གསལ་བཤད། འབའ་རོམ་ཆོས་འབྱུང་གསལ་བྱེད་སྒྲོན་མེ་ནི། ཚངས་གསར་འཇམ་དབྱངས་བློ་གྲོས་ཀྱི་དུས་རབས་ཉི་ཤུ་པའི་སྨད་ལ་བརྩམས་ཤིང་། དེའི་ནང་དུ་བཀའ་རྒྱུད་སྤྱིའི་ལོ་རྒྱུས་དང་། སྒྲུབ་བརྒྱུད་འབའ་རོམ་པ་རང་གི་ཆོས་འབྱུང་། དོན་རྒྱུད་བྱེ་བྲག་ཏུ་གྱུར་པའི་གསེར་ཕྲེང་གི་ཟུར་རྒྱན་པ་ལས་དགོན་རི་ཁག་བཅོ་བརྒྱད་སོགས་བཤད་པ་དང་། ད་དུང་སྒོམ་སྡེ་ནང་ཆེན་པའི་ལོ་རྒྱུས་དང་། སྐུ་འབུམ་གྱི་ལོ་རྒྱུས། ཚངས་གསར་པའི་ལོ་རྒྱས་བཅས་ཡོད་ལ་ཆོས་འབྱུང་འདི་ནི་ཆང་ཚང་བ་ཞིག་གོ། ༢༠༠༥ལོར་མཚོ་སྔོན་མི་རིགས་དཔེ་སྐྲུན་ཁང་ནས་དཔར་དུ་སྐྲུན།

                             དཔལ་ལྡན་འབའ་རོམ་བཀའ་བརྒྱུད་ཀྱི་རྣམ་ཐར་ཆོས་འབྱུང་མདོར་བསྡུས་གསལ་བྱེད་སྒྲོན་མེ་ཞེས་བྱ་བ་བཞུགས་སོ།།

༄༅། །ན་མོ་གུ་ར་ཝེ། །དག་པ་གཉིས་ལྡན་ཆོས་སྐུའི་ཀློང་ཡངས་པར། །ངེས་པ་ལྔ་ལྡན་ལོངས་སྐུའི་དཀྱིལ་འཁོར་རྒྱས། །རྣམ་གསུམ་སྤྲུལ་སྐུའི་འདུལ་བཞིའི་འོད་འབུམ་འཕྲོ། །སྐུ་གསུམ་དབྱེར་མེད་དཔལ་ལྡན་བླ་མར་འདུད། །བཀའ་བརྒྱུད་མཁྱེན་གཉིས་རི་དབང་ལྷུན་མཐོ་ཞིང༌། །སྒྲུབ་བརྒྱུད་ལུང་རིགས་བ་དན་ཕྱོགས་བཅུར་གཡོ། །དོན་བརྒྱུད་གྲུབ་བརྙེས་བང་རིམ་རབ་མཛེས་པའི། །འབའ་རོམ་གསེར་རིའི་ཕྲེང་བར་གུས་ཕྱག་བཏུད། །གང་གི་ཡོན་ཏན་ཕ་མཐའ་མི་མངོན་ཞིང༌། །རྣམ་ཐར་རྒྱ་མཚོས་ཞིང་ཀུན་ཡོངས་ཁྱབ་པར། །བློ་གྲོས་ཆོས་སྤྱན་ཡངས་པས་མ་འཚལ་ན། །རྨོངས་པ་བདག་ལྟས་མཚོན་པར་ག་ལ་ནུས། །འོན་ཀྱང་གོང་མའི་གསུང་སྒྲོས་ལ་བརྟེན་ཏེ། །རྒྱ་མཚོ་ལས་ནི་ཆུ་ཐིགས་ཇི་བཞིན་དུ། །རང་བློར་དཔག་པའི་ལོ་རྒྱུས་མདོ་ཙམ་ཞིག །བརྗོད་པར་སྤྲོ་ལ་གནང་བའི་སྐབས་དབྱེ་གསོལ། །དེ་ལ་འདིར་དད་པ་ཅན་ལོ་རྒྱུས་ཀྱི་རྗེས་སུ་འབྲང་བ་དང༌། །བརྩོན་འགྲུས་ཅན་ཆོས་ཀྱི་རྗེས་སུ་འབྲང་བ་གཉིས་ལས། །སྐབས་འདིར་ནི་ཁུངས་བཙུན་ཞིང་ཡིད་ཆེས་པའི་ཕྱིར་དུ་བླ་མ་བརྒྱུད་པའི་ལོ་རྒྱུས་གལ་ཆེ་བ་ཡིན། །དེ་ལའང་བླ་མ་བརྒྱུད་པའི་རྩ་བ་ཅན་ཞེས་རྡོ་རྗེ་འཆང་ནས་རང་གི་རྩ་བའི་བླ་མའི་བར་དུ་བྱིན་རླབས་ཀྱི་དྲོད་ཚད་མ་ཉམས་ཤིང་བརྒྱུད་པ་བར་མ་ཆད་པ་ཞིག་དགོས་ཤིང༌། གསང་བ་ཟབ་མོའི་ལམ་མཆོག་རྡོ་རྗེ་ཐེག་པའི་སྨིན་གྲོལ་དང༌། རིམ་གཉིས་ཀྱི་རྣལ་འབྱོར་ཉམས་སུ་བླངས་པས། ཕྱག་རྒྱ་ཆེན་པོ་མཆོག་གི་དངོས་གྲུབ་བདེ་བླག་ཏུ་བརྙེས་ཏེ་རང་གཞན་གཉིས་ཀྱི་དོན་ཆེན་འབད་མེད་དུ་གྲུབ་པ་ཤ་སྟག་ནི་མཉམ་མེད་དྭགས་པོའི་བཀའ་བརྒྱུད་ཅེས་ཡོངས་སུ་གྲགས་པ་འདི་ཉིད་ཡིན་ལ། དེ་ལའང་བཀའ་བརྒྱུད་ཆེ་བཞི་ཆུང་བརྒྱད་དུ་གྲགས་པའི་སོ་སོའི་བརྒྱུད་པའི་ལོ་རྒྱུས་བསམ་གྱིས་མི་ཁྱབ་པ་ཇི་སྙེད་ཅིག་མཆིས་པ་ལས། །ཁྱད་པར་དུ་གྱུར་པ་བཀའ་བརྒྱུད་ཆེ་བཞིའི་ཡ་གྱལ་དཔལ་ལྡན་འབའ་རོམ་བརྒྱུད་པའི་ལོ་རྒྱུས་བསྡུས་ཏེ་འཆད་པ་འདི་ལ་སྤྱི་དོན་རྣམ་པ་གསུམ། བཀའ་བརྒྱུད་སྤྱི་དང་མཐུན་པའི་རྣམ་ཐར་གྱིས་ཁོག་དབུབ། སྒྲུབ་བརྒྱུད་རང་དང་མཐུན་པའི་ཆོས་འབྱུང་གིས་གཞུང་བསྲང༌། དོན་བརྒྱུད་བྱེ་བྲག་ཏུ་གྱུར་པའི་གསེར་ཕྲེང་གིས་ཟུར་བརྒྱན་པའོ། །དང་པོ་སྟོན་པ་མཆོག་གི་རྟོགས་བརྗོད་ལ་གཉིས། ཐེག་པ་ཆུང་ངུའི་ལུགས་དང༌། ཐེག་པ་ཆེན་པོའི་ལུགས་སོ། །དང་པོ་ནི། སློབ་དཔོན་འཕགས་པ་ཀླུ་སྒྲུབ་ཀྱིས། དང་པོ་བྱང་ཆུབ་མཆོག་ཏུ་སེམས་བསྐྱེད་དེ། བསྐལ་པ་གྲངས་མེད་གསུམ་དུ་ཚོགས་བསགས་ཤིང༌། བར་དུ་གཅོད་པའི་བདུད་བཞི་འཇོམས་མཛད་པ། བཅོམ་ལྡན་སེང་གེ་ཁྱོད་ལ་ཕྱག་འཚལ་ལོ། །ཞེས་གསུངས་པ་འདི་ལ་གསུམ། དང་པོ་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་པ་གྲངས་མེད་གསུམ་དུ་ཚོགས་བསགས། མཐར་མངོན་པར་རྫོགས་པར་སངས་རྒྱས་པ་ཡིན་ཏེ། དེ་ཡང་དང་པོ་སེམས་བསྐྱེད་ཚུལ་ནི། སྔོན་བྱུང་བ་འདས་པའི་དུས་སུ་རྒྱལ་པོ་གསལ་གྲགས་ཞེས་བྱ་བ་གཅིག་བྱུང་ངོ༌། །དེས་སངས་རྒྱས་ཤཱཀྱ་ཐུབ་པ་ཆེན་པོའི་དྲུང་དུ་བསྙེན་བཀུར་ཞིང་སེམས་བསྐྱེད་པ་ནི། སྦྱིན་པ་འདི་ཡིས་ཤཱཀྱའི་རིགས་སྐྱེས་ནས། ཡོན་ཏན་མཉམ་པའི་སངས་རྒྱས་ཉིད་གྱུར་ཏེ། །ཚངས་པའི་བར་གྱི་ཉམ་ཐག་འཆིང་བ་རྣམས། ཞི་བ་རྒྱ་ཆེན་འཇིགས་མེད་སྒྲོལ་བར་ཤོག །ཅེས་དང༌། བསྐལ་བཟང་ལས་ཀྱང༌། ང་ནི་སྔོན་ཚེ་སྨན་པར་གྱུར་པའི་ཚེ། །དེ་བཞིན་གཤེགས་པ་ཤཱཀྱ་ཐུབ་དེ་ལ། །འཇམ་གང་ཞིག་ནི་དབུལ་བ་བྱས་ནས་ཀྱང༌། །དང་པོ་བྱང་ཆུབ་ཏུ་ནི་སེམས་བསྐྱེད་དོ། ཞེས་གསུངས་ཤིང༌། ཡང་རྫ་མཁན་གྱི་བུ་ཁྱེའུ་སྣང་བྱེད་དུ་གྱུར་པའི་ཚེ། དེ་བཞིན་གཤེགས་པ་ཤཱཀྱ་ཐུབ་པ་ཆེན་པོར་རྫ་མའི་བུམ་པ་གཅིག །མགྲོན་བུ་ལྔ། མཆིལ་ལྷམ་ཟུང་ཞིག །གདུགས་གཅིག་རྣམས་ཕུལ་ཏེ། དེ་བཞིན་གཤེགས་པ་ཁྱེད་སྐུ་ཅི་འདྲ་དང། །འཁོར་དང་སྐུ་ཚེའི་ཚད་དང་ཞིང་ཁམས་དང༌། །ཁྱེད་ཀྱི་མཚན་མཆོག་བཟང་པོ་ཅི་འདྲ་བ། །དེ་འདྲ་ཁོ་ན་བདག་ཀྱང་འགྱུར་བར་ཤོག །ཅེས་སྨོན་ལམ་བཏབ་སྟེ་སེམས་བསྐྱེད་དོ། །གཉིས་པ་བསྐལ་པ་གྲངས་མེད་གསུམ་དུ་ཚོགས་བསགས་ཚུལ་ནི། སངས་རྒྱས་ཤཱཀྱ་ཐུབ་པ་ནས། འདྲེན་པ་ཡུལ་འཁོར་སྐྱོང་གི་བར། བདུན་ཁྲི་ལྔ་སྟོང་ཚང་བ་ཡི། སངས་རྒྱས་རྣམས་ནི་ངས་མཆོད་དོ། །ཞེས་བསྐལ་པ་གྲངས་མེད་པར་ཚོགས་བསགས་པས་གྲངས་མེད་དང་པོ་རྫོགས། ཡང་ཇི་སྐད་དུ། སངས་རྒྱས་ལེགས་མཛད་ནས་བཟུང་སྟེ། །དབང་པོའི་རྒྱལ་མཚན་ཐུབ་པའི་བར། །བདུན་ཁྲི་དྲུག་སྟོང་ཚང་བ་ཡི། །སངས་རྒྱས་རྣམས་ནི་ངས་མཆོད་དོ། ཞེས་གྲངས་མེད་གཉིས་པ་རྫོགས་པར་མཛད། ཡང་སྔ་མ་ལས། སངས་རྒྱས་མར་མེ་མཛད་ནས་ནི། །སངས་རྒྱས་འོད་སྲུང་བར་དག་ཏུ། །བདུན་ཁྲི་བདུན་སྟོང་ཚང་བ་ཡི། །སངས་རྒྱས་རྣམས་ནི་ངས་མཆོད་དོ། །ཞེས་གྲངས་མེད་གསུམ་པ་རྫོགས་པར་མཛད་དོ། དེ་ཡང་འདི་ལ་བཞེད་དགོངས་མང་དུ་ཡོད་ཀྱང༌། བྱང་ཆུབ་སེམས་དཔའི་སྡེ་སྣོད་ལྟར་བཤད་པ་ནི། རྒྱལ་བའི་ཕོ་བྲང་རྣམ་པར་རྒྱལ་བའི་རྒྱལ་མཚན་དུ། རྒྱལ་པོ་རྣམ་པར་རྒྱལ་བའི་སྲས་གཞོན་ནུ་བརྩོན་འགྲུས་སྤྱོད་བྱ་བར་གྱུར་པའི་ཚེ། དེ་བཞིན་གཤེགས་པ་ཕུང་པོ་ཆེན་པོ་འཇིག་རྟེན་དུ་བྱོན་པ་ལ། །བསྙེན་བཀུར་ཞིང་དགེ་བའི་རྩ་བ་བསྐྲུན་པ་ནས་བརྩམ་སྟེ། བསྐལ་པ་གྲངས་མེད་གཅིག་ཏུ་ཚོགས་བསགས་པས་ས་དང་པོ་ཐོབ་པར་གྱུར། དེ་ནས་གྲོང་ཁྱེར་ཛམ་བུའི་ཆུ་བོའི་གསེར་དུ་རྒྱལ་པོ་མཛེས་པར་སྣང་བའི་གནས་ཆེན་པོ་དེར་ཚོང་དཔོན་ཤེས་རབ་བཟང་དུ་གྱུར་པའི་ཚེ། དེ་བཞིན་གཤེགས་པ་དཀོན་མཆོག་ཡན་ལག་འཇིག་རྟེན་དུ་བྱོན་པ་ལ་བསྙེན་བཀུར་ཞིང༌། རྗེས་སུ་བསྟན་པ་མནོས་ནས་བཟུང་སྟེ། གྲངས་མེད་པ་གཅིག་ཏུ་ཚོགས་བསགས་པས་ས་བདུན་པ་ནོན་པར་གྱུར། དེ་ནས་བྲམ་ཟེའི་ཁྱེའུ་སྤྲིན་ཞེས་བྱ་བར་གྱུར་པའི་ཚེ། དེ་བཞིན་གཤེགས་པ་མར་མེ་མཛད་འཇིག་རྟེན་དུ་བྱོན་པ་ལ་ཨུརྤལ་ལྔ་ཉོས་ནས་གཏོར་ཏེ། རལ་པ་གསེར་གྱི་མདོག་ཅན་གདན་དུ་བཏིང་ནས་ཡིད་དམ་བརྟན་པོར་བཅས་པ་ན། དེ་བཞིན་གཤེགས་པ་མར་མེ་མཛད་ཀྱིས། འདི་ནི་ལྷ་དང་བཅས་པའི་འཇིག་རྟེན་གྱི་མཆོད་གནས་ཡིན་ཏེ། མ་འོངས་པའི་དུས་སུ་ཤཱཀྱ་ཐུབ་ཅེས་བྱ་བའི་སངས་རྒྱས་སུ་འགྱུར་རོ། ཞེས་ལུང་བསྟན་པ་དང༌། དགའ་ཆེས་ཏེ་ཤིང་ཏཱ་ལ་བདུན་སྲིད་དུ་འཕགས་ནས་ཏིང་ངེ་འཛིན་བརྒྱ་སྟོང་ཡང་མངོན་སུམ་དུ་བྱས་ཤིང་ས་བརྒྱད་པ་ཐོབ་སྟེ། ཇི་སྐད་དུ། སངས་རྒྱས་མར་མེ་མཛད་ལ་ཨུཏྤལ་ལྔ་གཏོར་ཏེ། །རལ་པ་གསེར་མདོག་གདན་དུ་བཏིང་བྱས་པས། །མི་སྐྱེའི་ཆོས་ལ་བཟོད་པ་ཐོབ་གྱུར་ནས། །ཤཱཀྱའི་རྒྱལ་པོར་འགྱུར་ཞེས་ལུང་བསྟན་ཏོ། ཞེས་གསུངས་སོ། །གསུམ་པ་མངོན་པར་རྫོགས་པར་སངས་རྒྱས་པའི་ཚུལ་ནི། སངས་རྒྱས་ཀྱི་ངོ་བོ་ངོས་བཟུང་བ་སྟེ། སངས་རྒྱས་ཀྱི་ངོ་བོ་དེ་རྟེན་སྐུ་བརྟེན་པ་ཡེ་ཤེས་མཛད་པ་ཕྲིན་ལས་གསུམ་དུ་འཆད་པ་དང༌། སྐུ་གསུང་ཐུགས་ཀྱི་ཡོན་ཏན་ཕྲིན་ལས་ལྔར་འཆད་པ་དང༌། སྤང་རྟོགས་ཕྲིན་ལས་གསུམ་དུ་འཆད་པ། ཕུན་སུམ་ཚོགས་པ་ལ་གཉིས་སམ་གསུམ་དུ་འཆད་པ་ལ་སོགས་པ་བཤད་ཚུལ་མང་དུ་ཡོད་ཀྱང་ངོས་འཛིན་ལུགས་ཀྱི་རྣམ་དབྱེ་ཡིན་ཏེ། ཐམས་ཅད་སངས་རྒྱས་པའི་ཆོས་ལ་འདུས་པས་དོན་ལ་མི་གཅིག་པ་མེད། དེ་ཡང་སངས་རྒྱས་ཞེས་པ་ནི། སྤང་བྱ་ཉོན་མོངས་པ་ཐམས་ཅད་སྤང་ཞིང༌། རྟོགས་བྱ་ཤེས་བྱ་ཐམས་ཅད་ལ་བློ་རྒྱས་པའི་ཕྱིར་སྤངས་རྟོགས་མཐར་ཐུག་པ་ཡིན་ཏེ། དེ་སྐད་དུ་ཡང་སློབ་དཔོན་ཟླ་བ་གྲགས་པས། ཉོན་མོངས་མ་ལུས་སྤང་ཕྱིར་དང༌། ཤེས་བྱ་ལ་ཡང་བློ་རྒྱས་ཕྱིར། སངས་རྒྱས་པདྨ་ལྟར་སངས་རྒྱས། དེ་ཕྱིར་སངས་རྒྱས་དེ་སངས་རྒྱས། ཞེས་གསུངས་སོ། །དེ་ལྟར་སངས་རྒྱས་དེ་ཡང་སྐུ་གཉིས་དང་ སྐུ་གསུམ་དང༌། སྐུ་བཞི་དང༌། སྐུ་ལྔ་ལ་སོགས་རྣམ་དབྱེ་མང་དུ་ཡོད་ཀྱང༌། སྐུ་གསུམ་ལ་འདུས་པ་ཡིན། དེ་ཡང་ཆོས་སྐུ་ནི་དེ་ཁོ་ན་ཉིད་ཡང་དག་པའི་ཡེ་ཤེས་ཉིད་ཙམ་དུ་གནས་པ་དེ་ནི་ཆོས་ཀྱི་སྐུ་ཞེས་གསུངས་ལ། ལོངས་སྤྱོད་རྫོགས་པའི་སྐུ་ནི་ལངྐར་གཤེགས་པ་ལས། འོག་མིན་གནས་ནི་ཉམས་དགའ་བར། གཙང་མའི་གནས་ཀྱི་སྟེང་བཞུགས་ནས། ཡང་དག་སངས་རྒྱས་དེར་སངས་རྒྱས། སྤྲུལ་པ་པོ་གཅིག་དེར་སངས་རྒྱས། ཞེས་དང། རྒྱན་སྟུག་པོ་བཀོད་པའི་མདོ་ལས། སངས་རྒྱས་ཐམས་ཅད་འོག་མིན་དུ། སངས་རྒྱས་མ་གྱུར་འདོད་ཁམས་སུ། སངས་རྒྱས་མཛད་པ་མི་མཛད་དོ། ཞེས་ངེས་པ་ལྔ་ལྡན་གྱི་ཚུལ་དུ་སངས་རྒྱས་པར་མཛད། སྤྲུལ་པའི་སྐུ་ནི། བཟོ་དང་སྐྱེ་དང་བྱང་ཆུབ་ཆེ། མྱ་ངན་འདས་པ་རྟག་སྟོན་པ། སངས་རྒྱས་སྤྲུལ་པའི་སྐུ་དེ་ནི། རྣམ་པར་གྲོལ་བའི་ཐབས་ཆེན་པོ། ཞེས་པས་དང་པོ་ནི་བཟོའི་སྤྲུལ་པ་དང༌། གཉིས་པ་ནི་བྱ་ལ་སོགས་སྐྱེ་བའི་སྤྲུལ་པ་དང༌། གསུམ་པ་ནི་ཤཱཀྱ་ཐུབ་པ་ལྟ་བུ་མཆོག་གི་སྤྲུལ་པ་སྟེ། དེ་ནས་མཛད་པ་བཅུ་གཉིས་ཀྱི་ཚུལ་དུ་བསྟན་པ་ཡིན་ཏེ། འཕོ་དང་ལྷུམ་ཞུགས་བལྟམས་པ་དང༌། བཟོ་དང་རོལ་རྩེད་ངེས་འབྱུང་དང༌། བཀའ་སྤྱད་དྲུང་གཤེགས་བདུད་སྡེ་བཅོམ། བྱང་ཆུབ་ཆོས་འཁོར་མྱ་ངན་འདས། ཞེས་པའི་མཛད་པ་བཅུ་གཉིས་འདི་དག་ཐུགས་རྗེ་ཆེན་པོའི་ལོངས་སྐུའི་སྤྲུལ་པ་ཙམ་དུ་བཞེད་པ་ཡིན་ནོ། དེའང་སྤྱི་ལོ་སྔོན ༩༥༧ ཤིང་བྱི་ས་ག་ཉ་བའི་ཚེས་བརྒྱད་ལ་སྟོན་པ་སྐུ་བལྟམས་ སྤྱི་ལོ་སྔོན་ ༨༧༨ ཆུ་ལུག་ནག་ཉར་དུས་འཁོར་གསུངས་ནས་ས་གའི་ཉ་ལ་རྩ་ཅན་གྲོང་དུ་སྐུ་མྱ་ངན་ལས་འདས་པའོ། མཆན། གཉིས་པ་གསང་སྔགས་རྡོ་རྗེ་ཐེག་པའི་ལུགས་ནི། དེ་ཡང་འོ་སྐོལ་གྱི་སྟོན་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འདི་ནི་ཡང་དག་པར། སྐྱེ་རྒུ་བླང་དོར་གྱི་གནས་ལ་མ་རྨོངས་པ། མཐའ་ཡས་པའི་དོན་དུ་ཐུགས་བརྩེ་བ་ཆེན་པོའི་སྒོ་ནས། དང་པོར་བྱང་ཆུབ་མཆོག་ཏུ་ཐུགས་བསྐྱེད། དེ་ནས་བརྩོན་འགྲུས་རླབས་པོ་ཆེའི་ཤུགས་ཀྱིས་བསོད་ནམས་དང་ཡེ་ཤེས་ཀྱི་ཚོགས་རྒྱ་མཚོ་ལྟ་བུ་ཟུང་འཇུག་ཏུ་བསགས་ཤིང༌། ཁྱད་པར་དུ་ཡང་གསང་སྔགས་རྡོ་རྗེ་ཐེག་པའི་མྱུར་ལམ་རིམ་གཉིས་ཟབ་མོའི་སྒོ་ནས་བདེ་སྟོང་ལྷན་ཅིག་སྐྱེས་པའི་ཡེ་ཤེས་མངོན་དུ་མཛད་ནས་ མཐར་འོག་མིན་སྟུག་པོ་བཀོད་པའི་ཞིང་དུ། སྐུ་བཞི་ཡེ་ཤེས་ལྔའི་བདག་ཉིད་རིགས་དྲུག་པ་རྡོ་རྗེ་འཆང་ཆེན་པོར་སངས་རྒྱས་པའི་ཚུལ་བསྟན་པ་ཡིན་ཞིང༌། དེར་ཡང་སངས་རྒྱས་ཐམས་ཅད་ནི་རྟེན་སྐུ་ བརྟེན་པ་ཡེ་ཤེས། མཛད་པ་ཕྲིན་ལས་དང་གསུམ་དུ་འདུས་པ་ཡིན་ཅིང། དེའི་དང་པོ་ནི་ཆོས་སྐུ། ལོངས་སྐུ་ སྤྲུལ་སྐུ་གསུམ་མམ། ངོ་བོ་ཉིད་ཀྱི་སྐུ་དང་བཞིའོ། །དེ་ཡང་དང་པོ་ཆོས་ཀྱི་སྐུ་ནི་དག་པ་གཉིས་དང་ལྡན་པ་སྟེ། རང་བཞིན་གྱིས་དག་པ་དང༌། ཡུལ་གྱི་དག་པ་སྟེ། གཞིའི་ཆོས་ཉིད་སྐྱེ་འགགས་གནས་གསུམ་སྤྲོས་པའི་མཐའ་ཐམས་ཅད་དང་བྲལ་བར་གནས་པ་དེ་ཉིད་རང་བཞིན་གྱི་སྐུའམ་འདུས་མ་བྱས་ཀྱི་ཆོས་ཀྱི་སྐུ་ཡིན་པ་ལ། སྦྱངས་པས་དག་པའང༌། ཡུལ་ཅན་གྱིས་དག་པ་ནི་ལམ་བསྒོམ་པས། སྒྲིབ་པ་ཐམས་ཅད་དག་ནས་གནས་ལུགས་ཀྱི་དོན་ཇི་ལྟ་བ་བཞིན་རྟོགས་པ་དེ་ནི་ཡེ་ཤེས་ཆོས་ཀྱི་སྐུའོ། དེ་ལྟ་བུའི་དག་པ་གཉིས་ལྡན་གྱི་ཆོས་སྐུ་དེའི་རྟེན་པ་ལོངས་སྤྱོད་རྫོགས་པའི་སྐུ་ནི་ཡན་ལག་བདུན་ལྡན་པ་སྟེ། རྡོ་རྗེ་འཆང་ཆེན་པོ་མཚན་དང་དཔེ་བྱད་ཀྱིས་བརྒྱན་པ་ནི་ལོངས་སྤྱོད་རྫོགས་པའི་སྐུ་དང༌། ཐབས་ཤེས་སམ་བདེ་སྟོང་ཟུང་འཇུག་པའི་བརྡར་རང་འོད་ཀྱི་ཡུམ་དང་བཅས་པ་ཁ་སྦྱོར་གྱི་སྐུ་དང༌། དེའི་ཐུགས་མཆོག་ཏུ་མི་འགྱུར་བའི་བདེ་བ་ཆེན་པོའི་ཡེ་ཤེས་ནི་བདེ་ཆེན་དང༌། དེ་ལྟ་བུའི་སྐུ་དང་ཡེ་ཤེས་ཀྱི་ངོ་བོ་ནི་ཅིར་ཡང་མ་གྲུབ་པར་གནས་པས་རང་བཞིན་མེད་པ་དང༌། སེམས་ཅན་ཐམས་ཅད་ལ་དམིགས་པ་མེད་པའི་སྙིང་རྗེ་ཆེན་པོ་ཕུལ་དུ་ཕྱིན་པ་མངའ་བས་སྙིང་རྗེས་གང་བ་དང༌། དེ་ལྟར་བདེ་སྟོང་གཉིས་སུ་མེད་པའི་ཡེ་ཤེས་ཕུན་སུམ་ཚོགས་པ་དང་ལྡན་པའི་ལོངས་སྐུའི་དེ་ཉིད་ནམ་མཁའ་ཇི་སྲིད་བར་གནས་པས་རྒྱུན་མི་འཆད་པ་དང༌། དམིགས་པ་མེད་པའི་ཐུགས་དང༌།བྱང་ཆུབ་ཀྱི་སེམས་དང༌། སྨོན་ལམ་གྱི་མཐུ་དེ་དག་ཕུན་སུམ་ཚོགས་པས་འགལ་བའི་རྐྱེན་གང་གིས་ཀྱང་གཅོད་པར་མི་ནུས་ཤིང༌། གནས་སྐབས་སུ་ཡང་རིགས་འདྲས་མི་འགགས་པས་འགོགས་པ་མེད་དེ། །དེ་སྐད་དུ་ཡང་སློབ་དཔོན་ངག་གི་དབང་ཕྱུག་གྲགས་པས། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་འཆད་དང་འགོགས་པ་མེད། །ཡན་ལག་བདུན་བཤད་དོན་དང་ལྡན་པ་བསྒྲུབ་བྱ་འདི། །བདག་འདོད་ཚད་མས་ཡོངས་བསྒོས་བློ་ཅན་གྱིས་ཀྱང་བསྔགས། ཞེས་གསུངས་སོ། །དེ་ཡང་ངེས་པ་ལྔ་དང་ལྡན་པ་ནི། གནས་ངེས་པ་འོག་མིན་སྟུག་པོ་བཀོད་པའི་ཞིང་ཁམས་དང༌། ངོ་བོ་ངེས་པ་ནི་ལོངས་སྤྱོད་རྫོགགས་པའི་སྐུ། ཆོས་ངེས་པ་ནི་ཐེག་པ་ཆེན་པོའི་ཆོས་ལ་ལོངས་སྤྱོད་ཅིང༌། འཁོར་ངེས་པ་ནི་ས་བཅུའི་བྱང་ཆུབ་སེམས་དཔའ་རྣམས་ཡིན་ལ། དུས་ངེས་པ་ནི་ཇི་སྲིད་འཁོར་བ་མ་སྟོང་གི་བར་དུ་བཞུགས་པ་ཡིན་ནོ། །དེ་ལྟར་རྒྱུའི་ཧེ་རུ་ཀ་སངས་རྒྱས་དྲུག་པ་རྡོ་རྗེ་འཆང་ཆེན་པོ་ཆོས་ཀྱི་སྐུ་དབྱིངས་དང་ཡེ་ཤེས་དབྱེར་མེད་ཀྱི་ངང་ལས་གསང་བ་མཆོག་གི་གནས་འོག་མིན་གྱི་ཕོ་བྲང་དུ་འཁོར་དེ་བཞིན་གཤེགས་པ་དང༌། བྱང་ཆུབ་སེམས་དཔའ་ཚད་མེད་པ་འདུས་པ་ལ། འོད་གསལ་ལྷན་ཅིག་སྐྱེས་པའི་ཆོས་བསྟན་པའི་ཚེ། དྲག་པོ་འཇིགས་བྱེད་འཁོར་དང་བཅས་པ་འདུལ་བའི་དུས་ལ་བབས་པར་མཁྱེན་ནས། སྤྲུལ་སྐུའི་འབྲས་བུའི་ཧེ་རུ་ཀར་བཞེངས་ནས་རི་རབ་ཀྱི་རྩེ་མོར་བྱོན་པ་ལས་མི་བསྐྱོད་པས་གཞལ་ཡས་ཁང་གདན་དང་བཅས་པ་ཕུལ། རིན་འབྱུང་གིས་འཇམ་དཔལ་ལ་སོགས་པའི་དཔའ་བོ་ཉི་ཤུ་རྩ་བཞི་དང༌། རྡོ་རྗེའི་ཕོ་ཉ་མོ་ལ་སོགས་པ་དཔའ་མོ་ཉི་ཤུ་རྩ་བཞིར་སྤྲུལ་ཏེ་ཕུལ། སྣང་བ་མཐའ་ཡས་ཀྱིས་ལྷ་མོ་བཅུ་གཉིས་སྤྲུལ་ཏེ་ཕུལ། དོན་ཡོད་གྲུབ་པས་གོ་ཆའི་ལྷ་བཅུ་གཉིས་སྤྲུལ་ཏེ་ཕུལ། རྣམ་སྣང་གིས་ཕུང་ཁམས་སྐྱེ་མཆེད་བྱིན་གྱིས་རློབས་པའི་ལྷ་རྣམས་ཕུལ། སྤྲུལ་པའི་འཁོར་རྣམས་ལ་ཡང་སྤྲུལ་དང་ཉིང་སྤྲུལ་གྱི་ཚོགས་བསམ་གྱིས་མི་ཁྱབ་པ་དང་བཅས་ཏེ་དེ་རྣམས་ནི་ཉན་པའི་འཁོར་རོ། །དེ་དག་གི་འདུལ་བའི་ལྷ་དབང་ཕྱུག་ཆེན་པོ་ལ་སྐུ་བཞི་ཡོད་པའི་མངོན་སྤྱོད་ཀྱི་དྲག་པོ་འཇིགས་བྱེད་ནག་པོའི་ཆུང་མ་དུས་མཚན་མ་དང་སྙོམས་པར་འཇུག་པ། འཛམ་བུ་གླིང་གི་དབུས་མ་གྷ་ཏ་ན་གནས་པའོ། །དེའི་ཚེ་ནམ་མཁའ་ནས་ལྷ་བཞི་དང༌། དྲི་ཟ་བཞི་དང༌། ས་སྟེང་ནས་གནོད་སྦྱིན་བཞི་དང་སྲིན་པོ་བཞི། ས་འོག་ནས་ཀླུ་བཞི་དང་ལྷ་མ་ཡིན་བཞི་རིམ་པ་ལྟར་བྱུང་ནས། པུ་ལི་ར་མ་ལ་སོགས་པའི་ཡུལ་ཉི་ཤུ་རྩ་བཞི་བཟུང༌། མིའམ་ཅི་བཞི་དང༌། ཕྲ་མན་མ་བཞིའམ། མ་མོ་བཞི་སྟེ་བརྒྱད་ཀྱིས་གཏུམ་དྲག་ལ་སོགས་པའི་དུར་ཁྲོད་ཆེན་པོ་བརྒྱད་བཟུང་ངོ༌། །ཐམས་ཅད་ཀྱང་སྲིད་པ་གསུམ་ལ་དབང་དུ་བྱ་བའི་བདག་པོ་འདོད་པའི་ལྷ་དབང་ཕྱུག་ཆེན་པོ་སྤྱན་དྲངས་ཏེ་མཆོད་པ་བྱེད་པ་ལ། དབང་ཕྱུག་ཆེན་པོ་ཨུ་མ་དང་འཁྱུད་ཅིང་རོལ་པས་འགྲོར་མི་ཁོམས་ཏེ། དེའི་སྤྲུལ་པ་རྡོའི་ལིང་ག་མགོ་ལྟ་ལ་སོགས་པ་ཉི་ཤུ་རྩ་བཞིར་སྤྲུལནས། ཡུལ་རེ་རེར་རྟེན་རེ་རེ་བཞག་གོ །དེ་རྣམས་ཀྱང་རྟེན་ལ་དམིགས་ནས་མཆོད་ཅིང་ཚོགས་འཁོར་བྱེད་དོ། །ལྷ་དེ་རྣམས་ཀྱང་འདོད་ཆགས་ཤས་ཆེ་བས་སྤྱོད་ལམ་དུས་བཞིར་ཆུང་མ་དང་འཁྱུད། ཞེ་སྡང་ཤས་ཆེ་བས་མི་མང་པོ་བསད་ནས་མི་ཤ་དང་མི་ཁྲག་ལ་རོལ། གཏི་མུག་ཤས་ཆེ་བས་ལས་རྒྱུ་འབྲས་དང་དེ་ཁོ་ནའི་དོན་ལ་རྨོངས། དེ་རེ་རེ་འང་འཁོར་གདུག་པ་ཅན་མང་པོས་ནི་བསྐོར། འདོད་ཡོན་ལྔ་ནི་རང་གར་སྤྱོད། འཛམ་བུ་གླིང་ཐམས་ཅད་དབང་དུ་བསྡུས་ནས་དྲེགས་པའི་རློམ་ཚིག་སྨྲ་ཞིང༌། ལམ་ལོག་པ་ལ་རང་ཡང་ཞུགས་ནས་གཞན་ཡང་འགོད་པར་བྱེད་དོ། །དེའི་ཚེ་སྤྲུལ་སྐུའི་འབྲས་བུའི་ཧེ་རུ་ཀ་བཅོམ་ལྡན་འདས་འཁོར་ལོ་བདེ་མཆོག་ཞལ་བཞི་ཕྱག་བཅུ་གཉིས་པ་འཁོར་དང་བཅས་པ་རི་རབ་ཀྱི་རྩེ་མོ་ནས་འཛམ་བུའི་གླིང་ཡུལ་མ་གྷ་ཏར་བྱོན། དྲག་པོ་འཇིགས་བྱེད་འཁོར་དང་བཅས་པ་རྣམས་དབང་དུ་བྱེད་པ་དང༌། ལོངས་སྤྱོད་པ་དང༌། ཐིམ་པའི་ཚུལ་གསུམ་གྱིས་བཏུལ་ཏེ། ཁོའི་ལུས་ངག་ཡིད་གསུམ་དབང་དུ་བསྡུས་ནས། འཇིགས་བྱེད་དུས་མཚན་ཞབས་འོག་ཏུ་མནན། འཇིག་རྟེན་པའི་པྲ་ཀ་ར་སོགས་འདས་པའི་ཨོཾ་ཧཱུྃ་ཧཱུྃ་ཕཊ་ཀྱིས་བར་དུ་བཅུག་ནས་སྔགས་སུ་བྱིན་གྱིས་བརླབས། སེམས་བརྒྱལ་བར་བྱས་ཤིང་གཟུང་འཛིན་གྱི་རྟོག་པ་རྒྱུན་བཅད་དེ། ཡེ་ཤེས་ཆེན་པོས་བྱིན་གྱིས་བརླབས་ནས་ཟག་པ་མེད་པའི་བདེ་བ་ལ་བཀོད་པས་འཇིགས་བྱེད་ས་འོག་ཏུ་མངོན་པར་རྫོགས་པར་སངས་རྒྱས། འཁོར་རྣམས་དལ་གྱིས་འཁོར་ལོར་བཀོད་ནས། མཛད་པ་མ་བསྡུས་པར་འཛམ་བུའི་གླིང་དུ་དངོས་སུ་བཞུགས་པ་ཡིན་ཏེ། རྡོ་རྗེ་གདན་དུ་འཁོར་ལོ་ཆེན་པོ་བསྐོར་བ་དང༌། ཡུལ་ཉི་ཤུ་རྩ་བཞི་ན་ཐུགས་གསུང་སྐུའི་འཁོར་ལོ་གསུམ་དང༌། ཡུལ་མཐའི་དུར་ཁྲོད་བརྒྱད་དུ་དམ་ཚིག་གི་འཁོར་ལོའོ། །དེ་ལྟར་སངས་རྒྱས་པའི་གནས་འོག་མིན་ལ་སྤྲུལ་ཞིང་རྒྱུད་བཤད་པའི་གནས་རི་རབ་ཀྱི་རྩེ། གདུལ་བྱ་བཏུལ་བའི་གནས་འཛམ་བུའི་གླིང་དུ་གདུལ་བྱའི་འཁོར་དྲག་པོ་འཇིགས་བྱེད་འཁོར་བཅས་དལ་ལ་བཀོད་པའི་འཁོར་ལོ་ལྔའི་ལྷ་ཚོགས། ཉན་པའི་འཁོར་སངས་རྒྱས་བྱང་སེམས་རི་རབ་ཀྱི་རྡུལ་དང་མཉམ་པ་དང༌། སྐལ་པ་དང་ལྡན་པའི་ལྷ་མི་སོགས། ཞུ་བ་པོའི་འཁོར་ཕག་མོའམ་ཕྱག་རྡོར། སྡུད་པ་པོའི་འཁོར་ཡང་དེ་ཉིད་ཡིན་ལ། ཆོས་བདག་པོས་རྩ་རྒྱུད་བཤད་རྒྱུད་ལ་སོགས་རྣམས་གསུངས་ཏེ། དེ་ཡང་ཆོས་གཞན་རྣམས་བསྐལ་པ་འཇིགས་ཆགས་དབང་གིས་ནུབ་ཀྱང༌། བདེ་མཆོག་ཡུལ་ཉི་ཤུ་རྩ་བཞི་ན་གནས་པའི་དཔའ་བོ་དང༌། དཔའ་མོས་ཉམས་སུ་བླངས་ཏེ་གནས་པའི་ཕྱིར་ཉམས་མི་ནུས་པས། ཐུབ་པ་ཟས་གཙང་གི་སྲས་སུ་གྱུར་པས་བསྐྱར་ནས་གསུང་པ་མེད་ལ། ཕྱིན་ཆད་ཀྱང་མི་ནུབ་པར་གསུངས་ཤིང༌། ཁྱད་པར་དུ་ཡང་ནུབ་ཕྱོགས་ཨོ་རྒྱན་ཡུལ་དུ། ཕོ་ཐམས་ཅད་དཔའ་བོ་དང་མོ་ཐམས་ཅད་དཔའ་མོར་གནས་པའི་ས་ཕྱོགས་དེར་ཧེ་རུ་ཀ་རང་བྱུང་གི་ཕོ་བྲང་དྷཱརྨ་གྷ་ཛ་ཆོས་ཀྱི་དཀོར་མཛོད་བྱ་བ། འོབས་དང་ལྕགས་རི་ལ་སོགས་བསམ་གྱིས་མི་ཁྱབ་པས་བསྐོར་ཞིང༌། གང་ཟག་ཕལ་གྱིས་བགྲོད་པར་དཀའ་བའི་གནས་དེ་ཉིད་དུ། དུས་གསུམ་གྱི་སངས་རྒྱས་ཐམས་ཅད་ཀྱི་ཡུམ་རྡོ་རྗེ་རྣལ་འབྱོར་མ་འཁོར་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་མ་དཔག་ཏུ་མེད་པས་བསྐོར་ནས། སྤྱིར་གསང་སྔགས་ཀྱི་རྒྱུད་སྡེ་མང་པོ་དང་ཁྱད་པར་བདེ་མཆོག་གི་རྒྱུད་རྣམས་ཀྱི་བདག་པོ་མཛད་ཅིང་བཞུགས་ལ། རྒྱ་གར་དུ་ཡང་རྒྱུད་ཕལ་ཆེར་དེ་ནས་བྱུང་ཞིང་གདུལ་བྱ་སྨིན་གྲོལ་གྱི་ལམ་ལ་བཀོད་དོ། གཞན་ཡང་རིན་པོ་ཆེ་ལྟ་བུའི་གང་ཟག་ལ་གསང་བ་འདུས་པ་དང༌། དབང་པོ་རྣོན་པོ་དག་ལ་ཀྱཻའི་རྡོ་རྗེ། མཧཱ་མ་ཡ། རྡོ་རྗེ་གདན་བཞི། དུས་ཀྱི་འཁོར་ལོ་ལ་སོགས་པ་དུ་མ་དང༌། གཏི་མུག་ཤས་ཆེ་བ་རྣམས་འདུལ་བའི་དོན་དུ་རྣམ་པར་སྣང་མཛད། ཞེ་སྡང་ལ་མི་བསྐྱོད་པ། ང་རྒྱལ་ལ་རིན་ཆེན་འབྱུང་ལྡན། འདོད་ཆགས་ལ་འོད་དཔག་མེད། ཕྲག་དོག་ལ་དོན་ཡོད་གྲུབ་པ། འགྲོ་བ་ནད་ཀྱིས་ཉེན་པ་ལ་སྨན་གྱི་རྒྱལ་པོ། ངན་འགྲོ་ནས་མྱུར་དུ་འདོན་པ་ལ་ཀུན་རིག །ཞི་བས་མི་ཐུལ་བ་ལ་ཁྲོ་བོ་བཅུ། བསྟན་པ་སྲུང་བ་ལ་ཡེ་ཤེས་པའི་ཆོས་སྐྱོང་བའི་སྲུང་མ་དང༌། དབུལ་བ་སེལ་བ་ལ་ནོར་ལྷ་སོགས་གང་ལ་གང་འདུལ་དུ་མ་ཞིག་ཏུ་སྤྲུལ་ནས་དོན་མཛད་དོ། །ཁྱད་པར་དུ་ཡང་སྟོང་གསུམ་མི་མཇེད་འཇིག་རྟེན་གྱི་ཁམས་འདིར་དུས་གསུམ་སངས་རྒྱས་ཀྱིས་ཀྱང་འདུལ་བར་དཀའ་བའི་སྙིགས་མ་ལྔ་བདོ་བའི་སེམས་ཅན་དམུ་རྒོད་དཔག་ཏུ་མེད་པའི་དོན་དུ་གླིང་བཞི་བྱེ་བ་ཕྲག་བརྒྱར་མཆོག་གི་སྤྲུལ་པའི་སྐུ་ཤཱཀྱའི་རྒྱལ་པོ་བྱེ་བ་ཕྲག་བརྒྱར་སྤྲུལ་ནས། མཛད་པ་བཅུ་གཉིས་ཀྱི་སྒོ་ནས་མངོན་པར་རྫོགས་པར་སངས་རྒྱས་པའི་ཚུལ་བསྟན་ཏེ། བཀའ་འཁོར་ལོ་རིམ་པ་གསུམ་བསྐོར་ཞིང་གདུལ་བྱ་མཆོག་དམན་དཔག་ཏུ་མེད་པའི་དོན་རྒྱ་ཆེན་པོ་མཛད་པ་ཡིན་ནོ། །གཞན་ཡང་བཟོའི་སྤྲུལ་པ་ཀརྨ་བི་ཤྭ་ལ་སོགས་དང༌། སྐྱེ་བའི་སྤྲུལ་པ་སྟག་དང་སེང་གེ་དང༌། སྤྲེའུ་དང༌། སྲོག་ཆགས་དེས་པ་དང་རུ་རུ་ལ་སོགས་པ་དུ་མ་ཞིག་དང༌། གཟིངས་དང༌། ཟམ་པ་དང༌། འབྱུང་བ་བཞི་ལ་སོགས་པ་མདོར་ན་གང་ལ་གང་འདུལ་གྱི་ཚུལ་གྱིས། མཆོག་དམན་གྱི་སྤྲུལ་པ་བསམ་གྱིས་མི་ཁྱབ་པ་ཞིག་བསྟན་ནས་མཐའ་ཡས་པའི་སྐྱེ་རྒུ་རྣམས་ཕན་བདེ་ལ་འགོད་པར་མཛད་དོ། །དེ་ཡང་ཆོས་ཀྱི་སྐུ་དང༌། ལོངས་སྤྱོད་རྫོགསཔའི་སྐུ་དང༌། སྤྲུལ་པའི་སྐུ་དང༌། སྐུ་གསུམ་དབྱེར་མེད་པ་ངོ་བོ་ཉིད་བདེ་བ་ཆེན་པོའི་སྐུ་སྟེ། དེ་ལྟར་སྐུ་བཞིའི་དབང་ཕྱུག་སྟོན་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་དྲུག་པ་རྡོ་རྗེ་འཆང་ཆེན་པོ་འདི་ཉིད་འོག་མིན་སྟུག་པོ་བཀོད་པའི་ཞིང་དུ་སངས་རྒྱས་ནས་འདོད་ཁམས་སུ་སེམས་ཅན་གྱི་དོན་ལ་མཛད་པ་བཅུ་གཉིས་སྟོན་པར་ཐེག་པ་ཆེན་པོའི་ལུགས་ལས་གསུངས་ཏེ། དེ་ཡང་བྲམ་ཟེའི་ཁྱེའུ་བླ་མ་དགའ་ལྡན་དུ་དམ་པ་ཏོག་དཀར་ལ་སྐྱེས་ནས་ཟས་གཙང་གི་སྲས་སུ་ཐུབ་པ་འཁྲུངས་ཏེ། མྱ་ངན་ལས་འདས་པ་ཆེན་པོའི་བར་ཐམས་ཅད་ལོངས་སྐུའི་སྤྲུལ་པ་ཙམ་ཅིག་ཡིན་པས་སྤྲུལ་སྐུ་ཟེར་བ་ཡིན་ཏེ། ངག་གི་དབང་ཕྱུག་གྲགས་པའི་ཞལ་ནས་ཀྱང༌། དཔལ་ལྡན་སྟུག་པོ་བཀོད་པ་ཉིད་དུ་དོན་དམ་ཐུགས་ཆུད་ཅིང༌། དགའ་ལྡན་སྐྱེ་བོའི་དོན་མཛད་ཕྱིར་ན་དམ་པ་ཏོག་དཀར་གྱུར། དེ་ནས་འདིར་ནི་འགྲོ་བའི་དོན་དུ་ཤཱཀྱའི་ཏོག་གྱུར་གང༌། འཆི་བདག་ལས་རྒྱལ་སྒྱུ་མ་ཀུན་སྟོན་དེ་ནི་རྒྱལ་གྱུར་ཅིག །ཅེས་གསུངས་སོ། ཡང་ཆོས་ཀྱི་གཤེས་གཉེན་ལ་སོགས་ཀྱིས་གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་ཁམས་ལོངས་སྤྱོད་རྫོགས་སྐུའི་ཞིང་དུ་བཞེད་དེ། དེ་ཡང་གླིང་བཞིའི་བྱེ་བ་ཕྲག་བརྒྱ་ལ་སྟོང་གསུམ། དེ་བྱེ་བ་ཕྲག་བརྒྱ་ལ་རབ་འབྱམས་ཀྱི་འཚམས་སྦྱོར་གཅིག །དེ་བྱེ་བ་ཕྲག་བརྒྱ་ལ་རབ་འབྱམས་ཀྱི་རྒྱུད་གཅིག །དེ་བྱེ་བ་ཕྲག་བརྒྱ་ལ་རབ་འབྱམས་ཀྱི་རྒྱུད་བར་མ་གཅིག །དེ་བྱེ་བ་ཕྲག་བརྒྱ་ལ་མེ་ཏོག་གི་གཞིའི་སྙིང་པོའི་རྒྱན་བཀོད་པ་སྟེ། རྣམ་སྣང་གི་ཞིང་གཅིག་གོ །དེ་ཡང་རྣམ་སྣང་གངས་ཅན་མཚོའི་ཕྱག་གི་མཐིལ་གྱི་རྡུལ་ཕྲན་གཅིག་ལ་གནས་ཤིང༌། དེ་ལོངས་སྐུར་འདོད་པ་ལ་སོགས་བཞེད་པ་མང་དུ་ཡོད་དོ། དེ་ཡང་སྐུ་གསུམ་གྱི་ཡོན་ཏན་ལས། ཆོས་སྐུའི་ཡོན་ཏན་བྲལ་འབྲས་སུམ་ཅུ་རྩ་གཉིས་ནི། སྟོབས་བཅུ་ མི་འཇིགས་པ་བཞི། མ་འདྲེས་པའི་ཆོས་བཅོ་བརྒྱད་དང་སོ་གཉིས་ཏེ། ཡོན་ཏན་གྱི་སྡེ་ཚན་ཉི་ཤུ་རྩ་གཅིག་གསུངས་པ་ཡང་འདི་ཡི་ནང་དུ་འདུས་པ་ཡིན། གཟུགས་སྐུའི་ཡོན་ཏན་སྨིན་འབྲས་སུམ་ཅུ་སོ་གཉིས་ནི། མཚན་བཟང་པོ་སུམ་ཅུ་སོ་གཉིས་དང༌། མཚན་གྱི་ཡན་ལག་ཏུ་གྱུར་པའི་དཔེ་བྱད་བཟང་པོ་བརྒྱད་ཅུ་རྣམས་སོ། །སྤྱི་དོན་གཉིས་པ་བརྟེན་པ་ཡེ་ཤེས་ནི། མཉམ་བཞག་ཇི་ལྟ་བ་མཁྱེན་པའི་ཡེ་ཤེས་དང༌། རྗེས་ཐོབ་ཇི་སྙེད་མཁྱེན་པའི་ཡེ་ཤེས་གཉིས་སོ། དེ་ཡང་དབྱེ་ན་ལྔ། ཆོས་ཀྱི་དབྱིངས་ཀྱི་ཡེ་ཤེས། མེ་ལོང་ལྟ་བུའི་ཡེ་ཤེས། མཉམ་པ་ཉིད་ཀྱི་ཡེ་ཤེས། སོ་སོར་རྟོགས་པའི་ཡེ་ཤེས། བྱ་བ་གྲུབ་པའི་ཡེ་ཤེས་སོ། །དེ་ལ་གནས་འགྱུར་གྱི་རྒྱུ་དང༌། ཐོབ་པའི་རྒྱུ་རྣམས་གཉིས་ཏེ། དེ་ཡང་དང་པོ་ནི། རྣམ་པར་ཤེས་པ་ཚོགས་བརྒྱད་གནས་འགྱུར་བ་ཡིན་ཏེ། ཀུན་གཞིའི་རྣམ་པར་ཤེས་པ་གནས་འགྱུར་བ་མེ་ལོང་ལྟ་བུའི་ཡེ་ཤེས། ཉོན་མོངས་པ་ཅན་ཡིད་གནས་འགྱུར་བ་ནི་མཉམ་པ་ཉིད་ཀྱི་ཡེ་ཤེས། ཡིད་ཀྱི་རྣམ་པར་ཤེས་པ་གནས་འགྱུར་བ་ནི་སོ་སོར་རྟོགས་པའི་ཡེ་ཤེས། སྒོ་ལྔའི་རྣམ་པར་ཤེས་པ་གནས་འགྱུར་བ་ནི་བྱ་བ་གྲུབ་པའི་ཡེ་ཤེས་སོ། །དེ་ཡང་ཀུན་གཞིའི་རྣམ་ཤེས་ཀྱིས་གཞན་རྣམས་ཀྱི་རྟེན་བྱེད་པ་ལྟར། མེ་ལོང་ལྟ་བུའི་ཡེ་ཤེས་ཀྱིས་གཞན་རྣམས་ཀྱི་རྟེན་བྱེད་དོ། །རྒྱན་ལས༌། མེ་ལོང་ཡེ་ཤེས་མི་གཡོ་སྟེ། ཡེ་ཤེས་གསུམ་ནི་དེ་ལ་བརྟེན། མཉམ་པ་ཉིད་ནི་སོ་སོར་རྟོགས། །བྱ་བ་གྲུབ་པ་ཁོ་ནའོ། །ཞེས་གསུངས་སོ། ཡང་ཉོན་མོངས་པ་ཅན་གྱི་ཡིད་ནི་ཆོས་སྤྱི་དང་རང་གི་བྱེ་བྲག་མི་འབྱེད་པ་དང༌། ཡིད་ཀྱི་རྣམ་པར་ཤེས་པ་ནི། དུས་གསུམ་གྱི་ཡུལ་ལ་ཆགས་ཐོགས་མེད་པ་དང༌། སྒོ་ལྔའི་རྣམ་པར་ཤེས་པ་ནི་ཡུལ་ལ་འབད་པ་མེད་པར་འཇུག་པ་བཞིན་དུ་མཉམ་པ་ཉིད་ཀྱི་ཡེ་ཤེས་ནི་གཉིས་སུ་འཛིན་པ་ལས་གྲོལ་བ་དང༌། སོ་སོར་རྟོགས་པའི་ཡེ་ཤེས་ནི་ཤེས་བྱ་ལ་ཆགས་ཐོགས་མེད་པར་འགྲོ་བ་དང༌། བྱ་བ་གྲུབ་པའི་ཡེ་ཤེས་ཀྱི་གདུལ་བྱའི་དོན་ལ་འབད་རྩོལ་མེད་པར་འཇུག་པའོ། །ཐོབ་པའི་རྒྱུ་ནི། རྒྱན་ལས། འཛིན་པའི་ཕྱིར་དང་སེམས་མཉམ་ཕྱིར། ཡང་དག་ཆོས་རབ་སྟོན་ཕྱིར་དང༌། བྱ་བ་གྲུབ་པ་ཉིད་ཀྱི་ཕྱིར། ཡེ་ཤེས་བཞི་པོ་ཡང་དག་འབྱུང༌། གསུངས་ཏེ་སྡེ་སྣོད་གསུམ་གྱི་ཆོས་ཐོས་ཤིང་འཛིན་པའི་ཤེས་རབ་ནི་མེ་ལོང་ལྟ་བུའི་རྒྱུཡིན་ལ། སེམས་ཅན་ཐམས་ཅད་ལ་སེམས་མཉམ་པར་བསྒོམ་པ་ནི། མཉམ་པ་ཉིད་ཀྱི་ཡེ་ཤེས་ཀྱི་རྒྱུ་ཡིན་ལ། གཞན་ལ་ཆོས་བསྟན་པ་ནི། སོ་སོར་རྟོགས་པའི་ཡེ་ཤེས་ཀྱི་རྒྱུ་ཡིན། །གཞན་ལ་བྱ་བ་སྒྲུབ་པ་ནི་བྱ་བ་གྲུབ་པའི་ཡེ་ཤེས་ཀྱི་རྒྱུ་ཡིན་ནོ། ཆོས་ཀྱི་དབྱིངས་ཀྱི་ཡེ་ཤེས་ནི་ཆོས་ཀྱི་དབྱིངས་རྣམ་པར་དག་པ་སྟེ་འཁོར་འདས་ཀྱི་ཆོས་ཐམས་ཅད་ལ་ཁྱབ་པས་ངོ་བོ་ཉིད་ཀྱི་སྐུ་དང་མཚུངས་སོ། །དེ་ཡང་སྐུ་དང་ཡེ་ཤེས་གཉིས་འབྲེལ་ཚུལ་ནི། ཆོས་ཀྱི་དབྱིངས་ཀྱི་ཡེ་ཤེས་དང༌། མེ་ལོང་ལྟ་བུའི་ཡེ་ཤེས་གཉིས་ཆོས་སྐུ་ཡིན་ཞིང༌། མཉམ་ཉིད་དང་སོ་སོར་རྟོགས་པ་ཉིད་ལོངས་སྐུ། བྱ་བ་གྲུབ་པ་སྤྲུལ་སྐུ་ཡིན་ནོ། །ཡང་ཡེ་ཤེས་ཐམས་ཅད་ཚོགས་པ་ཆོས་སྐུ། མེ་ལོང་ལྟ་བུའི་ལོངས་སྐུ། མཉམ་པ་ཉིད་དང་ཆོས་དབྱིངས་གཉིས་ལོངས་སྐུའི་ཐུགས། སོ་སོར་རྟོགས་པ་ལོངས་སྐུའི་གསུངས། བྱ་བ་གྲུབ་པ་ལོངས་སྐུའི་མཛད་པ་སྟེ་སྤྲུལ་སྐུ་ཡིན་ནོ་ཞེས་དང༌། ཡང་ཆོས་དབྱིངས་ཆོས་སྐུ་མེ་ལོང་མཉམ་པ་ཉིད། སོ་སོར་རྟོགས་པ་ལོངས་སྐུ། བྱ་བ་གྲུབ་པ་སྤྲུལ་སྐུར་བཞེད་པ་ཡིན་ནོ། །དེ་རྣམས་གང་ཡང་དོན་ལ་འགལ་བ་མེད་པས། སངས་རྒྱས་རྣམས་ནི་ཡེ་ཤེས་ཀྱི་སྐུ་ཡིན་པའི་ཕྱིར་རོ། །སྤྱི་དོན་གསུམ་པ་མཛད་པའི་ཕྲིན་ལས་ནི། སྔོན་གྱི་སྨོན་ལམ་དང་སྙིང་རྗེའི་དབང་གིས་རྒྱུ་རྐྱེན་རྟེན་འབྲེལ་ཚོགས་པ་ལས་རྟེན་འབྲེལ་དང༌། རྟོག་པ་མི་མངའ་བར་འབད་མེད་དུ་འབྱུང་བ་ནི། རྩོལ་རྟོག་མི་མངའ་བར་ལྷུན་གྱིས་གྲུབ་པ། འཁོར་བ་མ་སྟོང་གི་བར་དུ་འབྱུང་བས་རྒྱུན་མི་འཆད་པ། རྒྱ་ཆེ་བས་ནམ་མཁའ་དང་མཉམ་པར་འབྱུང་བ་གང་ལ་གང་འདུལ་གྱི་ཚུལ་དུ་བྱུང་བས་སྣ་ཚོགས་སུ་སྣང་སྟེ། ཕྲིན་ལས་ཀྱི་ཆོས་བཞི་ཚང་བའོ། །གདུལ་བྱ་གང་འདུལ་གྱི་དོན་དཔག་ཏུ་མེད་པ་འབྱུང་བ་ནི། དཔེར་ན་ཡིད་བཞིན་གྱི་ནོར་བུའམ། དཔག་བསམ་གྱི་ཤིང་ངམ། བུམ་པ་བཟང་པོའམ། ནམ་མཁའ་ལྡིང་གི་མཆོད་སྡོང་ལྟ་བུས་དུས་ཅི་སྲིད་འཁོར་བ་གནས་ཀྱི་བར་དུ་སེམས་ཅན་གྱི་དོན་འབྱུང་བ་ཡིན་ཏེ། ས་ར་ཧས། གོམས་པའི་མཐུ་ཡིས་དོགས་པ་ཐམས་ཅད་ཟིལ་གྱིས་མནན། འབྲས་བུ་གཉིས་ནི་རང་དང་གཞན་དོན་ཕུན་ཚོགས་ཡིན། རྒྱུ་དང་འབྲས་བུ་གཉིས་ནི་ངོ་བོ་དེ་དབྱེར་མེད། སྨོན་ལམ་སྙིང་རྗེའི་སྟོབས་ཀྱིས་གཟུགས་སྐུ་རྣམ་གཉིས་འབྱུང༌། བུམ་པ་བཟང་དང་དཔག་བསམ་རིན་ཆེན་ནོར་བུ་ལྟར། གང་གི་བཟུང་བ་མེད་པའི་སྐུ་ནི་རབ་ཏུ་མཛེས། གདུལ་བྱ་རྣམས་ལ་སྣ་ཚོགས་པ་ཡི་གཟུགས་ཤར་བ། དེ་དག་ཐམས་ཅད་བསམ་མི་ཁྱབ་ཀྱི་སྤྲུལ་པ་སྟེ། ཞེས་དང༌། སྤྱོད་འཇུག་ལས། ཡིད་བཞིན་ནོར་བུ་དཔག་བསམ་ཤིང༌། །ཇི་ལྟར་རེ་བ་ཡོངས་སྐོང་བ། །དེ་བཞིན་གདུལ་བྱར་སྨོན་ལམ་གྱིས། །དབང་གིས་རྒྱལ་པོའི་སྐུར་སྣང་ངོ། །དཔེར་ན་ནམ་མཁའ་ལྡིང་གིས་ནི། །མཆོད་སྡོང་སྒྲུབ་ནས་འདས་གྱུར་ན། །དེ་འདས་ཡུན་རིང་ལོན་ཡང་དེར། །དུག་ལ་སོགས་པ་ཞི་བྱེད་བཞིན། །བྱང་ཆུབ་སྤྱོད་དང་རྗེས་མཐུན་པའི། །རྒྱལ་བའི་མཆོད་སྡོང་སྒྲུབ་པ་ཡང༌། །བྱང་ཆུབ་སེམས་དཔའ་མྱ་ངན་འདས། །འདས་ཀྱང་དོན་རྣམས་ཐམས་ཅད་མཛད། ཅེས་གསུངས་པ་དང༌། རྗེ་བཙུན་གྱི་རྒྱལ་པོ་མི་ལ་རས་པས། །དེ་ལ་སྙིང་རྗེས་ཤུགས་འབྱུང་སྟེ། །སྟོབས་དང་མི་འཇིགས་གཟུགས་ལ་སོགས། །སངས་རྒྱས་ཡོན་ཏན་གང་ཡིན་པ། ནོར་བུ་རིན་ཆེན་ཚུལ་གྱིས་འབྱུང༌། ཞེས་གསུངས་པས། འབད་རྩོལ་དང་རྟོག་པ་མི་མངའ་བཞིན་དུ། སེམས་ཅན་གྱི་དོན་འབད་མེད་ལྷུན་གྲུབ་ཏུ་འབྱུང་བ་ཡིན་ཏེ། དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ལ་དགོས་འདོད་སྟེར་བསམ་པའི་རྟོག་པ་མི་མངའ་ཡང་རྒྱལ་མཚན་གྱི་རྩེ་མོ་ལ་བཏགས་ཅིང་གསོལ་བ་བཏབ་པས། དགོས་འདོད་ཐམས་ཅད་ཆར་བཞིན་འབབས་པ་དང་འདྲ་བར་བཞེད་པ་ཡིན་ནོ། །དེ་དག་གི་སྟོན་པ་རྡོ་རྗེ་འཆང་ཆེན་པོའི་རྟོགས་པ་བརྗོད་པ་བསྟན་ཟིན་ཏོ།

གཉིས་པ་གྲུབ་ཆེན་ཏཻ་ལོ་པའི་རྣམ་ཐར་ནི། དེའང་སྐུ་འཁྲུངས་ཡུལ་རྒྱ་གར་ཟ་ཧོར་གྱི་ཡུལ། གྲོང་ཁྱེར་ཆེན་པོ་ཛ་གོ་ཞེས་བྱ་བརཡབ་བྲམ་ཟེ་གསལ་བ་དང༌། ཡུམ་བྲམ་ཟེ་མོ་གསལ་སྒྲོན་ལ་སྲས་མོ་གཅིག་མཆིས་ཀྱང་སྲས་ཀྱིས་དབེན་ནས་མཆོད་དང་སྦྱིན་གཏོང་རྒྱ་ཆེར་མཛད་པ་ལས། ཟླ་དགུ་ངོ་བཅུའི་ཐོག་ཁྱེའུ་མཚན་དང་ལྡན་པ་གཅིག་བཙས་ཏེ་ས་ཕྱོགས་ཐམས་ཅད་འོད་ཀྱིས་གང་བ་སོགས་ལྟས་ཁྱད་འཕགས་བྱུང་བས་ཉམས་སྤྲོ་བར་གྱུར། དེ་ནས་བྲམ་ཟེ་མཚན་མཁན་གྱིས་མཚན་ལྟས་རྩིས་པ་ལས་རྟགས་མ་ངེས་པར་ཤར་ནས་ལུང་སྟོན་དུ་མ་གཏུབ་ཀྱང༌། སངས་རྒྱས་ཀྱི་སྤྲུལ་པ་ཞིག་ཡིན་སྙམ་ཏེ། འདི་ནི་ལྷ་ཀླུ་གནོད་སྦྱིན་དང༌། སངས་རྒྱས་གང་ཡིན་མ་འཚལ་ཏེ། བྱུང་ན་རྒྱལ་བའི་སྲས་པོ་དང༌། མ་བྱུང་མི་ཡི་བདག་པོར་འགྱུར། དེ་བས་སྐྱེས་བུ་ངོ་མཚར་ཅན། མཆོག་འདི་ཁྱོད་ཀྱིས་ལེགས་པར་སྐྱོངས། ཞེས་བརྗོད་ཅིང་མཚན་གསལ་འོད་དུ་གསོལ། དེ་ནས་གཙུག་ལག་ཁང་དུ་རིམ་གྲོ་དུ་མས་སྐྱེད་སྲིང་བྱས་པས་ལོ་གཅིག་སོང་བ་དང་ལོ་བཅུ་གཉིས་པའི་ཚད་དུ་སོན། ཉིན་གཅིག་ཡུམ་དང་ལྷན་དུ་ཕོ་བྲང་གི་དབུས་ན་བཞུགས་སྐབས་བུད་མེད་མི་སྡུག་པའི་ཉམས་ཅན་ཞིག་བྱུང་ནས་འཁར་བུར་ཨོཾ་ཚུགས་བྱས་ཏེ། གཅེས་པར་བསྐྱངས་ཀྱང་མི་འཆི་བའི། ས་ཕྱོགས་དེ་ནི་ཡོད་མ་ཡིན། ཟེར་ཞིང་ངུས་པ་ལ། ཡུམ་ཤིན་ཏུ་སྐྲག་ནས་དེ་ལ་ཐབས་ཅི་ལྟར་བྱས་ན་ཐར་བར་འགྱུར་ཞེས་དྲིས་པས། གཞོན་ནུ་མཛེས་པ་མཚན་དང་ལྡན། དམ་ཆོས་བརྡ་སྐད་འཕྲད་ན་བདེ། ཞེས་ཟེར་ནས་མི་སྣང་བར་གྱུར། དགོང་མོ་ཡབ་ཕོ་བྲང་དུ་ཕེབས་པ་ལ། གོང་གི་ལོ་རྒྱུས་དེ་དག་ཞིབ་ཏུ་བསྙད་དེ་ཡི་གེ་ལ་སོགས་རིག་པའི་གནས་ཐམས་ཅད་ལ་བསླབ་པས་མཁས་པར་གྱུར། དེ་ནས་ཀྱང་ཡབ་ཡུམ་སྲས་འཁོར་ལྷན་ཅིག་བཞུགས་པའི་དབུས་སྔར་གྱི་བུད་མེད་དེ་གར་བྱུང་ཆ་མེད་དུ་བྱུང་ནས། ལྟོས་མེད་སཱ་ལའི་ནགས་གསེབ་ཏུ། བྲམ་ཟེའི་ཁྱེའུ་གསལ་འོད་ཐོང༌། ཡི་གེ་བལྟ་ཞིང་མ་ཧེ་སྐྱོངས། མཁའ་འགྲོ་མ་ཡི་ལུང་བསྟན་འབྱུང༌། ཞེས་ཟེར་ཞིང་ནམ་མཁའ་ལ་ཡར་ནས་སོང་བས། མཁའ་འགྲོ་མར་ཤེས་ཏེ་ལུང་བསྟན་བཞིན་མ་ཧེའི་ཁྱུ་རྣམས་དེད་ནས་ནགས་ཚལ་ཕུན་སུམ་ཚོགས་པར་ཕེབས་པ་ལས། ཡང་མཁའ་འགྲོ་མ་དེ་བྱུང་ནས་ཡུལ་དང་ཡབ་ཡུམ་སོགས་བརྡ་ཡི་སྒོ་ནས་དྲིས་པར་དེ་བཞིན་དུ་གསལ་འོད་ཀྱིས་ལན་བཏབ། དེ་ནས་འོ་ན་ཁྱོད་གང་ཡིན་དྲིས་པས། ཡུལ་ནི་ནུབ་ཕྱོགས་ཨོ་རྒྱན་ཡིན། །གྲོང་ཁྱེར་དཔལ་གྱི་སར་གནས་ཏེ། །ཡབ་ནི་བདེ་མཆོག་འཁོར་ལོ་སྟེ། །ཡུམ་ནི་རྡོ་རྗེ་རྣལ་འབྱོར་མ། །ང་ནི་སྲིང་མོ་བདེ་སྟེར་མ། །མིང་པོ་པཉྩ་པ་ན་ཡིན། །བྱང་ཆུབ་ཤིང་གི་ནགས་ཚལ་དུ། །ཉམས་མྱོང་མ་ཧེ་སྐྱོང་འདོད་ན། །སྙན་བརྒྱུད་ཡི་གེ་མེད་པ་ནི། །དྲི་མེད་མཁའ་འགྲོའི་ཕྱག་ན་ཡོད། གསུངས་པ་ལ། དེ་ངས་མི་ལོན་བྱས་པས། ལུང་བསྟན་དམ་ཚིག་ལྡན་པ་ཡི། །དངོས་གྲུབ་ཁྱོད་ཀྱིས་བླང་ན་ལོན། ཞེས་གསུངས་པས། འོ་ན་ཇི་ལྟར་བྱ་ཞུས་པས། ཤེལ་གྱི་སྐས་དང་རིན་ཆེན་ཟམ། །བྱི་ཟུང་ལྡེ་མིག་གསུམ་ཁྱེར་ལ། །ཐེ་ཚོམ་མེད་པར་ཤད་ཀྱིས་སོང༌། །སྙན་བརྒྱུད་དྲི་མེད་ལོན་པར་འགྱུར། ཅེས་གསུངས་ནས་བུད་མེད་དེ་ཉིད་ན་ཆུང་ལང་ཚོ་ཕུན་སུམ་ཚོགས་པ། མཛེས་ཤིང་ཡིད་དུ་འོང་བ་གཅིག་ཏུ་སྤྲུལ་ཏེ། རྫས་དེ་གསུམ་བསྐུར་ནས་ཐེ་ཚོམ་མེད་པར་སོང་གསུངས་ཤིང་ནམ་མཁའ་ལ་འཇའ་ཡལ་བ་བཞིན་མི་སྣང་བར་གྱུར་ཏོ། །དེ་ནས་པཉྩ་པ་ནས་ཀྱང་མ་ཧེའི་ཁྱུ་རྣམས་དེད་ནས། རྡོ་རྗེའི་གླུ་ལེན་ཞིང་གྲོང་ཁྱེར་དུ་བྱོན་ཏེ། །གོང་གི་ལོ་རྒྱུས་རྣམས་ཞིབ་ཏུ་བསྙད་ཅིང་ཨུ་རྒྱན་དུ་འགྲོ་བར་ཞུས་པས། ཡབ་ཡུམ་ལ་སོགས་ཀྱིས་ཀྱང་གནང་ནས་ཨུ་རྒྱན་དུ་བྱོན་ནོ། །དེར་ཡང་ཨོ་རྒྱན་གྱི་ཡུལ་དེ་གང་ཟག་ཕལ་གྱིས་བགྲོད་པའི་གནས་མ་ཡིན་ཞིང་དེའི་མི་ཕོ་མོ་ཐམས་ཅད་དཔའ་བོ་དང་དཔའ་མོའི་རིགས་སུ་ཡོད་པ། གྲོང་ཁྱེར་དཔག་ཏུ་མེད་པས་བསྐོར་བའི་དབུས་སུ། དྷརྨཱ་གྷ་ཛ་ཆོས་ཀྱི་དཀོར་མཛོད། ཧེ་རུ་ཀ་རང་བྱུང་གི་གནས་གནྡྷོ་ལ་ཡི་གཙུག་ལག་ཁང་ཆེན་པོ་དེ་ཉིད། རོ་གསར་པའི་ལྕོགས་དང༌། གདན་ལ་སོགས་ཀྱིས་བརྒྱན་ནས། མཛེས་ཤིང་ཡིད་དུ་འོང་བའི་ཕྱིར་རོལ་དུ། འོབ་དང་ལྕགས་རི་རིམ་པ་གསུམ་གྱིས་བསྐོར་ཞིང། དེ་དག་ཏུ་གཅན་གཟན་དང༌། སྦྲུལ་གདུག་པ་ཅན་དུ་མ་དང༌། ཀླུ་བདུད་སྲིན་མོའི་ཚོགས་མ་རུངས་པ་རྣམས་གནས་པའི་དབུས་སུ། ཕྱི་སྒོ་སྲུང་བ་ཟ་བྱེད་ལས་ཀྱི་མཁའ་འགྲོ་ལས་མཁན་གྱི་ཚུལ་དང༌། བར་སྒོ་སྲུང་བ་སྤྲུལ་སྐུ་འཇིག་རྟེན་གྱི་མཁའ་འགྲོ་མ་འབངས་ཀྱི་ཚུལ་དང༌། ནང་སྒོ་སྲུང་བའི་ལོངས་སྐུ་འཇིགས་བྱེད་ཀྱི་མཁའ་འགྲོ་རྣམས་བློན་མོའི་ཚུལ་དུ་གནས་ཏེ། དེ་དག་ཀྱང་འཁོར་དཔག་ཏུ་མེད་པས་བསྐོར་ཞིང་བཞུགས་པ། ཕོ་བྲང་དེའི་དབུས་སུ་ཆོས་འབྱུང་བསྣོལ་བའི་ལྟེ་བར། གདན་སུམ་བརྩེགས་ཀྱི་སྟེང་དུ་དུས་གསུམ་གྱི་སངས་རྒྱས་ཐམས་ཅད་ཀྱི་ཡུམ། རྗེ་བཙུན་རྡོ་རྗེ་རྣལ་འབྱོར་མ་ཆོས་ཀྱི་སྐུ་ལས་མ་གཡོས་བཞིན་ཏུ་ཟུང་འཇུག་ལྷུན་གྲུབ་བདེ་བ་ཆེན་པོ་ལོངས་སྤྱོད་རྫོགས་པའི་སྐུ་མཚན་དང་དཔེ་བྱད་ཀྱིས་བརྒྱན་པ། འོད་ཟེར་དཔག་ཏུ་མེད་པ་ཕྱོགས་བཅུར་འཕྲོ་ཞིང་གཟི་བརྗིད་དང་ལྡན་པ། འཁོར་མཁའ་འགྲོ་མ་བསམ་གྱིས་མི་ཁྱབ་པས་བསྐོར་ནས། ལྷའི་བུ་དང་བུ་མོ་ལ་སོགས་མཆོད་པའི་ལྷ་མོ་རྣམས་ཀྱིས་རྡོ་རྗེའི་གླུ་གར་དང༌། རོལ་མོའི་སྒྲ་ལ་སོགས་པ་མཆོད་པའི་བྱེ་བྲག་དཔག་ཏུ་མེད་པ་རྣམས་ཀྱིས་མཆོད་དོ། །རྡོ་རྗེ་ཐེག་པའི་རྒྱུད་སྡེ་རྣམས་གསེར་དངུལ་གྱི་བྱང་བུ་ལ་བཻཌཱུརྻ་ཞུན་མས་བྲིས་ནས་རིན་པོ་ཆེའི་སྒྲོམ་བུར་བཅུག་ཅིང༌། རྒྱ་རིམ་པ་གསུམ་གྱིས་བཏབ་ནས་གཅེས་པར་འཛིན་ཏེ། ཐེག་པ་ཆེན་པོ་གསང་སྔགས་ཀྱི་ཆོས་ལ་ལོངས་སྤྱོད་ཅིང་བཞུགས་སོ། དེ་ནས་པཉྩ་པ་ནས་འོབ་རྣམས་ལ་རིན་པོ་ཆེའི་ཟམ་པ་བྲིས། ལྕགས་རི་ལ་ཤེལ་གྱི་སྐས་བཙུག་བྱི་བཟུང་གིས་སྒོ་ཕྱེས་ནས་སྒོ་སྲུང་རྣམས་ཀྱིས་མ་ཁེགས་ཤིང་ཆགས་ཐོགས་མེད་པར་དེར་ཞུགས་ཏེ་རྗེ་བཙུན་རྡོ་རྗེ་རྣལ་འབྱོར་མ་མཇལ་ནས་དེ་ཉིད་དུ་དེ་སྐད་ཅེས་ཞུས་སོ། །ང་རང་པཉྩ་པ་ན་ཡིན། སྲིང་མོ་བདེ་སྟེར་མ་ཡིས་བཏང༌། ལྟ་སྒོམ་སྤྱོད་པ་འབྲས་བུ་དང༌། དམ་ཚིག་རང་གྲོལ་གདམས་ངག་འདོད། ཅེས་ཞུས་པས། རྡོ་རྗེ་རྣལ་འབྱོར་མས་དཀོར་མཛོད་གསུམ་གྱི་བརྡ་བསྟན་པས། མཁའ་འགྲོའི་ལྡེ་མིག་གསུམ་གྱི་རྒྱ་བཀྲོལ་ནས། ནོར་བུ་རྣམ་གསུམ་གྱི་སྙན་བརྒྱུད། འཁོར་ལོ་བདེ་མཆོག་གི་རྒྱུད་ལེའུ་ལྔ་བཅུ་རྩ་གསུམ་པ་སོགས་ཟབ་ཅིང་རྒྱ་ཆེ་བ་རྣམས་བཏོན་ནས་ཉིད་ཀྱི་ཞལ་ནས། ང་ནི་མཁའ་ལ་བྱ་བཞིན་དུ། །ཐོགས་མེད་ཤེས་རབ་བཟང་པོ་འགྲོ། ཞེས་གསུངས་ཤིང་བར་སྣང་ལ་ཚུར་བྱོན་པས་འཁོར་གྱི་མཁའ་འགྲོ་རྣམས་ཀྱིས། དམ་པ་ཁྱོད་ནི་གང་དུ་གཤེགས། །བདག་ཅག་དོན་དུ་བཞུགས་སུ་གསོལ། །ཅེས་གསོལ་བ་བཏབ་པས། ཏཻ་ལོ་པས། ནཱ་རོ་རི་རི་ཀ་སོ་རི། བུ་རྣམས་དོན་དུ་རྣལ་འབྱོར་བདག །གཙུག་གི་ནོར་བུའི་དགོན་པར་འགྲོ །གསུངས་ནས་གཤེགས་པས། སྐད་ཅིག་དེ་ཉིད་ལ་ཡེ་ཤེས་ཀྱི་མཁའ་འགྲོ་མས་ལུས་མངོན་དུ་མི་སྣང་བར་བྱས་ནས་སྒྲའི་སྒོ་ནས་ཆོས་སྐོར་ཕུལ་བ་ནི། །སྨིན་གྲོལ་སེམས་ཀྱི་རྒྱ་མདུད་ཤིག །དམ་ཚིག་རང་གྲོལ་མེ་ལོང་ལྟོས། །སྤྱོད་པ་ཆུ་ལ་རལ་གྲི་རྒྱོབ། རོ་སྙོམས་ཕྱི་ཡི་མེ་ལོང་ལྟོས། །དམ་རྫས་རྟོགས་པའི་ཉི་མ་འདེས། །རིག་པ་ཡེ་ཤེས་སྒྲོན་མེ་བལྟམ། །རྩ་རླུང་དྲྭ་མིག་འཁོར་ལོ་བསྐོར། །རང་གྲོལ་ཕྱག་རྒྱ་ཆེན་པོ་བསྒོམ། །བདེ་ཆེན་གསུང་གི་རིན་ཆེན་ཟུངས། ཞེས་ལུས་མེད་མཁའ་འགྲོའི་ཆོས་སྐོར་ཕུལ་བ་ལ། ཏཻ་ལོ་པའི་ཞལ་ནས། སྒྱུ་མ་ལུས་ཀྱི་གནྡྷོ་ལར། ལུས་མེད་མཁའ་འགྲོའི་གསུངས་བཅུག་སྟེ། བརྗོད་མེད་ངག་གི་ལྕགས་བཅུག་ནས། འོད་གསལ་སེམས་ཀྱི་བྱ་འཕུར་འགྲོ། ཞེས་གསུངས་ཤིང་ནམ་མཁའ་ལ་འཕུར་ནས་བྱོན་ནོ། །དེའང་བཀའ་བབས་བཞིའི་བླ་མ་བརྟེན་ཚུལ་ནི། དེའང་ཨོ་རྒྱན་གྱི་ཡུལ་དང་ཉེ་བ་དུ་ལ་ཀེ་དུ་བྱ་བའི་གཙང་པོའི་འགྲམ་ན་མྱ་ངན་མེད་པའི་གཙུག་ལག་ཁང་གི་ནང་དུ། རྣལ་འབྱོར་མ་སུ་མ་ཏི་སྐལ་པ་བཟང་མོ་ཞེས་བྱ་བ་བཞུགས་པའི་དྲུང་དུ་བྱོན་ནས་ཕྱག་དང་མནྜལ་ཕུལ༌། ཞབས་སྤྱི་བོར་བླངས་ཏེ་གདམས་པ་ཞུས་པས་དབང་གི་རིམ་པ་རྣམས་བསྐུར་ཞིང༌། འཕོ་བ་བར་དོ་ལ་སོགས་པའི་གདམས་ངག་རྫོགས་པར་གནང༌། དེ་ནས་སློབ་དཔོན་ལྭ་བ་པའི་དྲུང་དུ་བྱོན་ནས་འོད་གསལ་གྱི་གདམས་པ་མ་ལུས་པ་ཞུས། །དེ་ནས་སློབ་དཔོན་ཙཱརྻ་པའི་ཞབས་ལ་བཏུད་དེ་གཏུམ་མོ་རྩ་ཐིག་རླུང་གསུམ་གྱི་སྐོར་དང་བདེ་མཆོག་འཁོར་ལོ་སོགས་མ་རྒྱུད་ཀྱི་སྐོར་རྣམས་རྫོགས་པར་གསན། དེ་ནས་རྒྱ་གར་ལྷོ་ཕྱོགས་པཱ་ལ་བྷོ་ཏ་འཇིགས་བྱེད་བཞད་པའི་དུར་ཁྲོད་དེར་ཀླུ་སྒྲུབ་མཇལ་དུ་འབྱོན་པར་བཞེད་པ་ལས། ཀླུ་སྒྲུབ་ཀྱིས་མཁྱེན་ནས་རྗེས་སུ་བཟུང་བར་མ་ཏཾ་གི་བཞག་ནས་སློབ་དཔོན་དྲི་ཟའི་ཡུལ་དུ་བཞུད། དེར་ཤིང་ལོ་དམར་པོའི་སྤྱིལ་པོར་མ་ཏཾ་གི་བཞུགས་པ་དང་མཇལ། ཞལ་ནས་སྐྱེས་བུ་ཁྱོད་རྗེས་སུ་འཛིན་པར་ང་བཞག་པ་ཡིན་གསུངས། ཕྱག་མཆོད་ཕུལ་ནས་ཆོས་ཞུས་པར། རྨི་ལམ་སྒྱུ་མ་གསུམ་བརྒྱུད་དང༌། གསང་བ་འདུས་པ་སོགས་ཕ་རྒྱུད་ཀྱི་སྐོར་རྣམས་གནང་ནས་སྒྲུབ་པ་ཉམས་སུ་ལེན་དགོས་པའི་བརྡ་བསྟན་པས། ཏཻ་ལོ་པ་ཉིད་ནུབ་ཕྱོགས་སོ་མ་པུ་རིའི་གཙུག་ལག་ཁང་དུ་ཞབས་ལྕགས་སུ་བཅུག་ནས་ལོ་བཅུ་གཉིས་སྒྲུབ་པ་མཛད་པས་དཀྱིལ་འཁོར་གྱི་ལྷ་ཚོགས་ཞལ་གཟིགས་ཤིང༌། ཐུན་མོང་གི་དངོས་གྲུབ་བརྙེས་པའི་ཚུལ་བསྟན། དེ་ནས་རྒྱས་སྲས་མ་ཏཾ་གིས་ཁྱོད་རིགས་བཟང་བའི་ང་རྒྱལ་བཅག་པའི་ཕྱིར་ཤར་ཕྱོགས་བྷ་ག་ལའི་རྒྱུད་རིང་པོ་ན་ཧ་རི་ཀཱི་ལ་བྱ་བའི་གྲོང་ཁྱེར་སྔོན་རཱ་ཛ་ཨུ་མ་ཀེ་ར་བྱ་བའི་སྤྲུལ་པའི་རྒྱལ་པོས་བྱིན་བརླབས་པའི་གནས་སྒྲུབ་ཐག་ཉེ་ལ་ལམ་མྱུར་བའི་སར་པཉྩ་པ་ཎ་ཞེས་བྱ་བའི་ཚོང་འདུས་ཞིག་ཡོད་པས། དེར་ཌཱ་རི་མ་སྨད་འཚོང་མའི་གཡོག་གང་བསྒོ་བ་གྱིས་ལ་རིང་པོར་མི་ཐོགས་པར་མཆོག་གི་དངོས་གྲུབ་འགྲུབ་ནས་འགྲོ་བ་མང་པོ་ཡང་གྲོལ་བར་འགྱུར་རོ། །ཞེས་ལུང་བསྟན་པས། ཏཻ་ལོ་པས་བླ་མའི་བཀའ་བཞིན་ཌཱ་རི་མའི་གཡོག་མཛད་དོ། །མཚན་མོ་སྐྱེས་པ་འགུགས་པ་དང་སྐྱེལ་བའི་གྲོགས་བྱེད། ཉིན་པར་ཏིལ་བརྡུང་ཤིང་སེམས་ཉིད་འདུ་འབྲལ་མེད་པར་བསྐྱངས་བས་ཅི་ཞིག་ལྟར་ན་ཏིལ་གྱི་ལས་དེ་ལ་བརྟེན་ཏེ། སེམས་ཉིད་ལྷན་ཅིག་སྐྱེས་པའི་ཡེ་ཤེས་ཀྱི་གནས་ལུགས་དེ་ཁོ་ན་ཉིད་མངོན་དུ་གྱུར་ཅིང༌། ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་སྟེ། དེ་ཉིད་དུ་དྲུག་པ་རྡོ་རྗེ་འཆང་ཆེན་པོ་དངོས་སུ་མཇལ་ནས་རྒྱུད་སྡེ་བཞི་ལ་སོགས་པའི་གདམས་པ་ཐམས་ཅད་མ་ལུས་པར་གསན་པ་ཡིན་ཏེ། གྲུབ་ཆེན་རྡོ་རྗེ་གདན་པ་ཆེན་པོས་གྲུབ་ཐོབ་བརྒྱད་ཅུའི་བསྟོད་པ་ལས། ཏིལ་བརྡུང་མཆོག་གི་དངོས་གྲུབ་བརྙེས། བྷ་ག་ལ་རུ་སངས་རྒྱས་མཇལ། ཏཻ་ལོ་པ་ཞེས་བྱ་བ་ཡི། བླ་མ་དེ་ལ་ཕྱག་འཚལ་ལོ། །ཅེས་བསྟོད་པ་ལྟར་རོ། །དེར་ཏཻ་ལོ་པས་རྫུ་འཕྲུལ་གྱི་བཀོད་པ་དུ་མ་མཛད་ཅིང་བཞུགས་པས་གྲོང་ཁྱེར་གྱི་མི་རྣམས་ཀྱི་མཐོང་སྣང་ལ། ལ་ལས་མེ་དཔུང་ཆེན་པོ་འབར་བའི་དབུས་ན་བཞུགས་པ་ལ་མར་མེ་བཅུ་བཞིའི་བསྐོར་བ་མཐོང༌། ལ་ལས་འོད་ཀྱིས་ཕུང་པོའི་ནང་དུ་དགེ་སློང་གི་ཆ་ལུགས་མཛད་ནས་མཉམ་བཞག་ལ་བཞུགས་པ་མཐོང༌། ལ་ལས་རྣལ་འབྱོར་པ་དུར་ཁྲོད་ཀྱི་ཆས་ཀྱིས་བརྒྱན་པ་གཅིག་ལ་ལྷའི་བུ་དང་བུ་མོ་མང་པོས་ཕྱག་དང་བསྐོར་བ་བྱེད་ཅིང༌། མེ་ཏོག་གཏོར་བ་ལ་སོགས་མཐོང་སྣང་མི་འདྲ་བ་སྣ་ཚོགས་བྱུང་ནས། དེ་རྣམས་ཀྱིས་ཌཱ་རི་མོ་ལ་ཁྱོད་ཀྱི་གཡོག་པོ་དེ་རྫུ་འཕྲུལ་སྟོན་ནུས་པའི་གྲུབ་ཐོབ་གཅིག་ཏུ་འདུག་པས་ཁྱོད་ཀྱིས་སྡིིག་མང་པོ་བསགས་པ་མ་ལེགས་ཞེས་སྨྲས་པས། མོ་བལྟ་རུ་ཕྱིན་པ་ལ་མདུན་གྱི་ནམ་མཁར་འོད་ཕུང་གི་ནང་དུ་རྒྱལ་པོ་རོལ་པའི་ཆ་ལུགས་སུ་བཞུགས་ནས། ཕྱག་གཡོན་པས་གཏུན་ཤིང་ལྷུང་ཐབས་སུ་བསྣམས་ནས། གཡས་པས་ཏིལ་བརྡུང་བའི་ཚུལ་མཛད་པ་མཐོང་ཏེ། མོ་དད་ཅིང་གུས་པས་ཕྱག་དང་བསྐོར་བ་བྱས་ཏེ་ནང་དུ་སྤྱན་དྲངས་ནས་ཞབས་སྤྱི་བོར་བླངས་ཏེ། རིན་པོ་ཆེའི་མནྜལ་ཕུལ་ནས༌། རྗེ་བཙུན་ཁྱེད་གྲུབ་ཐོབ་ཆེན་པོར་འདུག་པ་ལ་ངས་དེ་ལྟར་མ་ཤེས་ནས་སྡིག་པ་མང་པོ་བསགས་པ་བཟོད་པར་གསོལ། ད་ཕྱིན་ཆད་རྗེས་སུ་བཟུང་ཞིང་སྐྱབས་སུ་གསོལ་ཞུས་པས། ཏཻ་ལོ་པས་ཁྱོད་ཀྱིས་ང་ལ་གང་ཟག་དམ་པ་ཆ་ཡོད་བཞིན་དུ་ལས་བཅོལ་བ་ནི་མ་ཡིན་པས་ཉེས་པ་མི་འོང། ངས་ཁྱོད་ཀྱི་ཏིལ་བརྡུང་པ་ལ་བརྟེན་ནས་ལམ་སྦྱངས་པ་ཡིན་པས་ད་ང་ཡི་རྒྱུད་ལ་སྐྱེས་པའི་ཆོས་ཉིད་སྐྱེ་བ་མེད་པའི་གཉུག་མ་ལྷན་ཅིག་སྐྱེས་པའི་ཡེ་ཤེས་དེ་ཁྱོད་ཀྱི་རྒྱུད་ལ་སྐྱེ་བར་གྱུར་ཅིག་གསུངས་ནས་མེ་ཏོག་སྤྱི་བོར་བཞག་པ་ཙམ་གྱིས་མ་རིག་པའི་སྒྲིབ་གཡོགས་དང་བྲལ་ནས་གཉུག་མ་ལྷན་ཅིག་སྐྱེས་པའི་ཡེ་ཤེས་མངོན་དུ་གྱུར་ཅིང༌། ཌཱ་རི་མོ་དེ་ཉིད་དུ་གྲོལ་ཏོ། །དེའི་ཚེ་སྤྲུལ་པའི་རྣལ་འབྱོར་པ་ཆེན་པོ་གཅིག་བྱོན་ནས་ཌཱ་རི་མ་བྱིན་གྱིས་བརླབས་པ་ཙམ་གྱིས་གྲུབ་པ་ཐོབ་བོ། །ཞེས་གྲོང་ཁྱེར་ཐམས་ཅད་དུ་གླེང་བ་རྒྱལ་པོའི་སྙན་དུ་ཐོས་པས་ངོ་མཚར་སྐྱེས་ཏེ། རྒྱལ་བློན་བཙུན་མོ་འཁོར་འབུམ་ཕྲག་དུ་མ་རྣམས་ཡན་ལག་བཞི་པའི་དཔུང་དང་བཅས་ཏེ། ཏཻ་ལོ་པའི་མདུན་དུ་བྱོན་པ་ལ། དེ་དག་འདུལ་བའི་དུས་ལ་བབ་པར་དགོངས་ཞིང་སྤྲོ་བ་སྐྱེས་པའི་སླད་དུ། ཚོང་དུས་ཀྱི་དབུས་སུ་ཤིང་རྟ་ལ་བདུན་སྲིད་ཙམ་གྱིས་ནམ་མཁའ་ལ་འཕགས་ཏེ། ཌཱ་རི་མོ་དང་བཅས་པ་འཇའ་འོད་ཀྱི་ནང་དུ་ཏིལ་བརྡུང་བའི་ཚུལ་མཛད་ནས་ཚངས་པའི་དབྱངས་ཀྱིས་ལྟ་བ་རྡོ་རྗེའི་མགུར་བཞེངས་པ། གང་ཞིག་སྙིང་པོར་གྱུར་པ་ཏིལ་གྱི་མར། ཞེས་སོགས་དོ་ཧ་རྡོ་རྗེའི་གསུངས་ཚངས་པའི་དབྱངས་ཀྱིས་བཀའ་སྩལ་པ་ཀུན་གྱིས་ཐོས་ཏེ་དེར་འདུས་པ་ཐམས་ཅད་ཉོན་མོངས་པའི་འཆིང་བ་ལས་གྲོལ་ཏེ་ལྷན་ཅིག་སྐྱེས་པའི་ཡེ་ཤེས་མངོན་དུ་གྱུར་ནས་ཡུལ་ཁམས་དེ་རེ་ཞིག་སྟོང་པར་གྱུར་ཏོ། །དེ་ནས་ཨོན་ཏན་ཏའི་གཙུག་ལག་ཁང་གཙུག་གི་ནོར་བུའི་དགོན་པར་བྱོན་པ་ལ། ཏཻ་ལོ་པ་ནུབ་ཕྱོགས་ཨོ་རྒྱན་གྱི་ཡུལ་དུ་མངོན་སུམ་དུ་བྱོན་ནས་རྣལ་འབྱོར་མའི་དྲུང་ནས་གསང་སྔགས་ཀྱི་རྒྱུད་སྡེ་མང་པོ་མཁའ་འགྲོ་སྙན་བརྒྱུད་ཀྱི་གདམས་པ་རྣམས་གདན་དྲངས། རྫུ་འཕྲུལ་སྣ་ཚོགས་པའི་སྒོ་ནས་ཤར་ཕྱོགས་བྷཾ་ག་ལ་ཡི་འགྲོ་བ་མ་ལུས་པ་གྲོལ་བར་མཛད་དོ་ཞེས་སྙན་གྲགས་ཕྱོགས་ཐམས་ཅད་དུ་ཁྱབ་པས། པཎྜི་ཏ་རྣམས་དང་ཀུ་སུ་ལུ་པ་སྐྱེ་བོ་ཕལ་མོ་ཆེ་ཐམས་ཅད་ཐེ་ཚོམ་གཅོད་པ་དང་ཞལ་བལྟ་བར་འདུས། ཁྱེད་ཀྱི་བླ་མ་སུ་ཡིན་དྲིས་པ་ལ། ང་ལ་མི་ཡི་བླ་མ་མེད། ང་ཡི་བླ་མ་ཐམས་ཅད་མཁྱེན། ཞེས་གསུངས་པས། འགའ་ཞིག་ཐེ་ཚོམ་སྐྱེས་ཏེ། ཡང་ང་ལ་མི་ཡི་བླ་མ་ཡོད་གསུངས། ཇི་ལྟར་ལགས་ཞུས་པས། ཀླུ་སྒྲུབ་ཙཱརྻལྭ་བ་པ། སྐལ་པ་བཟང་མོ་ང་ཡི་ནི། བཀའ་བབས་བཞི་ཡི་བླ་མ་ཡིན། ཞེས་གསུངས་ཤིང་ཐམས་ཅད་བདེ་བ་ལ་བཀོད་དོ། །རྒྱལ་པོ་མེ་ཏོག་གླིང་པར་གྲགས་པས་ཚོགས་ཀྱི་སློབ་དཔོན་དུ་སྤྱན་དྲངས་པར་མཐོང་སྣང་སྣ་ཚོགས་སུ་བྱུང་བ་འདི་ཅི་ལགས་ཞུས་པར། ཏཻ་ལོ་པའི་ཞལ་ནས། ང་ལུས་ཀྱཻ་ཡི་རྡོ་རྗེ་སྟེ། ངག་ནི་མ་ཧཱ་མཱ་ཡཱ་ཡིན། སེམས་ནི་འཁོར་ལོ་བདེ་མཆོག་སྟེ། དབང་པོ་གསང་བ་འདུས་པ་ཡིན། ཡན་ལག་དགྲ་རྒྱུད་ནག་པོ་ལ། ཉིང་ལག་རྡོ་རྗེ་འཇིགས་བྱེད་ཡིན། །བ་སྤུ་དུས་གསུམ་སངས་རྒྱས་ཏེ། །བདེ་གཤེགས་སྐུ་གསུང་ཐུགས་དང་ནི། །ང་ལུས་དབྱེར་མེད་བརྗོད་དུ་མེད། །ཅེས་གསུངས་ནས་རྒྱལ་པོ་འཁོར་བཅས་བདེ་བ་ལ་བཀོད་དོ། །འདི་ནི་དུས་གསུམ་སངས་རྒྱས་ཐམས་ཅད་ཀྱི་ངོ་བོ་ཡིན་པར་འདུག་ཅེས་གྲགས་སོ། དེ་ལྟ་བུའི་བདག་ཉིད་ཆེན་པོ་དེས། གདུལ་བྱ་རྣམས་བཏུལ་ཞིང་སྨིན་གྲོལ་གྱི་ལམ་ལ་བཀོད་པའི་ཚུལ་གསུམ་ལས་རྣལ་འབྱོར་པ་བརྒྱད་བརྟུལ་བའི་ཚུལ་དང༌། ཉིན་གཅིག་ལ་སྤྲུལ་པ་དུ་མ་བསྟན་ཚུལ་དང༌། རྒྱ་གར་ཕྱོགས་བཞིའི་དུར་ཁྲོད་ཡུལ་ཁམས་བདེ་བ་ལ་བཀོད་པའི་ཚུལ་ཏེ་དེ་དག་ནི་ཟབ་ཅིང་རྒྱ་ཆེ་བའི་རྣམ་ཐར་བསམ་གྱིས་མི་ཁྱབ་པ་མཆིས་མོད་འདིར་ཡི་གེས་འཇིགས་ནས་བསྡུས་དོན་ཙམ་སྟེ་ཞིབ་ཏུ་ནི་གོང་མའི་གསུང་སྒྲོས་ལས་རྟོགས་པར་བྱ་བར་རིགས་སོ། །དེ་ལྟར་སངས་རྒྱས་གཉིས་པའི་ཚུལ་འཆང་གྲུབ་པའི་སློབ་དཔོན་དེ་ནི་བདེ་མཆོག་རྡོ་རྗེ་ཕྲེང་བ་ཞེས་བྱ་བའི་རྒྱུད་ལེའུ་དྲུག་ཅུ་རྩ་བཞི་པའི་ལེའུ་བཅུ་གསུམ་པའི་ནང་ནས། བདེན་གཉིས་མཐའ་དང་བྲལ་བ་ཏཻ་ལོ་པ། །རིག་པའི་གནས་ལྔ་དག་ལ་མཁས་པ་ནི། །དེ་བཞིན་གཤེགས་པའི་སྤྲུལ་སྐུ་ཁྱོད་ལུང་བསྟན། །ཁྱོད་ཀྱི་བླ་མ་ཐམས་ཅད་མཁྱེན་པ་ཡིན། །ཞེས་ལུང་བསྟན་པ་ལྟར་འཁོར་ལོ་བདེ་མཆོག་མི་ཡི་བླ་མའི་ཚུལ་བཟུང་ནས། རིག་པའི་གནས་ལྔ་དག་ལ་མཁས་པའི་གྲུབ་ཐོབ་གཅིག་གིས་འདུལ་བའི་དུས་ལ་བབ་པའི་གདུལ་བྱ་རྣམས་ཀྱི་སྣང་ངོར་རྫུ་འཕྲུལ་སྣ་ཚོགས་བསྟན་ནས་སྨིན་གྲོལ་གྱི་ལམ་ལ་བཀོད་དོ། །སྐྱེ་འཆི་མེད་པ་རྡོ་རྗེའི་སྐུ་བརྙེས་ནས་ད་ལྟ་ཡང་བཞུགས་ཤིང༌། འགྲོ་བའི་དོན་དཔག་ཏུ་མེད་པ་རྒྱུན་ཆད་མེད་པར་གང་ལ་གང་འདུལ་གྱི་ཚུལ་དུ་མཛད་པ་ཡིན་ཏེ། མདོར་ན་གདུལ་བྱའི་བློ་ངོར་སྣང་ཚུལ་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་པ་གཅིག་བསྟན་པས། འདི་ཡི་རྣམ་ཐར་ཕྱོགས་གཅིག་འདི་ལྟར་ཡིན་གྱི། ངེས་ངེས་མེད་ཀྱང་འདིར་བླ་མ་གོང་མ་རྣམས་ཀྱི་གསུང་སྒྲོས་ཆ་ཤས་ཙམ་གཅིག་བརྗོད་པའོ། །འདི་ལ་སློབ་མ་དཔག་ཏུ་མེད་པ་ཡོད་པའི་ནང་ནས། རྒྱུད་འཛིན་དམ་པ་ནི། རྒྱལ་རིགས་ལ་ནཱ་རོ་པ། བྲམ་ཟེའི་རིགས་ལ་རི་རི་པ། རྗེའུ་རིགས་ལ་ཀ་སོ་རི་པའོ། །གཞན་ཡང་སྤྲུལ་པས་བཏུལ་བའི་གྲུབ་ཐོབ་བརྒྱད་དང༌། དཔལ་མཻ་ཏྲི་ཛོ་ཀི་ལ་སོགས་པ་ཡང་འདིའི་བརྒྱུད་འཛིན་གྱིས་སློབ་མར་གསུངས་ཤིང༌། མདོར་ན་ཟ་ཧོར་གྱི་རྒྱལ་པོ་ལ་སོགས་འབུམ་ཕྲག་གྲངས་མེད་པ་གྲུབ་པ་བརྙེས་ནས་མཁའ་སྤྱོད་དུ་བཞུད་དོ། །

གསུམ་པ་གནས་ལྔ་རིག་པའི་པཎ་ཆེན་ནཱ་རོ་པའི་རྣམ་ཐར་ནི། །དེའང་སྐུ་འཁྲུངས་ཡུལ་ཤར་ཕྱོགས་བྷ་ག་ལའི་ས་ཕྱོགས། ཤྲཱི་ནཱ་ག་ད་ཡི་གྲོང་ཁྱེར་ཛམྦུ་བྱ་བར་ཡབ་ས་སྐྱོང་རྒྱལ་པོ་དགེ་བའི་གོ་ཆ་དང༌། ཡུམ་བྲམ་ཟེ་མོ་དཔལ་གྱི་བློ་གྲོས་གཉིས་ལ་སྲས་མོ་དཔལ་གྱི་ཡེ་ཤེས་བྱ་བ་ཡོད་ཀྱང་སྲས་ཀྱི་དབེན་པར་གྱུར་ཏེ། དཀོན་མཆོག་མཆོད་ཅིང་སྲིད་སྒྲུབ་ཀྱི་བྱ་བར་བརྩོན་པས་དུས་རེས་གཅིག་སྟག་ལོ་སྟག་གི་ཟླ་བ་ཚེས་བཅོ་ལྔ་སྐར་མ་རྒྱལ་གྱི་ཉིན་པར་ངོ་མཚར་བའི་སྲས་གཅིག་སྐུ་བལྟམས། དེར་བྲམ་ཟེ་མཚན་མཁན་ལ་བསྟན་པས། འདི་ནི་ཟས་གཙང་སྲས་བཞིན་དུ། མ་བྱུང་མི་ཡི་བདག་པོར་འགྱུར། བྱུང་ན་སངས་རྒྱས་སྲས་པོར་འགྱུར། ཞེས་ལུང་བསྟན་ཅིང་རྒྱལ་བུའི་མཚན་ཀུན་ཏུ་བཟང་པོར་གསོལ། ཡབ་ཡུམ་གྱི་རྒྱལ་སྲིད་སྐྱོང་ཕྱིར་འདོད་ཡོན་གྱིས་བློ་བྲིད་ཀྱང་འཁོར་བ་སྙིང་པོ་མེད་པར་དགོངས་ནས་བཤོལ་མ་ཐེབས་པར་ཁ་ཆེའི་གྲོང་ཁྱེར་པུརྞར་བྱོན་ཏེ་བྲམ་ཟེའི་གནས་བརྟན་ནམ་མཁའ་ལས་དགེ་བསྙེན་གྱི་སྡོམ་པ་བླངས། ནམ་མཁའི་སྙིང་པོར་གསོལ། མངོན་པ་སོགས་རིག་གནས་བསླབ་པས་མཁས་པར་གྱུར། སླར་ཡབ་ཡུམ་གྱི་དྲུང་དུ་བྱོན་པར། ཡབ་ཀྱི་ཞལ་ནས་ན་རེ། ཕ་མའི་ངག་བཅག་དམ་ཆོས་ཅི། ཁྱིམ་གྱི་གནས་སུ་བཞུགས་པར་རིགས། ཞེས་སྨྲས་པར། འགྲོ་དྲུག་ཕ་མའི་རང་བཞིན་ལ། གཅིག་གཉིས་ཕ་མར་མ་ངེས་ཀྱང༌། བཀའ་བཅག་མི་རུང་ཁྱིམ་རིགས་ན། །རྟོག་མེད་གཙང་སྦྲ་ལ་གནས་ཤིང༌། །མུ་སྟེགས་དྲི་མེད་ཐེག་ཆེན་རིགས། རྙེད་ན་བཀའ་བ་བཀའ་སྩོལ་ཅིག །ཅེས་གསུངས་པས་རྒྱལ་བློན་ཀུན་དགྱེས་ཏེ་གྲོས་བཏབ། བློན་པོ་ཤེས་རབ་གོ་ཆས་ཤར་ཕྱོགས་ཀྱི་བྲམ་ཟེ་སྐར་རྒྱལ་གྱི་བུ་མོ་མཚན་ལྡན་ཞིག་ཡོད་པ་ཐབས་ཀྱིས་ལོན་པར་བྱེད་ཟེར་བར་ཀུན་གྲོས་འཆམ། དེ་ནས་བློན་པོའི་ཐབས་ཀྱིས་དྲི་མེད་མ་ཁུག་སྟེ་རྒྱལ་བུའི་བཙུན་མོར་སྤྱན་དྲངས་ནས་ཕུལ། རྒྱལ་བུ་ཡང་བཙུན་མོ་དྲི་མེད་དང་ལྷན་ཅིག་དགའ་མགུར་ལོངས་སྤྱོད་ཅིང་རྒྱལ་སྲིད་ཡུན་རིང་དུ་བསྐྱང། དུས་ཤིག་ན་རྒྱལ་བུ་ཉིད་ནས་འཁོར་བ་ལ་སྙིང་པོ་མེད་པས་ཆོས་བྱེད་དགོས་གསུངས་ཙ་ན། དྲི་མེད་མས་ཀྱང་དེ་ལྟར་དགོངས་ན་བདག་གི་གེགས་མི་བྱེད། ཡབ་ཡུམ་གྱིས་གེགས་མི་བྱེད་པའི་ཐབས་སུ་རང་གིས་མི་སྡུག་པའི་སྤྱོད་པ་ལ་བསྙད་ནས་སོ་སོར་འགྲོ་བ་འཐད། བདག་ཀྱང་རྣམ་ཀུན་ཐུགས་རྗེས་འཛིན་པར་ཞུ་ཞེས་གྲོས་འཆམ་པར་མཛད། དེ་ནས་རྒྱལ་པོས་དུས་སྟོན་སར་ཀུན་གླུ་གར་རྩེ་འཇོའི་སྐབས་དྲི་མེད་མས་མི་སྡུག་པའི་སྤྱོད་པ་སྣ་ཚོགས་མཛད་པས། ཐམས་ཅད་ཀྱིས་སྨྱོན་པ་ཡིན་ནམ་ཟེར་བར་བསྙད་དེ་རང་ཡུལ་དུ་ལོག །རྒྱལ་བུས་ཀྱང༌། བུད་མེད་སྐྱོན་ནི་མཐའ་ཡས་པ། གཡོ་སྒྱུ་དག་གི་འདམ་རྫབ་ཏུ། རང་སེམས་གླང་པོ་བྱིང་བར་འགྱུར། དེ་ཕྱིར་བདག་ནི་རབ་ཏུ་བྱུང༌། གསུངས་ནས་གནས་གཞི་དགའ་ཚལ་དུ་བྱོན་ནས། མཁན་པོ་སངས་རྒྱས་སྐྱབས་དང་སློབ་དཔོན་ཡེ་ཤེས་འོད་གསལ་ལས་དགེ་ཚུལ་གྱི་སྡོམ་པ་བླངས། མཚན་སངས་རྒྱས་ཡེ་ཤེས་སུ་བཏགས། ཡང་མཁན་པོ་ཆོས་ཀྱི་བླ་མ་སློབ་དཔོན་ཆོས་ཀྱི་ཡེ་ཤེས་གསང་སྟེ་ཆོས་ཀྱི་བྱང་ཆུབ་རྣམས་ལས་དགེ་སློང་གི་སྡོམ་པ་རྣམ་པར་དག་པ་བླངས། མཚན་ཆོས་ཀྱི་རྒྱལ་མཚན་གསོལ། མཁན་སློབ་ལས་ཐོས་བསམ་མཐར་ཕྱིན་པ་མཛད། བི་ཀཱ་མ་ལ་ཤཱི་ལའི་གཙུག་ལག་ཏུ་བྱོན་ནས་འཆད་ཉན་གྱིས་དུས་འདའ་བར་བསྟན་པ་སྤེལ། བྱང་པཱུ་ལ་ཧ་རིར་བྱོན་ནས་བཤད་སྒྲུབ་ཚུལ་བཞིན་མཛད། དུས་རེ་ཤིག་ན་ནཱ་ལེནྡྲའི་བྱང་སྒོ་སྲུང་བའི་པཎྜི་ཏར་བསྐོས་ནས་གདན་དྲངས་བསུ་བ་མཛད། དེ་ནས་མུ་སྟེགས་ཀྱི་སྟོན་པ་མང་པོ་འདུས་ནས་རྩོད་པ་བྱས་པས་གནས་བརྟན་བསྟན་པ་འཛིན་པ་རྒྱལ་ཏེ་ཕྱི་པ་རྣམས་ནང་པའི་བསྟན་པརབཙུད། བསྟན་པ་དར་ཞིང་རྒྱས་པར་མཛད་ནས་གསུངས་པ། ཐ་སྙད་དོན་ཚུལ་ལྕགས་ཀྱུ་ཡིས། །རྒོལ་ངན་མཆིན་པ་གཟན་ལ་དྲངས། །རིག་པ་སྒྲ་ཚད་རལ་གྲི་ཡིས། །རྒོལ་ངན་སྡོང་པོ་རྩད་ནས་གཅོད། །ལུང་རིགས་ཡེ་ཤེས་སྒྲོན་མེ་ཡིས། །རྒོལ་ངན་མ་རིག་མུན་པ་བསལ། །སྡོམ་གསུམ་དག་པའི་ཆུ་རྒྱུན་གྱིས། །མ་དག་འཆལ་བའི་དྲི་མ་འཁྲུད། །མན་ངག་ལ་བརྟེན་འཁྲུལ་འཁོར་གྱིས། །སྒྱུ་མ་ལོག་ལྟའི་གྲོང་ཁྱེར་འཇོམས། །རྒྱལ་པོ་པཎ་ཆེན་སྤྱན་སྔ་རུ། །ནཱ་ལེནྡྲ་རུ་བདར་བདར་ནས། །མུ་སྟེགས་ལྗོན་ཤིང་རྩད་ནས་བཅད། །སངས་རྒྱས་བསྟན་པའི་རྒྱལ་མཚན་བཙུགས། །ཞེས་གསུངས་ཤིང་ཕྱི་ནང་གི་རྒོལ་བ་གང་ལ་ཡང་འཇིགས་པ་མེད་པས། མཚན་དཔལ་ལྡན་འཇིགས་མེད་གྲགས་པ་ཞེས་གྲགས་སོ། །དེ་ནས་ཆོས་སྤྱོད་ཀྱི་རིམ་པ་ཁོ་ནར་བརྩོན་ཞིང་བཞུགས་པའི་སྐབས། མདུན་དུ་བུད་མེད་རྒན་མོ་མི་སྡུག་པའི་མཚན་མ་སུམ་ཅུ་རྩ་དྲུག་དང་ལྡན་པ། ངུ་ཞིང་འཁར་བ་ལ་བརྟེན་པ་ན་རེ། ཁྱོད་ཀྱི་བལྟ་ས་དེ་ཅི་ཡིན་ཟེར། གསུང་རབ་ཡིན་བྱས། ཁྱོད་ཀྱིས་དེའི་དོན་ཤེས་སམ་ཚིག་ཤེས་ཟེར། དོན་ཤེས་བྱས་པས་མི་དགའ་ཞིང་ངུ་བར་སྣང༌། ཚིག་ཤེས་བྱས་པས་དགའ་ནས་དགོད་འདུག། དེའི་དོན་ནི་གོང་མ་དོན་མ་ཤེས་པས་མ་དགའ་བ་དང༌། འོག་མ་དྲང་པོར་སྨྲས་པས་དགའ་བ་ཡིན་པར་སྣང༌། འོ་ན་དོན་ཤེས་པ་སུ་ཡོད་བྱས་པས་ང་ཡི་མིང་པོ་ཡོད་ཟེར། ཁོ་བོས་མཇལ་བར་ཞུ་བྱས་པས། བརྩོན་འགྲུས་དྲག་ཏུ་བསྐྱེད་ལ་གསོལ་བ་བཏབ་ན་མཇལ་བར་འགྱུར་ཟེར་ནས་ན་ཆུང་མཛེས་མ་ཞིག་ཏུ་གྱུར་ནས་མི་སྣང་བར་གྱུར་ཏོ། །དེ་ནས་ཡེ་ཤེས་གྲུབ་ཉིད་ཐུགས་སྐྱོ་བས་གསུངས་པ། འཁོར་བའི་དབང་པོ་གཞན་སྐྱོན་རྟོག ཅེས་སོགས་འཁོར་བའི་ཉེས་དམིགས་སུམ་ཅུ་གསུངས་ནས་དཔེ་ཅ་ལྷ་རྟེན་རྣམས་ནཱ་ལེནྡྲར་བསྐྱེལ་ནས་སྤོང་དག་མཛད། ནཱ་ལེནྡྲའི་སྒོ་སྲུང་རྣམས་དང་འདུས་པ་རྣམས་ཀྱིས་བཤོལ་བཏབ་ཀྱང་མ་ཁོག་པར་ཆོས་གོས་རྣམ་གསུམ་འཁར་གསིལ་བྱང་ཆུབ་ཆེན་པོར་ཕུལ་ནས་ཀུ་སུ་ལུའི་ཆས་མཛད་དེ། དགྱེས་རྡོར་ལ་བརྟེན་ནས་བླ་མ་ཚོལ་དགོངས་པར་ནམ་མཁའ་ནས་སྒྲ་བསྒྲགས་པར་འདི་སྐད་དོ། །བདེ་མཆོག་འཁོར་ལོ་ལ་བརྟེན་ནས། །བླ་མ་སངས་རྒྱས་ལུང་བསྟན་འབྱུང༌། གསུངས་ནས་ས་ཕྱོགས་ཡིད་དུ་འོང་བ་ནགས་ཚལ་ཕུན་སུམ་ཚོགས་པ་དང་ལྡན་པ། མེ་ཏོག་སྣམ་བུ་ཅན་གྱི་དུར་ཁྲོད་བྱ་བ་གཅིག་ཏུ་རྩའི་སྤྱིལ་པོ་གཅིག་ཏུ་བྱས་ཏེ་བདེ་མཆོག་གི་ཡི་གེ་བདུན་པ། འབུམ་ཕྲག་གསུམ་བཟླས་པས་ས་གཡོ་བ་དང༌། སྒྲ་སྙན་པ་དང་འཇའ་འོད་དྲི་ཞིམ་པོས་ཁྱབ་སྟེ། ནམ་མཁའ་ལས། ཤར་ཕྱོགས་ངོས་སུ་ཏཻ་ལོ་པ་ཞེས། བླ་མ་སངས་རྒྱས་ཡོད་ཅེས་སོང༌། ཞེས་གྲགས་པ་ལ། ནཱ་རོ་པས། དེང་ནས་བརྩམས་ཏེ་བདག་ཉིད་ཀྱིས། ལུང་བསྟན་བླ་མ་ཅིས་མི་བཙལ། ཞེས་གསུངས་ནས་ཕྱོགས་ཐམས་ཅད་དུ་ལོ་མང་དུ་ཚོལ་ཞིང་སོང་བ་ལས། ཐོག་མར་བྲག་རོང་ཞིག་ཏུ་མཛེ་མོ་ཞིག་གི་ལམ་བགག་པ་ནས་བརྩམས། བླ་མས་སྤྲུལ་པའི་ཆོ་འཕྲུལ་མི་འདྲ་བ་བཅུ་གསུམ་བསྟན་པས་ངོ་མཚར་ཞིང་ཀུན་མི་སྣང་བར་གྱུར་པས། མཐར་ཡི་ཐང་ཆད་པའི་ཚུལ་གྱིས། ད་ནི་ལུས་ཐོག་འདིར་བླ་མ་དམ་པ་དང་མི་མཇལ་བར་འདུག་པས། དེའི་གེག་བྱེད་པའི་ལུས་འདི་ལེན་པས་ལྟོས་མེད་དུ་ངེས་པར་དོར་ནས། སྐྱེ་བ་ཕྱི་མར་མཇལ་བའི་སྨོན་ལམ་འདེབས་སྙམས་པའི་ཐུགས་ཐག་རྦད་ཀྱིས་བཅད་ཏེ། ཕྱག་གཡོན་པས་སྤྱི་བོའི་སྐྲ་ནས་བཟུང་གཡས་པས་སྤུ་གྲི་ཕྱར་ཞིང་སྨྲེ་སྔགས་བཏོན་པ་ནི། མཁའ་འགྲོས་ལུང་བསྟན་རྗེས་འབྲང་ནས། བསྟན་རྩ་དགེ་འདུན་སྡེ་བོར་ཞིང༌། སྡོམ་ལྡན་ཆོས་ཀྱི་གྲོགས་པོ་སྤངས། ཆོས་ལྡན་ཁྲིམས་ཀྱི་བཀའ་བཅག་སྟེ། བརྩེ་ལྡན་གྲོགས་ཀྱི་ངག་བཅག་ནས། སྡུག་བསྔལ་དཀའ་བ་ཉམས་བླངས་ཀྱང༌། བླ་མ་རྙེད་པར་མ་གྱུར་པ། བདག་གི་ལུས་འདིས་གེགས་བྱས་པས། འདི་དོར་བླ་མ་ཅིས་མི་བཙལ། ཅེས་བརྗོད་མ་ཐག་ནམ་མཁའ་ནས། གཏན་དུ་འགྲོགས་ཀྱང་མ་མཐོང་སྟེ། བླ་མ་མ་རྙེད་སངས་རྒྱས་དག །བསད་པས་བླ་མ་ག་ལ་རྙེད། ཁྱོད་འདོད་སྤངས་པ་ངོ་མིན་ནམ། ཞེས་གསུངས་པ་དང༌། སྤྱན་ཕྱེས་ནས་བལྟས་པས། མདུན་གྱི་ནམ་མཁར་འཇའ་འོད་ཀྱི་ནང་དུ། ཨ་ཙ་ར་ནག་པོ་གཟི་མདངས་ཅན། སྤྱན་རྩ་དམར་ཙ་ལེ་བ་ཞལ་འཛུམ་བག་ལྡན་པ། དབུ་སྐྲ་ཐོར་ཚུགས་ཅན། ཕྱག་གཉིས་མཉམ་གཞག་དང་སྐྱབས་སྦྱིན་མཛད་ཅིང༌། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ་ཝལ་གྱིས་མཐོང་བས། ནཱ་རོ་པ་ཡུས་ཀྱིས་མནང་སྟེ་མཆི་མ་ཤོར་ནས། ཐལ་མོ་སྦྱར་ཞིང་གསོལ་བ། ནམ་མཁའ་སྤྲིན་བཞིན་ངེས་མེད་པས། བླ་མ་བཙལ་བས་ག་ལ་རྙེད། ཀྱཻ་མ་ཐུགས་རྗེས་མི་གཟིགས་སམ། ད་ནི་ཐུགས་རྗེས་བཟུང་དུ་གསོལ། ཅེས་ཞུས་པས། ཏཻ་ལོ་པའི་ཞལ་ནས། སྣོད་ལྡན་དྲི་མེད་གཟི་བརྗིད་ཁྱོད། མཁའ་འགྲོ་མ་ཡི་གསང་བའི་གནས། གསང་སྔགས་ཡིད་བཞིན་ནོར་བུ་ཡི། དབང་གི་སྣོད་དུ་ད་གྱུར་ཏོ། །ཁྱོད་དང་པོ་མཛེ་མོ་དང་འཕྲད་པའི་དུས་ནས་ང་དང་འགྲོགས་པ་ཡིན་ཏེ། སྒྲིབ་པས་བསྒྲིབས་ནས་དེ་ལྟར་མ་མཐོང་ཞིང༌། ད་ལྟ་ཡང་ལུས་སྲོག་ལ་ལྟོས་པ་མེད་པའི་གདུང་ཤུགས་དྲག་པོའི་སྟོབས་ཀྱིས་སྒྲིབ་པ་དག་ནས་མཐོང་ཞིང་གདམས་ངག་གི་སྣོད་དུ་གྱུར་པ་ཡིན་གསུངས་སོ། །ད་ནི་དཀའ་བ་སྤྱད་པ་ལ་བརྟེན་ནས། བརྡ་དོན་བཀྲོལ་ཞིང་སྨིན་གྲོལ་གྱི་ལམ་བསྟན་པའི་དང་པོ་སྨིན་ལམ་དབང་གི་བསྐོར་ནི། དེ་ཡང་ཏཻ་ལོ་པ་བྱོན་ནས་ཐང་ཆེན་པོ་ཞིག་གི་དབུས་ན། ལུས་སྤང་ལ་ཕུར་པ་བཏབ་པ་བཞིན་དུ་གཡོ་འགུལ་མེད་པར་བཞུགས། ངག་སྐུགས་པ་ལྟར་མི་སྨྲ་ཞིང༌། ཐུགས་ཏིང་ངེ་འཛིན་གཉིས་སུ་མེད་པའི་ངང་ལ་གནས་པ་ལ། ནཱ་རོ་པས་ཕྱག་དང་བསྐོར་བ་བྱས་ཤིང་མནྜལ་ཕུལ་ནས་གདམས་ངག་ཞུ་བྱས་པས། ཏཻ་ལོ་པས་བརྡ་བཅུ་གཉིས་བསྟན་པ་ནི། རས་ཡུག་གཅིག་མེ་སྟག་གི་བསྲེག་པ་དང་གཅིག །ཤེལ་གོང་བསྟན་པ་དང་གཉིས། རྒྱ་མདུད་བཀྲོལ་བ་དང་གསུམ། ནོར་བུ་བསྟན་པ་དང་བཞི། ཐལ་མོ་སྦྱར་བ་དང་ལྔ། ཆུ་ཕོར་གང་འཐུང་བཅུག་པ་དང་དྲུག །ཆོས་འབྱུང་བསྟན་པ་དང་བདུན། ཆུ་སྣོད་མང་པོ་གཅིག་ཏུ་བླུག་པ་དང་བརྒྱད། ཐིག་ལེ་དམར་པོ་བྱུང་བ་དང་དགུ །མེ་ལོང་བཟུང་བ་དང་བཅུ། ལྐུགས་པའི་ཚུལ་དུ་མཛད་པ་དང་བཅུ་གཅིག། ཤིང་ཐོག་རློན་པ་གནང་བ་དང་བཅུ་གཉིས་མཛད་ནས། དེ་རྣམས་གོའམ་གསུང་པས། ནཱ་རོ་པས་དེ་རྣམས་གོ་བའི་བརྡ་བཀྲོལ་བ་ནི། དབང་དོན་མེ་སྟག་ལྟ་བུ་ཡིས། །ཉོན་མོངས་རས་ཡུག་ལྟར་བསྲེག་པས། །རས་ཀྱི་བྱ་བ་མི་བྱེད་ཀྱང༌། རས་ཀྱི་རྒྱ་ཡང་མི་ཉམས་ལྟར། །དངོས་པོའི་བྱ་བ་མི་བྱེད་ཀྱང༌། །ལྷའི་སྐུ་ལུས་གསལ་བར་སྣང༌། །བདག་རྒྱུད་ཤེལ་གོང་ལྟར་དག་པས། །ཆོས་བརྒྱད་ཚེ་འདིའི་རྒྱ་མདུད་གྲོལ། །བླ་མ་ནོར་བུ་རིན་ཆེན་ལ། དད་གུས་དབང་པོ་འགྱུར་མེད་ལྟོས། །གདམས་ངག་དྲི་མེད་ཆུ་རྒྱུན་འཐུང༌། །ཆོས་འབྱུང་སྐྱེ་བ་མེད་པ་ཡིན། །ཆོས་རྣམས་དུ་མ་རོ་གཅིག་ཡིན། །ཆོས་སྐུ་ཐིག་ལེ་རང་ལ་གནས། །མེ་ལོང་སྣང་གསལ་རང་ངོ་སྤྲད། །ལྐུགས་པས་མི་སྨྲ་རྒྱ་ཆེར་བཤད། །ཤིང་ཐོག་བདག་གཞན་དོན་གཉིས་འགྲུབ། ཅེས་བཀྲོལ་བས། ཏཻ་ལོ་པའི་ཞལ་ནས། ཁྱོད་ནི་བརྡ་ཤེས་སྐྱེས་བུ་ཡིན། །མཁའ་འགྲོ་མ་ཡི་གསང་བའི་གནད། །གསང་སྔགས་ཡིད་བཞིན་ནོར་བུ་ཡིན། །སྨིན་ལམ་སེམས་ཀྱི་མེ་ལོང་ལྟོས། །ཞེས་གསུངས་ནས། རྡུལ་ཚོན་གྱི་དཀྱིལ་འཁོར་དང༌། སིནྡྷུ་ར་འདི་ལ་བརྟེན་ནས་དབང་བསྐུར་བས་དབང་བཞི་ངོ་འཕྲོད། ད་ནི་དཀའ་བ་ཆེན་པོ་བཅུ་གཉིས་མཛད་པས་གྲོལ་ལམ་རྫོགས་པར་གནང་སྟེ། སྟེང་སྒོ་རྣམ་པར་གྲོལ་བ་དང༌། །དེ་ཡང་དང་པོ་ནི། ཨོན་ཏན་ཏའི་གཙུག་ལག་རིམ་བཅུ་གསུམ་པའི་རྩེར་བྱོན་ནས་བླ་མའི་ཅི་གསུངས་བསྒྲུབ་པ་ཡོད་ན། འདི་ནས་མར་མཆོང་ནུས་སམ་གསུངས་པས། ཐེ་ཚོམ་མེད་པར་མཆོང་བས་ཤ་རུས་ཉབ་ཉོབ་ཏུ་སོང༌། བླ་མ་བྱོན་ནས་བྱིན་རླབས་མཛད་པས་སྔར་བཞིན་སོང༌། གདམས་ངག་ཏུ་བླ་མ་བརྒྱུད་པའི་རྣམ་ཐར་རྣམས་གསུངས། བླ་མའི་བཀའ་བསྒྲུབ་མོས་གུས་བསྐྱེས་ན་ཡོན་ཏན་སྐྱེ་བའི་བརྡར་གོ །གཉིས་པ་ནགས་ཚལ་འཐུག་པོའི་དབུས་ཤིང་སྐམ་མང་དུ་བསྡུས་ལ་མེ་སྦོར་གསུངས། དེ་ལྟར་བྱས། སྐྱེས་བུ་དམ་པ་བླ་མའི་བཀའ་བསྒྲུབ་གདམས་ངག་འདོད་ན་མེར་མཆོངས་གསུངས་པས་ཐེ་ཚོམ་མེད་པར་མཆོང་བས་ལུས་ཀྱི་ཤ་ཁྲག་ཐམས་ཅད་ཚིག་པས་ཀེང་རུས་སུ་སོང༌། བླ་མ་བྱོན་བྱིན་རླབས་མཛད་པས་སྔར་བཞིན་གྱུར། གདམས་ངག་དུ་ཐུན་མོང་གི་ཆོས་སྐོར་རྣམས་གནང༌། སྣོད་བཅུད་ལྷ་དང་ལྷ་མོར་ཤར་བའི་བརྡར་གོ །གསུམ་པ་གཅོང་རོང་དོག་མོར་ཆུ་ཧུར་མོར་འབབས་པ་ལ་བླ་མའི་བཀའ་བསྒྲུབ་གདམས་ངག་འདོད་ན་འདི་ལ་ཟམ་པ་གྱིས་གསུངས། དེ་མ་ཐག་ཆུའི་སྟེང་དུ་ཉལ་ནས་ཟམ་པ་བྱས། དེའི་སྟེང་ནས་ཏཻ་ལོ་པ་ཕར་བཞུད་ཚུར་བཞུད་མཛད་པས་ནཱ་རོ་པ་ཆུ་ནང་ལྷུང་བ་ལ་སྲིན་བུ་པདྨ་དཔག་ཏུ་མེད་པས་ལུས་ཐལ་མར་ཕུག་ནས་ཟོས། ཡང་བླ་མ་བྱོན་བྱིན་རླབས་མཛད་པས་སྔ་མ་བཞིན་གྱུར། དམ་ཚིག་སྐོར་རྣམས་གནང་ནས་སྡོམ་པ་དམ་ཚིག་གི་སྐྱོན་གྱིས་མ་གོས་པར་བསྲུང་དགོས་པའི་བརྡར་གོ །བཞི་པ་གདམས་ངག་འདོད་ན་མེ་དང་སྨྱུག་མ་མར་ནག་གསུམ་ཁྱེར་ཤོག་གསུངས། དེ་རྣམས་ཕྱག་ཏུ་ཕུལ་བས་སྨྱུག་མ་མེར་བསྲང་ནས་སོ་བཏོན་མར་ནག་གིས་ངར་བླུད། ནཱ་རོ་པའི་སྐུ་ལུས་སྟེང་འོག་ཀུན་ཏུ་ཏལ་ཏལ་ཕུགས་པས་སྡུག་བསྔལ་ཟུག་ངུ་བཟོད་གླགས་མེད་པ་བྱུང༌། ཡང་བྱིན་རླབས་མཛད་པས་སྔར་བཞིན་གྱུར། གདམས་ངག་གཏུམ་མོ་ཐབས་ལམ་གྱི་ཆོས་གནང་བས་བདེ་སྟོང་ལྷན་སྐྱེས་ཀྱི་བརྡ་རུ་གོ །ལྔ་པ་ནགས་ཚལ་ཞིག་ཏུ་བཞུགས་པར་གདམས་ངག་ཞུས་པས། གདམས་ངག་འདོད་ན་བསོད་སྙོམས་གྱིས་གསུངས། སོང་བས་ཆོས་སྟོན་བྱེད་སར་ཕྱིན། འབྲས་ཆེན་ཐོད་ཕོར་གང་བྱིན་པ་བླ་མ་ལ་དྲངས་པ་ཐུགས་དགྱེས་དགྱེས་མཛད། དེ་རིང་འདིས་ཐུགས་མཉེས་ཆེ་བས་ཕྱིན་པ་དྲག་སྙམ། ཡང་ཕྱིན་པ་མ་བྱིན་པས་བཅོམ་པས་ཕོར་གང་ཐོབ་པ་བྲོས་ཏེ་ཁྱེར་བ་བླ་མར་ཕུལ། དགྱེས་བཞིན་གསོལ་ནས་ད་དུང་ཐབས་ཨི་ཡོད་གསུངས་ནས་ཆུ་བུམ་པ་གང་ཐག་པ་གཅིག། རལ་གྲི་གཅིག་དང་གསུམ་གནང་ནས་བཏང༌། སྔར་བཞིན་སོང་སྐབས་ལྷག་འཕྲོ་ནས་ཕོར་གང་ཁྱེར་ནས་བྲོས་པས། ངན་པ་འདི་ཟེར་རྗེས་དེད་ཆུ་བུམ་དེ་ཕོས་ཆུར་གྱུར། གྲུ་བཏང་ནས་དེད། ཐག་པ་སྐྱུར་བས་ལ་ཞིག་ཏུ་གྱུར། ཡང་རྗེས་སླེབ་པས་རལ་གྲི་ཀླད་ལ་བསྐོར་བས་ལྕགས་ཀྱི་སྐྱིལ་པོར་གྱུར། ཡང་ཕྱི་ནས་མེས་བསྲེགས་པས་མ་ཚུག་ཕྱིར་བྲོས་པས་ཐམས་ཅད་ཀྱིས་བརྡུངས་ནས་འདམ་བུ་ལྟར་བཅོམས། བླ་མ་བྱོན་ནས་བྱིན་རླབས་ཀྱིས་སྔར་བཞིན་གྱུར། གདམས་ངག་སྒྱུ་ལུས་སྐོར་གནང༌། ཆོས་ཐམས་ཅད་སྒྱུ་མ་ལྟ་བུར་གོ །དྲུག་པ་ཐང་མེ་ཏོག་ཁྲ་ཆེམ་མེ་བར་བཞུགས་པར་གསོལ་བ་བཏབ་མནྜལ་ཕུལ་གདམས་པ་ཞུས་པར། ན་ནིང་ཁྱོད་བརྡུང་བའི་མི་དེ་ཕ་ཀི་རེད་པས་དེད་ལ་ཤོག་གསུངས། དེར་ཐང་དུ་མི་གཅིག་འགྲོ་བདོ་བ་ལ་ཤི་མ་ཤི་མེད་པར་དེད་པས་ཇེ་རིང་ཇེ་རིང་ལ་སོང་ནས་ཐང་ཆད་དེ་འགྱེལ། བླ་མ་བྱོན་ནས་རྨི་ལམ་གྱི་གདམས་པ་རྣམས་གནང་བས་འདི་སྣང་ཐམས་ཅད་རྨི་ལམ་ཤར་བའི་བརྡར་གོ །བདུན་པ་མཐོ་ལ་གསལ་བའི་ས་ཕྱོགས་གཅིག་ཏུ་བཞུགས་པར་གསོལ་བ་གཏབ་གདམས་ངག་ཞུས་པར། གདམས་པ་འདོད་ན་དེ་རིང་བག་མ་གཅིག་འོང་བར་དང་པོ་མེ་ཏོག་ཕྲེང་བ་ཐོགས། དེ་ལ་དགའ་བས་ནུ་མ་མཉེས་གསུངས། གསུངས་པ་བཞིན་བྱས་པས་ཉེ་འབྲེལ་རྣམས་ཀྱིས་མི་རིག་པ་འདི་ལྟ་བུ་བྱས་ཟེར་ཞིང་བརྡུང་པས་ལུས་པོ་ཐམས་ཅད་ཉབ་ཉོབ་ཏུ་སོང་ཡང་བླ་མ་བྱོན་ནས་བྱིན་རླབས་སྔར་བཞིན་གྱུར། གདམས་ངག་ཏུ་འོད་གསལ་གྱི་སྐོར་གནང་ཉིན་མཚན་དབྱེར་མེད་ཀྱི་བརྡར་གོ །བརྒྱད་པ་རི་ཆེན་པོ་གཅིག་གི་རྩར་བཞུགས་གདམས་པ་ཞུས་པས་རྒྱལ་པོའི་བཙུན་མོ་ཁྲི་ལས་ཕོབ་གསུངས་པས། དེ་བཞིན་བྱས་པས་བློན་པོ་ཀུན་གྱིས་གཡང་ལ་བསྐྱུར་བས་ཤ་རུས་ཞིག་པའི་སྡུག་བསྔལ་བྱུང༌། ཡང་བླ་མས་བྱིན་རླབས་པས་སྔར་ལྟར་བྱུང༌། འཕོ་བའི་གདམས་སྐོར་རྣམས་གནང་བས་སངས་རྒྱས་སར་ཉིང་མཚམས་སྦྱོར་དགོས་པའི་བརྡར་གོ །དགུ་པ་དབེན་པར་བཞུགས་པའི་སྐབས། བླ་མ་ཉིད་ནས་གདམས་པ་འདོད་ན་རྒྱལ་བུ་ཁྲི་ཁ་ནས་ཕོབ་ཅིག་གསུངས། རྒྱལ་བུ་བློན་པོ་བཅས་སྐྱོ་བསངས་ལ་འགྲོ་བའི་ལམ་ཁ་ནས་ཁྲི་ལས་ཕབ་པས་བློན་པོ་སོགས་ཀྱི་བེམ་རིག་མ་བྲལ་ཙམ་དུ་བཅོམས། ཡང་བླ་མས་བྱིན་རླབས་པས་སྔར་ལུས་སུ་གྱུར། གྲོང་འཇུག་གི་གདམས་པ་གནང་ནས་འཕོ་དང་ལྷུམ་ཞུགས་ཀྱི་བརྡར་གོ །བཅུ་པ་འོག་སྒོ་བདེ་བ་ཆེན་པོ་བསྟན་པ་ནི། ཡང་སྐྱིད་མོའི་ཚལ་ཞིག་ཏུ་བཞུགས་པ་ལ་ཕྱག་མནྜལ་བཅས་གདམས་པ་ཞུས་པས། དེ་ལྟར་ན་ཕྱག་རྒྱ་མ་བརྟེན་ཅིག་གསུངས་ནས་དྲི་མེད་མ་བརྡས་བཀུག་སྟེ་གནང༌། དེར་བརྟེན་པས་དགའ་བདེ་འཕེལ་རུང་ལུས་རིད་པར་གྱུར། བླ་མས་རྡོ་རྗེའི་བུག་པར་སྨྱུག་ཐུར་དྲངས་རྡོ་བར་དུ་བརྡུངས་པས་རྣག་ཁྲག་ཟག་ཅིང་སྡུག་བསྔལ། ཡང་ཕྱག་གིས་བྱུག་པས་སྔར་བཞིན་གྱུར། འོག་སྒོའི་གདམས་པ་རྣམས་གནང༌། ཕྱག་རྒྱ་ལ་བརྟེན་ནས་ལྷན་ཅིག་སྐྱེས་པའི་ཡེ་ཤེས་འཆར་བའི་བརྡར་གོ །བཅུ་གཅིག་པ་ལྗོན་ཤིང་མེ་ཏོག་རྒྱས་པའི་སྡོང་པོ་ཞིག་གི་རྩར་བཞུགས་པ་ལ། གདམས་པ་འདོད་ན་ཤེས་རབ་མ་ཕུལ་གསུངས་པས། དེར་ལྟོས་མེད་དུ་ཕུལ། ཏཻ་ལོ་ནས། ཆོས་ཀྱི་དབྱིངས་ཀྱི་ཀློང་ཡང་ནས། །བདེ་ཡང་རུང་གི་ནཱ་རོ་པ། །མཁའ་འགྲོ་མ་ཡི་གསང་བའི་གནས། །གསང་སྔགས་ཡིད་བཞིན་ནོར་བུ་ཡི། །སྐྱེ་མེད་སེམས་ཀྱི་མེ་ལོང་ལྟོས། །གསུངས་ནས་ཕྱག་རྒྱ་ཆེན་པོའི་གདམས་ངག་རྣམས་གནང་ནས། རིག་མ་ལ་བརྟེན་པའི་ལྷན་སྐྱེས་དེ་ཉིད་བླ་མའི་ཚིག་གིས་ངོ་སྤྲད་པས། རང་གི་རྒྱུད་གོམས་པར་བྱེད་པའི་བརྡར་གོ །བཅུ་གཉིས་པ་ཆུ་དང་རྡོ་ཤིང་གང་ཡང་མེད་པའི་བྱེ་ཐང་གཅིག་ཏུ་བཞུགས་པ་ལ་ཕྱག་འཚལ་གསོལ་བ་གདབ་པས། གདམས་ངག་འདོད་ན་ལུས་ཀྱི་མནྜལ་ཕུལ་གསུངས་པས། དེར་ལུས་ཀྱི་རྩ་བོ་ཆེ་རྣམས་ཕུག་ནས་བྱེ་མར་ཆག་ཆག་བཏབ་མནྜལ་བྱས་པས། མནྜལ་རྒྱན་མེད་ཞིང་ཁམས་སྟོང་པར་སྐྱེ། ཞེས་གསུངས་པས། རང་གི་ཡན་ལག་རྣམས་བཅད་ནས་རྒྱན་བྱས་ཕུལ་བས། ཏཻ་ལོ་པས་བདེའམ་གསུངས། ནཱ་རོ་པས། ཤ་ཁྲག་ལུས་ཀྱི་མནྜལ་འདི། བླ་མ་ལ་ཕུལ་རྣལ་འབྱོར་བདེ། ཞུས་པས། ཏཻ་ལོ་པས། ཟག་བཅས་སྙིང་པོ་མེད་པའི་ལུས། ཕུལ་ཡང་རུང་གི་ནཱ་རོ་པ། མཁའ་འགྲོ་མ་ཡི་གསང་བའི་གནས། གསང་སྔགས་ཡིད་བཞིན་ནོར་བུ་ཡི། བར་དོ་སེམས་ཀྱི་མེ་ལོང་ལྟོས། གསུང་ནས་ཕྱག་གིས་བྱུག་ཙམ་གྱིས་རྨ་རྣམས་སོས་ནས་ལུས་སྔར་བཞིན་པསཀྱང་བཟང་བར་གྱུར། བར་དོའི་གདམས་ངག་རྣམས་གནང༌། དེ་ལྟར་ལོ་བཅུ་གཉིས་སུ་ཆགས་ཕྱིར་འབྲངས་བས་ལོ་རེར་དཀའ་ཆེན་རེ་དང་གདམས་ངག་ཁྱད་འཕགས་རེ་ཐོབ་པའི་གདམས་ངག་རྣམས་དོན་གསུམ་དུ་བསྡུས་ནས། དངོས་པོའི་གནས་ལུགས་ལམ་དང་ནི། འབྲས་བུ་སྐྱེ་བའི་རིམ་པའོ། །གསུངས་པས། གོང་དུ་བསྟན་པ་རྣམས་ཀྱང་གཞི་ལམ་འབྲས་གསུམ་དུ་འདུས་པའི་བརྡར་གོ་ཞིང་ཐུགས་སུ་ཆུད་དོ། །དེ་ནས་ཏཻ་ལོ་པས་ཕར་གཟིགས་ཚུར་གཟིགས་མཛད་ནས་མཆིལ་ལྷམ་རྒོག་པོ་གཅིག་མདུན་དུ་འདུག་པ་བླངས་ནས་ནཱ་རོ་པའི་དཔྲལ་བར་རྒྱབ་པས། ནཱ་རོ་པ་ལིང་གི་བརྒྱལ་ནས་སོང༌། བརྒྱལ་སངས་པ་དང༌། ཐུགས་གཉུག་མ་ལྷན་ཅིག་སྐྱེས་པའི་ངང་ལས་མ་གཡོས་བཞིན་དུ། མདོ་རྒྱུད་ཀྱི་ཆོས་ཐམས་ཅད་རྒྱ་མཚོ་ལ་གཟའ་སྐར་བཀྲ་བ་ལྟར། ཐུགས་ལ་བཀྲ་ལམ་མེར་ཤར་ནས་འདུག །ཏཻ་ལོ་པས་དེའི་དོན་ངོ་སྤྲད་པ་ནི། ཀྱཻ་ཧོ་འདི་ནི་རང་རིག་ཡེ་ཤེས་ཏེ། །ངག་གི་ལམ་འདས་ཡིད་ཀྱི་སྤྱོད་ཡུལ་མིན། །ཏཻ་ལོ་ངས་ནི་ཅི་ཡང་བསྟན་དུ་མེད། རང་གི་རང་ཉིད་མཚོན་ཏེ་ཤེས་པར་བྱོས། ཞེས་དང༌། མི་མནོ་མི་བསམ་མི་སེམས་ཤིང༌། །མི་བསྒོམ་མི་སྤྱད་སེམས་ཉིད་ནི། །རང་ག་གནས་ལུགས་ངང་དུ་བཞག །དམིགས་མེད་ཡིད་ལ་མི་བྱ་ཞིང༌། །དབྱེར་མེད་ལྷན་ཅིག་སྐྱེས་པ་ཡི། །སེམས་ཉིད་རང་རིག་རང་གསལ་ལ། །ང་ཡིས་ཅི་ཡང་བསྟན་དུ་མེད། གསུངས་པས། ནཱ་རོ་པས། ཡིད་ལ་མི་བྱེད་ཕྱག་རྒྱ་ཆེན་པོའི་ལམ། །སྤྲོས་བྲལ་བརྗོད་མེད་སྒྲིབ་བྲལ་སེམས་ཀྱི་ནི། །ངོ་བོ་ལྷན་ཅིག་སྐྱེས་པ་མཐོང་བ་སྟེ། །ད་ནི་སུ་ལའང་དྲི་བ་མི་བྱའོ། །ཞེས་གསུངས་ནས་ཐུགས་ཐག་ཆོད་དོ། །འདི་ལྟ་བུའི་དོན་རྟོགས་པ་ནི་བླ་མ་དམ་པ་འདིའི་བཀའ་དྲིན་ཁོ་ན་ཡིན་ཞིང༌། དྲིན་ལ་འཁོར་མཐའ་མེད་ཀྱང༌། ད་ནས་དངོས་པོའི་ཡོ་བྱད་ཅུང་ཟད་ཙམ་ཡང་འབུལ་དུ་རུང་ངོ་སྙམས་དུ་སེམས་ཤིང༌། དེ་ནས་བྱོན་ཏེ་སྔར་གྱི་གྲོགས་པོ་མགར་བ་ཕྱུག་པོ་གཅིག་ཡོད་པ་ལ། བྱུ་རུ་བྲེ་དོ་དང་མུ་ཏིག་ལ་སོགས་རིན་པོ་ཆེ་སྣ་ཚོགས་བསྐྱེལ་ནས་འབུལ་དུ་སོང་བས། ཏཻ་ལོ་པས། འདི་ད་རུང་དངོས་པོ་ལ་ཞེན་ནས་འདུག་དགོངས་ནས། བྱུ་རུའི་དིའུ་འབུར་ཆེན་པོ་གཅིག་ལ་རིན་པོ་ཆེ་སྣ་ཚོགས་ཀྱིས་སྤྲས་པའི་སྟེང་དུ་བཞུགས་ཅིང་དཔའ་བོ་དཔའ་མོ་ཚོགས་ཀྱིས་བསྐོར་ནས་ཕྱོགས་ཐམས་ཅད་ནས་ལྷའི་བུ་དང་བུ་མོ་དཔག་ཏུ་མེད་པས་མཆོད་རྫས་སྣ་ཚོགས་ཐོགས་ནས་མཆོད་པ་འབུལ་བ་གཅིག་ཏུ་སྤྲུལ་ཏེ་ཡོད་པ་ལ། ནཱ་རོ་པས་མཐོང་ནས་བསྐྱེངས་བ་བཞིན་སོང་ཏེ། འོན་ཀྱང་བླ་མ་དམ་པ་འཁོར་འདས་ཀྱི་དཔལ་འབྱོར་ལ་དབང་བསྒྱུར་བས། དངོས་པོའི་དགོས་པ་མེད་ཀྱང་རང་གི་བསམ་པ་དག་པས་བསྔོས་པ་ཡིན་ཞིང༌། བསྔོས་ལོག་མི་རུང་སྙམས་ནས་མདུན་ཕྱོགས་སུ་གཏོར་ནས་བཞག་གོ །དེ་ཡང་བླ་མ་དུས་གསུམ་གྱི་སངས་རྒྱས་འདི་ལྟ་བུ་དང་མཇལ་བ་ལ་སྐད་ཅིག་ཀྱང་མི་འབྲལ་བར་འདིའི་དྲུང་དུ་སྡོད་དགོས་བསམ་པ་ལ། ཏཻ་ལོ་པས། བསྡད་པས་དམུས་ལོང་གཟུགས་མི་མཐོང༌། །བསྡད་པས་ལྐུགས་པ་དོན་མི་ཁྲོལ། །བསྡད་པས་ཞ་བོ་རྗེས་མི་སླེབ། །བསྡད་པས་སྡོང་པོ་རྩ་མི་བརྟན། །བསྡད་པས་ཕྱག་རྒྱ་ཆེ་མི་རྟོགས། །ནཱ་རོ་སྤྱོད་པ་བྱ་བར་རིགས། །ཞེས་གསུངས་ནས་ཕྱག་གི་ཐོད་པ་བདུད་རྩིས་གང་བ་དེ་གནང་ནས། སྤྱོད་པ་གཤེགས་པར་ལུང་བསྟན་ཏོ། །དེ་ནས་ནཱ་རོ་པས་ཐོད་པ་དང་ཌཱ་རུ་གཅིག་བཟུང་ནས་སྤྱོད་པ་ལ་གཤེགས་ནས་རྒྱལ་པོ་སེང་གེ་ཟླ་བའི་རྒྱལ་ཁམས་སུ་བྱོན་ནས་རྫུ་འཕྲུལ་མ་ངེས་པ་སྣ་ཚོགས་བསྟན་ནས་རྒྱལ་པོ་འཁོར་བཅས་གྲོལ་བར་གྱུར་ཏེ་དེར་བཞུགས་པར་གསོལ་ཀྱང་མ་གནང་ནས་ཆུ་བོ་གངྒཱའི་འགྲམ་དུ་བྱེ་མ་ལ་རྩེད་མོ་མཛད་ཅིང་བཞུགས་པ་ལ། ཏཻ་ལོ་པ་མདུན་གྱི་ནམ་མཁར་བྱོན་པའི་ཚེ། ཕྱག་འཚལ་ཞིང་གདམས་ངག་ཞུ་བྱས་པས། ཕྱག་རྒྱ་ཆེན་པོ་བསྟན་དུ་མེད་ཀྱིས་ཀྱང༌། དཀའ་བ་སྤྱད་ཅིང་བླ་མ་ལ་གུས་པའི། སྡུག་བསྔལ་བཟོད་ལྡན་བློ་ལྡན་ནཱ་རོ་པ། སྐལ་ལྡན་ཁྱོད་ཀྱིས་སྙིང་ལ་འདི་ལྟར་བྱོས། ཞེས་སོགས་གདམས་པ་མང་དུ་གསུངས་ནས་མི་སྣང་བར་གྱུར་ཏོ། །དེ་ཡང་ནཱ་རོ་པས་སྐུ་ལ་རས་ཀྱི་ཨང་རག་གསོལ་ཞིང་ཐོད་པ་དང་ཌཱ་རུ་ཕྱག་ཏུ་བསྣམས་ནས། སྤྱོད་པ་སྣ་ཚོགས་མཛད་ཅིང་བྱ་སྒྲོ་རླུང་གིས་ཁྱེར་བ་ལྟར་ཕྱོགས་ཐམས་ཅད་དུ་གཤེགས་པ་ལ་དུས་རེ་ཞིག་གི་ཚེ། ཏཻ་ལོ་པ་མདུན་གྱི་ནམ་མཁར་བྱོན་ནས། བླ་མ་མཁའ་འགྲོའི་མ་གནང་ཞིང༌། །ཉམས་མྱོང་རྟོགས་པ་མ་རྒྱས་ཏེ། །ཤུགས་འབྱུང་ཞེན་པ་མ་ལོག་པར། །སྤྱོད་པ་མ་བྱེད་ནཱ་རོ་པ། ཞེས་སོགས་ཞལ་ཏ་མང་དུ་མཛད་དེ་མཐར་འགྲོ་དོན་བྱེད་པར་དབང་བསྐུར་ཞིང་བརྒྱུད་འཛིན་ལུང་བསྟན་པ་ནི། ཏཻ་ལོ་པས༌། པུ་ལ་ཧ་རིའི་དགོན་པ་རུ། །རང་གྲོལ་ཡེ་ཤེས་ཉི་མ་ཡིས། ཁ་བ་ཅན་གྱི་སྐལ་ལྡན་པ། །མ་ཏིའི་མ་རིག་མུན་པ་སོལ། །ཡེ་ཤེས་སྣང་བས་ཁྱབ་པར་གྱིས། །གང་ཡང་སྐྱེ་བ་མེད་པ་ཡི། །རང་རིག་རང་གསལ་ནམ་མཁའ་ལ། །དམ་ཆོས་སྤྲིན་གྱི་ཆར་རྒྱུན་གྱིས། །གདུལ་བྱའི་ལོ་ཏོག་སྨིན་པར་མཛོད། ཅེས་གསུངས་ཤིང༌། གཞན་ཡང་ཏཻ་ལོའི་སློབ་ཚོགས་རྣམས་ནས་ཀྱང་འགྲོ་དོན་གྱི་བསྐུལ་མ་རྒྱ་ཆེར་གནང་བས། ནཱ་རོ་པས་ཕྱག་འཚལ་ཞིང༌། བླ་མ་དམ་པའི་བཀའ་ལུང་དང༌། །རྡོ་རྗེ་སྤུན་གྱི་གསུང་བཞིན་དུ། །མདོ་རྒྱུད་སྙིང་པོ་དོན་གྱི་བཅུད། །ངེས་མེད་ཡུལ་དུ་བསྒྲགགས་པར་བྱ། ཞེས་གསོལ་ཏེ་པུ་ལ་ཧ་རིའི་དགོན་པར་བྱོན་ནོ། །དེ་ནས་བི་ཀ་མ་ལའི་ཤྲཱི་ལའི་གཙུག་ལག་སོགས་སུ་ཡང་མུ་སྟེགས་པའི་རྒོལ་བ་ཐམས་ཅད་ཚར་བཅད་ཅིང་གདུལ་བྱ་རྣམས་སྨིན་གྲོལ་གྱི་ལམ་ལ་བཀོད་པ་སོགས་རྒྱལ་བའི་བསྟན་པ་རིན་པོ་ཆེ་སྒོ་ཐམས་ཅད་ནས་དར་ཞིང་རྒྱས་པར་མཛད་དོ། །དེ་ལྟ་བུའི་བླ་མ་དམ་པ་དཔལ་ལྡན་ནཱ་རོ་པ་ཆེན་པོ་དེ་ཉིད་ཀྱིས་ཕྲིན་ལས་རྣམ་པ་བཞིའི་སྒོ་ནས། རྒྱ་གར་ཕྱོགས་བཞིའི་གདུལ་བྱ་དཔག་ཏུ་མེད་པ་སྨིན་གྲོལ་གྱི་ལམ་ལ་བཀོད་དེ། གསང་སྔགས་སྙིང་པོའི་དོན་མཁའ་འགྲོ་མ་རྣམས་ཀྱི་ཕྱག་ན་ཡོད་པ་རྣམས་ཀྱང༌། སྐལ་ལྡན་མཐའ་དག་ལ་སྣང་བར་བྱས་ནས། སྐྱེས་མཆོག་མར་པ་ལ་སོགས་རྒྱུད་འཛིན་གྱི་སློབ་མ་དམ་པ་རྣམས་ཀྱང་གཞན་དོན་དུ་ལུང་བསྟན་ཅིང༌། སངས་རྒྱས་ཀྱི་བསྟན་པ་རིན་པོ་ཆེ་སྒོ་ཐམས་ཅད་དུ་དར་ཞིང་རྒྱས་པར་མཛད་དེ། རྡོ་རྗེའི་སྐུ་བརྙེས་པ་དེ་ཉིད་སོ་སོའི་སྐྱེ་བོའི་ངོར་མཐར་འདིར་བྱོན་འདིར་འདས་འདིར་གནས་མེད་ཀྱང༌། ངེས་པ་དོན་དུ་མཁའ་འགྲོ་མ་རྣམས་ཀྱིས་འདོ་ལིའི་ཁར་ཨོ་རྒྱན་གྱི་ཡུལ་དུ་དངོས་སུ་གདན་དྲངས་ནས་འགྲོ་བའི་དོན་མཛད་ཅིང་ད་ལྟའི་བར་དུ་བཞུགས་ཞེས་གྲགས་སོ། འདི་ལ་ཁ་གཅིག་གོང་དུ་མུ་སྟེགས་གཅེར་བུ་པ་དང་བརྩད་པས་ཆོས་ལ་སྨོད་པའི་ལྟུང་བ་དྲུག་པ་ཕོག་ནས། བཀའ་བཅག་པས་སྐྱེ་བ་འདི་ལ་མཆོག་མ་ཐོབ་སྟེ། བར་དོར་མཆོག་གི་དངོས་གྲུབ་ཐོབ་པར་ལུང་བསྟན་ཟེར་བ་དང༌། ཡང་རིགས་བྲམ་ཟེ་ཡིན་ཟེར་བ་དང༌། ཕྱིས་སྐུ་འདས་ནས་གདུང་བཞུས་པའི་ཤུལ་དུ་ཡང་ ཟླ་བ་རེ་རེ་བཞིན་གཤེགས་པའི་དུས་ཚོད་དུ་ལྷའི་མཆོད་པ་འོང་སྟེ། རོལ་མོའི་སྒྲ་དང་མེ་ཏོག་གི་ཆར་བབས་པ་ཡང༌། དེང་སང་གི་བར་དུ་ཀུན་གྱིས་མཐོང་ཞིང་ཐོས་པ་ཡོད་ཟེར་བ་ལ་སོགས་ཀྱི་བཞེད་པ་འགའ་ཤས་ཡོད་ན་ཡང༌། བཀའ་བརྒྱུད་པ་ཕལ་ཆེར་རྣམས་ཀྱི་གོང་དུ་བཤད་པ་ལྟར་བཞེད་པ་ཡིན་ནོ། །དེ་ལྟར་སྤྲུལ་པ་དུ་མའི་སྒོ་ནས་སེམས་ཅན་གྱི་དོན་མཛད་པའི་གྲུབ་ཆེན་ནཱ་རོ་པ་ཆེན་པོ་དེ་ཉིད་བདེ་བར་གཤེགས་པས་ལུང་བསྟན་པ་ནི། བདེ་མཆོག་གི་རྒྱུད་རྡོ་རྗེ་ཕྲེང་བ་ཞེས་བྱ་བའི་དྲུག་ཅུ་རྩ་བཞི་པའི་ལེའུ་བཅུ་གསུམ་པའི་ནང་ནས༌། ནཱ་རོ་པ་ཞེས་གྲགས་པའི་རྣལ་འབྱོར་པ། །བཅོམ་ལྡན་ཤཱཀྱ་ཐུབ་པའི་བསྟན་པ་ལ། །མྱ་ངན་མི་འདའ་སྤྲུལ་སྐུའི་འགྲོ་དོན་མཛད། །འདི་ནི་རྒྱལ་བ་ཉིད་ཀྱི་རྣམ་པར་འཕྲུལ། ཞེས་ལུང་བསྟན་པ། དེ་ལྟ་བུའི་དཔལ་ལྡན་ནཱ་རོ་པ་ཆེན་པོ་དེ་ཉིད་ལ་རང་དང་མཚུངས་ཤིང་ཆེར་གྲགས་པའི་བུ་ཆེན་དམ་པ་བདུན་བྱུང་བ་ནི་མངའ་བདག་ཆེན་པོ་མཻ་ཏྲི་པ། དཔལ་ཞི་བ་བཟང་པོ། ཇོ་བོ་བླ་མ་འབིར་བ་པ། མཁས་པ་ཆེན་པོ་ཤནྟི་པ། བལ་པོ་སྤྱི་ཐེར་བ། དགེ་ཚུལ་ཤེས་རབ་སེང་གེ། ཁ་ཆེ་ཨ་དཀར་སིདྡྷི་སྟེ་བདུན་དང༌། པྲཛྙ་རཀྵི་ཏ་ལ་སོགས་ཕྱོགས་བཞིའི་རཀྵི་ཏ་ཆེན་པོ་བཞི་དང༌། མཁས་པ་ཆེན་པོ་སྨྲི་ཏི༌། ཞི་བའི་གོ་ཆ་ཛྙཱ་ན་ཀ་ར༌། སུ་མ་ཏི་ཀིརྟི་ལ་སོགས་པ་པཎྜི་ཏའི་སློབ་མ་དུ་མ་དང༌། ཀ་ན་རི་པ་དང༌། ཁ་ཆེ་བྱང་ཆུབ་བཟང་པོ། ཕམ་མཐིང་བ་བྱང་ཆུབ་སྐུ་མཆེད་ལ་སོགས་གྲུབ་ཐོབ་བརྒྱ་རྩ་བརྒྱད། པེན་ཏ་བ་ལ་སོགས་བརྟུལ་ཞུགས་གྲུབ་པའི་རྣལ་འབྱོར་པ་ལྔ་བཅུ་རྩ་བཞི། མཚན་ལྡན་གྱི་རྣལ་འབྱོར་མ་སྟོང་དང་ཆིག་བརྒྱ་ལ་སོགས་པ་སྨིན་པར་མཛད་ཅིང༌། སྙན་བརྒྱུད་ཕལ་ཆེར་གནང་བ་ཡང༌། ཕམ་མཐིང་བ། འཇིགས་མེད་གྲགས་པ། ཛྙཱ་ན་ཀ་ཤྲཱི་ཀ་ན་ཀ །ཀ་ར་ཤྲཱི། ཀ་ཤུ་ཀ །དྷརྨཱ་ཀ་ཤྲཱི་སྟེ། ཤྲཱི་རྣམ་པ་བཞི་མ་ན་བྲི་དང་ཏི་ཡུ་པ་རྣམས་སོ། །ཁྱད་པར་དུ་འཕགས་ཤིང་བརྒྱུད་འཛིན་དམ་པར་ལུང་བསྟན་པ་ནི། སྐྱེས་མཆོག་མར་པ་ཆོས་ཀྱི་བློ་གྲོས་ལགས་སོ། ། བཞི་པ་སྐྱེས་མཆོག་མར་པ་ལོ་ཙཱའི་རྣམ་ཐར་ནི། དེའང་དང་པོ་སྐུ་འཁྲུངས་ཡུལ་ལྷོ་ཕུ་ཆུ་ཁྱེར་བྱ་བར་ཡབ་མར་པ་དབང་ཕྱུག་འོད་ཟེར་དང༌། ཡུམ་རྒྱལ་མོ་འོད་དེ་བྱ་བའི་སྲས་སུ་ཆུ་ཕོ་བྱི་བའི་ལོ་ལ་སྐུ་བལྟམ། སྐུ་མཛེས་པ་དང་ཐུགས་རབ་ཆེ་བར་བྱུང༌། དེ་ནས་སློབ་དཔོན་རྙིང་མ་བ་ལས་སློབ་གཉེར་མཛད་འབྲི་ཀློག་ཀྱང་མཁས་པར་གྱུར། འོན་ཀྱང་ཐུགས་རྒྱུད་ཧུར་ཞིང་སྤྱོད་ལམ་འཆོལ་པས་ཁྱིམ་གྱི་ནོར་རྫས་ཤོར་གོད་ཆེ་བར་བྱུང༌། ཉིན་གཅིག་ཆང་གྲལ་དུ་སྐྱོ་བ་སྐྱེས་ནས་ངས་འཇིག་རྟེན་གྱི་བྱ་བ་འདི་ལ་དགོས་པ་ཅི་ཡང་མི་འདུག་པས་དེ་བས་རྒྱ་གར་དུ་འགྲོ་ནས་ལོ་ཙཱ་བསླབ་སྟེ་ཆོས་གཅིག་བྱ་དགོས་བསམ་པའི་གྲོས་ཉེ་དུ་རྣམས་ལ་བྱས་པས་ཀུན་གྱི་བློར་འཐད་པ་བྱུང་ནས་དེ་དག་གིས་གསེར་དང་རྟ་གཉིས་གྲོ་ཆས་སོགས་ཀྱིས་རྫོངས་པ་བྱས། མར་པས་དེ་རྣམས་རྟ་ལ་བཀལ་ནས་མྱང་སྟོད་རྩིས་ཀྱི་ལྷ་ཁང་དུ་གཉོས་ལོ་ཙཱ་དང་འཕྲད། དེ་ནས་མྱུ་གུ་ལུང་དུ་འབྲོག་མི་ཤཱཀྱ་ཡེ་ཤེས་མཇལ། དེར་ལོ་ཙཱ་ཡང་བསླབ་ཆོས་ཀྱང་ཞུ་སྙམ་པར་ཆོས་སྒོ་དྲག་པས་འདུག་སྙིང་མ་འདོད། འདི་བས་རྒྱ་གར་དུ་འགྲོ་དགོངས་བྱོན་པས་བལ་དུ་ཡུལ་སླེབས། ནགས་འདབས་ཤིག་ཏུ་པཎ་ཆེན་ནཱ་རོའི་སློབ་མ་སྤྱིི་ཐེར་བ་དང༌། པཻ་དྷ་པ་གཉིས་བཞུགས་ཟེར་བར་དད་ནས་མཇལ་དུ་བྱོན། དེར་ཕྱག་རྟེན་ཕུལ་ནས་ཆོས་ཞུས། དགྱེས་རྡོར་གྱི་རྒྱུད་གདམས་ངག་མང་དུ་གསན། དབང་བསྐུར་ཀྱང་ཐོབ། ད་བོད་དུ་ལོག་ནས་གསེར་བཙལ་ཏེ་སླར་རྒྱ་གར་དུ་འགྲོ་བསམ་ནས་ཚུར་བོད་དུ་ལོག །དེར་ཉ་མ་དང་མི་སྐྱ་སོགས་ཆོས་ཞུ་མང་དུ་བྱུང་བས་འབུལ་བ་ཆེ་བར་བྱུང༌། རྟ་ནག་པོ་སེང་གེ་སྲབ་མེད་དང༌། སེང་ལྡེང་སྒ་བཀྲ་དང༌། ཟབ་ཆེན་ཡུག་གཅིག་གཙོས་ཡོ་བྱད་ཐམས་ཅད་གསེར་དུ་བསྒྲིལ་བས་གསེར་སྲང་བཅོ་བརྒྱད་ཙམ་འགྲུབ་པ་བསྣམས་ནས་ཀློག་སྐྱར་ཕེབས། དེར་གསེར་སྲང་ལྔ་བཅུ་ཡོད་པ་ཁྱེར་ནས་བལ་ཡུལ་དུ་བྱོན། རང་བྱུང་གི་མཆོད་རྟེན་དྲུང་དུ་ལོ་གསུམ་དུ་ཚད་པ་གོམས་པ་དང་ལོ་ཙཱ་བསླབ་སྤྱི་ཐེར་བ་ལས་གདན་བཞིའི་སྐོར་དང་ལྷ་མོ་དུད་སོལ་མ་སོགས་གསན། དེ་ནས་རྒྱ་གར་དུ་བྱོན་ནས་པཎྜི་ཏ་ཡེ་ཤེས་སྙིང་པོ་དང་ཀུ་སུ་ལུ་པ་སོགས་བརྟེན་ཅིང་ཀྲི་ཡ་ཕ་རྒྱུད་མ་རྒྱུད་སྐོར་གསན་ནས་ལོ་ལྔ་སོང་བ་དང༌། ཡང་རྒྱགས་ཆད་ནས་བལ་པོར་ཕྱིན་པས། ལྷོ་བྲག་ནས་ཉེ་གཞིས་དང༌། གཙང་གི་སློབ་མ་རྣམས་ཀྱིས་གསེར་མང་པོ་བསྡུས་ནས་བསྐུར་ཏེ་བསྐྱལ་བ་དང་འཕྲད། བལ་པོར་བླ་མ་རྣམས་ལ་ཞོ་ཤས་ཀྱི་མཎྜལ་ཕུལ། དེ་ནས་རྒྱ་གར་དུ་བྱོན་ནས་གོང་གི་བླ་མ་རྣམས་ལ་གསེར་གྱི་མཎྜལ་ཕུལ། པཻ་དྷ་བ་སྐུ་མཆེད་ཀྱིས་ནཱ་ལེནྜའི་དགེ་ཚུལ་ཤེས་རབ་སེང་གེ་ལ་བླ་མ་ཆེན་པོ་དང་མཇལ་བའི་ཞུ་སྣ་མཛད་ཐུགས་ལ་འདོགས་པར་ཞུ་ཞེས་ཡི་གེ་དང་ཚོགས་པ་ལ་སྦྲག་ནས་བཏང་བས་ནཱ་ལེནྜའི་བྱང་སྒོར་དགེ་ཚུལ་ཤེས་རབ་སེང་གེ་དང་མཇལ། ལོ་རྒྱུས་ཞུ་བ་ཕུལ་བས་བླ་མ་ཆེན་པོ་རྒྱ་གར་ནུབ་ཕྱོགས་སུ་ཆོས་གསུང་ལ་གཤེགས། ཅུང་སྔ་བས་ངལ་གསོས་གསུངས། ཉིན་གཅིག་བླ་མ་ནཱ་རོ་ཆེན་པོ་བྱོན་ཞིང་ཡོད་ཟེར། དེ་ཉིད་དུ་ཤེས་རབ་སེང་གེས་མར་པ་ཁྲིད་ནས། པཱུ་ལ་ཧ་རིའི་དགོན་པ་དེར་བླ་མ་ནཱ་རོ་ཆེན་པོ་དེ་ཉིད་ཤིང་སྡོང་པོ་ལ་སྐུ་རྒྱབ་བཏད་ནས་འབྲས་ཆེན་ཞིག་གསོལ་ཞིང་འཁོར་མང་པོ་ལ་ཆོས་གསུངས་པ་དང་མཇལ། མར་པས་གསེར་གྱི་མནྜལ་ཕུལ་ཞིང་ཕྱག་དང་བསྐོར་བ་བྱས་ཞབས་སྤྱི་བོར་བླངས། ཉེ་གནས་ཤེས་རབ་སེང་གེས་ལོ་རྒྱུས་ཞུ་བ་ཕུལ། ཁྱོད་མིང་ཅི་ཡིན་གསུང༌། ཆོས་ཀྱི་བློ་གྲོས་བྱ་བ་ལགས་ཞུས་པས་ཐུགས་དགྱེས། དབང་བསྐུར་ཨི་ཐོབ་གསུངས། བལ་པོར་བླ་མའི་སློབ་མ་རྣམས་ལས་དགྱེས་རྡོར་གདན་བཞི་སོགས་ཀྱི་དབང་ཐོབ་ཞུས་པས་དེས་ཆོག་གསུངས། བདེ་དགྱེས་རྣལ་འབྱོར་མ་སོགས་རྒྱུད་སྒྲུབ་ཐབས་རྣམས་གནང༌། ཐབས་ལམ་གཏུམ་མོ་དང་གྲོལ་ལམ་ཕྱག་རྒྱ་ཆེན་པོ་རྣམས་ཐོབ། དེ་ནས་བླ་མས་ལུང་བསྟན་པ་བཞིན་དུག་མཚོ་ཁོལ་མའི་ཆུ་ལས་བརྒལ་ལུས་དུག་སྦྲུལ་ཤུན་པ་ལྟར་བརྗེས་ནས་ནུབ་དུ་ལ་ཥེ་ཏྲའི་དགོན་པར་ཡེ་ཤེས་སྙིང་པོའི་ཞབས་ལ་བཏུད་དེ་བསྙེན། དེའང་ནུབ་དུ་ལ་ཥེ་ཏྲའི་གྲོང་ཁྱེར་དུ། དཔལ་ཡེ་ཤེས་སྙིང་པོའི་ཞབས་ལ་གཏུག །ཕ་རྒྱུད་གསང་བ་འདུས་པ་ཉན། སྒྱུ་ལུས་འོད་གསལ་གྱི་གདམས་པ་ཐོབ། ལམ་རིམ་པ་ལྔའི་དོན་ལ་བསླབ། ཅེས་གསུངས་པ་ལྟར་རོ། །དེར་ཁ་སརྤ་ཎི་རང་བྱུང་གི་མཆོད་རྟེན་དུ་ཕྱིན་པས་གཉོས་ལོ་དང་འཕྲད། ཅི་ཤེས་ཟེར་བར་དགྱེས་རྡོར་ཤེས་བྱས་ནས་བགྲོ་གླེང་བྱས་པས་མར་པ་རྒྱལ། གཉོས་ན་རེ། གནས་པ་རྩ་ལ་གཡོ་བ་རླུང། བཀོད་པ་བྱང་ཆུབ་སེམས་དང་གསུམ་བྱ་བའི་གདམས་ངག་སྒྱུ་མ་ཆེན་པོ་བྱ་བ་དགོས་པ་ཡིན། དགྱེས་རྡོར་ག་ན་ཡང་ཡོད་ཟེར། མར་པ་ནཱ་རོ་པའི་དྲུང་དུ་བྱོན་ནས་མ་ཧཱ་མཱ་ཡའི་གདམས་ངག་གནང་བར་ཞུ་ཞུས་པས། །མ་ཧཱ་མཱ་ཡ་ང་མཁས་ཏེ་བདག་པོ་ཀུ་ཀུ་རི་པ་ཡིན་པས་དེར་གཏོང་གསུངས། སོ་ས་གླིང་ནས་རྣལ་འབྱོར་པ་གསུམ་འཇིགས་པ་སྒྲོལ་བའི་གྲོགས་སུ་བཀུགས་ནས་ལྷོ་དུག་མཚོ་ཁོལ་མ་ཆུང་སར་བོལ་ནུབ་ཆེ་སར་པུས་ནུབ་ཙམ་གྱི་ཟླ་བ་ཕྱེད་སོང་ནས་ཆུ་ཡི་ཕར་ཁར་ཕྱིན་པ་དེར། སྤྲེའུ་འདྲ་བའི་ལུས་སྤུས་འཐུམ་པའི་གསེབ་ནས་མིག་དམར་ཀེཾ་ཀེཾ་བྱེད་པ་ཅིག་འདུག་པར་བླ་མ་ཀུ་ཀུ་རི་པ་མཐོང་ངམ་བྱས་པས། ང་སྔོན་ནས་འདིར་བསྡད་པ་དེ་འདྲ་མ་མཐོང་ཟེར། བླ་མས་ཆ་ལུགས་མ་ངེས་པ་གསུངས་པ་དྲན་ནས་དེ་ཉིད་དུ་ཕྱག་འཚལ་མཎྜལ་ཕུལ་གདམས་པ་གནང་བར་གསོལ་བ་བཏབ་པས། ཁྱོད་འདིར་སུས་བཏང་གསུངས། བླ་མ་ནཱ་རོ་པ་ལགས་བྱས། ནཱ་རོ་པ་ཟེར་ནས་གཤེ་ཡིན་གདའ། དེ་ལ་རྟོག་པ་ཞིག་སྐྱེས་པ་ལ། ཐེ་ཚོམ་སྐྱེ་མི་དགོས་གསུངས། ཁྱོད་བསུ་བར་རྣལ་འབྱོར་པ་གཉིས་བཏང་ཡོད་འཕྲད་དམ་གསུངས། བྱ་གཉིས་མིན་པ་མ་འཕྲད་ཞུས། འོ་དེ་ཀ་ཡིན་གསུངས། ད་ཕར་འདོང་གདམས་ངག་བྱ་ཡིས་གསུངས་ནས་ནགས་གསེབ་ཏུ་བཞུགས་སར་ཕྱིན་ནས་དབང་བསྐུར་ཞིང་ཟླ་བ་ཕྱེད་བཞུགས། ཀུག་ཆེན་ཀུག་ཆུང་ལ་སོགས་རྫོགས་རིམ་ཉི་ཤུ་རྩ་བཞི་ཡན་ལག་དང་བཅས་པ་གནང༌། དེ་ཡང་དམན་པ་དབྱིབས་ཀྱི་རྣལ་འབྱོར་ལ་བརྟེན་ནས་ཕྱག་རྒྱ་གསུམ་ལམ་དུ་བྱེད། ཟབ་པ་སྔགས་ཀྱི་རྣལ་འབྱོར་ལ་བརྟེན་ནས་རིག་པ་གསུམ་ལམ་དུ་ཁྱེར། མཐར་ཐུག་ཆོས་ཀྱི་རྣལ་འབྱོར་ལ་བརྟེན་ནས་གནད་ཀྱི་ཆིང་ལྔ་རྫོགས་རིམ་དང་བཅས་པ་འདི་ལྟ་བུར་ཡིན་ནོ་གསུངས་ཤིང་རྫོགས་པར་གནང༌། ཕྱག་སྤྱི་བོར་བཞག་ཅིང་བྱིན་གྱིས་བརླབས་ནས། ད་སོང་དང་ལམ་དུ་བར་ཆད་མི་འབྱུང་ཞིང་མྱུར་དུ་ཕྱིན་པར་འགྱུར་རོ་གསུངས། དེ་ནས་གཏང་རག་གི་ཚོགས་གྲལ་དུ་རྟོགས་པ་ཕུལ་བའི་མགུར་ནི། དུས་གསུམ་སངས་རྒྱས་རྣམས་ཀྱི་སྲས། ཞེས་སོགས་ཕུལ་ཞིང་དེ་ནས་བྱོན་པས་བླ་མའི་ཐུགས་རྗེས་ཞག་བདུན་ནས་པཱུ་ལ་ཧ་རིར་སླེབས་ཏེ་ལོ་རྒྱུས་རྣམས་བླ་མར་ཞུ་སྙམས་པར་ཚུར་ལ་ཞིབ་མོར་གསུངས། ད་ཡང་ངས་ཚར་གཅིག་བྱ་གསུངས་ནས་གནང་བས་ནམ་ལངས་པའི་སྟེང་ཉི་མ་ཤར་བ་བཞིན་སོང་བས་དད་པ་ལྷག་པར་སྐྱེས་སོ། །ཡང་རེ་ཞིག་གནས་གཞི་ཞིག་ཏུ་གཉོས་ལོ་དང་འཕྲད་མ་ཧཱ་མཱ་ཡའི་སྐོར་ལ་བསྒྲོ་གླེང་བྱས་པས་མར་པ་རྒྱལ་བས། བླ་མ་སུ་ལས་ཉན་ཟེར་བའི་ལན་དུ། དམན་པ་དབྱིབས་ལ་ཟབ་པ་སྔགས། མཐར་ཐུག་ཆོས་ཀྱི་རྣལ་འབྱོར་རྣམས། ལེགས་པར་སྟོན་པའི་སློབ་དཔོན་ནི། བླ་མ་ཐར་པའི་ལམ་སྟོན་ཡིན། ཞེས་མཚན་གསང་ཞིང་སྨྲས་པས་ཁོ་ན་རེ། དེ་ལས་ཉི་ཟླ་ལྟར་གྲགས་པའི་གསང་བ་འདུས་པའི་ཆོས་རྣམས་གལ་ཆེ་ཟེར། གཉོས་ཀྱིས་བླ་མ་དེ་འདྲ་གང་དུ་བཙལ་ཀྱང་མ་རྙེད་པར་གྲགས། དེ་ནས་བདག་ལ་གསང་བ་འདུས་པ་གནང་བར་ཞུ་ཞུས་པས་དུས་ཤིག་ན་སྟོན་གསུངས། དེ་ནས་པཱུ་ལ་ཧ་རིའི་དགོན་དུ་ཉིན་གཅིག་གི་ཚེ། ཁ་ཆེའི་པཎྜི་ཏ་ཨ་ཀར་སིདྡྷི་བྱ་བ་དེ་བྱུང་ནས། བདག་རྒྱ་ནག་རི་བོ་རྩེ་ལྔར་བསྒོམ་དུ་འགྲོ་བས། གསང་བ་འདུས་པ་གནང་བར་ཞུ་ཞུས་པས། ནཱ་རོ་པའི་ཞལ་ནས་ལོ་ཙཱ་བ་ཁྱོད་ཀྱི་དུས་ལ་བབ་བོ་གསུངས། དེ་ནས་དབང་བསྐུར་ཞིང་གདམས་ངག་རྣམས་རྫོགས་པར་གནང༌། དེ་ནས་མངའ་བདག་མཻ་ཏྲི་པ་མཇལ་དུ་འགྲོ་བ་ལ་ཞུས་པས་གནང་ཞིང་སོང་བས། ཆུ་བོ་གང་གཱའི་འགྲམ་རི་བོ་མེ་ལྟར་འབར་བའི་གནས་སུ་བཞུགས་པ་ལ། ཕྱག་དང་གསེར་གྱི་མཎྜལ་ཕུལ་ནས་ཞུས་པས། རྒྱུད་བསྟོད་པ་གླུར་བླངས་དང༌། ཕྱག་རྒྱ་ཆེན་པོ་ལ་སོགས་པ་གདམས་པ་དཔག་ཏུ་མེད་པ་གནང་སྟེ། ཇི་སྐད་དུ། ཤར་ཆུ་བོ་གང་གཱའི་འགྲམ་དུ་ཕྱིན། །རྗེ་མཻ་ཏྲི་ཆེན་པོའི་བཀའ་དྲིན་གྱིས། །གཞི་ཆོས་ཉིད་སྐྱེ་བ་མེད་པར་རྟོགས། །སེམས་སྟོང་པ་ཉིད་ལ་སྤར་ཟིན་བྱས། །དོན་སྤྲོས་བྲལ་གཉུག་མའི་ངོ་བོ་མཐོང༌། །སྐུ་གསུམ་མ་དང་མངོན་དུ་མཇལ། །མི་ཁོ་བོའི་སྤྲོས་པ་དེ་ནས་ཆོད། །ཅེས་གསུངས་སོ། །དེ་ནས་གཏང་རག་གི་མཆོད་པའི་སྐབས་སུ་རྟོགས་པ་ཕུལ་བའི་མགུར་ནི། །ལས་ཀྱི་ས་ཡི་འཛམ་གླིང་འདིར། །བྲམ་ཟེའི་རིགས་ལས་སྐྱེ་བ་བཞེས། །ཕྱི་ནང་གྲུབ་མཐའ་ཐམས་ཅད་མཁྱེན། །པཎྜི་ཏ་ལ་ཕྱག་འཚལ་ལོ། །ཞེས་སོགས་མཛད་དོ། །ཡང་ནཱ་རོ་པའི་ཞལ་ནས། ལྷོ་དུག་མཚོ་ཁོལ་མའི་ཕར་ཀ་རྩྭའི་སྤྱིལ་པོའི་ནང་དུ། ཡེ་ཤེས་ཀྱི་མཁའ་འགྲོ་མ་རུས་པའི་རྒྱན་ཅན་བཞུགས་པ་ལས། གདན་བཞིའི་སྐོར་རྣམས་ཞུས་གསུངས། དེར་སོང་བས་བྱིན་རླབས་ཀྱིས་ཆུའི་གནོད་པས་མ་ཚུགས་ཤིང༌། མཁའ་འགྲོ་མའི་དྲུང་དུ་ཕྱིན་ཏེ། ཕྱག་དང་གསེར་གྱི་མཎྜལ་ཕུལ་ནས་གདམས་པ་ཞུས་པས་དབང་བསྐུར་ཞིང༌། གདན་བཞི་ལ་སོགས་གདམས་པ་རྣམས་རྫོགས་པར་གནང༌། གསང་མཚན་བདེ་བའི་རྡོ་རྗེར་བཏགས། གཞན་ཡང་བླ་མ་མང་པོ་ལས་ཆོས་དཔག་ཏུ་མེད་པ་ཞུས་ཤིང་སྒྲོ་འདོགས་རྣམས་ལེགས་པར་བཅད་དོ། །དེ་ནས་མར་པ་ལོ་ཙཱས་ད་ནི་ལན་གཅིག་བོད་དུ་འགྲོ་ནས་གསེར་ཞིག་བསྒྲུབ་སྟེ། མཚན་ལྡན་གྱི་བླ་མ་འདི་ལྟ་བུ་མཇལ་བ་ད་ལན་ཙམ་ཡིན་པས། འདི་རྣམས་ཀྱི་མདུན་དུ་ཚོགས་ཀྱི་འཁོར་ལོ་བསྐོར་ཞིང་མེ་ཏོག་གི་མཆོད་པ་རེ་ཡང་འབུལ། རྡོ་རྗེ་གདན་ལ་སོགས་པའི་གནས་ཁྱད་པར་ཅན་འདི་རྣམས་ལ་མཆོད་པ་རེ་འབུལ་སྙམས་ནས། ང་རེས་གཅིག་བོད་དུ་འགྲོ་བ་ལགས་ཞུས་པས། ནཱ་རོ་པའི་ཞལ་ནས་ཁྱོད་བོད་དུ་འགྲོ་ན་གསང་སྔགས་ཀྱི་ཆོས་དང༌། ཡོན་ཏན་ཐམས་ཅད་བླ་མའི་བཀའ་བཞིན་སྒྲུབ་པ་ལས་བྱུང་བ་ཡིན་པས་འདི་བཞིན་ཡིད་ལ་ཟུངས་ཤིག་གསུངས་ནས། ཆོས་བརྒྱད་ཚེ་འདིའི་རྟ་མ་རྒྱུག །ཅེས་སོགས་གསུངས། དེ་ནས་གསེར་ལྷག་མ་གང་ཡོད་ཡོ་བྱད་བསྒྲུབ་ནས་ཉི་ཤུ་དགུའི་ནུབ་མོར་རྗེ་ནཱ་རོ་པ་ལ་གཏང་རག་གི་ཚོགས་འཁོར་བསྐོར་བའི་ཚོགས་གྲལ་དུ་རྟོགས་པ་ཕུལ་བའི་མགུར་ཏམྦུ་རའི་ཁོང་འགྱུར་གྱི་རྟ་ལ་དྲངས་ཏེ་ཕུལ་བ་ལ། རྗེ་མཚན་ལྡན་གྱི་བླ་མ་རིན་པོ་ཆེ་སོགས་ཀྱིས་གསོལ་བ་བཏབ་ཅིང་སྤྱན་ཆབ་ཕྱུང་བར། བླ་མའི་ཞལ་ནས་རྒྱ་གར་ཕྱོགས་བཞི་ན་གདུལ་བྱ་བྱིན་བརླབ་པའི་སློབ་དཔོན་བཞི་ཡོད་དེ། ཤར་ཕྱོགས་བྷཾ་ག་ལར་ནག་པོ་ཞབས། ལྷོ་ཕྱོགས་སེང་ག་གླིང་དུ་ནཱ་གརྫུ་ན། ནུབ་ཕྱོགས་ཨོ་རྒྱན་དུ་ཨིནྜ་བྷུ་ཏི། བྱང་ཕྱོགས་པརྤ་ཏ་རུ་ངས་བྱིན་གྱིས་བརླབས་པ་ཡིན་ནོ། །ཁོ་བོ་ལ་ཏཻ་ལོ་པས་ཁྱོད་ལུང་བསྟན་པའི་བུ་ཡིན་པས་བོད་ཡུལ་དུ་སོང་ལ་འགྲོ་དོན་གྱིས་ཤིག་དང་བླ་མ་རྣམས་ཀྱང་མཉེས་ཤིང་ང་དང་ཡང་འདུ་འབྲལ་མེད་པ་ཡིན་གསུངས་ནམ་ཐོ་རས་ཁར་ཕྱག་སྤྱི་བོར་བཞག་ནས། ནམ་མཁའི་མེ་ཏོག་སྐྱེས་བུ་ཡིས། ཞེས་སོགས་གསུངས་ཤིང་བརྡ་ཚིག་རྣམས་མ་བརྗེད་པར་བོད་དུ་བྱོན་ནོ། །དེ་ནས་བལ་བོད་ཀྱི་ས་མཚམས་ལི་ཤྭ་ཀ་ར་བྱ་བ་མཐའ་འཁོབ་ཀྱི་གྲོང་ཁྱེར་ཤྭ་གམ་གཅོད་ས་ཞིག་ཏུ་ཤྭ་གམ་མ་འཕྲོད་ནས་ཞག་ལྔ་ལུས་པའི་ནུབ་གཅིག་རྨི་ལམ་དུ་བྲམ་ཟེའི་བུ་མོ་མཛེས་མ་རྒྱན་སྣ་ཚོགས་ཀྱིས་བརྒྱན་པ་གཉིས་ཀྱིས་ཁྱོད་ལྷོ་ཕྱོགས་དཔལ་གྱི་རི་ལ་བྲམ་ཟེ་ཆེན་པོའི་མདུན་དུ་འགྲོ་དགོས་ཟེར་ཞིང༌། དར་གྱི་འདོ་ལིའི་ཁ་ན་བཞག་ནས་ཁོ་རང་གཉིས་ཀྱི་ཕྲག་ལ་བཀལ་ནས་སོང་བས། སྐད་ཅིག་དེ་ཉིད་ལ་བྲམ་ཟེ་ཆེན་པོའི་མདུན་དུ་ཕྱིན་ཏེ། དོ་ཧ་རྡོ་རྗེ་མགུར་གསུངས་པས་ཕྱག་རྒྱ་ཆེན་པོའི་རྟོགས་པ་མངོན་དུ་གྱུར་ནས་ཐུགས་སྤྲོ་བའི་ངང་ནས་གཙང་གྱེར་ཕུར་བྱོན། ཀློག་སྐྱ་ཇོ་སྲས་ཀྱི་སྣེ་ལེན་བྱས་ཏེ་ཟླ་བ་ཕྱེད་དུ་ཆོས་གྲྭ་བཙུག་ནས་ཞབས་ཏོག་བཟང་པོ་བྱས། དེའི་སྐབས་སུ་སྔར་མ་བཞེངས་པའི་གླུ་ཞིག་ཞུ་ཟེར་བས་སྔོན་གྱི་རྨི་ལམ་དུ་བྲམ་ཟེ་ཆེན་པོ་མཇལ་བའི་སྐབས་ཀྱི་དོ་ཧ་རྡོ་རྗེའི་མགུར་གསུངས་པ། དཔལ་དེ་རིང་བཀྲ་ཤིས་ཡར་གྱི་ངོ༌། ཞེས་ཁྱུང་ཆེན་གཤོག་བརྒྱང་གི་རྟ་ལ་དྲངས་ཏེ་གསུངས་པས་ཀུན་དད་པར་གྱུར་ཏོ། །དེ་ནས་ལྷོ་བྲག་ཏུ་བྱོན་པས་སློབ་དཔོན་དང་ཉེ་གཞིས་རྣམས་ཀྱིས་སྣ་ལེན་ཅུང་ཙམ་རེ་བྱས་ཤིང་ཆོས་མཁས་པར་ཤེས་ཀྱང་སྔར་མི་ངན་པའི་དོན་གྱིས་ཞུ་མི་མ་བྱུང༌། ཆང་ས་ཞིག་ཏུ་སྔགས་པ་ཞིག་དང་ཁ་འགྲས་པས་ཁོ་རྦབ་ཀྱིས་ཤི། དཔོན་པོ་ཇོ་བོ་དེས་ཁྱེད་ཀྱིས་ཅི་ཤེས་ཟེར། ཧེ་བཛྲ་དང་ཙཀྲ་སམྦྷ་ར་དང༌། མཉྫུ་ཤྲཱི་ཤེས་བྱས་པས། བ་རི་ཟ་རི་དེ་ཀུན་མ་གོ་ཟེར་ཡང་དོན་ལ་དད་ནས་སྣང༌། དེ་ནས་དུས་རེ་ཞིག་གི་ཚེ་བྱང་ནམ་རའི་གསེར་ཁ་རྡོར་བ་དང་ཐུག་སྟེ་རྟ་དཀར་པོ་ཞིག་ལ་དཔེ་ཆ་ སོགས་ཆ་རྐྱེན་རྣམས་བཀལ་ནས་གཡོག་པོ་གཅིག་ཁྲིད་དེ་ཆུ་འགྲམ་ཞིག་ཏུ་གྲོ་བྱས་པས། བནྡེ་ཞིག་བྱུང་ནས་ཕྱག་འཚལ་ཏེ་གང་ནས་ཡིན་ཟེར། ཉེ་གནས་ཀྱིས་གྲུབ་ཆེན་ནཱ་རོ་པའི་སློབ་མ་མར་པ་ལོ་ཙཱ་བྱ་བ་ཡིན་ཞེས་ཞིབ་པར་བཤད། ཁོང་རྔོག་སྟོན་ཆོས་རྡོར་ཡིན་ཞིང་ཤིན་ཏུ་དད་ནས་གདན་དྲངས། དབང་དང་གདམས་པ་མང་དུ་ཞུས་ཞབས་ཏོག་བཟང་པོ་བྱས། དེ་ནས་འཕན་ཡུལ་དུ་བྱོན་ཏེ་སྲིའུ་བཅུ་དགུ་གསོས་པས་རེ་རེ་ལ་གསེར་ཞོ་བཅུ་གཅིག་རེ་བྱུང༌། རེ་མ་ཏིའི་ངན་སྔགས་བསླབ་པས་གཙང་དར་ཡེ་སོགས་ཆོས་ཞུ་མང་དུ་བྱུང༌། འབུལ་བ་ཐམས་ཅད་གསེར་དུ་བསྒྱུར་བས་གསེར་མང་དུ་འགྲུབ། དེ་ཙ་ན་འདམ་སྙིང་དྲུང་གི་ཚོང་པ་མར་པ་མགོ་ཡག་ཟེར་བ་རུས་གཅིག་པའི་ཞེན་གྱིས་ཕྱག་འབུལ་དུ་ཕྱིན། དེར་གླེང་བསླང་བྱུང་བས་ཁོ་ན་རེ། འཕན་ཡུལ་སྐྱ་མོ་ན་བྱེའུ་ལ་ལྷུ་ཐང་རྩི་བ་ཡིན། བྱང་ཁ་སྣང་བརྒྱད་ནས་གཡག་ལ་གཟུག་ཐང་བྱེད་ཟེར་བ་ཡིན་པས་ངའི་ཡུལ་དུ་བྱོན་ཟེར། དེར་འདམ་དུ་ཕྱིན་པས་འབུལ་བ་ཞབས་ཏོགས་མང་དུ་བྱས། དེ་དུས་ནོར་ལ་ཞེན་པ་ཆེ་བ་ལྟར་མཛད་པས་སློབ་མ་རྣམས་ཅུང་མ་མགུ་བས། ཁོ་བོ་ནོར་ལ་གཅེས་པ་མ་ཡིན། བླ་མ་རྣམས་ཀྱི་སྐུ་དྲིན་བསབ་པ་དང༌། རྟེན་ངོ་མཚར་ཅན་རྣམས་ལ་མཆོད་པ་འབུལ་བའི་ཕྱིར་ཡིན་གསུངས་པས་ཀུན་ཡིད་ཆེས་པར་གྱུར། ཡོན་བདག་འགའ་ཞིག་མ་དད་པ་ལ་ལུ་གུ་དང་གཡག་ཤི་བའི་རོ་ལ་གྲོང་འཇུག་མཛད་པས་གྲུབ་ཐོབ་ཀྱི་སྙན་པ་ཕྱོགས་ཀུན་ཏུ་ཁྱབ་ཅིང་ཆོས་ཞུ་དང་འབུལ་བ་ཆེར་བྱུང༌། དེ་ནས་ནུབ་གཅིག་ནམ་ཐོ་རངས་ཁར་མཁའ་འགྲོ་མ་དཔག་ཏུ་མེད་པ་བྱུང་ནས་གླུ་གར་རོལ་མོའི་སྒྲ་བཅས་གོང་དུ་ནཱ་རོ་པས་གསུངས་པའི་བརྡ་རྣམས་བཀྲོལ་ཅིང་གནང༌། ཏཻ་ལོས་ལུང་བསྟན་ནཱ་རོའི་བུ། །ལྷུན་གྲུབ་ཆོས་ཀྱི་བློ་གྲོས་ཁྱོད། །པཱུ་ལ་ཧ་རིའི་དགོན་པ་ན། །རྣལ་འབྱོར་དབང་ཕྱུག་ནཱ་རོ་པ། །སྐྱེ་བ་མེད་པའི་དབྱིངས་སུ་ཡལ། །ཁྱེད་བཞུད་ན་ངེད་དང་འགྲོགས་ལ་གཤེགས། ཞེས་ཟེར་ནས་བསྐུལ་བས། རྣལ་སད་པ་དང་གདུང་ཤུགས་དྲག་པོས་མང་དུ་བཤུམ་པ་ལ། མགོ་ཡག་ལངས་ནས་འདི་ལྟར་མཛད་པ་ཅི་ལགས་ཞུས་པས། ང་རྒྱ་གར་དུ་འགྲོ་དགོས་པར་འདུག་གསུངས་ཤིང་ཆོས་འཕྲོ་རྣམས་ཚར་བར་མཛད། དེར་མགོ་ཡག་གིས་གཡུ་སེང་གེའི་མགོ་བྱ་བ་གཅིག་ཇ་ཤོང་སིག་བཞི། རྟ་ཁྲ་བོ་མགོ་དཀར་སོགས་མང་དུ་ཕུལ་བས་དངོས་པོ་རྣམས་གསེར་དུ་བསྒྱུར་བས་གསེར་སྲང་སུམ་བརྒྱ་ལྷག་འགྲུབ། མགོ་ཡག་ལ་སོགས་པའི་སློབ་མ་བཅུ་དགུས་མང་ཡུལ་དུ་བསྐྱལ་ནས་སླར་རང་ཡུལ་དུ་ལོག །དེ་ནས་བལ་པོར་བྱོན་ནས་པེ་དྷ་བ་ལ་གསེར་སྲང་ཕྱེད་ཕྱག་རྟེན་དུ་ཕུལ། བླ་མས་ཕྱག་ནས་བཟུང་སྟེ་བུ་འོང་ཙ་ཕ་མེད། ཁྱོད་ན་ནིང་མི་ཡོང་བའི་དཔེ་ཅི་ཡོད། བླ་མ་སྤྱོད་པ་ལ་གཤེགས་གསུངས་མང་དུ་བཤུམ། དེ་ནས་བླ་མ་སྤྱི་ཐེར་བ་ལ་གསེར་སྲང་གང་ཕྱག་རྟེན་ཕུལ་མཇལ་བས་གོང་བཞིན་གསུངས། བླ་མ་རྣམ་གཉིས་ལ་ཚོགས་འཁོར་དང་འཕགས་པ་ཤིང་ཀུན་ལ་མཆོད་པ་དང་སྨོན་ལམ་བཏབ་ནས་རྒྱ་གར་དུ་བྱོན། དགེ་ཚུལ་ཤེས་རབ་སེང་གེ་མཇལ་གསེར་སྲང་གང་ཕྱག་རྟེན་དུ་བྱས། བླ་མ་སྤྱོད་པ་ལ་གཤེགས་པའི་ལོ་རྒྱུས་ཞིབ་ཏུ་གསུངས། དགྱེས་རྡོར་གྱི་ཐང་སྐུ་གཅིག །ཀ་པཱ་ལའི་ནང་དུ་རྩ་རྒྱུད་བཞག་པ་གཅིག །རྡོར་དྲིལ་གཅིག་བཅས་མར་པ་བོད་ནས་ཡོང་བ་ལ་གཏོད་གསུངས། དེར་མར་པས་བླ་མ་དྲན་ནས་མང་དུ་བཤུམས་ཏེ་ང་ཅི་ལྟར་བྱས་ན་གྲགས་ཞུས་པས། གསེར་ཅི་ཙམ་ཡོད་གསུངས། མང་དུ་ཡོད་ཞུས་པས། འོ་ན་ཅི་ཡོད་དོན་ལ་བྱ་བ་ཡིན་པས། མཻ་ཏྲི་བ་ལ་སོགས་གྲུབ་ཐོབ་རྣམས་ཀྱི་མདུན་དུ་སོང་ལ་གསོལ་བ་ཐོབ་དང་ཁྱོད་ལུང་བསྟན་པའི་སྐྱེས་བུ་ལས་འཕྲོ་ཅན་ཡིན་པས། མཇལ་ནས་འོང་གིས་གསུངས་སོ། །དེ་ནས་རྒྱལ་བ་མཻ་ཏྲི་པའི་མདུན་དུ་སོང་སྟེ། གནས་དེ་མེ་ཏོག་དམར་པོའི་ཚལ་གྱིས་གང་བའི་འོད་ཀྱིས་མི་ལ་སོགས་མདངས་འཕྲོག་ཅིང་དམར་པོར་བསྒྱུར་ནུས་པས། མེ་ཏོག་མདངས་འཕྲོག་གི་རི་མེ་ལྟར་འབར་བ་ཟེར་ཏེ། དེ་ན་ཤིང་སྡོང་པོ་གཅིག་གི་དྲུང་དུ་སྐུ་གཟི་མདངས་དང་བཅས་པར་བཞུགས་པ་ལ། ཕྱག་དང་གསེར་གྱི་མཎྜལ་ཕུལ་ནས། ཚོགས་ཀྱི་འཁོར་ལོ་ཟླ་བ་གཅིག་བསྐོར་ཏེ་གསོལ་བ་བཏབ་པས། ངོ་མཚར་གྱི་ཆོ་འཕྲུལ་མང་པོ་ཡང་མཐོང་གནམ་གང་གི་ཉིན་པར། རྨི་ལམ་མི་ངན་རྨི་ལམ་བཟང༌། །ནོར་བུ་རྒྱལ་མཚན་རྩེ་ལ་ཕྱར། །སྒེག་མོའི་མེ་ལོང་ཟུར་མིག་བལྟ། །དད་དཔོན་ཆེན་པོའི་གྲུ་གཟིང་གཏོང༌། །བྱ་འཕུར་སྟེང་ན་རྒྱལ་མཚན་བཙུག །བྱ་མགོ་བོད་དུ་བསྟན་པ་རྨིས། །དཔལ་ནཱ་རོ་པ་དང་མཇལ་ཏེ་འོང༌། གསུངས། དེ་ནས་ཀུ་ཀུ་རི་པའི་མདུན་དུ་སོང་བས་ཁོང་དུག་མཚོའི་གླིང་ནས་ཚུར་བྱོན་ཏེ། ཆུ་འགྲམ་དུ་ཤིང་ཏིང་ཏིང་ཀུན་གྱི་རྩ་བར་བཞུགས་པ་ལ། ཚོགས་ཀྱི་འཁོར་ལོ་ཟླ་བ་གཅིག་ལ་བསྐོར་ཞིང་གསོལ་བ་བཏབ་པས། རྗེ་བཙུན་དཔལ་ལྡན་ནཱ་རོ་པ། །གླང་པོ་ཆེ་ཡི་བལྟ་སྟངས་ཀྱིས། །སྤྱན་མིག་གཉིས་ནི་ཉི་ཟླ་ཡི། །འོད་ཟེར་བོད་དུ་བཀྱེ་བ་རྨིས། །དཔལ་ནཱ་རོ་པ་དང་མཇལ་ཏེ་འོང༌། ཞེས་གསུངས། ཁྱེད་ཀྱི་གདམས་ངག་ཐུན་མོང་མ་ཡིན་པ་གཅིག་ཀྱང་ཐོབ་པ་ཡིན་གསུངས། རུས་པའི་རྒྱན་ཅན་དུར་ཁྲོད་སོ་ས་གླིང་དུ་བཞུགས་པའི་དྲུང་དུ་སོང་ནས། ཚོགས་ཀྱི་འཁོར་ལོ་ཟླ་བ་གཅིག་ལ་བསྐོར་ཏེ་གསོལ་བ་བཏབ་པས། རི་གསུམ་རྩེ་ནས་དུང་འབུད་ཅིང༌། །ལུང་གསུམ་མདོ་ནས་ལམ་སྣ་འདྲེན། །བུམ་ནང་མར་མེ་འབར་བ་ཡིས། །འཛམ་གླིང་ཐམས་ཅད་གསལ་བར་རྨིས། །དཔལ་ནཱ་རོ་པ་དང་མཇལ་ཏེ་འོང༌། ཞེས་གསུངས། དེ་ནས་དགེ་ཚུལ་ཤེས་རབ་སེང་གེའི་མདུན་དུ་ཚོགས་ཀྱི་འཁོར་ལོ་ཟླ་བ་གཅིག་བསྐོར་ནས་གསོལ་བ་བཏབ་པས། བདག་གི་མྱ་ངན་ཐང་ཆེན་ལས། །དམུས་ལོང་ཁྲིད་དེ་གཉིས་ལ་བཏད། །གཉིས་ཀྱི་རབ་རིབ་མིག་ཕྱེས་ནས། །སེམས་ཀྱི་མེ་ལོང་བལྟ་བ་རྨིས། །དཔལ་ནཱ་རོ་པ་དང་མཇལ་ཏེ་འོང༌། གསུངས། ཡང་རི་རི་པའི་མདུན་དུ་ཚོགས་ཀྱི་འཁོར་ལོ་ཟླ་བ་གཅིག་ལ་བསྐོར་ནས། གསོལ་བ་བཏབ་པས། བྲམ་ཟེ་ཆེན་པོ་བཟང་ལྡན་གྱིས། རིགས་ངན་ཆོས་ཀྱི་རྒྱལ་པོ་ལ། གསོལ་བཏབ་དགེ་བཟང་དཔང་བཙུག་པས། འབྲས་བུས་འདིར་ཡང་མཇལ་བར་ངེས། ཞེས་གསུངས། དེ་ནས་ཀ་སོ་རི་པའི་མདུན་ཏུ་ཟླ་བ་གཅིག་ལ་ཚོགས་ཀྱི་འཁོར་ལོ་བསྐོར་ཞིང་གསོལ་བ་བཏབ་པས། ཡང་དག་ཟླ་བའི་དཀྱིལ་འཁོར་དུ། །སེམས་ཉིད་ཆོསསྐུའི་མེ་ལོང་ནི། །མི་གཡོ་པུ་ལ་ཧ་རི་ན། །ནཱ་རོ་པ་ཡི་སྟོན་པར་འགྱུར། ད་སྟེ་ཟླ་བ་བརྒྱད་ན་པུ་ལ་ཧ་རིར་མཇལ་བར་གདའ་འོ། །ཞེས་ལུང་བསྟན་ཏོ། །གཞན་ཡང་སྦས་པའི་རྣལ་འབྱོར་པ་ལྔ་རྣལ་འབྱོར་མ་དྲུག་སྟེ་བཅུ་གཅིག་གི་མདུན་དུ་ཚོགས་ཀྱི་འཁོར་ལོ་བསྐོར་ནས་གསོལ་བ་བཏབ་པས་མཇལ་བར་ལུང་བསྟན་ཏོ། །དེ་ནས་ནཱ་ལེནྡྲར་བྱོན་ནས་བཞུགས་ཀྱང་བླ་མ་དྲན་ནས་སྡོད་མ་ཚུག་པར་ཕྱོགས་ཐམས་ཅད་དུ་ཚོལ་དུ་བྱོན་པས་ཙནྡན་སྡོང་པོར་འཇའ་གུར་དུ་ཀྱཻ་རྡོར་ལྷ་དགུ་ཐུགས་ཀའི་སྔགས་ཕྲེང་དང་བཅས་པ་མཇལ་བ་དང༌། རྨི་ལམ་དུ་ཟླ་བའི་སྟེང་དུ་ནཱ་རོ་པ་སེང་གེ་ཆིབས་ནས་བཙུན་མོ་གཉིས་ཀྱིས་བརྟེན་ནས་གླུ་གར་བྱེད་པ་རྨིས་པ་དང༌། ཡང་ཤེལ་གྱི་ཕ་བོང་གཅིག་གི་སྟེང་དུ་བླ་མ་གཤེགས་པའི་ཞབས་རྗེས་གསལ་བར་དོད་པ་མཐོང་བས། འཇའ་ཚོན་ལྟ་བུའི་སྐུ་ཝལ་གྱིས་མཐོང་བ་དང༌། ཤིན་ཏུ་གསལ་བ་ཞིག་མཐོང་བ་དང༌། ཙནྡན་གྱི་ནགས་ཚལ་དུ་སྐུ་གཟི་མདངས་ལ་མེ་འབར་བ་མཐོང་བ་དང༌། བྲག་ཕུག་ཞིག་ཏུ་ཐོད་ཁྲག་གསོལ་ཞིང་བཞུགས་པའི་འཕྲོ་བདག་ལ་གནང་བས་བདེ་སྟོང་ཐུགས་ལ་ཤར་བ་དང༌། དེ་རྣམས་ནི་ཡུད་ཙམ་ནས་མི་སྣང་བར་གྱུར་པའོ། །དེ་ནས་ཡང་གསོལ་བ་བཏབ་ནས་ཚོལ་བས་རི་བོ་གསེར་གྱི་དགོན་བྱ་བར་བླ་མ་སྐུ་གཟི་མདངས་ཅན་ཁཊྭཱྃ་ཐོད་པ་བསྣམས་ནས་གར་མཛད་པ་མཇལ་བས་དེ་མ་ཐག་དགའ་ཆེས་ཏེ་གསེར་སྙིམ་པས་གཅུས་ནས་ཕུལ་ཏེ། ཕ་རྗེ་བཙུན་ཐུགས་རྗེས་བཟུང་དུ་གསོལ། ཞུས་པས་བླ་མ་དཀོན་མཆོག་མཆོད་གསུངས་ནས་གསེར་རྣམས་ནགས་ཚལ་གསེབ་ཏུ་གཏོར། མར་པས་བོད་ནས་དཀའ་སྡུག་གིས་བཙལ་སྙམས་པས། བུ་འདོད་ན་ཐམས་ཅད་གསེར་གླིང་ཡིན་ནོ་གསུངས། གོང་གི་ཕུལ་བའི་གསེར་རྣམས་རང་གི་སྙིམ་པར་བྱུང་ཞིང་ཡང་མི་སྣང་བར་གྱུར། ཡང་མོས་གུས་གྱིས་བཙལ་བས་རི་བོ་གསེར་གྱི་དགོན་པར་ནགས་ཚལ་ཕུན་སུམ་ཚོགས་པར་ནཱ་རོ་པ་སྐུ་གཟི་མདངས་དང་ལྡན་ཞིང་རུས་པའི་རྒྱན་དྲུག་གིས་བརྒྱན་པ་ཕྱག་ན་ཌཱ་མ་རུ་དང་ཐོད་པ་ཐོགས་པ་ལམ་མེར་མཇལ་བས། ཐུགས་རྗེ་མ་ཆུང་ཞེས་སྐད་མི་ཐོན་ཙམ་དུ་གསོལ་བ་བཏབ་པས་ཙནྡན་གྱི་སྡོང་པོ་གཅིག་གི་རྩ་བར་བཞུགས་པ་ལ་གསེར་གྱི་མཎྜལ་ཕུལ་ཞིང་ཕྱག་འཚལ་ནས་ཞབས་ལ་འཇུས་ཤིང་སྤྱི་བོར་བཞག་སྟེ། ང་བོད་ནས་དཀའ་ལས་མང་པོ་བྱས་ནས་འོང༌། འདིར་བླ་མ་མ་རྙེད་ནས་དཀའ་བ་དཔག་ཏུ་མེད་པ་སྤྱད་པ་ལ་རྗེ་བཙུན་དེ་ཙམ་དུ་ཐུགས་རྗེ་ཆུང་བ་ཞེས་ཡུས་ཀྱིས་བརྣངས་ནས་སྤྱན་ཆབ་མང་པོ་ཕྱུང་བ་ལ། ང་དུས་རྟག་ཏུ་ཁྱོད་དང་མ་བྲལ་བསྡད་པ་ལ་ཁྱོད་རང་ལས་ཀྱི་སྒྲིབ་པས་བསྒྲིབས་ནས་རང་གི་བག་ཆགས་ཀྱིས་མ་མཐོང་བ་ཡིན། ད་ལྟ་བག་ཆགས་ངན་པ་དང༌། སྒྲིབ་པ་ཐམས་ཅད་དག་ནས་མཐོང་བ་ཡིན་གསུངས། དེ་ནས་ཡབ་སྲས་འགྲོགས་ནས་པཱུ་ལ་ཧ་རིར་བྱོན་པའི་ལམ་ན་ཡེ་ཤེས་མཁའ་འགྲོ་མང་པོས་ནཱ་རོ་པ་ལ་མཆོད་པ་ཕུལ་ནས། ལུང་བསྟན་མར་པ་བློ་གྲོས་ནི། །ཡང་དག་མཐར་ཕྱིན་སྡོང་གྲོགས་བྱེད། །ཟླ་གསུམ་སོང་བའི་ནང་པར་ནས། །རྗེ་བཙུན་དཔལ་ལྡན་ནཱ་རོ་པ། །པུ་ལ་ཧ་རིའི་དགོན་པ་ནས། ཤིང་རྟ་ཆེན་པོའི་རྟར་བསྐྱོད་དེ། །ཨོ་རྒྱན་རང་བྱུང་དུར་ཁྲོད་དུ། ལུང་བསྟན་རང་གྲོལ་མཁའ་འགྲོས་བསུ། ཞེས་གསུངས་ནས་ནམ་མཁར་གཤེགས་སོ། །དེ་ནས་པཱུ་ལ་ཧ་རིར་བྱོན་ནས་དེར་ནཱ་རོ་པས། བོད་ཀྱི་མར་པ་བློ་གྲོས་ཁྱོད། །དེ་དེ་ཡིན་ཏེ་དེ་ཉིད་མེད། དེ་སྔ་བསྟན་པ་རྣམས་གཙོ་ཆེར་རྒྱུད་འབྲེལ་པ་ཐབས་ལམ་གྱི་གདམས་ངག་ཡིན། ད་ནི་བྱིན་རླབས་དང་འབྲེལ་བ་སྙན་བརྒྱུད་ཀྱི་གདམས་ངག་སྟོན་པ་ཡིན་གསུངས་ནས། དེར་ཚོགས་ཀྱི་འཁོར་ལོ་བསྐོར་ཏེ། ཐབས་གཙོ་བོར་སྟོན་པ་རྡུལ་ཚོན་གྱི་དཀྱིལ་འཁོར་དུ་དབང་བསྐུར་བའི་ཚེ། བླ་མའི་ཐུགས་ཀར་ལྷན་ཅིག་སྐྱེས་མ་བྱོན་ཏེ། བུམ་པའི་དབང་བསྐུར། ཐུགས་ཀའི་སྔགས་ཀྱི་འཁོར་ལོ་ཞལ་ནས་ཐོན་ཏེ། མར་པའི་ཐུགས་ཀར་ཐིམ། སྣོད་བཅུད་ཐམས་ཅད་ལྷ་དང་ལྷ་མོའི་རང་བཞིན་དུ་མཐོང༌། གསང་མཚན་ཞེ་སྡང་རྡོ་རྗེར་བཏགས། ཤེས་རབ་དང་འབྲེལ་བ་སིནྡྷུ་རའི་དལ་ལ་བརྟེན་ནས་བྱིན་གྱིས་རླབས་པའི་ཚེ། བླ་མ་ཡབ་ཡུམ་གྱི་སྦྱོར་མཚམས་ནས་བདུད་རྩིའི་རྒྱུན་བབ་ཅིང་མར་པ་ལ་ཐིམ་པས་རྩ་མདུད་གྲོོལ་ཏེ་བདེ་སྟོང་ཟག་པ་མེད་པའི་ཏིང་འཛིན་རྒྱུད་ལས་སྐྱེས་པ་བླ་མས་ངོ་སྤྲད། དེ་དག་གི་སྐབས་སུ་རང་བྱུང་ཤེལ་གྱི་མཆོད་རྟེན་ཁྲུ་གང་བ་དང༌། བཅོམ་ལྡན་འདས་ལྷན་ཅིག་སྐྱེས་པའི་སྐུ་ལ་སོགས་ལྷ་ཚོགས་དཔག་ཏུ་མེད་པ་རང་བྱུང་དུ་བྱོན་ཞིང༌། མཆོད་པའི་བཀོད་པ་ཕུན་སུམ་ཚོགས་པ་ཡང་བྱུང༌། ཙནྡན་གྱི་སྡོང་པོ་གཅིག་ལ་སྒྲ་དང་འོད་བྱུང་བའི་ནང་ནས་དགྱེས་པ་རྡོ་རྗེ་ལྷ་དགུ་བྱུང་བ་དེའི་འོད་ཀྱིས་གསལ་བར་གྱུར། དེ་ལ་སོགས་པའི་རྟགས་ངོ་མཚར་ཅན་དཔག་ཏུ་མེད་པ་བྱུང་ངོ༌། །དེ་ནས་དེ་ཉིད་དུ་བླ་མ་ནཱ་རོ་པ་ཆེན་པོའི་ཞབས་དྲུང་དུ་ཟླ་བ་གསུམ་བཞུགས་ཏེ༌། གོང་དུ་གསུངས་པའི་ཆོས་རྣམས་ཀྱང་གསལ་བཏབ་ཅིང༌། ག་དར་དང་ཞུ་གཏུག་ལེགས་པར་མཛད་ནས་ཐེ་ཚོམ་མེད་པར་བྱས་སོ། །གོང་དུ་མ་ཐོབ་པའི་སྙན་བརྒྱུད་ཡིད་བཞིན་ནོར་བུ་རྣམ་གསུམ་དང༌། ལུས་མེད་མཁའ་འགྲོའི་ཆོས་སྐོར་ལ་སོགས་མང་དུ་གནང་ཞིང༌། སྒྲོ་འདོགས་ཐམས་ཅད་ཆོད་པར་བྱས་པ་ཡིན་ནོ། །དེར་ནཱ་རོ་པའི་ཞལ་ནས་མདོ་རྒྱུད་ཐམས་ཅད་ཀྱི་དགོངས་པ་ཕྱོགས་གཅིག་ཏུ་དྲིལ་ཞིང་སྙིང་པོའི་དོན། མར་གྱི་སྙིང་ཁུ་ལྟ་བུ་ཚེ་གཅིག་ལུས་གཅིག་ལ་སངས་རྒྱས་པར་བྱེད་པའི་ཆོས། སྙན་བརྒྱུད་ཆོས་དྲུག་དང་བཅས་པ་འདི་དག་ཡིན་ཏེ། དེ་ཡང་གདམས་པའི་མཆོག་ཏུ་གྱུར་པ། བླ་མ་དམ་པ་ལ་སངས་རྒྱས་ཀྱི་འདུ་ཤེས་བསྐྱེད་ཅིང༌། ཅི་གསུང་གི་བཀའ་ལས་མི་འདའ་ཞིང༌། སྒྲུབ་པ་ལ་བརྩོན་ཏེ་འགྲོ་དོན་བྱེད་པ་ཡིན་པས། སྣོད་མིན་ལ་གསང་ཞིང་སྣོད་ལྡན་ལ་སྟོན་པར་གྱིས་ཤིག །ཏཻ་ལོ་པས་ང་ལ་ཁྱོད་ལུང་བསྟན་པ་ཡིན་པས། ཕྱག་རྒྱ་ལ་བརྟེན་ནས་གདུལ་བྱ་རྣམས་སྨིན་ཅིང་གྲོལ་བར་གྱིས་དང༌། ཁྱོད་ཀྱི་སློབ་མ་དང་ཡང་སློབ་ལ་སོགས་ནས་ཀྱང་གཞན་དོན་ཇེ་ཆེར་འགྲོ་ཞིང་སངས་རྒྱས་ཀྱི་བསྟན་པ་དར་བར་འགྱུར་རོ། །ཞེས་གསུངས་སོ། །དེ་ནས་གདམས་པ་ཐམས་ཅད་གྲུབ་པ་དང༌། གཏང་རག་གི་མཆོད་པ་ཆེན་པོ་བྱེད་པའི་ཕྱིར། གྲུབ་པ་ཐོབ་པའི་རྣལ་འབྱོར་ཕོ་མོ་མང་པོ་བརྡས་བཀུག་སྟེ། ཚོགས་ཀྱི་འཁོར་ལོ་རྒྱ་ཆེན་པོ་བསྐོར་ནས་ཚོགས་ལ་ལོངས་སྤྱད། ཡི་དམ་མཁའ་འགྲོ་ཆོས་སྐྱོང་གི་ལྟས་ངོ་མཚར་ཅན་མང་པོ་ཡང་མཐོང་བས་ཤིན་ཏུ་དགའ་སྟེ། རྟོགས་པ་ཕུལ་བས་བླ་མ་ཡང་ཤིན་ཏུ་མཉེས་ནས། །བླ་མའི་མཚན་ཉིད་བརྒྱུད་པར་ལྡན། །སེམས་ཉིད་མཚན་ཉིད་ཟུང་དུ་འཇུག །སྣང་བའི་མཚན་ཉིད་སྐྱེ་བ་མེད། །འཁོར་བའི་མཚན་ཉིད་གཞི་རྩ་བྲལ། །མོས་གུས་གནད་ཀྱི་མཚམས་སྦྱར་ནས། །སྟོང་ཉིད་སྙིང་པོའི་རོ་སྙོམས་པས། རང་བྱུང་འོད་གསལ་བརྗོད་ལས་འདས། རྟོགས་པ་ཕྱག་རྒྱ་ཆེན་པོ་ཡིན། དེར་ནཱ་རོ་པས། ཁོང་གི་ཐུགས་དམ་པདྨ་དམར་པོའི་ཕྲེང་བ་བརྒྱ་རྩ་བརྒྱད་གནང་ནས། བུ་ཁྱོད་དང་ཁོ་བོ་འདུ་འབྲལ་མེད་དོ། །ཁྱོད་འཕོ་བའི་དུས་སུ་ཁོ་བོ་ཡང་འོང་ཞིང་ཡི་དམ་མཁའ་འགྲོ་ཆོས་སྐྱོང་གིས་ལྟས་ངོ་མཚར་ཅན་དུ་མ་སྟོན་ནས་བསུ་ཞིང་སྐྱེ་བ་ཕྱི་མར་ཁྱོད་རྒྱ་གར་ཤར་ཕྱོགས་སུ་བྲམ་ཟེའི་རིགས་མཆོག་ཏུ་གྱུར་པ་ཞིག་ཏུ་སྐྱེས་ནས་ཁོ་བོ་དང་ལྷོ་ཕྱོགས་དཔལ་གྱི་རི་ལ་མཇལ་བར་འགྱུར་རོ་གསུངས། དེ་ནས་སྐྱ་རེངས་དང་པོ་ཤར་བའི་ཚེ། ཕྱག་གཡོན་པ་མར་པའི་སྤྱི་བོར་བཞག་སྟེ། སྔོན་ཚུལ་བཞིན་སྦྱངས་པའི་ལས་འཕྲོ་ཅན། ཞེས་ལུང་བསྟན་གྱི་མགུར་གསུངས་ཏེ། དེའི་ཚེ་འོད་དང་རོལ་མོའི་སྒྲ་དང་སྤོས་ཀྱི་དྲི་དང༌། མེ་ཏོག་གི་ཆར་དང༌། འཇའ་འོད་ཀྱི་གུར་ལ་སོགས་པ་མཆོད་པའི་བྱེ་བྲག་བསམ་གྱིས་མི་ཁྱབ་པའི་དབུས་སུ། སེང་གེའི་ཁྲི་པདྨ་བརྩེགས་པའི་སྟེང་དུ་ནཱ་རོ་ཆེན་པོ་བཞུགས་ཏེ། དཔའ་བོ་མཁའ་འགྲོ་གྲངས་མེད་པས་གདན་དྲངས་ནས་ནམ་མཁའ་རུ་ཇེ་མཐོ་ཇེ་མཐོ་ལ་སོང་ནས་ཨུ་རྒྱན་དུ་གཤེགས་སོ། །དེ་ནས་མར་པ་ཐུགས་ཤིན་ཏུ་སྐྱོ་བར་གྱུར་ཏེ། ཕྱིར་ཉིན་ཉི་མ་ཤར་ཙ་སེང་ལྡེང་ནགས་ཚལ་གྱི་ནང་དུ་སོང་ཞིང་གསོལ་བ་བཏབ་པས། ནཱ་རོ་པ་ཤིང་ནྱ་གྲོ་ཏའི་སྡོང་པོ་གཅིག་གི་སྟེང་དུ་བཞུགས་ནས་འདི་སྐད་གསུངས། དལ་འབྱོར་གཟུགས་ཀྱི་ཕུང་པོ་འདི། གཡར་སྐྱོ་ཙམ་ན་འདི་སྐད་དོག །ཅེས་སོགས་ཆོས་དྲུག་དྲིལ་བ་རྡོ་རྗེའི་མགུར་གསུངས་པས། སྐྱོ་བ་སངས་ཏེ་ཤིན་ཏུ་དགའ་བར་གྱུར་ཏོ། །དེ་ནས་མངའ་བདག་མཻ་ཏྲི་པའི་མདུན་དུ་སོང་ཞིང་ཕྱག་དང་གསེར་གྱི་མཎྜལ་ཕུལ་ནས་ནཱ་རོ་པ་དང་མཇལ་བའི་ལོ་རྒྱུས་རྣམས་ཞིབ་ཏུ་ཞུས་ཤིང༌། གདམས་ངག་ཞུས་པས་སྙན་བརྒྱུད་ཀྱི་གདམས་པ་རྣམས་བུམ་པ་གང་བྱོའི་ཚུལ་དུ་གནང་བས། གཏང་རག་ཏུ་ཚོགས་ཀྱི་འཁོར་ལོ་བསྐོར་ཞིང༌། བླ་མ་ལ་རྟོགས་པ་ཕུལ་བའི་མགུར་ནི། སྤྱི་གཙུག་བདེ་ཆེན་གཞལ་ཡས་ནས། ཞེས་སོགས་གསུངས་པས་མཻ་ཏྲི་པ་ཡང་ཤིན་ཏུ་དགྱེས་ཏེ། ཕྱག་སོར་ལ་གསེར་གྱི་མགུ་ཡ་རྡོར་དྲིལ་ཟུང་ཡོད་པ་གནང་ནས། དུས་གསུམ་གྱི་སངས་རྒྱས་ཐམས་ཅད་ཀྱི་ངོ་བོ་བླ་མ་དམ་པ་སྤྱི་བོར་ཁུར་ཞིང༌། ཡི་དམ་མཁའ་འགྲོ་ཆོས་སྐྱོང་གི་ཚོགས་གཏོར་མ་མ་གཅོད་དང་ཅི་བསམ་འགྲུབ་སྟེ། གཞན་དོན་འབད་མེད་དུ་འབྱུང་ཞིང༌། མཆོག་གི་དངོས་གྲུབ་ཐོབ་པར་འགྱུར་རོ། །ཞེས་གསུངས་སོ། །དེ་ནས་ཀུ་ཀུ་རི་པ༌། ཀ་སོ་རི་པ། རྣལ་འབྱོར་མ་རུས་པའི་རྒྱན་ཅན་ཀུ་སུ་ལུ་པ་ཡེ་ཤེས་སྙིང་པོ་དགེ་ཚུལ་ཤེས་རབ་སེང་གེ་ལ་སོགས་བླ་མ་རྣམས་ལ་ཚོགས་འཁོར་གཏང་རག་ཕུལ་ཞིང་སྨོན་ལམ་གྱི་ཕྱག་འཚལ། བྲམ་ཟེའི་ཁྱེའུ་གསེར་ཕྲེང༌། དེད་དཔོན་བུ་མོ་ཙཀྲ། ཆང་ཚོང་བུ་མོ་ཀུན་དྷ་ལི་སོགས་ལ་ཕྱག་རྟེན་དང་སྨོན་ལམ་ཕུལ། རྡོ་རྗེ་གདན་སོགས་རྒྱ་གར་གྱི་གནས་ཆེན་རྣམས་ལ་མཆོད་པ་དང་ཚོགས་འཁོར་མཛད། དེ་ནས་ཤིང་ཨ་མྲའི་ཚལ་དུ་མཆེད་གྲོགས་འགའ་ཞིག་གཤེགས་སྐྱེལ་དང་མཉམ་དུ་བཞུགས། བར་ཆད་མེད་པར་སློབ་གཉེར་མཐར་ཕྱིན་བོད་དུ་འགྲོ་བར་ཐུགས་བྲོད། བླ་མ་མཆེད་གྲོགས་ཤུལ་དུ་ལུས་པར་ཐུགས་འཕྲེང༌། ལམ་བར་འཇིགས་པ་རྣམས་འཚེར་གསུངས་ནས་མགུར་མཛད། དེར་སྐྱེས་མཆོག་མར་པ་ལོ་ཙཱ་དེ་ཉིད་རྒྱ་གར་དུ་བྱོན་པའི་སྔ་མ་ལ་ལོ་ལྔ། བར་མ་ལ་ལོ་དྲུག་དང་ཟླ་བ་བདུན། ཕྱི་མར་ལོ་ལྔ་སྟེ་བཅུ་དྲུག་བཞུགས། སྤྱིར་གྲུབ་ཐོབ་བླ་མ་བརྒྱ་རྩ་བརྒྱད་བཤད་སྲོལ་འཛིན་པ་ལྔ་བཅུ། སྣང་བར་འགྱུར་ངེས་བཅུ་གསུམ། ཁྱད་འཕགས་བཞི། འགྲན་གྱི་དོ་མེད་རྣམ་གཉིས། དེའི་ནང་ནས་གཙུག་གི་རྒྱན་གཅིག་པཎ་ཆེན་ནཱ་རོ་པ་བརྟེན། ཞབས་ཏོག་གསུམ་གྱིས་མཉེས་པར་མཛད། གདམས་པ་རྫོགས་ནས་ལུང་བསྟན་བརྙེས། ནཱ་རོ་སྤྱོད་པར་གཤེགས་ཀྱང་མཇལ་བའི་གྲགས་སྙན་ཐོབ་བཞིན་བལ་པོར་ཕེབས། དེར་ཕམ་མཐིང་བའི་ཚེས་བཅུའི་སྐུ་མཆོད་དང༌། དུར་ཁྲོད་ར་མ་དོ་ལིར་ཚེས་བཅུའི་མཆོད་པ་རྣམས་མཛད་ཅིང་རྡོ་རྗེའི་མགུར་སོགས་ངོ་མཚར་བ་མཛད། བལ་ཡུལ་རིན་ཆེན་ཚུལ་གྱི་གཙུག་ལག་ཁང་དུ་བཞུགས་པའི་ནུབ་གཅིག་རྗེ་མཻ་ཏྲི་པ་བྱོན་ནས་སྐྱེ་མེད་མཚོན་པའི་བརྡའ་བསྟན། ཡི་གེ་མེད་པའི་ཆོས་གསུངས། བརྗོད་ལས་འདས་པའི་དོན་རྟོགས། སྔར་མ་སྐྱེས་པའི་ཉམས་ཤར་བ་རྣམས་པེ་དྷ་བའི་མགུར་དུ་ཕུལ། ལ་སྟོད་དུ་ཡོན་བདག་ཁུམ་བུའི་སྒོར་མགུར་མཛད། སྟག་ཚལ་དུ་མེས་སྟོན་ཚོན་པོ་དང་མཇལ། ཆོས་ཞུས་བསྙེན་བཀུར་མཛད། མྱང་སྟོད་ཀྱི་མཁར་སྒང་དཀར་པོ་ནས་མར་པ་མགོ་ཡག་གིས་བསུ་བ་བྱས་ནས་མྱེས་པོ་སར་ཟླ་གཅིག་ཆོས་ཞུས་བསྙེན་བཀུར་ཕུལ་བས། མཉེས་པའི་ཕུལ་དུ་སོན་ནས་དེང་ཕྱིན་ཕྱག་བགྱི་བ་མཛད་དོ། །ལྷོ་ལ་ཡག་རུ་བ་རོང་ལྦ་བ་ཅན་གྱི་གདན་དྲངས་ཆོས་གྲྭ་ཆེན་པོ་བཙུག །རྒྱ་གར་དུ་བྱོན་པའི་ལམ་གླུ་མགུར་དུ་གསུངས། གྲོ་བོ་ལུང་དུ་ཆགས་ཕེབས་པའི་སྐབས་བླ་མ་བསྟེན་ཚུལ་བླ་མའི་རྣམ་གྲངས་རྣམས་མགུར་དུ་བཞེངས། གཞུང་དུ་རྔོག་སྟོན་ཆོས་རྡོར་གྱིས་གདན་དྲངས། ཆོས་འཁོར་བསྐོར་ཞིང་ཞབས་ཏོག་རྒྱ་ཆེར་ཕུལ། དོལ་དུ་ཚུལ་སྟོན་དབང་ངེས་གདན་དྲངས་ཆོས་ཕྱིར་དཀའ་བ་སྤྱད་པའི་མགུར་གསུངས། དེ་ནས་རྗེ་མར་པ་དེ་ཉིད་ལས་ཀྱི་ཕྱག་རྒྱ་ལ་བརྟེན་ནས་འགྲོ་དོན་ཆེན་པོ་གྱིས་གསུངས་ཤིང༌། རང་ཉིད་ཀྱང་གསང་སྔགས་ལམ་གྱི་རྣལ་འབྱོར་ཀྱཻའི་རྡོ་རྗེའི་རྣམ་འཕྲུལ་ཡིན་པར་སྟོན་པའི་ཕྱིར་བདག་མེད་མ་གཙོ་བོར་གྱུར་པའི་ཇོ་མོ་དགུ་ཁབ་ཏུ་བཞེས། དེ་དག་ཀྱང་བླ་མ་ལ་གུས་དམ་ཚིག་ལྡན་པ་སོགས་གསང་སྔགས་ནས་བཤད་པའི་རིགས་མ་ཁོ་ནར་ངེས་ཤིང༌། གཞན་ཡང་གྲྭ་སློབ་མང་དུ་འཚོགས་པ་དང༌། གྲོ་བོ་ལུང་གི་ཕུ་ན་གནག་ལུག་སོགས་འབྲོག་སྐྱོང༌། བར་ན་དགོན་འདེབས། མདའ་ན་ཞིང་བྱེད་པ་ལ་བྱིན་རླབས་དང་ནུས་མཐུ་ཆེ་བའི་གྲགས་པས་ཕྱི་ནང་གི་འཚེ་བ་བྲལ། དེ་ཚེ་ཇོ་མོ་རྣམས་ཀྱི་ངེད་ཅག་ཚེ་འདིར་སྣང་ཞེན་ཆུང་བར་མཆིས་པ་རྗེ་ཡི་བཀའ་དྲིན་ལགས་ཞུས་པས། ཡིན་ཏེ་རྩ་བ་གསུམ་གྱི་བྱིན་རླབས་ཀྱང་ཡིན་པས་ཚོགས་འཁོར་རྒྱ་ཆེན་པོ་ཞིག་ཤོམས་གསུངས། ཇོ་མོས་ཡོ་བྱད་བླ་མར་ཞུ་བའི་ཆང་བེམ་ཆུང་གང་ཉ་ཤ་སྐམ་པོ་འགའ་ཞིག་ལས་མེད་པས་སང་བཤམས་ཞུས་པས། ད་ལྟར་རང་ཤོམས་གསུངས། ཚོགས་མཆོད་ཀྱི་སྐབས་ཡོ་བྱད་ཕུན་སུམ་འཚོགས་པས་གང་ནས་འདུག །དེ་ཚེ་བླ་མ་ཀྱཻའི་རྡོ་རྗེར་གྱུར་པའི་ཐུགས་འོད་ཀྱིས་གཙོ་མོ་ཡུམ་བདག་མེད་མ་དང༌། འཁོར་གཽ་རི་ལྷ་མོ་བརྒྱད་དུ་གྱུར་པ་ཚོགས་འདུ་བ་ལ་ལོངས་སྤྱོད་པས་ཀུན་ཡིད་ཆེས་ངོ་མཚར་དུ་གྱུར་ཏེ་མི་ལྡོག་པའི་དད་པ་ཐོབ། དེ་ནས་སྲས་ཀྱི་ཐུ་བོ་མི་ལ་མཐུ་ཆེན་ཆོས་ཞུར་ཕྱིན་པ་ལ་སྒྲིབ་པ་སྦྱང་བ་དང་ཕྱི་རབས་གདུལ་བྱའི་དོན་དུ་མཁར་དགུ་ཐོག་གྷནྫ་རའི་གདན་དང་བཅུར་ལོངས་པ་རྩིགས་སུ་བཅུག །ཆོས་ཀྱང་ཆེར་མ་གནང༌། རྩག་བདུན་ཐོན་པའི་དུས་རྔོག་གཞུང་པ་ཅན་དུ་སོང༌། མཁར་ཐོན་པའི་དགའ་སྟོན་དུ་རྔོག་པ་དང་འགྲོགས་ནས་མི་ལ་ཡང་བྱོན་ནས་བླ་མ་མཇལ། གདམས་པ་རྣམས་རྒྱས་པར་གནང༌། མཁར་དགུ་ཐོག་འགྲུབ་ན་དེ་ཀར་གྲོལ་བ་ཡིན་ཏེ་མ་བྱས། ད་སྒྲུབ་པ་ལ་བརྩོན་ན་འགྲུབ་པར་འགྱུར་རོ། །མཁར་དགུ་ཐོག་འགྲུབ་ན་སློབ་མ་རང་དང་མཉམ་པ་དགུ་འབྱུང་ཞིང་བདུན་ལས་མ་འགྲུབ་པས་གཉིས་ཀྱི་ནང་དུ་སྤྱོད་པ་རྩིང་བ་ཞིག་འབྱུང་གསུངས། ཡང་བླ་མ་རེས་གཅིག་འདག་སྦྱར་མཛད་ནས་ཟླ་བ་གཅིག་སོང་བ་ལས། ཆུ་གང་དཔལ་ལེ་ལ་མཚམས་ཁང་དུ་རིམ་ལྔའི་ཁྲིད་གསུངས་པ་དང༌། ལེའུ་ཆུང་ལ་རི་ཁྲོད་དུ་ཆོས་གསུངས་པ་དང༌། ལུང་པའི་མདར་ཡུལ་པ་རྣམས་ལ་ཆོས་གསུངས་པ་དང༌། ཇོ་མོ་རྣམས་ལ་རང་རང་ཐུགས་ལ་བཏགས་ཤིང་ཆོས་བསྟན་པ་དང་གྲྭ་སློབ་རྣམས་ལ་རྒྱུད་སྡེའི་བཤད་སྲོལ། འབྲོག་ཡུལ་མཁར་ལས་ཀུན་ལ་ཞལ་བཀོད་མཛད་པ་སོགས་ཀུན་ངོ་མཚར་དུ་གྱུར་པས་འདི་ཅི་ལྟར་ཡིན་ཞུས་པར། ཚོགས་འཁོར་ཤོམས་དང་རྒྱུ་མཚན་ཡོད་གསུངས། དེ་ལྟར་བསྐོར་བའི་ཚེ་བླ་མ་ཉིད་བདེ་མཆོག་དགྱེས་རྡོར་གསང་འདུས། མཱ་ཡ་སོགས་མཐོང་སྣང་མི་འདྲ་བ་བྱུང་བས་དེ་ཇི་ལྟར་ལགས་ཞུས་པས། བདག་ལ་དེ་དག་གི་གདམས་ངག་ཡོད་པས་དེ་ལྟར་དུ་འགྲོ་བ་ལགས་གསུངས། དེ་ནས་རེ་ཤིག་རྔ་མོ་ཆུ་ཤུལ་དུ་དུས་སྟོན་ཆེན་པོ་ཡོད་པའི་ཁྲོམ་ཚོགས་དབུ་འཛིན་དུ་ཇོ་སྲས་ཉིད་སྤྱན་དྲངས་པར་ད་ལན་བར་ཆད་ཡོད་གསུངས་ཀྱང་བཤོལ་མ་ཐེབས། དམ་བཅའ་བདུན་བཞག་པ་ཐམས་ཅད་རིམ་པར་རལ། ཚུར་བྱོན་པའི་ལམ་ནང་ནས་ཆིབས་རྟ་འདྲོགས་ནས་དྲུད་པས་དབུ་ཚལ་པར་འཐོར་ལ་ཁད་དུ་བླ་མའི་མདུན་དུ་འབྱོར་ཐུབ། བླ་མ་ཡབ་ཡུམ་གྱི་འགྱོད་མེད་ཀྱི་མགུར་དང༌། སྲས་ཀྱི་ཐུགས་ཁྲལ་མི་མཛད་པའི་མགུར་ཞུས་ཕུལ་ཞིང༌། དོན་དུ་ནཱ་རོ་པས། རིགས་རྒྱུད་ནམ་མཁའི་མེ་ཏོག་ཡལ། གསུང་པའི་ལུང་དོན་ཇི་བཞིན་དུ་གྱུར། དེ་ནས་སྲས་ཀྱིས་ཕུག་རོན་རོ་གསར་པ་གཅིག་ལ་གྲོང་འཇུག་མཛད་དེ་རྒྱ་གར་དུ་འཕུར་ནས་དེར་བྲམ་ཟེའི་ཁྱེིའུ་ལོ་བདུན་ལོན་པ་རིར་བསྐྱལ་བའི་རོ་ལ་གྲོང་འཇུག་མཛད་པས་རྒྱ་གར་དུ་ཏི་ཕུ་པ་ཞེས་གྲགས་ཤིང་གསང་སྔགས་ཀྱི་སློབ་དཔོན་དམ་པར་གྱུར། དེ་ནས་དར་མ་མདོ་སྡེའི་གདུང་སྦྱངས་པས་འཇའ་འོད་རིང་བསྲེལ་བསམ་གྱིས་མི་ཁྱབ་པ་བྱུང་ངོ། །དེ་ནས་སློབ་མ་རྣམས་ཀྱིས་སྲས་མདོ་སྡེ་འདྲ་བ་མེད། ད་བརྒྱུད་པ་འཛིན་ཅིང་བསྟན་པ་སྤེལ་བ་ཅི་འདྲ་བ་འབྱུང་ཞུས་པས། རྨི་ལམ་ཤར་བའི་ཀ་ཆེན་བཞིའི་མགུར་གསུངས། དེ་ནས་སློབ་མ་རྣམས་ཀྱིས་ཚོགས་བསགས་ཕུལ་ཚུལ་དང༌། བླ་མས་གྲོང་འཕོ་གྲོང་འཇུག་མཛད་པ་སོགས་གྲངས་ལས་འདས་པ་ཡོད་ཀྱང་འདིར་སྨོས་ཀྱིས་མི་ལོངས་པས་དེ་ཙམ་མོ། །དེ་ལྟར་བླ་མ་དང་མཁའ་འགྲོའི་ཁ་བ་ཅན་གྱི་གདུལ་བྱ་འདུལ་བའི་ལུང་བསྟན་ཞིང༌། བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་འཕྲུལ་སྐྱེས་མཆོག་མར་པ་ལོ་ཙཱ་དེ་ཉིད་སྦས་པའི་རྣལ་འབྱོར་པ་ཡིན་ཏེ་མ་དག་པའི་སྣང་ངོར་འཇིག་རྟེན་གྱི་བྱ་བ་སྣ་ཚོགས་ལ་འཇུག་པའི་ཚུལ་མཛད་ཀྱང༌། སྐལ་བ་དང་ལྡན་པ་ལ་སྐུ་ལུས་ཀྱི་བཀོད་པ་དང། རྫུ་འཕྲུལ་སྣ་ཚོགས་སྟོན་ཅིང༌། གང་ལ་གང་འདུལ་གྱི་གདུལ་བྱ་རྣམས་སྨིན་གྲོལ་གྱི་ལམ་ལ་བཀོད་ནས་བརྒྱུད་འཛིན་གྱི་སྲས་དམ་པ་རྣམས་ཀྱང་གཞན་དོན་དུ་ལུང་བསྟན་པར་མཛད་དོ། །དེ་ནས་རེ་ཞིག་གི་ཚེ། བླ་མའི་ཞལ་ནས་ཁྱེད་རྣམས་ལེ་ལོ་མི་ཁོམ་པར་འདུག །ཁོ་བོ་ལ་ཌཱཀྐིའི་སུན་མ་བྱུང་ནས་འགྲོ་དགོས་པར་གདའ། རྗེ་བཙུན་ནཱ་རོ་པ་ལ་དཔའ་བོའི་མཁའ་འགྲོའི་ཚོགས་བསམ་གྱིས་མི་ཁྱབ་པས་བསྐོར་བ། མདུན་གྱི་ནམ་མཁའ་ལ་བྱོན་ནས་སྣང་བས་ཚོགས་མཆོད་ཕུལ་གསུངས། དེར་ཚོགས་མཆོད་ཆེན་པོ་ཞིག་ཕུལ་ཞིང་གསོལ་བ་བཏབ་པའི་ཚེ། དགུང་ལོ་བརྒྱད་ཅུ་གྱ་གཉིས་བཞེས་པའི་ཆུ་མོ་བྱའི་ལོ་རྟ་ཟླ་བའི་ཚེས་བཅུའི་ཉིན་པར་བླ་མའི་ཐུགས་ཀ་ནས་འོད་འཕྲོས་ཇོ་མོ་བདག་མེད་མ་ལ་ཕོག་སྟེ། འོད་དུ་ཞུ་ཞིང་བླ་མའི་ཐུགས་ཀར་ཐིམ་པའི་ཚེ། དབུ་གཙུག་ནས་འོད་དཀར་པོ་ཟླ་བའི་དཀྱིལ་འཁོར་ལྟ་བུ་ནམ་མཁའ་ལ་རྒྱང་གིས་སོང་བ་དང༌། དེ་དང་དུས་མཚུངས་པར་མྱ་ངན་ལས་འདས་པའི་ཚུལ་བསྟན། ལྷོ་བྲག་གི་ལུང་པ་ཐམས་ཅད་མེ་ཏོག་གི་ཆར་དང༌། འཇའ་དང་འོད་ཀྱིས་ཁྱབ་པར་གྱུར། སྐུ་གདུང་བཞུས་པའི་ཚེ། དབུ་ཐོད་ལ་འཁོར་ལོ་བདེ་མཆོག་དང༌། ཐུབ་པའི་སྐུ་བྱོན་པ་ནི་ལྷོ་བྲག་དང་མདོ་སྨད་དུ་བཞུགས་ལ། སྤུར་ཁང་གི་རྡོ་ལ་ཨ་ཡིག་བྱོན་པ་ནི། ཚལ་གུང་ཐང་དུ་བཞུགས་སོ། །དེ་ལྟ་བུའི་སྐྱེས་མཆོག་མར་པ་ལོ་ཙཱ་དེ་ཉིད་ལ་བུ་ཆེན་བྱོན་ཚུལ་ནི། བཀའ་བབས་ཀྱི་བུ་ཆེན་བཞི་ནི། རིགས་ཀྱི་སྲས་དར་མ་མདོ་སྡེ་ལ་གྲོང་འཇུག་གི་བཀའ་བབས། ཆོས་ཀྱི་སྲས་དོལ་གྱི་མཚུལ་སྟོན་དབང་ངེ་ལ་འཕོ་བའི་བཀའ་བབས། གཞུང་གི་རྔོག་སྟོན་ཆོས་རྡོར་ལ་བཤད་རྒྱུད་ཀྱི་བཀའ་བབས། གཙང་གི་མེས་སྟོན་ཚོན་པོ་ལ་འོད་གསལ་གྱི་བཀའ་བབ་བོ། །ལས་ཅན་གྱི་སློབ་མ་བཞི་ནི། འདམ་གྱི་མར་པ་མགོ་ཡག །གྱེར་ཕུའི་ཀློག་ཀྱ་ཇོ་སྲས། འཕན་ཡུལ་གྱི་ཉ་མ་དཔལ་མོ། །རྐྱང་རོ་ཞང་སྟོན་རྣམས་སོ། །ཐུགས་ཀྱི་སྲས་བཞི་ནི། དོལ་པ་དགའ་སྟོན། དྲེའི་མི་ཆུང༌། ཆུ་གོང་དཔལ་ལེ། དགེ་བཤེས་ཁེ་རྒད་དང་བཞིའོ། །གཞན་ཡང་ཤུད་ཁེ་ལྦ་བ་ཅན་དང༌། བ་རང་ལྦ་བ་ཅན་དང༌། ལྷ་རྗེ་པེ་རིན། རྒྱ་སྒོམ་ཞིག་པོ། མར་པ་བྱ་ཟེ། ཉང་སྒོམ་སྤྲང་སྟག། རྩང་དར་ཡེ་ལ་སོགས་དཔག་ཏུ་མེད་པ་བྱུང་ངོ། །དེ་དག་གི་ནང་ནས་མཆོག་ཏུ་གྱུར་ཅིང་འགྲན་ཟླ་ཐམས་ཅད་དང་བྲལ་བ་ཐབས་ལམ་ལ་སོགས་གདམས་པ་ཐམས་ཅད་ཀྱི་བཀའ་བབས་ཅིང༌། བརྒྱུད་འཛིན་གྱི་སྲས་དམ་པར་གྱུར་པ་ནི། རྗེ་གྲུབ་ཐོབ་ཀྱི་རྒྱལ་པོ་མི་ལ་རས་པ་ལགས་སོ། །

