བོད་ཀྱི་གྲུབ་མཐའ་ཁག་གི་མིང་བྱུང་ཚུལ།

དེ་ཡང་སྤྱི་ལོ་༨༤༡ ཙམ་ལ་རྒྱལ་པོ་གླང་དར་མས་ཆོས་བསྣུབས། དེ་ནས་ལོ་ངོ་བརྒྱ་དང་སུམ་ཅུ་སོ་དྲུག་འདས་ཤིང་། བཙན་པོའི་གདུང་རབས་ཀྱིས་བོད་སྤྱི་ལ་དབང་བསྒྱུར་ བའི་དུས་སྐབས་ཡོལ་ཏེ་བོད་སིལ་བུར་ཐོར། རྗེ་དཔོན་ཚན་པ་བཅུ་ གཅིག་གིས་ས་ཁུལ་བཅད་བཟུང་དབང་བསྒྱུར་བྱེད་པའི་དུས་སྐབས་བྱུང་། སྤྱི་ལོ་༩༧༨ལོར་བླ་ཆེན་དགོངས་པ་རབ་གསལ་གྱི་སློབ་བརྒྱུད་དབུས་གཙང་གི་མཁས་པ་མི་བཅུ་ (དབུས་པ་ཀླུ་མེས་ཚུལ་ཁྲིམས་ཤེས་རབ། གཉལ་པ་འབྲིང་ཡེ་ ཤེས་ཡོན་ཏན། སྦ་ཚུལ་ཁྲིམས་བློ་གྲོས། རག་ཤི་ཚུལ་ཁྲིམས་འབྱུང་གནས། སུམ་པ་ཡེ་ཤེས་བློ་གྲོས་དང་ལྔ། གཙང་ནས་ལོ་སྟོན་རྡོ་རྗེ་དབང་ཕྱུག ཤེས་རབ་སེང་གེ། བོ་དོང་བ་ ཨུ་པ་དེ་དཀར་བ། མངའ་རིས་པ་འོ་བརྒྱད་སྤུན་གཉིས་དང་ལྔའོ།) ཡི་ནང་ཚན་ཀླུ་མེས་ཀྱིས་ཀ་ཆུང་ལྷ་ཁང་བཟུང་། དབུས་སྟོད་ལ་མོར་ཆག་དེའུ་ལྷ་ཁང་བཏབ། དེའི་སློབ་མ་ཞང་སྣ་ནམ་རྡོ་རྗེ་དབང་ཕྱུག་གིས་འཕན་པོ་རྒྱལ་ལྷ་ཁང་ བཞེངས། རྡོག་བྱང་ཆུབ་འབྱུང་གནས་ཀྱིས་ཡེར་པའི་ལྷ་ཁང་ བཞེངས། གླན་ཡེ་ཤེས་ཤེས་རབ་ཀྱིས་རྒྱ་གསར་སྒང་གི་ལྷ་ཁང་བཞེངས། དེ་བཞི་པོ་དེ་ལ་ཀླུ་མེས་ཀྱི་སློབ་མ་ཀ་བ་བཞི་ཟེར་རོ། ཁོང་རྣམ་པས་སྔ་རྗེས་སུ་ལྷ་ཁང་བཞེངས་ ཏེ་གནས་གཞི་བཟུང་བས་འདུལ་བ་སྨད་འདུལ་གྱི་ལུགས་ རབ་བྱུང་གི་སྡེ་སླར་ཚུགས་སོ། མདོར་ན། རྒྱལ་པོ་གླང་དར་མས་བསྟན་པ་བསྣུབས་རྗེས་སླར་ཡང་བསྟན་པའི་མེ་རོ་སྟོད་སྨད་གཉིས་ལས་ལངས་ཏེ་རིམ་བཞིན་དབུས་སུ་གསོས་ ཏེ་གཞི་ནང་པ་སངས་རྒྱས་པའི་ཆོས་ལུགས་ཡིན་པ་ལ་ཆོས་རྒྱུད་ཀྱི་ལྟ་གྲུབ་ཐུན་མོང་མ་ཡིན་པའི་ གྲུབ་མཐའ་སོ་སོར་བྱུང་བ་རྣམས་ཀྱིས་ཀྱང་རང་རང་གི་རྟེན་གཞི་བཙུགས་ཏེ་ཡུལ་དང་གནས་ཀྱི་མིང་དང་སྦྱར་བའི་ཆོས་ལུགས་ཀྱི་ཚོ་པ་མང་དུ་གྱེས་སོ། །

གྲུབ་མཐའ་ཞེས་པ་ནི་རང་གི་བློ་ངོར་ལུང་རིགས་ཀྱིས་བསྒྲུབས་ནས་གྲུབ་པར་ཐག་བཅད་པའི་ལྟ་ཚུལ་ལམ་རིགས་པའི་གཞུང་ལུགས་ཤིག་ལ་བྱ་ཞིང་། སྤྱིར་ནང་པའི་གྲུབ་མཐའ་སྨྲ་བ་ནི་བཀའ་བསྡུ་བ་གསུམ་ནས་བཟུང་འགྲེལ་བྱེད་རྣམས་ཀྱིས་ འཁོར་ལོ་གསུམ་གྱི་དགོངས་པ་སོ་སོར་བཀྲལ་བ་ལ་བརྟེན་ནས་བྱེ་མདོ་གཉིས་དང་། དབུ་སེམས་གཉིས་དང་བཅས་བཞིར་གྲངས་ངེས་པའོ། ཞེས་གྲགས་ལ། ད་ནི་བྱེ་བྲག་ བརྗོད་པར་བྱ་བའི་གཞི་སྟེ་བོད་ཀྱི་གྲུབ་མཐའ་སོ་སོའི་མིང་བྱུང་ཚུལ་མདོ་ཙམ་བརྗོད་པར་བྱའོ། །