལྗོངས་ཚིག་མཛོད་ཆེན་མོ་གཉིས་ཞལ་མཐུན་པར་དབྱར་རྩྭ་དགུན་འབུའི་རོ་དང་ཕན་ནུས་གསུངས་སྐབས། རོ་མངར་ལ་ལན་ཚ། ཞུ་རྗེས་དྲོ། ནུབ་པས་བཅུད་ལེན་ཟུངས་འཕེལ། ཁྱད་པར་མཁལ་དྲོད་གསོ་ཞིང་མཁལ་སྟོབས་སྐྱེད། རོ་ཙ་སྐྱེད་ཅིང་ཐིག་ལེ་འཛག་གཅོད་སྲུང་། གློ་གཅོང་དང་བད་རླུང་གློ་བར་ཞུགས་པ། དབུགས་མི་བདེ་བ་བཅས་སེལ་ཞིང་། རྒན་བྱིས་དང་། ཟུངས་ཟད། རླུང་ལྡན་རྣམས་ལ་བདུད་རྩིར་མཚུངས་ཞེས་གསུངས་འདུག མཚོ་སྔོན་མི་རིགས་དཔེ་སྐྲུན་ཁང་གིས་པར་ཏུ་བསྐྲུན་པའི་སྨན་རིས་གསལ་བའི་མེ་ལོང་དུ། རོ་མངར་ཞིང་ནུས་པ་དྲོ་བ་ཡིན། བྱེད་ལས་ནི་ལུས་སྟོབས་རྒྱས་ཤིང་ལུས་ཟུངས་གསོ། གློ་སྐྲན་དང་རྒན་པོ་རླུང་ལུ་བྱེད་པ། ཟུངས་ཁྲག་ཉམས་པ། རྩ་དཀར་རང་བཞིན་གྱི་ཕོ་བ་ན་བ། ཕོ་བ་འཚང་ཞིང་སྒྲེགས་པ། ཡི་ག་ཆད་པ། རུས་ཚིགས་ན་བ། རྒན་པོ་ཕོ་དྲོད་ཉམས་པ་བཅས་གསོ་སོགས་གསུངས་ཡོད་ལ། བོད་རྒྱ་ཚིག་མཛོད་ཆེན་མོ་རུ། རོ་མངར། ཞུ་རྗེས་སྙོམས། ནུས་པས་མཁལ་རྐེད་ན་བ་དང་། ལུས་སྨད་དུ་དྲོད་མི་ཁུག་པ་དང་། ཁུ་བ་ཟད་པ། ལུས་སྟོབས་ཉམས་པ་བཅས་ལ་ཕན་ཞེས་བྲིས་ཡོད། རྒྱ་སྨན་གྱིས་དབྱར་རྩྭ་དང་དཀར་པོ་ཆིག་ཐུབ་དང་། ཤྭ་རྭ་བཅས་ལ་སྨན་གྱི་རིན་ཆེན་རྣམས་གསུམ་དུ་འབོད་ཅིང་། ཉེ་སྔོན་ཤར་ལྷོ་སློབ་ཆེན་མཁལ་ནད་ཞིབ་འཇུག་ཁང་དང་ཤར་ལྷོ་སློབ་ཆེན་གྱི་ཁོངས་གཏོགས་ཀྲུང་གོ་གསོ་རིག་སློབ་གླིང་གི་མཁས་དབང་ཀུང་ཀྲང་དང་ཀྲང་ཤའོ་ལེང། ལུའོ་པེས་ཁྲང་བཅས་ཀྱིས་མཛད་པའི་དབྱར་རྩྭ་དགུན་འབུའི་ད་ཡོད་གནས་ཚུལ་དང་སྨན་བཅོས་ཡར་རྒྱས་འབོད་པའི་དབྱར་རྩྭ་དགུན་འབུའི་ད་ཡོད་གནས་ཚུལ་དང་སྨན་བཅོས་ཡར་རྒྱས་འབོད་པའི་དཔྱད་རྩོམ་ནང་དུ་མིག་སྔར་ཚན་རིག་ལག་རྩལ་གསར་བས་ཤེས་གསལ་ལྟར་ན། དབྱར་རྩྭ་དགུན་འབུས་མཁལ་མ་དང་མཆིན་པ་སྲུང་བ་དང་། རིམས་འོག་མ་ལག་འཛུགས་པ། སྙིང་ཁྲག་དབྱང་འགྱུར་འབྱུང་བ་སྔོན་འགོག་བྱེད་པ་དང་ཁྲག་རྩའི་གནོད་ཤུགས་ཆུང་དུ་བཏང་ནས་ཁྲག་རྩ་འགད་པ་སྔོན་འགོག་པ་སྔོན་འགོག་དང་ཁྲག་རྩ་ཉམས་གསོའི་ནུས་པ་ལྡན་པ། སྐྲན་ནད་སྔོན་འགོག་དང་སྨན་བཅོས་བྱེད་པ། གཅིན་སྙིའི་ནད་ལ་སྨན་བཅོས་བྱེད་པ། གློ་གཅོང་དང་དབུགས་ལམ་གྱི་ནད་རིགས་ལ་སྨན་བཅོས་བྱེད་པ་སོགས་ལ་ནུས་པ་ཆེན་པོ་འདོན་གྱིན་ཡོད་པར་བཤད་ཡོད། གཞན་འདིར་རྒྱུན་ཤེས་ཀྱི་ཚུལ་གྱིས་ངེས་དགོས་པ་ཞིག་ལ། རྒྱ་སྐད་དུ་ཁྲུང་ཚོའོ་སྟེ་རྩྭ་འབུ་ཞེས་པ་འདི་ས་གང་དུའང་བྱུང་བ་ཞིག་ཡིན་ཏེ། ཨན་ཧྭེ་ཞིང་ཆེན་གྱི་ཅིན་ཀྲའེ་ཟེར་བའི་ས་ཆ་རུ་ཡ་ཤང་པང་རྩྭ་འབུ་ཞེས་པ་ཞིག་བྱུང་ཡོད་ལ། རྩྭ་འབུ་དེ་རི་མཐོན་པོའི་མགོ་ལས་དམའ་མོར་མི་སྐྱེ། རི་མཐོན་པོར་སྐྱེས་པ་ནི་ལོ་དེའི་སྔར་ལོ་ཅིན་ཀྲའེ་ས་ཁུལ་དུ་སྔོན་བྱུང་མ་མྱུང་བའི་གངས་ཆེན་ཞིག་བབས་པས་ཡིན་ཞེས་བརྗོད་ཀྱིན་འདུག ཆེད་མཁས་ཀྱིས་གསུངས་ན་ཀྲུང་གོ་རྒྱལ་ཁབ་ཀྱི་ནང་རྐྱང་བོར་རྩྭ་འབུ་དེ་འདྲ་རིགས་༤༠༠ཙམ་ཡོད་ཅིང་། ཡ་ཤང་པང་རྩྭ་འབུ་ནི་རིགས་དེའི་ནང་གསེས་ཙམ་ཡིན། དེ་ལ་ཕྱི་ཚུལ་ནས་བལྟས་ན་དབྱར་རྩྭ་དགུན་འབུ་དང་གཅིག་མཚུངས་ཡིན་རུང་དོན་དུ་སྨན་ནུས་ཀྱི་ཐད་གཏན་ནས་མི་འདྲ་ཞེས་གསུངས་ཡོད།