ལྔ་པ་རྗེ་བཙུན་གྲུབ་ཐོབ་ཀྱི་རྒྱལ་པོ་མི་ལ་རས་པའི་རྣམ་ཐར་ནི། དེའང་སྐུ་འཁྲུངས་པའི་ཡུལ་ནི་མང་ཡུལ་གུང་ཐང་གི་སྐྱ་རྔ་རྩའི་ཀོ་རོན་བྱ་བར་རིགས་ཁྱུང་པོ། ཡབ་མི་ལ་ཤེས་རབ་རྒྱལ་དང་ཡུམ་མྱང་བཟའ་དཀར་ལེགས་གཉིས་ཀྱི་སྲས་སུ་ལྕགས་ཕོ་འབྲུག་གི་ལོ་ལ་ཡ་མཚན་གྱི་ལྟས་བཅས་སྐུ་བལྟམས། དེ་ནས་ལོ་གསུམ་ནས་སྲིང་མོ་པེ་ཏ་མགོན་སྐྱིད་བྱ་བ་སྐྱེས། རྗེ་བཙུན་ལ་མཚན་ཐོས་པ་དགའ་གསོལ། མི་ལ་ཞེས་པ་ནི་ཡབ་མེས་ཀྱི་རིགས་ལ་མི་ལ་ཙ་ཊ་བྱ་བའི་གདོན་བཏུལ་བའི་མིང་རུས་ལ་ཆགས་པ་སྐད། རྗེ་བཙུན་དགུང་ལོ་བདུན་ནས་ཡབ་འདས་པ་ལ། ཨ་ཁུ་གཡུང་རྒྱལ་དང༌། ཨ་ནེ་དཔལ་འདྲེན་སོགས་ཕ་ཚན་ཆེ་བར་ཡོད་པས། རྒྱུ་ནོར་རྣམས་ངེད་ཚོས་ཉར་ཚགས་བྱེད། ཁྱེད་མ་བུ་གསུམ་སྡུག་པོ་མི་གཏོང་ཟེར་ནས་ཁོང་ཚོས་བདག་བྱས། དེ་ནས་བུ་ཐོས་པ་དགའ་ཅུང་ཟད་ནར་སོན་པ་དང༌། ཡུམ་གྱི་ཕ་མེས་ཉེ་དུ་གྲོང་པ་རྣམས་བསྡུས་ནས་སྟོན་མོ་བྱས་ཏེ། ངའི་བུ་དང་ལེགས་སེ་ཆུང་གཉེན་བསྒྲིགས་ཡོད་ཅིང་ད་ཁྱིམ་སོ་ཟིན་ཙམ་ཡོད་པས། རྒྱུ་ནོར་ཚང་མའམ་མིན་ཀྱང་བུ་ཁོ་རང་གི་ནོར་སྐལ་ཙམ་ཞིག་སྙིང་རྗེས་ལྟོས་ལ་བྱིན་བྱས་པས། དེ་སྔོན་གསོས་པ་དྲ་མ་ཡིན༌། རྒྱུ་གཡར་རྩིས་སྤྲད་པ་ཡིན་པས་གཏད་རྒྱུ་མེད། ཁྱོད་མ་སྨད་ཀྱིས་མང་བའི་དམག་དང་ཉུང་བའི་མཐུ་ཅི་དགའ་གྱིས་ཟེར་ནས་འཇིགས་ཉམས་མེར་སོང༌། དུས་དེ་ཙམ་ན་རྩ་ཡི་མི་ཐོད་ཁར་སློབ་དཔོན་ཞིག་ཡོད་སར་འབྲི་ཀློག་བསླབ་པར་བཞག །མ་དང་ཞང་པོ་ལེགས་སེའི་ཕ་མིང་གི་གྲོགས་བྱས། འབྲི་ཀློག་མཁས་པར་བྱུང༌། དུས་རེ་ཤིག་མ་ན་རེ། རང་རེ་མ་བུ་རྒྱུ་ནོར་ཤོར་རྗེས་མང་ན་དམག་ཉུང་ན་མཐུ་གྱིས་ཟེར་ནས་བསྡིགས་མོ་བྱས། རང་ཚོའི་ཉམ་ཞན་པ་འདིར་མེད། ཁྱོད་ཀྱིས་མཐུ་ཞིག་བྱེད་དགོས། མ་བྱས་ན་ཁྱོད་རང་གང་དགར་སོང༌། རང་ཕ་མིང་ཡུལ་དུ་འགྲོ་བ་ཡིན་ཟེར་གཅུད་ལ་བོར་བས་མཐུ་བྱེད་པར་ཁས་བླངས། མ་ཡི་ཞིང་སྐལ་བཙོང་བའི་རིན་རྟ་ཁམ་པ་རྟེལ་གྲགས་བྱ་བ་དང་ཚོས་སྲང་བཞི་ཁུག་པས། ཚོས་དང་གྲོ་ཕྱེ་རྟ་ལ་བཀལ༌། མཐུ་སློབ་པའི་མི་དྲུག་དང་བསྡེབས་ནས་བཏང༌། སྐྱིལ་བའི་ལྡོན་ཁར་བུ་ཁྱོད་ཀྱི་སྙིང་རུས་གྱིས། མཐུ་རྟགས་བྱུང་ན་ཅི་རྙེད་བསྐུར་ནས་ཡོང་ཟེར། གྲོགས་ཚོར་ངའི་བུ་དགྲ་གཉེན་ངོ་མི་ཤེས་པ་ཞིག་ཡོད་པས་འདི་ལ་སྙིང་རྗེའི་ལྟོས་ཟེར་བཅོལ་གཏམ་ནན་བཅག་བྱས། ཁོང་རྣམས་འགྲོགས་ནས་མཐུ་གང་ཆེ་དྲིས་ཤིང་གཙང་ནས་མར་སོང་བས། ཡར་ལུང་གཉག་གཡུང་སྟོན་ཆེ་ཟེར། དེ་གར་ཕྱིན་ནས་རྟ་དང་དངོས་པོ་ཅི་ཡོད་ཕུལ། མཐུ་བསླབ་ནས་ལོ་གཅིག་སོང༌། གྲོགས་པོ་རྣམས་འགྲོ་རན་པས་ཚ་ལམ་དུ་བསྐྱལ། རང་ནི་ཡུལ་དུ་མཐུ་རྟགས་མེད་པས་འགྲོ་ས་མེད་ནས་ཡར་ལོག་པའི་ལམ་ཁ་ནས་རྟ་ལུད་མཐུ་བ་གང་རྙེད་པ་བླ་མའི་ཞིང་དུ་བླུགས། དེར་བླ་མས་གཟིགས་ནས་མཉེས། ཁྱོད་ཅི་ཡིན་གསུངས་པར་སྔོན་གྱི་ལོ་རྒྱུས་ཞིབ་ཏུ་ཞུས་པས་སྙིང་རྗེ་གསུངས། འོ་ན་ངའི་གཟའ་གདོང་དམར་ནག་ཟེར་བ་གནུབ་ཆུང་ལ་ཡར་ཕུལ། ཁོང་གི་སེར་བ་མཛུབ་ཁྲིད་ཀྱི་གདམས་པ་དེ་ང་ལ་གནང་བ་ཡིན་པས་ད་ཁྱོད་དེར་གཏོང་གསུང་ཞིང༌། རྟ་དཀར་པོ་སྟོང་ལ་གྲགས་ཞེས་པ་དང་སྣམ་བུ་བུབ་འགའ་བསྐུར་ནས་བུ་དང་སྦྲགས་ཏེ་བཏང༌། དེར་གནུབ་ལ་རྟེན་རྣམས་ཕུལ་ནས་ཞུས་པས། དཔེ་ཞིག་གཏད་ནས་བློ་ལ་ཟུངས་ཟེར། དེ་ནས་ཁོང་གི་བུ་གཅིག་དང་མཉམ་དུ་མཚམས་ལ་བཞག་པས་ཟླ་གཅིག་གིས་འགྲུབ༌། དེར་སེང་ལྡེང་གི་ཕུར་པ་རྐང་མགྱོགས་པ་གཉིས་ལ་བསྐུར་ནས་འདི་ང་ཡི་མ་ལ་གཏོད་ལ་ཁོང་ཚོའི་མཁར་ལ་འདེབས་སྟངས་མང་དུ་གྱིས་བྱས་པས། དེ་ཙམ་ན་ཁོལ་མོ་གཅིག་གིས་སྡིག་པ་གླང་ཤད་ཙམ་གྱི་ཀ་བ་འཐེན་པ་མཐོང་སྟེ། ཨ་ཁུའི་བུ་ལ་གནའ་མ་བླངས་བའི་ཆང་སྟོན་གྱི་སར་ཕྱི་མི་རྣམས་གྱེས་ནང་མི་རྣམས་མ་གྱེས་པར་དེར་ཁང་པའི་ཐེབ་འོག་ཏུ་མི་ཉེར་ལྔ་ཤི། དེར་གྲོང་པ་རྣམས་ཀྱིས་མི་ལའི་མཐུ་ཡིན་པར་ཤེས་ནས་གསོད་མི་གཏོང་ཟེར་བའི་ལྐོག་ཆད་བྱས། དེའི་ཡུལ་དེའི་གཙོ་བོའི་ཆུང་མ་རྗེ་བཙུན་ཕ་མ་འཛོམ་དུས་གཡོག་མོ་ཡིན་པ་དེས་རྗེ་བཙུན་གྱི་མ་ལ་བྱ་བཏང༌། མས་ཀྱང་རྣལ་འབྱོར་པ་ཞིག་ལ་བརྔན་བྱིན་ནས་མ་རིག་པར་དུག་པོའི་བར་དེར་གསེར་སྲང་བདུན་སྦས་སྟེང་དུ་ལྷན་པ་ནག་པོ་བརྒྱབ། ཡི་གེ་བསྐུར་བར་བུ་ཁྱོད་ཀྱི་མཐུ་བྱས་བྱུང་བས་གོ་ཆོད། ཁྱོད་ཡུལ་མིས་གསོད་པའི་གྲོས་འཆམས་པས་སྲོག་ཟོན་གྱིས། ད་དུང་གྲོང་པ་འདིར་སེར་བ་གཅིག་ཐོངས་དེ་ནས་བསམ་པ་འགྲུབ་བརྒྱག་ཆད་ན་རི་ཆེན་པོའི་ནུབ་ཕྱོགས་སྤྲིན་ནག་ལྡིང་བའི་འོག་ཏུ་ཉེ་ཚན་བདུན་ཡོད་པས་དེར་ཚོལ་མ་ཤེས་ན་རྣལ་འབྱོར་པ་རང་ལ་འདྲི་རྟོག་གྱིས་བྱས་འདུག །དེར་ཇོ་མོའི་བརྡ་གོ་ནས་དུག་པོ་ནས་གསེར་བཏོན། དེར་སེར་བ་གནང་བར་ཞུ་བྱས་པས། སེར་བ་ངས་ཀྱང་ཤེས་ཏེ་ཆད་ལ་གནོད་པས་ཁོང་ཅན་དུ་སོང་གསུངས། དེ་ནས་ཡར་ལུང་དུ་གཉགས་ཀྱི་སར་ཕྱིན་ནས་ཞུས་པས་གནང་ཞིང༌། གཉགས་ཀྱི་བུ་གཅིག་དང་ངེད་གཉིས་སྒྲུབ་ཁང་དུ་ཞུགས་ནས་སེར་བ་བསྒྲུབས་པས་ཞག་ཉི་ཤུ་རྩ་ལྔ་ནས་ཐུན་ཐམས་ཅད་ཁོལ་ཏེ། དེར་སྙེ་མ་ཐོན་ཙམ་དུ་སེར་བ་གཅིག་ཕབ་བཙས་མའི་སྒང་གཅིག་ཕབ། དེ་ལྟར་སེར་བ་ལོ་རེ་རེར་ལན་གཉིས་རེ་གཏོང་བ་ཡིན་ཞེས་ཤིང་གི་བྱང་བུ་བྲིས་ཤིང་བཙུག་པས་ཀུན་ཧ་ལས། དེ་སྐབས་མ་ཡིས་བོང་བུ་ཞིག་ལ་ཚོས་ལྟང་གཉིས་བཀལ་ནས་འགྲོས་པར་བསྐུར་ནས་ད་ཡང་བུ་ཡིས་གོ་བཅད། བུ་རང་ཡུལ་དུ་མགོ་མི་ཚུད་པར་བྱས་པ་མ་ལེན་པ་ཡིན། ད་ནི་འགྲོ་གང་བདེ་སོང་ལ་དམ་པའི་ཆོས་ཤིག་ཨི་འགྲུབ་གྱིས་ཟེར་བའི་འཕྲིན་བྱུང་ངོ། །དེར་གཡུང་སྟོན་ཁྲོ་རྒྱལ་གྱིས་ཀྱང་རང་གཞན་གཉིས་སྡིག་ཚན་པོ་ཆེ་བསགས་པས་ཆོས་ངེས་པར་བསྒྲུབ་དགོས་གསུངས། གནུབ་ཆུང་གིས་ཀྱང་དེ་བཞིན་དུ་དགོས་གལ་ཆེ་བ་ཡིན་གསུངས། བླ་མ་གཉིས་ནས་སྣམ་བུ་ལ་སོགས་ཕྱག་རྟེན་གནང་ནས་གཙང་རོང་སྟོན་ལྷ་དགའ་མཇལ་དུ་བྱོན། ཕྱག་རྟེན་རྣམས་ཕུལ་ཏེ་མཇལ། གྱེར་སྟོན་གྱིས་གང་ནས་འོང་གསུངས། ཁྲོ་རྒྱལ་གནུབ་ཆུང་གཉིས་ཀྱི་རྩ་ནས་འོང་ཞུས། ཨེ་མཐུ་སེར་གྱིས་མི་མང་པོ་སྡུག་བསྔལ་ལ་སྦྱར་ཨཾ་གསུངས། སྡིག་ཆེ་བས་ཐུགས་ལ་འདོགས་པར་ཞུ་ཞུས་པས། འདིར་འོང་བ་ལེགས། ངའི་དམ་ཆོས་རྫོགས་པ་ཆེན་པོ་འདི། ནང་རྟོགས་ན་ནང་སངས་རྒྱས། ནུབ་རྟོགས་ན་ནུབ་སངས་རྒྱས། སྐལ་ལྡན་ལས་འཕྲོ་ཅན་རྣམས་སྒོམ་མི་དགོས་པར་གྲོལ་བའི་ཆོས་ཟབ་མོ་ཡོད་པས་སྐྲག་མི་དགོས་གསུངས་ནས་གདམས་པ་ཡང་གནང༌། མྱང་སྟོད་ཁ་རེ་བྱ་བ་ན་ཁ་མི་བྱང་ཆུབ་རྒྱལ་པོ་ལས་སྒྱུ་འཕྲུལ་གྱི་རྒྱུད་ལ་སོགས་པ་མང་དུ་ཞུས། ཡར་འབྲོག་ཏུ་མར་པ་འབྱུང་ངེ་བྱ་བ་ལ་མདོ་སེམས་སོགས་ཀྱི་ཆོས་མང་དུ་ཉན། གཞན་ཡང་བླ་མ་མང་པོ་ལས་ཆོས་མང་དུ་ཉན་ཞིང་སློབ་གཉེར་བག་རེ་ཡང་བྱས། དེ་ནས་གཙང་རོང་དུ་སྙིང་རུས་དྲག་པོ་བསྐྱེད་ནས་བསྒྲུབ་པའི་ཚེ། རོང་སྟོན་ནས་ངའི་ཆོས་འདིས་ཁྱོད་ལ་ཕན་ཆེར་མི་འོང་བས། ད་ལྷོ་བྲག་ཆུས་ཁྱེར་དུ་མར་པ་ལོ་ཙཱ་བྱ་བ་རྒྱ་གར་ནཱ་རོ་པཎ་ཆེན་གྱི་ཐུགས་སྲས་སྡིག་པོ་ཆེ་བཙན་ཐབས་སུ་སངས་རྒྱས་པའི་གདམས་པ་ཡོད་གྲགས་པས་དེར་འགྲོ་བ་དྲག་གསུངས། མར་པའི་མཚན་ཐོས་པ་ཙམ་གྱིས་ཐུན་མིན་གྱི་དད་པ་སྐྱེས། དེ་ཉིད་དུ་ཁྲེལ་པོ་ཁུར་ནས་བྱོན། ལྷོ་བྲག་ཏུ་སླེབས་པ་དང་མར་པ་ལོ་ཙཱ་གར་བཞུགས་དྲིས་པས་དེ་འདྲ་ཟེར་བ་འདིར་མེད་ཟེར། གཅིག་གི་ཁུ་བོ་བློ་གྲོས་ཡིན་པ་འདྲ་ཁོ་རྒྱ་གར་ཐེང་འགའ་ཕྱིན་པ་ཡིན་ཟེར། དེ་ཡིན་ན་སྤང་རྐོ་ཞིང་ཡོད་པས་ཡར་སོང་དང་ཟེར། དེར་སོང་བས་རྣལ་འབྱོར་པ་གཟུག་བོང་ཆེ་ཞིང་རལ་པ་སིག་གེ་བ་ཞིག་སྤང་རྐོ་ནས་གདའ། དེར་མར་པ་ལོ་ཙཱ་གར་བཞུགས་ངེད་ཀྱིས་མཇལ་འདོད་བྱས་པས། སྤང་ལ་རི་མོ་ཞིག་བྱས་འདི་རྐོས་དང་བླ་མ་མཇལ་སྣ་བྱེད་ཟེར་སྤང་དེ་རྐོས་པས་ཐོན་པ་དང༌། བླ་མ་དམ་པའི་གདམ་ངག་གནད། །རྩ་ཁམས་དབུ་མར་བསྡུས་པ་ཡི། །ཉོན་མོངས་ཐ་བ་འདུལ་ལགས་ན། །འབྲས་བུ་མྱུར་དུ་སྨིན་ཏེ་མཆིས། །ཟེར་ནས་ས་ལ་རི་མོ་ཅིག་བྱས་ཏེ། འང་འདི་ཙམ་ཞིག་རྐོས་ཟེར། ཡང་དེ་རྐོས་པས་ཐོན་ཙམ་ན། བརྒྱུད་ལྡན་བླ་མའི་བྱིན་རླབས་ཀྱིས། སེམས་ཉིད་ལྷུག་པའི་ངོ་བོར་གནས། དྲན་པའི་ཐ་བ་འདུལ་ལགས་ན། སྟོན་ཐོག་འབྲས་བུ་མྱུར་དུ་སྨིན། ཞེས་ཟེར་ཞིང་ལས་ལ་རེམ་པོ་ཞིག་འདུག་ཟེར། དེ་ནས་སྤོ་ཐོའི་གསེབ་ནས་ཆང་གཅིག་བླངས་ཏེ། ཁོ་རང་གིས་གསོལ་ཏེ། འཕྲོ་གཅིག་གདའ་བ་མི་ལ་ལ་བླུད་ནས་ངོམས་པར་བྱུང༌། དེ་ནས་ཡང༌། བདེ་བ་ཆེན་པོའི་ཆང་གི་དངོས། ཡང་དག་དོན་ཆེན་གསང་བ་འདིས། ཡོངས་དག་ཐ་བ་འདུལ་ལགས་ན། སྟོན་ཐོག་འབྲས་བུ་སྨིན་ཏེ་མཆིས། ཞེས་ཟེར་ཞིང་དེ་དག་ཁ་འབྱང་གི་ཚིགས་སུ་གོ་ཞིང༌། གཞན་གྱི་རྟོག་དཔྱོད་ཅི་ཡང་མ་བྱུང༌། བླ་མ་ཡིན་པར་ཡང་མ་ཤེས། དེ་ནས་ལག་ཆ་རྣམས་འཟུང་ནས་སྒོ་ཙར་ཕྱིན་པ་དང༌། འདིར་སྡོད་དང་ངས་ཞུ་ལེན་ཅིག་བྱེད་ཟེར། དེ་ནས་དལ་གཅིག་ལོན་པ་དང༌། གཅིག་བྱུང་ནས་མཇལ་འདོད་ན་ནང་དུ་བྱོན་ཟེར། དེར་སོང་ནས་བར་ཁང་གཅིག་ཏུ་ཕྱིན་པ་དང༌། ད་ཅིའི་རྣལ་འབྱོར་པ་དེ་རལ་པ་ས་བྲུལ་ལེ་ན་བཟའ་དང་སྟེགས་གཅིག་གི་ཁ་ན་སང་ངེ་བཞུགས་པས་ཞལ་མཐོང་བ་དང༌། དངངས་ཡེར་གྱིས་སོང་བས་བླ་མས་དེ་ཙམ་འཇིགས་མི་དགོས་ངའི་སྤྱོད་ལམ་འདི་ལ་གཞན་ཀུན་མི་ཤེས་པ་ཡིན་གསུངས། ལོ་རྒྱུས་ཞིབ་ཏུ་ཞུས་ནས་མི་སྡིག་པོ་ཆེ་ཡིན་པས་ལུས་ངག་ཡིད་གསུམ་འབུལ། ལྟོ་གོས་ཆོས་གསུམ་ཞུ་ཞུས་པས། གསུམ་ཀ་མི་འོང་གསུངས་པས་ཆོས་གནང་བར་ཞུ་ཞུས་པས། ཁྱོད་ཀྱི་མིང་ལ་མཐུ་ཆེན་ཐོག་གསུངས། དེར་ལྷོ་བྲག་ཏུ་སྟོན་ཐོག་གཅོད་སར་བསོད་སྙོམས་བྱས་པས་ནས་དགའ་བར་བྱུང༌། ནས་ཕད་ཙེ་གང་ཁུར་ནས་བླ་མར་ཕུལ་བས་ཤེད་པོ་ཆེས་མི་འོང་ཁང་ཤིང་ཆགས་དོག་ཡོད། ཁྱོད་ལ་ལས་ཀ་རེམ་པོ་ཞིག་འདུག་པས་ངའི་ཇོ་སྲས་མདོ་སྡེ་ལ་ཕོག་པའི་མཁར་གཅིག་བརྩེགས་དགོས་གསུངས་ནས། མཁར་སྒོར་མོ་སོག་ཀ་ཟླ་གམ་གྲུ་གསུམ་རེ་ཕྱེད་ཙག་ལོང་ནས་ཡང་ཕྱིར་བཤིག་པའི་ཞལ་བཀོད་གནང། ཡང་མཁར་ཁང་གྲུ་བཞི་ཕྱི་ཁྱམས་ཀ་བ་སུམ་ཅུ་སོ་གཉིས་དང་བཅས་པའི་རྨིང་བཞག །ཉིན་པར་མཁར་བརྩེགས། ནང་སྔ་ནུབ་ཀྱི་ཆུ་དང་མེ་ཤིང་གསོག །སྲོད་ལ་རྔོ་འཐག་བྱས། བླ་མའི་ཆིབས་སྟེགས་ཇོ་མོའི་གཞོན་སྟེགས་བྱས། ལུས་སྲོག་ལྟོས་མེད་མོས་གུས་བྱས་ཤིང་བརྩེགས་པས་ཐོག་གསུམ་གྲུབ། དེ་དུས་རྔོག་གཞུང་པ་སོགས་སློབ་མ་མང་པོར་དབང་ཞུར་ཕྱིན། ཇོ་མོའི་མར་རྡོག་ཆེ་བ་གཅིག། ཤ་སྐལ་གཅིག སྣམ་བུ་གཅིག་ཁྱེར་ནས་དབང་གྲལ་བསྡད། འདི་རྣམས་གང་ནས་བྱུང་གསུངས། ཇོ་མོའི་གནང་ལགས་བྱས། ང་ཡི་དངོས་པོ་ཁྱོད་ཀྱི་འབུལ་བ་མི་འོང༌། ཁྱོད་ལ་ཡོད་ན་ཁྱེར་ཤོག་གསུངས། དེར་ཐུགས་མུག་ནས་བཤུམ་པར་ཇོ་མོས་སེམས་གསོ་བཏང། ཇོ་མོས་ཉིན་རེར་ཚལ་མ་རྒྱ་མ་རེ་དུས་གསུམ་དང༌། ཆང་ངོམ་པ་རེ་གནང་ནས་ཐུགས་ལ་བཏགས། ཡང་གཅིག་གཉལ་པའི་འབུལ་སྐྱེལ་ཡོང་བ་ལྷོ་སྨད་པའི་ཇག་པས་ཁྱེར་བ་བྱུང་སྐབས། བླ་མས་འདི་བསྟན་པ་ལ་གནོད་པ་ཡིན། ཁྱོད་ཀྱིས་སེར་བ་ཕོབ་དང་སྡིག་པས་མི་གནོད་པའི་ཐབས་ཡོད་གསུངས། སེར་བ་ཕབ་ནས་ད་གདམས་པ་ཞུ་འཚལ་ཞུས་པས། སྡིག་བྱས་པའི་བརྔན་པར་ཆོས་སྟོན་མི་རུང་གསུངས། དེར་སྡུག་བསྔལ་ཚད་མེད་བྱུང༌། དེ་ནས་ཇོ་མོས་གྲོ་ཆས་ཅུང་ཟད་གནང་བ་ཁྱེར་ནས་ཡོང་བས་བྲག་རྩ་ཞིག་ཏུ་ཉལ། ཕྱིར་ནང་ཚ་བ་བསྐོལ་བའི་དོན་དུ་རྗེས་ཀྱིས་གང་ནས་འདུག །ག་རེ་དེ་སྔོན་ཁང་པ་བརྩེགས་པ་ཕྱེད་བླ་མའི་དོན་ཡིན་རུང༌། ཕྱེད་རང་གི་རེད་འདུག་ཡར་ལོག་པ་དྲག་སྙམ་ཕྱིན་པས་ཇོ་མོ་ཐུགས་དགྱེས། ཡང་མཁར་ལས་གྱིས་གསུངས། དེ་ནས་སྒལ་པ་བྱང་ནས་རྨ་རུལ་སོང་བ་བླ་མས་གཟིགས་ནས་རྟ་བོང་ལྟར་སྒལ་ལྕིབ་ཕུབས་གསུངས། ཡང་དབང་ཞུ་བ་འགའ་བྱུང་བར་མ་ཚུད། ཇོ་མོས་ཐབས་བྱ་གསུངས་ནས་མཐུ་ཆེན་འགྲོ་བ་སྐད་ཇོ་མོས་བཤོལ་བ་སྐད་བྱས་པས་ཅི་བྱེད་པ་ཡིན་གསུངས། མཐུ་ཆེན་འགྲོ་བ་རེད་ཞུས་ཀྱང་མ་གནང༌། ཕྱིར་ཉིན་ཁྱོད་ཞེ་སྡང་སྐྱེས་སམ་གསུངས། མ་སྐྱེས་ཀྱང་རང་ལ་ཆོས་སྐལ་མེད་པ་རེད་སྙམ་མཚན་ཁོ་ནར་ངུས་པ་ཡིན་ཞུས་པས། ཁྱོད་ང་ལ་ངུ་ཤག་བྱེད་པའི་ཡུས་ཅི་ཡོད་གསུངས་ཕྱག་མཁར་བརྒྱབ་ནས་སྒོར་ཕུད། ཇོ་མོས་ད་དུང་ཁྱོད་ཡི་མ་ཆད་པར་གཉུག་བསྲིང་དང་ངས་ཀྱང་ཞུ་ནས་གནང་བ་ཡིན་གསུངས། ཁོང་རང་གིས་ཕྱག་རྒྱ་ཆེན་པོའི་གདམས་པ་ཞིག་གནང་བ་ཉམས་སུ་བླངས་པས་སེམས་ལ་འཕྲོད་པར་བྱུང༌། དེ་ལྟར་ལོ་རེ་ལ་རྩག་རེ་ཐོན་པའི་ཐོག་བདུན་ལོན། དེར་དོལ་གྱི་མཚུལ་སྟོན་དབང་ངེ་དཔོན་སློབ་རྣམས་བདེ་མཆོག་གི་དབང་ཞུ་བར་སླེབ། ཇོ་མོའི་ཕག་ནོར་གཡུ་ཞིག་ཡོད་པ་འདི་མཐུ་ཆེན་གྱི་ཕྱག་རྟེན་ཡིན། ད་རེས་དབང་གནང་བར་ཞུ་ཞུས་མདུན་དུ་ཁྲིད་པས། ང་ཡི་གཡུ་ཡིན་ཁྱོད་ཀྱི་འབུལ་བ་མི་ཡོངས་གསུངས་ནས་ཕྱག་འཁར་རྒྱབ་པས་ཁོང་གཉིས་ཕྱིར་བྲོས། དེར་ཇོ་མོ་ན་རེ། ནཱ་རོ་མཻ་ཏྲིའི་བརྒྱུད་པ་ཚེས་བཅུ་ལ་བརྩོན་མཛད་པས་དེ་དུས་ཐབས་ཤིག་ཡོད་ཟེར། དེར་ཚེས་བཅུའི་སྐབས་ཆང་གར་མ་མང་དུ་བླ་མ་ལ་དྲངས་པས་བད་ནས་གཟིམ་པའི་ཚེ། ཏཻ་ལོ་ནཱ་རོའི་དབུ་སྐྲ་ན་བཟའ་དུམ་བུ་རེ་དང༌། དམ་རྫས་བདུད་རྩི། ཕྱག་ཕྲེང་གི་རྡོག་མ་ཁ་ཤས་རྣམས་བླངས་ཏེ། འདི་རྣམས་ཁྱེར་ལ་རྔོག་ཅན་སོང་དང་བླ་མའི་གདམས་པ་ཁོང་ལ་ཡོད་པས་ཞུས་ཤིག་གསུངས་ནས་བཏང་ངོ༌། །དེར་མཐུ་ཆེན་བླ་མ་རྔོག་པའི་མདུན་དུ་སླེབས་ནས་རྟེན་རྣམས་ཕྱགག་ཏུ་ཕུལ་ནས་ཇོ་མོས་འདིར་བཏང་བ་ཡིན། གདམས་ངག་ཐུགས་ལ་འདོགས་པར་ཞུས། འོ་ན་དོར་ཚོང་དུས་པས་ངའི་འབྲོག་ནོར་ཐམས་ཅད་དེད་ནས་གཏད་དུ་མ་ཉན་པས་དེར་སེར་བ་ཕོབ། དེ་ནས་གདམས་ངག་བྱ་ཡིས་གསུངས། དེར་དོལ་པ་ལ་སེར་བ་ཕབ་ནས་ལོ་ཐོག་བཅོམ། ལམ་བར་ནས་བྱེའུ་རོ་ཕད་བུ་གང་ཁྱེར་བ་བླ་མའི་དྲུང་དུ་སྤུངས་པ་ལ། བླ་མས་སེ་གོལ་གཅིག་མཛད་པས་བྱིས་རོ་རྣམས་ནམ་མཁར་ཅིག་དེར་གྱིས་འཕུར་སོང་བས་ངོ་མཚར་སྐྱེས། དེར་དབང་གདམས་ངག་ཐོབ་ཅིང་སྒྲུབ་པ་ལ་འབད་ཀྱང་ཡོན་ཏན་ཆེན་པོ་མ་བྱུང་བས། འདིར་བླ་མའི་བཀའ་ཨི་ཡོད་གསུངས་པས། མེད་ཞུས། ཇོ་མོས་བཏང་བ་ཁོ་ན་ཡིན་ཞུས་པས། ཨེ་ཨེ་དེ་ཡིན་པ་འདྲ། ད་ལན་བླ་མའི་སྐུ་མཁར་ཚར་བའི་དགའ་སྟོན་དུ། ང་རང་ཤོག་གསུངས་གདའ་བས་དངོས་པོ་སྤོང་དག་བྱེད་རྒྱུ་ཡིན། ཁྱོད་ཀྱི་ཟངས་དཀར་ལུང་བཞི་འདི་ཟུང་ལ་བླ་མར་ཕུལ་གསུངས། ཁོང་རྣམས་ལྷོ་བྲག་མདར་སླེབ་མཐུ་ཆེན་སྔོན་དུ་སོང་ནས་ཇོ་མོ་མཇལ་བས་ཐུགས་དགྱེས། རྔོག་གཞུང་པས་འབུལ་སྐྱེལ་དེད་ནས་བྱོན་ཡོད་པས་བསུ་བ་མཛད་དམ་ཞུས་པས་བསུ་བ་འཐད་གསུངས། ཇོ་མོ་ནས་སྤོས་ཕོར་ཐོགས་ནས་བསུ་བ་མཛད། དེ་ནས་བུ་ཆེན་རྣམས་འདུས་ནས་མཁར་སྟོན་ལ་ཚོགས་འཁོར་བསྐོར་ཞིང་དབང་བསྐུར་མཛད། ཡང་བླ་མས་རྔོག་ལ་མཐུ་ཆེན་ཁྱོད་ཅན་དུ་སོང་བར་གདམས་པ་ཨི་བྱིན་གསུངས། རྟེན་རྣམས་གནང་བས་བྱིན་པ་ཡིན་ཞུས། ཇོ་མོས་དེ་ང་ལེན་པ་ཡིན་ཞུས་པས་འདི་ཚོས་རྐུ་མ་བྱས་གསུངས་ནས་རྦ་བེར་བརྒྱབ། རྔོག་པས་སྤོང་དག་གི་འབུལ་བ་བྱས་ནས་སྙན་དྲིལ་ཞུས་པར། སྙན་བརྒྱུད་ཆོས་ཀྱི་ཕྱི་མོ་ཡིན། ཁྱོད་ཀྱི་ར་ཡི་ཕྱི་མོ་བཞག་པས་དེ་ཕུལ་གསུངས། དེ་ཉིད་དུ་བྱོན་ནས་རྒྱབ་ཏུ་ཁུར་ནས་ཕུལ། ང་ལ་དེ་འདྲའི་དགོས་པ་མེད་ཀྱང་ཆོས་ཀྱི་ཆེ་བ་ཡིན་གསུངས། དེ་ནས་མཐུ་ཆེན་གྱི་ཟངས་ཕུལ་བ་ལ་དགྱེས་ཏེ། རྦ་བེར་བརྒྱབ་ཅིང་རྟེན་འབྲེལ་བཟང༌། ཆེ་རྒྱུ་མེད་ཏེ་རང་ལ་མནོག། ནང་གཙང་བས་དམ་ཚིག་གཙང་ཞིང་སྣོད་དང་ལྡན། མདོག་དམར་བས་མཁའ་འགྲོ་འདུ་ཞིང་གདམས་པ་ཟབ་མོ་ཐོབ། ཕྱི་ནག་པས་འཕྲལ་སྡུག་དཀའ་བ་སྤྱད་དགོས། ནང་ན་ནས་འབྲུ་གསུམ་བླུགས་པས་ལྟོ་བ་བསེར་རེ་བ་འབྱུང༌། ལུང་བཞི་ཡོད་པས་རྒྱུ་མཚན་བཞི་འོང༌། རྒྱུ་བཟང་བས་རྒྱུད་པ་ཇེ་བཟང་ལ་འགྲོ། སྐད་སྙན་པས་སྙན་པ་ཆེ་གསུངས། དེ་ནས་མཐུ་ཆེན་ལ་དགེ་བསྙེན་གྱི་སྡོམ་པ་གནང་ཞིང༌། མཚན་རྡོ་རྗེ་རྒྱལ་མཚན་བྱ་བར་བཏགས། བདེ་མཆོག་ལ་སོགས་པའི་དབང་བསྐུར་བས། བླ་མ་འཁོར་ལོ་བདེ་མཆོག་དངོས་སུ་ཞལ་གཟིགས། ད་ཡང་མཐུ་ཆེན་ངེད་གཉིས་མཚམས་ལ་འདུག་དགོས་གསུངས་ནས་སྐུ་མཚམས་མཛད་ཅིང༌། སྙན་བརྒྱུད་ཆོས་དྲུག་ཕྱག་རྒྱ་ཆེན་པོ། རིམ་ལྔའི་དམར་ཁྲིད། བསྲེ་འཕོ་སྐོར་གསུམ་ལ་སོགས་གདམས་པ་ཐམས་ཅད་བུམ་པ་གང་བྱོའི་ཚུལ་དུ་གནང་ཞིང་ཁྱོད་ལ་བྱིན་དང་གཞན་ལ་བྱིན། གལ་ཏེ་སྲང་ལ་གཞལ་ཡོད་ན། འབུམ་འགྱུར་བས་ཀྱང་མི་ལྷག་སྟེ། གསུང་ཞིང་ད་ཡང་གདམས་པ་ཐམས་ཅད་རྫོགས་པར་ཐོབ་པ་ཡིན་པས། ལྷོ་བྲག་སྟག་ཉའི་ཕུག་ཏུ་སོང་ལ་སྒོམས་གསུང༌། དེར་སོང་ནས་བསྒོམས་པས་ཡོན་ཏན་ཐམས་ཅད་རྒྱུད་ལ་སྐྱེས་ནས་ཡོད་པའི་ཚེ། མཁའ་འགྲོ་མའི་ལུང་བསྟན་བྱུང་ཞིང་བླ་མའི་མདུན་དུ་སོང་སྟེ་འདོད་ཆོས་ཀྱི་བྱེ་བྲག་མང་དུ་ཞུས་པ་རྫོགས་པར་གནང་ནས། ན་མོ་བཀའ་བརྒྱུད་གོང་མའི་རྣམ་ཐར་འདི། ཞེས་དང༌། ཇོ་མོ་བདག་མེད་མས་ཀྱང༌། ཁྱོད་སྙིང་རུས་ཅན་གྱི་སྡུག་བསྲན་ཅན། ཞེས་སོགས་གསུངས་མི་ལ་ཡང་ཤིན་ཏུ་དགའ། དེ་ནས་བླ་མ་དང་ཇོ་མོས་ཐུགས་ལ་བཏགས་ཤིང་གདམས་ངག་ཐམས་ཅད་རྫོགས་པ་དང༌། མི་ལས་མགུར་ལ་སྔ་བ་གཙང་ལ་ཡར་འགྲོའི་མགུར་ཕུལ་བ། རྗེ་མི་བསྐྱོད་ཀྱི་ངོ་བོ་ལྷོ་བྲག་པ། ཞེས་ཞུས་པ་དང༌། བླ་མའི་ཞལ་ནས། རྗེ་བླ་མའི་སྐུ་ལ་གསོལ་བ་འདེབས། ཞེས་པ་ནས། མི་ལ་རས་པའི་སྙིང་རུས་ལ། སངས་རྒྱས་བསྟན་པའི་སྲོག་ཤིང་ཡོད། ཅེས་སྨོན་ལམ་གྱི་མགུར་གསུངས། ད་ཞག་ཤས་མ་འགྲོ་བར་ཇོ་སྲས་འདས་པའི་དུས་མཆོད་གཅིག་བྱེད་གསུངས། དེར་གྲྭ་སློབ་ཐམས་ཅད་འཚོགས་ནས་ཚོགས་ཀྱི་འཁོར་ལོ་བསྐོར་བའི་ཚོགས་གྲལ་དུ། མཐུ་ཆེན་གྱི་ཕྱག་ཕུལ་ཏེ། ཇོ་སྲས་འགྲན་ཟླ་བྲལ་བ་དེ་གདུལ་བྱའི་བསོད་ནམས་ཀྱིས་མ་དབང༌། ད་ཆོས་བརྒྱུད་འཛིན་ པའི་སློབ་མ་དང་དར་རྒྱས་གང་དུ་འབྱུང་ཞུས་པས། ངས་ཀྱང་དོ་ནུབ་བརྟགས་པ་བྱེད་ནས་ནངས་པར་ཆོས་ཀྱི་ཕས་ཕོག་བྱེད་གསུངས། ཕྱིར་ནང་ཐམས་ཅད་འཚོགས་པར་རྨི་ལམ་ལུང་བསྟན་གྱི་མགུར་གསུངས་པས། ཤར་དུ་ཀ་ཆེན་གཅིག་བཙུགས་པ་རྨིས། ཞེས་གསུང་ཞིང་གཞུང་གི་རྔོག་སྟོན་ཆོས་རྡོར་གྱིས་བཤད་རྒྱུན་ཆུ་བོའི་གཞུང་དང་འདྲ་གསུངས། དོལ་གྱི་ཚུལ་སྟོན་དབང་ངེས་འཕོ་བ་རྒྱ་མཐོང་ཁ་ཕྱེས་པ་ལྟ་བུས་འགྲོ་དོན་གྱིས། གཙང་གི་མེས་སྟོན་ཆེན་པོས་འོད་གསལ་བུམ་ནང་མར་མེ་ལྟ་བུ་སྦོར། ཁྱོད་གུང་ཐང་གི་མི་ལ་རས་པས་གཏུམ་མོ་ཤིང་བཤག་ལ་མེ་སྦར་བ་ལྟ་བུས་རང་གཞན་སྨིན་པར་གྱིས། ལར་མཁར་གྱིས་ཁོ་བོ་ལ་དགོས་པ་མེད་རུང་ཁྱོད་སྒྲིབ་པ་སྦྱངས་བའི་རྟེན་འབྲེལ་ཡིན། ད་དེ་ལྟར་རྫོགས་པར་མ་གྱུར་པས་གནས་གངས་ཁྲོད་འགྲིམས་ལ་སྒྲུབ་པ་ལ་བརྩོན་ན་གྲོལ་བར་འགྱུར་རོ་གསུངས། དེ་ནས་བླ་མ་ཡབ་ཡུམ་དཔོན་སློབ་རྣམས་ཀྱིས་གྲོ་ལམ་ཞིག་ཏུ་སྐྱེལ། དེར་བླ་མས་མི་ལའི་ཕྱག་ནས་བཟུང་སྟེ་རྒྱ་གར་ནས་ལུས་མེད་མཁའ་འགྲོའི་ཆོས་སྐོར་དགུ་ཡོད་པའི་བཞི་ངས་བླངས་ཡོད་ལྔ་པོ་དེ་ཁྱོད་ཀྱིས་ལོན་པར་གྱིས། ང་དང་ཁྱོད་གཉིས་འདུ་འབྲལ་མེད་པ་ཡིན་ཞེས་གསུངས་ནས་བཀྲ་ཤིས་སྨོན་ལམ་མཛད་དོ། །དེ་ནས་རྗེ་བཙུན་ཡུལ་དུ་བྱོན་པས་ཁང་པ་འགྱེལ་ཞིང་འཇག་མས་གང༌། སྲིང་མོ་སྤྲང་དུ་སོང་བས་ནུབ་མོ་གཟིམ་མ་ཟིན། ཐོ་རངས་སྐྱོ་ཕྱེད་དེ་བ་ལ། མི་རྟག་པའི་མགུར་གསུངས། དེ་ནས་སློབ་དཔོན་རྙིང་མ་བའི་དྲུང་དུ་བྱོན་ནས་མི་རྟག་པའི་མགུར་གསུངས། ཨ་ནེ་ཕུ་འབྲོག་མདའ་ཞིང་འཛོམ་ཡོད་པས་དེར་སོང་དང་རྒྱག་ཆུ་ལ་ཕན་པ་ཞིག་སྟེར་འོང་གིས་གསུངས། དེར་ཨ་ནེ་ཅན་དུ་སོང་ཙ་ན་སྤྲང་པོ་ཕ་མེས་བླ་འཚོང་པོ་ཟེར་ནས་སྦྲ་ཡི་ཀ་བས་བརྡུང༌། གུང་ཐང་ཕུག་ཏུ་བཞུགས་དུས་ཕྱེ་དུམ་པ་ཞིག་ཞིང་རིན་ཡིན་ཟེར་བསྐྱལ། རག་མ་བྱང་ཆུབ་ནམ་མཁའ་རྫོང་དུ་བསྒོམས་པས་རྨི་ལམ་བརྡ་ཤར་གྱི་མགུར་མཛད། བྲག་དཀར་སྤོ་མཐོན་དུ་ཟྭ་ཚྭ་མེད་རྡོལ་མེད་གསོལ་བས་སྐུ་ལུས་ཤེད་མེད་པར་གྱུར། ཉིན་གཅིག་ཡུལ་མིས་མཐོང་བས་འདྲེ་རེད་ཟེར་ཞིང་བྲོས། ཡང་སྒྲོ་ཚོལ་མི་འགའ་བྱུང་བས་ཙམ་པ་དུམ་པ་ཞིག་བྱིན་པ་ཟྭ་ལ་བཏབ་ནས་གསོལ་བས་ཁམས་དྭངས། དེར་ཡུལ་མིས་རྗེ་བཙུན་གྱི་ལོ་རྒྱུས་བཤད་པས་པེ་ཏས་ཚོལ་ནས་མཇལ་དུ་ཕྱིན། སྐུ་ལུས་མཐོང་བས་ཡིད་སྡུག་ནས་མང་དུ་ངུས། འདིར་ཤི་བས་མི་ཕན་བསོད་སྙོམས་ལ་སོང་ཟེར་བས། སྡིག་ཆེ་བས་དགེ་སྦྱོར་མ་འགྲུབ་ན་བསོད་སྙོམས་ལ་མི་འགྲོ་གསུངས། ཡང་པེ་ཏས་ཆང་སྦང་ཟོ་བ་གང་དང་ཤ་ཟན་ཅུང་ཟད་ཁུར་བ་ཚོགས་འཁོར་མཛད་ཡང་ཉིན་གཅིག་སྣམ་བུ་སྲེ་བོ་ཞིག་ཁྱེར་ནས་འདི་ལ་གོས་གྱིས་ལ་བླ་མ་བ་རི་བའི་ཉེ་གནས་ལ་འགྲོ་ཟེར་བས་དེར་ཆོས་བརྒྱད་སྤང་པའི་མགུར་གསུངས། གཞན་ཡང་ཁྱི་ར་བ་དང་གཤིན་རྡོར་མོ་སོགས་ཀྱིས་འཚོ་བ་ཅུང་ཟད་རེ་སྦྱར་བ་ལ་སྨོན་ལམ་དང་བསྔོ་བ་མཛད། དེ་ལྟར་གནས་དེར་ལོ་དྲུག་སོང༌། དེ་ནས་བྲག་དམར་མཆོང་གླིང་ཁྱུང་གི་རྫོང་ལ་ལོ་བཅུ་གཉིས་ཀྱི་དམ་བཅའ་བྱས་ནས་ཡུལ་མིས་མི་ཚོར་བར་ཤི་ཨི་ཐུབ་བསམ་པ་མཛད་གསུངས། ཉིན་གཅིག་ཐུག་མ་བཏུས་ནས་རྡོ་ལེབ་སྟེང་དུ་བཏིང་བས་རླུང་གིས་གཏོར་ཤིང་སྐམ་པོ་བཅག་པས་འགྱེལ་ནས་དབང་པོ་མ་བྱུང༌། ལྷག་པས་བརྒྱལ་སངས་ནས་ཡིད་སྐྱོ་བའི་སྐབས་བླ་མ་བཞུགས་པའི་ཕྱོགས་ནས་སྤྲིན་དཀར་པོ་བྱུང་བར་བླ་མ་དྲན་དྲུག་གི་མགུར་མཛད། སྤྲིན་སྣམ་བུ་བརྐྱང་འདྲའི་སྣེ་མོར་བླ་མ་མར་པ་ཞལ་གཟིགས་ནས་དགའ་དྲག་པའི་གསོལ་འདེབས་མཛད། དེ་ནས་ཕུག་པར་ཨ་ཙ་ར་བདུན་གྱི་ཆོ་འཕྲུལ་ལ་བྱམས་སྙིང་རྗེའི་མགུར་མཛད་པས་འཇའ་ཡལ་བ་བཞིན་སོང༌། དེར་ལོ་བཅུ་གཉིས་ཀྱི་དམ་བཅའ་རྫོགས། དེ་ནས་ལ་ཕྱི་ཆུ་བཟང་དུ་བྱོན་ནས་བསྒོམས་པས་ལྷ་འདྲེས་ཆོ་འཕྲུལ་སྣ་ཚོགས་བྱུང་བ་ཟིལ་གྱིས་མནན། ཕྱི་ནང་ཁ་ཟས་ཀྱི་བྱེ་བྲག་མང་པོ་ཕུལ་བ་བཞེས་པས་ཟླ་མང་པོར་འཚོ་བ་མི་དགོས་པ་བྱུང༌། སྙེ་ནམ་དུ་གཤིན་རྡོར་མོ་སྟོན་པ་ཤཱཀྱགུ་ཎ་སོགས་ཀྱིས་བསྙེན་བཀུར་ཡོན་བདག་བྱས། རྗེ་བཙུན་ལ་ཕྱི་གངས་དུ་ཕྱེ་བྲེ་དོ། ཤ་གཟུག་གཅིག་མར་ཤག་གཅིག་བསྣམས་ནས་བྱོན་པ་ལ། སྟག་ཡོས་གཉིས་ཀྱི་ལོ་མཚམས་སུ་ཁ་བ་ཉིན་མཚན་བཅོ་བརྒྱད་བབས་ལམ་ཆད། ཡོན་བདག་རྣམས་ཀྱིས་འདས་མཆོད་ཕུལ། ཕྱིས་ཟླ་བ་བདུན་པའི་ནང་ཡུལ་མི་དྲུག་འཚོལ་དུ་སོང་བས་རྗེ་བཙུན་དང་མཇལ། རྗེ་བཙུན་གཟི་མདངས་ཆེ་བར་བཞུགས་པས་ལྷ་འདྲེས་འཚོ་བ་ཕུལ་བ་འདྲ་ཞུས། སྐབས་འགར་མཁའ་འགྲོ་མས་ཚོགས་སྐལ་དང༌། སྐབས་འགར་མི་མ་ཡིན་གྱི་འཚོ་བ་སྦྱར་གསུངས། དེ་ནས་སྙེ་ནམ་གྱི་བྲག་ཕུག་ལ་བཞུགས་སྐབས་རས་ཆུང་པ་སོགས་སྐལ་ལྡན་གྱི་སློབ་ཚོགས་མང་དུ་འདུས་ནས་ཆོས་གསུངས། གཞན་ཡང་ཤེལ་ཕུག་ནམ་མཁའི་རྫོང་དང༌། སྐྱིད་ཕུག་ཉི་མ་རྫོང་དུ་ཡོན་བདག་འདུས་ནས་ཆོས་ལ་བཀོད་པའི་མགུར་མཛད། དེ་ནས་ལིང་པའི་བྲག་ཏུ་བྲག་སྲིན་མོ་ལ་མགུར་གསུངས་ནས་དམ་ལ་བཏགས། དེ་ནས་སློབ་ཚོགས་རྣམས་ཀྱིས་ལིང་པའི་བྲག་ནས་སྙེ་ནམ་བྲོད་ཕུག་ཏུ་གདན་དྲངས་པེ་ཏ་དང་ཨ་ནེས་ཆོས་ཞུས། དེར་རྗེ་བཙུན་གྲགས་པའི་སྙན་པས་ཁྱབ་ནས་སྡེ་རྣམས་ཀྱིས་ཚོགས་གསོགས་དང༌། རས་པའི་སློབ་ཚོགས་མང་དུ་བྱུང༌། སྙེ་ནམ་དུ་ལོ་སྟོན་དར་ལོ་གཉིས་ཀྱིས་གཙོར་བྱས། བཀའ་གདམས་པའི་མཚན་ཉིད་རྣམས་ཕྲག་དོག་གིས་རྩོད་པ་བྱས་པར། སྙེ་ནམ་རིའི་དགོན་པ་ན། །མི་ལ་རས་པ་སྒོམ་པ་ལ། །སྟོན་པ་ལོ་སྟོན་ཟུག་རྔུ་སྐྱེས། །དེ་རང་སྟོན་པ་ཨེ་མ་འཁྲུལ། །ཡོན་བདག་ཕོ་མོའི་དད་ཟས་ལ། །ཁྱེད་མཁས་བཙུན་བཟང་པོ་སེར་སྣ་སྐྱེས། །དེ་རང་མཁས་པ་ཨེ་མ་འཁྲུལ། །དོན་མེད་ཚིག་གི་སྟོང་སྒྲ་ལ། །དོན་བདེན་པར་མ་འཛིན་སྟོན་པ་ལགས། །ཚིག་ཐ་སྙད་མུ་སྟེགས་རྟོག་པ་ལ། །ཚེ་སུམ་གཉིས་ཟད་པ་མ་ཚོར་རམ། །རྟོག་གེའི་ངན་ཚིག་སྣ་ཚོགས་ལ། །ཚེ་སྟོང་པར་མ་ཟད་སྟོན་པ་བ། །ངས་ཚིག་ངན་གྱི་ཡ་བོ་ལབ་མི་ཁོམ། །མུ་སྟེགས་སྟོན་པ་དྲང་མི་ལ། །ཚད་མི་ཚོད་མ་འཐུང་མ་མྱོང༌། །ད་རེས་རྩོད་པ་སྟོན་པ་རྒྱལ། །ཅེས་གསུངས་ཤིང་རིམ་ཀྱིས་ཆོས་ཀྱི་དྲི་བ་དང་གསུང་མགུར་མཛད་པས་མཐར་གདམས་ངག་ཞུས་ནས་སྟོན་སྒོམ་ཆེ་བར་གྱུར། དེ་ནས་རས་ཆུང་པ་རྒྱ་གར་དུ་འབྱོན་གསུངས་པར་བཤོལ་མ་ཐེབས་ནས། སྙེ་ལམ་དུ་གསེར་ཅུང་ཟད་བསོད་སྙོམས་སུ་ཕུལ་བ་རས་ཆུང་པའི་རྫོངས་མཛད་ནས། ད་རེས་བླ་མ་མར་པའི་བཀའ་བཞིན་ལུས་མེད་མཁའ་འགྲོའི་ཆོས་སྐོར་ལྔ་རྒྱ་གར་ནས་ལེན་རྒྱུ་ཡོད་གསུངས་པ་ད་རེས་གདན་དྲོངས་ཤོག་གསུངས། དེ་ནས་རས་ཆུང་རྒྱ་གར་དུ་བྱོན་ནས་ཏི་པུ་པ་དང༌། མ་གཅིག་གྲུབ་པའི་རྒྱལ་མོ་སོགས་མཇལ་ནས་གསེར་གྱི་མཎྜལ་ཕུལ་ཏེ། ལུས་མེད་མཁའ་འགྲོའི་ཆོས་སྐོར་ལྔ་དང༌། གཞན་ཡང་གདམས་པ་ཟབ་ཁྱད་ཅན་མང་པོ་ཞུས། ཏི་པུ་པས་ག་པུར་གུར་གུམ་སིནྡྷུ་ར་ཨ་ཀ་རུ་ནག་པོའི་འཁར་བ་རྣམས་རྗེ་བཙུན་ལ་ཕྱག་རྟེན་དུ་བསྐུར། དེ་ནས་རས་ཆུང་པ་བལ་པོར་ཕེབས་ནས་དེ་ན་མུ་སྟེགས་ཀྱི་སྟོན་པ་ངན་སྔགས་སྣ་ཚོགས་ཤེས་པ་ཞིག་འདུག་པ་ལ་གསེར་ལྷག་མ་རྣམས་ཕུལ་ནས་ངན་སྔགས་རྣམས་ཞུས་ནས་འོང་བ་ན། རྗེ་བཙུན་བྲག་དམར་མཆོང་གླིང་ན་བཞུགས་ནས་གཟིགས་པར། རས་ཆུང་པ་ཤེལ་གྱི་མཆོད་རྟེན་ཞིག་ཏུ་ཡོད་པ་ལ། ངན་སྔགས་སྣ་ཚོགས་ཞུས་ནས་རླུང་དམར་འཚུབས་མ་གཅིག་ཏུ་གྱུར་སོང་བས་ལམ་དུ་བར་ཆད་བྱུང་བར་མཁྱེན་ནས། དཔལ་མོ་དཔལ་ཐང་ལ་བསུ་བར་བྱོན། རས་ཆུང་པ་དང་འཕྲད། དེར་སེར་བ་བབས་པས་རས་ཆུང་པ་དབུ་གཏུམ་ནས་བཞུགས་སེར་བ་སྲབ་སྐབས་རྗེ་བཙུན་མ་བཞུགས་པ་ལ་གར་བྱོན་བཙལ་བས་གཡག་རྭ་ཞིག་གི་ནང་དུ་རྗེ་བཙུན་ཆུང་དུ་མ་སོང༌། གཡག་རྭ་ཆེ་རུ་མ་སོང་བར་དེར་ཤོག་གསུངས་ཀྱང་མ་ཐར། རྗེ་བཙུན་སྒོར་བྱོན་ཏེ་ལྟ་སྟངས་མཛད་པས་སྤྲིན་དྭངས། དེ་ནས་རུ་བར་རྒན་མོ་ཞིག་ལ་བསོད་སྙོམས་བྱས་པས་གཏད་དུ་མ་ཉན། རྒྱང་དེར་ཕེབས་ནས་གཟིམས། ནང་པར་རུ་བ་གཞན་མི་འདུག །རྒན་མོ་ཤི་བ་གཟིགས་ནས་བསྔོ་སྨོན་མཛད། ཟ་མ་ཟོས་འཕྲོ་ཅུང་ཟད་ཡོད་པ་བསྣམས་ནས་བྲག་དམར་མཆོང་གླིང་དུ་བྱོན། དེར་རས་ཆུང་པ་ཆུ་ལེན་དུ་བྱོན་པའི་ཕར་ཁར་རྐྱང་ཕ་མ་བདུན་དང༌། སྤྱང་ཀི་མ་བུ་བདུན་བརྩེ་ཞིང་འདུག་པ་མཐོང་བས་ཐུགས་ཡེངས་སོང་བ་དང༌། དེ་ནས་ཡར་བྱོན་པས་ཤོག་བུའི་ཚིག་དྲི་བྲོ་བས་གོང་ནས་གདམས་ངག་ལ་སྙད་འདོགས་ལུགས་ཀྱིས་བསྲེགས་གམ་སྙམ་པས་དཔེ་ཁུག་སྟོང་པར་གཟིགས། དེར་དད་པ་ལོག་ནས་སེམས་སྡུག་པས་རྗེ་བཙུན་གྱིས་སྐུ་ལུས་ཀྱི་བཀོད་པ་དང་རྫུ་འཕྲུལ་སྣ་ཚོགས་བསྟན་ཅིང་རྐྱང་མགུར་སྐོར་གསུམ་སོགས་མཛད་ངན་སྔགས་བསྲེགས་པ་མ་གཏོགས་གཞན་མཁའ་འགྲོའི་ཕྱག་ཏུ་ཡོད་པས་གསོལ་བ་ཐོབ་གསུངས། དེར་བྲག་གསེབ་ནས་དཔེ་ཀུན་ཆིལ་གྱིས་བྱུང་བས་དེ་ནས་མི་ལྡོག་པའི་དད་པ་སྐྱེས་སོ། །ཡང་ཉིན་གཅིག་སྐུ་ལུས་བཀོད་པ་དྲུག་མཛད་པ་ལས་མཐོང་སྣང་སྣ་ཚོགས་འདི་ཇི་ལྟར་ལགས་ཞུས་པས། སྣ་ཚོགས་ཆུ་ཡི་སྣོད་རྣམས་སུ། ཇི་ལྟར་ཟླ་བའི་དཀྱིལ་འཁོར་བཞིན། དག་པའི་འགྲོ་རྣམས་ཐམས་ཅད་ལ། ཐ་དད་སྣང་ཡང་དེ་བཞིན་མིན། ཞེས་སོགས་གསུངས་སོ། །ཡང་ཉིན་གཅིག་ཟད་པར་གྱི་ཏིང་ངེ་འཛིན་དུ་མ་བསྟན་པ་དེ་ཇི་ལྟར་ལགས་ཞུས་པས། མེ་ཡིས་མི་ཚིག་ཆུས་མི་བྱིང༌། སྤྱོད་པ་གླང་ཆེན་འགྲོས་ཀྱི་གར། དག་པའི་འགྲོ་རྣམས་ཐམས་ཅད་ལ། ཐ་དད་སྣང་ཡང་དེ་བཞིན་མིན། ཞེས་སོགས་གསུངས་སོ། །ཡང་མ་ཇོ་ལྕམ་མོའི་ཚོགས་འཁོར་གཅིག་བསྐོར་བའི་གྲལ་དུ་ཁྱེད་ལ་སློབ་མ་གྲུབ་ཐོབ་ཨི་ཡོད་ཞུས་པས། མཁའ་འགྲོའི་ལུང་བསྟན་སྤྲུལ་པའི་སྐུ། དྭགས་པོ་ཉི་མ་འགྲོ་ལ་འཆར། རས་ཆུང་ཟླ་བ་སྤྲུལ་པའི་སྐུ། སྒོམ་སྟག་ཇོ་དར་ཞི་བ་འོད། འབྲི་སྒོམ་ལ་སོགས་ཉི་ཤུ་ལྔས། འགྲོ་དོན་བྱེད་འབྱུང་མཁའ་འགྲོའི་གསུངས། གྲུབ་ཐོབ་ལྔ་དང་རྟོགས་ལྡན་བརྒྱད། རང་བྱུང་ཉམས་ཤར་བརྒྱ་རྩ་བརྒྱད། ཆོས་མཐུན་སློབ་མ་སྟོང་རྩ་འོང༌། ཆོས་འབྲེལ་ཐོབ་པ་ཁྲི་འབུམ་སྟེ། ལག་ལེན་སྐྱོང་བ་འགའ་རེ་འདུག །ཁྱོད་དྲི་རྟོག་བྱེད་པ་བག་ཆགས་བཟང༌། གསུངས་སོ། །དེ་ནས་བལ་པོའི་རྒྱལ་པོ་ལ། མགུར་གསུངས་པ་དང༌། རྒྱ་གར་གྲུབ་ཐོབ་དྷརྨ་བོ་དྷི་དང༌། བོད་ཀྱི་མི་ལ་རས་པ་གཉིས་བལ་ཡུལ་དུ་མཇལ་འཕྲད་མཛད་པའི་སྐོར་དང་གུང་ཐང་སྣ་རྩེའི་ཕུག་ཏུ་ལྷ་ཡི་བུ་མོ་བརྒྱད་བྱུང་ནས་ཆོས་ཞུས་པ་དང༌། དིང་རི་ནས་ཕ་དམ་པ་ཚུར་བྱོན། རྗེ་བཙུན་གཉའ་ནང་ནས་ཕར་བྱོན། ཐོང་ལའི་ལ་ཁར་ཆོས་དང་རྫུ་འཕྲུལ་མཛད་པ་དང༌། སྐྱིད་ཕུག་ཉི་མ་རྫོང་དུ་ཁྱི་ར་བ་མགོན་པོ་རྡོ་རྗེ་རྗེས་སུ་བཟུང་ཕྱིར་ཤ་གྲོལ་ཁྱི་གྲོལ་མཛད་པའི་སྐོར་དང༌། ཡང་གཙང་གི་ག་ར་ཁ་ཆེའི་མགྲོན་ཁང་དུ་དགེ་བཤེས་གཡག་རུ་ཐང་པ་དང་སེ་བན་སྟོན་ཆུང་གཉིས་རྗེས་སུ་བཟུང༌། བྲིན་གྱི་ཕུག་པར་འདྲེ་དམག་གི་ཆོ་འཕྲུལ་བསྟན་པར་ཆོས་གསུངས་ནས་དམ་ལ་བཏགས་པ་དང༌། རས་ཆུང་པ་དང་ལེགས་སེ་འབུམ་རྣམས་ཀྱིས་དབང་བསྐུར་ཞུས་པའི་སྐབས་བུམ་པ་ནམ་མཁར་འཕར་ནས་དབང་བསྐུར་བ་དང༌། ཐང་སྐུ་ལ་རབ་གནས་མཛད་པ་མེ་ཏོག་རང་འབྱར་དུ་སོང་བ་རྣམས་དང༌། ཆུ་མིག་དངུལ་འབུམ་དུ་རས་པ་ཞི་བ་འོད་རྗེས་སུ་བཟུང་བའི་སྐོར་དང༌། གུང་ཐང་ལྷོ་སྒོ་ན་ཉ་མ་བཙུན་སེང་རྗེས་སུ་བཟུང་བ་དང༌། གངས་ཏི་སེར་བྱོན་ནས་ནཱ་རོ་བོན་ཆུང་དང་རྫུ་འཕྲུལ་འགྲན་པས་མཐར་ཟིལ་གྱིས་མནན་ནས་ཚར་བཅད་པ་དང༌། གུང་ཐང་ཡངས་པ་ཅན་དུ་བུད་མེད་རྗེས་སུ་བཟུང་བ་སྙན་བརྒྱུད་ཀྱི་བདག་མོར་གྱུར་པ་དང༌། ལྕིམ་ལུང་གི་ཆུ་མཐའ་མཁར་ཕུར་བྱོན་དུས་ངན་རྫོང་བྱང་ཆུབ་རྗེས་སུ་བཟུང་བ་དང༌། གཙང་གི་དིང་རི་མཁར་དམར་དུ་ལྷ་རྗེ་གཡང་ངེ་ལ་མགུར་མཛད། གཙང་བོང་རོང་གི་གྲོང་དུ་རྟོགས་ལྡན་རས་ཆུང་མ་རྗེས་སུ་བཟུང་བའི་སྐོར་རྣམས་སོ། །དེ་ནས་རེས་གཅིག་གི་ཚེ་རྗེ་བཙུན་ཆུ་བར་ན་ཏིང་ངེ་འཛིན་ལ་བཞུགས་པའི་ཚེ་ཆུ་ཕོ་འབྲུག་ལོ་དཔྱིད་ར་བའི་ཚེས་བརྒྱད་ལ་ཤ་ཟ་ཆེན་མོ་ལྔས་ཆོ་འཕྲུལ་བར་ཆད་བརྩམ་པར་ཟིལ་གྱིས་མནན་པས་ཕྱག་འཚལ་ནས་སོང༌། ཡང་དབྱར་ར་བའི་ཚེས་བཅུའི་ནུབ་མོ་མཚར་སྡུག་ཅན་གྱི་བུ་མོ་ལྔས་མཆོད་ཅིང་སེམས་བསྐྱེད་སྡོམ་པ་ཞུས་ནས་ཞབས་སྤྱི་བོར་བླང་ནས་སོང༌། ཡང་སྟོན་འབྲིང་པོའི་ཚེས་བཅུ་གཅིག་དགུང་མོར་བུད་མེད་གཅིག་གིས་ཇོ་མོ་བྲོ་འཚལ་བས་སྤྱན་འདྲེན་པར་ཞུས་ནས་དར་གྱི་སྣམ་བུའི་སྟེང་ནས་གདན་དྲངས། ཡུལ་གྱི་ཕྱུགས་རྫིས་དམར་ཐབ་ཀྱིས་མཁྲེན་པར་གྱུར་པའི་ཡུལ་མི་ལ་ཡང་ཡམས་རིམ་བྱུང༌། དེར་ཡི་གེ་བརྒྱ་པའི་ཁྲུས་དང༌། སྒྲོལ་མ་ཀུ་རུ་ཀུལླེའི་གཟུངས་སྒྲུབ། གཙུག་ཏོར་རྣམ་རྒྱལ་གྱིས་ཚེ་བསྲིང་མཛད་པས་ནད་ཡམས་ཐམས་ཅད་ཞི། ཟླ་བ་དེའི་ཉེར་དགུའི་ཉིན་ཚེ་རིང་མཆེད་དང་ཡུལ་བདག་གིས་བར་དོའི་ཁྲིད་ཞུས། བྱི་བ་ཟླ་བའི་ཚེས་བརྒྱད་ནུབ་མོར་ངོ་མཚར་བའི་གསང་མཆོད་ཕུལ་ཏེ་བསྟན་པ་བསྲུང་བར་དམ་བཅའ་ཕུལ་ལོ། །དེ་དག་ནི་བཀྲ་ཤིས་ཚེ་རིང་མའི་ཞུས་ལེན་གྱི་སྐོར་རོ། །དེ་ནས་རས་ཆེན་རས་ཆུང་གཉིས་བཅས་ཅོག་རོ་འབྲིང་མཚམས་སུ་རས་ཆུང་མ་རྗེས་སུ་བཟུང་བས་གྲུབ་པ་བརྙེས་ནས་མཁའ་སྤྱོད་དུ་གཤེགས་སོ། །དེ་ནས་རས་ཆུང་པ་རྒྱལ་ཁམས་བསྐོར་བར་གཤེགས་པ་ལ་བཤོལ་མ་ཐེབས་པར་བྱོན་པའི་དེ་དག་གི་ལོ་རྒྱུས་རས་ཆུང་པ་ཉིད་ཀྱི་རྣམ་ཐར་དུ་གསལ་ལོ། །དེ་ནས་རྗེ་བཙུན་གྱི་མདུན་དུ་རས་པ་བསྒྲེས་པ་རྣམས་བཞུགས་པའི་སྐབས་རས་ཆུང་པས་རྗེ་བཙུན་ལ། རང་རེ་རྣམས་ལྷོ་བྲག་མར་པའི་རྒྱུད་འཛིན་དུ་འདུག་པས། ངེད་སློབ་མ་རྣམས་ལ་རྒྱུད་པ་འཛིན་ཅིང་འཚོགས་པ་སྐྱོང་བ་འགའ་རེ་ཨེ་འོང་ཞུས་པས། རྒྱུད་འཛིན་དམ་པ་ཞིག་སྤྱན་སྔར་ཡོང་གསུངས། དེར་ཞག་བཅོ་ལྔ་ནས་དྭགས་པོ་སྙི་སྒོམ་སྤྱན་སྔར་བྱོན། ཕྱག་རྟེན་དུ་ཇ་གསེར་ཕུལ་བ་ཆོས་བརྒྱགས་གྱིས་གསུངས་ནས་གནང༌། དེ་ནས་རྗེ་བཙུན་གྱིས་སྣ་ལེན་གྱི་མགུར་མཛད། དེ་ནས་དབང་བསྐུར་དང་རྗེ་བཙུན་རྣལ་འབྱོར་མའི་ཐབས་ལམ་ལ་སོགས་པའི་གདམས་ངག་ཞུས་ནས་བསྒོམས་པས་ཐབས་སྟོན་ཁྱད་པར་ཅན་འཁྲུངས༌། བདེ་མཆོག་མཁའ་འགྲོ་སྙན་བརྒྱུད་ཀྱི་བཀའ་རྒྱས་པར་མཛད། ཉམས་ཀྱི་འཆར་སྒོ་དང་རྨི་ལམ་གྱི་བརྡ་དོན་རྣམས་ཞུས་ལེན་གྱི་མགུར་མཛད། བར་དོའི་གདམས་པ་དང༌། ཞལ་གདམས་སྐྱེལ་མགུར་གྱི་ཚུལ་དུ་མཛད། ད་ནི་གདམས་ངག་ཐམས་ཅད་རྫོགས་པས་ཁྱོད་ལ་ཡོན་ཏན་སྐྱེ་བ་ལ་དཀའ་ཚེགས་མི་དགོས། འདིར་ཐོག་མར་ཕྱིན་པའི་ནུབ་མོ་ཁྱུང་གཅིག་བྱ་རྒོད་མང་པོས་བསྐོར་བ་མེ་ཏོག་སེར་པོའི་གླིང་དུ་བབ་པ་རྨིས། བླ་མ་གོང་མ་རྣམས་ཀྱིས་བརྒྱུད་འཛིན་ལུང་བསྟན་ལྟར་ང་ཡི་བརྒྱུད་པ་འདི་ཁྱོད་ལ་གཏད་པས་ཟུང་དང་སྒྲུབ་བརྒྱུད་ཀྱི་བསྟན་པ་དར་བར་འགྱུར་རོ། །ད་དབུས་སུ་སོང་ལ་སྒྲུབ་གནས་སྒམ་པོ་ལུང་བསྟན་པ་དེར་སྒྲུབ་པ་གྱིས། བུ་ཁྱོད་ཡོས་ཀྱི་ལོ་རྟའི་ཟླ་བའི་ཚེས་བཅུ་བཞི་ལ་བྲིན་དུ་སླེབ་པར་གྱིས་གསུངས་སོ། །དེ་ཐམས་ཅད་དྭགས་པོའི་ཞུ་ལེན་གྱི་སྐོར་དང༌། ཡང་རེས་ཤིག་གི་ཚེ། རས་ཆུང་པ་རྡོ་མོན་གྱི་མཚམས་སུ་ལུང་བསྟན་ཅིང་ད་ནི་རེས་ཤིག་དབུས་སུ་སོང༌། མ་འགྲོ་ཟེར་དུས་འགྲོ་རང་ཟེར། ད་མ་འདུག་པར་སོང་ལ་འགྲོ་དོན་གྱིས་གསུངས་ནས་ཞལ་ཏའི་མགུར་མ་མང་དུ་མཛད། རས་ཆུང་པས་ཀྱང་སྨོན་ལམ་ཞལ་མཇལ་ལ་སོགས་ཀྱི་མགུར་ཕུལ་ནས་བྱོན་ནོ། །དེ་ནས་སྙེ་ནམ་ཀྱི་མི་སྡེ་རྣམས་འདིར་ཤོག་ཚོགས་འཁོར་ཡོད་ན་བཟང་གསུངས། དེར་འདུས་ནས་ཚོགས་འཁོར་བསྐོར་ཏེ་ཆོས་མང་དུ་གསུངས། མགུར་བཞེངས་འཇའ་འོད་མེ་ཏོག་ཆར་དུ་འབེབ་པ་སོགས་ཡོན་ཏན་གྱི་ཁྱད་པར་མང་དུ་བྱུང༌། ཀུན་ལ་བསྔོ་སྨོན་ཞལ་ཏ་མཛད་པས་དགའ་སྤྲོ་དང་བཅས་པས་སོང་ངོ༌། །དེ་ནས་འབྲི་སྒོམ་དང་སེ་བན་རས་པ་ངན་རྫོང་རས་པ་སོགས་མང་དུ་འཚོགས་པ་ལ། བླ་མའི་ཞལ་ནས། རྣལ་འབྱོར་ལུས་ཀྱི་མེ་ཏོག་འདི། འཆི་བདག་རྐྱེན་གྱི་བ་མོ་ཡིས། བཅོམ་ཏེ་ཕ་རོལ་འགྲོ་དུས་སུ། ང་ལ་མཐོང་སྣང་སྣ་ཚོགས་འོང༌། ཞེས་གསུང་ཞིང༌། འབྲི་སྒོམ་ཁྱེད་དྲང་པོ་ཡིན། ཇི་ལྟར་འོང་སྨྲོས་ཤིག་གསུངས་པ་ལ། རྗེ་བཙུན་ཆེན་པོ་ལ་མཐོང་སྣང་ལ་སོགས་སྐྱེ་འཆི་མི་མངའ་ཡང༌། དག་མ་དག་གི་མཐོང་སྣང་ལ་སོགས་འབྱུང་བ་ལགས་སམ་ཞུས་པས། ཁྱོད་ཀྱིས་གོ་ནས་འདུག་གསུངས། དེར་སེ་བན་གྱིས་རྗེབཙུན་གྲོང་ན་ཇི་ལྟར་བྱེད་ཞུས་པས། ལྷོ་བྲག་མར་པའི་བཀའ་དྲིན་གྱིས། བྱ་བ་ཐམས་ཅད་བྱས་ནས་ཡོད། མི་ལ་རས་པའི་སྙིང་རུས་ཀྱིས། བྱེད་པ་ཐམས་ཅད་ཟིན་ནས་ཡོད། ཅེས་སོགས་མགུར་མཛད་ཅིང༌། ད་ང་ཡི་ཤུལ་དུ་དངོས་པོ་ཆེན་པོ་མེད། ཨ་ག་རུ་ནག་པོ་འབའ་ཞིག་གི་ཕྱག་འཁར་དང༌། ཨ་རུ་ར་རྣམ་པར་རྒྱལ་བ་དང༌། རས་ཀྱི་པན་ཞུ་དང༌། རས་དུམ་གཅིག་དྭགས་པོ་ལ་བསྐུར། སྦ་བེར་དང་རས་དུམ་གཅིག་རས་ཆུང་པ་ལ་བསྐུར། གྲི་གུ་མེ་ཆ་མ་འདི་ངན་རྫོང་སྟོན་པ། རུས་པའི་ཐུར་མ་འདི་འབྲི་སྒོམ་རས་པ། པཎ་ཞུ་ཧྲུལ་པོ་འདི་སེ་བན་ནས་ཟུང༌། རས་འདི་དུམ་བུ་གྱིས་ལ་རས་པ་རེ་རེ་ལ་རེ་རེ་བྱིན། ནོར་ཆེ་བ་མིན་ཏེ། དངོས་གྲུབ་སྣ་རེ་འོང་སྲིད། སྒོམ་ཁང་གི་ཕུག་པར་གསེར་གཅིག་ཡོད་པ་ལ་འགྱེད་གྱིས་གསུངས་སོ། །དེར་མ་དག་པའི་བོན་སྟོན་གཅིག་གིས། ཡུལ་དུ་ནད་ཡམས་དཀོན་པ་རྗེ་བཙུན་གྱི་བྱིན་རླབས་ཡིན་ཏེ། ང་ཡི་ཁ་ཡི་ཟ་ཕུ་འགགས་ཟེར་ནས། མཛེ་མོ་གཅིག་ལ་རྔན་དུ་གཡུ་བྱིན་ནས། ཞོ་ཕོར་བ་གང་ལ་དུག་བཏབ་དེ་བསྐུར་བ་དྲངས་པ་དང༌། རྗེ་བཙུན་མཛེ་མོ་ཁྱོད་ཀྱིས་གཡུ་ཐོབ་པར་བྱ་བའི་ཆེད་དུ་འཐུང་བ་ཡིན་གསུངས་ནས་གསོལ་བ་དང༌། ཕོར་པ་ཡང་བཀྲུས་ནས་གནང་སྟེ། མཁའ་འགྲོ་མ་ཡི་ཆད་པས་དེ་ནུབ་བོན་པོ་ཤི་བས་དུག་དྲངས་པར་ཤེས་ཏེ། ཨ་ག་མཁྱེན་བཞིན་དུ་གསོལ་བའི་དཔེ་ཡོད་དམ་ཞུས་པས། ཨ་མཚར་པོ་ང་ཡི་འདུལ་ཞིང་ཐམས་ཅད་རྫོགས་པ་ཡིན། གསུངས་ནས་གསོལ་འདེབས་དང་བསྔོ་བ་མང་དུ་མཛད་ཅིང་བོན་པོ་མཛེ་མོ་གཉིས་ཀྱང་མཐོ་རིས་སུ་དྲངས་སོ། །དེ་ནས་རྗེ་བཙུན་ཆེན་པོ་དེ་གཞོན་ནུ་ནོར་བཟང་དང༌། ནཱ་རོ་ཆེན་པོའི་རྣམ་ཐར་བཞིན་དཀའ་བ་དཔག་ཏུ་མེད་པས་བླ་མ་དམ་པ་བསྟེན་ཅིང༌། གདམས་པ་ཟབ་མོའི་ཐུགས་བལྟམས་ཏེ། རི་ཁྲོད་རྣམ་དག་ཏུ་ལུས་སྲོག་ལ་ལྟོས་པ་མེད་པར་སྒྲུབ་པ་ཁས་བླང་ཞིང་བསྒོམས་པས༌། མཆོག་དང་ཐུན་མོང་གི་དངོས་གྲུབ་ཐམས་ཅད་ཐོབ་སྟེ། འགྲོ་བ་མི་དང་མི་མ་ཡིན་པ་དཔག་ཏུ་མེད་པ་སྨིན་གྲོལ་གྱི་ལམ་ལ་བཀོད་ཅིང༌། མཐར་ཡང་དག་པར་རྫོགས་པའི་སངས་རྒྱས་ཀྱི་མཛད་པ་དང་སྒོ་བསྟུན་ནས་ལེ་ལོ་ཅན་ཆོས་ལ་བསྐུལ་བའི་ཕྱིར་དགུང་ལོ་བརྒྱད་ཅུ་རྩ་བཞི་བཞེས་པའི་དུས་སུ། ཆུ་མོ་ཡོས་ཀྱི་ལོ་རྟའི་ཟླ་བའི་ཚེས་བཅོ་ལྔའི་ཉི་མ་རི་རྩེར་ཤར་བ་ལ། མ་དག་པའི་སྣང་ངོར་མྱ་ངན་ལས་འདས་པའི་ཚུལ་བསྟན་ཏེ། དེའི་དུས་སུ་དག་པའི་སྒོམ་ཆེན་རྣམས་ལ་འདུ་འབྲལ་མེད་པར་བཞུགས་པའི་སྣང་བ་དང༌། འགའ་ཞིག་ལ་མཁའ་སྤྱོད་དུ་བྱོན་པ་དང༌། སེང་གེ་ལ་བཅིབས་ནས་འབྱོན་པ་ལ་སོགས་མཐོང་སྣང་ཐ་དད་པ་བྱུང་ཞིང༌། ནམ་མཁའ་ཐམས་ཅད་འཇའ་འོད་ཀྱིས་ཁྱབ་ཏེ། མེ་ཏོག་སྣ་ཚོགས་ཀྱི་ཆར་ལ་སོགས་པ་ལྟས་ངོ་མཚར་ཅན་དུ་མ་བྱུང་ངོ༌། །དེར་ཐམས་ཅད་ཚོགས་ཏེ་གདུང་བཞུ་བ་ལ་མ་འཆམས་པས། བྱིས་སྦ་རལ་པ་ཁམས་སེག་གེ་བ་གཅིག་ནམ་མཁའ་ལ་གར་བྱེད་ཅིང༌། ཁྱེད་ཅག་མི་ཡུལ་གླེན་པ་འདིར། མི་ལ་རས་པའི་གདུང་ལ་རྩོད། བརྩད་པས་ཐོབ་ཏུ་མི་འཇུག་པ། མཁའ་འགྲོ་སྤྱི་ཡི་དམ་ཚིག་ཡིན། ཅེས་སོགས་དང༌། ལུང་པ་གཉིས་ཀྱི་རབ་སྒང་འདིར། བཞུས་ན་ཕན་པ་ཤིན་ཏུ་ཆེ། ཟེར་བས་བྲིན་ཆུ་བར་གྱི་བྲག་སྟེང་དུ་བཞུས་པས་མཛེ་ནད་ཐམས་ཅད་ཆད་དོ། །ཡང་མཁའ་འགྲོ་མ་རྣམས་ཀྱི་ནམ་མཁའ་ནས༌། རཾ་ཡེ་ཤེས་གཏུམ་མོ་མེ་ལྷའི་མེ། ཞེས་སོགས་མགུར་བླངས་པས་ཐུགས་ཀ་ནས་མེ་རང་བྱུང་དུ་འབར་བ་ལས༌། མཁའ་འགྲོ་མས་རྗེ་ཡིད་བཞིན་ནོར་བུ་གཤེགསཔ་ལ། ལ་ལ་ངུ་ཞིང་ལ་ལ་བརྒྱལ། བརྒྱལ་སངས་མྱ་ངན་བྱེད་དུས་འདིར། རང་བྱུང་མེ་ནི་རང་འབར་འགྱུར། ཅེས་སོགས་གདུང་དབྱངས་མགྲིན་གཅིག་ཏུ་མཛད་དོ། །དེར་གདུང་ཁང་གི་སྟེང་དུ་གདུང་རིང་བསྲེལ་འདུས་པའི་གོང་བུ་འོད་འཕྲོ་བ་གཅིག་འདུག་པ་ལ། ཞི་བ་འོད་དང༌། སེ་བན་གཉིས་ཀྱིས་མགུར་བླང་ནས་གསོལ་བ་བཏབ་པས། མཆོད་རྟེན་གཅིག་ཏུ་གྱུར་ནས་བསྐལ་བཟང་གི་སངས་རྒྱས་སྟོང་དང༌། བླ་མའི་སྐུ་གཅིག་ཏུ་འདུས་པས་མགུར་མཛད་ཅིང༌། ནམ་མཁར་འཁོར་ལོ་བདེ་མཆོག་ཁྲ་དཔུང་ངེ་བ་གཅིག་ཡོད་པ་ལ་ཐིམ་མོ། །མཆོད་རྟེན་མཁའ་འགྲོ་མ་དཀར་མོ་གཅིག་གིས་གདན་དྲངས་པ་ལ། ཞི་བ་འོད་ཀྱིས་མགུར་མཛད་ཅིང་གསོལ་བ་བཏབ་པས། མཆོད་རྟེན་གྱི་ནང་ནས་རྗེ་བཙུན་གྱི་མགུར་མཛད་པ་དང༌། མཁའ་འགྲོ་མས་མཆོད་རྟེན་བུ་ཆེན་རྣམས་ཀྱི་དབུ་ལ་རེག་ཙམ་རེ་བྱས་ཏེ་ནམ་མཁར་གདན་དྲངས་སོ། །དེ་ནས་ལེགས་སེ་ན་རེ། བླ་མའི་རྣམ་པར་ཐར་པ་དེ་ལ་གསེར་མེད་ཟེར་ནས་ཕུག་པ་རློགས་པས། བུར་དཀར་རྡོག་པོ་གསུམ་རས་ཁ་གཅིག་ཏུ་བཏུམ། གྲིའི་ཡུ་བ་ཁེམ་སོའི་གྲི་རྩེ་མོས་འབུག །ལྟག་པས་མེ་ཆ་འོང་བ་གཅིག་དང༌། ཡི་གེ་གཅིག་འདུག་པ་ལ་བལྟས་པས་རས་དང་བུ་རམ་གྲི་འདིས་ཆོད་དང་ཐམས་ཅད་ལ་ཁྱབ་ཅིང་ཐོབ་པར་འོང༌། དངོས་པོ་ལ་ཆགས་ཞེན་སྤང་ཞིང༌། རི་ཁྲོད་འགྲིམ་ལ་དགོན་པ་རུ་བསྒྲུབ་པ་དང༌། དེ་ཡང་རྗེ་བཙུན་ཆེན་པོ་དེ་གནས་ངེས་མེད་རི་ཁྲོད་འགྲིམ་པའི་བཞུགས་གནས་མང་དུ་ཡོད་ཀྱང་ཡོངས་སུ་གྲགས་པའི་རྫོང་ཆེན་བཅོ་བརྒྱད༌། རྫོང་ཆུང་གཉིས་དང་ཉི་ཤུ་ནི། བྲག་དམར་ལིང་པ་རྫོང༌། རྟ་སོ་དབུ་མ་རྫོང༌། བྲག་དཀར་སྤོ་མཐོན་རྫོང༌། རྐྱང་འཕན་ནམ་མཁའ་རྫོང༌། རག་མ་བྱང་ཆུབ་རྫོང༌། སྨིན་འཁྱུག་འགྲིབ་མ་རྫོང་སྟེ་ཡོངས་གྲགས་གི་མི་ལའི་རྫོང་དྲུག་གོ། བྲག་སྐྱ་རྡོ་རྗེ་རྫོང༌། ཁྲ་ཚང་སྲིན་པོ་རྫོང༌། སྐྱིད་པ་ཉི་མ་རྫོང༌། ཁུ་བྱུག་དབེན་པ་རྫོང༌། ཤེལ་ཕུག་ནམ་མཁའ་རྫོང༌། རྩེག་པ་རྐང་མཐོ་རྫོང་སྟེ། སྐུ་ཐང་རྫོང་དྲུག་གོ །རྒྱ་བྲག་ནམ་མཁའ་རྫོང༌། སྦས་ཕུག་མ་མོ་རྫོང༌། སྟག་ཕུག་སེང་གེ་རྫོང༌། ལ་ཕུག་པདྨ་རྫོང༌། ཁྲོ་རྒྱལ་རྡོ་རྗེ་རྫོང༌། གླང་མགོ་ཀླུ་བདུད་རྫོང་སྟེ། དེ་རྣམས་སློབ་དཔོན་ཆེན་པོ་པདྨས་བྱིན་གྱིས་རླབས་པའི་དཔལ་མོ་རྫོང་དྲུག་གོ། བྲག་དམར་སྤོ་མཐོན་སྐེད་ཕུག་ཉི་མ་རྫོང་སྟེ་རྫོང་ཆུང་གཉིས་སོ། །ཁྱད་པར་གྱི་གནས་ནི་ལ་ཕྱི་ཆུ་བར་ཏི་སེ་གསུམ་ཡིན་ནོ། །རྗེ་བཙུན་ཆེན་པོ་དེ་ལ་རས་པ་ཕ་བཞི་བུ་བརྒྱད་ལ་སོགས་སློབ་མ་མང་དུ་བྱུང་བའི་ཆེ་བཞི་ནི་གུང་ཐང་གཉན་ཆུང་རས་པ་ སྟག་མོའི་འབྲི་སྒོམ་རས་པ་ མདོ་བཀྲའི་སེ་བན་རས་པ། ལྕིམ་ལུང་གི་ངན་རྫོང་རས་པའོ། །ཆུང་བརྒྱད་ནི། རས་པ་ཞི་བ་འོད། རས་པ་སངས་རྒྱས་སྐྱབས། རས་པ་རྡོ་རྗེ་དབང་ཕྱུག། གཤིན་སྒོམ་རས་པ། རོང་ཆུང་རས་པ། མཁར་ཆུང་རས་པ། གཉེན་སྒོམ་རས་པ། ཁྱི་ར་རས་པ་བརྒྱད་དོ། །སྐུ་བགྲེས་པའི་སྲས་དྲུག་ནི། ལོ་སྐོར་འུ་པ། ལོ་སྟོན་དགེ་འདུན། སྐྱོ་སྟོན་ཤག་འགུ །དམ་པ་རྒྱག་ཕུ་བ། འབྲི་བན་བཀྲ་ཤིས། གཤིན་རྡོར་མོ་དང་དྲུག་གོ། ཉེ་བའི་སྲས་བཞི་ནི། རས་པ་བདེ་བ་སྐྱོང༌། རས་པ་རྩལ་ཡུལ་བ། གླན་བཙུན་རས་པ། ར་རྫི་རས་པ་དང་བཞིའོ། །སྲིང་བཞི་ནི། ལེགས་སེ་འབུམ། དཔལ་དར་འབུམ། གསལ་ལེ་འོད། རས་ཆུང་མ་དང་བཞིའོ། །དེ་རྣམས་ཀྱི་ནང་ནས་མཆོག་ཏུ་གྱུར་ཅིང༌། རྒྱུད་འཛིན་དམ་པ་མི་ཡི་འགྲོ་བ་འདུལ་བའི་མཆོག །དྭགས་པོ་རིན་པོ་ཆེ། མི་མ་ཡིན་གྱི་འགྲོ་བ་འདུལ་བའི་མཆོག་ཇོ་མོ་བཀྲ་ཤིས་ཚེ་རིང་མ། ཌཀྐི་མ་རྣམས་འདུལ་བའི་མཆོག། ལྷན་ཅིག་སྐྱེས་པའི་སྒྲོན་མ་སྟེ། འདི་གསུམ་མཆོག་ཏུ་གྱུར་པ་ཡིན་ནོ། གཞན་ཡང་ཇོ་རྡོར་སྒོམ་སྟག་ལ་སོགས་གྲུབ་ཐོབ་ཉི་ཤུ་རྩ་ལྔ། རས་པ་ཉེར་གཅིག །སྟོན་པ་བཅུ། རས་མ་བཅུ་གཉིས། ཁྱིམ་པའི་ཚུལ་གྱི་གྲུབ་ཐོབ་མ་དྲུག །ཐོ་བརྩམས་ཏེ་སླར་དད་ནས་གྲུབ་པ་ཐོབ་པའི་སློབ་མ་ལ་སོགས་དཔག་ཏུ་མེད་པ་བྱུང་ངོ༌། ། དྲུག་པ་མཉམ་མེད་དྭགས་པོ་རིན་པོ་ཆེའི་རྣམ་ཐར་ནི། དེ་ཡང་སྐུ་འཁྲུངས་ཡུལ་གཉལ་གྱི་སེ་བ་ལུང༌། གདུང་སྙི་བ། ཡབ་དབུ་གཙོ་རྒྱ་འབར། ཡུམ་ཤོ་རོམ་བཟའ་ཚེ་ལྕམ་གཉིས་ལ་སྲས་གསུམ་ཡོད་པའི་ཆེ་བ་བླ་མ་རིན་པོ་ཆེ། དེ་འོག་རྒྱ་པ་གསེར་རེ། ཆུང་བ་གྲགས་པ་སེང་གེ །རྒྱལ་པ་གསེར་རེ་ལ་སྲས་གསུམ་ཡོད་པའི་ཆེ་བ་སློབ་དཔོན་སྒོམ་པ། དེ་འོག་སྒོམ་ཆུང་ ཆུང་བ་གྲགས་མཛེས་སོ། གྲགས་པ་སེང་གེའི་སྲས་སློབ་དཔོན་ཇོ་སྲས་མཆེད་གཉིས་ཡིན་ལ། ཆེ་བ་བླ་མ་རིན་པོ་ཆེ་ངོ་མཚར་བའི་ལྟས་བཅས་མེ་ལུག་ལ་སྐུ་བལྟམས། སྐུ་གཟུགས་ཤིན་ཏུ་མཛེས་ཤིང་ཡིད་དུ་འོང་བ་ཞི་བ་དུལ་བ། ཤེས་རབ་ཤིན་ཏུ་ཆེ་བར་བཞུགས་པས་མཚན་སྙི་བ་ཀུན་དགའ་བྱ་བར་གསོལ། དགུང་ལོ་བཅུ་གཅིག་ལོན་ནས་གསོ་རིག་ལ་མཁས་པར་སྦྱངས། ཉེར་གཅིག་དུས་འཆིམ་ཇོ་སྲས་ཀྱི་བུ་མོ་ཁབ་ཏུ་བཞེས། སྲས་མིང་སྲིང་གཉིས་བྱུང་ཞིང་དར་རྒྱས་ལེགས་པོར་ཡོད་དུས་དེར། དགུང་ལོ་ཉེར་དྲུག་ལ་སྲས་ཤི་བའི་རོ་རིར་བསྐྱལ་ནས་ཚུར་ཕྱིན་པ་དང༌། སྲས་མོ་ཡང་དེར་ཤི། དེ་དང་མ་འགྱང་པར་ཇོ་མོ་ཡང་ལོ་ནད་སྟན་འབྱར་བྱུང་ནས་ཤི་བར་ཐག་ཆོད་རུང༌། ལྷ་རྗེ་གཟུགས་མཛེས་པར་ཆགས་ནས་ད་ཁྱེད་ཁྱིམ་བཟུང་ངམ་ཟེར་མཆི་མ་ཕྱུང༌། དེར་ལྷ་རྗེ་ཁྱིམ་མི་བཟུང་བར་རབ་ཏུ་བྱུང་ནས་ཆོས་བསྒྲུབ་པའི་ཁས་བླངས་པས་ཡིད་བདེ་ནས་ཤི། རྒྱུ་ནོར་རྣམས་དགེ་རྩར་བཏང་ནས་དགེ་བཤེས་ཤ་བ་གླིང་པར་རབ་བྱུང་བསྙེན་པར་རྫོགས་པར་མཛད། མཚན་བསོད་ནམས་རིན་ཆེན་དུ་བཏགས། བྱ་འདུལ་བ་འཛིན་པ་ལས་འདུལ་བ་ལ་སོགས་གསན། མང་ཡུལ་གྱི་བློ་ལྡན་ལས་ཕ་རྒྱུད་མ་རྒྱུད་ཀྱི་སྐོར་དང༌། ཟངས་དཀར་བ་ལས་བདེ་མཆོག་སྐོར་གསན། དྭགས་པོ་འདུལ་འཛིན་དང༌། དགེ་བཤེས་སྒྲེ་པ་སོགས་བརྟེན་ཅིང་མདོ་ཕྱོགས་དང༌། དབུ་རུ་སྟོད་ནས་དགེ་བཤེས་སྙུག་རུམ་པ་དང་རྒྱ་ལྕགས་རི་གོང་ཀ་བ་མང་ར་སྒོམ་བརྩོན་བྱ་ཡུལ་སོགས་ལས། སྐྱེས་བུ་གསུམ་གྱི་ལམ་རིམ་བྱང་ཆུབ་སེམས་ཀྱི་གདམས་པ་སོགས་བཀའ་གདམས་པའི་ཆོས་རྣམས་རྫོགས་པར་གསན། སྒྲོ་འདོགས་ཆོད་པར་མཛད་ནས་ད་ནི་སྒྲུབ་པ་ལ་བརྩོན་དགོས་སྙམ་ནས་ཕ་མེས་ཀྱི་བཞེངས་པའི་སེར་ཀ་བྱ་བའི་གཙུག་ལག་ཏུ་སྒྲུབ་པ་མཛད། ཏིང་ངེ་འཛིན་བཟང་པོ་སྐྱེས། ས་བཅུ་པའི་སྔ་ལྟས་རྨི་ལམ་དུ་ཤེས། སྐུ་ལ་ཤིག་སྲོ་མེད། དེ་ནས་ནམ་ཟླ་དཔྱིད་ཀར་ལྕགས་རིའི་ལྷོ་ཕྱོགས་སུ་སྐྱོ་བསངས་ལ་བྱོན་ནས། ཐུགས་ཏིང་ངེ་འཛིན་དང་ཕྱག་གིས་ཡི་དྭགས་ཆུ་སྦྱིན་མཛད་ནས་བཞུགས་པར། སྤྲང་པོ་གསུམ་གྱིས་ཤིག་སྲོ་འཐུ་བཞིན་ཡོད་པ་ལས། སྤྲང་པོ་གཅིག་ན་རེ། འོ་སྐོལ་བསོད་ནམས་ཆུང་བ་ལ་རྩོལ་བ་མི་དགོས་པར་ཟན་རྡོག་ཆེ་བ་རེ་དང་ལོ་ཚོད་ཕོར་པ་རེ་འཐུང་རྒྱུ་ཡོད་ན་ལྟ་ཅི་ཟེར། གཅིག་ན་རེ། དེ་འདྲ་ལ་ཡིད་སྨོན་མ་བྱེད་མངའ་བདག་རྩེ་ལྡེ་བ་འདྲ་བ་རེ་ཡིན་ན་དགའ་མོད་ཟེར། གཅིག་ན་རེ། མངའ་བདག་རྩེ་ལྡེ་་བ་ལ་འཆི་བ་ཡོད། མི་ལ་རས་པ་འདྲ་བའི་གྲུབ་ཐོབ་ལུས་ལ་གོས་མི་དགོས་ཤིང་ཁ་ལ་ཟས་མི་དགོས་པ། ཟས་མེད་ན་མཁའ་འགྲོས་བདུད་རྩི་འདྲེན། སེང་གེ་ལ་ཆིབས་ནས་ནམ་མཁའ་ལ་འཕུར་འགྲོ་བ་དེ་ལྟརཡིན་ན་དགའ་མོད་ཟེར། དེར་བླ་མ་རིན་པོ་ཆེའི་མཚན་ཐོས་པ་ཙམ་གྱིས་ལུས་བ་སྤུ་ཟིང༌། མིག་མཆི་མ་འཁྲུགས་ཏེ་འགྲོ་རྒྱུ་མ་བྱུང༌། དེ་ནས་བྲང་ཁང་དུ་ཡན་ལག་བདུན་པ་འབུལ་བ་ལ་འཕྲོ་སྟོར་བཞིན་སོང༌། །ང་ཅི་རེད་འདུག་སྙམ། འཇིག་རྟེན་ཁམས་ཐམས་ཅད་ཡིད་ཡུལ་དུ་ཤར་བའམ། སེམས་ཅན་ཐམས་ཅད་ཀྱི་སེམས་ཤེས་པ་སྙམས་བྱེད་དེ། དགོངས་ཐུན་ཁར་སྤྲང་པོ་དེར་འདྲི་བར་ཕྱིན་པས་སྤྲང་པོ་རྣམས་མགྲོན་ཁང་ཞིག་ཏུ་ཉལ་འདུག །ད་ནང་ཁྱོད་ཀྱི་གླེང་བའི་བླ་མ་དེ་གར་བཞུགས། དེའི་བླ་མ་དེ་གང་ཡིན། གདམས་ངག་ཅི་གནང༌། ས་ཆ་གར་ཡོད་ཅེས་དྲིས་པར༌། བླ་མ་གུང་ཐང་མི་ལ་རས་པ་ཡིན། གོང་མ་མར་པ་ལོ་ཙཱ། དེའི་བླ་མ་ནཱ་རོ་པ་ཡིན་ཟེར། གདམས་ངག་ནཱ་རོའི་ཆོས་དྲུག་དང་དགྱེས་རྡོར་གྱི་གདམས་པ་གནང་ཟེར། མི་རྣམས་ཀྱིས་མཇལ་སྐབས་མཐོང་སྣང་སྣ་ཚོགས་སུ་མཐོང་ཟེར། ཁོང་གྲགས་པ་ཆེ་བས་དྲིས་ནས་སོང་དང་ཤེས་ནི་འོང་ཟེར། དེ་ནས་དཀོན་མཆོག་ལ་མཆོད་པ་བྱས། གསོལ་བ་བཏབ་ནས་ཉལ་བའི་རྨི་ལམ་ལ་རག་དུང་ཞིག་བུས་པས་འཛམ་བུའི་གླིང་དུ་ཐོས་པ་རྨིས། དེང་སང་རག་དུང་འདི་འདྲ་བ་དབུས་གཙང་གཉིས་ན་མེད་བྱས་རྨིས། གཞན་ཡང་རྔ་བོ་ཆེ་སོགས་ལྟས་མི་འདྲ་བ་བཟང་བར་རྨིས། དེ་ནས་ཞིང་བཟང་པོ་ཞིག་ཡོད་པ་གསེར་སྲང་དོ་ལ་བཙོང༌། ལྕགས་རི་བ་སོགས་དགེ་བའི་བཤེས་གཉེན་རྣམས་མཇལ་ནས་ཞུས་པས་བཀས་གནང༌། འོན་ཀྱང་རྟགས་མ་བྲལ་བར་ཤོག་ཟངས་ངས་བརྡུང་ཟངས་སྐད་མིས་འདོན་པ་ཞིག་འདུག་སྟེ་ཐབས་མེད་གསུངས། དེ་ནས་ས་མོ་གླང་གི་ལོ་ལ་བོང་ཚུགས་ཀྱི་ཟླ་བ་ཕྱེད་གཉིས་ཀྱི་ས་བཅད་ནས་ཞག་བཞི་བཅུས་ཚོང་དུས་མགུར་མོར་ཕྱིན། དེ་ནས་མགོ་ཡམས་བྱ་བའི་སྙུན་དྲག་པོ་གཅིག་བྱུང་ནས་ཉིན་ཞག་བདུན་དུ་ལུས་པ་ལས། རྗེ་བཙུན་བཞུགས་པའི་གངས་དེ་ལ་བལྟ་ཞིང་གསོལ་བ་བཏབ་པས་བསྙུང་དེ་ལས་གྲོལ་བར་གྱུར། དེ་ནས་སྤྲོ་བདེ་བཀྲ་ཤིས་སྒང་དུ་བྱོན་ནས་དེར་བཞུགས། ཕྱི་དེའི་ནང་པར་བུད་མེད་རྒན་མོས་ལོ་རྒྱུས་བཤད་པས་ཐུགས་རྒྱལ་ཅུང་བཞེས་པས་མཇལ་ཁ་མ་བྱུང༌། བླ་མར་གསོལབ་བཏབ་ནས་བཞུགས་པས་ཉིན་གཅིག་བླ་མའི་མདུན་དུ་ཤོག་གསུངས། དེར་བླ་མ་ཕ་བོང་ཞིག་གི་སྟེང་དུ་བཞུགས་ཤིང་རས་པ་རྣམས་ཀྱི་བསྐོར་ནས་འདུག །དེར་ཕྱག་འཚལ་ཞིང་གསེར་སྲང་གང་དང་ཇ་ཟི་བོལ་གཅིག་ཕྱག་རྟེན་བྱས་པ་ལ། གསེར་དང་བན་རྒན་བློ་མི་མཐུན། ཇ་ལ་བསྐོལ་བའི་ཐབ་ཁ་མེད། ཁྱེད་རང་བསྒྲུབ་པའི་ཆ་རྐྱེན་གྱིས་གསུངས་ནས་མ་བཞེས། ཆང་ཐོད་ཕོར་གང་གསོལ་འཕྲོ་གདའ་བ་གནང་བས། རྟེན་དགེ་སློང་ཡིན་པ་དང་སྐུ་འཁོར་མང་བས་ལེན་མ་ནུས་པ་ལ། རྣམ་རྟོག་མ་མང་འཐུང་གསུངས། དེར་ལྷག་མ་མ་ལུས་པར་འཐུང་བས། བརྒྱུད་པ་ཟིན་ཅིང་གདམས་ངག་མ་ལུས་པའི་སྣོད་དུ་གྱུར་པར་མཁྱེན་ཏེ། དེ་ནས་ཕ་བོང་གཅིག་གི་འོག་དེར་འཁན་པ་དང༌། རི་ཤོ་ཁོག་མོ་དང༌། ཤང་ཤིང་རྣམས་བསྡུས་ནས་ཕྱེད་སྤྱིལ་བ་བྱས། ཡོན་བདག་མོ་དཀོན་འབར་དང༌། འབར་སེང་གཉིས་ལ་གསེར་ཞོ་རེ་གཙོང་བའི་རིན་ཕྱེ་བླང་ནས་ཁྲིད་ཞུས། བླ་མའི་ཞལ་ནས། ཁྱེད་ལ་དབང་བསྐུར་གྱི་བཀའ་ཡོད་དམ་གསུངས། དགེ་བཤེས་མང་ཡུལ་བློ་ལྡན་ཤེས་རབ་ལས་གསང་འདུས་ཀྱི་དབང་བཞི་རྫོགས་པར་ཞུས། དགྱེས་རྡོར་གྱི་དབང་ལན་གཉིས། བདག་མེད་མའི་བྱིན་རླབས་དང་གསུམ། ཇོ་བོ་ལུ་ཧི་པའི་བཀའ་བབས་རིན་ཆེན་རྒྱན་དྲུག་མའི་བྱིན་རླབས་དང༌། གཞན་ཡང་བླ་མ་མང་པོ་ལས་དབང་བསྐུར་མང་དུ་ཐོབ། ང་ལ་ཞག་བཅུ་གསུམ་དུ་མི་འཆོར་བའི་ཏིང་ངེ་འཛིན་བཟང་པོ་ཡོད་ཞུས་པས། ཧ་ཧ་གསུང་ཞིང་གད་མོ་ཆེན་པོ་གཅིག་མཛད་ནས༌། བྱེ་མ་བཙེར་བ་ལ་མར་ཁུ་མི་འོང༌། ཡུངས་ཀར་བཙེར་བ་ལ་མར་ཁུ་འོང་བ་ཡིན། དེ་འདྲ་ལ་དགོས་པ་མེད། ང་ཡི་གཏུམ་མོ་ཨ་ཐུང་གི་སྲོག་རྩོལ་འདི་སྒོམ་དང༌། སང་ད་བཟོད་སེམས་ཀྱི་ངོ་བོ་མཐོང་ནས་འོང་གི་ཐབས་ལམ་སྒོམས་ཤིག་གསུངས། དེ་ནས་བླ་མ་ལྷ་རྗེ་ལ་རྨི་ལམ་གྱི་ལྟས་བྱུང་བའི་དོན་མགུར་དུ་ཞུས་པ། །མདངས་སུམ་གཉིད་ཀྱི་རྨི་ལམ་ན། །ཡ་ཀི་སྤྱི་བོའི་གཙུག་རུམ་ན། །གཡུ་འབྲུག་སྔོན་མོ་འཁྱིལ་བ་རྨིས། །གཡུ་ཡི་ན་བུན་འཐིབས་པ་རྨིས། །དུང་གི་ཁུ་འཕང་བབས་པ་རྨིས། །གཡས་སུ་ཁྱུང་ཞིག་ལྡིང་བ་རྨིས། །གཡོན་དུ་རྒོད་ཅིག་འཁོར་བ་རྨིས། །དཔྲལ་བར་ཉི་མ་ཤར་བ་རྨིས། །གལ་ཏ་འཕྲག་ལ་བཀལ་བ་རྨིས། །གླང་དཀར་ཕྱག་ན་བསྣམས་པ་རྨིས། །རྒྱབ་ཏུ་དགྲ་ལྔ་བསད་པ་རྨིས། །མདུན་དུ་ཆུ་མིག་བརྡོལ་བ་རྨིས། །འོག་ན་སེང་གེ་ཞོན་པ་རྨིས། ཞེས་ཞུས་པས། བླ་མའི་ཞལ་ནས། ཨེ་མ་སྐལ་ལྡན་ལས་འཕྲོ་ཅན། །རྨི་ལམ་མི་ངན་རྨི་ལམ་བཟང༌། །སྐྱེས་བུ་ལས་དང་སྐལ་པར་ལྡན། །ཡ་ཀི་སྤྱི་བོའི་གཙུག་རུམ་ནས། །གཡུ་འབྲུག་སྔོན་མོ་འཁྱིལ་བ་དེ། །བླ་མ་རྗེ་བཙུན་བཞུགས་པ་ཡིན། །གཡུ་ཡི་ན་བུན་འཐིབ་པ་དེ། །སངས་རྒྱས་ཞིང་ཁམས་སླེབས་པ་ཡིན། །དུང་གི་ཁུ་འཕང་འབབ་པ་དེ༌། །ཉོན་མོངས་ཐ་བ་སྤང་པ་ཡིན། །གཡས་ན་ཁྱུང་ཅིག་ལྡིང་བ་དེ། །དཔའ་བོ་དཔའ་མོ་འཁོར་བ་ཡིན། །གཡོན་ན་རྒོད་ཅིག་ལྡིང་བ་དེ། །རིག་འཛིན་ཕོ་མོ་འཁོར་བ་ཡིན། །དཔྲལ་བར་ཉི་མ་ཤར་བ་དེ། །འཕགས་པའི་སྤྱན་གྱིསགཟིགས་པ་ཡིན། །གལ་ཏ་ཕྲག་ལ་བཀལ་བ་དེ། །ཐབས་ཤེས་ཟུང་དུ་འབྲེལ་བ་ཡིན། །གླང་དཀར་ཕྱག་ན་བསྣམས་པ་དེ། །བག་ཆགས་དབྱུགས་པས་དེད་པ་ཡིན། །རྒྱབ་ཏུ་དགྲ་ལྔ་བསད་པ་དེ། །དུག་ལྔ་རྩད་ནས་བཅད་པ་ཡིན། །མདུན་དུ་ཆུ་མིག་བརྡོལ་བ་དེ། །རྣལ་འབྱོརབསོད་ནམས་སྐྱེས་པ་ཡིན། །འོག་ན་སེང་གེ་ཞོན་པ་དེ། །བདུད་བཞི་ཟིལ་གྱིས་མནན་པ་ཡིན། །ཅེས་གསུངས་སོ། །དེ་ནས་རྗེ་བཙུན་བལ་ཡུལ་དུ་འབྱོན་གསུངས་པས། འཁོར་རྣམས་བལ་ཡུལ་དུ་ཚད་པ་ཡོད་ཟེར་ནས་སེམས་ནད་བྱེད་ཅིང་འདུག །ཁོ་བོ་ནི་ཚད་པས་ཤི་ཡང་ཆགས་ཕྱིར་འགྲོ་དགོས་སྙམས་པ་ལ། བྲིན་ནས་བླ་མ་འབྱོན་པར་ཐོས་ནས་ཕྱར་བ་ཆེན་པོ་བཏང་ཞིང་ཕྱག་རྟེན་གསེར་ཞོ་གསུམ་དང་འབྲས་མང་པོ་སྤུངས་ཡང་མ་བཞེས་ཏེ། དེའི་ནང་པར་བྱོན་ཏེ་བྲག་རྩ་གཅིག་ཏུ་བཞུགས་པས། བུད་མེད་གོས་ནག་པོ་གྱོན་ཞིང་བོང་རིང་བ་ངམ་ནག་པ་མིག་རྩ་དམར་བ་གཅིག་བླ་མའི་ཞལ་ལ་འབྲུ་ཚུགས་སུ་བལྟས་ཏེ། འགྲོ་བ་གར་འགྲོ་གཏོང་མཁན་སུ་ཡིན་ཟེར། དེའི་ནུབ་མོ་ནས་ཐུགས་འགྱུར་ཞིང་མ་བྱོན། བུད་མེད་དེ་ཡང་མཁའ་འགྲོ་མར་འདུག་གསུངས། དེ་ནས་སྨན་ལུང་དུ་བཞུགས་ཏེ་ཆོས་ཞུས་པ་ལ། སྔར་དབང་བསྐུར་རྣམས་ཀྱིས་གོ་མི་ཆོད་པ་མིན་ཏེ། རྟེན་འབྲེལ་ཡིན་པས་ང་རང་གི་ལུགས་ཀྱི་བྱིན་རླབས་ཆུང་ངུ་གཅིག་བྱ་དགོས་གསུངས་ནས། སིན་དྷུ་རའི་དལ་ལ་བརྟེན་ནས་བསྙན་རྒྱུད་ཀྱི་བྱིན་རླབས་མཛད་དོ། །དེ་ནས་རྗེ་བཙུན་གྱི་སྤྱན་སྔར་གསུང་གླེང་ཁོ་ཐག་ཆོད་པ་གཅིག་བྱ་དགོས་བསམ་ནས་སྤྱན་སྔར་བྱོན། དེར་བླ་མ་ལ་ཚོགས་བསགས་པའི་སྟོབས་གང་ཆེ་ཞུས་པར་བླ་མས་བདག་གིས་དགེ་བཤེས་རྒྱ་ལ་ཞུས་པས་ཁོ་ན་རེ། གསང་འདུས་དང་རྡོ་རྗེ་གདན་བཞི་རྣམས་ལས། དུས་གསུམ་སངས་རྒྱས་མཆོད་པ་ལས། སློབ་དཔོན་བ་སྤུ་ཁུང་བུ་མཆོད། ཅེས་གསུང་པ་བཞིན། དུས་གསུམ་གྱི་སངས་རྒྱས་ཐམས་ཅད་ལ་རིན་པོ་ཆེའི་ཕུང་པོ་རི་རབ་ཙམ་ཕུལ་བ་བས། བླ་མའི་བ་སྤུའི་ཁུང་བུ་གཅིག་མཆོད་པ་བསོད་ནམས་ཆེ་གསུངས། དེ་ལས་ལྷག་པའི་ཚོགས་བསོགས་ཐབས་ཡོད་དམ་ཞུས་པས་ཡོད་གསུངས། དེ་གང་ལགས་ཞུས་པས། བླ་མས་བསྟན་པའི་གདམས་ངག་དེ་ཆུད་ཟོས་མེད་པར་ཉམས་སུ་བླང་ན་དེ་ཀ་ཡིན་གསུངས། བདག་གི་དགེ་བཤེས་སྙུག་རུམ་པ་ལ་ཚེ་གཅིག་ལུས་གཅིག་ལ་སངས་རྒྱས་སྲིད་དམ་ཞུས་པས། ཚེ་འདི་ལ་ལྟོས་པ་སྤུ་ཙམ་མེད་པ་ཞིག་དགོས་གསུངས། དགེ་བཤེས་ཡར་ལུང་པ་ལ་ཞུས་པས་གསུངས་དེ་ངེས་པ་ཅན་མིན། དགོངས་པ་ཅན་ཡིན། སྨན་རིལ་བུ་འགྲུབ་པ། ཚེ་ཉི་ཟླ་དང་མཉམ་པ། སྐྱེ་བ་བདུན་པ། ཡི་དམ་ལྷ་ཡི་ཞལ་མཐོང་བ། མཁའ་སྤྱོད་དུ་འགྲོ་ནུས་པ་ཞིག་དགོས་གསུངས། དེ་ལྟར་ལགས་སམ་ཞུས་པས། གསུངས་དེ་དགོངས་པ་ཅན་མིན། ངེས་པ་ཅན་ཡིན། ཚེ་འདི་ལ་ལྟོས་པ་མེད་པ་གཅིག་གིས། བླ་མ་མཚན་ཉིད་དང་ལྡན་པ་གཅིག་ལ་སློབ་མ་སྣོད་དང་ལྡན་པ་གཅིག་གིས། གསང་སྔགས་ཀྱི་དཀྱིལ་འཁོར་དུ་དབང་རྫོགས་པར་ཞུས་ནས། བསྐྱེད་རྫོགས་ཀྱི་གདམས་ངག་བར་མ་ཆད་པར་བསྒོམས་པས། རབ་ཚེ་འདིར་སངས་རྒྱས། འབྲིང་འཆི་ཀའམ་བར་དོར། ཐ་མ་ཡང་སྐྱེ་བ་བདུན་ནམ་བཅུ་དྲུག་ཚུན་ལ་འགྲུབ། དེས་མ་གྲུབ་ན་དམ་ཚིག་ལ་སེལ་ཡོད་པ་ཡིན་ཏེ་རེ་ཤིག་ངན་སོང་དུ་སྐྱེ་དོགས་ཡོད། ལར་ལྷ་རྗེ་སྟོན་པ་ཁྱེད་ལྟ་བ་ཁ་ལྟ་ལ་བསྐུར་བའི་མི་དང་བློ་མ་བསྟུན། དེའི་ངག་ལ་མ་ཉན། རྗེས་སུ་མ་འབྲང༌། བསྒོམ་པ་ཉམས་སུ་ལེན་པའི་མི་དང་བློ་བསྟུན། དེའི་ངག་ལ་ཉོན། རྗེས་སུ་འབྲངས་དགོས་པ་ཡིན། གྲོས་ཕུག་ཐམས་ཅད་ཚེ་འདི་བློས་བཏང་བའི་སྐྱེས་བུ་དམ་པ་རྣམས་ལ་བྱེད་དགོས། ཚེ་འདིས་མིག་ཁྲིད་པའི་གང་ཟག་འགའ་ཞིག་གིས་ཆོས་བརྒྱད་སློབ་དུ་འོང་བ་ཡིན། ལར་སྟོང་པ་ཉིད་ལ་ཤོར་ས་ཡོད་པ་ཡིན་ཏེ། སྟོང་ཉིད་རྒྱས་འདེབས་སུ་ཤོར་བ་དང༌། ཤེས་བྱའི་གཤིས་ལ་ཤོར་བ་དང༌། གཉེན་པོར་ཤོར་བ་དང། ཆགས་པར་ཤོར་བ་དང༌། བཞི་ཡིན་ཏེ། སྟོང་ཉིད་རྒྱས་འདེབས་སུ་ཤོར་བ་ནི་འདི་ལྟར་བཟུང་བ་དང༌། འཛིན་པ་བློ་ཡུལ་དུ་བྱུང་བའི་ཆོས་ཐམས་ཅད་སྟོང་པ་ཉིད་ཟེར་བ་ཡིན། སྟོང་ཉིད་ཤེས་བྱའི་གཤིས་ལ་ཤོར་བ་བྱ་བ། འདི་ལྟར་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་སྟོང་པ་ཡིན་ཟེར་བ་ཡོད། སྟོང་ཉིད་གཉེན་པོར་ཤོར་བ་བྱ་བ་ཉོན་མོངས་པ་སྣ་ཚོགས་གང་སྐྱེས་ལ་བལྟས་པས་དེ་ཀ་སྟོང་པ་ཡིན་མོད་ཟེར་བ་ཡིན། སྟོང་ཉིད་ཆགས་པར་ཤོར་བ་བྱ་བ་ལ་སྒོམ་རྒྱུ་མེད་ཅིང་སྒོམ་ཐམས་ཅད་སྟོང་པ་ཡིན་མོད་ཟེར་བ་ཡོད། དེ་རྣམས་ཡང་དག་པ་མ་ཡིན། འོན་ཀྱང་ལས་དང་པོ་པ་བློའི་བདེན་ཞེན་བཟློག་པ་ལ་ཕན་དུ་རུང་ཙམ་ཡིན། ལར་སེམས་ཀྱི་གཞི་རྩ་མ་ཆོད་ན། བདེ་གསལ་མི་རྟོག་གསུམ་གྱི་ཉམས་ཡོད་ཀྱང་སྲིད་པ་གསུམ་ལས་མ་འདས། རྩ་བ་མ་ཆོད་པའི་ཉམས་བྱ་བ་ཡིན། འོ་ན་ཡང་དག་པའི་ཉམས་གང་ཡིན་ན། བླ་མ་མཚན་ཉིད་དང་ལྡན་པ་གཅིག་གིས། སློབ་མ་སྣོད་དང་ལྡན་པ་གཅིག་ལ་ངོ་སྤྲོད་དེ་ཁྲིད་པས། གཉུག་མའི་ཤེས་པ་དེ་སེམས་ཅན་ཐམས་ཅད་ལ་ཁྱབ་པར་གནས། སངས་རྒྱས་ཐམས་ཅད་ལ་ཆོས་སྐུའི་སྣང་བ་གསལ། རྣལ་འབྱོར་པས་ཐབས་དཔག་ཏུ་མེད་པའི་སྒོ་ནས་བསྒོམས་པས། ལྟ་བ་ཤུགས་ཀྱི་རྟོགས། ཉོན་མོངས་པ་ངང་གིས་འགགས་རྣམ་རྟོག་རང་ཤུགས་ཀྱིས་ཆོད། ཡེ་ཤེས་ཤུགས་ལ་འཆར། དེའི་དུས་ཉམས་སུ་མྱོང་བའི་རྟོགས་པ་དེ་ངག་ཏུ་སྨྲར་མི་བཏུབ། དཔེར་ན་གཞོན་ནུའི་བདེ་བའམ། ལྐུགས་པའི་རྨི་ལམ་བཞིན་ཏེ་གཞི་དེ་ནིསེམས་ཅན་ཀུན་ལ་ཡོད་ཀྱང་ངོ་མ་ཤེས། དེས་ན་བརྒྱུད་ལྡན་གྱི་བླ་མ་བསྟེན་པ་གལ་ཆེ། དེ་བས་གཉུག་མའི་ཤེས་པ་དེ་ཕུག་གར་ཡང་མ་གཏད་སྒོ་གར་ཡང་མ་འགགས་དཔེ་གང་གིས་ཀྱང་མཚོན་པར་མི་ནུས། བརྗོད་པ་གང་གིས་ཀྱང་ཐོག་ཏུ་མི་ཕེབ། ཐ་སྙད་གང་གིས་ཀྱང་མཚོན་པར་མི་ནུས། དེས་ན་བཅས་བཅོས་མི་བྱ། རང་གར་མ་བཅོས་པའི་ངང་ལ་ལྷོད་དེ་ཞོག་དང༌། གསུངས་ནས་མགུརའདི་གསུངས་པ། ལྟ་བ་ཡིན་པར་ངེས་ཀྱི་རང་གི་སེམས་ལ་ལྟོས། ཞེས་སོགས་གསུངས་སོ། །ཕྱི་དེའི་ནང་པར་སེ་བན་སྟོན་ཆུང་འབོད་དུ་བྱུང་བས། དབུས་པ་སྟོན་པ་ཁྱེད་རྗེ་བཙུན་གྱི་སྤྱན་སྔར་ཤོག་གསུངས་ཟེར་བས། རྗེ་བཙུན་གྱི་སྤྱན་སྔར་བྱོན་ནས་ཕྱག་འཚལ་ཞིང་ཡོད་པ་ལ། རྗེ་བཙུན་ཞལ་འཛུམ་པ་མཛད་ནས། དབུས་པ་སྟོན་པ་ཁྱོད་ཆོས་གཤའ་མ་གཅིག་བྱེད་བསམ་ན། ཡོན་ཏན་འཚོང་བ་དང་དགེ་སྦྱོར་བྱེད་པ་གཉིས་རྒྱབ་བསྣོལ་ཡིན་པས། སྟོན་བྲིན་དང་སྙེ་ནམ་དུ་བསོད་སྙོམས་གྱིས་ལ་ནུབ་མོ་གྲོང་གསེབ་ཏུ་མ་བསྡད་པར་སྤྲོ་བདེ་ཕུག་ཏུ་དགེ་སྦྱོར་ལ་བསྙེགས་གསུངས། རྗེ་བཙུན་མད་དགོངས་ནས་བསོད་སྙོམས་མཛད་དོ། །དེ་ནས་གཏུམ་མོའི་ཁྲིད་ཞུས་ནས་བསྒོམ་པས་བདེ་དྲོད་རང་འབར་ལ་སོང༌། ཞག་བདུན་གྱི་ནང་པར་རྒྱལ་བ་རིགས་ལྔའི་ཞལ་མཐོང༌། བླ་མར་ཞུས་པས་འབྱུང་ལྔའི་རླུང་ཟིན་པ་ཡིན་གསུངས། ཡང་བསྒོམས་པས་སྟོང་གསུམ་འདི་འཁོར་ལོ་བཞིན་འཁོར་ནས་འདུག་པས་སྟོང་སྐྱུག་བྱས་ནས་བརྒྱལ་ཞུས་པས། རོ་རྐྱང་གཉིས་རླུང་དྷུ་ཏིར་འཇུག་པ་ཡིན་གསུངས། ཡང་བསྒོམས་པས་ཉིན་གཅིག་ཐུགས་རྗེ་ཆེན་པོས་ཐེམ་མེར་གང་བ་ལ་དབུ་ཡི་སྟེང་ན་ཟླ་དཀྱིལ་རེ་འདུག་པ་མཐོང་ཞུས་པས། སྤྱི་བོ་བདེ་ཆེན་འཁོར་ལོ་ཐིག་ལེའི་གང་བ་ཡིན་གསུངས། ཡང་བསྒོམས་པས་དམྱལ་བ་ཐིག་ནག་མཐོང་བས་སྙིང་འཚང་ཞུས་པས་གྱེན་རྒྱུའི་རླུང་ཟིན་པ་ཡིན་གསུངས། ཡང་བསྒོམས་པས་འདོད་ལྷ་རྣམས་རིགས་དྲུག་གི་ལྷ་རྣམས་རིམ་པར་བདུད་རྩི་འབེབས་པ་མཐོང་ཞུས་པས་མགྲིན་པ་ལོངས་སྤྱོད་འཁོར་ལོ་ཐིག་ལེས་གང་བ་ཡིན་གསུངས། ཡང་བསྒོམས་པས་ལུས་འཕར་འདར་གཡོ་བ་དང་ངག་རྒོད་པ་དང་ཀུ་འདེབས་འདོད་པ་བྱུང་བ་ཞུས་པས། སྙིང་ག་ཆོས་ཀྱི་འཁོར་ལོ་ཐིག་ལེས་གང་བ་ཡིན་གསུངས། ཡང་བསྒོམས་པས་ཉིན་གཅིག་ཉི་ཟླ་གཉིས་གཟས་ཟིན་པ་མཐོང་ཞུས་པས། དྷུ་ཏིར་རོ་རྐྱང་གཉིས་ཀྱི་རླུང་ཚུད་པ་ཡིན། ལར་དེ་རྣམས་སྐྱོན་དང་ཡོན་ཏན་གང་ཡང་མིན། ཕོ་རྒོད་རབ་ཏུ་འདུག །ད་ནི་ད་ནི་བྱ་བ་ལན་གསུམ་གསུངས་པས། དྲག་ཏུ་བསྒོམས་པས་ཟླ་བ་གཅིག་ནས། དགྱེས་རྡོར་དམར་པོའི་དཀྱིལ་འཁོར་ཞིག་མཐོང་བས། ད་ནི་གསུངས་པས་ཡི་དམ་གྱི་ལྷ་ཡིན་བསམ་ཞུས་པས། སྙིང་ག་ཆོས་ཀྱི་འཁོརལོ་མ་ལས་ཐོབ་པའི་རཀྟ་བརྟན་པ་ཡིན་གསུངས། ཡང་བསྒོམས་པས་བདེ་མཆོག་ལུ་ཧི་པའི་ཀེང་རུས་ཀྱི་དཀྱིལ་འཁོར་ཞིག་མཐོང་ཞུས་པས་ལྟེ་བ་སྤྲུལ་པའི་འཁོར་ལོ་ཐིག་ལེས་གང་བ་ཡིན་གསུངས། ཡང་བསྒོམས་པས་འཆར་སྒོ་སྣ་ཚོགས་ལ་གེགས་སེལ་བོག་འདོན་གྱི་རིམ་པ་འགའ་ཞིག་མཛད། དེ་ནས་སྲོད་ལ་ཡི་དམ་གྱི་ལྷ་བསྒོམས་བཟླས་པ་བྱས། གུང་ལ་བླ་མའི་རྣལ་འབྱོར་བསྒོམས། ཐོ་རངས་སྲོག་རྩོལ་གྱི་རླུང་ལ་འབད། ནངས་པར་སྐྱ་རེངས་ཤར་བ་ན་གཉིད་ཐུན་ཕྲན་ཙམ་སོང་བར་སྔར་འདྲིས་བག་ཆགས་མེད་པའི་རྨི་ལམ་གྱི་མཚན་ལྟས་ཉེར་བཞི་བྱུང་བས་ལྟས་དགེ་མི་དགེ་སྙམས་ནས་རྟོག་པ་ཞིག་སྐྱེས། ཡང་བླ་མ་སངས་རྒྱས་མངོན་སུམ་དུ་བཞུགས་པ་ལ་ཞུས་པས་ཆོག་དགོངས་ནས་ཚ་བ་མ་བསྐོལ་བར་དེ་གར་བཞེངས་ནས་བྱོན། རྗེ་ བཙུན་ཆུ་བར་བྲག་རྩ་ན་བཞུགས་པ་དང་མཇལ། ཕྱག་འཚལ་མཎྜལ་ཕུལ་ནས་ཞུས་པ༌། བདག་ལ་སྔར་འདྲིས་བག་ཆགས་མེད་པའི་རྨི་ལྟས་ཉེར་བཞི་བྱུང་བ་དེ་རྣམས་དགེ་མི་དགེ་ཇི་ལྟར་ལགས་ཞུས་པའི་མགུར་ཕུལ་བ། རྗེ་བརྟུལ་ཞུགས་སྤྱོད་པའི་རྣལ་འབྱོར་པ། ཞེས་སོགས་ཕུལ་བས། བུ་ལྷ་རྗེ་སྟོན་པ་ཐུགས་མི་བདེ་མི་འཚལ། ཤེས་པ་གློད་ལ་ཞོག །ང་རྨི་ལམ་གྱི་ཆོས་ཉིད་ཁུང་དུ་ཆོད་པ་ཡིན། ད་རེས་བུ་ཁྱོད་ཀྱི་རྨི་ལྟས་དེ་རྣམས་དོན་ངོ་སྤྲོད་པས་ཐུགས་མ་ཡེངས་པར་གསན་འཚལ། གླུ་དྲིན་ལན་འཇལ་ལོ་ལྷ་རྗེ་བ། སོགས་ཀྱི་མགུར་གསུངས། ལར་རྨི་ལམ་དང་རྟགས་མཚན་ལ་མངོན་ཞེན་མ་ཆེ། བདུད་འཇུག་པའི་ཆོས་ཡིན་ཞེས་གསུངས། ཚོགས་པ་སྐྱོང་བའི་དུས་ནམ་ཡིན་ཞུས་པས། ཅི་ཞིག་ན་ད་ལྟ་དང་མི་འདྲ་བའི་རྟོགས་པ་ཞིག་སྐྱེ་ལ། ཕ་རྒན་ང་ལ་སངས་རྒྱས་དངོས་ཀྱི་འདུ་ཤེས་སྐྱེ་བ་ཞིག་ཡོངས་བས་དེ་དུས་ཚོགས་པ་སྐྱོངས་ཤིག །ད་ནི་འདི་ནས་ཤར་གྱི་ཕྱོགས་ན། སྒམ་པོ་གདར་གྱི་རི་བོ་རྒྱལ་པོ་གདན་ལ་བཞུགས་པ་ལྟ་བུ། རྩེ་མོ་རིན་ཆེན་པྲོག་ཞུ་ལྟ་བུ། རྩེ་མོ་ལྔ་རུ་ཡོད་པ། ང་ཡི་ཞྭ་འདི་ལྟ་བུ། སྤང་ཐང་གསེར་གྱི་མཎྜལ་བཀོད་པ་ལྟ་བུ་མདུན་རི་རིན་ཆེན་སྤུང་པ་འདྲ་བ། རྒྱབ་རི་དར་དཀར་ཕྱར་བ་ལྟ་བུ། རི་བདུན་བློན་པོ་ཕྱག་འཚལ་བ་ལྟ་བུ། དེའི་མགུལ་ན་ཁྱོད་ཀྱི་གདུལ་བྱ་ཡོད་པས་དེར་སོང་འགྲོ་བ་སེམས་ཅན་གྱི་དོན་གྱིས་ཤིག་གསུངས་ནས་མགུར་འདི་གསུངས་སོ། །བུ་སྟོན་པ་དབུས་སུ་བཞུད་མི་བཞུད། ཅེས་པ་ལ་སོགས་མགུར་མང་དུ་གསུངས་ནས། ཁྱོད་ཀྱི་མིང་ལ་དགེ་སློང་རྡོ་རྗེ་འཛིན་པ་འཛམ་གླིང་གྲགས་པ་བྱ་བ་ཡིན་ནོ་གསུངས། དེ་ནས་དབང་དང་བྱིན་རླབས་མཛད་ནས་ཆོས་ཐམས་ཅད་རྫོགས་པར་གནང་ཞིང༌། ད་ཡུལ་དུ་སོང་དང་ང་བས་ཀྱང་འགྲོ་དོན་ཆེ་བ་གཅིག་འབྱུང་བར་འདུག་གསུངས་སོ། །དེ་ནས་ཕྱག་དཔེ་ཐམས་ཅད་གཉེར་མཛད་པའི་ལྕམ་ལྷན་ཅིག་སྐྱེས་པའི་སྒྲོན་མ་ལ་ཞུསཏེ། ལེགས་སེའི་རྩ་ནས་ཕྱག་དཔེ་ཐམས་ཅད་ལྷག་ལུས་མེད་པར་ཞལ་བཤུས་ནས་བཅད་དོ། །དེ་ལྟར་རྗེ་བཙུན་གྱི་དྲུང་དུ་ཟླ་བ་བཅུ་གསུམ་བཞུགས་ནས། ལྕགས་ཕོ་སྟག་གི་ལོ་ལ་དབུས་སུ་འབྱོན་པར་བརྩམ་སྟེ། ཤིང་སྟག་པའི་ནགས་ཡོད་པ་གཅིག་གི་ཆུ་ལ་རྡོ་ཟམ་ཡོད་པའི་བར་ལ་སྐྱེལ་ཐུང་མཛད་དོ། །དབུས་པ་སྟོན་པ་རྟེན་འབྲེལ་གྱི་གནད་ཞིག་གིས། ཆུ་འདི་ཡི་ཕར་ཀར་ཁོ་བོ་བགྲོད་མི་བཏུབ་པར་འདུག་པས། འོ་སྐོལ་ཕ་སྤད་ཀྱི་ཕྲིན་སྒོས་འདིར་བྱ། ཁྱོད་ཁྲེས་པོ་ཕོག་ལ་སྡོད་ཅིག་གསུངས་ནས། ཨ་རུ་ར་གསེར་མདོག་གཅིག་དང་མེ་ཆ་གཅིག་གནང་སྟེ། དབུས་པ་སྟོན་པ་ཕ་ཚན་གྱི་ཁེ་གྲགས་སྤོང༌། གཉེན་འདུན་གྱི་ཐག་པ་ཆོད། ཚེ་འདིའི་གདོས་ཐག་མེད་པར་གྱིས། རི་ཡི་བུ་གྱིས། ཆོས་ཐམས་ཅད་གཅིག་ཏུ་དྲིལ་ནས་ཉམས་སུ་ལོངས། མི་རྒན་ང་ལ་གསོལ་བ་ཐོབ། སྤྱིར་ཡང་རི་དྭགས་རྨས་མའམ། བྱ་བཞིན་བྱོན་བག་ཆེ་བར་བྱ། ཞི་བ་དུལ་བ་རྩེ་རག་ཆུང་བར་བྱ། ཐམས་ཅད་དང་མཐུན་པར་བྱ་ གཙང་སྦྲ་ཤིན་ཏུ་ཆེ་བར་བྱ། རྟོག་པ་ཤིན་ཏུ་ཆུང་བར་བྱ། རི་མཚམས་དང་སྨྲ་བཅད་འདག་ཆར་གསུམ་གྱི་དུས་འདའ་བར་བྱ། རང་སེམས་སངས་རྒྱས་སུ་རྟོགས་ཀྱང་བླ་མ་རྡོ་རྗེ་སློབ་དཔོན་མི་སྤང་བ་བསླབ། བསགས་སྦྱངས་གཉིས་པོ་རང་སར་དག་ཀྱང་ཚོགས་ཆུང་ངུ་ཆུང་ངུ་ནས་བསགས། ལས་རྒྱུ་འབྲས་ནམ་མཁའ་ལྟར་གོ་ཡང༌། སྡིག་པ་ཆུང་ངུ་ཆུང་ངུ་ལ་འཛེམ། མཉམ་བཞག་དང་རྗེས་ཐོབ་མེད་པའི་ཉམས་ལེན་ཡོད་ཀྱང་ཐུན་བཞིའི་རྣལ་འབྱོར་རྒྱུན་ཆད་མེད་པར་ཉམས་སུ་ལོངས། བདག་གཞན་མཉམ་པ་ཉིད་དུ་གོ་ཡང༌། ཆོས་དང་གང་ཟག་ལ་སྐུར་པ་མ་འདེབས་གསུངས་ནས། བུ་ཁྱོད་སང་ཕོད་ཡོས་བུ་ལོའི་རྟའིི་ཟླ་བའི་ཚེས་བཅུ་བཞི་ལ་བྲིན་སྙེ་ནམ་གྱི་རི་ལ་སླེབས་པར་གྱིས་ཤིག་གསུངས་ནས། བུ་སྤྲོས་བྲལ་སེམས་ལ་ཤར་དུས་སུ། ཞེས་སོགས་དྭགས་པོའི་སྐྱེལ་མགུར་མཛད་དོ། །དེ་ནས་རྗེབཙུན་ཡར་བྱོན་ཏེ། སློབ་མ་ཐམས་ཅད་བསགས་ནས། ལྷ་རྗེ་སྟོན་པ་དེེས་སེམས་ཅན་མང་པོ་ལ་ཕན་ཐོགས་པར་འདུག །མདང་ང་ཡི་རྨི་ལམ་དུ། བྱ་རྒོད་པོ་སེར་པོ་གཅིག་དབུས་སུ་འཕུར་ནས་སོང༌། དེ་རི་ཆེན་པོ་གཅིག་གི་རྩེ་ལ་བབས་ཏེ། ཕྱོགས་ཕྱོགས་ནས་ངང་པའི་འཁོར་མང་པོ་འདུས་ནས། དར་གཅིག་ན་སོ་སོར་གྱེས་ཏེ། ངང་པ་རེ་རེ་ལ་གཡོག་ལྔ་བརྒྱ་ལྔ་བརྒྱས་བསྐོར་ནས་ལུང་པའི་གཤིས་ཐམས་ཅད་ངང་པས་སེར་ཉོག་གིས་གང་ནས་སོང་བ་རྨིས། ཁོ་བོ་རྣལ་འབྱོར་པ་ཡིན་པ་ལ། ཁོ་བོའི་རྗེས་སུ་རབ་ཏུ་བྱུང་བ་མང་པོ་ཡོང་བར་འདུག །ལྷ་རྗེ་སྟོན་པ་དེས་སེམས་ཅན་མང་པོ་ལ་ཕན་ཐོགས་པར་འདུག །ཁོ་བོས་ཀྱང་སངས་རྒྱས་ཀྱིི་བསྟན་པ་ལ་བྱ་བ་བྱས་པར་འདུག་གསུངས། དེ་ནས་དྭགས་པོ་དབུས་སུ་བྱོན་ཏེ། བཀའ་གདམསཀྱི་ཆས་རྣམས་མ་བོར་བར་དགེ་བཤེས་སྙུག་རུམ་པའི་རྩར་ཕྱིན་པས། ཁྱོད་ལ་ཡོན་ཏན་ཅི་བྱུང་གསུངས་པ་ལ། རླུང་ཕྱི་ནང་དུ་མི་རྒྱུ་རྟོགས་པ་ནམ་མཁའ་དང་མཉམ་ཞུས་པས། ངོ་མཚར་ཆེ་གསུང་ནས་ཚེ་བསྲིང་བའི་ཆོ་ག་ཡང་གནང་ངོ༌། དེ་ནས་གཉལ་དུ་བྱོན་ནས་བཞུགས་ཙམ་ན། བླ་མའི་གསུང་དྲན་ནས། རྒྱ་པ་གསེར་རེ་ལས་གསེར་ཞོ་བཅུ་གཉིས་ནས་ཀྱིས་ཉོས་ནས། རས་སྒོམ་རས་པ་ཁྲིད་དེ་བྱོན་པས་ཡར་ལུང་གི་མདར་སླེབ་ཙ་ན། གཙང་གི་བོང་ཚོང་བ་དང་འཕྲད་ནས། དེ་རྣམས་ན་རེ། རྗེ་བཙུན་རྟའི་ཟླ་བའི་ཚེས་བཅུ་བཞི་ལ་གཤེགས་ཟེར་ནས། ཕྱག་འཁར་དང་ན་བཟའི་རས་དུམ་གཅིག་མཆོད་པའི་རྟེན་དུ་བསྐུར་བ་ཡང་གཏད། དེའི་མོད་ལ་སྤྱན་ཆབ་མང་པོ་ཤོར་ནས་དྲན་མེད་དུ་བརྒྱལ་སོང་སྐད། དེར་རྩ་ན་ཡོད་པ་རྣམས་ཀྱིས་ཕྱག་ཞབས་ལ་སྐུ་མཉེ་ཕུལ། ཞལ་ལ་ཆུ་མང་དུ་བཏབ་པས་དར་ཅིག་ལ་དྲན་པ་རྙེད་ནས་གསེར་རྣམས་བྲིན་གྱི་ཕྱོགས་སུ་གཏོར་ནས་བླ་མ་ལ་གསོལ་བ་འདེབས་པའི་མགུར་གསུངས་སོ། །དེ་ནས་ཁོ་རང་གི་ཕྱོགས་ལ་ཕྱིར་བྱོན་ཏེ། ཉི་མ་དྲོས་རན་དུ་སོང་འདུག་པས་སེའུ་ལྕོག་གཅིག་གི་རྩ་ན་བུད་མེད་གཅིག་འདུག་པ་ལ་གྲོ་གཅིག་འདོད་གསུངས་པས། དེ་ན་རེ་གྲོ་དྲངས་པས་ཆོག་སྟེང་ཁང་དུ་བྱོན་ཟེར་ནས། དེར་བུད་མེད་དེས་ནས་སྤར་གང་ཁྱེར་ནས་ས་གཅིག་ལ་ཞིང་རྨོ་བའི་ཚུལ་བྱས་ནས་དེ་ལ་བཏབ་པས་ལྗང་བུ་སྐྱེས་ནས་ནས་སུ་སྨིན་ཏེ། དེ་ལ་རྩས་མ་བྱས། དབྱུག་པས་བརྡུངས་ནས་བརྔོས་ཏེ་བཏགས་ཤིང་ཟན་དུ་བརྫིས་ཆབ་བསྐོལ་ཞིང་བླ་མ་ལ་གྲོ་དྲངས་ཏེ་ཆབ་གཅིག་བཏང་བས་དེའི་ཞལ་བཤལ་ནས་བཞེངས་པ་སྙམ་བྱེད་ཙ་ན་སེའུ་ལྕོག་དང་བུད་མེད་གང་ཡང་མི་འདུག་པས་ང་འཁྲུལ་བ་ཡིན་བསམ་ཙ་ན། མ་འཁྲུལ་བར་ཟན་གྱི་སྒྲེག་པ་ཆིལ་ཆིལ་འདུག། ལར་འཁོར་འདས་ཀྱི་ཆོས་ཐམས་ཅད་སྣང་ཞིང་བདེན་པའམ་རྫུན་པའི་མཐའ་དང་བྲལ་བ་འདི་ལྟ་བུ་གཅིག་ཨང་སྙམ་སྟེ། ཉམས་སུ་མྱོང་བ་ཁྱད་པར་ཅན་རྒྱུད་ལ་སྐྱེས་སོ། །དེ་ནས་འཁོར་ལ་སྔ་བ་རས་སྒོམ་རས་པ་བྱ་བ་ཉེ་གནས་བྱས། གཉལ་ཕྱེ་བ་ལུང་དུ་ལོ་དྲུག་བསྒོམས་པས། དེའི་དུས་བཀའ་གདམས་པའི་ཆོས་སྤྱོད་ཀྱི་རམ་འདེགས་བྱས་པས་སྔར་གྱི་ཉམས་མྱོང་ཁྱད་པར་ཅན་རྣམས་ཡལ་ནས་སོང༌། དེར་ཐུགས་མ་བདེ་ནས་སྔར་གྱི་བཀའ་གདམས་པའི་བླ་མའི་སར་འགྲོའོ་སྙམ། ང་ཡི་བླ་མ་རྗེ་བཙུན་ཞལ་ནས། ཕྱག་རྒྱ་ཆེན་པོ་བསྒོམ་དུས་སུ། ལུས་ངག་གི་དགེ་སྦྱོར་མ་བརྩོན་ཅིག །མི་རྟོག་ཡེ་ཤེས་ཡལ་ཉན་ཡོད། ཅེས་གསུངས་པ་བཞིན། ད་བླ་མར་ལྟོས་པ་འཆའ་བ་ཡིན། གསུངས་ནས་བློ་ཁེལ་ངེས་སུ་གསོལ་བ་བཏབ་པས་རིང་པོར་མ་ལོན་པར་མཆོག་གི་རྟོགས་པ་སྐྱེས། བོ་དྷི་ཙི་ཡི་ཐུགས་དམ་བརྒྱ་རྩ་གཅིག་ཡོད་པ་ལྕང་མའི་སྡོང་པོ་ལ་བཀལ་ནས། དུས་གསུམ་སངས་རྒྱས་ཀྱིས་ང་ལུང་བསྟན་ན་ཤིང་འདི་ལ་སྐྱེ་བར་ཤོག་ཅིག། གལ་ཏེ་མ་བསྟན་ན་མི་སྐྱེ་བར་ཤོག་ཅིག །ཅེས་བདེན་པ་བརྗོད་པས་སྐྱེས་སོ། །དེ་ནས་འོལ་ཁར་བྱོན་ནས་དགེ་ལུང་དུ་ལོ་གསུམ་བསྒོམས་པས་ཆོས་ཐམས་ཅད་བདེན་མེད་དུ་རྟོགས་ནས་གཉུག་མའི་ཡེ་ཤེས་རང་ལ་དབུལ་མོའི་འོག་གི་གཏེར་ལྟ་བུ་སོགས་དཔེ་བཅུ་གཉིས་ཀྱི་མགུར་གསུངས། ཡང་ང་སྐྱེ་བ་གཅིག་གི་ཐོགས་པའི་སྲིད་པ་མཐའ་མ་ཡིན། བླ་མ་དྲིན་ཆེ་ཨང་གསུངས། ནུབ་གཅིག་རང་གི་བུ་གཅིག་ཡོད་པ་སྐེ་བཅད་ནས་སྐྱེ་རྒྱུད་བཅད་དོ་བྱས། རོ་རྦབ་ལ་བཏང་བ་རྨིས། དེ་ཕྱིན་ཆད་འོད་གསལ་དུ་འགྲོ་བར་འདུག་གསུངས་ནས་ཉང་སྒོམ་རས་པ་དང༌། ཟངས་རི་རས་པ་ལ་སོགས་ལ་བདེ་ཆེན་ཆོས་དབྱིངས་ཀྱི་མགུར་གསུངས། དེ་ལྟར་འོར་ཁར་ལོ་བདུན་སོང་ནས་དབྱར་འོ་དེ་གུང་རྒྱལ་ལ་བསྒོམ་ཙ་ན་ཐོ་རངས་ལ་དངོས་ཀྱི་གདུལ་བྱ་ཡལ་བར་དོར་ན་བྱང་ཆུབ་སེམས་དཔའི་ལྟུང་བ་ཡིན་ཟེར་བའི་སྒྲ་ནམ་མཁའ་ནས་གྲགས་བྱུང༌། དགུན་འགྲོ་སྙམས་པར་ཡུལ་བདག་བཙད་པོའི་ཚུལ་གྱིས་འདིར་བཞུགས་ན་ཡོན་བདག་དང༌། སྒམ་པོར་ཕེབས་ནའང་བཞེད་དོན་བསྒྲུབ་ཟེར། སྐྱབས་འགྲོ་སེམས་བསྐྱེད་དང་སྡིག་བཤགས་ཞིག་ཞུ་ཟེར་བས། དེར་སྐྱབས་སེམས་དང་སྟོབས་བཞིའི་སྒོ་ནས་སྡིག་སྦྱངས་གསུངས། ཕྱག་རྒྱ་ཆེན་པོའི་སྒོམ་ཞིག་བཏབ་སྙམ་པར་འཇའ་ཡལ་བ་བཞིན་སོང༌། དེ་ནས་སྒམ་པོར་བྱོན་ནས་ལོ་བཅུ་གཉིས་འདག་སྦྱར་བྱ་དགོས་སྙམ་ནས་ཟངས་ལུང་དུ་འདག་ཆར་གྱི་ཁང་པ་ལེགས་པོ་ཞིག་བྱས་ནས་ཐོག་མར་ཆུ་ཡི་བཅུད་ལེན་བྱ་དགོས་སྙམ་ཙ་ན། བུད་མེད་ལུས་ལ་ཐལ་བ་བྱུགས་པ་ལག་ན་རྨ་བྱའི་སྒྲོ་ཆུན་བཟུང་བ་ཞིག་ན་རེ། བཅུ་གཉིས་འདག་ཆར་བྱས་པ་བས། བཅུ་གཉིས་བསྟན་པ་སྤེལ་ན་དགའ། ཟེར་ནས་མི་སྣང་བར་སོང༌། དེར་ཞག་འགའ་ནས་གཙང་གི་ཀློག་སྐྱ་སྟོན་པ་ཟེར་བ་བྱུང་ནས་གདམས་ངག་ཞུས་པར་གནང་ནས་སྒོམ་ཆེན་གཤའ་མར་བྱུང༌། དེ་ནས་དགེ་བཤེས་རྒྱལ་བ་ཁྱུང་ཚང་བ་དང༌། གཉག་ནག་པོ་དང༌། གཉག་དམར་པོ་བྱུང༌། ཡང་དཔོན་སློབ་དྲུག་ཅུ་ཙམ་བྱུང༌། དེ་རྣམས་ཀྱི་ཁྲིད་ཚར་ནས་མཚམས་བྱ་དགོས་སྙམ་ཙ་ན། དབུས་གཙང་ཁམས་གསུམ་གྱི་སྣོད་ལྡན་རྣམས་འདུས་ཏེ། དེ་དག་རིང་པོར་མ་ལོན་པར་ཉམས་རྟོགས་དང་རྩ་རླུང་གི་ཡོན་ཏན་བཅུ་གཉིས་ལ་སོགས་མངོན་ཤེས་དང་ལྡན་པ་ཤ་སྟག་བྱུང་ཞིང༌། དེ་ཡང་མ་དག་པའི་དངོས་པོ་བརྒྱད་མི་འཆང་ཞིང་ཙོག་པུའི་རྣལ་འབྱོར་ལ་བརྩོན་པ། སྦྱངས་པའི་ཡོན་ཏན་བཅུ་གཉིས་ལ་གནས་པ། གསང་སྤྱོད་དང་སྨྲ་བཅད་རི་མཚམས་ཁོ་ནས་དུས་འདའ་བ་བྱུང་ངོ༌། གཞན་ཡང་དྲང་སྲོང་ཆེན་པོ་དེས་སྐུ་ཡི་བཀོད་པ་རྫུ་འཕྲུལ་བསམ་མི་ཁྱབ་པ་མཛད་དོ། སློབ་དཔོན་ཁམས་པའི་ཞལ་ནས། རེས་ཤིག་སྐུ་ཡི་སྤྲུལ་པ་རྣམ་བཞིར་བསྟན། །་རབ་ཏུ་གནས་དང་གཞན་ལ་ཆོས་སྟོན་དང༌། །མཁའ་ལ་འཕུར་དང་གཅིག་ནི་འདག་སྦྱར་བཞུགས། །ཟད་པར་ཟིལ་གནོན་ཏིང་འཛིན་ཅིར་ཡང་བསྒྱུར། །སྐུ་ལ་སྒྲིབ་མེད་འཇིག་རྟེན་དབང་པོར་སྤྲུལ། ཅེས་དང༌། ཡང་སློབ་མ་རྣམས་ཀྱིས་མཐོང་སྣང་སྣ་ཚོགས་པར་བསྟན་པའི་ཚུལ་ཡང༌། དད་ལྡན་རྣམས་ཀྱི་འཁོར་ལོ་སྡོམ་པར་མཐོང༌། །རབ་གནས་མཛད་ཚེ་བྱང་ཆུབ་ཆེན་པོར་སྤྲུལ། །ཡེ་ཤེས་སེམས་དཔའ་རྟེན་ལ་དངོས་སུ་ཐིམ། ཞེས་གསུངས་པ་ལྟར་རོ། །ཡང་རྒྱལ་བ་ཁྱུང་ཚང་ཅན་གྱི་བསམ་པ་ལ། བླ་མ་རིན་པོ་ཆེའི་བཙུན་ཆུང་འདི་རྣམས་ལ་ཐོས་པ་བག་རེ་བྱེད་མི་འཇུག་པར། སྒོམ་ཉི་ཚེ་བ་ལ་བཅུག་པས་ཡོན་ཏན་ཅང་སྐྱེའམ་སྙམ་ཙ་ན། དེའི་ནུབ་མོ་རྨི་ལམ་ན་སྒམ་པོའི་རི་ཐམས་ཅད་ཕུག་གིས་གང་ནས་འདུག །དེ་རྣམས་ཀྱི་ནང་ནས་རིན་པོ་ཆེའི་མཆོད་རྟེན་མང་པོ་འདུག །ཕལ་ཆེར་བཟོ་ཤིན་ཏུ་ལེགས་པ་འོད་ནམ་མཁའ་ལ་འགྲོ་བ་ཁོ་ན་འདུག །ལ་ལ་ནི་བཟོ་ཕྱེད་ཙམ་ཚར་ནས་འདུག །ལ་ལ་ནི་གཟུགས་དོད་པ་ཙམ་དཀར་ཆབ་གསོལ་ཏེ། མི་མང་པོའི་ཕྱག་འཚལ་ཞིང་འདི་རྣམས་འཇིག་རྟེན་ལྷ་དང་བཅས་པའི་མཆོད་གནས་ཡིན་ཟེར་བ་རྨིས། དེའི་ནངས་པར་བླ་མ་ལ་ཞུར་སོང་བས། ཕྱག་འཚལ་ནས་དེ་ཚོ་ཞུ་མ་ཁོམ་པར་བླ་མའི་ཞལ་ནས། སྤྱིར་མཚན་ཉིད་པ་རྣམས་ཀྱིས་ང་ལ་སྡང༌། སྒོས་སུ་ཁྱོད་ཀྱིས་ང་ལ་བརྙས་ཏེ་ང་ཡི་བཙུན་ཆུང་འདི་ཚོ་ལ། ཁྱེད་ཀྱི་རྨིས་པ་ཁོ་ན་བཞིན་ཡོད་པ་ཡིན། སྤྲང་ཕྲུག་འདི་ཚོ་ཡང་འཇིག་རྟེན་ལྷ་དང་བཅས་པའི་མཆོད་གནས་སུ་ཡོང་བ་ཡིན། ཁོ་བོ་ལ་ནི་ཆེ་རིག་ཆེ་འཚིངས་ཆུང་རིག་ཆུང་འཚིངས་བ་ཡིན་ཏེ། མི་ལ་ལས་ཁོ་བོས་བསྟན་པ་སྣུབ་ཟེར་བ་དེ། བསྟན་པའི་བདག་པོ་སུ་ཡིན། བསྟན་པ་ལ་སུས་ཕན། སེམས་ཅན་གྱི་དོན་སུ་ཡིས་བྱས་ཉི་འོག་གི་རྒྱལ་ཁམས་འདི་ན་བསྟན་པ་སུས་བསྲུང༌། རང་རེ་ཚོ་ལ་འགའ་ནས་གསལ་ཏེ་འོང་གསུངས་སོ། །གཞན་ཡང་ར་རྫི་སྒོམ་སྐྱེས་ཀྱིས་བླ་མའི་མཚན་ཐོས་པས་སྒོམ་བྱུང་བ་དང༌། རྒྱ་སྒོམ་རྡོར་སེང་གིས་ཡེ་མ་མཐོང་བར་མོས་གུས་མཎྜལ་ཕུལ་བས་སྒོམ་བྱུང༌། གཞན་ཡང་ཉང་སྟོན་དང་ཤེལ་སྒོམ་གཉིས་ཀྱིས་སྒོམ་ཞུར་བྱོན་པས་སྒམ་པོའི་རི་རྩར་ཉལ་བ་དང་སྲོད་ལ་ཉང་སྟོན་དང༌། ནམ་ལངས་ཁར་ཤེས་སྒོམ་ལ་ཕྱག་རྒྱ་ཆེན་པོའི་རྟོགས་པ་སྐྱེས། འོལ་ཁའི་མཛེ་མོ་ཞིག་གིས་བླ་མ་བཞུགས་པའི་གངས་དཀར་རམ་མེ་བ་ལ་བལྟས་ནས་གསོལ་འདེབས་བྱས་པས་ནད་ལས་གྲོལ། རྗེ་ཡི་སློབ་མ་འབྲོམ་དམར་ཡུ་བྱ་བ་ཕྱིས་ཁྱིམ་པར་གྱུར་ཀྱང་ཤི་དུས་རོ་བསྲེགས་པས་རིང་བསྲེལ་ཕོན་ཆེ་བར་མཆིས། སྒལ་ཚིག་ལ་དེ་བཞིན་གཤེགས་པའི་སྐུ་བྱོན་པ་སོགས་ངོ་མཚར་བ་བྱུང༌། ཡང་སློབ་དཔོན་སྒོམ་པས་རོ་གཅིག་སྐྱེས་པའི་ཚད་གང་ལ་བྱེད་ཞུས་པས། མདུན་ན་ཀ་བ་ཞིག་ཡོད་པ་ལ་ཕྱག་གཡུག་པ་མཛད་པས་ཐོགས་མེད་དུ་སོང་བ་དེ་ཡིན་གསུངས། གཞན་ཡང་གདུལ་བྱ་མང་པོའི་སྣང་ངོར་སྐུ་ལུས་ཀྱི་བཀོད་པ་དང༌། རྫུ་འཕྲུལ་དཔག་མེད་བསྟན་པ་སོགས་ནི་བརྗོད་ཀྱིས་མི་ལང་ངོ། ཡང་གྲུབ་ཐོབ་ཤངས་པའི་ཐུགས་སྲས་རྨོག་ཅོག་པ་རིན་ཆེན་བརྩོན་འགྲུས་བྱ་བ་མཇལ་དུ་བྱོན། གསེར་ཞོ་བཅུ་གཉིས་བུར་བཏང་གསུམ་རྣམས་ཕུལ། ཆོས་དྲུག་དང་རྨི་ལམ་གྱི་གདམས་པ་ཟབ་མོ་ཞུས་པས་ཉམས་མྱོང་གི་བོགས་ཁྱད་པར་དུ་ཐོན། དེ་ནས་ཡར་བྱོན་རྨོག་ཅོག་གི་བྲག་ལ་བསྒོམས་པས་གྲུབ་པ་ཐོབ། ཞི་བྱེད་པའི་གྲུབ་ཐོབ་རྒྱལ་བ་རྟན་ནེ་ཞེས་པ་ལོ་བདུན་ནས་བླ་མ་ལྷ་རྗེ་མཇལ། ཕྱག་ཆེན་གྱི་སྒོམ་བཏབ། ཕྱིས་གྲུབ་ཐོབ་རྩོད་མེད་ཡོང་བའི་ལུང་བསྟན། གཞན་ཡང་སྐྱེས་བུ་ཆེན་པོ་དེ་ཉིད་གང་དུ་བྱོན་ཡང་འཇའ་འོད་ཀྱིས་ལམ་སྣ་འདྲེན་ཅིང༌། མི་ནད་ཕྱུགས་ནད་ཡམས་ནད་ཐམས་ཅད་རྒྱུན་ཆད་ནས་བཀྲ་ཤིས་བདེ་ལེགས་དང་ལྡན་པར་མཛད་པ་ཡིན་ཏེ། དགེ་བཤེས་ཁམས་པས། ཁྱེད་ནི་མཐོང་ཐོས་དྲན་པ་ཙམ་གྱིས་ཀྱང༌། སྡུག་བསྔལ་ཟུག་རྔུ་མ་ལུས་སེལ་མཛད་པའི། སྨན་གྱི་རྒྱལ་པོ་ཁྱོད་ལ་ཕྱག་འཚལ་ལོ། གསུངས། དེ་ནས་རེ་ཞིག་བྱར་ལྐོག་ན་བཞུགས་པའི་ཚེ། བྱང་ཡེ་ལ་སོགས་འཁོར་རྣམས་ལ་ད་ནི་ཁོ་བོ་ཡང་འཇིག་རྟེན་འདིར་ཡུན་རིང་པོར་མི་སྡོད་པས། ཆོས་ཀྱི་ལྷག་མ་དྲི་རྒྱུ་ཡོད་ན་མྱུར་དུ་དྲིས་ཤིག །འོན་ཀྱང་ཉམས་སུ་ལེན་པ་ལ་ཚིག་མང་མི་དགོས་འདི་རྣམས་ཡིད་ལ་ཞོག་གསུངས་ཏེ། དུས་གསུམ་རྒྱལ་བ་ཐམས་ཅད་འདུས་པའི་སྐུ། ཞེས་སོགས་གསུངས་སོ། །དེ་ནས་ཉིན་གཅིག་རིན་པོ་ཆེའི་ཞལ་ནས། བླ་མ་འབའ་རོམ་པ་འོ་སྐོལ་ཕ་སྤད་འགྲོགས་ཡུན་རིང་བས་ཁྱོད་ཀྱི་ལུས་སྲོག་ལ་ལྟོས་པ་མེད་པའི་ཞབས་ཏོག་བྱས་ཤིང༌། གདམས་ངག་ཐམས་ཅད་ཚར་བ་ཡིན་གསུངས་ནས། གསེར་སྲང་གང་གནང་སྟེ། ད་ཁྱོད་ཀྱང་འབའ་རོམ་བྱ་བ་ལྷོ་བྲག་མར་པ་ཡབ་སྲས་ལ་སོགས་ཀྱི་སྒྲུབ་གནས་ཡིན་པས། དེར་སོང་ལ་དང་པོ་གསེར་འདིས་སྒྲུབ་རྒྱགས་གྱིས་ལ་སྒྲུབས་དང༌། དེ་ནས་སྟེར་མི་འོང་གསུངས། བླ་མ་འབའ་རོམ་པས་གསེར་མཎྜལ་བྱས་ནས་ཡར་ཕུལ་ཞིང་ཕྱག་འཚལ་ཏེ། སྤྱན་ཆབ་མང་པོ་ཕྱུངས་ནས་བླ་མ་རིན་པོ་ཆེ་སྐུ་ཚེ་མཐར་མ་ཕྱིན་གྱི་བར་དུ་སེམས་ཅན་གྱི་དོན་ལ་བཞུགས་པར་ཞུ། བདག་ཀྱང་གཞན་དུ་མི་འགྲོ་ནས་དེ་བཞིན་དུ་ཞབས་ཏོག་བྱེད་ལགས་ཞུས་པས། ཁོ་བོས་གསེར་བློས་བཏང་ཡང༌། ལན་གཅིག་ཚུར་ཕུལ་བའི་རྟེན་འབྲེལ་གྱིས་གསེར་ལ་སོགས་འབུལ་བ་མང་དུ་འོང༌། ཁྱོད་ཀྱིས་ང་ཡི་ངག་གཅོག་མ་མྱོང་ཞིང༌། ནན་ཞུས་བྱེད་པའི་ངོར་ཞག་སུམ་ཅུ་རྩ་གསུམ་གྱི་བར་དུ་འོ་སྐོལ་ཕ་སྤད་ལྷན་ཅིག་འདུག་གོ །དེ་ནས་ཅིས་ཀྱང་འབའ་རོམ་དུ་སོང་སྟེ། རེ་དོགས་མེད་པའི་གདེངས་དང་ལྡན་པར་བྱོས། རྣམ་གཡེང་གི་ནོར་ལ་ཞེན་མེད་འབྲོས་པར་འགྱུར། གཞན་ཡང་སེམས་ཅན་གྱི་དོན་མཛད་ནས་སླར་ཡང་གངས་ལ་འཆི། དེ་དུས་ཙམ་ན་ཁོ་བོ་རྗེས་སུ་དྲན་པ་ཡིན་ཏེ་གསུངས་ཞིང༌། དེ་ནས་ཞག་སུམ་ཅུ་རྩ་གསུམ་ནས་སྐུ་ཡོལ་བ་ཡིན་ནོ། །དེ་ནས་བསྙུང་བ་ཆེར་མེད་ཀྱང་སྐུ་ཤེད་ཆུང་དུ་སོང་བས། ལེགས་མཛེས་ཀྱི་སྐུ་ཁམས་ཅི་འདྲ་ཞུས་པས། བླ་མ་དམ་པའི་མཚན་ཐོས་ནས་ཞེས་སོགས་གསུངས་སོ། དེ་ནས་མྱ་ངན་ལས་འདས་པའི་ཚུལ་སྟོན་པའི་ཟླ་བ་ཕྱེད་ཙམ་གྱི་གོང་ནས༌། ཁོ་བོ་སྐྱས་ཆེན་པོ་གཅིག་འདེགས་པས། གདམས་ངག་གི་ལྷག་མ་རྣམས་དང་དྲི་རྒྱུ་ཡོད་པའི་ཚིག་དྲིས་ཤིག་གསུངས༌། དེའི་ཚེ་སློབ་དཔོན་སྒོམ་པས་བླ་མ་རིན་པོ་ཆེ་ཕྱི་རབས་གདུལ་བྱ་རྣམས་ལ་ཞལ་ཏ་གདམས་ངག་དང་བཅས་པ་རྣམས་གནང་བར་ཞུ་ཞུས་པས། ཁོ་བོས་དེ་སྔ་ཚོགས་དབེན་དུ་བཤད་པ་དེ་ཚོ་ཡིན་མོད། འོན་ཀྱང་འདི་བཞིན་དུ་ཐུགས་ལ་ཐོགས་མཛོད་གསུང་སྟེ། འཆི་བ་ཞེས་བྱ་རྣམ་རྟོག་ཡིན། དཔའ་བོ་རྣལ་འབྱོར་མ་ཚོགས་ཀྱིས། མཁའ་སྤྱོད་གནས་སུ་ཁྲིད་པར་བྱེད། ཅེས་སོགས་གསུངས་མགུར་མཛད་ཅིང༌། ཡང་འདི་སྐད་ཀྱང་གསུངས། བླ་མ་དམ་པ་དུས་གསུམ་གྱི་སངས་རྒྱས་རྣམས་དང༌། ང་ཡི་སེམས་དབྱེར་མི་ཕྱེད་པར་བརྟན་གཡོ་ཐམས་ཅད་ཁྱབ་པར་གནས་པ་ཡིན་པས་དེ་བཞིན་དུ་གོ་ཞིང་རྟོགས་པར་མཛད་པར་ཞུ། ཆོས་ཐམས་ཅད་ཀྱི་མཐར་ཐུག་པའི་དོན་སྟོང་པ་ཉིད་དང་སྙིང་རྗེ་གཉིས་སུ་མེད་པ་བསྒོམ་པར་ཞུ། ལམ་རྣམས་ཀྱི་ནང་ནས་མཆོག་ཏུ་གྱུར་པ་ཟབ་མོ་ནཱ་རོའི་ཆོས་དྲུག་བསྒོམ་པར་ཞུ། ཡོན་ཏན་སྐྱེས་ཚད་མཆོག་ཏུ་མི་འཛིན་པར་གོང་ནས་གོང་དུ་བརྩེགས་པར་ཞུ། སྒོམ་སྐྱོན་དང་ཐེ་ཚོམ་བྱུང་ན་གེགས་སེལ་གྱི་དཔེ་རྣམས་ལ་གཟིགས་པར་ཞུ། ཞི་བདེ་འདོད་ན་འདོད་ཆུང་ཆོག་ཤེས་ལ་བརྟེན་པར་ཞུ། རྫོགས་པའི་སངས་རྒྱས་བཞེད་ན་རི་ཁྲོད་དགོན་པ་འགྲིམ་པར་ཞུ། འཁོར་བའི་སྡུག་བསྔལ་དྲན་པར་གྱིས་ལ་ཚེ་འདི་བློ་ཡིས་གཏོང་བར་ཞུ། བླ་མ་རང་སེམས་ཡིན་པས་གཞན་ནས་མི་ཚོལ་བར་ཞུ། རྣམ་རྟོག་མི་མངའ་ས་ལེར་མཁྱེན་པའི་ཆོས་རྣམས་རྟེན་འབྲེལ་དུ་རྟོགས་པར་ཞུ། སྨོན་ལམ་ཇི་ལྟར་བཏབ་པ་བཞིན་དུ་འགྲུབ་པ་ཡིན་པས་སྨོན་ལམ་ཟབ་ཅིང་རྒྱ་ཆེ་བ་འདེབས་པར་ཞུ། གཞི་སྐྱེ་བ་མེད་པ་ཆོས་ཀྱི་སྐུ། ལམ་འགགས་པ་མེད་པ་ལོངས་སྤྱོད་རྫོགས་པའི་སྐུ། འབྲས་བུ་གང་ལ་གང་འདུལ་སྤྲུལ་པའི་སྐུ་སྟེ་སྐུ་གསུམ་དུ་ཆོས་ཐམས་ཅད་མ་ལུས་པ་མེད་པས། དེ་བཞིན་དུ་གོ་ཞིང་རྟོགས་པར་ཞུ། སེམས་ཅན་ལ་གནོད་པ་ནི་འོང༌། ཕན་པ་ནི་དཀའ་བས་གདན་ས་དང་སྐུ་ལྡེར་དང་འབུམ་པ་ལ་སོགས་པ་ནི་མི་མཛད་པར་ཞུ། བླ་མའི་གདན་ས་གང་ཡིན་ཆོས་དང་མཐུན་པ་དེ་ཡིན་པས། རྒྱལ་བའི་བཀའ་དང་མི་འགལ་བ་མཛད་པར་ཞུ། མ་འོངས་པའམ་གང་ཟག་ང་དང་མ་མཇལ་སྙམས་པ་རྣམས་ཀྱང༌། ཁོ་བོས་བརྩམ་པའི་བསྟན་བཅོས་ལམ་མཆོག་རིན་པོ་ཆེའི་ཕྲེང་བ་དང༌། རྣམ་པར་ཐར་པའི་རྒྱན་ལ་གཟིགས་དང་ང་དང་མངོན་སུམ་དུ་མཇལ་བ་དང་ཁྱད་མེད། ད་ལྟ་ང་ཡི་འཁོར་སྙིང་མེད་པོ་འགའ་ཞིག །བླ་མ་དུས་གསུམ་གྱི་སངས་རྒྱས་འདི་དང་མ་མཇལ་ནས་ང་ལ་མེད་སྙམས་པ་ཡང་འབད་དེ་གུས་པས་གསོལ་བ་ཐོབ་དང༌། བྱིན་རླབས་ཀྱི་ཡོན་ཏན་རང་འབར་དུ་འབྱུང་བས། དེ་ལྟར་དུ་དགོངས་པར་ཞུ། ལར་བླ་མར་སྣང་བ་རྨི་ལམ་ཙམ་འདི་ནུབ་ཀྱང་ཐུགས་རྗེ་དང་བྱིན་རླབས་ཆུང་དུ་མི་འགྲོ་ཞིང༌། སྡུག་བསྔལ་ལས་སྐྱོབས་པ་དང༌། འཁོར་བར་མི་ལྟུང་བར་ང་རང་ཤེས་ཀྱིས་མོས་པ་དང་གུས་པའི་གདུང་བ་མི་གཅོད་པར་ཞུའོ་གསུངས་སྟེ་ཆོས་ཐམས་ཅད་ཀྱི་གནས་ལུགས་སྐྱེ་བ་མེད་པ་སྤྲོས་པའི་མཐའ་ཐམས་ཅད་དང་བྲལ་བའི་ངང་ལ་སྙོམས་པར་ཞུགས་སོ། །དེ་ནས་འདུས་བྱས་ཐམས་ཅད་མི་རྟག་པར་སྟོན་པ་དང༌། གདུལ་བྱ་ལེ་ལོ་ཅན་རྣམས་ལ་མི་རྟག་པར་བསྐུལ་བར་བྱ་བའི་ཕྱིར། དགུང་ལོ་བདུན་ཅུ་རྩ་ལྔ་བཞེས་པའི་དུས་སུ་ཆུ་མོ་བྱའི་ལོ་སྟོན་ཟླ་འབྲིང་པོའི་ཚེས་བཅོ་ལྔའི་སྔ་དྲོ་སྐར་མ་ཁྲུམས་སྟོད་ལ་བབས་པའི་ཚེ། སྐུ་ཡོངས་སུ་མྱ་ངན་ལས་འདས་པའི་ཚུལ་བསྟན་ཏེ། ནམ་མཁའ་ལ་འཇའ་འོད་དང་མེ་ཏོག་གིས་ཁྱབ་པར་གྱུར། དེར་ལྷ་རྗེ་སྙི་སྒོམ་འདས་ཟེར་བའི་སྒྲ་ཐོས། དེའི་ནུབ་མོ་སྒོམ་ཆེན་པ་ཐམས་ཅད་མཚམས་ཐོན་ལ་ཤོག་ཟེར་བ་ཐོས་ནས། ཕྱིན་ཙ་ན་བླ་མ་འདས་ནས་གདུང་ལྷ་ཁང་ཆེན་མོར་སྤྱན་དྲངས་ཤིང༌། དར་ཟབ་དང་རིན་པོ་ཆེ་སྣ་ཚོགས་ཀྱི་ཁྲི་ལ་བཞུགས་འདུག་པ་ལ། བཙུན་ཆུང་གཉིས་ཀྱི་ལྷ་བཤོས་ཕུལ་ཏེ། མཆོད་གཉེར་བྱས་པས་ཕྱག་རྒྱ་ཆེན་པོའི་སྒོམ་སྐྱེས་ཏེ། དེར་འཚོགས་པའི་ཡོན་བདག་ཐམས་ཅད་ཀྱིས་མོས་པའི་མཆོད་པ་ཕུལ་ཞིང་གསོལ་བ་བཏབ་པས། ཕལ་ཆེར་ཏིང་ངེ་འཛིན་གྱི་ཉམས་མྱོང་ཁྱད་པར་ཅན་དང་ལྡན་པར་གྱུར་ཏོ། །དེ་ནས་ཞག་གསུམ་གྱི་ནང་པར་གདུང་བཞུ་བའི་ཕྱིར་དར་གྱི་ཁྲི་ལ་གདན་དྲངས་ཏེ། དགེ་སློང་རྣམས་ཀྱིས་སྣ་དྲངས་པའི་དགེ་འདུན་རྣམས་ཀྱིས་སེར་ཕྲེང་བྱས་ནས། མཆོད་རྫས་སྣ་ཚོགས་དང༌། རོལ་མོ་ཆ་བྱེད་དཔག་ཏུ་མེད་པ་ཐོགས་ཏེ། ཚེས་བཅོ་བརྒྱད་ཀྱི་ཉིན་པར་གདུང་སྦྱངས་པས། ས་གཡོ་བ་དང་འོད་དང་རོལ་མོའི་སྒྲ་དང༌། དུད་པ་འཇའ་ཁ་དོག་སྣ་ལྔ་ལྟར་གྱུར་ཏེ། དྭགས་པོའི་ལུང་པ་ཐམས་ཅད་ཁེངས་ནས། ཐམས་ཅད་ཀྱི་མཐོང་སྣང་ལ་མེ་ཏོག་སྔོན་པོའི་ཆར་བབས་ཤིང༌། ཐུགས་ལྗགས་དང་རིང་བསྲེལ་དཔག་ཏུ་པ་མེད་བྱོན་ནོ། །དེ་ལྟ་བུའི་བླ་མ་བདེ་བར་གཤེགས་པ་དྭགས་པོ་རིན་པོ་ཆེ་དེ་ཉིད་མདོ་སྡེ་ལས་ཇི་ལྟར་བྱུང་བའི་ཚུལ་ནི། རྡོ་རྗེ་གདན་གྱི་བྱང་ཕྱོགས་ཁ་བ་ཅན་གྱི་ལྗོངས། ཆུ་བོ་མ་ཧཱ་ལོ་ཧི་ཏའི་འགྲམ། རི་བྲག་ཚང་ཚིང་ཅན་ན། དགེ་སློང་འཚོ་བྱེད་ཅེས་གྲགས་པ་དག་པའི་འཁོར་མ་དག་པའི་འཁོར་དྭངས་བ་འདྲེན་པ། ལྔ་བརྒྱ་ལས་མི་ཉུང་བ་ལྷན་ཅིག་ཏུ་དེ་བཞིན་གཤེགས་པའི་ཡེ་ཤེས་ལ་ལོངས་སྤྱོད་དོ། །ཞེས་དང༌། འཇིག་རྟེན་གྱི་ཁམས་ཡོན་ཏན་ཐམས་ཅད་ཀྱིས་བརྒྱན་པ་ཞེས་བྱ་བར། དེ་བཞིན་གཤེགས་པ་འོད་དྲི་མ་མེད་པ་ཞེས་བྱ་བར་འགྱུར་རོ། །ཞེས་སོགས་མདོ་རྒྱུད་དུ་མ་ནས་ལུང་བསྟན་པའི་ཆོས་རྗེ་དྭགས་པོ་རིན་པོ་ཆེ་ལ། སློབ་མ་ངོ་མཚར་ཅན་མང་དུ་བྱུང་བའི་བུ་ཆེན་བཞིར་ཡོངས་སུ་གྲགས་པ་ནི། བླ་མ་ཤོ་རོམ་འཕགས་པ། གསེར་སྒོམ་ཡེ་ཤེས་སྙིང་པོ། འོལ་ཀ་རམ་ཉེ་ཆོས་གཡུང༌། ཟེམ་ཤིང་ཡེ་ཤེས་སྙིང་པོ་དང་བཞིའོ། །རྒྱུད་པ་འཛིན་པའི་སྲས་བཞི་ནི། སློབ་དཔོན་དྭགས་པོ་སྒོམ་ཚུལ། བདེ་གཤེགས་ཕག་མོ་གྲུབ་པ། ཆོས་རྗེ་དུས་གསུམ་མཁྱེན་པ། བླ་མ་དཔལ་ཆེན་འབའ་རོམ་པ་དང་བཞིའོ། །ཐུགས་ཀྱི་སྲས་བཞི་ནི། དབོན་པོ་དྭགས་པོ་སྒོམ་ཆུང༌། བླ་མ་རྨོག་ཅོག་པ། གྲུབ་ཐོབ་གསལ་སྟོང་ཤོ་སྒོམ། བླ་མ་ཆེན་པོ་འོལ་ཀ་བ་དང་བཞིའོ། །ཉེ་བའི་སྲས་བཞི་ནི། དྭགས་པོ་འདུལ་འཛིན། ཇོ་སྲས་ལྷོ་ལ་ཡག །ཀྱེ་པོ་ཡེ་རྡོར། མགར་སྒོམ་དཀར་པོ་དང་བཞིའོ། །སྐལ་ལྡན་གྱི་སློབ་མ་དྲུག་ནི། ཁམས་སྒོམ་ཆོས་ཀྱི་བླ་མ། ཤེལ་སྒོམ་འཕགས་པ། སྐྱེ་སྒོམ་ཡེ་རྡོར། ཐང་ལ་མོན་སྒོམ། ཏི་སྒྲོ་ཉང་སྒོམ། གནམ་མཚོ་དེ་སྒོམ་དང་དྲུག་གོ། ལས་ཅན་གྱི་བུ་བཞི་ནི། སྐེ་རོང་རྩ་སྤྱིལ་བ། རྒྱལ་བ་ཁྱུང་ཚང་བ། བླ་མ་ཟངས་རི་བ། ཞིག་པོ་འཇའ་ཐུལ་དང་བཞིའོ། །ཞབས་ཏོག་བྱེད་པའི་གནས་བཞི་ནི། ཇོ་གདན། ལེགས་མཛེས་བྱང་ཡེ། གསལ་བྱང་དང་བཞིའོ། །གཞན་ཡང་ས་ཐོབ་ཀྱི་སློབ་མ་ལྔ་བརྒྱ་ཕྲག་གཅིག །གདུགས་ཐོགས་ཀྱི་སློབ་མ་སྟོང་ཕྲག་གཅིག་བྱུང་བ་ཡིན་ནོ།

སྤྱི་དོན་གཉིས་པ་སྒྲུབ་བརྒྱུད་རང་དང་མཐུན་པའི་ཆོས་འབྱུང་གིས་གཞུང་བསྲང་བ་ལ་གཉིས། །རྩ་བའི་རྒྱུད་འཛིན་གྱི་ཡ་གྱལ་དཔལ་ལྡན་འབའ་རོམ་རིན་པོ་ཆེའི་རྣམ་ཐར་ནས་བརྩམ་ཆོས་རྗེ་གོང་མ་རྣམས་ཀྱི་རྣམ་ཐར་རགས་རིམ་བརྗོད་པས་མདོར་བསྟན། ཆོས་སྲིད་ཟུང་འབྲེལ་གྱི་སྒོ་ནས་ཇི་ལྟར་བྱུང་ཚུལ་རྒྱས་པར་བཤད་པའོ། །དང་པོ་ལ་ལྔ་ལས་ཐོག་མར་མཉམ་མེད་དྭགས་པོ་རིན་པོ་ཆེའི་སྲས་ཀྱི་ཐུ་བོར་གྱུར་པ་དཔལ་ལྡན་འབའ་རོམ་པ་ཆེན་པོ་དར་མ་དབང་ཕྱུག་གི་རྣམ་པར་ཐར་པ་ནི། དེའང་སྐུ་འཁྲུངས་ཡུལ་འཕན་ཡུལ་ལུང་པ་བྱ་བ། རིགས་བྲན་ཀ་ཡབ་གནས་བརྟན་སྟོན་པ། ཡུམ་ལོ་ཆུང་མ་གཉིས་ལས་སྲས་གསུམ་ཡོད་པའི་ཆེ་བ་འབུམ་སྐྱབས་བྱ་བ་མེ་ལུག་ལ་སྐུ་འཁྲུངས། འདི་ནི་སྤྱི་ལོ།༡༡༢༧ རབ་བྱུང་གཉིས་པའི་མེ་ལུག་ཡིན། མཆན། ལོ་བདུན་ལོན་ནས་བུད་མེད་མཁའ་འགྲོ་མའི་གཟུགས་སུ་བྱས་པ་གོས་རེའུ་ཕྲུག་གཉིས་སྦྲག་པ་འཁོར་བཅུ་གསུམ་ཙམ་གྱིས་བསྐོར་བ། ལག་ན་ཆགས་ཤིང་ཐོགས་པ་གཅིག་བྱུང་བ་ལ། བླ་མས་ཁྱོད་སུ་ཡི་སློབ་མ་ཡིན་བྱས་པ་ལ། ང་དྭགས་པོ་སྙི་སྒོམ་གྱི་སློབ་མ་ཡིན་ཟེར། བླ་མ་རིན་པོ་ཆེ་ལ་བུད་མེད་ཀྱི་གྲྭ་པ་མེད། ཁྱེད་ཀྱི་རྫུན་ཟློ་ཨང་བྱས་པས། མོ་ན་རེ། བླ་མ་དྭགས་པོ་སྙི་སྒོམ་ལས་གལ་ཏེ་ང་བཟང་ངམ་ཅི་ཆ་ཟེར། དེ་སྐད་ཟེར་བས་མ་དགའ་བས། ཁྱོད་རིན་པོ་ཆེ་བས་བཟང་བྱས་ནས་བྱིས་པ་རྩེ་རོག་མང་པོ་ཡོད་པ་ལ་སྦྲན་ནས་བུད་མེད་དེའི་ཕྱོགས་སུ་ས་རྡོ་མང་པོ་གཏོར་བས། ཁྱོད་དྭགས་པོའི་ཁ་འཛིན་བྱེད་ལུགས་ལ་དད་པ་ཨན་ཙམ་ཡོད་པའི་རྟགས་ཡིན་པས་ཁྱོད་ལ་ང་མི་འཐབ་ཟེར་ནས་སོང་སྐད། དེའི་ནུབ་མོ་གཉིད་ལོག་ཏུ་མ་ཉན་པས། སྒམ་པོར་ཐོན་ན་སྙམ་པའི་བསམ་པ་མང་པོ་བྱུང་བས། བླ་མ་རིན་པོ་ཆེའི་ཐུགས་རྗེས་གཟིགས་བྱས་ནས་གསོལ་བ་དྲག་ཏུ་བཏབ་པས། ཐོ་རངས་མནལ་ཅུང་ཟད་འཐུམ་པས་ཤར་ཕྱོགས་ནས་འོད་དཀར་པོ་ཉི་མའི་སྲབ་མདའ་ལྟ་བུ་གཅིག་བྱུང་ནས་ཐུགས་ཀར་ཕོག་པ་རྨིས་ཙམ་ན། འདི་འདྲེ་ཡིན་ནམ་ཅི་ཡིན་སྙམ་པའི་ཐེ་ཚོམ་གཅིག་ཟོས་པ་དང༌། དགེ་བའི་བཤེས་གཉེན་དབང་གཞོན་ལ་དྲིས་པས་འདྲེ་མིན། ཁྱོད་ཀྱིས་བླ་མ་ལ་གསོལ་བ་བཏབ་པས། བླ་མ་དེ་ཡི་བྱིན་རླབས་ཞུགས་པ་ཡིན་ཡང་སྲིད་གསུངས་སྐད། དེ་ནས་དགུང་ལོ་བརྒྱད་ལ་མཁན་པོ་སྐ་བ་པ་དང་སློབ་དཔོན་དབང་ཕྱུག་གཞོན་ནུ་ལས་རབ་ཏུ་བྱུང༌། མཚན་ཡང་དར་མ་དབང་ཕྱུག་བྱ་བར་བཏགས། ཡབ་མེས་ཀྱིས་བཞེངས་པའི་སྐ་བ་ཡུལ་སྣ་བྱ་བའི་གནས་གཞི་གཅིག་གི་དཔོན་དུ་མངའ་གསོལ། དེ་ནས་སློབ་དཔོན་དབང་ཕྱུག་གཞོན་ནུས་གཏོར་ཆེན་མཛད་ནས་གཏོར་དབང་བསྐུར། ཆོས་སྐྱོང་བ་ཆེན་པོ་ཁྱོད་ཀྱིས་ང་ལ་སྡོང་གྲོགས་མཛད་པ་དེ་བས་ཀྱང་ལྷག་པར་ངའི་བཙུན་ཆུང་འདི་ལ་ལུས་དང་གྲིབ་མ་བཞིན་གྱིས་ལ་ཐུགས་ཡེངས་བ་མེད་པར་སྡོང་གྲོགས་མཛོད་ཅིག །སྐུ་མ་གཡེལ་གསུང་མ་གཡེལ་ཐུགས་མ་གཡེལ་གསུངས་ནས་དབུ་ཐོག་ཏུ་གཏོར་མ་བཞག །ཁྱོད་དོ་ནུབ་ང་ཡི་རྩལ་ཉོལ་དང༌། རྨི་ལམ་བརྟགས་པ་གཅིག་ཀྱང་བྱ་གསུངས་ནས་དབུ་སྤྲད་དེ་གཟིམས་པ་དང་ནང་པར་ཁྱོད་ཀྱི་འགྲོ་བ་མང་པོ་ལ་ཕན་ཐོགས་པ་གཅིག་འོང་བར་འདུག །ཆོས་སྐྱོང་ཡང་ཁྱོད་ལ་དགའ་བར་འདུག །ལུས་དང་གྲིབ་མའི་ཚུལ་དུ་འགྲོགས་ནས་དགོས་པའི་དུས་སུ་དྲན་པས་ཆོག་པ་གཅིག་འོང་བར་འདུག །ང་ཡིས་ད་ནང་ཐོ་རངས་ཁར་དུང་ཤིན་ཏུ་ཆེ་བ་གཅིག་སྣང་བ་ལ། དུང་མཁན་པ་གཉིས་ཀྱིས་དཀོན་མཆོག་གི་སྤྱན་སྔར་དུང་རུང་ཞིག་གྱིས་ལ་ཕུལ་བྱས་པ་ལ། དེར་དུང་རུང་བྱས་པས་དུང་སྐད་ཇེ་ཆེར་སོང་ནས་དུང་དེ་ཤིན་ཏུ་སྐད་ཆེ་བས་མདོ་སྨད་ཁམས་སུ་ཡང་ཐོས་ངེས་པ་གཅིག་བྱུང་བ་དང༌། དུང་འདི་འདྲ་བ་དཀའ་བས་འདི་བཙུན་ཆུང་འདིས་བྱེད་དགོས་བྱས་ཙ། མི་ནག་པོ་བོང་རིང་བ་སྨ་ར་ཆགས་པ་གཅིག་འོང་ནས། ངས་དུང་འདིར་ལེགས་པར་ཉར་ཆོག་བྱེད་ཟེར་ནས། དགའ་སྤྲོ་དྭངས་བས་དུང་ལག་ཏུ་བླངས་པ་ལ། འོ་ན་བཙུན་ཆུང་འདིའི་ཉེ་གནས་ཀྱང་ཁོང་ལ་བཅོལ་དགོས་སྙམ་པ་བྱུང་ཙ་ན་འོ་དེ་ཙུག་མཛོད་ཟེར་བ་རྨིས་གསུངས། ཡང་གཏོར་མ་གཅིག་བཤམས་ནས། བཙུན་ཆུང་འདིའི་ལུས་དང་གྲིབ་མ་བཞིན་དུ་འགྲོགས་ལ་སྲུངས་ཤིག་བྱས་ནས་བཀའ་བསྒོ་ནན་ཏན་དུ་མཛད་དོ། །དེ་ནས་དགུང་ལོ་བཅུ་གཅིག་ལོན་ཙ་ན། དགེ་བའི་བཤེས་གཉེན་བྱ་ཡུལ་པ་བྱ་མཁར་བུ་དགོན་དུ་རབ་གནས་ལ་གདན་དྲངས་པ་དང་མཇལ་བས་ལམ་རིམ་གྱི་ཁྲིད་དང་གདམས་པ་ཞུས། ཁྲོ་བོའི་རྒྱལ་པོ་མི་གཡོ་བའི་བཟླས་ལུང་དང༌། ཇོ་བོ་ཐུགས་རྗེ་ཆེན་པོ་དང་ཇོ་མོ་སྒྲོལ་མ་ལ་སོགས་པའི་ལུང་གནང་བ་ཡང་ཐོབ། ཆོས་ཀྱང་མང་དུ་གསན་གསུངས། དེ་ནས་དགེ་བཤེས་བླ་མ་གྲུམ་བུ་ལུང་པའི་སྤྱན་སྔར་ཕྱིན་པས་ཁོང་ལས་བྱམས་ཆོས་སྡེ་ལྔ་དང༌། བསླབ་པ་ཀུན་ལས་བཏུས་པ་དང༌། བྱང་ཆུབ་སེམས་དཔའི་སྤྱོད་འཇུག་ལ་སོགས་པ་མཚན་ཉིད་ཀྱི་ཆོས་མང་དུ་གསན། དེར་ནས་ཡང་སྐྱེས་བུ་གསུམ་གྱི་ཁྲིད་ཀྱང་བྱ་གསུངས་ནས་མཛད། དེ་ནས་དགེ་བཤེས་གྲུམ་བུ་ལུང་པ་འདས་ནས། ཁོང་རང་གི་མཁན་པོ་དགེ་བཤེས་སྐ་བ་པའི་སྤྱན་སྔར་བྱོན་ནས། ཁོང་ལས་འདུལ་བ་མདོ་རྩ་ཡན་ཆད་ཀྱི་ཆོས་ལ་སློབ་གཉེར་བྱེད་ཀྱིན་ཡོད་ཙ་ན། བླ་མ་རིན་པོ་ཆེ་སྒམ་པོ་པའི་སྐུ་ཡི་སྙན་པ་ཐོས་ནས་དད་པ་བྱུང་ངོ། དེ་ནས་འཁོར་བ་ལ་སྐྱོ་བ་སྐྱེས་ནས་ཐུགས་དགོངས་བཏང་བས། ཆོས་ཐམས་ཅད་བུ་རམ་གྱི་གཟུགས་བརྙན་དང་འདྲ་ཞིང༌། གསང་སྔགས་ཐབས་ཀྱི་ལམ་ཉེ། དེ་ཡང་ཁ་ན་མ་ཐོ་བ་གསུམ་ལ། ཤའུ་ལ་ཐུག་པ་བས་ཀྱང་འཛེམ། འོན་ཀྱང་འཆི་ཁར་ཞེ་སྡང་ངམ་ལོག་ལྟར་སྐྱེས་ན་ངན་སོང་དུ་འགྲོ་ངེས། འཆི་བ་མི་རྟག་པ་སྒོམ་པ་ཆོས་ཀྱི་རྩ་བ་ཡིན་རུང༌། དུས་རྒྱུན་དུ་སྒོམ་ཀྱང་འཁོར་བ་ལ་ཞེན་པ་གཏིང་ནས་ལོག་པའི་གཏད་མེད། ཐོས་བསམ་གྱི་སྒྲོ་འདོགས་གཅོད་ཟེར་བ་འདི་ཡང་སློབ་མ་ལེགས་ན་གཉེན་པོར་མི་འགྲོ་བར་ང་རྒྱལ་གྱི་སྣོན་པར་འགྲོ་བ་ལ་ཚིགས་མེད། བྱམས་པ་དང་སྙིང་རྗེ་གཞན་དོན་འབྱུང་བའི་གཞི་ཆེན་པོ་ཡིན་ཀྱང༌། དམིགས་པ་མེད་པའི་སྟོང་ཉིད་ངེས་ཤེས་དང་བཅས་པ་དབྱེར་མེད་དུ་མ་འདྲེས་ན། ཉི་ཚེ་བའི་སྙིང་རྗེས་གཞན་དོན་འབྱུང་བའི་ངེས་པ་མེད། བླ་མ་དཀོན་མཆོག་གསུམ་གྱི་རྩ་བ་ཡིན་ཏེ། ཆོས་རྗེ་འགྲོ་བའི་མགོན་པོ་ཡང་དག་པར་རྫོགས་པའི་སངས་རྒྱས་སྤྲུལ་པའི་སྐུ། འཇིག་རྟེན་དུ་བྱོན་ངེས་པས་གཞན་དང་མཉམ་པ་མ་ཡིན། སྒོམ་པས་དོན་རྟོགས་ཟེར་ཏེ། བླ་མ་བརྒྱུད་པ་དང་ལྡན་པ། དམ་ཚིག་དང་ལྡན་པ་གཅིག་དགོས་པ་ཡིན། དེ་རྣམས་མ་འཛོམས་ན་ཞི་གནས་ཕྱི་བ་ཉལ་བ་དང་འདྲ་བས་ལམ་མགོ་བཏུམ། བླ་མ་ལ་ཡོན་ཏན་མེད་པར་སློབ་མས་ཡོན་ཏན་འདོད་པ་ནི་ཆུ་བཤིག་ནས་མར་འདོད་པ་དང་འདྲ། བླ་མ་ཕལ་ལ་མོས་གུས་མི་སྐྱེ། དེ་ནས་ཡོན་ཏན་གོང་མ་རྒྱུད་ལ་མི་སྐྱེ། སྐྱེས་ཀྱང་ངོ་སྤྲོད་མི་ཤེས་པས། ཐེ་ཚོམ་བྱས་པའི་ཡོན་ཏན་སྐྱོན་དུ་འགྱུར། སྐྱོན་དུ་བྱུང་ན་ཡོན་ཏན་དུ་བསྒྱུར་མི་ཤེས། ཉམས་སྣང་འདྲེར་བཟུང་བའི་རེ་བས་འགོག །དོགས་པས་བསུས་པར་བདུད་འཇུག །དངོས་གྲུབ་ཐོབ་པས་བར་གཅོད་བྱུང་ཟེར་ནས་ལོག་ལྟ་སྐྱེ། དེའི་གནང་ཀས་བསྒྲུབ་པ་དང། དཀའ་ལས་དཔག་ཏུ་མེད་པ་བྱས་པ་ཐམས་ཅད་ཆུར་ཕོ། སློབ་དཔོན་དང་གྲོགས་པོ་དམ་པ་རྣམས་ལ་སྡིག་གསོག་ཁྱད་གསོད་ཀྱི་ཚིག་རྒྱག །ཆོས་མི་བདེན། བདེན་ན་ད་ལྟ་ངས་འབད་རྩོལ་ལམ། ཞབས་ཏོག་གམ། བསྒྲུབ་པ་ཡུན་རིང་པོ་བྱས་པ་ལ་ནད་འདི་འདྲ་ཡོང་མི་ཐང་ཟེར་ནས། སྣང་བ་ལོག་པ་ཡང་མཐོང་ཐོས་ཡོད། དེ་བླ་མ་མཚན་ཉིད་དང་ལྡན་པ་མ་མཇལ་བའི་སྐྱོན་ཡིན། ཆོས་སྡེ་སྣོད་གསུམ་ནས་བླ་མ་གལ་ཆེ་བར་གསུངས་པ་ཡོད། བླ་མ་མ་བརྟེན་ན་སངས་རྒྱས་མི་སྲིད་གསུངས། ལུས་ཀྱི་འབད་རྩོལ་གྱིས་བསྒྲུབ་ཏུ་ཉན་པའི་ཆོས་ཅིག་རྙེད་པར་སོང་ན་ཡོན་ཏན་ཨི་སྐྱེ་རང་ལ་རག་སྙམས་ནས་དེ་ནུབ་ཉལ་བ་ལ་གཉིད་མ་བྱུང༌། ཕྱི་ཉིན་འགོལ་ས་ཞིག་ཏུ་ཕྱིན་ནས་གཟིམས་སྙམ་སྟེ་ཡར་ལ་སོང་ཙམ་ན། གད་ཕུག་ཅིག་ན་རྣལ་འབྱོར་པ་སྐྲ་ཕོད་དཀར་ཡོད་པ་གཞོན་ནུ་ཤིན་ཏུ་མཛེས་པ་ཞིག་ཙོག་པུར་ལུས་གནད་བཅས་ནས་གདའ་བ་ལ། ཁྱོད་གང་ནས་འོང་གར་བཞུད་བྱས་པ་ལ། ང་སྒམ་པོ་ནས་བླ་མ་རིན་པོ་ཆེའི་ཞབས་དྲུང་ནས་འོང་བ་ཡིན། ད་གར་འགྲོ་ངེས་པ་མེད་ཟེར། དེ་ལ་དགའ་བ་དང་མོས་གུས་ཐུན་མོང་མ་ཡིན་པ་གཅིག་སྐྱེས་ཏེ། བླ་མ་སྒམ་པོ་པ་དེ་སྐུ་སྙན་པ་ཤིན་ཏུ་ཆེ་བས་སྐུ་ཁམས་བདེའམ། སྐུ་འཁོར་ཅི་ཙམ་བདོག །ཆོས་ཇི་ལྟ་བུ་ལ་གཙོ་བོར་མཛད། ལེགས་པར་ཁྱོད་ཀྱིས་གསུངས་བར་ཞུ་ཞུས་པ་ལ། རྣལ་འབྱོར་པ་དེས་ཐལ་མོ་སྦྱར་ནས། ཡོངས་ཀྱི་བླ་མ་རིན་པོ་ཆེ་དེ་སྐུ་སྙན་པ་ཤིན་ཏུ་ཆེ་ནའང་ཐང༌། ཡང་དག་པར་རྫོགས་པའི་སངས་རྒྱས་གདུལ་བྱའི་དོན་ལ་འཇིག་རྟེན་དུ་བྱོན་པ་ལགས་མོད། སྐུ་ཁམས་ནི་དེང་སང་ཤིན་ཏུ་བདེ། སྐུ་འཁོར་ནི་མང་བར་བཞུགས། ཆོས་ནི་ངེས་དོན་ཕྱིན་ཅི་མ་ལོག་པ། ཐེག་པ་ཆེན་པོའི་གསང་སྔགས་ཀྱི་གདམས་པ་ཁྱད་པར་ཅན། ཚེ་གཅིག་ལུས་གཅིག་ལ་སངས་རྒྱས་པའི་གདམས་ངག་འབའ་ཞིག་གསུངས། དེ་མ་ཡིན་པ་ཉིན་གཅིག་ལ་རབ་གནས་གཉིས་མཛད་པ་དང། དུས་དེར་ཟངས་ཟླུམ་ན་བཞུགས་པ་དང༌། ངོ་མཚར་ཁྱད་པར་ཅན་གྱི་མཛད་པ་ཡང་ཡོད། ཉི་ཟེར་ལ་ཆོས་གོས་བཀལ་བ་དང༌། ཤིང་སྐམ་པོ་ཐབ་ཁུང་དུ་བཙུག་ནས་ང་ཡི་བསྟན་པ་འདི་དར་ཞིང་རྒྱས་པར་འགྲོ་ན་ཤིང་འདིའང་སྐྱེ་བར་གྱུར་ཅིག །ཅེས་སྨོན་ལམ་བཏབ་པས་ཤིང་ཕུང་པོ་སྐྱེས་པ་དང༌། ཟད་པར་གྱི་ཏིང་ངེ་འཛིན་ཐམས་ཅད་ལ་བཞུགས་པ་དང༌། བག་ལ་ཉལ་བ་མཁྱེན་པས་གང་ལ་གང་འདུལ་ཚུལ་གྱིས་ཆོས་གསུང་པས། ཡོན་ཏན་གོང་མ་མི་སྐྱེ་མི་སྲིད་པ་དང༌། འཁོར་རྣམས་ཀྱང་ས་ལ་གནས་པའི་བྱང་ཆུབ་སེམས་དཔའ་ཤ་སྟག་ཡིན། འཛམ་བུའི་གླིང་ན་སེམས་ཅན་རེ་རེའི་རྩར་ཐུགས་དགོངས་རེ་རེ་བཀྱེ་བས། ང་འདྲ་བ་རེ་ཁྱོད་འདྲ་བ་རེའི་རྩར་འོང་བ་ཡང་ཁོང་གིས་ཐུགས་དགོངས་པ་བཀྱེ་བ་ཡིན། བྱ་བ་ལ་སོགས་པའི་རྣམ་པར་ཐར་པ་དཔག་ཏུ་མེད་པ་ཞིག་གསུངས། སྟོན་ཆུང་ཁྱོད་རྗེ་རིན་པོ་ཆེ་ལ་ཤིན་ཏུ་དད་པར་འདུག་པ་ལ་ཕན་པ་རྐྱེན་ངན་གྱི་བར་ཆད་བྱས་པ་ཡིན། ཁྱོད་རྗེ་རིན་པོ་ཆེའི་རིགས་ཅན་འདུག་པས་ངས་དྲངས་ཚད་དུ་བཟླས་པ་ཡིན་གསུངས། སློབ་དཔོན་པས་ཆུང་ནས་བླ་མ་རིན་པོ་ཆེའི་སྐུ་ཡི་སྙན་པ་ཐོས་ནས་ཤིན་ཏུ་དད་པ་ལ། དེ་སྔ་ཆོས་ཉན་དུ་གཟས་ཏེ་སྤྱིར་བཏང་ཆོས་བརྒྱག་ཀྱང་བཟང་པོར་བསྐུར་བ་ལ། ཁོང་གིས་སློབ་གཉེར་མ་བྱུང་ཟེར་གྱིས་དོགས་པའི་རྒྱུ་མཚན་གྱིས་སྒོ་ནས་མ་ཐོན། དེ་རིང་ཁྱོད་དང་མཇལ་ནས་རྣམ་ཐར་གསུངས་པ་དེ་ཤིན་ཏུ་དགའ་བས་ད་ཅིས་ཀྱང་འགྲོ། བདག་ཀྱང་འཁོར་བ་ལས་གྲོལ་བར་འདོད་ནས། རིན་པོ་ཆེའི་སྤྱན་སྔར་མ་ཕྱིན་ན་ཅིས་ཀྱང་མི་ཕན་པའི་་དགོངས་པ་བྱུང་བ་ལ་སོགས་པ་རྣམས་བཤད་དེ། ད་ཇི་ལྟར་བགྱི་བྱ་བ་གྲོས་བྱས་པ་ཁྱོད་མིན་པ་མེད། ཁྱེད་ལ་ཙམ་པ་གཅིག་ཀྱང་འབུལ་བགྱིས་པས། རྣལ་འབྱོར་པ་དེ་ན་རེ། སྤྱིར་གསང་སྔགས་ཐབས་ཀྱི་ལམ་ཉེ་ཟེར་ཡང་འོ་ཅག་གི་བླ་མ་རིན་པོ་ཆེས་ནི་བར་ཆད་མེད་པར་ཁྱད་པར་གྱི་ལམ། མོས་གུས་གཅིག་ལ་བཞེད་པ་ལགས་པས་ཁྱེད་མོས་གུས་ཆེ་བས་ཡོན་ཏན་སྐྱེས་པ་དེ་རང་ཡིན་མོད། སྐད་ཅིག་ཙམ་ཡང་དད་པ་སྐྱེས་པ་ནི། བསོད་ནམས་དམ་པའི་མཆོག་ཏུ་འདི་འགྱུར་རོ། །གསུངས་པས་ད་ལྟ་དུས་ལ་བབ་སློབ་གཉེར་བྱེད་མ་ནུས་པ་སྒོམ་གྲྭར་ཕྱིན་པས་སྒོམ་ཡང་མ་བྱུང་ཟེར་བའི་དོགས་པ་མེད་ཀྱི། ཁྱོད་ལ་གྲུབ་ཐོབ་ཅིག་འོང་བ་རང་གིས་ཁས་བླང་གི །ཡོན་ཏན་གོང་མ་བྱུང་ན་ངས་ཁྱོད་བསླུས་པ་ཡིན། རིན་ཆེན་ཆོས་ཀྱང་དཀོན་ལ་རྟག་ཏུ་འཚེ་བའང་མང༌། གསུངས་པས། རིན་ཆེན་ཆོས་ཀྱི་དོན་ནི་ཕྱིན་ཅི་མ་ལོག་པ་ཚེ་གཅིག་གིས་སངས་རྒྱས་པ། སྣང་སེམས་ངོ་སྤྲོད་ཀྱི་གདམས་པ་ཕྱག་རྒྱ་ཆེན་པོ་དང༌། སྒོམ་པའི་བརྩོན་འགྲུས་ཀྱི་སངས་རྒྱས་པ་གཏུམ་མོ། མ་སྒོམ་པ་བཙན་ཐབས་ཀྱི་སངས་རྒྱས་པ་འཕོ་བ། གཏི་མུག་ཅན་གཉིད་དང་རྨི་ལམ་གྱིས་སངས་རྒྱས་པ་འོད་གསལ། མོས་གུས་ཅན་བླ་མ་ལ་ཅི་མཉེས་བསྒྲུབ་ཅིང་དམ་ཚིག་ལ་ནན་ཏན་བྱས་ན། ཅིས་ཀྱང་སངས་མི་རྒྱ་མི་སྲིད་པ་ཡིན་པས་ཐེ་ཚོམ་བྱ་མི་དགོས། དགེ་བཤེས་ཆེན་པོ་དང་གནས་གཞི་བཙན་པོའི་དགོས་པ་མེད། ཚེ་འདིར་སྡུག་བསྔལ་ལ་ཕྱི་མ་ཡང་དམྱལ་བར་འགྲོ་ངེས་པས་ཆོས་བརྒྱད་ཀྱི་སློབ་གཉེར་ཞོག །ང་རྒྱལ་གྱི་དཔེ་སྤོང༌། ཁེ་གྲགས་ཀྱི་གནས་གཞི་བོར། ཆགས་སྡང་གི་འཁོར་བ་སྐྱུར། ཕྲག་དོག་གི་བྱ་བྱེད་ཐོངས། གཏི་མུག་གི་རྒྱ་ཐག་ཆོད། ང་ལ་ཕྱེ་སྦྱིན་ཟེར་བ་དེ་གྲོ་ཕྱེ་གྱིས་ལ་སང་ནས་སོངས། སྙིང་གཏམ་དང་གཏད་གཉེར་མ་བྱེད་ཕྱིས་ཡི་གེ་བསྐུར་བས་ཆོག །བྱ་བྱེད་མང་ན་ཆོས་ཀྱི་བར་ཆད་ཡིན་གསུངས་པས། བྱ་བ་ཅོག་གིས་ཞོག་ལ་བཞུད་པར་ཞུ་གསུངས་སྐད། རོག་ངའི་ཁ་ལ་ཉན་པ་ཞིག་ཡོད་པ་དེ་ཡང་ཁྲིད་ན་བྱས་པ་ལ་ཉོན་ན་ཁྲིད། དགེ་བ་བསྐུལ་ན་གྲོགས་ཀྱི་མཆོག་ཟེར་བས། དགེ་བ་ཁྱད་པར་དུ་འཕགས་པ་ནི། རྗེ་རིན་པོ་ཆེའི་ཞལ་མཐོང་ན་ཕྱིར་མི་ལྡོག་པའི་ས་ཐོབ་པ་ཡིན། འདིར་ཐ་སྙད་ཀྱི་བསམ་ཁྲལ་དང༌། ཁེ་གྲགས་ཀྱི་རྩོད་པ་བྱས་པ་ནི་མི་ཚེ་སྟོང་ཟད་རང་ཡིན་མོད། བླ་མ་སངས་རྒྱས་དང་ཞལ་འཕྲད་རྐྱེན་བྱས་པས་ཁོ་བོའི་འདྲེན་པའི་བླ་མ་དྲིན་ཅན་དུ་ཁྱོད་ཡོང་བ་ཡིན། ཁྱེད་བཞུད་ན་དགའ་བ་ལ། ད་སྒམ་པོར་འབྱོན་བྱས་པས། ཁྱོད་དགའ་ན་ང་བྲན་གྱིས་འགྲོགས་པ་ཡིན་མོད། ང་རྣལ་འབྱོར་པ་ཡིན་པས་འགྲོ་འོང་གི་གཏད་སོ་མེད། རྗེ་རིན་པོ་ཆེ་ལ་གསོལ་བ་ཐོབ་ཅིང་སོང་དང་ཅིས་ཀྱང་བར་ཆད་མི་འོང༌། མོས་གུས་ཆེ་བས་ཡོན་ཏན་སྐྱེ་བ་ལ་ཚེགས་མེད། དེའི་དུས་སུ་ང་ལ་ཡང་དགའ་བར་ཡོང༌། སང་ནས་བཞུད་གསུངས་ནས་རྣལ་འབྱོར་པ་དེ་བཞུད་སྐད། དེ་ནས་བླ་མ་འབའ་རོམ་པ་དེ་ཚུར་རང་ཡུལ་དུ་བྱོན་ནས་འགྲོ་བའི་ཆས་བྱས། གྲོགས་པོ་བླ་མ་སྤོས་ཀ་བ་སངས་རྒྱས་སྒོམ་པ་བྱ་བ་དེའི་དུས་ན་བཙུན་ཆུང་ཞིག་ཡིན་པ་ལ། ཁྱོད་དྭགས་པོར་བླ་མ་རིན་པོ་ཆེའི་སྤྱན་སྔར་ཨི་འགྲོ། བླ་མ་དེ་ཡང་དག་པར་རྫོགས་པའི་སངས་རྒྱས་དང་ཁྱད་པར་མེད་པ་ཡིན། འཁོར་བ་འདི་ན་སྐྱིད་མེད་ཆོས་ཞིག་བྱེད་དགོས། ཆོས་བྱེད་པ་ལ་དང་པོ་བླ་མ་ཞིག་འཚོལ་དགོས་ཏེ། བླ་མ་དེ་འདྲ་བ་དེང་སང་འཛམ་བུ་གླིང་དུ་བཙལ་ཡང་མི་རྙེད་བྱས་ནས། བླ་མའི་ཡོན་ཏན་དཔག་ཏུ་མེད་པ་བརྗོད་པ་དང༌། དེར་ཁོང་ཡང་དད་ནས་འགྲོ་གསུངས་སྐད་བླ་མ་འབའ་རོམ་པས་ད་མྱུར་བརའགྲོ། མི་ཡི་ཚོར་མ་འཇུག་ཟེར་ནས། དེ་རྣམ་པ་གཉིས་ཀྱིས་ཕྱག་རྟེན་ལ་ཇ་དང་གསེར་ཡོད་པ་ཁྱེར་ནས། བླ་མ་དྭགས་པོ་རིན་པོ་ཆེའི་སྤྱན་སྔར་ཕྱིན། ཇ་དང་གསེར་ཕྱག་ཏུ་བཏང༌། ངེད་ཡང་བླ་མ་རིན་པོ་ཆེའི་སྐུའི་སྙན་པ་ཆེ་བར་ཐོས་པས་དད་པ་སྐྱེས་ནས་ཆོས་བྱེད་དུ་འོང་བ་ཡིན། ཐུགས་ལ་འདོགས་པར་ཞུ་ཞུས་པས། བླ་མ་དྭགས་པོ་རིན་པོ་ཆེའི་ཞལ་ནས། ་ངེས་པར་ཆོས་བྱེད་པ་ལ། ཁམས་གསུམ་འཁོར་བ་འདི་ལས་ཡིད་དབྱུང་ནས། ཚུལ་ཁྲིམས་རིན་པོ་ཆེ་མིག་གི་འབྲས་བུ་ལྟར་སྲུང་བ་དང༌། བླ་མ་དམ་པ་ལ་མོས་གུས་བྱེད་ཅིང༌། ལས་རྒྱུ་དང་འབྲས་བུ་ལ་ནན་ཏན་བྱེད་དགོས་པ་ཡིན། དེ་ལྟར་བྱས་ན་ཡོན་ཏན་སྐྱེ་གསུངས། དེ་ནས་ཚེས་བཅུའི་ནངས་པར་ཚོགས་མཆོད་ཅིག་མཛད་པའི་དུས་སུ། བླ་མ་དྭགས་པོ་རིན་པོ་ཆེ་ལ། ཁོང་གིས་ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་དངོས་ཡིིན་སྙམ་པའི་མཐོང་སྣང་ངེས་ཤེས་དང་བཅས་པ་སྐྱེས་ཏེ། བླ་མ་རིན་པོ་ཆེའི་ཞལ་ནས་ཁྱོད་མོས་གུས་ཆེ་བར་འདུག །ཁྲིད་ཆེན་པོ་རང་མེད་ཀྱིས་འགྲོ་བ་མང་པོ་ལ་ཕན་ཐོགས་པ་གཅིག་འོང་བ་ཡིན། ཁྱོད་རང་ནང་དུ་སྡོད་གསུངས་ནས་དེ་ལྟར་ཞུ་བྱས་ཏེ་ནང་དུ་བསྡད་ཐུགས་ལ་བཏགས། དེ་ནས་དྭགས་ལ་སྒམ་པོར་བྱོན་ནསདགུན་ཟླ་གཅིག་ཙམ་ལོན་པའི་དུས་སུ་འབའ་རོམ་པ་ཉིད་སྐུ་ཁམས་ཤིན་ཏུ་མ་བདེ་བས། གློ་བུར་དུ་ཆུ་བུར་མང་པོ་བྱུང་ནས་ནད་ཀྱི་ཟུག་གཟེར་བཟོད་སྲན་མེད་པ་གཅིག་བྱུང༌། སྡུག་བསྔལ་བས་ད་ཅི་ཕན་སྙམ་པའི་རྟོག་པ་གཅིག་སྐྱེས་པ་ལ། ད་རེས་བླ་མ་རིན་པོ་ཆེ་ཡང་དག་པར་རྫོགས་པའི་སངས་རྒྱས་དང་ཞལ་ཐ་དད་མེད་པ་འཇིག་རྟེན་དུ་བྱོན་པའི་ཞབས་དྲུང་དུ་ཕྱིན་པ་ལས། ཐབས་གཞན་དུ་འཚོལ་ན་ང་རང་ལན། ཡུལ་གཞན་གྱི་ནད་པས་གྲུབ་མཐའ་བློ་མ་བསྒྱུར་ནས་འདིར་སྙེགས་པ་དང༌། མོས་གུས་བྱེད་གསོལ་བ་བཏབ་ནས་ནད་སོས་པ་དང་ཕན་དུ་རེ་བ་ལ་ངས་ཐོས་བསམ་ཡང་མང་དུ་བྱས། དཔེ་དང་ནོར་རྫས་གནས་གཞི་ལ་མ་ཆགས་པར་སློབ་དཔོན་སྐ་བ་པའི་ས་ནས་ཀྱང་དམ་བཅའ་བྱས་ནས་ཡོད་པ་ལ། ད་ནད་དང་བར་ཆད་བྱུང་ན་ང་རང་གི་སྐྱོན་ཡིན་སྙམ་ནས། ཐུགས་ཡེངས་པ་མེད་པར་དམིགས་པ་རྩེ་གཅིག་ཏུ་བསམ་གཏན་དང༌། མོས་གུས་དྲག་པོའི་སྒོ་ནས་གསོལ་བ་བཏབ་པས། རྨི་ལམ་དུ་ལྷ་ཁང་གི་དབུ་རྩེ་འདྲ་བའི་མཐོང་ཁུང་ཡོད་པ་གཅིག་ཏུ་ཕར་བལྟས་པས། མཚོ་ནག་པོ་ཆེ་བ་གཅིག་གི་ནང་ནས། ཉ་དང་ལྕོང་མོ་ལ་སོགས་པ་མང་པོ་གཅིག་འདུག་པ་སྣང་བ་ལ། འཇིགས་བཞིན་དུ་དེས་ནང་འགྲོ་སྙིང་འདོད་པ་གཅིག་བྱུང་དུས་ དེར་རྗེ་རིན་པོ་ཆེ་དང་ཐང་ཅིག་མཇལ་ན་དགའ་བ་དང༌། ཁོང་ལ་ཞུ་ནས་འགྲོ་དགོས་སྙམ་པ་གཅིག་བྱུང་བ་ནི། སྐད་ཅིག་མ་ལ་བླ་མ་རིན་པོ་ཆེ་ཞལ་གཏུམ་པའི་ཉམས་དང་ལྡན་པ་གཅིག་སྣང་བ་ལ་བྱུང་ནས་སློབ་དཔོན་གྱིས་འབའ་རོམ་པའི་ཕྱག་གཡོན་པའི་སྲིན་ལག་དམ་དུ་བཟུང་སྟེ། བསམ་ངན་ཞེ་སྡང་གིས་སྦྱོར་བ་ཡིས། །རིགས་ངན་དུད་འགྲོའི་གནས་དག་ཏུ། །རྐྱེན་ངན་རྣམ་རྟོག་གི་ཡིད་འཇུག་ཀྱང༌། །ལས་ངན་གྱི་གནས་སུ་འཆར་དོགས་ཡོད། །སྣང་སྲིད་འཁོར་འདས་རང་གི་སེམས། །མོས་གུས་དྲག་པོ་རྟེན་འབྲེལ་གྱི་གནད། །ཐུགས་རྗེས་ལྕགས་ཀྱུས་རྒྱུན་དུ་འཛིན། །འགྱུར་མེད་བདེ་ཆེན་གནས་སུ་འདེང། །གསུངས་ནས་ཕྱག་གི་ཡར་འཐེན་ནས། ཡབ་སྲས་ནམ་མཁའ་ལ་གཤེགས་པ་རྨིས་གསུངས། རྣལ་སད་པ་དང༌། ཁམས་ཀྱང་དྭངས་སང་གིས་སོང༌། ཆུ་བུར་རྣམས་ཀྱང་རྡོར་སྔར་བས་ཀྱང་ལུས་ཡང་ཞིང་ཤེས་པ་ཡང་བདེ་བ་གསལ་བ། མི་རྟོག་པའི་ཉམས་ཁྱད་པར་ཅན་སྐྱེས་སྐད། ཡང་མཛོ་དཀར་ཨ་ཡུ་གཅིག་ཡོད་པ་ལ་རྗེ་རིན་པོ་ཆེའི་ཆིབས་པ་མཛད་ནས་རྐེ་འཕྲང་བྱ་བ་ལ་འགྲོ་ཙ་ན། མཛོ་ཡི་ལག་པ་འདྲེད་ནས་རིན་པོ་ཆེ་མཛོ་གོང་ནས་ལྷུང་བ་དང༌། བླ་མ་འབའ་རོམ་པས་སྐུ་ས་ལ་མ་ལྷུང་བར་རིན་པོ་ཆེ་སྤང་དུ་ཏོག་གིས་བླངས་པས་ཤིན་ཏུ་མཉེས་ནས། ཁྱོད་ཀྱིས་དེ་རིང་གོ་བཅད་གསུངས་ནས། སྐུ་ཚེའི་བར་ཆད་བསལ་བ་ལ། ཡང་བླ་མ་རིན་པོ་ཆེ་ལྷ་ལུང་དུ་བྱོན་པའི་དུས་སུ་རྟ་དཀར་པོ་ལུག་གུ་བྱ་བ་ཆིབས་ནས་བཞུད་པ་ལ། གློ་བུར་དུ་རྟ་འདྲོགས་ནས་འུར་སྒྲ་བྱུང་བ་དང༌། ཆིབས་པ་ཡང་འགྲོགས་ནས་རིན་པོ་ཆེ་རྟའི་གོང་ནས་ལྷུང་བ་ན། ཡང་ས་ལ་མ་ལྷུང་བར་བླ་མ་འབའ་རོམ་པས་ཕྱག་གཉིས་ཀྱིས་སྐུ་བླངས་པས་རིན་པོ་ཆེ་ཡང་མཉེས་ཏེ། སྐུ་ཚེའི་བར་ཆད་བསལ་བ་དང༌། ཡང་དྭགས་པོ་རོང་ཁ་བས་བླ་མ་རིན་པོ་ཆེ་རབ་གནས་ལ་སྤྱན་དྲངས་པའི་དུས་སུ་དྭགས་པོའི་ཡུལ་གྱི་མི་ཡོད་ཚད་འདུས། གྲྭ་པ་ཤིན་ཏུ་མང་བར་ཚོགས་པའི་དུས་སུ། བུམ་ཆུ་དང་ལྷ་བཤོས་དང་མེ་ཏོག་དང་རྡུལ་ཚོན་ལ་སོགས་པ་རྣམས་ཀུན་གྱི་ཧབ་ཐོབ་བྱས་པས་རིན་པོ་ཆེས་ཁྱེད་ཚོས་དེ་ཙུག་མ་བྱེད་བྱས་ཀྱང་མ་ཉན་པར་འཕུལ་འདེད་བྱས་པས། རིན་པོ་ཆེ་ཉིད་མིའི་འོག་ཏུ་གླེབ་མ་ཐུབ་པ་དང། བླ་མ་རིན་པོ་ཆེ་འབའ་རོམ་པ་ཕར་ལ་རྒྱུག་སྟེ་རིན་པོ་ཆེའི་སྐུ་ཁུར་ནས་མིའི་ནང་ནས་ཚུར་བྲོས་ཏེ་ཡོངས་པས། རིན་པོ་ཆེ་ཉིད་ཀྱིས་ཞལ་ནས་ད་རེས་ཀྱི་རབ་གནས་འདི་ཤིན་ཏུ་གཉན་པར་འདུག །དེ་རིང་ཁྱོད་མིན་ན་གྱོད་ཅན་དེ་རྣམས་ཀྱིས་ཁོ་བོ་གསོད་ངེས་པར་འདུག་གསུངས་ནས་ཤིན་ཏུ་མཉེས་སྐད། གྲོགས་པོ་རྣམས་ཀྱིས་ངེད་ཀྱིས་རྡུལ་ཚོན་འདི་འདྲ་རྣམས་ཐོབ་ནས་ཡོད། ཁྱོད་ཀྱིས་ཅི་ཐོབ་ནས་ཡོད། བླ་མ་འབའ་རོམ་པས་ངས་ཆོས་སྐུ་གཅིག་ཐོབ་གསུངས་པ་དང༌། ཁོང་རྣམས་ན་རེ་ཁྱེད་བདེན་དེ་ཆོས་སྐུ་ཡིན། ཁྱེད་མིན་ན་རིན་པོ་ཆེ་སྐུ་མི་བཞུགས་པ་ལ་ཐེ་ཚོམ་མེད་གསུངས་ནས་ཐམས་ཅད་དགའ་བ་དང་མོས་པ་བཅས་དེརསྐུ་ཚེའི་བར་ཆད་བསལ། དེའི་དུས་བླ་མ་འབའ་རོམ་པ་དེ་མོས་གུས་ལ་འགྱུར་བ་མེད། གཅིག་ཆར་དུ་བྱིན་རླབས་ཞུགས། འཇིགས་དང་ཉམ་ང་མེད། རྐྱེན་ངན་གྲོགས་སུ་ཤར། སྣང་སེམས་གཉིས་སུ་མེད། དབྱེར་མེད་ཆོས་སྐུར་གསལ། རྣམ་རྟོག་ངོས་བཟུང་མེད། བསྒོམ་བྱ་སྒོམ་བྱེད་སྟོར། ཉམས་ཀྱི་ཆགས་ཞེན་མེད། རྟོགས་པའི་གདིངས་དང་ལྡན། རིག་པ་དྲི་མ་མེད་ཡིད་བྱེད་རྣམ་པར་དག །སྐྱེ་འགགས་གནས་པ་མེད། གཉུག་མ་ལྷན་ཅིག་སྐྱེས། ཐུགས་རྗེ་དམིགས་པ་མེད། གཞན་དོན་ལྷུན་གྱིས་གྲུབ། རྣམ་རྟོག་རང་སར་གྲོལ་ནས། ཐམས་ཅད་སེམས་སུ་ཤེས་པས། དང་པོའི་ཤེས་པ་མ་བཅོས་པ་དེ་མ་འགགས་པ། འཇིན་ཆགས་ཐམས་ཅད་དང་བྲལ་བ། བློས་མ་བྱས་པ་ངེས་ཤེས་དང་བཅས་པ། ཐེ་ཚོམ་མི་བྱ་བར་བརྗོད་པར་དཀའ་བ། བརྡས་མཚོན་དུ་མེད་པའི་རྟོགས་པ་གཤའ་མ་གཅིག་ཤར། རྟོགས་པ་འདི་ལྟ་བུ་ཤར་ཞུས་པས། རིན་པོ་ཆེའི་ཞལ་ནས་དེ་དག་ཡིན་གསུངས་ཤིང་ངོ་སྤྲོད་རྒྱས་པ་གཅིག་གནང༌། འདི་དག་གི་སྐབས་སུ་རྗེ་མི་ལ་དང་མཁའ་འགྲོ་མས་ལུང་བསྟན་པ་བཞིན་མགུར་དཔག་ཏུ་མེད་པ་མཛད། དེ་ནས་ཚོགས་འཁོར་ཞིག་མཛད་པའི་དུས་ཆོས་རྗེ་རིན་པོ་ཆེའི་ཞལ་ནས་སྒོམ་ཆེན་པ་བྱ་བ་ལ་མྱོང་བ་ནང་ནས་ཤར་བའི་མགུར་དགོས་པས། ཁྱོད་ཀྱི་གྲེ་བ་འདི་རྫོགས་པའི་སངས་རྒྱས་མི་ལའི་དབྱངས་དང་འདྲ་བར་འདུག་པས། རྟོགས་པ་དོན་གྱི་མགུར་གྱིས་གསུངས་ནས་མཛད་པས། ཆོས་རྗེ་རིན་པོ་ཆེ་རྫོགས་པའི་སངས་རྒྱས་མིའི་གཟུགས་ཅན་དེའི་མགུར་དང་འདྲ་བ་འདུག་གསུངས་ཤིང་ཕྱག་ཐལ་མོ་སྦྱར་དབུ་དུད་པ་དང་སྤྱན་ཆབ་ཀྱང་འབྱོན། ཡང་བླ་མ་དྭགས་པོ་རིན་པོ་ཆེས་བླ་མ་འབའ་རོམ་པ་ལ་བྱིན་རླབས་གཅིག་མཛད་པས་དེའི་དུས་སུ། ཁྱོད་ལ་བྱིན་རླབས་བྱས་པས་ང་ལ་ཕན་པ་བྱུང་གསུངས། སྔོན་ཁོ་བོའི་སློབ་དཔོན་ལྕགས་རི་གོང་ཀ་བ་ལས་དབང་བསྐུར་ཅིག་ཞུས་པ་ལས་ཁོང་གི་ཞལ་ནས། མདངས་ངས་ཁྱོད་ལ་དབང་བསྐུར་བྱས་པས། སྒྲིབ་པ་ང་རང་བས་ཁྱོད་དག་པ་གཅིག་བྱུང་གསུངས། ཁྱོད་ལ་ཡང་དེ་འདྲ་གཅིག་བྱུང་བས་ཁྱོད་ཀྱིས་འགྲོ་བ་ལ་བརྡ་བྱས་པས་ཀྱང་ཕན་པ་ཞིག་འོངས་བ་ཡིན། ཡང་རིན་པོ་ཆེ་ཞལ་ནས། འཚོགས་པ་བདུན་བརྒྱའི་ནང་ནས། གནས་བརྟན་ཡུལ་སྣ་བ་དར་མ་དབང་ཕྱུག་དང༌། མགར་སྒོམ་དཀར་པོ་གཉིས་ལས་ཉམས་རྟོགས་ཆེ་བ་སུ་ཡང་མེད་གསུངས། ཡང་ཉིན་གཅིག་བླ་མ་འབའ་རོམ་པས་མོས་གུས་བྱེད་ཀྱིན་བཞུགས་ཙ་ན། སྒོམ་པ་ཡེ་ཤེས་གཡུང་དྲུང་བྱ་བས་རིན་པོ་ཆེའི་སྤྱན་སྔར་ཁྱོད་མྱུར་བར་འབྱོན་ཟེར་བའི་སྐད་བྱུང་བ་དང༌། བླ་མ་འབའ་རོམ་པ་མྱུར་བར་རྒྱུག་ཙམ་ན་བྲག་རོམ་ཟབ་མོ་འཇིགས་སུ་རུང་བ་གཅིག་ཡོད་པ་ལ། བྲག་དེའི་མགོ་བསྐོར་ན་ནི་ཡུན་རིང་འགོར་བས། སྔ་ནས་ཁོ་རང་མཆོང་པས་ཐར་ས་ཡོད་པས་མཆོང་བ་དང་ཞབས་འདྲེད་ནས་ཕྱམས་གྱིས་སོང་བ་དང༌། ད་ནི་ངེས་པར་འཆི་སྙམ་ནས་བླ་མ་རིན་པོ་ཆེ་སྤྱི་བོར་བཞུགས་པ་དྲན་རིན་པོ་ཆེ་ལ་སྐྱབས་སུ་མཆིའོ་ཡང་བྱས། རྐང་པ་བཙུག་པ་ཨེ་འོང་སྙམ་ནས་རླུང་བཙན་ཐབས་སུ་བཟུང་བ་དང༌། མདུན་གྱི་བྲག་དཀྱིལ་ཙམ་ན་ཞབས་འཐོག་ས་ཡོད་མེད་གཅིག་ལ་བརྟེན་ནས་བོས་པས་ཕྱུགས་རྫིས་ཐོས་པས་དེས་གཞན་ལ་སྦྲན་ནས། ཐག་པ་རིང་པོ་མང་དུ་མཐུད་ནས་བྱུང་བས། ཐག་པ་ལ་འཇུས་ནས་ཡར་ཕྱིན། སྣད་པ་དང་ལུས་ལ་ན་བ་ཡེ་མི་འདུག །རིན་པོ་ཆེ་ལ་ཞུས་པས་འཆི་ལྟས་བཟློག་ཤིན་ཏུ་དཀའ་བ་གཞན་གྱིས་མི་བཟློག་པ་གཅིག་བྱུང་བ་ལ། ང་ལ་ཁྱོད་ཀྱིས་མོས་གུས་ཀྱིས་གདུང་སེམས་ཤིན་ཏུ་ཆེ་བས་འཆི་ལྟས་བཟློག་པ་ཡིན་གསུངས། ང་མཐའ་ལ་ལྷུང་བའི་དུས་སུ་ཡང་རིན་པོ་ཆེ་དྲན་ནས་མོས་གུས་བགྱིས་ཞུས་པ་ལ། ཁོ་བོ་དུས་དེར་ཁྱོད་ཀྱི་དྲུང་ནས་ཡོད་པ་ཡིན་གསུངས། ད་ནི་ཚེ་རིང་བར་ཡོངས་གསུངས་སྐད། དེ་ཕྱིན་ཆད་འཇིག་རྟེན་གྱི་བྱ་བ་ཐམས་ཅད་ལ་ཞེན་པ་གཏིང་ནས་ལོག་པ་ཞིག་དུས་རྒྱུན་ཆད་མེད་པར་བྱུང་སྐད། ཡང་སྡོམ་ལུང་ནས་བྱ་རྐོང་དུ་འགྲོ་བའི་དུས་སུ། རྟ་དཀར་པོ་ལུ་གུ་བྱ་བ་ཆིབས་པ་མཛད་ལམ་མི་བདེ་བ་གཅིག་ལ་རྟའི་ལག་སྦུབ་བརྒྱབ་པས། སྐུ་བསྐྱོད་པ་ཡང་བླ་མ་འབའ་རོམ་པས་སྐུ་ཏོག་གིས་བླངས་གསུངས། རྟ་འདིའི་གོང་ནས་ང་ནི་འཇིགས། ཁྱོད་ཀྱིས་ཡང་དག་གོ་བཅད་གསུངས། དེར་ཡང་སྐུ་ཚེའི་བར་ཆད་བསལ། དེ་ནས་ཕྱག་གཉིས་ལ་ཁྲི་མཛད་པ་ལྟར་བྱས་ཡོར་སྣམ་འཇམ་པོའི་ཕྱམས་ཕྱེ་གཅིག་ཡོད་པ་ལ། ཕྱག་གི་སྟེང་ན་ཕར་བཀབ་གདན་བྱས། དེའི་སྟེང་དུ་བཞུགས་པར་ཞུས་པས། བཞུགས་ནས་ཐག་རིང་པོ་གཅིག་ལ་གདན་དྲངས། རིན་པོ་ཆེའི་ཞལ་ནས། རྒྱ་གར་འདོ་ལི་དང་འདྲ་བར་སྣང་བ་ཤིན་ཏུ་ཆེ་བར་བྱུང༌། ཁྱོད་ཀྱིས་གོ་བཅད་གསུངས་ནས་མཉེས་པར་བྱུང་སྐད། ལར་དྭགས་པོའི་ལུང་པ་དེ་ས་གཟུགས་ཆེ་བ་དང༌། ལམ་མི་བདེ་བ་དང༌། རིན་པོ་ཆེ་སྐུ་ན་བྱོན་པས་བླ་མ་འབའ་རོམ་པས་ཡར་གཤེགས་མར་གཤེགས་ལ། རིན་པོ་ཆེ་སྐུ་རྒྱབ་ལ་ཁུར་བ་ཡིན་པ་ལ་ཞབས་ཏོག་མཛད་པས་ཤིན་ཏུ་མཉེས་པ་ཡིན་གསུངས། དེ་ལ་སོགས་པ་ལུས་ཀྱི་ཞབས་ཏོག་གཞན་གྱིས་བསྒྲུབ་པར་དཀའ་བ་ཡང་ནས་ཡང་དུ་བགྱིས་པས། བླ་མ་རིན་པོ་ཆེ་དྭགས་པོ་ལྷ་རྗེ་ཤིན་ཏུ་མཉེས། ཉམས་མྱོང་དང་རྟོགས་པ་ཁྱད་པར་ཅན་ཕུན་སུམ་ཚོགས་པ་རྒྱུད་ལ་སྐྱེས་ནས། དུས་རྒྱུན་མཉམ་བཞག་རྗེས་ཐོབ་རྒྱུན་ཆད་མེད་པར་འོད་གསལ་ཆེན་པོའི་ངང་ལ་བཞུགས་པ་ཡིན་གསུངས། དེ་ནས་ཉིན་གཅིག་བླ་མ་རིན་པོ་ཆེའི་ཞལ་ནས། ངས་ཁྱོད་ལ་གདམས་པ་འདོད་ཆོས་སོ་སོའི་ཁྲིད་ལ་སོགས་པ་ཐམས་ཅད་ནི་ཚང་བར་བྱས་པ་ཡིན་པས། ད་ཁྱོད་བྱང་འབའ་རོམ་བྱ་བའི་རི་ཁྲོད་རྣམ་པར་དག་པ། གངས་ཏི་སེ་ནས་གངས་བརྒྱུད་མ་ཆད་པར་རྗེ་བཙུན་མར་པ་ལྷོ་བྲག་པ་ཡབ་སྲས་ལ་སོགས་པ་གྲུབ་ཐོབ་དཔག་ཏུ་མེད་པ་བཞུགས་པའི་སྒྲུབ་གནས་ཡིན་པས། དེར་སོང་ལ་བསྒྲུབས་པ་གྱིས་གསུངས་ནས་གསེར་སྲང་གང་གནང༌། ངས་གཞན་ལ་སྦྱིན་པ་མ་ཡིན་ཏེ། འོ་ཅག་ཕ་སྤད་འགྲོགས་ཡུན་རིང་བ་ཡིན། ཁྱེད་ཀྱིས་ལུས་སྲོག་ལ་མ་ལྟོས་པར་ང་ཡི་ཞབས་ཏོག་ཡང་དང་ཡང་དུ་བྱས་ཤིང་ངའི་ངག་གཅོག་མ་མྱོང༌། དང་པོ་གསེར་འདིས་འཚོ་བ་སྒྲུབས་ལ་དེ་ལ་བརྟེན་དང༌། དེ་ནས་ཁྱོད་ལ་འཚོ་བ་མི་ཡིས་སྟེར་ནས་འོང་གསུངས། དེ་ནས་བླ་མ་འབའ་རོམ་པའི་ཐུགས་དགོངས་ལ། ཡོངས་ཀྱི་བླ་མ་རིན་པོ་ཆེ་སངས་རྒྱས་འཇིག་རྟེན་དུ་བྱོན་པ་དང་ཞལ་མཇལ་ནས་ཀྱང༌། ཡང་དགོན་དུ་སྡོད་བཅུག །རྒྱུད་རྣམ་པར་དག་པར་བྱིན་གྱིས་བརླབས་ལོ་གྲངས་མང་པོར་ཞབས་ཏོག་ཡང་བྱས། གདམས་ངག་དང་རྗེས་སུ་བསྟན་པ་ཡང་མཛད། ཚོགས་པ་མང་པོའི་ནང་ནས་ཀྱང་གཞན་དང་མི་འདྲ་བར་ཐུགས་ལ་བཏགས། བླ་མ་རིན་པོ་ཆེ་ལས་འཇིག་རྟེན་གྱི་ཁམས་ན་ང་ལ་དྲིན་ཆེ་བ་མེད། རྨི་ལམ་དུ་ཆོས་རྗེ་རིན་པོ་ཆེ་གཞན་དོན་ལ་དགོངས་ནས། སྤྲུལ་སྐུའི་དཀྱིལ་འཁོར་བདེ་བ་ཅན་དུ་བཞུད་པ་རྨིས། ཁོང་སྤྲུལ་པའི་སྐུ་ལ་ཉོན་མོངས་མི་མངའ་ནའང༌། གདུལ་བྱའི་རྟག་འཛིན་ཤས་ཆེ་བ་རྣམས་དྲངས་པར་བྱ་བའི་ཆེད་དུ། འཕགས་པ་སྡུད་པ་ནས་གསུངས་པའི་དོན། རྒ་དང་ན་དང་འཆི་བ་མེད་ཀྱང་འཆི་འཕོ་སྟོན། བྱ་བའི་དོན་ཚུལ་གྱིས། གདུལ་བྱའི་དོན་དུ་སྤྲུལ་སྐུ་བདེ་བར་གཤེགས་པ་ཡང་སྲིད། དེང་སང་སྐུ་ན་བྱོན། སྐུ་འབོར་ལྕི་བ་དང༌། ཞལ་ཏ་ཡང་སྔར་དང་མི་འདྲ་བ་མང་དུ་གསུངས། ངས་ཀྱང་ལུས་སྲོག་ལ་ལྟོས་མེད་པར་སྐུ་ཚེའི་བར་ཆད་ལན་གྲངས་མང་དུ་བསལ། མི་མཉེས་པ་སྐད་ཅིག་ཙམ་ཡང་བྱེད་མ་མྱོང༌། ཁོང་གི་རྩ་ན་ང་ཡོད་པ་དེ་བཞེད་པ་ལ། རི་ཁྲོད་གཞན་དུ་སོང་ཟེར་བ་དེ་དགོངས་པ་ཅན་ཡིན་སྲིད། དེ་ལྟར་མིན་ཀྱང་ང་རང་སོང་བའི་ཤུལ་དུ་རིན་པོ་ཆེ་སྐུ་ཡལ་ན། ངས་ཀྱང་རིན་པོ་ཆེའི་སྐུ་ཡུན་རིང་དུ་བསྟེན་པ་ཡིན་པ་ལ། འདའ་ཁར་ཁོ་བོ་ཡང་མེད་ཟེར་ནས་མིས་ཀྱང་འཕྱ། དེའི་སྟབས་ཀྱིས་ང་རང་ཡང་ཕྱིས་འགྱོད་པ་ཡིན་པས་ད་དུང་ལུས་ཀྱི་ཞབས་ཏོག་ཅི་ནུས་སུ་བྱ་དགོས་པ་ལ། མི་འགའ་ཞིག་གིས་ཞབས་ཏོག་བྱེད་འདོད་ཀྱང་ཐུགས་ཀྱིས་མི་བཞེད། ངས་ཀྱང་འདས་བྲལ་མིན་པ་རྩ་ནས་བྲལ་མི་ཕོད། ད་རུང་སྐུ་བཞུགས་རིང་ལ་གར་ཡང་མི་འགྲོ་བྱས་ནས་ཕྱག་འཚལ་ནས་ཞུས། དེ་ནས་སྔ་ཕྱི་ཇི་ལྟར་བཀའ་དྲིན་ཆེན་པོས་ཡང་དང་ཡང་དུ་བསྐྱངས་ཞིང་བྱིན་གྱིས་བརླབས་པ་ཐམས་ཅད་དྲན་ནས་སྤྱན་ཆབ་མང་པོ་ཡང་བྱུང༌། གསེར་གནང་བ་ཡང་ང་ལ་མི་འཚལ་བྱས་ནས་ཞུས་པ་ལ། བླ་མ་དྭགས་པོ་རིན་པོ་ཆེའི་ཞལ་ནས། རྒྱ་ལ་ཆགས་ཀྱང་ཤིན་ཏུ་ཕྲ། །གང་ལ་ཆགས་པ་དེས་འཆིང་བས། །རྩ་བྲལ་ནམ་མཁའི་འདུད་པ་ཁྲོལ། །རྨི་ལམ་རི་ཁྲོད་རོ་སྙོམས་གྱིས། །གསུངས་ནས་གསེར་ཁོ་བོས་ཁྱོད་ལ་བྱིན་པས་ངས་བློས་བཏང་ནས་ཡོད། ཁྱོད་ཀྱིས་ང་ལ་ལན་གཅིག་ཚུར་ཕུལ་བས། དེའི་རྟེན་འབྲེལ་གྱིས་ཁྱོད་ལ་གསེར་ལ་སོགས་པའི་འབུལ་བ་འོང་གསུངས། དེ་ནས་སློབ་དཔོན་འཕགས་པ་ཁྱོད་ཀྱིས་ཆོས་ཁུག་ཁྱེར་ལ་ཤོག །ཁོ་བོས་དཔེ་ཡོད་ཚད་ཁོང་ལ་སྟེར་དགོས་གསུངས་པས། བླ་མ་འབའ་རོམ་པས་ང་ལ་དཔེ་མི་འཚལ། ང་ཡིས་སློབ་དཔོན་བྱ་བསམ་མེད། བླ་མ་རིན་པོ་ཆེའི་དྲིན་གྱིས་ཉམས་སུ་ལེན་རྒྱུ་ནི་ང་རང་གི་ཤེས་ཞུས་པ་ལ། ཁྱོད་ལ་གཞན་གྱི་སློབ་དཔོན་བྱ་བསམ་མེད་པ་དང༌། དཔེ་མི་དགོས་སྙམ་པ་དེ་རང་གི་དཔེ་ཡོད་ཚད་དགོས་པ་ལགས་གསུངས་ནས། དཔེ་བྲི་འོས་ཐམས་ཅད་གནང་ནས་ཀུན་གྱི་ལུང་གནང་བ་དང༌། ཁྲིད་ནི་ངས་བྱས་ཟིན་པ་ཡིན། དཔེ་དགོས་ཟེར་བ་ལ་ཁོ་བོས་ཀྱང་མི་སྟེར་གསུངས་ནས། ཞེ་འདོད་མེད་པའི་སྒྲུབ་སེམས་ཅན། །དམིགས་པ་མེད་པའི་ཐུགས་རྗེ་ཆེ། །གསོལ་བ་བཏབ་ན་དགོས་འདོད་འབྱུང༌། །ཅི་འདུལ་སྣ་ཚོགས་ཕྲིན་ལས་འཚལ། །གསུངས། ཡང་ཁྱོད་ལ་ནོར་སྐལ་དུ་ཕོར་སྡེར་གཉིས་དང༌། རྒྱབ་ཡོལ་གཅིག་དང༌། དེ་གསུམ་སྦྱིན། མི་འདོད་མ་ཟེར། ཁྱོད་ནི་སེན་མོའི་སྟེང་དུ་ཞིང་རྨོ་བའི་ཡུལ་སོང་ན་ཡང་ལྟོ་རྒྱབ་གཉིས་ཕྱེད། ཡི་དྭགས་ཀྱི་ཡུལ་དུ་བསླང་ཀྱང་གྲོ་རྙེད། ཁྱེད་ཀྱི་སྒྲུབ་པའི་ཆ་རྐྱེན་འཚོ་བ་ལ་སོགས་རྙེད་མི་རྙེད་ཁོ་བོས་རང་ཤེས་གསུངས། རེ་དོགས་མེད་པའི་གདེངས་དང་ལྡན་པར་བྱོས། རྣམ་གཡེང་གི་ནོར་ལ་ཞེན་མེད་འབྲོས་པར་འགྱུར། གཞན་དོན་མཛད་ནས་སླར་ཡང་གང་ལ་འཆི། དེ་དུས་ཙམ་ཁོ་བོས་རྗེས་སུ་དྲན་པ་ཡིན་གསུངས། ངས་བླ་མ་ལ་ཟང་ཟིང་གི་ཞབས་ཏོག་མ་བྱས་མ་བསམ། ང་ནི་སྒྲུབ་པའི་ཞབས་ཏོག་གིས་མཉེས་པ་ཡིན་གྱི། ཟང་ཟིང་གིས་ཁོ་བོ་མཉེས་པ་མ་ཡིན་ནོ། གནས་རི་ཁྲོད་དགོན་པར་ཕྱིན་ནས་ཏིང་ངེ་འཛིན་ཁྱད་པར་ཅན་རྒྱུན་ཆད་མེད་པར་ཉམས་སུ་བླངས། རྗེས་སྤྱོད་ལམ་གྱིས་རོ་སྙོམས་ནས་འགྲོ་བ་སྐྱབས་མེད་པ་མང་པོ་ལ་ཕན་འདོག་པར་ཡོངས་བས། ཐ་མ་བྱང་འབའ་རོམ་བྱ་བ་སྒྲུབ་གནས་ཁྱད་པར་ཅན་ཡིན་པས། རི་ཁྲོད་རྣམ་པར་དག་པ་དེར་སོང་ལ་སྒྲུབ་པ་གྱིས་གསུངས་ནས་ལུང་བསྟན་ད་ཁྱོད་ཀྱི་ཞུ་བའི་ངོ་མི་གཅོག །ཁྱོད་ཅི་དགའ་བ་བྱ་གསུངས། ཞག་སུམ་ཅུ་རྩ་བདུན་བར་འོ་སྐོལ་ཕ་སྤད་ལྷན་ཅིག་ཏུ་བསྡད་གསུངས། དེར་བླ་མ་འབའ་རོམ་པ་བཞེངས་ནས། བླ་མ་རིན་པོ་ཆེ་ལ་མཎྜལ་ཕུལ་ནས་ཕྱག་འཚལ། བླ་མ་རིན་པོ་ཆེ་ལ་རླུང་སེམས་དབང་ཐོབ་པས་ཅི་ཡང་ཉན་པས་ཅིས་ཀྱང་མྱ་ངན་ལས་མི་འདའ་བར་བཞུགས་སུ་གསོལ་བྱས་ནས་ཞུ་བ་ཕུལ་བས། བླ་རིན་པོ་ཆེའི་ཞལ་ནས། ང་ད་ལྟ་འདི་བས་གཞན་ན་འགྲོ་དོན་ཆེ་བར་ཡོད་པས། ཅིས་ཀྱང་མི་ཕན་པར་འགྲོ་དགོས་གསུངས་པ་དང༌། དེ་ནས་བླ་མ་འབའ་རོམ་པ་དེ་ཐུགས་ཤིན་ཏུ་སྐྱོ་བས། བཀའ་བརྒྱུད་ཀྱི་བླ་མ་རིན་པོ་ཆེ་རྣམས་ལ་གསོལ་བ་འདེབས་པ་དང༌། བླ་མ་རིན་པོ་ཆེ་སྒམ་པོ་པ་ལ་སངས་རྒྱས་སུ་འདུ་ཤེས་པའི་མོས་གུས་ཡང་བྱས་ཤིང་བཞུགས་པས། རང་གི་སེམས་རྟོགས་པའི་དོན་ཉམས་མྱོང་དབྱེར་མེད། འཁོར་འདས་ཀྱི་ཆོས་ཐམས་ཅད་རང་གི་སེམས། སེམས་ཕྱག་རྒྱ་ཆེན་པོར་ལྷུན་གྱིས་གྲུབ་པར་རྟོགས་པས། སྒོམ་མ་ཡིན་པའི་ཡུལ་མེད། སྣང་བ་མ་ཡིན་པའི་ཐབས་གཞན་ནས་བཙལ་མི་དགོས། དེ་ཉིད་མ་ཡིན་པའི་ཤེས་རབ་སྟོང་པ་ཉིད་ལོགས་སུ་བསྒོམ་མི་དགོས། གཉིས་སུ་མེད་པའི་དོན་ལ་བཏང་བཞག་མེད་པའི་ཚུལ་གྱིས་ཡེངས་པ་མེད་པར་བྱས་ནས། རྩོལ་སྒྲུབ་མེད་པར་ངང་གིས། འགྲོ་འོང་མེད་པར་བཞུགས་ནས། བདུད་དང་མཚན་མ་དང་བར་ཆད་ཐམས་ཅད་རང་སར་གྲོལ། ཐུན་མོང་གི་ཡོན་ཏན་དང་དྲོད་རྟགས་ཅི་བྱུང་ཡང་བླ་མ་ལ་ཞུ་བ་མ་ཡིན་པ་གསང་སྤྱོད་མཛད། བླ་མ་ལ་མོས་གུས་བྱས་པས་ཡོན་ཏན་ཐམས་ཅད་བླ་མའི་བྱིན་རླབས་ཀྱི་རྫོགས་པར་བྱས་ནས་བཞུགས་ཙ་ན། ཉིན་གཅིག་རིན་པོ་ཆེའི་ཞལ་ནས། ཆོས་ཤིག་བཤའ་མར་བྱེད་ན། གཞི་དད་པ་དང་མོས་གུས་ཁྱད་པར་ཅན་གྱིས་ཀུན་ནས་བསླང༌། ལམ་བརྩོན་འགྲུས་ཡེངས་པ་མེད་པའི་སྒོ་ནས་ཉམས་སུ་བླངས་ན། འབྲས་བུ་སངས་རྒྱས་ཟེར་བ་དེ་མངོན་དུ་བྱེད་པ་ལ་དཀའ་ཚེགས་མེད་པ་ཡིན་པས། འཁོར་བ་བློ་ནས་སྤོང། གཉེན་བཤེས་ཤུལ་དུ་ཞོག །ཆོས་བརྒྱད་རྒྱབ་ཏུ་སྐྱུར། འདུ་འཛིའི་གཡེང་བ་སྤོང༌། ཚུལ་ཁྲིམས་རྒྱན་དུ་གྱིས། དད་པ་གཏིང་ནས་སྐྱེས། སེམས་ཀྱི་གཞི་རྩ་ཆོད། འཁྲུལ་པ་ནང་ནས་ཞིག། སྣང་སེམས་གཉིས་སུ་མེད། རྣམ་རྟོག་ཆོས་སྐུར་གསལ། ཐ་མལ་ཤེས་པ་དེ་འོད་གསལ་ངང་དུ་འབྲལ་བ་མེད་པས་ཆོས་ཐམས་ཅད་ལམ་དུ་འགྲོ། རྐྱེན་ངན་གྲོགས་སུ་འཆར། དེའི་དུས་ན་མོས་གུས་ཁྱད་པར་ཅན་སྐྱེ་བས། དངོས་གྲུབ་འཇུག །བར་ཆད་ཞི། གཞན་ཕན་ཆེ། གྲུབ་ཐག་ཉེ། མཁའ་འགྲོ་འདུ། བླ་མ་མཉེས་པ་ཡོན་ཏན་ཐམས་ཅད་ཀྱི་རྩ་བ་ཡིན། དེའི་དུས་སུ་རི་ཁྲོད་རྣམ་པར་དག་པ་ན། བག་ཚ་དང་ཉམ་ང་མེད་པར་རྡོ་རྗེའི་མགུར་ཤུགས་ལས་འབྱུང་བ་བླངས་ན་མཁའ་འགྲོ་མཉེས་པ་ཡིན་པས། རྟོགས་པ་དོན་གྱི་མགུར་ཡང་ལོངས་གསུངས། ཁོ་བོའི་འདས་མཆོད་ལ་ཁྱོད་རི་ཁྲོད་རྣམ་པར་དག་པ་ན། སྒྲུབ་པ་རྩེ་གཅིག་ཏུ་བྱེད་ངེས་པ་ཞིག་གྱིས། མེ་ཏོག་སྤར་གང་དང་ཆུ་ཕོར་གང་ཕུལ་ནས། མོས་གུས་བྱེད་ཅིང་གསོལ་བ་བཏབ་ན་རབ་ཡིན་གསུངས། དེ་ནས་ཞབས་ཏོག་བྱེད་ཀྱིན་བཞུགས་ཙམ་ན། ཞག་སུམ་ཅུ་རྩ་གཉིས་ནས་རིན་པོ་ཆེ་སྐུ་ཡལ། དེ་ནས་ས་འབུམ་མ་ཚར་གྱི་བར་དུ་ཡོན་བདག་ཅིག་གིས་ཁོང་བཞི་སྡེ་གཅིག་ལ་བསྙེན་བཀུར་བྱེད་པ་ཞིག་བྱུང་བ་དེའི་བར་ལ་བཞུགས། དེར་ས་འབུམ་ཚར་ནས་ཡུལ་དུ་ཕྱིན་ཏེ་རྟ་གཅིག་ལ་ཕྱེ་ཡ་བཞི་བཀལ་ནས་འདམ་ཀོ་སྐྱེམ་གསེར་གྱི་ལྷ་ཁང་དུ་བྱོན་ནས། རྟ་དེ་ཡང་དེར་བཙོང་སྟོན་པ་ཚུལ་ཁྲིམས་གྲགས་ཀྱིས་འཚོ་བ་དང༌། ཆ་རྐྱེན་སྦྱར་བ་ཁྱེར་ནས་བླ་མས་ལུང་བསྟན་པའི་བྱང་འབའ་རོམ་བྱ་བ། ཡུལ་ཆེན་ཏི་སེའི་གངས་རྒྱུད་ཆུ་ཆེན་གངྒཱའི་མགོ་བོ། སྡེ་ཆེན་པ་ཚབ་ཀྱིས་ཡུལ། རི་ཆེན་རྫ་མོ་སྤུངས་པ། རྫོང་ཆེན་བྲག་དམར་བསམ་ཡས། ཐང་ཆེན་ཕྱུག་མོའི་གོང་བ། རུ་ཆེན་བཞིའི་རྒྱུད་ལམ། བྱང་ཆེན་རི་ཁྲོད་རྣམ་དག །མཚོ་ཆེན་ཕྱུག་མོའི་ལྟག་པ། །ལོ་ཆེན་སྒྲ་བསྒྱུར་མར་པས། །སྟོན་ཆེན་བཤད་གྲྭ་འཛུགས་ས། །སྒོམ་ཆེན་སེང་ཁྱུའི་གྲུབ་གནས། །མཐུ་ཆེན་ནུས་པ་ལྟ་ས། །རྩམ་ཆེན་ལྷ་སྒོའི་གངས་དཀར། འཛམ་བུ་གླིང་གི་རིའི་རྒྱལ་པོ་ཡིན་པས། ཁྱད་པར་དུ་མཐོ་ལ་བརྗིད་ཆེ་བ། བྱ་རྒོད་ཀྱི་རྒྱལ་མཚན་ཕྱར་བ་དགུང་གི་ཀ་བ་འདྲ་བའི་དབྱིབས་ལེགས་པ། རྩེ་ལ་ལྷོ་སྤྲིན་འཁྲིགས་ནས། མགུལ་པར་གཡུ་ཡི་ན་བུན་འཐིབ་པ། ཡིད་འཇུག་པ་ཡང་དག་པར་རྫོགས་པའི་སངས་རྒྱས་ཀྱི་ཞལ་སློབ། གནོད་སྦྱིན་གྱི་སྡེ་དཔོན་ཆེན་པོ་གང་བ་བཟང་པོའི་ཕོ་བྲང་གནས་བཅས་པའི་རི་ལྷུན་ཆགས་པའི་དྲུང༌། བྱིན་ཆགས་པའི་ས། ཉམས་དགའ་བའི་ཡུལ། རྩམ་ཆེན་ལྷ་སྒོའི་ཞོལ། སྒྲུབ་གནས་འབའ་རོམ་ལྷུན་གྲུབ་ཀྱི་གཞལ་ཡས་ཁང་རྫ་རིན་ཆེན་སྤུངས་པ་ལ་གཤེགས་ནས། བརྒྱག་བསྐྱེལ་ཞང་བཙུན་འབྱུང་གནས་འོང་བ་མིན་པ། སུས་ཀྱང་མ་མཐོང་བར་དྲང་སྲོང་ཆེན་པོ་ལྟར་གཅིག་པུར་སྒྲུབ་པ་ནན་ཏན་དུ་མཛད་སྐད། ཡང་དུས་རེ་ཞིག་ན་རྫ་དེའུ་བཞུགས་པའི་དུས་སུ་ཉིན་གཅིག་མི་གོས་དཀར་ཅན་ཞིག་ཡོངས་ནས་ཕྱག་འཚལ་བསྐོར་བ་བྱེད་ཀྱིན་སྣང་བས། བླ་མས་དེ་ལ་ཁམས་བདེའམ་བྱས་པས་ངེད་བདེ། ཆོས་གཅིག་ཞུར་མཆིས་པ་ལ་ཞུ་མ་ཕོད་ཟེར། དེར་བླ་མས་སྐྱབས་འགྲོ་དང༌། ལས་རྒྱུ་འབྲས་ཀྱི་ཆོས་ཞིབ་ཏུ་གསུངས། དགེ་བསྙེན་གྱི་སྡོམ་པ་ཕོག་པས་ཆོས་ཉན་བར་ལ་ཡར་ལྟ་་མར་ལྟ་མང་དུ་བྱེད་ཀྱིན་འདུག །དེ་ནས་ཡང་ཉིན་གཅིག་བྱུང་བས་ངའི་ཉེ་འབྲེལ་དང༌། གྲོགས་པོ་འགའ་ཡང་ཆོས་ཞུ་ཟེར་བ་ལ་བླ་མ་འབའ་རོམ་པས། ཁྱོད་རང་ཆོས་ཉན་པའི་བར་ལ་མི་ཟུག་པར་སྣང་བ་ལ། ཁོང་གི་ཆོས་ཞུར་ཅི་འོང་བྱས་པ་ལ། ངེད་མི་མ་ཡིན་བྱ་བ་ཡིན་པས་བག་གིས་སློབ་པ་ལགས། ཁོང་ལ་ཡང་ཆོས་གནང་བར་ཞུ་ཟེར་བ་དང༌། འོ་ན་རུང་བྱས་པས་གནོད་སྦྱིན་ཕོ་མོ་མང་པོ་རྩར་བྱུང་ནས་ཕྱག་འཚལ་བ་ལ། བྱམས་པ་ཆེན་པོའི་ཏིང་ངེ་འཛིན་ལ་ཆོས་སྔར་ལྟར་གསུངས་པས། མི་མ་ཡིན་པ་ཐམས་ཅད་དགའ་བ་དང༌། ངེད་ཀྱི་འབུལ་བ་ཡང་བྱེད་པ་ལགས་ཟེར་བ་ལ། ལན་ཅི་ཡང་མ་གསུངས། དེར་ཕྱག་རྒྱ་ཆེན་པོའི་སྒོམ་ཞིག་བསྟན་སྙམ་པ་དང་ཆར་སྤྲིན་དེང་པ་ལྟར་ཡལ་ནས་སོང༌། དེ་ནས་ཞག་འགའ་ལོན་པ་ན། ཕུ་ཕྱོགས་སུ་སོང་དང་འབྲི་རོ་གཅིག་ཡོད་ཟེར་བའི་སྐད་ལྷང་ལྷང་བ་གཅིག་གཟུགས་མེད་པ་རྣ་ལམ་དུ་བྱུང༌། དེ་ཅི་ཡིན་སྙམ་ནས་ཕུ་ན་ཡར་གཤེགས་པ་ལ། འབྲི་གཅིག་སྤྱང་ཀུའི་བསད་མ་འཕྲལ་གྱི་རོ་གཅིག་སྣང་བས་ཡུལ་འབྲི་ཨི་ཡིན་ནམ། ཡིན་ན་གཞན་གྱི་འབྲི་རྐུས་ཟིན་ཟེར་ཞིང་སྐུར་པ་འདེབས་སྙམ་ནས་ལེགས་པར་གཟིགས་པ་ལ། དེར་བྱང་འབྲིར་སྣང་བས་ཁོང་པའི་གློ་བ་བོར་ནས། རྐང་ལག་རྣམས་ཚུར་རྒྱབ་ལ་གཏད་ནས་ཁུར་ཡོང༌། བཤུ་བ་དང་ཤ་ཚིལ་ཉ་ར་ཡང་གཤའ་མར་མ་ཤེས་གསུངས། དེར་བསམ་པ་ལ་འདི་ཁོང་གིས་གནོད་སྦྱིན་དེ་ཙམ་ཀུན་ལ་ཆོས་བསྟན་དུས་འབུལ་བ་བྱེད། ཟེར་བ་དེའི་རྣམ་འཕྲུལ་ཡིན་ཏེ་འོང༌། དེ་ཀུན་གྱི་མ་ལེགས་པ་བྱས་སྙམས་ནས། ཏིང་ངེ་འཛིན་གྱི་འགུག་གཞུག་བྱས་ནས༌། དགེ་བསྙེན་དཀར་པོ་བྱས་ནས་བོས་པ་དང༌། ཁོ་བྱུང་བས་ཁྱོད་ལ་ངས་དགེ་བསྙེན་གྱི་སྡོམ་པ་ཕོག །ལས་རྒྱུ་འབྲས་ཀྱི་ཆོས་དེ་ཙམ་བསྟན་པ་ལ། འདི་འདྲ་བའི་སྡིག་པ་བྱེད་པ་བྱས་ནས་བཀའ་བཀྱོན་པ་དང༌། འབྲི་དེ་ངེད་ཀྱི་བསད་པ་མ་ཡིན། འདིར་བཙན་བདུད་གཤིན་རྗེ་དྲི་ཟའི་ཚོགས་དཔག་ཏུ་མེད་པ་ཡོད་པས་དེ་རྣམས་ལ་འཁོར་ལྕེ་སྤྱང་གི་གཟུགས་ཅན་ཡོད་པ་ཡིན་པས་དེ་ཀུན་གྱིས་བསད་པ་ཡིན། ངེད་ཀྱི་སློབ་དཔོན་ལ་སྐད་བཏང་བ་ཡིན་ཟེར། དེར་བླ་མ་འབའ་རོམ་པས་ང་ལ་བླ་མ་རིན་པོ་ཆེས་འབའ་རོམ་བྱ་བ་སྒྲུབ་གནས་ཁྱད་པར་ཅན་ཡིན་པས་དེར་སོང་ལ་སྒྲུབ་པ་གྱིས་ལས་རྒྱུ་འབྲས་ལ་འཛེམས་གསུངས། བླ་མའི་གསུང་སྒྲུབ་པའི་ཆེད་དུ་འདིར་བསྡད་པ་ཡིན་པ་ལ། ཁྱོད་ཡུལ་བདག་གིས་སྡིག་ལ་སྦྱོར་བར་འདུག །ཁྱོད་རང་དམ་ཚིག་མི་བསྲུང་བར་འདུག །ད་ང་འགྲོ་དགོས་པར་སྣང་གསུངས་པ་དང༌། དེར་ཁོང་རྣམས་དང་མི་མ་ཡིན་མང་པོ་འཚོགས་ནས་ངེད་མི་མ་ཡིན་བྱ་བ་ཤིན་ཏུ་ཆད་བཙན་པ་ཡིན་པས། དམ་ཚིག་ཀྱང་བསྲུང་བ་ཡིན། ཁྱད་པར་ངེད་རྣམས་སློབ་དཔོན་པདྨ་འབྱུང་གནས་བོད་དུ་བྱོན་དུས་ནས། ལས་རྒྱུ་འབྲས་ཀྱི་ཆོས་མང་དུ་ཞུས་པའི་སློབ་མ་དམ་ཚིག་ཅན་ཡིན། སུ་ཡིན་ཡིན་ལ་ངེད་མི་མ་ཡིན་རོ་གྱོང་བས་ཆོས་མི་ཞུ། བླ་མ་ཁྱོད་མི་མེད་ལུང་སྟོང་དུ་བརྩོན་འགྲུས་དྲག་པོའི་སྒོ་ནས་གྲོགས་མེད་པར་ཐུགས་དམ་རྩེ་གཅིག་ཏུ་མཛད་པས། ཁྱེད་ལ་དད་པར་བྱུང་ནས་ཆོས་ཞུས་པ་ལགས། ད་ཕྱིན་ཆད་སྡིག་བྱེད་རེ་ཟེར་ནས་ཐམས་ཅད་ཀྱིས་མནའ་བསྐྱལ། སློབ་དཔོན་ཆེན་པོ་དེ་སྐད་མི་གསུངས་བར་ཅིས་ཀྱང་མི་བཞུད་པར་ཞུ། ཇི་ལྟར་གསུངས་པ་བཞིན་དུས་ད་ལྟ་ནས་བཟུང་སྟེ་མ་ཤིའི་བར་དུ་ཨ་ཀྱང་ཡང་ཆེ་སྟེ། སངས་མ་རྒྱས་ཀྱི་བར་དུ་བཀའ་ལས་ཡང་མི་འདའ་བར་གསུངས་བཞིན་དུ་བཀའ་བསྒྲུབ་པ་ལགས་ཟེར་ནས། ཀུན་གྱིས་ཕྱག་འཚལ་ནས་ཞུ་དོན་ནན་ཏན་དུ་ཕུལ་བ་ལ། དེར་བླ་མས་སློབ་དཔོན་གྱི་སློབ་མ་ཡིན་པས་དེ་ལྟ་ལེགས་ཏེ། འོ་ན་ང་ཡི་བཀའ་ལས་མི་འདའ་བར་སྡོམ་པ་སྲུངས། ཁྱེད་ཀྱིས་སངས་རྒྱས་ཀྱི་བསྟན་པ་སྲུངས། ཁྱད་པར་དུ་བཀའ་འཁོར་རིགས་བརྒྱུད་དུ་གྱུར་པའི་བུ་སློབ་རྣམས་ལ། བསྲུང་ཞིང་སྐྱོབས་པ་དང་སྡོང་གྲོགས་གྱིས། དམ་ཚིག་ལས་མི་འདའ་བར་ཆོས་དང་མཐུན་པར་གྱིས་དང་ང་བསྡད་གསུངས་པས། དེར་མི་མ་ཡིན་

ཐམས་ཅད་དགའ་ནས་གསུངས་པ་ལྟར་བགྱི་ཐུགས་ལ་བཏགས་ཟེར་ནས་ཐམས་ཅད་འཇའ་ཚོན་ཡལ་བ་ལྟར་ནམ་མཁར་དེངས་ནས་སོང་གསུངས། ཡང་དུས་རེས་ཤིག་ཙམ་ན་སློབ་དཔོན་རྫ་ཕུག་གཅིག་ལ་ཐུགས་དམ་མཛད་པར་བཞུགས་ནས་ཡོད་ཙམ་ན། ཕྱི་སྒོ་ན་ཀུ་དི་རེ་བ་གཅིག་གྲགས། ཕྱིར་ལངས་ནས་སྒོ་ན་ཕ་བོང་ཆེན་པོ་གཅིག་ཡོད་པའི་སྟེང་དུ་བཞེངས་ནས་གཟིགས་པས། རྟ་པ་མང་པོ་གཅིག་གིས་རྨས་མ་གཅིག་དཔང་ཁྱེར་བྱས་ནས་བྲོས་ཏེ་བྱུང༌། དེ་ཅི་ཡིན་སྙམ་ཙ་ན། དེ་རྣམས་ན་རེ་ད་མཇུག་ན་སླེབ་ནས་བྱུང༌། རྨས་མ་སློབ་དཔོན་ལ་བཅོལ་ལ་རང་རེ་རྣམས་ལ་འུར་བྲོས་ཟེར་ཞིང༌། རྨས་མ་སློབ་དཔོན་མདུན་དུ་སྐྱུར་ནས་ཁོང་རྣམས་བྲོས་ནས་ཐལ། མར་གཟིགས་ཙམ་ན་ཕྱི་ན་རྟ་པ་མང་པོ་གོ་གྱོན་མཚོན་ཐོགས་ནས། མདའ་འགེངས་ཀྱིན་ཡར་རྒྱུག་ནས་བྱུང་བ་དང༌། འཆོར་མི་འཆོར་ལྟ་ཡི་ཟེར་བ་དང༌། རྟ་མ་རྒྱུགས་ཁྱེད་རྣམས་ཀྱི་བར་ང་ཡི་བྱེད་དང་ང་ཡི་ཁ་ལ་ཉོན་གསུངས་་པ་དང༌། ཀུན་གྱིས་རྒྱུག་འཕྲོ་བཅད་ནས་ཚོམ་བསྡད། དེ་ནས་ཕྱིར་ལོག་ནས་འགབ་ཏུ་དལ་གཅིག་བསྡད། དེ་ནས་འབྲོས་མིི་རྣམས་བྱུང་ནས་རྨས་མ་ཁུར། ཁོང་གིས་སློབ་དཔོན་ལ་ཅང་མི་ནུས་པ་འདུག །དེ་རིང་སློབ་དཔོན་བས་གོ་བཅད་ཟེར་ཞིང་ཕྱག་འཚལ་ཞིང་ཕུ་ཕྱོགས་སུ་སོང་སྐད། ཁོང་རྣམས་ཡར་སོང་བ་དང༌། རྟ་པ་ཕྱི་ཏ་རྣམས་ཡར་བྱུང་ནས་དེ་རིང་འཁྲུགས་པ་དེ་སློབ་དཔོན་ལ་འབུལ་ཟེར་ཕྱག་འཚལ་བ་དང༌། ཡོན་ཡག་པོ་ཕུལ་ཆེ་གོ་བཅད་གསུངས། ལྷ་འདྲེ་ཡིན་པར་མཁྱེན་ཀྱང་མི་མཁྱེན་པ་ལྟར་མཛད་ནས་ཁྱེད་མི་སྡེ་གང་ཡིན་གསུངས་པས། ངེད་མི་མ་ཡིན་ཡུལ་འདིའི་ལྷ་འདྲེ་འཁྲུགས་པ་ཡིན་ཟེར་ནས་ཁོང་རྣམས་ཕྱིར་ལོག་ནས་སོང་སྐད། ཕྱིས་ཡང་ནུབ་གཅིག་ནས་སྔར་གྱི་རྟ་པ་རྨས་མ་ཁྱེར་བ་རྣམས་བཅོལ་ཟེར་བ་དེ་རྣམས་ཀྱི་འཁོར་བུ་ཚ་བུད་མེད་ལ་སོགས་པ་མང་པོ་ཁྲིད་ནས་བྱུང༌། དེར་མར་དང་ཐུད་ལ་སོགས་པའི་འབུལ་བ་ཆེན་པོ་ཡང་བྱས། དེ་རྣམས་ཀྱི་དཔོན་པོ་དྲག་ཤོས་གཅིག་གིས་ཞོ་སྙན་གྱི་རུ་ཅོ་གང་སློབ་དཔོན་ལ་དྲངས་ནས་སློབ་དཔོན་བས་ངོས་བཀའ་དྲིན་ཆེན་པོས་སྐྱབས། དེ་ཉིན་རྨས་མ་བཅོལ་ནས་མ་བྲོས་ན་བསད་ཤི་མང་དུ་འོང་བར་སྣང༌། ད་ཆོས་ཀྱང་ཞུ་ཅི་གསུངས་བསྒྲུབ་པ་ཡིན། སློབ་མ་བྱེད་ཟེར་བ་ལ། བླ་མ་འབའ་རོམ་པས་དེ་དུས་ཁྱེད་ཀྱི་ང་ཡོད་པ་ཅི་ཙུག་མཐོང་གསུངས་པ་དང་ངེད་རྣམས་ཞེད་པས་ཡར་བྲོས་ཙ་ན་རྡོ་ཕ་བོང་དེའི་ཁ་ལ་མེ་དཔུང་ཆེན་པོ་གཅིག་ནམ་མཁའ་ལ་རེག་རེག་འབར་བའི་ནང་ནས། སློབ་དཔོན་བཞེངས་ནས་བཞུགས་པར་མཐོང་བས། ད་འདི་ལ་བཅོལ་ལ་བྲོས་བྱས་པ་ལགས། ཁོང་རྣམས་ཀྱིས་ཀྱང་དེ་ལྟར་དུ་མཐོང་བས་ཡར་མི་བདའ་བར་ཡིན་པ་ལགས་ཟེར་སྐད། དེར་སློབ་དཔོན་གྱིས་ཆོས་བསྟན་པ་དང༌། བཀའ་དྲིན་རེ་ཆེ་ཟེར་ནས་ཀུན་ཡལ་ནས་སོང་གསུངས། སྤྱིར་རྫ་རིན་ཆེན་སྤུངས་པ་ལ་ལོ་བཞི་བཞུགས། མདོའི་བྲག་ལ་དགོན་བཟུང་ནས་ལོ་གསུམ་ཕན་ཚུན་གཉིས་ཆར་ལོ་བདུན་བཅས་འབའ་རོམ་དུ་བཞུགས། དེ་ནས་རྩི་ཀླུང་མཁའ་བས་གདན་དྲངས་ནས་ཁམས་སུ་ཕེབས། ལམ་ཧ་རི་སྣར་མགུར་དང་གར་མཛད་པས་ཞབས་རྗེས་བྱོན། རྩི་རྒྱུད་ཀོ་མཛོའི་བྲག་ལ་ལོ་མང་དུ་བཞུགས། དེར་དགོན་བཏབས། གྲུབ་ཆེན་བརྒྱད་ཞལ་གཟིགས་ཐུགས་དམ་ལ་བོགས་ཆེ། འགྲོ་རྣམས་སྨིན་གྲོལ་ལ་བཀོད། དེ་ནས་དབུས་སུ་ཡར་བྱོན་ནས་འབའ་རོམ་དགོན་དུ་ལོ་བཅུ་གསུམ་དུ་གྲྭ་པ་བསྐྱངས་ཞིང་བཞུགས་པ་ལ། ཉིན་གཅིག་འབའ་རོམ་གྱི་བྲག་དམར་རྫོང་ཆེན་དུ་ཡང་ཐོག་གོང་མ་དང༌། འོག་མའི་བར་གྱི་བྲག་སྣའི་ཐད་ཀྱི་ནམ་མཁའ་ལ། རྨ་བྱའི་གདུགས་ཆེན་པོ་ཤིན་ཏུ་ངོ་མཚར་ཅན་གཅིག་ནམ་མཁའ་ལ་ཀྱི་ལི་ལི་འདུག་པ་ལ། འདི་འདྲ་སྔོན་མེད་པ་ཅི་ཡིན་སྙམ་ཙ་ན། བླ་མ་འབའ་རོམ་པ་གདུགས་དེའི་འོག་ཏུ་ནམ་མཁའ་ལ་ཞལ་ཤར་དུ་གཟིགས་ནས། ས་གནོན་གྱི་ཕྱག་རྒྱ་མཛད་ནས་བཞུགས་པ་འཁོར་འགས་མཐོང་སྐད། ཡང་གསེར་འབུམ་གཉིས་དང་ཐང་སྐུ་འགའ་ལ་རབ་གནས་མཛད་པ་གཅིག་ཏུ། བཀའ་གདམས་པའི་དགེ་བཤེས་ཞིག་གིས་བླ་མའི་སྐུ་སངས་རྒྱས་ཤཱཀྱ་ཐུབ་པར་མཐོང་བ་ལ། བླ་མས་ཁྱེད་དེ་འདྲ་མཐོང་ཟེར་བ་མི་ལ་མ་ཟློ་གསུངས་སྐད། ཡང་སློབ་དཔོན་ལ་མི་འགས་བྱིན་རླབས་གཅིག་ཞུས་པའི་དུས་སུ། ཚོགས་བྱིན་རླབས་སྐབས་སྟོན་པ་རིན་ཆེན་བླ་མ་བྱ་བས། སློབ་དཔོན་འབའ་རོམ་པ་དྲུག་པ་རྡོ་རྗེ་འཆང་རྒྱན་ཆ་ལ་སོགས་པས་བརྒྱན་པ། གར་གྱི་ཉམས་དགུ་དང་ལྡན་པར་གཟིགས་པས། ངས་རིན་པོ་ཆེ་འདི་ལྟར་བཞུགས་པ་མཐོང་བྱས་པ་ལ། དེ་ཡང་མཐོང་དུ་རུང་ད་ཁྱོད་ཀྱི་མི་ལ་མ་ཟློ་གསུངས་སྐད། ཡང་སློབ་དཔོན་པ་གཟིམས་མལ་ན་བཞུགས་དུས་གཅིག་ལ། ཤེས་རབ་རྒྱལ་མཚན་བྱ་བ་ཡོང་ནས་བལྟས་ཙམ་ན་གཟིམས་མལ་ན་བཅོམ་ལྡན་འདས་འཁོར་ལོ་བདེ་མཆོག་ལྷན་ཅིག་སྐྱེས་པའི་སྐུར་བཞུགས་པར་འདུག། ཡང་ཡང་མིག་ཕྱིས་ཀྱིན་བལྟས་པས། རྒྱན་དང་ཆ་ལུགས་ཤིན་ཏུ་གསལ་བ་སྨྲ་ལ་ཁད་དུ་བཞུགས་ནས་འདུག། དེའི་ཕྱིར་ག་ལེ་ཕྱིན་ཙ་ན་སུ་ཡོད་གསུངས། དེར་ང་ཡོད་ཞུས་པ་ལ་ཅི་སྣང་གསུངས། སློབ་དཔོན་མིན་པ་གཅིག་གཟིམ་མལ་ན་བཞུགས་ནས་སྣང་བ་ལ། དེ་ཅི་ཡིན་ནམ་སྙམས་པ་ཅིག་བྱུང་ནས་ཕྱིར་ཕྱིན་པ་ལགས་ཞུས་པ་ལ། དམ་པའི་ཆོས་འདུལ་བ་ནས། བླ་མ་གནས་པའི་སྒོ་ལོག་ན། ལག་པས་དལ་གྱིས་བརྡུང་བར་བྱ། ཟེར་བ་ཁྱོད་ཀྱིས་མ་ཐོས་སམ། རྐང་རྗེན་དུ་འཇབ་ཀྱིན་ཡོང་བ། མི་ལྟ་རེ་ཡང་སྒོམ་དུ་མ་སྟེར་ང་མིན་པ་མལ་ས་ན་སུ་ཡོད། ཁྱོད་རང་མིག་འཁྲུལ་པ་ཡིན་པས། འཁྲུལ་གཏམ་མི་ལ་མ་ཟློ་བར་སོང་གསུངས་སྐད། ཡང་ནུབ་གཅིག་མེ་ཏོག་ར་བ་འགེབ་པ་བརྗེད་པ་ལ་ནམ་སྲོད་འཁོར་ཙམ་ན། རྗེ་བཙུན་མའི་སྐུ་གསལ་ཞིང་རྒྱན་དང་ལྡན་པ་གཟིམ་མལ་ནས་བཞེངས་ཏེ། མེ་ཏོག་ར་བར་བྱོན་ནས་མེ་ཏོག་འགེབ་ཀྱིན་སྣང༌། ལེགས་པར་བལྟས་པ་ལ། རྗེ་བཙུན་མ་དངོས་སུ་རང་འདུག །ཁྱོད་ནམ་ལ་མི་ཉལ་བར་དུས་མ་ཡིན་པར་ཅི་ལྟ་གསུངས། ངས་སློབ་དཔོན་པ་བཞེངས་ཏེ་འདུག་པས་ཡོད་པ་ལགས་བྱས་པ་དང༌། སློབ་དཔོན་གང་ན་སྣང་གསུངས། འདི་རང་མིན་ནམ་ཞུས་པ་ལ། ཉིན་མོ་དཔལ་ལྡན་ཧེ་རུ་ཀ། མཚན་མོ་རྒྱན་ལྡན་རྣལ་འབྱོར་མ། ཞེས་གསུངས་པ་དེ་ཐོས་སམ་གསུངས། ཐོས་ལགས་བྱས་པ་ལ་འོ་དེ་ཡིན་གསུངས། ལར་རྣལ་འབྱོར་པའི་ཉམས་ལཅི་ཡང་འབྱུང། བདེན་འཛིན་དང་དགའ་སྤྲོ་མ་བྱེད་བདུད་འཇུག་པའི་རྒྱུ་ཡིན། བླ་མ་རིན་པོ་ཆེའི་བཞེད་པ་སྟེ། ཡོན་ཏན་གོང་མ་རྒྱུད་ལ་སྐྱེ་བ་ལ། བླ་མའི་ཞབས་ཏོག་ལ་འབད་པ་དང༌། བྱང་ཆུབ་ཀྱི་སེམས་རྣམ་གཉིས་སྦྱང་བ་དང༌། ལས་རྒྱུ་འབྲས་ལ་ནན་ཏན་བྱེད་པ་དང༌། རྩ་བའི་བླ་མ་ལ་མོས་གུས་འགྱུར་བ་མེད་པ་གནད་དུ་ཆེ། དེ་ལྟར་བྱས་པས་ཡོན་ཏན་སྐྱེས་པ་དང་མ་སྐྱེས་ན། རྟེན་ཅིང་འབྲེལ་བར་འབྱུང་བས་བསླུས་པ་ཡིན་པས་དེ་ལྟར་མི་འབྱུང་མི་སྲིད། ཕྱག་རྒྱ་ཆེན་པོ་ནི་རང་གི་སེམས་འདི་ལས་གཞན་པ་གཅིག་ལ་མི་ཟེརབླ་མ་བརྟེན་པའི་ཐབས་དང་རང་གི་བསོད་ནམས་བསགས་པས་རྟོགས་པ་ཡིན། དེ་གང་གིས་ཤེས་ན། གཞན་གྱིས་བརྗོད་མིན་ལྷན་ཅིག་སྐྱེས། གང་དུ་ཡང་ནི་མི་གནས་ཏེ། བླ་མའི་དུས་ཐབས་བསྟེན་པ་དང༌། རང་གི་བསོད་ནམས་ལས་རེག་བྱ། གསུངས་པས་སེམས་འགྱུར་བ་མེད་པ་རྟེན་འབྲེལ་དུ་ཆེ་བས། རང་གིས་རང་ཤེས་ནས་ཡོང་བ་ཡིན་གསུངས་སྙེམས་བྱེད་མང་པོས་ཡིད་འགྱུར་བ་ལ་མངོན་ཞེན་མ་ཆེ། ཤིན་ཏུ་གསང་དགོས་པ་ཡིན། སྒྲོ་སྐུར་འོང༌། རང་ལ་ཡོན་ཏན་ཡོད་ཀྱང་མ་གསང་བར་བཟླས་པས་དུང་ཕྱིས་པ་བཞིན་དུ་འགྱུར་བ་ཡིན། ཇོ་བོས་ཀྱང་ས་དང་པོའི་བདེན་པ་མ་མཐོང་བར་རྨི་ལམ་གཞན་ལ་བཤད་པ་ན། དྲོད་རྟགས་ཕྲ་མོ་ཡལ་བར་འགྱུར་བ་དང༌། གསང་སྔགས་གསང་ན་འགྲུབ་པས་ཐམས་ཅད་གསང་དགོས་པར་བསྟན་པ་ཡིན་གསུངས་ནས་ཕྱིར་གཟིམ་མལ་དུ་བཞུད་སྐད། ཡང་བཅོམ་ལྡན་འདས་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས། རིགས་ལྔ་དང༌། དྲུག་པ་རྡོ་རྗེ་འཆང༌། ཞལ་གཟིགས་པའི་དུས་སུ། དཔལ་ལྷ་ལས་བབས་པ་ཚངས་པའི་དབྱངས་བྱ་བའི་བསྟོད་པ་ཡོད་གསུངས། ཡང་སློབ་དཔོན་པས་འགའི་ཆོས་སྒོ་འགྱེད་པའི་དུས་སུ། བྱིན་རླབས་བྱས་ནས་སྤོག་ཆོག་མཛད་དུས་སུ། ཡང་འགས་རྣལ་འབྱོར་མར་ཞལ་གཟིགས་ནས་ཉམས་ཁྱད་པར་ཅན་རྒྱུད་ལ་སྐྱེས་སྐད། བསོད་ནམས་རྒྱལ་མཚན་བྱ་བས། གཟིམ་མལ་ན་འོད་དམར་པོའི་ཕུང་པོ་གཅིག་འཁོར་བ་ཡིན་འདུག་པར་མཐོང༌། ཕྱིར་ལོག་ནས་སྒོར་སོང༌། ཡར་ནང་དུ་འོང་ནས་བལྟས་ཙ་ན། སློབ་དཔོན་པས་མགུར་ལྷང་ལྷང་མཛད་ཀྱིན་གདའ། ཡང་དགེ་བསྙེན་གཅིག་གིས་སློབ་དཔོན་བླ་དབྱེ་ན་བཞུགས་པའི་དུས་སུ། ཇོ་བོ་ཐུགས་རྗེ་ཆེན་པོ་ཡི་གེ་དྲུག་མའི་སྐུར་བཞུགས་ནས་ཆོས་གསུངས་པར་མཐོང་སྐད། ཡང་ཞང་བཙུན་ཏོག་གཞིར་བྱ་བ་གཅིག་གིས་རྗེ་བཙུན་མའི་སྒྲུབ་ཐབས་གཅིག་ཞུ་དགོས་ཏེ། ཁོང་གིས་ཆང་འཐུང་ཟེར་ན་རྐེ་རྦད་ཀྱིས་བཅད་ཀྱང་ཆང་མི་འཐུང་བྱ་དགོས་སྙམས་པ་ལ། ཞུ་དགོས་སྙམས་བྱུང་ནས་ཕྱིན། སློབ་དཔོན་པ་ལ་རྗེ་བཙུན་མའི་སྒྲུབ་ཐབས་གཅིག་ཞུར་མཆིས་པ་ལགས་པས། གནང་བར་ཞུ་བགྱིས་ཙམ་ན། ཆང་ནི་རྣལ་འབྱོར་མ་ཉིད་དེ། རྣལ་འབྱོར་མ་ནི་ཆང་གི་གཟུགས། གལ་ཏེ་གོ་འཕང་མཆོག་འདོད་པས། དེ་དག་ཐ་དད་མི་བརྟག་གོ། གསུངས་སྐད་པ་ལ་མ་གསན་ནམ། རྐེ་བཅད་ཀྱང་ཆང་མི་བཏུང་སེམས་པའི་མི་རྟོག་ངན་ལ་རྣལ་འབྱོར་མའི་སྒྲུབ་ཐབས་ཀྱིས་ཅི་བྱེད། གསེར་སྤང་བས་སེར་པོ་གང་ལ་ཡོང༌། གཅན་གཟན་ཕྲ་མོ་བཟའ་འདོད་ཟས་ཀྱིས་འཇིགས་པ་བྱ་བ་ཡིན། སྡུག་པ་སྒྲུབ་ཐབས་ཀྱང་མི་འཚལ་རྟོག་ངན་མ་བསམ་གསུངས་སྐད། ཡང་ཡོན་བདག་དབང་སེང་གི་བུ་ཆུང་བ་ལ་ཐུགས་དམ་འཕྲེང་རྡོག་གཅིག་བཏགས་པ་ལ། དུས་རེ་ཞིག་ཙམ་ན་དེ་ཤི་བའི་རོ་བསྲེགས་པས་འཕྲེང་རྡོག་མདོག་མ་ཉམས་པར་ཐལ་བའི་གསེབ་ན་རྙེད་པ་དབང་སེང་གི་མགུལ་དུ་བཏགས་སྐད། ཡང་ཡོན་མགོན་གྱི་བུ་ཆུང་ལ་སྔགས་མདུད་གཅིག་བཏགས་པ་ལ། དུས་རེས་གཅིག་ན་དེ་ཤི་སྟེ་རོ་བསྲེགས་དུས་སུ་སྔགས་མདུད་མ་ཚིག་པར་ཕ་མས་ཕྱིར་ཉིན་ཐལ་བའི་གོ་གསེབ་ཏུ་སྔགས་མདུད་རྙེད་པས། མེ་ཉིན་གཉིས་འབར་བས་སྐུད་པ་ཕྲ་མོ་འདི་མི་ཚིགས་པ་མཚར་ཆེ། བྱིས་པ་ཤི་བ་ནི་ལས་ཀྱིས་ཤི་བ་ཡིན། མདོ་སྡེ་ན་བཅོམ་ལྡན་འདས་ཀྱིས་ཀྱང་ལས་ཀྱི་རྣམ་པར་སྨིན་པ་ནི་མ་གཏོགས་སོ་གསུང༌། དེ་འདྲ་ལ་དགོངས་པ་ཡིན་ཏེ་འོང་གསུངས་ནས་ཀུན་གྱིས་མྱ་ངན་མི་བྱེད་པར་འདུག་སྐད། ཡང་ཉེ་གནས་གཅིག་གིས་གཟིམས་མལ་ནང་དུ་བལྟས་པས་མི་བཞུགས་པར་འདུག །ད་བཟོད་འདི་ན་བཞུགས་པ་ཡིན་པ་ལ་བྱས་ནས། སྒོ་ཕྱིར་ལོག་ནས་ཡོང་ཙ་ན་མཇུག་ནས་འབོད་ཀྱིན་འདུག །ནང་དུ་ཕྱིན་ཙ་ན་ཁྱོད་ཕྱིར་ལོག་པ་ཅི་ཡིན་གསུངས། སློབ་དཔོན་མི་བཞུགས་པར་འདུག་གདན་མིན་པ་ངས་མ་མཐོང་ཞུས་ཙམ་ན་ངས་འདི་ཙུག་བྱས་པ་ཡིན་གསུངས་ནས། ཁྲུས་རས་གཅིག་གིས་ཞལ་བཀབས་པ་ལྟར་མཛད། དེ་ཙུག་མཛད་ཀྱང་ད་ཅི་མི་འདུག། ད་ལྟར་འདུག་ཀྱིན་གདའ་བ་ལ་ཞུས་པ་ལ། གླེན་པ་དབྱར་ཀའི་ས་ལ་ཅི་ཡང་སྐྱེ། །རྣལ་འབྱོར་ཉམས་ལ་ཅི་ཡང་འོང༌། །ཟེར་བ་མ་ཐོས་སམ། ཐམས་ཅད་ཉམས་སྣང་ཡིན་པས་བདེན་འཛིན་མ་བྱེད། རང་སྣང་བཟླས་ན་སྒྲོ་སྐུར་འོང༌། དུས་ད་ལྟ་ཅི་བྱས་ཀྱང་ཡིད་ཆེས་དཀའ་བས་ཁྱེད་ཀྱི་དེ་ཚུག་ཡིན་ན་ད་ལྟའང་འདི་ལྟར་དུ་འབྱུང་དགོས་ཟེར་ནས་ལུང་འདྲེན་ཤད་ཤད་བྱེད། ལས་དང་པོ་པ་ལ་འདི་ཚུག་བཤད་ཟེར་བ་ལ། ཐོས་པ་ཆེན་པོ་མ་བྱས་པའི་མི་ལ་སྐྱོན་ཟེར་ནས་སྡིག་རྩར་འགྲོ་བས། ད་ལྟའི་དུས་ན་ཅིས་ཀྱང་གསང་དགོས་པ་ཡིན་གསུངས། ལར་ས་ལམ་གྱི་རྟགས་མི་དགོས་བླ་མ་དམ་པ་ཞིག་ལ་མོས་གུས་ཁྱད་པར་ཅན་གཅིག་གི་སྒོ་ནས། དམ་ཚིག་མ་ཉམས་པར་བསྟེན་ན་དངོས་གྲུབ་རྣམ་གཉིས་ཚེ་འདི་ཉིད་ལ་ཐོབ་པ་ཡོང་གསུངས། ལུང་ལས༌། སྐད་ཅིག་གཅིག་གིས་རྫོགས་སངས་རྒྱས། བྱ་བ་ཡང་བཤད། དེ་བློ་ཆུང་བ་ཚོགས་མ་བསགས་པའི་གང་ཟག་གི་བློར་མི་ཤོང་གསུངས་སྐད། ཡང་དགོན་དུ་བརྒྱག་བསྐྱེལ་བ་འགའ་ཡོང་བའི་དུས་རྟ་ཇག་པས་ཁྱེར་བ་ལ། ཕྱག་རྒྱ་གཅིག་བཅས་ནས་ལྟ་སྟངས་གཅིག་མཛད་པ་དང༌། ཇག་པ་རྣམས་རྟ་རྒྱུག་བདོ་ལ་འདམ་ལ་ཟུག་པ་བཞིན་དུ་སོང་ནས་རེངས་པར་གདའ། སློབ་དཔོན་པས་ད་ཁྱོད་ཀུན་སོང་ལ་རྟ་ལོང་ཁོང་ལ་ཅང་མ་ཟློ་སྙིང་རྗེ་གསུངས་སྐད། ཡང་སྐྱོ་དུ་སྐམ་བྲག་ཟེར་བ་ལ་ཉིན་ས་པ་སྐམ་པོ་ཆུ་ཡེ་ནས་མི་འདུག་པ་གཅིག་གི་སར། འདིར་གཏོར་མ་གཅིག་ཁྱེར་ལ་ཤོག་གསུངས་ནས། གཏོར་མ་གཅིག་བསྔོས་ཏེ། ཕྱག་འཁར་གྱིས་ས་ལ་རྗེས་གཅིག་ཕྱུང་ནས་འདིའི་ཤུལ་དུ་ལུགས་གསུངས་ནས། གཏོར་མ་འདིར་བླུག་པ་དང༌། འཽ་སྔགས་ཀྱི་བདག་པོ་འཇིག་རྟེན་ན་མཐུ་ཆེ་བ་ཁྱེད་རྣམས། ངེད་ལ་ཆུ་མེད་པས་མྱུར་བར་ཆུ་གཅིག་ཞུ་གསུངས། ཕྱིར་ཉིན་དེར་བལྟས་ཙམ་ན། རླན་བག་ཙམ་ཞིག་བྱུང་ནས་སྣང་ཞུས་ཙམ་ན། ཡང་གཏོར་མ་གཅིག་ཁྱེར་ལ་སྐྱེལ་དང་སང་ནངས་པར་ལས་མི་འཕྱི་བར་ཆུ་གཅིག་འདོད་པ་ཡིན་གྱིས་ལ་གཏོར་ཆུ་དེར་ལུགས་ལ་ཤོག་གསུངས། དེར་དེ་ཙུག་བྱས་པས་ཕྱིར་ཉིན་ད་སོང་དང་ཆུ་ཡོད་གསུངས། ཕྱིན་ནས་བལྟས་ཙམ་ན། ཆུ་མིག་སྔོ་སི་ལི་ལི་འབབ་པ་ཡིན་སྣང༌། དེར་ཆུ་བླང་ནས་ལོངས་སྤྱོད་གསུངས། ཕྱིས་ཡུལ་མི་རྣམས་ཀྱིས་ཆུ་དེ་ལས་བླངས་ནས། ནད་པ་རྣམས་དང་བར་ཆད་ཅན་རྣམས་ལ་བླུད་པས། སང་སང་འགྲོ་བ་ཡིན་འདུག་སྐད། རང་རེ་ཡང་སྣང་བ་དག་པ་ཁོ་ན་མ་ཡིན་ཏེ། འོ་ན་ཡང་བླ་མ་རིན་པོ་ཆེ་སྟག་ལུང་ཐང་པ་ཅན་དུ་བྱོན་པ་དང༌། བླ་མ་འབའ་རོམ་པ་མཇལ་བ་དང༌། བསྙེན་བཀུར་བྱེད་པ་གྲོ་ལམ་གཅིག་ཏུ་གཤེགས་ཏེ། འཇའ་ཁ་དོག་སྣ་ཚོགས་ཀྱིས་བླ་མ་འབའ་རོམ་པ་ཆེན་པོའི་དབུ་ཐོག་ཏུ་ཕུབ་ནས་བཞུད་པ་མཐོང་བ་ལགས་དེ་ལ་སོགས་པའི་མཐོང་སྣང་ཁྱད་པར་ཅན་དཔག་ཏུ་མེད་པ་ཡོད་དེ་འདིར་ཡི་གེ་མང་བས་ནས་མ་བཀོད་པ་ཡིན། བླ་མ་རིན་པོ་ཆེ་དཔལ་ལྡན་འབའ་རོམ་པ་ཆེན་པོ་དེས། འཛིན་པ་དང་རེ་དོགས་མེད་པར་ཆུ་བོ་རྒྱུན་གྱི་རྣལ་འབྱོར་གྱི་ངང་ལས། བླ་མ་དྭགས་པོ་རིན་པོ་ཆེའི་སྐུའི་ཞབས་ཏོག་ཁྱད་པར་ཅན་མཛད་ནས། དུས་གསུམ་གྱི་སངས་རྒྱས་ཐམས་ཅད་ཀྱི་སྐུའི་ངོ་བོར་བློ་ངེས་པར་མཛད་ཅིང་ཡང་དག་པར་རྫོགས་པའི་སངས་རྒྱས་ལོངས་སྤྱོད་རྫོགས་པའི་སྐུ་དྲུག་པ་རྡོ་རྗེ་འཆང་དུ་གཟིགས་པས། རང་དང་གཞན་སྣང་བ་དག་པ་རྣམས་ཀྱིས། ཡི་དམ་གྱི་ལྷར་གསལ་བ་ལ་སོགས་པ་སྐུ་ཡི་ཡོན་ཏན་དཔག་ཏུ་མེད་པ་མངའ་བ་ཡིན། བླ་མ་དེ་ཉིད་ཀྱི་གསུངས་ཇི་ལྟར་བཀའ་སྩལ་བ་བཞིན་དུ་སྒྲུབ་ཅིང༌། དུས་གསུམ་གྱི་སངས་རྒྱས་ཐམས་ཅད་ཀྱི་གསུང་དུ་ངེས་པའི་ཤེས་པ་སྐྱེས་པས། ངག་ནུས་པ་དང་ལྡན་ཞིང་གསོལ་བ་བཏབ་པ་ཙམ་གྱིས་ཀྱང་མངོན་སུམ་དུ་འགྲུབ་པ་དང༌། འགྲོ་བ་ཐམས་ཅད་དད་པ་དང་འདུན་པ་ཡིན། བླ་མ་དེ་ཉིད་ཀྱི་སྐུ་གསུང་ཐུགས་ཟུང་འཇུག་ཆོས་ཀྱི་སྐུར་བློར་ངེས་པས། སྣང་སྲིད་འཁོར་འདས་ཀྱི་ཆོས་ཐམས་ཅད་གདོད་མ་ནས་རང་བཞིན་གྱིས་རྣམ་པར་དག་པས་མཁྱེན་པ་དེ་ཉིད་ཀྱི་ངང་ལ། དུས་སྐད་ཅིག་ཆད་པ་མེད་པར་བཞུགས་པ་ཡིན། བླ་མ་རིན་པོ་ཆེ་དེ་ཉིད་ལ་རབ་བསྒྲུབ་པའི་ཞབས་ཏོག་རང་ཉིད་ཀྱི་ལུས་དང་སྲོག་ལ་མ་ལྟོས་པར་རྩམ་ཆེན་ལྷ་སྒོའི་གངས་ཀྱི་ར་བ། རི་ཁྲོད་རྣམ་པར་དག་པ་དེར་འཁོར་བ་བློས་སྤངས་ནས། གང་ལ་ཡང་ཉམ་ང་མེད་པར་སེང་གེའི་རྒྱལ་པོ་ལྟར། མཉམ་རྗེས་མེད་པར་ཕྱག་རྒྱ་ཆེན་པོའི་ངང་དུ་རྒྱུན་ཆད་མེད་པར་བཞུགས་པས། སེམས་སྙིང་པོ་མེད་པ་ལ་སྙིང་པོ་བླངས་པ་ཡིན། འབྲིང་ལུས་ཀྱི་ཞབས་ཏོག་ལ་དཀའ་བ་དཔག་ཏུ་མེད་པའི་སྒོ་ནས་ལུས་དང་སྲོག་ལ་མ་ལྟོས་པར་བླ་མ་དེ་ཉིད་ཀྱི་སྐུ་ཚེའི་བར་ཆད་ལན་གྲངས་ཀྱིས་བསལ་ནས། ལུས་སྙིང་པོ་མེད་པ་ལ་སྙིང་པོ་བླངས་པ་ཡིན། མཐའ་མར་དངོས་རྫས་ཟང་ཟིང་གི་ཞབས་ཏོག་ལ། མདོ་རྒྱས་པ་ལ་སོགས་པོ་ཏི་མང་པོས་སྣ་དྲངས་པའི་ཇ་དང་གསེར་དངུལ་དང༌། སྟག་གཟིག་དང་ཁྲབ་རྨོག་དང༌། གཡུ་དང་བྱི་རུ་དང༌། གནག་རྟ་ལ་སོགས་པ་ཤིན་ཏུ་ངོ་མཚར་ཆེ་བའི་ནོར་རྫས་ཕུལ་ཏེ། ལོངས་སྤྱོད་སྙིང་པོ་མེད་པ་ལ་སྙིང་པོ་བླངས་པ་ཡིན། ཞབས་ཏོག་གསུམ་གྱི་སྒོ་ནས་བླ་མ་རིན་པོ་ཆེ་དེ་ཤིན་ཏུ་མཉེས་པར་བྱས་པ་ལགས། ཡང་འགྲོ་བའི་མགོན་པོ་བླ་མ་རིན་པོ་ཆེ་དེས་བྱང་ཆུབ་ཀྱི་སེམས་རིན་པོ་ཆེ་འབྱུང་བས་སྐུ་ལ་རིང་བསྲེལ་ཁ་དོག་སྣ་ཚོགས་བྱོན་པ་ཡིན། བླ་མའི་ཞབས་ཏོག་དང་སྦྱིན་པའི་ཕ་རོལ་ཏུ་ཕྱིན་པ་རྫོགས་པས། ཕྱག་དང་ཞབས་ལ་འཁོར་ལོ་དང་པདྨས་ལེགས་པར་བརྒྱན་པ་ཡིན། ཐུགས་ཀར་དཔལ་བེའུ་རི་མོ་ཤིན་ཏུ་གསལ་བ་ཡོད་པ་ཡིན། ཕྱག་གི་ཨུད་པ་ལ་ཁ་གྱེན་དུ་ལྟ་ཞིང་རིང་བ་ཡིན། ཕྱག་གཡོན་པའི་སྲིན་ལག་གི་རྩ་བར་ཧཱུྃ་སྤུ་ཤད་ལྟ་བུ་གསལ་བར་ཡོད་པ་ཡིན། སྐུ་གཟི་བརྗིད་ཆེ་ཞིང་མདངས་དང་ལྡན་པས་ཐམས་ཅད་ཟིལ་གྱིས་གནོན་པར་བཞུགས་པ་ཡིན། ཆོས་ཐམས་ཅད་ཕྱི་ནང་གསང་གསུམ་གྱི་རྟེན་འབྲེལ་དུ་ཤར་བས། དམིགས་པ་མེད་པའི་ཐུགས་རྗེས་ཕྱོགས་རིས་མེད་པའི་གདུལ་བྱ་བསམ་གྱིས་མི་ཁྱབ་པའི་དོན་ནོ། རྟེན་འབྲེལ་སྣ་ཚོགས་ཀྱི་སྒོ་ནས་སེམས་ཅན་མང་པོའི་དོན་མཛད་པཡིན། བཞུད་པ་ན་ཐུགས་རྗེཆེན་པོའི་འགྲོ་བ་ལ་ཕན་བདེ་བསྒྲུབ་ཅིང་བཞུད་པ་ཡིན། བཞུགས་པ་ན་ལུས་གནད་བཅས་པས་སྐུ་སྐྱིལ་མོ་ཀྲུང་གིས་ལེགས་པར་བཞུགས་པ་ཡིན། གཟིམས་ཙམ་ན་འོད་གསལ་འགྲོ་འོང་མེད་པའི་ངང་ལ་གཟིམས་པ་ཡིན། ་སྤྱོད་ལམ་རྣམ་བཞིར་མཉམ་བཞག་ཆེན་པོའི་ངང་ལ་བཞུགས་པ་ཡིན། མངོན་པར་ཤེས་པ་དྲུག་དང་ལྡན་པའི་སྒོ་ནས་གསང་སྤྱོད་མཛད་པ་ཡིན། སྐུ་གསུང་ཐུགས་ཀྱི་ཕྲིན་ལས་གང་ལ་གང་འདུལ་གྱིས་གདུལ་བྱའི་ཁམས་དང་བག་ལ་ཉལ་བ་དང་བསྟུན་ནས་དེ་ལ་དེ་ལྟར་སྟོན་པ་ཡིན། སྐུ་གསུང་ཐུགས་བྱམས་པའི་ལས་དང་ལྡན་པའི་གཟིམས་པར་རི་དྭགས་རྣམས་ཀྱི་ས་མནལ་ལོག་པ་སྲུང་བ་ཡིན། བྱ་དང་བྱིའུ་རྣམས་ཀྱིས་མནལ་བསྲུང་ཞིང་ཕྱག་མཐིལ་དུ་སྡོད་པ་དང། ཤངས་ཀྱི་རྩེ་ལ་བབས་ནས་སྤྱན་རྣག་སེལ་བ་ཡིན། མནལ་སད་ཙ་ན་དཔའ་བོ་དང་མཁའ་འགྲོ་མས་ཌཱ་མ་རུའི་སྒྲ་དང༌། ཕྱག་གི་བརྡས་ཐུགས་དམ་དང་གཤེགས་བཞུད་ཀྱི་དུས་ཚོད་མ་ཡེལ་བར་བསྐུལ་བ་ཡིན། གཞན་ཡང་བླ་མ་རིན་པོ་ཆེ་དེས་ཡི་དམ་གྱི་ལྷ་དཔག་ཏུ་མེད་པ་ཞལ་གཟིགས་པ་དང༌། ནམ་མཁའ་ལ་འགྲོ་བ་དང༌། ཆུ་ལ་མི་བྱིང་བ་དང༌། སྐུའི་བཀོད་པ་དུ་མ་མཛད་པ་དང༌། ཟད་པར་གྱི་ཏིང་ངེ་འཛིན་ཐམས་ཅད་སྙོམས་པར་འཇུག་པ་དང༌། རྩིག་པ་དང་བྲག་ལ་ཐོགས་པ་མེད་པར་གཤེགས་པ་དང༌། མངོན་པར་ཤེས་པ་རྒྱ་ཆེན་པོ་མངའ་བ་དང༌། ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ཅིང༌། ཐུན་མོང་གི་ཡོན་ཏན་མ་ལུས་པ་མངོན་སུམ་དུ་གྱུར་པའི་འགྲན་གྱི་དོ་ཟླ་མེད་ཅིང༌། རྩོད་པ་དང་བྲལ་བའི་གྲུབ་ཐོབ་ཆེན་པོར་གྱུར་པ་ཡིན། འགྲོ་བ་ཀུན་གྱི་མགོན་དང་སྐྱབས་སུ་གྱུར་པའི་བླ་མ་རིན་པོ་ཆེ་དེ་ལ་སྐྱེ་རྒ་ན་འཆི་ལ་སོགས་པ་མི་མངའ་ཡང་དགུང་ལོ་བདུན་ཅུ་རྩ་གཉིས་ལ་གདུལ་བྱ་འགའ་ཞིག་ལ་གཟིགས་ནས། ཡང་དག་པར་རྫོགས་པའི་སངས་རྒྱས་ཀྱི་མཛད་པ་བཅུ་གཉིས་ལྟར་བླ་ན་མེད་པའི་མཛད་པ་དང་མཐུན་པར་དགོངས་ནས། ཉིན་གཅིག་ལ་མདངས་རྨི་ལམ་ན་སང་ཕོད་ང་འཆི་བ་གཅིག་རྨིས། ཅི་བྱས་ཀྱང་མི་ཟློག་པར་འགྲོ་དགོས་པར་སྣང་བས། མི་གསར་དུ་ཡོངས་ནས་ཆོས་ཞུ་བ་རྣམས་ང་རྩར་མ་འཇོག་གོ་བ་ལོང་ཅིས་ཀྱང་མ་བཞག་གསུངས། ཁྱེད་ལ་མི་དགའ་སྟེ་ཡིད་གདུངས་ནས་འགྲོ་བ་ཡིན། བླ་མ་གཞན་གྱི་གན་དུ་ཐོང་ཡུན་རིང་བས་གཙོ་མི་ཆེ་སྟེ། མོས་གུས་ཆུང་བ་གྱོང་ཆེ་བས། མི་འགའ་རེས་ཆོས་བྱ་རྒྱུ་མ་རྙེད་ཟེར་ཏེ་མི་བདེན། རྩོད་པ་མེད་པའི་བླ་མ་མཚན་ཉིད་དང་ལྡན་པ་མཇལ་ནས། མོས་གུས་རྩེ་གཅིག་ཏུ་བྱས་ཤིང་བསླུ་བ་མེད་པའི་ལས་རྒྱུ་འབྲས་ལ་ནན་ཏན་ཏུ་མཛོད། གཡེང་བ་མེད་པར་བྱང་ཆུབ་ཀྱི་སེམསས་རིན་པོ་ཆེ་སྦྱངས་ནས་རེ་དོགས་མེད་པར་ཕྱག་རྒྱ་ཆེན་པོ་རང་ལ་ཡོད་པ་དེ། ལྷུན་གྱིས་གྲུབ་པར་རྒྱུན་ཆད་མེད་པར་གོ་ཞིང་རྟོགས་ན། ཐེ་ཚོམ་མེད་པར་ཚེ་འདི་ཉིད་ལ་དངོས་གྲུབ་རྣམ་གཉིས་ཐོབ་པར་ངེས་ཤིང༌། ཐོགས་པ་མེད་པར་སེམས་ཅན་བསམ་གྱིས་མི་ཁྱབ་པའི་དོན་རླབས་པོ་ཆེ་འབྱུང་བ་ནི་རྟེན་ཅིང་འབྲེལ་བར་འབྱུང་བའི་ཆེ་བ་ཡིན་པས། གང་གིས་ཀྱང་འགགས་པར་ནུས་པ་མ་ཡིན་ནོ། །སང་ཕོད་དཔྱིད་ནི་ང་འགྲོ་བ་ཡིན་གསུངས་པ་ལ། རིམ་གྲོ་བྱས་ན་བཟློག་ཏེ་འོང་བས་རིམ་གྲོ་བྱེད་པར་ཞུ་བྱས་པ་ལ། གླེན་པ་ཀུན་གོང་དུ་བཟླས་པ་དེ་མ་གོའམ། བླ་མའི་གསུང་ལ་ཚད་མར་མི་འཛིན་པའི་མིས་བླ་མས་བྱིན་རླབས་འདོད་པ་དེ་རེ་བླུན། །ཁྱོད་ཚོ་ལ་དབང་མེད། སྙིང་སྟོང་སང་ཀྱི་སོང་ཙམ་ན། ད་གཟོད་བདེན་སྙམ་པ་གཅིག་འོང་བ་ཡིན། ཅི་བྱས་ཀྱང་སང་ཕོད་མི་བཟློག་གསུངས། ཕྱིས་ལོ་ནུབ་གཅིག་རྨི་ལམ་ན། འབུལ་བ་གཅིག་འོང་ཟེར་བ་ལ། ང་ད་ལྟ་འདས་ན་གདུང་བཞུ་བདེ་བ་འདི་ཡིན་བྱས་པ་རྨིས་གསུངས། དེ་ནས་སོག་རུ་ཇ་པ་མང་པོ་སླེབས་པའི་ནང་ནས། འབའ་རོམ་པའི་འབུལ་སྐྱེལ་འོང་ཟེར་བའི་སྐད་བྱུང་བ་ལ། བླ་མས་དེ་ཀུན་དང་རེས་གཅིག་འཕྲད་ན་ཁོ་ཡིད་ཚིམས་པ་ཡིན་ཏེ། ང་མེད་པ་གཅིག་དང་ཐུག་དོགས་ཡོད་གསུངས་པ་ལ། ཁོང་འགའ་རེས་ཤི་རྨིས་བཟང་བ་ཡིན་ཟེར་བ་མི་བཟང་ངམ་ཞུས་པ་ལ། དེ་དང་མི་འདྲ་ང་བླ་མ་མཉེས་པར་བྱས་པ་ཡིན། གདམས་ངག་གི་གནད་ལ་མཁས་པ་ཡིན། སྒྲུབ་པ་རྩེ་གཅིག་ཏུ་ནན་ཏན་བྱས་པ་ཡིན། ཉམས་མྱོང་དང་རྟོགས་པ་ངེས་ཤེས་དང་བཅས་ཐེ་ཚོམ་མི་ཟ་བར་ཡོད་པ་ཡིན། འཆི་ལྟས་ལ་ཤིན་ཏུ་མཁས་པ་ཡིན་པས། དེས་ཕན་པ་མེད། ད་གསོལ་བ་བཏབ་ནས་ཁོང་ལ་ལན་གཅིག་སྡོད་དགོས། མགྲོན་པོ་ཡར་ཚེས་ལ་འོང་བར་སྣང་གསུངས། དེ་ནས་ཞག་དྲུག་བདུན་ནས་སྐུ་བསྙུང༌། ཚེས་གཅིག་དང་གཉིས་ལ་ཇ་པ་སྔ་ཕྱི་ཡང་སླེབས། དེར་བླ་མ་རིན་པོ་ཆེའི་མགྲོན་པོ་ཐག་རིང་ནས་ཡོང་བ་ཡིན་པས་སྤྱན་སྔར་ཐོངས་གསུངས་པ་ལ། མགྲོན་པོས་ཡར་ཞུས་པ། བླ་མ་རིན་པོ་ཆེའི་སྐུ་ཁམས་ཀྱི་བཅའ་རྩི་བགྱིད་པ་གལ་ཆེ་བས། དེ་རེས་ངེད་དང་མི་མཇལ་བས་ཚུར་ལམ་མཇལ་བ་ཞུ་ཟེར་བ་ལ། ཚུར་ལམ་ང་ནི་གར་ཡོད་ཁྱོད་ནི་གར་ཡོད། ཐག་རིང་ནས་འོང་བའི་མི་དཀའ་ལས་མང་པོ་བྱས་པ་ཡིན། མ་འགོག་པར་ཤོག་མཇལ་དགོས་པ་ཡིན། ངས་འབུལ་བའི་ངོ་ལ་བལྟས་པ་མ་ཡིན། ཁོང་རྣམས་དང་འཕྲད་ནས་ད་རེས་ཕྱིས་ལྟ་ཡིན། གཞི་བྱེས་ལ་སོགས་པ་འཛོམས་པ་ཡིན་པས། ད་ཐོངས་དང་ཆོས་ཀྱང་བྱ་དགོས་པ་ཡིན་གསུངས། དེར་མགྲོན་པོ་རྣམས་ལ་སྐྱབས་འགྲོ་དང༌། སེམས་བསྐྱེད་ལ་སོགས་པ་ལེགས་པར་མཛད། དེ་ནས་དགོན་པའི་གྲྭ་པ་རྣམས་དང་མཇལ་ཁ་ལེགས་པར་མཛད་ནས། ཞལ་ཏ་ཡང་ཞིབ་ཏུ་གསུངས། དེ་ནས་ས་ག་ཟླ་བའི་ཡར་ངོའི་ཚེས་གཉིས་ཀྱི་ནུབ་མོའི་ནམ་གུང་ཡོལ་ཙམ་ན་སྐུ་མྱ་ངན་ལས་འདས་པའི་ཚུལ་བསྟན་པ་ཡིན། དེ་དུས་མཐོང་སྣང་ལ་འོད་དམར་པོ་ནམ་མཁའ་ལ་འཁོར་བཞིན་འདུག་པ་དང༌། མེ་ཏོག་སྣ་ཚོགས་ཀྱི་ཆར་དང་རོལ་མོའི་སྒྲ་དཔག་ཏུ་མེད་པ་དང༌། ཁྱད་པར་དུ་ཌཱ་མ་རུ་དང། ཅང་ཏེའུའི་སྒྲ་འཁྲོལ་བ་དང༌། ས་གཡོ་བ་དང་ འུར་ཆེན་པོ་དང༌། འོད་དང༌། འཇའ་དང༌། ལྟས་ཆེན་པོ་དཔག་ཏུ་མེད་པ་དང་ངོ་མཚར་ཆེ་བ་མང་པོ་བྱུང༌། དེ་ནས་ཡར་གྱི་ཚེས་བཅུ་ལ་གདུང་བཞུས། དེའི་དུས་སུ་དུད་པ་ཐད་ཀའི་ནམ་མཁའ་ལ་ཡར་སོང་ནས་འཁྲིགས་པ་ན། འཇའ་ཡི་གདུགས་ཁ་དོག་སྣ་ཚོགས་པར་སོང༌། ནམ་མཁའི་འཇའ་ཚོན་ཀུན། པདྨ་དང༌། ཤིང་ལྗོན་པ་དང༌། རྒྱལ་མཚན་དང༌། བ་དན་ལྟ་བུ་དཔག་ཏུ་མེད་པ་གང་བ་བྱུང༌། འགྲོ་བ་ཀུན་ལ་དང་བ་ཁྱད་པར་ཅན་འདྲེན་པ་དང༌། མོས་གུས་བྱེད་པའི་རྟེན་ལ། རིང་བསྲེལ་ཁ་དོག་སྣ་ཚོགས་པ་མང་པོ་རིན་པོ་ཆེ་འབར་བ་ལྷ་བཟོས་ཇི་ལྟར་བཟོས་པ་དང་ཚོན་རྩིས་བྲིས་པ་ལྟར་ཤིན་ཏུ་གསལ་བ་ངོ་མཚར་ཅན་དང༌། བཀྲ་ཤིས་ཀྱི་རྟགས་རྣམ་པ་བརྒྱད། རྗེ་བཙུན་མའི་སྐུ་ལ་སོགས་པ་རྟེན་མང་པོ་བྱོན་པ་ཡིན་ནོ། །དེ་ལྟ་བུའི་ཆོས་ཀྱི་རྒྱལ་པོ་འགྲོ་བའི་མགོན་པོ་རིན་པོ་ཆེ་དེ་ལ། སློབ་མ་ངོ་མཚར་ཅན་མང་དུ་བཞུགས་ན་ཡང༌། བུ་ཆེན་བཞི་ནི། རྩེ་རོམ་དབང་ཕྱུག་སེང་གེ། བྲན་ཀ་ཇོ་བཙུན་ནམ་མཁའ། བླ་མ་ཆེན་པོ་ལྷོ་པ། སྟོན་པ་རིན་ཆེན་བླ་མ་དང་བཞི་ཡིན། དེ་ལ་ཉེ་བའི་སྲས་བཞི་ནི། བྲན་ཀ་ལྷ་སྟོན། སྟོན་པ་གཞོན་ནུ་གྲགས། ཁྱིམ་མཉེས་ཨཱརྻ་དེ་བ། ལྷ་རྗེ་བློ་གྲོས་མཆོག་དང་བཞི་ཡིན། བརྒྱུད་པ་འཛིན་པའི་སྲས་བཞི་ནི། བླ་མ་རིན་པོ་ཆེ་འབྲི་གུང་པ། བླ་མ་ཉིན་དགོན་པ། བླ་མ་དཔལ་རྒྱལ། བླ་མ་སེང་གེ་རྒྱལ་མཚན་དང་བཞི་ཡིན། ཐུགས་སྲས་གཉིས་ནི། དབོན་སྒོམ་རྒྱལ་བ་གྲགས་པ། དབོན་པོ་ཤེས་རབ་དབང་ཕྱུག་དང་གཉིས་ཡིན་ནོ། །མཆོག་ཏུ་གྱུར་པ་ནི། རྗེ་འགྲོ་བའི་མགོན་པོ་ཏི་ཤྲཱི་ཤེས་རབ་སེང་གེའོ། །

རྩ་བའི་གཉིས་པ་འགྲོ་བའི་མགོན་པོ་ཏི་ཤྲཱི་རས་པའི་རྣམ་ཐར་མདོར་བསྡུས་ནི། དེའང་སྐུ་འཁྲུངས་པའི་ཡུལ་འབྲོག་གི་སྤ་ཚབས་ཀྱི་ས་ཁུལ་ཤོད་ཆེན་བཞིའི་དང་པོ་འདམ་ཤོད་སྣར་མོ་ས་ཁུལ་དུ་ཕྱེས་པ་རག་ཁྲོམ་དབུ་མ། སྐུ་བལྟམས་པའི་གནས་ལྡ་ས་ཐེལ། རིགས་ནི་ཧོར། རུས་ནི་ལྡོང༌། ལྡོང་ལ་རྗེ་བཞི་ཁོལ་བརྒྱད་ཡོད་པའི་ནང་ནས་སྟེང་འཛོམ་ཡིག་ཚང་རྗེ་ཡིན། ཡབ་རྗེ་དར་ཁྲ་བོ་དང་ཡུམ་སྐ་བཟའ་ཀླུ་ལྕམ་གཉིས་ཀྱི་སྲས་སུ་ཤིང་ཕོ་སྤྲེལ་གྱི་ལོ་ལ་འཁྲུངས། རབ་བྱུང་གསུམ་པའི་ཤིང་སྤྲེལ་སྤྱི་ལོ་༡༡༦༤ལ།་་་་་་་་་མཆན། བལྟམས་པའི་དུས་སུ་འཇའ་དང་མེ་ཏོག་གི་ཆར་སོགས་ངོ་མཚར་བའི་རྟགས་མཚན་བཟང་པོ་བྱུང་བས་ཡབ་ཡུམ་ཡང་ཐུགས་དགྱེས་ནས་བཙས་སྟོན་རྒྱ་ཆེར་མཛད། དེར་མཚན་ལྟས་མཁན་ལེའུ་བོན་པོ་འཕར་བ་ཀུན་གྲགས་ཞེས་པས་རྩིས་བྱས་པར་གཙོ་བོ་ལྟ་བུ་བྱས་ན། ཀུན་གྱིས་བཀུར་འོས་མཆོག་ཏུ་འགྱུར་ལ། ཆོས་ལ་ཞུགས་ན་བནྡེ་བཟང་པོ་ཡོང་བར་འདུག་ཟེར། མཚན་ཧོར་གྲགས་སུ་གསོལ། དགུང་ལོ་ལྔ་ནས་བེའུ་དང་རིའུ་ལུག་གུ་རྣམས་བྱམས་བརྩེས་བསྐྱངས་བས་བུ་རྣམས་མ་ཕྱིར་འབྲང་བ་བཞིན་ཏུ་སྣང༌། དགུང་ལོ་བདུན་ལོན་ནས་བྱིས་པའི་ཚོགས་ལ་ཆོས་བཤད་པའི་ཚུལ་དང་སྒོམ་པའི་ལུས་གནད་བཅའ་ཚུལ་མཛད་ཅིང་ཕྱག་ཏུ་བཟའ་བཏུང་གང་བྱུང་གཞན་ལ་འཕང་མེད་དུ་སྟེར་བར་མཛད། དགུང་ལོ་བརྒྱད་ནས་སློབ་དཔོན་དབང་སེང་ལས་ཡི་གེ་འབྲི་ཀློག་དང༌། རྩིས་དང་ཐ་སྙད་མང་པོ་ཐུགས་སུ་ཆུད་པར་བསླབ། སྒོམ་ཁྲིད་ཞུས་ནས་རང་ཡུལ་དུ་བྱོན། བཅུ་གསུམ་བཞེས་ཙ་ན་བླ་མ་རིན་པོ་ཆེ་འབའ་རོམ་པའི་སྙན་པ་ཐོས་པས་མཇལ་སྙམས་པའི་ལུས་ཀྱི་བ་སྤུ་གཡོ་བ་བྱུང༌། དེ་སྐབས་བླ་མ་རིན་པོ་ཆེ་བྱང་རྩི་བར་གྱི་དཔོན་སྟག་ཆུང་གསེར་མཁར་ན་བཞུགས་པ་ཐོས་ནས་ཡབ་ཀྱི་རུ་བར་གདན་དྲངས། ཞབས་ཏོག་བསམ་གྱིས་མི་ཁྱབ་པ་བྱས། ཡབ་ཀྱི་ཆིབས་རྟ་བཟང་པོ་ལ་སྒ་ཆས་སྤྲས་ཏེ་སྲས་བསྐྱོན་ནས་དར་ཡུག་གིས་སྣ་དྲངས། ནོར་སྐལ་ཡོད་དོ་ཅོག་བཅས་ཕུལ། དེ་ནས་བླ་མ་རིན་པོ་ཆེ་སླར་མདོ་ཁམས་སུ་ཕེབས་པའི་ཕྱག་ཕྱིར་འབྲང་བ་མ་བྱུང༌། དགུང་ལོ་བཅོ་ལྔ་བཞེས་པའི་སྐབས་མཚལ་དུ་ཞང་རིན་པོ་ཆེ་མཇལ་དུ་བྱོན། འཁྲུགས་པ་མཛད་པ་དང་མཇལ་བས་ཁྱོད་ཀྱིས་ང་ཡི་འཁྲུགས་པ་བྱེད་དགོས་གསུངས། ཁོང་འཁྲུགས་གྲལ་དུ་བྱོན་ནས་སྒྱོགས་རྡོ་བསྐྱལ་བ་དང༌། བསྒུལ་ཏོག་འཕེན་པ་སོགས་མཛད་པས་འཁྲུགས་པ་རྒྱལ་བ་དང༌། རིན་པོ་ཆེ་ནས་ངས་ཇི་ལྟར་བྱས་ཀྱང་ཕྱག་རྒྱ་ཆེན་པོ་ལས་མི་འདའ་གསུངས་ནས་དེ་མ་ཐག་བྱིན་རླབས་ཞུགས། རང་སེམས་ངོ་འཕྲོད། དེར་ཕྱག་རྟེན་ཕུལ་ནས་རྗེས་སུ་འཛིན་པར་གསོལ། དེ་ནས་འཁྲུགས་པ་རྒྱལ་བའི་ལྷ་གསོལ་གྱི་སྐབས། ཡི་དམ་གྱི་བསྐྱེད་རིམ་དང་ཆོས་སྐྱོང་ཕྱག་བཞི་པའི་དབང་སྒྲུབ་ཐབས་རྣམས་གནང༌། ཡང་གཙང་སྟོན་ཧྲུལ་པོ་བྱ་བས་རྗེ་བཙུན་མའི་དབང་ཞུས་པའི་སྐབས་ཡེ་ཤེས་ཕེབས་རྟགས་སུ་ནམ་མཁའ་ལ་འཕར་ནས་འདུག་པ་བྱུང༌། ཉིད་ཀྱི་མཛད་པའི་ལམ་མཐར་ཐུག་གི་ཁྲིད་དང་གཟེར་ལྔ། སྒོམ་ཚུལ་ནས་བརྒྱུད་པའི་དྭགས་པོའི་སྙན་བརྒྱུད། རྒྭ་ལོ་ནས་བརྒྱུད་པའི་མགོན་པོའི་སྐོར་རྣམས་ཚང་བར་ཞུས། དེ་ནས་ཡེར་པར་སངས་རྒྱས་བསྒོམ་པའི་སྤྱན་སྔར་མཇལ་ཞིང་བསྙེན། བདག་ལ་མིང་ཞིག་འདོག་པར་ཞུ་བྱས་པས། ཤེས་རབ་སེང་གེ་བཏགས། འབྲི་སྒོམ་རས་པའི་སྙན་བརྒྱུད་དང༌། མལ་་ཡེར་པ་རྗེ་པ་རིན་པོ་ཆེ་ནས་བརྒྱུད་པའི་སྐོར་རྣམས་དང༌། ལམ་འབྲས་མ་གཅིག་ཞ་མའི་ལུགས་དང༌། ཞི་བྱེད་རྨ་སོ་ཀཾ་གསུམ། རིམ་ལྔ་བཅུ་ཆོས་སུམ་ཆོས་སོགས་ཞུས། དེར་རྔོག་གཞུང་པའི་སློབ་མ་སྨོན་ལམ་འོད་ཟེར་ལས་རྔོག་ནས་བརྒྱུད་པའི་ཆོས་སྐོར་རྒྱུད་སྡེ་རྣམས་ཀྱི་དབང་བཀའ་ཡོངས་རྫོགས་དང༌། གུར་རྟགས་སམ་གསུམ་སོགས་བཤད་འགྲེལ་དང་བླ་མ་ལྔ་བཅུ་པ་སོགས་རྩ་ལྟུང་གི་སྐོར་མ་ལུས་པ་ཞུས། དེ་ལྟར་བླ་མ་རྣམ་གསུམ་གྱི་ཞལ་དཀྱིལ་ལོ་དྲུག་ཏུ་བསྙེན་རེས་ཀྱིས་གདམས་ཁྲིད་གཞུང་བཤད་རྣམས་རྫོགས་པར་མཛད། དེ་ནས་སྟག་ལུང་དུ་བྱོན་ནས་ཐང་པ་རིན་པོ་ཆེ་མཇལ། ཕྱག་རྒྱ་ཆེན་པོའི་སྐོར་གསན་ཞིང་དོ་ཧ་རྣམས་ལ་ཞིབ་ཁྲིད་མཛད། བདེ་གཤེགས་ཕག་གྲུའི་བཀའ་འབུམ་རྫོགས་པར་གནང་ནས་ཐུགས་ཀྱིས་གཅེས་པར་མཛད། དེ་ནས་རང་ཡུལ་དུ་བྱོན་ནས་གདམས་ཁྲིད་རྣམས་ལ་བཤར་སྦྱངས་དང་ལྟ་རྟོགས་མཛད་ནས་ཡོད་པའི་སྐབས། བྱང་ནམ་རའི་གླག་མར་བྲག་དཀར་དུ་འབྲི་གུང་རིན་པོ་ཆེ་བཞུགས་ནས་གདུལ་བྱ་རྣམས་སྨིན་གྲོལ་གྱི་ལམ་ལ་བཀོད་ཅིང་བཞུགས་པ་སོགས་སྐུ་ཆེ་བའི་རྣམ་ཐར་ཐོས་པ་དང༌། དེར་དད་མོས་ཀྱིས་སྡོད་མ་ཚུགས་པར་མཇལ་དུ་བྱོན། ཐུགས་བརྩེ་བས་རྗེས་སུ་བཟུང༌། ཕྱག་རྒྱ་ཆེན་པོ་ལྔ་ལྡན་གྱི་གདམས་ཁྲིད་ལ་ཞིབ་མོར་གནང༌། བདེ་མཆོག་དང་ཕག་མོའི་དབང་བསྐུར་ཟབ་རྒྱས་མཛད། རྗེས་སུ་འབྲི་གུང་མཐིལ་དུ་ཅིས་ཀྱང་ཤོག་གསུངས་ནས་མགུར་དང་གསུང་འཕྲོས་བཀོད་ཁྱབ་ཡང་གཅེས་པར་བསྩལ། དེ་ནས་འབའ་རོམ་དུ་བྱོན་ནས་སློབ་དཔོན་དབང་སེང་གིས་མཚམས་གཡོག་བྱས་ཏེ་བྲག་རྩ་ཞིག་ཏུ་བདེ་མཆོག་དང་མགོན་པོ་ཕྱག་བཞི་པ་བསྙེན་ནས་བཞུགས་པས་ནུབ་གཅིག་རྨི་ལམ་དུ་བླ་མ་ཞང་རིན་པོ་ཆེ་ཡིན་སྙམས་པའི་དབང་བེར་དམར་པོ་ཞིག་མནབས་ནས་ཕྱག་རྡོར་དྲིལ་མཛད་པ་ཞིག་མཇལ་བྱུང་བ་བླ་མ་ཡི་དམ་དབྱེར་མེད་དུ་གྱུར་འདུག་གསུངས། ཡང་ཉིན་གཅིག་ཐུན་གཏོར་སྐབས་ལས་མགོན་ནག་པོ་སྟོང་གིས་བསྐོར་བ་ཞལ་གཟིགས་པས་ཕྲིན་ལས་བསྒྲུབ་པར་སྣང་གསུངས། དེ་ནས་བླ་མ་འབའ་རོམ་པ་ཁམས་ནས་ཡར་བྱོན་ཟེར་བའི་གཏམ་ཐོས་མ་ཐག་འབའ་རོམ་བྲག་ཏུ་ཕྱག་འབུལ་དུ་བྱོན་པས་ཐུགས་དགྱེས། དེ་སྔོན་གྱི་ལོ་རྒྱུས་རྣམས་ཞུས་པས་ཤིན་ཏུ་ལེགས་གསུངས། དེ་ནས་ཡབ་མེས་རྣམས་ཀྱི་ཆ་རྐྱེན་སྦྱར་ནས་འབའ་རོམ་ཕུག་ཏུ་བཞུགས་ནས་ཕག་མོ་ལྷ་ལྔའི་བྱིན་རླབས་ཞུས། ཚེས་བཅོ་ལྔ་ནས་ཡི་གེ་བརྒྱ་པའི་དབུ་འཛུགས་ཀྱི་ཁྲིད་མཛད་ཏེ། བཅོ་བརྒྱད་ལ་ཕྱག་ཆེན་གྱི་ཁྲིད་བཏབ། ཉི་ཤུ་གཅིག་ལ་ཕྱག་རྒྱ་ཆེན་པོའི་ངོ་བོ་མཐོང༌། ཉི་ཤུ་བཞི་ལ་ཕྱག་ཆེན་བོགས་འདོན་མཛད། ཉི་ཤུ་བདུན་ལ་ཕྱག་ཆེན་རྟོགས་པ་སྔར་ལས་ཆེས་ལྷག་པར་འཁྲུངས་ཤིང་བླ་མ་སངས་རྒྱས་དངོས་སུ་མཐོང༌། དེ་ནས་དགུང་ལོ་ཉེར་ལྔའི་དུས་སངས་རྒྱས་སྒོམ་པ་རིན་པོ་ཆེས་འབའ་རོམ་པ་ཡེལ་པ་ཨན་ཆུང་དུ་སྤྱན་དྲངས་པའི་ཆགས་ཕྱིར་འབྲང་སྟེ་བྱོན། དེར་སྤྲེལ་ལོ་ས་ག་ཟླ་བའི་ཚེས་བཅོ་ལྔ་ཐུབ་པ་མངོན་པར་བྱང་ཆུབ་པའི་དུས་སུ། བླ་མ་འབའ་རོམ་པ་དང་སངས་རྒྱས་སྒོམ་པ་གཉིས་གྲལ་གྱི་དབུར་བཞུགས་ཤིང༌། མཁན་པོ་བྲག་རུམ་པ་སྟོན་པ་གྲགས་དང༌། སློབ་དཔོན་མཐའ་བཞི་དར་མ་གཞོན་ནུ་སོགས་ཀྱི་དབུས་རབ་ཏུ་བྱུང༌། མཁན་པོ་ལས་དགེ་ཚུལ་ཀཱ་རི་ཀ་དང༌། འདུལ་བ་མདོ་རྩ་སོགས་གསན། དེར་བླ་མ་རིན་པོ་ཆེ་འབའ་རོམ་པས་དགེ་འདུན་མང་པོ་ལ་སེམས་བསྐྱེད་ཆེན་མོ་དང༌། བྱང་ཆུབ་ལམ་རིམ། འཚོགས་ཆོས་ཟབ་མོ་རྣམས་རྒྱ་ཆེར་གནང་བ་ཞུས། དེ་ནས་དཔོན་སློབ་ལྷན་དུ་འབའ་རོམ་དུ་ཕེབས། བླ་མ་རིན་པོ་ཆེ་ཤོད་ཀྱི་དགོན་པར་བཞུགས། དེར་ཉེ་གནས་མཛད་དེ་ཟབ་མོ་ནཱ་རོ་ཆོས་དྲུག་དང་ཆོས་བཞི། ཉིད་ཀྱིས་མཛད་པའི་རིག་པའི་གནད་ཆོས་བཅུ་གསུམ་ལ་སོགས་ལས་བརྩམས་ཏེ་གདམས་ངག་གི་ཞུན་ཐར་ལོ་དེར་བཅད། དེ་ནས་ལྷ་ལུང་དང་རྫ་ལུང༌། གཡུ་ལུང༌། རྫ་དེའུ། ཁྱུང་གཤོག་ཕུག །སྟོང་ཤོམ་ཕུག་ཆེ་ཆུང་ལུ་གུ་སྙིང་སོགས་སུ། དྲང་སྲོང་ཆེན་པོ་ལྟ་བུར་གཅིག་རི་ཁོ་ནར་ཐབས་གྲོལ་ཟུང་འཇུག་གི་ལམ་ལ་ཐུགས་གཞོལ་ནས་སྒྲུབ་པ་མཛད་པས་མཉམ་རྗེས་དབྱེར་མེད་ཀྱི་རྟོགས་པ་འཁྲུངས། རླུང་སེམས་གཉིས་མེད་ཀྱི་གྲུབ་རྟགས་ཐོན། དུས་དེ་ཙ་ན་བླ་མ་འབའརོམ་པ་ལ་སངས་རྒྱས་དངོས་ལས་ལྷག་པའི་ངེས་ཤེས་སྐྱེས་ཏེ་མི་ལྡོག་པའི་དད་པ་སྐད་ཅིག་ཙམ་ཡང་འབྲལ་དུ་མི་གཏུབ་པ་བྱུང༌། དེ་ནས་འབྲི་གུང་རིན་པོ་ཆེ་བྱང་ནམ་ར་ནས་ཚུར་བྱོན། འབའ་རོམ་ནང་དུ་རིན་པོ་ཆེའི་སྤྱན་སྔར་ཕེབས། མཉམ་མེད་སྒམ་པོ་པའི་དྲུང་ནས་ཞལ་གདམས་འཚོགས་ཆོས་ཀྱི་སྐོར་རྣམས་གསན་བཞེས་གནང་བའི་ ཐུགས་གཤིམས་པའི་གསུངས་གླེང་ཟབ་རྒྱས་མཛད། དེ་ནས་རོམ་པོའི་ཐང་ལ་ཆོས་རྗེ་རིན་པོ་ཆེ་རྣམ་གཉིས་སྟོན་འཁོར་བཅས་བྱོན། དེར་ཕ་བོང་དམར་པོའི་ཁར་ཆོས་ཁྲི་བཤམས་ནས་དེ་ཕྱོགས་ཀྱི་ལྷ་སྡེ་མི་སྡེ་དཔག་མེད་འདུས་ནས་བསྙེན་བཀུར་ཕུལ། ནུབ་གཅིག་འབའ་རོམ་རིན་པོ་ཆེ་ཆོས་ཁྲིར་བཞུགས་ནས་སེམས་བསྐྱེད་ཆེན་མོ་གསུངས། ནུབ་གཅིག་འབྲི་གུང་རིན་པོ་ཆེ་དེར་བཞུགས་ནས་ལྔ་ལྡན་ཕྱག་ཆེན་གྱི་ཁྲིད་གནང༌། དེར་ཡོད་ཀྱི་འགྲོ་བ་རྣམས་བྱང་ཆེན་རྒྱུར་སྨིན་པར་མཛད། དེ་ནས་འབྲི་གུང་རིན་པོ་ཆེ་གདན་ས་མཐིལ་དུ་ཕྱག་ཕེབས། འབའ་རོམ་པ་དགོན་དུ་ཡར་བཞུད། དེ་ནས་ཡབ་མེས་ཀྱི་སར་བྱོན་ནས་ཅུང་ཟད་བཞུགས་ཏེ་ལས་རྒྱུ་འབྲས་དགེ་སྡིག་གི་དག་ཤན་དང༌། ཇོ་བོ་ཐུགས་རྗེ་ཆེན་པོའི་སྒོམ་བཟླས། ཕྱག་རྒྱ་ཆེན་པོའི་ངོ་སྤྲོད་ཀྱིས་སྨིན་པར་བྱས། དེར་འབྲི་གུང་པས་སྔོན་ནས་གསུངས་པ་རྣམས་དྲན་ནས་འབྲི་གུང་དུ་བྱོན་པར་གདའ། དེ་ནས་འབྲི་གུང་གི་དགོན་པ་མཐོང་མ་ཐག་ཁྲེས་པོ་ཕོག་ནས་ཕྱག་འཚལ། མོས་གུས་བྱས་པས་དགོན་དེ་ཉིད་བདེ་མཆོག་ལྷ་དྲུག་ཅུ་རྩ་གཉིས་སུ་ཞལ་གཟིགས། སྐྱོབ་པ་རིན་པོ་ཆེ་མཇལ། གུས་པའི་ཕྱག་རྟེན་ཕུལ། ཉིད་ཀྱི་གསུངས་པའི་ཆོས་ཞལ་གདམས་ཀྱི་སྐོར་རྣམས་དང༌། རྒྱུད་སྡེ་བཞི་དང་འབྲེལ་བའི་དཀྱིལ་འཁོར་གྱི་ལྷ་ཚོགས་རབ་འབྱམས་ཀྱི་དབང་བཀའ་རྗེས་གནང་དང་ཚོགས་ཆོས་མང་དུ་གསན། དེ་ནས་ཡང་དགོང་མོ་ཞིག་ལ་རིན་པོ་ཆེའི་མདུན་དུ་བྱོན་ནས་ཡན་ལག་བདུན་པ་ཕུལ་ཞིང་ཕྱག་དང་མཎྜལ་བཅས་ཡོངས་ཀྱི་དགེ་བའི་བཤེས་གཉེན་ཆེན་པོ་གང་གི་དྲུང་དུ་རང་གི་ཉམས་སུ་མྱོང་བའི་ཚིག་ཅུང་ཟད་ཞུ་བས་གསན་འཚལ་ཞེས་རྟོགས་པ་ཕུལ་བས། དེར་ཅིར་ཡང་མ་གསུངས་ཅུང་ཟད་བཞུགས། དེ་ནས་བྱང་ཆུབ་སེམས་མཆོག་རིན་པོ་ཆེ། ཞེས་སོགས་སྨོན་ལམ་མཛད། ཕྱི་དེའི་ནངས་པར་བར་ཁྱམས་སུ་དགེ་སྦྱོར་བྱས་ཡོད་པར། རིན་པོ་ཆེ་ཕེབས་ནས་ཕར་བྱོན་ཚུར་བྱོན་མཛད་ནས། རོ་གཅིག་ཆེན་མོ། རོ་གཅིག་ཆེན་མོ་ཞེས་གསུངས་པར་གདའ། དེར་ངེད་མ་གཏོགས་གཞན་མི་འདུག་པས་རང་ལ་གསུངས་པ་ཡིན་ནམ་མ་ཤེས་གསུངས། ཡང་ཉིན་གཅིག་ཁྱོད་ཀྱི་རྟོགས་པ་དེ་གང་ལས་སྐྱེས་པ་ཡིན་གསུངས། བདག་གི་འདྲེན་པ་འབའ་རོམ་པའི་བཀའ་དྲིན་ལས་བྱུང་བ་ལགས་ཞུས། དེར་ཐུགས་དགྱེས་ཆེར་མཛད། ལར་ཆོས་རྗེ་འབྲི་གུང་རིན་པོ་ཆེའི་མཛད་པ་རྣམ་ཐར་ཆོས་ལུགས་རྣམས་ལ་ཕྱི་ནང་གསང་གསུམ་གྱི་གོ་བ་ཁྱད་པར་འཕགས་པ་བྱུང་གསུངས། དུས་དེར་དགུང་ལོ་སོ་གཉིས་པ་ཡོས་བུ་ཆུ་སྟོད་ཉ་བའི་ཚེས་བཞི་ཆོས་འཁོར་བསྐོར་བའི་དུས། མཁན་པོ་ཐག་མ་དཔལ་ཆེན་དང༌། སློབ་དཔོན་གུ་ར་བ། གསང་སྟོན་པ་དར་གཞོན་སོགས་དགེ་འདུན་ཉི་ཤུ་ཙམ་བཞུགས་པའི་དབུས་སུ་བསྙེན་པར་རྫོགས་པར་མཛད། དེ་ནས་མཁན་པོ་ཉིད་ལས་སོ་སོར་ཐར་པའི་མདོ་དང༌། འདུལ་ཊིག་དང་བསླབ་བཏུས་གསན། འབྲི་གུང་དུ་ལོ་གཅིག་བཞུགས། དེ་ནས་རིན་པོ་ཆེའི་མདུན་དུ་གསོལ་འདེབས་མོས་གུས་དྲག་ཏུ་བྱས་ནས་བྱོན་པར་གདའ། དེ་ནས་མཚལ་དུ་བྱོན། རིན་པོ་ཆེ་གུང་ཐང་དུ་བཞུགས་པ་དང་མཇལ། ཡར་ལ་རྟོགས་འབུལ་དང༌། མར་ལ་ངོ་སྤྲོད་གཅིག་ཆར་དུ་གདབ་པར་མཛད། སྔོན་གྱི་གདམས་ངག་རྣམས་ལ་དག་ཐེར་ཞུས་ཤིང་འཕྲོས་ལུས་ཀུན་ཚང་བར་གནང༌། དེ་ནས་ཡེར་པར་བྱོན་ནས་སངས་སྒོམ་དང་མཇལ། ཇོ་བོ་བཀའ་གདམས་པའི་སྐོར་གྱི་གསུངས་སྒྲོས་རྣམས་ལྷག་ལུས་མེད་པར་ཞུས། དེ་ནས་སྟག་ལུང་དུ་ཐང་པ་རིན་པོ་ཆེ་མཇལ་དུ་བྱོན། ཐང་པ་རིན་པོ་ཆེའི་མདུན་ནས་སེམས་བསྐྱེད་ཆེན་མོ་གསན། གཞན་འཚོགས་ཆོས་མང་དུ་གནང་བ་རྣམས་ངེས་པར་བྱས། ཆོས་རྗེའི་ཞལ་ནས། དབུས་པ་པདྨའི་ས་གཞི་ཡོད། ཁྱོད་འདིར་སྡོད་དང་གསུངས། ཐུགས་བརྩེ་བའི་གསུང་གླེང་མང་དུ་མཛད། དེར་མོས་གུས་ཕུལ་ཞིང་གསོལ་འདེབས་བཅས་རང་ཡུལ་ནས་འརྒྱུད། འབའ་རོམ་དུ་རྗེ་རིན་པོ་ཆེའི་སྤྱན་སྔར་ཕྱིན། ཕྱག་དང་མཎྜལ་བཅས་བསྙུང་དྲི་ཞུས། ད་སྐབས་མི་བདེའི་སྐྱོན་ཆེར་མེད་གསུངས། དེ་སྔོན་དགེ་བའི་བཤེས་གཉེན་རྣམས་བསྟེན་པ་དང༌། སྒྲུབ་པ་ལ་འབད་པ་བཅས་ཕུན་སུམ་ཚོགས་པར་བྱུང༌། ད་འདིར་ཚོགས་པ་སྐྱོང་བའམ་ཡང་ན་སྨུགས་སང་དགོན་བཟུང་བ་གང་མོས་ཤིག་དགོས་གསུངས། དེར་བདག་གིས་ཚོགས་པ་སྐྱོང་བ་བྱེད་བསམ་མེད་ཅིང་རི་ཁྲོད་ངེས་མེད་དུ་སྒྲུབ་པ་ཁོ་ནར་མཐའ་འཁྱོལ་བ་ཨི་ཡོང་སྙམས་པ་ཡོད་ཞུས་པས། རྒྱལ་བའི་གདུང་བརྒྱུད་མི་གཅོད་པ་བསྟན་པ་སྐྱོང་བ་ཡིན་ལ། སེམས་ཅན་བློས་མི་གཏོང་བ་གཞན་དོན་བསྒྲུབ་པ་ཁོ་ན་ཡིན་པ་དེ་ལྟ་བུའི་གོང་མའི་རྣམ་ཐར་ལ་སློབ་དགོས་པ་ཡིན་གསུངས། དེ་སོགས་ཞིབ་པར་ཞལ་འཕྲོས་གནང་ཞིང་སྤྱན་སྔར་བཞུགས་པ་ལ། ཉིན་གཅིག་དེར་རྒན་པོ་སེ་ཐུང་བ་རལ་གུ་གྱོནཔ་ཕྱིང་ཞྭ་ཅོག་ཅོག་གྱོན་པ་ཞིག་བྱུང་བས། ཁྱོད་གང་ནས་འོང་བྱས་པས་མདོ་སྨད་ནས་འོང་བྱས་པས། རྩི་བར་ཇ་པ་དང་འགྲོགས་ནས་ཕྱིན་ཟེར། དེ་ནས་ཅི་ཡང་མ་དྲིས་པ་ལ། མི་ཉག་རྒྱལ་པོ་འདས་ནས་ཆོས་རྒྱལ་ཐའི་ཧུ་བྱ་བ་རྒྱལ་སར་འཕོས་ནས་ཡོད། ཁོང་བསོད་ནམས་ཀྱང་ཆེ། དབུས་གཙང་གི་བླ་མ་འགའ་ཡང་མཆོད་གནས་སུ་བཞུགས་ཟེར། དེར་ཚིག་དེས་རྐྱེན་བྱས་མདོ་སྨད་དུ་འགྲོ་འདོད་པ་ཞིག་གིས་དེ་ནུབ་མནལ་ཡང་མ་བྱུང༌། ཕྱི་ཉིན་བླ་མ་རིན་པོ་ཆེ་ལ་བདག་མདོ་སྨད་དང་མི་ཉག་ཡུལ་དུ་འགྲོ་འདོད་པ་ཞིག་བྱུང་བས་བཀའ་གནང་བར་ཞུ་གསོལ་བས། འོ་སྐོལ་ཕ་བུ་མཉམ་དུ་སྡོད་པ་དགའ་ཡང་ཁྱོད་འགྲོ་འདོད་པས་ཤར་ཕྱོགས་སུ་སོང་དང་གདུལ་བྱ་ཡང་ཡོད་གསུངས། དེར་འགྲོ་བའི་ཐག་ཆོད་ནས་འགྲོ་གྲབས་བྱས། བྱིན་རླབས་རྟེན་ཕྱག་རྗེས་དང༌། ཇོ་བོ་ཛམྦྷ་ལའི་སྒྲུབ་ཐབས་ཞིག་ཞུ་སྙམས་ནས་བླ་མའི་མདུན་དུ་བྱོན་པས། ཞུ་མ་དགོས་པར་རིན་པོ་ཆེ་ཚེམས་གཅིག་དང་ཕྱག་རྗེས་རྟེན་དུ་གནང༌། ཛམྦྷ་ལའི་སྒྲུབ་ཐབས་འདི་ཀ་རང་ཡིན་གསུངས། ཟང་ཟིང་གི་རྫོང་ཡང་བཟང་པོ་གནང༌། དེར་ལུས་སྤུ་ཟིངས་སེ་སོང༌། དེར་འབྱོན་པ་ཙ་ན་དར་ཞྭ་རྩེ་ལྔ་བཞེས་ཏེ། དེའང་རང་ལ་དྲིན་ཐོབ་ཀྱི་བླ་མ་ལྔ་ཡོད་དོ། སེམས་ཉིད་ཡིད་བཞིན་གྱི་ནོར་བུ་ལག་བཅང་དུ་ངོ་སྤྲད་པ་དེ་བླ་མ་འབའ་རོམ་རིན་པོ་ཆེའི་བཀའ་དྲིན་ཡིན། ལྟ་བ་ནམ་མཁའ་ལ་མདུང་བསྐོར་བ་འདྲ་བ་དེ་བླ་མ་ཞང་རིན་པོ་ཆེའི་བཀའ་དྲིན་ཡིན། གསང་སྔགས་ཀྱི་ཆོས་ལ་རང་བྱན་ཚུད་པ་དེ་བླ་མ་སངས་རྒྱས་སྒོམ་པ་རིན་པོ་ཆེའི་བཀའ་དྲིན་ཡིན། རྟེན་འབྲེལ་ཕྱོགས་མེད་དུ་འཆར་བ་དེ་བླ་མ་འབྲི་གུང་རིན་པོ་ཆེའི་བཀའ་དྲིན་ཡིན། མོས་གུས་རྒྱུན་ཆད་མེད་པ་དེ་སྟག་ལུང་ཐང་པའི་བཀའ་དྲིན་ཡིན། དེ་ལྟར་རྩ་བའི་བླ་མ་ལྔ་ཡོད་རྟགས་སུ་དར་ཞྭ་རྩེ་ལྔ་གསོལ་བ་ཡིན་གསུངས། དེའང་འབའ་རོམ་དུ་སྔ་ཕྱིར་ལོ་བདུན་བཞུགས་ཤིང་ཡོས་བུ་ལོ་ཁྲུམས་ཟླའི་ཚེས་བཅུ་བདུན་ལ་འགྲོ་བའི་གྲོགས་པོ་འགའ་བྱུང་བ་དང་བཅས། བླ་མ་རིན་པོ་ཆེ་སྟོན་འཁོར་གྱིས་སྐྱེལ་ཐུང་མཛད། རང་ནས་ནམ་ཙམ་ཡར་ཡོང་ཞུས་པས་ཁྱོད་རང་ཤེས་ནས་འོངས་གསུངས་ནས་བཀྲ་ཤིས་སྨོན་ལམ་རྒྱ་ཆེར་མཛད་དེ་བྱོན། དེ་ནས་བྱང་ལམ་བརྒྱུད་ཟླ་སྨད་གླུ་ཐུ་ཟེར་བར་གྲོགས་པོ་བྱང་གྲགས་ཀྱི་གནས་པོ་བྱས་དེར་ཟླ་བ་གསུམ་ཙམ་བཞུགས། དེར་ཁྲོ་བོའི་རྒྱལ་པོ་རྟ་མགྲིན་ཞལ་གཟིགས་པས་བར་ཆད་འཕྲང་ལས་གྲོལ་བའི་རྟེན་འབྲེལ་དུ་སྣང༌། དེ་ནས་གདན་ཀློང་ཐང་དུ་ཕེབས་པ་དང་རྟེན་འབྲེལ་ངན་པ་ཞིག་བྱུང་བ་ཡར་ལོག་སྙམ་ཞལ་བུ་མདོར་སླེབས། དེ་ནུབ་རྨི་ལམ་དུ་རྟ་ངང་པ་ཆིབས་པའི་མི་སེར་པོ་གསེར་ཁྲབ་གསེར་ཞྭ་རྨ་བྱའི་སྒྲོ་འཕྲུ་ཅན། གཡས་ཕྱར་དར་གཡོན་ནེའུ་ལེ་འཛིན་པ་ཞིག་གིས་ངའི་ཕོ་བྲང་ཤར་ཕྱོགས་སུ་ཡོད་པས་འདོང་ཟེར་བ་ལ་རྨ་སྤོམ་ར་ཡིན་བསམ་པ་ལ་མིན་པར་འདུག །རྣམ་ཐོས་སྲས་ཀྱི་ལུང་བསྟན་པར་གདའ་གསུངས། དེ་ནས་ཡོབ་ཆེན་ཞེས་པར་ཞག་འགའ་བཞུགས་པར་ནུབ་གཅིག་དཔལ་ལྡན་ལྷ་མོ་རེ་མ་ཏི་གཟི་བརྗིད་དང་བཅས་པས་འབྱོན་ནས་ཁྱེད་ཀྱི་གདུལ་བྱ་རྩྭ་མིའི་རྒྱལ་ཁམས་ཡིན་པས་མེ་ཉག་ཡུལ་དུ་ཅིས་ཀྱང་བྱོན་ཞེས་ལུང་བསྟན། གཞན་ཡང་ཡུལ་ལྷ་ཀུན་གྱིི་བསུ་བ་བྱུང་གསུངས། ཙོང་ཀའི་ཏྲེ་རོང་དགོན་དུ་བྱོན། སློབ་དཔོན་ཡར་ལུང་པ་སེང་གེ་རྒྱལ་མཚན་དང་དགེ་བཤེས་དེའུ་སོ་བ་གཉིས་ནས་བསུ་བ་སྣ་ལེན་བཟང་པོ་མཛད། དེ་ནས་ལིང་ཅུར་བྱོན་པ་རྒྱལ་པོས་གསན་ནས་གསེར་ཡིག་པ་བཏང་སྟེ་ཆུ་ཤིང་འཛོམས་སར་དགོན་པ་ཟུངས་ཞེས་པའི་བཀའ་ལུང་བསྩལ། དགུང་ལོ་སོ་ལྔ་ལ་ཀཾ་ཆུ་གུ་རུབ་དགོན་བཏབ། བྷ་ཏིར་རྒྱལ་པོ་མཇལ། དེར་གཟི་དགའ་དགོན་བཏབ། མཁར་ལུང་དུ་བླ་ཆེན་དགོན། ཙོང་ཀའི་གོ་ར་དགོན། བྱར་ས་དགོན་ཞེས་ཆོས་སྡེ་ཆེན་པོ་འགའ་ཞིག་བཏབ། དེ་དག་ཚེ་དངོས་བརྒྱུད་བླ་མ་ཡི་དམ་མཁའ་འགྲོའི་ཚོགས་རྣམས་བར་སྣང་གི་སྤྲིན་གསེབ་ནས་ཀུན་གྱིས་མཐོང་བའི་བཀྲ་ཤིས་བརྗོད་ཅིང་ཅང་ཏེའུ་ཌཱ་མ་རུ་འཁྲོལ་འཇའ་འོད་མེ་ཏོག་གི་ཆར་བཅས་བྱིན་འབེབས་པའི་མཐོང་སྣང་དུ་མ་བྱུང༌། གྲྭ་ཚོགས་ཀྱང་ཁྲི་ཕྲག་ལྷག་ཙམ་རེེ་བྱུང༌། དེ་ནས་རྒྱལ་པོས་འགའ་མཁར་ཕོ་བྲང་དུ་སྤྱན་དྲངས། བསྙེན་བཀུར་ཟླ་མེད་བྱས། རྒྱལ་པོ་བསྙུན་པའི་སྐུ་རིམ་དགེ་བའི་བཤེས་གཉེན་གཙང་པ་བ་དང༌། ཁོང་རྣམ་གཉིས་ཀྱིས་མཛད། རྒྱལ་པོ་བསྙུན་ལས་གྲོལ་བར་གྱུར། དེ་ནས་ཆོས་རྒྱལ་ཐ་ཧུས་རྒྱལ་སྲིད་འཕོས་ཏེ་སྲས་རྒྱལ་རྒོད་རྒྱལ་སར་བཏོན། དུས་རེ་ཞིག་ན་ཧོར་དམག་གི་འགའ་མཁར་འསྐོར་བ་དང༌། ཆུ་ལོག་གིས་ལྕགས་རི་འཇིག་ལ་ཁད་པ་བྱུང་བས། དེར་དམག་ཟློག་ཏུ་མགོན་པོའི་གཏོར་ཆེན་མཛད་ནས་འཕངས་པའི་དུས་བསྐུལ་པ་དུར་ཁྲོད་བསིལ་ཚལ་གྱེར་རིང་སྐབས། མགོན་པོ་ཕྱག་བཞི་པ་ལས་མགོན་གསུམ་གྱིས་བསྐོར་བ་ཞལ་གཟིགས་ནས་ཕར་ཧོར་དམག་ཕྱོགས་སུ་ཆས་པ་མཐོང༌། ཆུ་ལྡོག་པས་ཧོར་དམག་ཕམ་སྟེ་འཚེ་བ་མེད་པར་གྱུར། དེར་རྒྱལ་པོ་རྒྱལ་རྒོད་ཤིན་ཏུ་དད་ཏེ་དབང་བསྐུར་ཞུས། ཏི་ཤྲཱི་ཞེས་བོད་སྐད་དུ་རྒྱལ་བོའི་སྤྱི་བོ་ནས་དབང་བསྐུར་བའི་བླ་མ་ཞེས་པའི་ལས་ཀ་དང༌། འབའ་རོམ་ཤེལ་སྐུ་བཻཌྲུརྻའི་གླེགས་བམ་སོགས་འབུལ་བ་བསམ་མི་ཁྱབ་པར་ཕུལ། དེ་ནས་ཞིན་ཁྱེའུ་ཕྱིན་ཆད་མེ་ཉག་རྒྱ་བོད་ཀྱི་བླ་མ་དགེ་བའི་བཤེས་གཉེན་དང༌། དགེ་འདུན་གྱི་ཚོགས་དང༌། རྒྱལ་པོ་དང་བཙུན་མོ་བློན་པོ་སྐྱེ་བོ་ཕོ་མོ་གྲངས་ལས་འདས་པ་རྣམས་ལ་སྣོད་དང་མཚམས་པར་སྐྱབས་འགྲོ་དང་དགེ་བསྙེན་སོགས་སོ་ཐར་རིས་བརྒྱད། བྱང་ཆུབ་སེམས་བསྐྱེད་དང༌། སྨིན་ལམ་དབང་བསྐུར། གྲོལ་ལམ་གདམས་ཁྲིད་སོགས་ཐར་པའི་ས་བོན་དཔག་བསམ་ཤིང་གི་འབྲས་བུ་ལྟར་བསྐྲུན་པར་མཛད་ཅིང༌། དངོས་པོའི་ཡོ་བྱད་ཐམས་ཅད་ཀྱང་སྦྱིན་བདག་ཚོགས་རྫོགས་བསོད་ནམས་འཕེལ་བའི་ཕྱིར། དངོས་བརྒྱུད་ཀྱི་གདན་ས་རབ་བྱུང་ཐམས་ཅད་ལ་ཕུན་སུམ་ཚོགས་པའི་བསྙེན་བཀུར་མཐའ་ཀླས་པ་དང༌། གསེར་འབུམ་དང༌། རྒྱུད་འབུམ། མདོ་མང་སོགས་པུསྟི་གྲངས་མང་པོ་དག་དང༌། གསེར་སྐུ་དངུལ་སྐུ་བཏགས་སྐུ་སོགས་བཟོ་ཁྱད་དཔེ་མེད་པ་རྣམས། གདན་ས་རྣམས་ལ་འབུལ་སྐྱེལ་ལན་མང་དུ་མཛད་པའོ། །གཞན་ཡང་རྫུ་འཕྲུལ་དང་ངོ་མཚར་བའི་བཀོད་པ་སྟོན་པར་མཛད་པའི་ཚུལ་ནི་རྣམ་ཐར་བསྟོད་པ་ལས། སྐུ་གཟུགས་་གསུང་རབ་མཆོད་རྟེན་གཙུག་ལག་ཁང༌། གྲངས་ལས་འདས་པ་སྐུ་གསུང་ཐུགས་ཀྱི་རྟེན། མངའ་གསོལ་རབ་ཏུ་གནས་པ་མཛད་པའི་ཚེ། ལ་ལ་དག་ཏུ་ཁྲོ་བོས་ཧཱུྂ་སྒྲ་སྒྲོགས། ལ་ལའི་གནས་སུ་བུམ་ཆུ་རང་བཞིན་ཁོལ། ལ་ལའི་གནས་སུ་ཤིང་ལས་པདྨོ་རྡོལ། ལ་ལའི་གནས་སུ་རྟེན་ལ་འོད་ཟེར་འབྱུང༌། ལ་ལ་དག་ལ་མེ་ཏོག་རང་འབྱར་ཏེ། ལ་ལ་དག་ལ་ལྡུམ་རའི་མེ་ཏོག་ཆགས། དག་པའི་རྒྱལ་ཁམས་ཆོས་ལ་སྤྱོད་པའི་ས། མི་རིགས་མི་མཐུན་སྐད་རིགས་བརྒྱད་ཀྱི་ཡུལ། རྒྱལ་བློན་འབངས་དང་བཅས་པ་བྱེ་བ་རྣམས། སྲོག་གི་ཕྱིར་ཡང་དམ་ཆོས་མི་གཏོང་ཞིང༌། མི་ཕྱེད་དད་པ་ཐོབ་མཛད་ཆོས་ཀྱི་རྗེ། བསྡུ་བཞིས་འགྲོ་བ་འདྲེན་པའི་རིན་པོ་ཆེ། ལུང་བསྟན་མཆོག་ཐོབ་ཁྱོད་ལ་ཕྱག་འཚལ་བསྟོད། ཞེས་པ་ལྟར་རོ། །དེ་ནས་བྱང་ཕྱོགས་ཇུས་ཟི་ནམ་ཞེས་པའི་ས་མཚམས་སུ་བདེ་གཤེགས་འོད་སྲུང་བཞུགས་གནས་ཙཱིར་ཁབ་ཞེས་པའི་ལྷ་ཁང་ཁྱད་འཕགས་ཡོད་པ་རྙིང་ཧྲུལ་དུ་གྱུར་པ་ཉིད། སླར་དངོས་པོ་རྒྱ་ཆེན་པོས་ཕྱི་ནང་གསར་བསྐྲུན་ཁྱད་འཕགས་གྲུབ་རྗེས་རབ་གནས་ཕུན་ཚོགས་བགྱིས་པ་དེ་ལྟ་བུའི་རྙིང་པ་གསར་བཟོས་དང་གསར་པ་བཟོ་བསྐྲུན་བཞེངས་པ་སོགས་ཕྱི་སྣོད་ནང་བཅུད་འཛོམས་པ་ལྷ་མིའི་དད་པའི་རྟེན་དུ་བཞེངས་པ་ངོ་མཚར་བརྗོད་ལས་འདས། ཡང་འགའ་མཁརདུ་ཐུགས་དམ་ལ་བཞུགས་པའི་ཚེ། ཡུལ་ཁམས་སྐྱོང་བའི་རྒྱལ་པོ་རྣམ་ཐོས་སྲས་རྟ་ལ་ཆིབས་ནས་བྲོས་པ་ལྟར་རིང་པར་བྱོན་པའི་རྗེས་སུ་གནམ་ཐེལ་དཀར་པོ་སྡིག་པའི་གཟུགས་ཅན་མགོ་བོས་ནམ་མཁའ་ཁེངས་པ་ཁ་གདངས་པ་ཤར་ངོས་ནས་འགའ་མཁར་དུ་བྱུང་ཞིང༌། དེར་བྱམས་པའི་ཐུགས་རབ་ཏུ་བསྐྱེད་དེ་ཡི་དམ་འཁོར་ལོ་སྡོམ་པའི་སྐུར་བཞེངས་ནས་སེམས་ཅན་དེའི་ཐད་དུ་བྱོན་པས། དེ་ཉིད་ཁ་བཙུམ་ནས་རྒྱལ་ཆེན་ཕྱི་ནས་ཕར་བྲོས་པར་སྣང་གསུངས། ད་ལན་མི་འཆོར་ལར་ནི་མི་གཏོང་ཞེས་ལུང་བསྟན་པར་མཛད། དེའང་དམག་མ་བཟློག་པ་མ་ཡིན་ཏེ། ལྕགས་སྤྲེལ་ནས་ཤིང་བྱ་བར་གྱི་ལོ་ཉེར་དྲུག་ལ་དམག་བཟློག་པ་ཡིན་ཏེ། མཐར་ནི་བཅོམ་ལྡན་འདས་ཀྱིས་ལས་དང་ལས་ཀྱི་རྣམ་པར་སྨིན་པ་ནི་མ་གཏོགས་པ། ཞེས་གསུངས་པས་ལྟར་རོ། དགུང་ལོ་རེ་གསུམ་ཐོག་དེ་ནས་བོད་དུ་འབྱོན་པ་ལ་རྒྱལ་བློན་སོགས་ཀྱིས་བཤོལ་བཏབ་ཀྱང་མ་ཐེབས་པར་བོད་དུ་བྱོན། ཤར་འོ་དེ་རལ་གསུམ་སོགས་བརྒྱུད། དགེ་བསྙེན་སེང་རུ་ངང་ཡག་གིས་བསུ་བ་བྱས། དེ་ཤོད་རག་ཉག་ཏུ་བཞུགས་པའི་སྐབས་ཉམས་ཀྱི་སྣང་བར་མདུན་གྱི་ནམ་མཁར་སྣ་ཚོགས་རིན་ཆེན་ལས་གྲུབ་པའི་གཞལ་ཡས་ཁང་གི་དབུས་སུ་རྡོ་རྗེ་རྣལ་འབྱོར་མ་སྒེག་འཛུམ་བཞད་པའི་ཉམས་ཅན་གསལ་བར་གཟིགས་པའི་ཞལ་ནས་ཐབས་གྲོལ་གྱི་གདམས་པ་ཟབ་མོ་བསྟན་པ་ཐུགས་སུ་ཆུད་པར་གྱུར་པའི་རྗེས་སུ་སྐུ་ལ་ཐིམ་པའི་སྣང་ཚུལ་བྱུང་ཞིང་སྐུ་ལ་བཟོད་མེད་ཀྱི་བདེ་བ་འབར་བ་དང༌། ཐུགས་ལ་ཆོས་ཉིད་གསང་བ་བསམ་མི་ཁྱབ་པའི་དོན་བརྗོད་བྲལ་ལྷན་ཅིག་སྐྱེས་པའི་ཡེ་ཤེས་མངོན་དུ་གྱུར། དེ་ནས་བྱང་ལམ་ནས་བརྒྱུད་དེ་འབའ་རོམ་དུ་ཕེབས། བསུ་བ་དང་སེར་སྦྲེང་མཛད། གདན་སར་དབོན་རིན་པོ་ཆེ་ལ་འབུལ་བ་དང༌། དགེ་འདུན་རྣམས་ལ་བཀའ་ཆོས་དང་ཕྱག་འགྱེད་ཕུལ། དེ་ནས་འབྲི་སྟག་གི་འཁྲུགས་པ་རྣམས་བཟླུམས་ནས་ཚལ་དང་ཡེར་སོགས་བླ་མའི་གདན་ས་སོ་སོའི་དབོན་རྣམས་དང་དགེ་འདུན་རྣམས་ལ་འབུལ་བ་ཕྱག་འགྱེད་དང་ཆོས་འབྲེལ་རིམ་པར་གནང་ནས་སླར་འབའ་རོམ་དུ་བྱོན། དེར་རྟེན་མཆོད་ཁང་རྣམས་ལ་རབ་གནས་རྟེན་བཞུགས་རྒྱས་པ་དང་དགེ་འདུན་ཚོགས་ལ་ཞལ་ཏ་ཞིབ་རྒྱས་མཛད་ནས་སྐྱེལ་མ་དང་བཅས་སླར་ཁམས་ལ་ཕེབས་པར་གདའ། དེ་ནས་སྤམ་ནེ་གེ་ཐང་ནས་བཀའ་བརྒྱུད་བླ་མ་རྣམས་ཞལ་གཟིགས་ནས་བཀའ་བཞིའི་གདམས་པ་གནང་བ་ལ་ཟབ་ལམ་བསྟན་བཅོས་མཛད། ཀ་ཐོར་ཕུག་ནས་རྣམ་སྲས་ཞལ་གཟིགས། རོག་སྤར་གོང་ནས་མགོན་པོ་ཞལ་གཟིགས། རོ་གད་བཞུགས་ཚེ་སྤྱན་རས་གཟིགས་ཞལ་གཟིགས། ཟླ་ཉིན་ལྕགས་ལ་སྒང་བཞུགས་ཚེ་ཨ་ཏི་ཤ་རྣལ་འབྱོར་ཆས་ཅན་བཙུན་མོ་གཉིས་ཀྱིས་བརྟེན་པ་ཞལ་གཟིགས་ནས། ང་ཡི་ཉན་ཐོས་སྡེ་པ་བཅོ་བརྒྱད་པོ་འདི་ཁྱོད་ལ་གཏད་པ་ཡིན་པས་ཟུངས་ཤིག་ཅེས་གསུངས་པའི་གཟིགས་སྣང་བྱུང་གསུངས། ཕྱིས་ཆོས་བརྒྱུད་ལ་སྒོམ་སྡེ་རི་ཁག་བཅོ་བརྒྱད་འབྱུང་བའི་ལུང་བསྟན་དུ་གོ །མཆན༌། སྐྱོ་ལྡག་ན་མོ་ཆེར་སྒར་ཕབ་ནས་བཞུགས་པའི་སྐབས། ཉིན་གཅིག་སློབ་དཔོན་ཅུང་པོ། མཁན་པོ་རབ་སྦྲེང་བ། རོང་ཀ་མཁན་པོ། དགོན་པ་བ་སོགས་དགེ་འདུན་མང་བར་བཞུགས་པ་ལ་གཟིམས་གུར་གཤམ་ཁྱོག་གསུངས་ནས་མཐའ་འདིར་ལྕགས་རི་ཆེན་པོ་གཅིག་གིས་བསྐོར་ནས་འདུག་པ་ཨེ་མཐོང་གསུངས། དེར་གཟིམས་གཡོག་ཤེས་རབ་རྡོ་རྗེ་ལ་འདིར་གཙུག་ལག་ཁང་དང་སྒྲུབ་པ་པོ་སེམས་ཅན་ལ་ཕན་ཐོགས་པ་མང་པོ་ཡོང་བར་འདུག །ཁོ་བོས་དེ་སྐད་ཟེར་གྱིས་ལ་བྲག་རྩ་ཆུ་མིག་མི་འཕོག་པར་ཡི་གེ་ཐོབ་གསུངས། དྲུང་དུ་འཁོད་པ་རྣམས་ལ། འདིར་དགོན་པ་ཆེན་པོ་འབྱུང་གི་དང་པོ་སངས་རྒྱས་ཀྱི་སྒྲུབ་གནས། བར་དུ་ཚོང་འདུས་ཆེན་མོ། ཐ་མ་ཇག་པའི་རྐུང་ལུང་ཡོངས་བར་འདུག་གསུངས། ཡུན་ཅི་ཙམ་གནས་ཞུས་པས་ཡུན་འབྲིང་ཙམ་ལས་མི་གནས། སྔར་ཞང་རིན་པོ་ཆེའི་འཁྲུགས་པ་བྱེད་དགོས་གསུངས་པ་ལ་ཁོ་བོས་མ་བྱས་པ་དང༌། འདིར་ཕྱིན་དུས་ཕ་ཀིར་སྤྱང་ཕོ་རང་གཉིས་རྩོད་པ་འདུག་པས། དེའི་རྟེན་འབྲེལ་གྱིས་མཐར་གདན་ས་བ་གཉིས་སུ་གྱེས་ནས་འཇིག་སླ་བར་འདུག་གསུངས། ཡུལ་དེའི་གཞི་བདག་རྫ་ངང་པ་ཡིན་ཟེར་བའི་ན་སོ་ཅུང་རྒན་པ་དར་གྱི་ལ་ཐོད་བཅིངས་པ་ཆོས་རྒྱུས་ཞིབ་པ་གཅིག་གིས་ཆོས་ཞུས། རྫ་རྒྱལ་ཆམ་ཕུ་དུང་རྣ་སྤོ་ར་ལོ་བཅས་ཟླ་རྒྱུད་གཞི་བདག་རྣམས་ལ་ཆོས་གསུངས། དེར་བཞུགས་རིང་བུ་སློབ་རྣམས་ལ་ཆོས་མང་དུ་གནང༌། ཁྱད་པར་དུ་འོ་སྐོལ་རྣམས་མར་མེ་སྣུམ་ཟད་པའམ། རྫིང་གི་ལྟག་ཆུ་ཆད་པ་འདྲ་གསུངས་མི་རྟག་པའི་ཆོས་དུ་མ་དང༌། ང་གར་ཡོད་ཀྱང་ཁྱེད་རྣམས་ཀྱི་ཅི་བྱེད་ལྟ་བ་ཡིན་གསུངས། ཅུང་ཟད་སྐུ་ཁམས་མ་བདེ་ནས་སྐུ་མཚམས་བཅད་ཀྱི་ཚུལ་དུ་བཞུགས་པ་ལ། རྩི་བ་དང་བེ་རི་མ་འགྲིགས་ནས་ཕེབས་དགོས་ཟེར་བའི་གདན་ཞུས་པ་བྱུང༌། བུ་སློབ་རྣམས་ཀྱིས་མི་ཕེབས་པར་ཞུས་ནའང་ཁོང་རྣམས་ལ་ཕན་ན་ང་མ་བདེ་བས་མི་ལྟོ་གསུངས་ཏེ་ཕེབས། འཁྲུགས་པ་བཟླུམ། ཚུར་ཕེབས་ལམ་ཀོ་མཛོ་དགོན་དུ་བྱོན། དགེ་འདུན་རྣམས་ཀྱིས་འབུམ་རྒྱས་འབྲིང་བསྡུས་གསུམ་སོགས་ཀྱི་སྐུ་རིམ་མང་དུ་ཕུལ་ཀྱང་སྐུ་ཁམས་དྭངས་སྐྱེད་མ་བྱུང༌། དེ་ནས་འབའ་རོམ་སྒྲུབ་ཕུག་དེར་ཡན་ལག་བདུན་པ་ཕུལ། དེར་འདུས་ཀྱི་གྲྭ་བུ་སློབ་རྣམས་དང༌། སྐྱེས་ཕོ་མོ་རྣམས་ལ་ཞལ་ཏ་གནང༌། དེ་ནས་སྒར་པ་བཏེགས་ནས་ཡོས་ཕུར་ཕེབས་པ་དང༌། སྤྲེལ་ལོ་ཟླ་བ་ལྔ་པའི་ཚེས་གཅིག་སྐར་མ་ལག་སོར་ཤར་རིའི་རྩེ་ནས་ཐོན་པ་དང་གཟུགས་སྐུའི་དཀྱིལ་འཁོར་བསྡུས། སྐུ་གདུང་འདོ་ལི་ཁར་གདན་དྲངས་ནས་རྫ་ཆུ་ལ་གྲུ་གཟིང་མི་ཐེབས་པ་ལ། སེམས་སྐྱེ་མེད་མའི་གསོལ་འདེབས་མཛད་ཟླ་ཆུ་སྐད་ཅིག་ཏུ་འཕང་དམའ་ནས་གདུང་སྒར་པ་ཕར་ཁར་ཐོན་པ་ངོ་མཚར་དུ་གྱུར་ཏོ། དེ་ནུབ་མེར་ཆུང་ཞོར་དུ་ཕེབས། ཟླ་རྒྱུད་ཐམས་ཅད་འོད་ཀྱིས་ཁྱབ་པར་གྱུར། ཚེས་བཞི་ལ་མེར་ཆེན་ཞོར་དུ་གདུང་སྦྱངས། དེའི་ཚེ་དུད་པའི་ནང་ནས་རིན་པོ་ཆེ་དབུ་ཞྭ་རྩེ་ལྔ་བཞེས་ནས་ནམ་མཁའ་ལ་འཕུར་བ་སོགས་དག་པའི་མཐོང་སྣང་མཐའ་ཡས། འཇའ་འོད་མེ་ཏོག་གི་ཆར་ཆེན་བབས་པ་སོགས་ངོ་མཚར་བའི་ལྟས་དུ་མ་བྱུང༌། དགེ་སློང་དགེ་འདུན་ཚོགས་སྐྱེ་བོ་འབུམ་ཕྲག་ལྷག་ཙམ་དང་བུ་སློབ་དཔོན་རིགས་རྣམས་ལ་དངོས་རྫས་བཏང་ཁྱད་པར་མང་གྷ་རྡའི་བྱང་ཆུབ་ཆེན་པོ། འཕགས་པ་ཤིང་ཀུན་རྣམས་སུ་འབུལ་བ་བསྐྱེལ། གདུང་རིང་བསྲེལ་བྱོན་ཚུལ་ལ། ཐུགས་ལྗགས་སྤྱན་གསུམ་དང་བདེ་མཆོག་ཡབ་ཡུམ་སྤྱན་གཟིགས་སོགས་སྐུ་རྟེན། ཡ་ར་ལ་བ་ཧཱུྃ་བྃ་གསུང་རྟེན། རིང་བསྲེལ་ཁ་དོག་ལྔ་ལྡན་ཐུགས་རྟེན། དུང་གཡས་འཁྱིལ་སོགས་ངོ་མཚར་རྨད་དུ་བྱུང་བ་དུ་མ་བྱོན། རྗེ་འགྲོ་བའི་མགོན་པོ་དེ་ཉིད་ལ་རྒྱ་བོད་མེ་ཉག་སོགས་སློབ་མ་གྲངས་ལས་འདས་པ་སྨོས་ཀྱིས་མི་ལངས་ཏེ། གཙོ་བོར་གྱུར་པ་ནི། སྤྱན་སྔར་རས་པ་དཀར་པོ། སློབ་དཔོན་གུར་དཀར་བ། ས་སྐྱ་པཎྜི་ཏ། རིགས་དབོན་བཟང་སྐྱོང་བ། ཡུལ་སྐྱོང་ཆེན་པོ། མཁན་པོ་རབ་སྦྲེང་བ། མཁན་པོ་ཤེས་རབ་ཉི་མ། སྐྱེ་ཤོད་པ། མང་སྒོམ་རས་པ། ཤེས་རབ་རྡོ་རྗེ། དགེ་བཤེས་ཅུང་པོ། རོང་ཁ་མཁན་པོ། སློབ་དཔོན་ཇོ་སྲས། བྲ་བོ་དབང་ཕྱུག །རྦད་ཆུ་སྒོམ་པ། དགེ་སློང་གྲགས་ཡེ། མོང་གོལ་འཕགས་པ། སློབ་དཔོན་གྱོ་སོགས་བསམ་གྱིས་མི་ཁྱབ་པ་བྱུང་ངོ།། རྩ་བའི་གསུམ་པ་སྤྱན་སྔ་པ་དཀར་པོའི་རྣམ་ཐར་ནི། སྐུ་འཁྲུངས་པའི་ཡུལ་མེ་ཉག་འགའ། གདུང་སར་ཆུ། ས་ཕོ་རྟ་ཡི་ལོ་ལ་སྐུ་བལྟམས་ཤིང༌། རབ་བྱུང་གསུམ་པ་སྤྱི་ལོ་༡༡༩༨ལ།་་་་་་མཆན། མཚན་ལྟས་བཟང་པོ་བྱུང༌། ཆུང་ངུའི་དུས་ནས་ཆོས་ལ་ཐུགས་འགྲོ་ཞིང་བྲེ་མོའི་གཏམ་ལ་སོགས་འཇིག་རྟེན་གྱི་བྱ་བ་མི་མཛད། དེ་ནས་སྐུ་ན་ཅུང་སོན་པ་ན། སྐྱེ་བ་དཔག་ཏུ་མེད་པའི་སྔོན་རོལ་ནས་ཚོགས་བསགས་སྨོན་ལམ་གྱི་འབྲེལ་བའི་མཐུས་འགྲོ་མགོན་རིན་པོ་ཆེའི་མཚན་ཐོས་པ་ཙམ་གྱིས་ཐུན་མོང་མ་ཡིན་པའི་དད་པ་སྐྱེས་ཏེ་མཇལ་ནས་ཆོས་ཤིག་བྱ་སྙམས་པ་རྒྱུད་ལ་སྐྱེས། དུས་རེ་ཞིག་གི་ཚེ་འཇིག་རྟེན་གྱི་དངོས་པོ་རྒྱ་ཆེ་བ་བསྣམས་ཏེ་བླ་མ་རིན་པོ་ཆེ་ཏི་ཤྲཱིའི་དྲུང་དུ་བྱོན་ནས་འབུལ་བ་དཔག་ཏུ་མེད་པ་ཕུལ། བླ་མ་རིན་པོ་ཆེས་ཀྱང་སྣོད་ལྡན་གྱི་སློབ་མར་དགོངས་ཏེ་ཐུགས་དགྱེས་མཛད། འབྲལ་མི་ཕོད་པ་ལྟ་བུའི་མོས་གུས་བསམ་ལས་འདས་པ་བྱུང༌། མཁན་པོ་དགེ་འདུན་དང་བཅས་པའི་དབུས་སུ་རབ་ཏུ་བྱུང་ཞིང་བསྙེན་པར་རྫོགས། མཚན་ཤེས་རབ་བྱང་ཆུབ་ཏུ་གསོལ། ཕྱི་ནང་གི་ཆོས་ཐམས་ཅད་ལ་གསན་སྦྱོང་དཔག་ཏུ་མེད་པ་མཛད། ཁྱད་པར་དུ་ནཱ་རོ་ཆོས་དྲུག་དང་ཕྱག་ཆེན་གྱི་ཁྲིད་མཛད་པ་ཙམ་གྱིས་རྟོགས་པ་གཅིག་ཆར་དུ་སྐྱེས། རྩེ་གཅིག་ཏུ་བསྒོམས་པས་རྩ་རླུང་ལ་རང་དབང་ཐོབ་ཅིང་གནད་དུ་བསྣུན་པས་བྱང་སེམས་སྐུ་ལུས་ལ་ཁྲེམ་པས་ཞལ་རས་བཅོ་ལྔའི་ཟླ་བ་ཉ་རྒྱས་པ་ལྟར་ངང་ལམ་མེ་ཡོད་པས། དེའི་དོན་གྱི་མཚན་རས་པ་དཀར་པོ་ཞེས་གྲུབ་པ་ཐོབ་པའི་སྙན་པ་ཕྱོགས་ཀུན་ཏུ་གྲགས་ཤིང༌། སྐྱོ་ལྡག་ལ་ཁ་ནས་ཡར་ལ་འབྱོན་པའི་དུས་སུ་ཚེས་བཅོ་ལྔའི་ཟླ་བ་ལ་ཁ་ནས་ཐོན་པ་བཞིན་དུ་ངང་རྒྱང་སེ་གསལ་བའི་གཟི་མདངས་ཡོད་པའི་ལོ་རྒྱུས་འདུག །བྲག་ལ་ཞབས་རྗེས་འཇོག་པ་མཛད་པ་སོགས་རྫུ་འཕྲུལ་གྱི་བཀོད་པ་བསམ་ལས་འདས། སྐུ་འབུམ་གྱི་ས་དེ་ཉིད་དུ་སྒར་པ་བཞུགས་ཅིང་བླ་མ་རིན་པོ་ཆེ་གཤེགས་རྫོང་གིས་གདུང་འབུམ་ཆེན་མོ་ཞག་ལྔ་བཅུ་ནས་གྲུབ། བཞུགས་ཁང་ཇོ་ཐོག་གྷཉྫི་ར་དང་བཅས་པ་བླ་ན་མེད་པར་མཛད་བཞེངས་པའི་རིང་ལའང་མི་མ་ཡིན་མང་པོས་མཆོད་རྫས་ཐོགས་ཏེ་མངོན་སུམ་དུ་མཆོད། རབ་གནས་ཀྱི་དུས་སུ་རིན་པོ་ཆེས་དབུ་ཞྭ་རྩེ་ལྔ་བཞེས་ནས་ནམ་མཁར་བཞུགས་པའི་མཐོང་སྣང་སོགས་ངོ་མཚར་བའི་ལྟས་དཔག་ཏུ་མེད་པ་བྱུང་ཤིང་འགྲོ་རྣམས་ཚོགས་གཉིས་རྫོགས་པའི་རྟེན་དུ་གྱུར། མེ་ཕོ་སྤྲེལ་ རབ་བྱུང་བཞི་པའི། ལ་བཞུགས་ཡུལ་གྱི་གཟིམས་ཁང་དང་དགོན་པ་འདེབས་པར་མཛད་པ་ཡང༌། སྐུ་འབུམ་རྩ་པ་ཟེར། ཧོར་སེ་ཆེན་རྒྱལ་པོའི་རྒྱལ་བུ་གཽ་པེ་ལར་གྲགས་པའི་དུས་ཟླ་རྒྱུད་དུ་དམག་དྲངས་ནས་མདོ་སྨད་དུ་བྱོན། རས་པ་དཀར་པོ་དཔོན་སློབ་དང་གུང་པ་ཨའུ་སོགས་མཇལ་དུ་ཕེབས་ཤིང༌། སྐུ་འབུམ་ཆེན་མོའི་དོན་དུ་གཙུག་ལག་ཁང་བཞེངས་པའི་བཀའ་ལུང་ཞུས་པས། རས་པ་དཀར་པོ་ལྷ་ཆོས་ཀྱི་བླ་མ་དང༌། གུང་སྒོམ་ཨའུ་མི་ཆོས་ཀྱི་དཔོན་དུ་སྐོས། གནས་དྲུག་ཁྲི་སྐོར་བཅུ་གཉིས་མངའ་འབངས་སུ་ཕུལ། གཙུག་ལག་ཁང་བཞེངས་པའི་ལུང་དང༌། ཁྲོ་ཐམ་ཆེན་མོ། གོས་དར་གསེར་དངུལ་སོགས་འབུལ་བ་རྒྱ་ཆེན་མཛད། ཡར་ཕེབས་ཏེ་གནས་དྲུག་ཁྲི་སྐོར་མངའ་ཞབས་སུ་བསྡུས། ཁ་ངག་ལ། རྟམ་མཁར་སྐྱ། ཆམ་མཁར་དམར། རྫ་གྱིང་ཐང༌། ལྕི་དབེ་ཁུ། ལྷོ་རྟ་ཤོད། འདན་རག་ཐག་ཡིན་ཟེར་ཞིང༌། གང་ལྟར་ནའང་དུད་ཁྲི་སྐོར་བཅུ་གཉིས་ཡིན་ཅིང༌། གཞིས་ཁ་དྲུག་ནས་དེའི་དཔྱ་ཁྲལ་སྡུད་ཅིང་སྐུ་འབུམ་དགོན་དུ་འབུལ། མཆན། མེ་ཉག་ཡུལ་ནས་ཤིང་བཟོ་བ་དང་རྡོ་བཟོ་བ་བོས་ཏེ་ལྷ་ཁང་ནང་སོ་ཆེན་མོ་ཞེས་པ་ཀ་བ་བརྒྱ་དང་ཉི་ཤུའི་མལ་ཐོག་གསུམ་བྱ་འདབ་གསེར་གྱི་གཉྫི་ར་ཁྱམས་སྐོར་ལམ་དང་བཅས་པ་འགྲན་གྱི་ཟླ་དང་བྲལ་བ་རྒྱ་ཕིགས་སུ་བཞེངས། ཐོག་བར་མར་བཀའ་བརྒྱུད་དང་རྒྱུད་སྡེའི་ལྷ་རིས་འོག་མར་ཟངས་གསེར་གྱི་ཐུབ་ཆེན་སོགས་རྟེན་མཆོད་ཀྱི་རིམ་པ་བསམ་ལས་འདས། ལྷ་མཁར་གྱི་ཐད་ཀྱི་བྲག་མགོར་རྡོ་མཁར་གྱི་ཕོ་བྲང་སོགས་མཛད། ཕྱི་ཐམས་ཅད་རྒྱུད་སྡེའི་སྔགས་ཀྱི་མཚན་པའོ། མཆན། དགེ་འདུན་སྟོང་ཕྲག་ཕྱེད་གཉིས་ཙམ་འཚོགས་དེ་དག་ཐམས་ཅད་ཀྱང་ཕྱི་དགེ་སློང་ཞི་དུལ་གྱིས་སེམས་ཅན་གྱི་དང་བ་འདྲེན་པ། ནང་སྔགས་ཀྱི་བསྐྱེད་རིམ་དང་ལྡན་པ། གསང་བ་བྱང་སེམས་ཀྱི་འགྲོ་བ་ཐར་ལམ་ལ་བཀོད་པ། དེ་ཁོ་ན་ཉིད་ཕྱག་ཆེན་གྱི་དངོས་གྲུབ་ཐོབ་པ་ཤ་སྟག་གོ །མེར་ཆེན་རྩེར་སྒྲུབ་གྲྭའི་རི་དགོན་མཛད། གཟིམས་་ཁང་དང་ཆོས་ཁྲི་དེང་སང་གི་བར་དུ་ཡོད། ཆུ་ཤིན་ཏུ་དཀོན་པས་རི་རྩེ་དེ་ཉིད་ནས་ཆུ་འདོན་པར་མཛད། དེ་ལྟའི་ལུགས་གཉིས་ཀྱི་སྒོ་ནས་སངས་རྒྱས་ཀྱི་བསྟན་པའི་ཞབས་འདེགས་རླབས་པོ་ཆེ་དང་གདུལ་བྱ་རྣམས་སྨིན་གྲོལ་གྱི་ལམ་ལ་བཀོད། དགུང་ལོ་དྲུག་ཅུ་རེ་ལྔ་བཞེས་པ་ཆུ་ཁྱི་རྟ་པ་ཟླ་བའི་ཚེས་བཅོ་བརྒྱད་ལ་ངོ་མཚར་བའི་ལྟས་དུ་མ་དང་བཅས་ཏེ་གཤེགས། སྐུ་གདུང་སྦྱངས་བས་རིང་བསྲེལ་གྱི་ཕུང་པོར་གྱུར། སློབ་མ་རྣམས་ནི། སྤྱན་སྔ་ལུས་མེད་རྡོ་རྗེ། སྤྱན་སྔ་བྱང་ཆུབ་མགོན་པོ། མཁས་པ་བྱང་ཆུབ་རྡོ་རྗེ། དཔལ་རྡོར་ཤེས་རབ་ཡེ་ཤེས། གུང་སྒོམ་ཨའུ། ཚུལ་པ་ཤེས་རབ་དཀོན་མཆོག །ལྷ་ཤཱཀྱ་རྒྱལ་བ། ཞང་སྒོམ་རས་པ། གཟི་དུ་རས་པ་སོགས་མང་དུ་བྱུང་ངོ༌།། རྩ་བའི་བཞི་པ་གསང་བ་ལུས་མེད་རྡོ་རྗེའི་རྣམ་ཐར་ནི། དེའང་མདོ་ཁམས་ལུང་པ་ཕྱུག་དྲུག་གི་ཡ་གྱལ་འབྲི་ཀླུང་དམ་པ་ཆོས་ཀྱིས་ཕྱུག་པའི་ལྗོངས་ཀྱི་ནང་ཚན་ལས་སྟོད་ཀྱི་ཕྱོགས་སུ་གྱུར་པ། ཇོ་བོ་རྒྱོག་ཆེན་གདོང་རས་ཉེ་བར་སྐྱོང་བའི་ས་ཡི་ཆ་སྒ་སྟོད་གནམ་རྫོངས་ཕྱུག་མོ་ཞེས་པར་ཡབ་ལྷ་ཆེན་ཚངས་པ་དཀར་པོའི་འཕྲུལ་ཐིག་གིས་བཀྲུན་པའི་སྲས་རྒ་རྗེ་ཐང་ལ་འབར་ཞེས་པ་དང༌། ཡུམ་འབྲོག་བཟའ་ལྷ་སྨན་སྒྲོན་ཞེས་པ་གཉིས་ལ་སྲས་གསུམ་ཡོད་པ་ལས་ཆེ་བ་ལ་རྒ་ཆེ་བཙན་ཡེ་རྒྱལ། འབྲིང་བ་ལ་དམ་པ་སངས་རྒྱས། ཆུང་བ་ལ་དམ་པ་ཀུན་དགའ། ཆེ་བཙན་ཡེ་རྒྱལ་ལ་སྲས་གཉིས་ཡོད་པའི། ཆེ་བ་སྒ་རྗེ་ཚུལ་ཁྲིམས་རྒྱལ་བ་ཞེས་པ་རྒ་པ་རིན་ཆེན་ཚོ་དྲུག་གི་རྒྱལ་པོར་གྱུར། ཆུང་བ་ལྷ་རིགས་རྒྱལ་བ་ཡེ་ཤེས་སམ་ལྷ་བཙུན་རྒྱལ་བ་ཡེ་ཤེས་ཞེས་པ་ནི། ཁུ་བོ་ལས་ཡབ་ཆོས་སྐོར་གསན་ནས་ཕྱོགས་མེད་ཀྱི་རྒྱལ་ཁམས་འགྲིམས་པར་མཛད། མཁས་གྲུབ་མང་པོ་ལས་གདམས་པ་ཟབམོ་རྣམས་ཞུས་ནས་ཐུགས་སུ་ཆུད་པར་གྱུར་ཅིང༌། མཐར་རྒྱམ་རྒྱལ་དྷྭོ་ཐིའི་གངས་རྒྱུད་མཚོ་རྐེ་མདོའི་ཀྱེ་ལ་ཐང་ཁར་གཏན་ཆགས། དེར་བཙུན་མོ་ཅོག་བཟའ་སྒྲོན་ནེ་ལ་འཕྲད་པའི་སྲས་གཉིས་བྱུང་བ་ལ། ཆེ་བ་ལ་ཀྱེ་ལ་སངས་རྒྱས་མགོན་པོ་དང༌། ཆུང་བ་ལ་ཀྱེ་ལ་དགེ་བཤེས་སུ་གྲགས་པ་ལས་དགེ་བཤེས་ཀྱི་སྲས་སུ་མེ་མོ་ཕག་ལོར་འཁྲུངས། རབ་བྱུང་བཞི་པ་༡༢༢༧ལ།་་་་་་་་མཆན། སྔོན་གྱི་རིགས་སད་པའི་སྟོབས་ཀྱིས་ཆོས་ལ་ཐུགས་འགྲོ་ཞིང༌། ཡི་གེ་ལ་སོགས་སློབ་གཉེར་མང་དུ་མཛད་པ་ཡང་ཐོགས་པ་མེད་པར་མཁྱེན་པ་བྱུང་ངོ༌། དེ་ནས་རེ་ཞིག་གི་ཚེ་གནས་དྲུག་ཁྲི་སྐོར་གྱིས་སྒོམ་སྡེའི་ལྷ་ཁང་ཆེན་མོ་བརྩེགས་པའི་ལས་ཀ་བ་ལ་སྐུ་འབུམ་རྩར་ཕེབས་ཏེ། དད་པས་ཀུན་ནས་བསླང་བའི་ལྷག་པའི་བསམ་པ་རྣམ་པར་དག་པས་ལུས་སྲོག་ལ་ལྟོས་པ་མེད་པ་ལྷ་ཁང་གི་ལས་ལ་འབད་པས། སྡིག་སྒྲིབ་དག་པའི་རྟག་ཐུན་མོང་མ་ཡིན་པ་བྱུང་ངོ༌། །དེ་ནས་རྫིལ་ཕ་རྟག་གསུམ་ལ་སོགས་པའི་རྩི་པའི་མི་སྡེ་ཐམས་ཅད་ཀྱིས་བྱང་ཕྱོགས་ཀྱི་ལོགས་དེ་ཁག་ཁུར་བྱས་པ་ཡིན་ཏེ། དེར་ཐམས་ཅད་ཀྱིས་བརྩོན་འགྲུས་དྲག་པོའི་སྒོ་ནས་བརྩེགས་པས། གཙུག་ལག་ཁང་ལེགས་པར་གྲུབ་པའི་དུས་སུ་རས་པ་དཀར་པོ་ཆིབས་གོང་དུ་བྱོན་ཞིང་ཚུལ་ཁང་སྣང་བྱ་བར་གནས་དྲུག་པའི་ལས་ཀ་བ་ཐམས་ཅད་ལ་ཁྲོམ་ཆོས་ཆེན་པོ་གསུངས་ནས་ཞབས་དབང་གཤར་བའི་དུས་སུ། རས་པ་དཀར་པོས་སྐྱེ་བ་དཔག་ཏུ་མེད་པའི་གོང་ནས་ཚོགས་བསགས་ཞིང་གདམས་ངག་གི་སྣོད་དུ་རུང་བའི་ལས་ཅན་གྱི་སྐྱེས་བུ་ཁྱད་པར་ཅན་ཡིན་ཏེ། འགྲོ་བའི་དོན་རྒྱ་ཆེན་པོ་འབྱུང་བར་དགོངས་ནས་བུ་ཚ་གོ་འཇོ་བ་ཁྱོད་རང་འདི་ཀ་རང་དུ་སྡོད་ནས་རབ་ཏུ་བྱུང་སྟེ་དམ་པའི་ཆོས་སྒྲུབ་པར་ནུས་སམ་གསུངས་པས་ལུས་ཐམས་ཅད་སྦྲིད་ཆིལ་གྱིས་སོང་ནས་གདོང་མཆི་མ་འཁྲུགས་ཤིང་དད་པ་ཐུན་མོང་མ་ཡིན་པ་སྐྱེས་ཏེ། བདག་ཅི་ནས་ཀྱང་བླ་མ་དམ་པའི་ཆགས་ཞབས་འདིར་སྡོད་པ་ཡིན་པས་ཐུགས་རྗེས་བཟུང་དུ་གསོལ་ཞེས་ཞུས་པ་ལ། རས་པ་དཀར་པོ་ཡང་ཤིན་ཏུ་ཐུགས་དགྱེས་པར་གྱུར། དེ་ནས་ཁོང་རང་གིས་ཉེ་གཞི་དང་ཁྱིམ་མཚེས་ལ་སོགས་ཕར་བཏང་ཞིང༌། ང་འདིར་སྡོད་ནས་དགེ་སྦྱོར་ཞིག་ཨི་འོང་བལྟ། ད་ལྟ་མི་ལུས་ཐོབ་པའི་དུས་འདིར་དགེ་སྦྱོར་གཅིག་མེད་ན། ཕྱི་མ་ཕྱིན་ཆད་ཅི་འདྲའི་ལུས་ལེན་ངེས་པ་མེད་པས། ད་ལན་བླ་མ་དམ་པའི་ཞལ་ནས་སྡོད་གསུངས་ཤིང་ཐུགས་ལ་བཏགས་པར་གདའ་བས། ང་ཅིས་ཀྱང་འདིར་སྡོད་པ་ཡིན་གསུངས་ནས་བཞུགས་སོ། །དེ་ནས་རས་པ་དཀར་པོ་ཉིད་ཀྱི་དབུ་མཛད་པའི་མཁན་སློབ་མང་པོའི་མདུན་དུ་རབ་ཏུ་བྱུང་ཞིང་མཚན་བྱང་ཆུབ་དཔལ་བྱ་བར་བཏགས། འདུལ་བ་ལ་སོགས་པའི་བཤད་ཉན་དང་སློབ་གཉེར་ཡང་མང་དུ་མཛད། དེ་ནས་བདེ་དགྱེས་དང་མ་ཧཱ་མ་ཡ་ལ་སོགས་ཀྱི་དབང་བསྐུར་མང་དུ་ཞུས་ཤིང། གསང་མཚན་མི་བསྐྱོད་རྡོ་རྗེ་བྱ་བར་བཏགས། དེ་དག་གི་དམ་ཚིག་གི་ཆོས་སྐོར་དང་རྒྱུད་འགྲེལ་ལ་སོགས་པ་བཤད་པ་ལ་ཡང་མཁས་པར་མཛད། ཐབས་ལམ་ནཱ་རོ་ཆོས་དྲུག །གྲོལ་ལམ་ཕྱག་རྒྱ་ཆེན་པོའི་ཁྲིད་གསན་ཅིང་བསྒོམ་པས་ཉམས་མྱོང་གི་འཆར་སྒོ་དཔག་ཏུ་མེད་པ་བྱུང༌། དེར་རས་པ་དཀར་པོ་དཔོན་སློབ་བཅོ་བརྒྱད་གླིང་སྟོད་ཀྱི་སྤྱིལ་པོ་གཅིག་ཏུ་གདན་དྲངས་ནས། གྲོ་མ་མར་ཁུ་ལ་སོགས་ཞུས་པ་ལ། བྱང་དཔལ་བས་ཁོ་རང་གི་སྐལ་བ་དང༌། རིན་པོ་ཆེའི་གསོལ་རས་ཡོན་བདག་གིས་ལྷག་པོརཞུས་པ་ལ་སོགས་མར་ཁུ་མང་དུ་གསོལ་བའི་ཚེ། ཉེ་གནས་རྣམས་ཀྱིས་དེ་རིང་བྱང་དཔལ་བས་མར་ཁུ་དེ་ཙམ་གསོལ་བ་མི་ཞུ་ནས་ནད་དུ་འགྲོ་ཉེན་ཡོད་བྱས་པ་ལ། བླ་མའི་ཞལ་ནས་ཁོའི་རྩ་ཐིག་རླུང་གསུམ་ལ་གནད་དུ་བསྣུན་ཞིང་སྙིང་རུས་དྲག་པོ་བསྐྱེད་ནས་བསྒོམས་པས། དེ་ཙམ་གྱིས་གནོད་པ་མ་ཡིན་ཏེ་འོན་ཀྱང་ཁྱེད་རྣམས་སོང་ལ་ལྟོས་ཤོག་གསུངས། དེར་སོང་ནས་བལྟས་པས་བྲག་རྩ་གཅིག་ན་སྒོམ་སྟན་བཏིང་བའི་སྟེང་དུ་བཞུགས་ནས་འཁྲུལ་འཁོར་བྱེད་ཅིང་འདུག་པ་ལ། བ་སྤུའི་བུ་ག་ནས་མར་ཁུ་ཅིལ་ཅིལ་ཕྱིར་ཐོན་པར་འདུག་ཟེར་རོ། །ཡང་དེ་དུས་སུ་རས་པ་དཀར་པོ་ཉིད་ཀྱིས་མཁན་པོ་མཛད་ཅིང་དགེ་སློང་གི་དགེ་འདུན་མང་པོ་ཚོགས་པའི་དྲུང་དུ་དགེ་སློང་གི་སྡོམ་པ་རྣམ་པར་དག་པ་བླང་ངོ༌། །དེ་ནས་ཁྲིད་ཀྱི་རིམ་པ་ལ་སོགས་པ་གདམས་པ་ཐམས་ཅད་རྫོགས་པར་གསན་ཅིང༌། ཁྱད་པར་དུ་ཡང་ཕྱག་རྒྱ་ཆེན་པོ་ལ་རྩེ་གཅིག་ཏུ་ཡེང་བ་མེད་པའི་བརྩོན་འགྲུས་བསྐྱེད་ནས་བསྒོམས་པས། སྣང་སེམས་དབྱེར་མེད་དུ་འདྲེས། མངོན་པར་ཤེས་པ་རྒྱ་ཆེན་པོ་མངའ་བ་ལ་སོགས་པ་ལམ་གྱི་ཡོན་ཏན་དཔག་ཏུ་མེད་པ་ཐུགས་ལ་བལྟམས་ཤིང༌། དེ་ཡང་ཉིན་མོ་ཉི་མའི་འོད་ཟེར་དང༌། མཚན་མོ་ཟླ་བ་དང་མར་མེའི་འོད། གང་ལ་བྱོན་ཡང་སྐུ་ལུས་ལ་གྲིབ་མ་མི་སྣང་ཞིང༌། བྲག་ལ་ཞབས་རྗེས་བཞག་པ་སོགས་རྫུ་འཕྲུལ་མཐའ་ཡས། སྣང་བ་སྤྲུལ་བསྒྱུར་ལ་མངའ་བརྙེས་རི་རབ་ཁང་ཁྱིམ་ལ་སོགས་འབྱུང་བའི་དངོས་པོ།་གང་གིས་ཡང་མི་སྒྲིབ་ཅིང་ཤེལ་སྒོང་དང་འདྲ་ལ། དེ་དག་གང་ལའང་ཆགས་ཐོགས་མེད་པར་འབྱོན་པས་ཆོག་པའི་དོན་གྱི་ལུས་མེད་ཟེར་ཞིང༌། སྲ་ཞིང་སྙིང་པོ་ཁོང་སྟོང་བསྟན། གཞོམ་དུ་མེད་ཅིང་གཞིག་ཏུ་མེད། སྲེག་མེད་བཅད་དུ་མེད་པས་ན། སྟོང་པ་ཉིད་ལ་རྡོ་རྗེར་བརྗོད། གསུང་པ་ལྟར་སྟོང་པ་ཉིད་ཀྱི་དོན་ཇི་ལྟ་བ་བཞིན་དུ་རྟོགས་པས་རྡོ་རྗེ་སྟེ། དེའི་དོན་གྱི་མཚན་ལུས་མེད་རྡོ་རྗེ་བྱ་བར་ཡོངས་སུ་གྲགས། ཕྱག་ཆུ་འཐོར་བས་བྲག་རིང་བསྲེལ་གྱི་ཕུང་པོར་གྱུར། བླ་མ་རིན་པོ་ཆེ་གཤེགས་པའི་འདས་མཆོད་དང༌། གཟིམས་མལ་གྱི་འདྲ་འབག །ཏི་ཤྲཱི་གསེར་གདུང་ཆེན་མོའི་གཡས་ངོས་སུ་གདུང་འབུམ་ལྷ་ཁང་ཇོ་ཐོག་དང་བཅས་པ་བཞེངས། དབུས་སུ་ཕེབས་ཏེ་རྔོག་གཟི་བརྗིད་གྲགས་པ་ལ་དགྱེས་རྡོར་དང་ལྷ་མོ་དུད་སོལ་མའི་སྐོར་དང་ཚུལ་ཁྲིམས་ཤཱཀྱ་ལས་གཅོད་སྐོར། མཚལ་དུ་ལྷ་ཕུག་ཉི་མ་འོད་ལས་གཟེར་ལྔ་སོགས་ཞང་རིན་པོ་ཆེའི་ཆོས་སྐོར་མ་ལུས་པ་གསན། བྱ་ཡུལ་བ་ཆེན་པོའི་གདན་ས་བ་ལས་ཚོགས་བདག་གི་སྐོར་གསན་ནས་དེ་ཕྱོགས་སུ་བཞུགས་པར་གདའ། དེའི་དུས་ས་སྐྱ་བའི་བླ་མ་འཕགས་པ་ཧོར་ཡུལ་ནས་བོད་དུ་ཕེབས་ཅིང་མདོ་སྟོད་དུ་བྱོན་པ་ལ་སྐུ་འབུམ་དགོན་གྱི་འདུས་གྲྭ་ཆེ་བགྲེས་རྣམས་མཇལ་དུ་བྱོན་ཏེ་འབུལ་ཞབས་བཟང་པོ་བྱས་ནས། བླ་མ་སྤྲུལ་པའི་སྐུ་ཆེན་པོ་དེ་ཞིང་ཁམས་གཞན་དུ་གཤེགས་ཏེ་མི་བཞུགས། ད་ཁྱེད་རང་བོད་ཀྱི་སེར་ཆགས་ཡོངས་ཀྱི་བདག་པོར་གྱུར་པས་ངེད་ཀྱི་བླ་མའི་གདན་ས་འདིར་བླ་མ་གཅིག་བསྐོ་བར་ཞུ་ཞུས་པས་ཞལ་ནས། འོ་སྐོལ་ཆོས་ལུགས་མི་གཅིག་པའི་ཞད་ཀྱིས། ངེད་ཀྱི་བླ་མ་གཅིག་བསྐོས་པས་མགོ་ལུས་འགྲིགས་པོ་རང་མི་ཡོངས། ཁྱེད་རང་གི་བུ་ཆེན་ཆེ་བ་གང་གྲགས་པ་གཅིག་བསྐོས་ནས་བདག་རྐྱེན་ལ་སོགས་པ་ངེད་ཀྱི་བྱེད་པ་འཐད་གསུངས། འདིར་བུ་ཆེན་མང་དུ་བཞུགས་ཀྱང་ཐམས་ཅད་དབུ་མཐོ་བ་འདྲ་འདྲར་སོང་བས་བསྐོ་འོས་མེད། འགྲན་ཟླ་དང་བྲལ་བའི་ཐུགས་སྲས་ལུས་མེད་རྡོ་རྗེ་བྱ་བ་གཅིག་ཡོད་པ། ད་ལྟ་དབུས་གཙང་གཉིས་ན་བཞུགས་ཞུས་པས། འོ་ན་ཁྱེད་རང་ཚང་གི་མི་སྣ་ཐོང་དང་ངེད་ཀྱི་རྩད་གཅོད་གསུངས། ལུས་མེད་རྡོ་རྗེ་མཚལ་གུང་ཐང་ནས་བཞུགས་སྐབས་འཕགས་པ་རིན་པོ་ཆེས་ས་སྐྱར་གདན་དྲངས་ནས་གདན་སར་རིན་པོ་ཆེ་བཞུགས་དགོས་གསུངས་ཤིང་ལུགས་གཉིས་ཀྱི་རྫོང་དར་བཅས། དགུང་ལོ་སུམ་ཅུ་རྩ་དགུ་བཞེས་པའི་དུས། ཤིང་མོ་གླང་གི་ལོ་ལ་བསྐོ་བཞག་མཛད་ཅིང༌། ཁམས་སུ་ཕེབས། སྐུ་འབུམ་རྩ་བའི་དགེ་འདུན་པ་རྣམས་དང་གནས་དྲུག་ལྷ་སྡེ་མི་སྡེའི་ཚོགས་ཀྱིས་བསུ་བ་སེར་སྦྲེང་དང་བཅས་ནང་སོ་ཆེན་མོའི་སེང་གེའི་ཁྲི་ལ་ཞབས་བཀོད་པར་མཛད། དེ་ཡང་སྡོམ་པ་གསུམ་དང་ལྡན་ཞིང་བསླབ་པ་གསུམ་ལ་ནན་ཏན་མཛད་དེ། བརྩོན་འགྲུས་ཆེན་པོའི་ཤུགས་ཀྱིས་མདོ་སྔགས་ཀྱི་ཆོས་ལ་ལོངས་སྤྱོད་ཅིང་ཐུགས་སྦྱངས་པས་བློ་གྲོས་ཀྱི་སྣང་བ་རྒྱས། དཔལ་ལྡན་བླ་མ་དམ་པ་རས་པ་དཀར་པོ་ལ་སངས་རྒྱས་ཀྱི་འདུ་ཤེས་བསྐྱེད་ནས། ཅི་གསུང་གི་བཀའ་བསྒྲུབ་ཅིང༌། ཁྱོད་ཀྱི་ང་ཡི་ཆོས་འདི་ཡི་བརྒྱུད་པ་ཡང་ཟུངས་ཤིག་གསུངས་ནས་ཞལ་ཏ་གནང་སྟེ། གདམས་པ་ཟབ་མོ་ཞལ་གདམས་གདན་ས་དང་བཅས་པ་རྣམས་ཐུགས་སུ་ཆུད་པར་མཛད་ཅིང༌། ཉམས་སུ་བླངས་པས་ཡོན་ཏན་གྱི་སྒོ་དུ་མ་དང་ལྡན་ཏེ། སོ་སོ་རང་གི་དབང་པོ་དང་མཚུངས་པར་ལྡན་པའི་ཆོས་བསྟན་ནས་གདུལ་བྱ་དཔག་ཏུ་མེད་པ་སྨིན་གྲོལ་གྱི་ལམ་ལ་བཀོད། ལྷ་ཁང་གསར་མ་བྱ་བ་ཀ་བ་བཅུ་གཉིས་ཀྱི་རྒྱ་ཁྱོན་ཅན་ལོགས་བྲིས་རྟེན་མཆོད་དང་བཅས་པ་སོགས་དགོན་པ་དར་རྒྱས་ཆེར་མཛད། ལྷ་མོ་བསྒྲུབས་པས་ཞལ་བསྟན་ཏེ་མི་རབས་བཅུ་གསུམ་ཚུན་བསྟན་པ་བསྲུང་བར་ཞལ་གྱིས་བཞེས། ཚོགས་བདག་བསྒྲུབས་པས་དངོས་གྲུབ་རྣམ་གཉིས་འབད་མེད་དུ་ཕུལ། གདན་ས་རིན་པོ་ཆེའི་བདག་རྐྱེན་མཛད་ནས་ལོ་ཉི་ཤུ་རྩ་བརྒྱད་ལ་བླ་མ་དམ་པའི་ཐུགས་དགོངས་རྫོགས་པའི་ཆེད་དུ་དགན་པ་བསྐྱངས་ཞིང་བསྟན་པ་དར་བར་མཛད་པ་ཡིན་ནོ། །དེ་ནས་ཡང་དག་པར་རྫོགས་པའི་སངས་རྒྱས་ཀྱི་མཛད་པ་དང་སྒོ་བསྟུན་ཞིང༌། དགུང་ལོ་དྲུག་ཅུ་རྩ་དྲུག་བཞེས་པའི་དུས་སུ་ཆུ་ཕོ་འབྲུག་གི་ལོ། རོག་ཉ་ཟླ་བའི་ཚེས་བརྒྱད་ཀྱི་ཉིན་ཕྱེད་མྱ་ངན་ལས་འདས་པའི་ཚུལ་བསྟན་ཏོ། །དེ་ནས་གདུང་འགྱེད་ཆེན་པོ་བྱས་ཤིང་གདུང་སྦྱངས་པས། ནམ་མཁའ་ཐམས་ཅད་འཇའ་ཚོན་འཁྲིགས་ཤིང་མེ་ཏོག་གི་ཆར་མང་དུ་བབས། དུང་དཀར་གཡས་སུ་འཁྱིལ་བ་བཅུ་གསུམ་ལ་སོགས་སྐུ་གདུང་རིང་བསྲེལ་དཔག་ཏུ་མེད་པ་བྱོན། ཁྱད་པར་དུ་ཡང་ཞག་བདུན་ཕྲག་བདུན་པ་ལ་རིང་བསྲེལ་གྱི་ཆར་བབས། དེ་ནས་སྐུ་གསུང་ཐུགས་ཀྱི་རྟེན་དང། གསེར་འབུམ་ཆེན་མོ་དང༌། ལྷ་ཁང་འབུམ་ཆུང་བྱ་བ་རྩགས་གསུམ་པ་གཅིག་ལེགས་པར་བཞེངས་སོ། །ཡབ་སྲས་འདི་གཉིས་ཀྱི་མཆོད་པའི་དུས་ལ་བཅོ་བརྒྱད་གོང་འོག་ཟེར། ཁྱད་པར་ལུས་མེད་རྡོ་རྗེའི་དུས་མཆོད་བྱེད་པའི་དུས་ལ། སྒོམ་སྡེའི་རོག་མཆོད་ཆེན་མོ་ཟེར་བའི་མིང་ཡང་ཕྱིས་ཀྱི་བར་དུ་བྱུང་ངོ༌། །སློབ་མའི་ཚོགས་བགྲང་གིས་མི་ལངས་ཤིང༌། བརྗོད་ཀྱི་མི་ལོངས་པ་བྱོན་ཀྱང་གཙོ་བོར་བཀའ་བབ་ཀྱི་སློབ་མ་བཞི་ནི། རིག་དབོན་བྱང་ཆུབ་གཞོན་ནུ་ལ་བརྒྱུད་འཛིན་གྱི་བཀའ་བབས། མཁས་པ་བྱང་ཆུབ་མགོན་པོ་ལ་རྟེན་འབྲེལ་གྱི་བཀའ་བབས། ལྷ་ཚངས་པ་ཚུལ་ཁྲིམས་སེང་གེ་ལ་དབང་དང་རབ་གནས་ཀྱི་བཀའ་བབས། དངུལ་རྫོང་བ་ཤཱཀྱ་རྡོ་རྗེ་ལ་ཕྱག་ཆེན་གྱི་བཀའ་བབས་པའོ། ། རྩ་བའི་ལྔ་པ་བརྒྱུད་འཛིན་གྱི་བཀའ་བབས་རིགས་དབོན་བྱང་ཆུབ་གཞོན་ནུ་ནི། འཁྲུངས་ཡུལ་ཀྱེ་ལ་ཁ། ཡབ་ཀྱེ་ལ་སངས་མགོན་ལ་སྲས་གཉིས་ཡོད་པའི་ཆེ་བ་སངས་རྒྱས་དཔལ་དང༌། ཆུང་བ་བྱང་ཆུབ་གཞོན་ནུ་སྟེ། རབ་བྱུང་བཞི་པའི་༼སྤྱི་ལོ་༡༢༥༤ལ་༽ཤིང་སྟག་ལ་སྐུ་འཁྲུངས། ལུས་མེད་རྡེ་རྗེའི་མདུན་དུ་རབ་ཏུ་བྱུང༌། མཚན་བྱང་ཆུབ་གཞོན་ནུར་གསོལ། འབའ་རོམ་ནས་བརྒྱུད་པའི་ཆོས་ཡོད་དགུ་ཅོག་རྣམས་ལ་གསན་བཞེས་རྒྱ་ཆེར་མཛད། ཁྱད་པར་ཟབ་ལམ་ནཱ་རོ་ཆོས་དྲུག །བསྲེ་འཕོ་གནད་ཀྱི་མཚམས་སྦྱོར། གྲོལ་ལམ་ཕྱག་རྒྱ་ཆེན་པོ་ལ་ཉམས་ལེན་རྩེ་གཅིག་ཏུ་མཛད་པས་ཉམས་རྟོགས་ཡོན་ཏན་མཐའ་ཡས། གསེར་གདུང་ཆེན་མོའི་གཡོན་ངོས་སུ་གདུང་འབུམ་དང༌། ལྷ་ཁང་འབུམ་ཆུང་བྱ་བ་སུམ་བརྩེགས་ཅན། ཐུབ་པའི་གསེར་སྐུ་ཆེན་མོ་སོགས་སྐུ་གསུང་ཐུགས་ཀྱི་རྟེན་མཆོད་བསམ་ལས་འདས་པ་བཞེངས། དེ་ནས་མགོ་རུའི་ཡེབ་ཏི་ཕུག་ཏུ་སྙིང་པོའི་རྣལ་འབྱོར་ལ་ཐུགས་གཞོལ་ནས་སྒྲུབ་པ་རྩེ་གཅིག་ཏུ་མཛད་པ་ལས། དུས་རེས་ཤིག་གི་ཚེ་ལྷ་ཆེན་ཚུལ་ཁྲིམས་སེང་གེས་གཙོར་མཛད་རས་ཚང་སྒོམ་སྡེའི་མི་སྣ་ཆེ་བ་རྣམས་དང༌། སྐུ་འཁོར་ཚང་མ་དེར་ཕེབས་ནས་བླ་མ་རིན་པོ་ཆེ་ཉིད་ནང་སོ་ཆེན་མོའི་ཁྲིར་ཕེབས་ནས་བསྟན་དགོན་གྱི་འཛིན་སྐྱོང་སྤེལ་གསུམ་ཆོས་སྲིད་ཟུང་འབྲེལ་གྱི་ཕྱག་བཞེས་མ་ཉམས་པའི་མཛད་བཟང་རྒྱུན་འཁྱོང་གི་ཞུ་བ་ནན་ཆེར་ཕུལ་བས། དེར་ལྷ་ཆེན་པོ་ཉིད་ཀྱི་བཀའ་མི་གཅོག་པའི་ཕྱིར་དེ་ལྟར་བྱ་གསུངས་ནས་ཕྱིར་གདན་སར་ཕེབས། གནས་དྲུག་ལྷ་མིའི་བསུ་བ་དཔེ་མེད་དང་བསྙེན་བཀུར་གྱིས་ནང་སོ་ཆེན་མོའི་གཙུག་རྒྱན་དུ་མངའ་གསོལ། དེ་ནས་གདན་ས་མཛད་ཅིང་གྲྭ་པ་བསྐྱངས་ནས་སྨིན་གྲོལ་གྱི་ཆོས་འཁོར་བསྐོར། གནས་དྲུག་པའི་མངའ་འབངས་བྱམས་བརྩེའི་སྐྱོང་བ་སོགས་རྒྱལ་བའི་སྲས་ཀྱི་མཛད་པ་ཇི་བཞིན་པ་ཁོ་ནར་སློབ་རུང༌། འགའ་ཞིག་དྲེགས་པས་སྙེམས་ཞིང་ཕྲག་དོག་པའི་རྣམ་འགྱུར་བྱུང་བར་བརྟེན། མ་ཀི་དིལ་འབུལ་གྱི་མགོ་རུ་ཚངས་མང་གསར་པ་ཞིག་བྱ་དགོས་གསུངས་ནས་གཟིམས་ཁང་གསར་པ་མཛད་དེ་ལྷ་ཁང་དང་བྲང་ཁང་སོགས་བཀོད་པ་བསམ་ལས་འདས་པ་བསྐྲུན། གོང་དུ་ནང་སོ་གོང་དུ་ནང་ཆེན་མོ་ལྷ་ཁང་གི་ཚུལ་དུ་བཞུགས་སུ་གསོལ་ཞིང༌། འགྲོ་དོན་བསམ་མི་ཁྱབ་པར་མཛད། མཐར་དགུང་ལོ་བདུན་ཅུ་ཆུ་ཕག་ས་ཟླའི་ཚེས་བཞི་ལ་གཤེགས། འཇའ་འོད་མེ་ཏོག་གི་ཆར་ཀུན་གྱི་མཐོང་སྣང་དུ་གྱུར། དེ་ནས་ཕྱོགས་ཀྱི་བླ་མ་མི་དཔོན་ལྷ་སྡེ་མི་སྡེ་ཀུན་ལ་སྐུ་ཡི་འདབས་ཆེན་པོ་བཏང་བས་ཀུན་རྔམས་ཁེངས་པར་གྱུར་ཅིང་གདུང་ཞུགས་ལ་ཕུལ་ཚེ་ལྷ་མི་ཀུན་གྱིས་མཆོད་པ་བླ་ན་མེད་པས་མདུན་བརྡར་ཏེ་ངོ་མཚར་བའི་གནས་སུ་གྱུར། གདུང་དང་རིང་བསྲེལ་གྲངས་ལས་འདས་པ་བྱུང་ཞིང་སློབ་ཚོགས་ཀྱང་མང་དུ་མཆིས་པ་ལས་གཙོ་ཆེ་བ་རིགས་དབོན་གྲགས་བྱང་བ་དང་གྲགས་ཚུལ་བ་གཉིས་སྟོང་ནག་རས་པ་བློ་གྲོས་རྡོ་རྗེ་སོགས་བྱོན་པའོ། །དེ་ཡང་ནང་ཆེན་ནང་གི་རྟེན་མཆོད་ཕུན་སུམ་ཚོགས་པ་རྣམས་ལས། ལུས་མེད་རྡོ་རྗེའི་བཞུགས་ཁྲི་ཕྱག་རྔ་གསང་བ་ལྷ་འབོད། ཚོགས་བདག་གི་སྐུ་རྟེན་དང་སྤྱན་གཟིགས་སྣ་ཚོགས་དང༌། དུང་དཀར་མོ་རྒྱང་གྲགས། ཟངས་བཀྲ་ཤིས་ཁ་གྲོ་སོགས། གཙོ་ཆེ་བ་རྣམས་དེར་བཞུགས་ཤིང༌། དེ་འཕྲོས་རྟེན་གསུམ་མཆོད་རྫས་རྣམས་ལས་ཉུང་ཤས་ཚངས་མང་གསར་པར་སྤོས་ནས་བཞུགས་པར་འདུག ། རྟེན་འབྲེལ་བཀའ་བབས་བྱང་ཆུབ་མགོན་པོ་ནི། གདུང་འབེ་ཡིན་ཞིང་སྐུ་ཆུང་ངུ་ནས་རས་དཀར་བ་ལས་རབ་ཏུ་བྱུང༌། མཚན་བྱང་ཆུབ་མགོན་པོར་གསོལ། མང་སྒོམ་རས་པའི་ཉེ་གནས་མཛད་ཅིང་རས་གུར་གཉིས་ལས་ཆོས་མང་དུ་གསན། ཕྱིས་གསང་བ་ལུས་མེད་རྡོ་རྗེ་ལས་གདམས་པ་ཕྱི་ནང་གསང་གསུམ་ཐམས་ཅད་རྫོགས་པར་ཞུས་ཤིང་ཁྱད་པར་ཚོགས་བདག་གི་སྒྲུབ་སྐོར་མ་ལུས་གསན་ནས་ཤར་གླིང་ཆེ་མོར་བཞུགས་ཤིང༌། ཕྱིས་བྱང་ཆུབ་གཞོན་ནུ་ཚངས་མང་གསར་པར་བཞུགས་པའི་སྐབས་བྱང་ཆུབ་མགོན་ནང་སོ་ཆེན་མོ་མཆོད་ཁང་གི་ཚུལ་དུ་ཡོད་པ་ལ་དཀོར་གཉེར་མཛད་པར་གདའ། འདི་ཡན་ཆད་དུ་རས་ཚང་སྒོམ་སྡེ་ཞེས་ཕྱོགས་གཅིག་ཏུ་གྲགས་ཀྱང༌། བྱང་ཆུབ་གཞོན་ནུ་གཤེགས་རྗེས་སུ། བྱང་ཆུབ་མགོན་པོའི་རུས་དབོན་ཡོན་ཏན་དཔལ་ཞེས་པ་ཉིད་ས་སྐྱའི་གདན་སར་བྱོན་ཏེ། ནང་སོ་ཆེན་མོའི་བསྟན་བདག་ཆོག་པའི་བཀའ་ལུང་གོང་དུ་ཞུས་པ་ལས། སྔོན་ནས་དགེ་བའི་བཤེས་གཉེན་བྱང་ཆུབ་མགོན་པོ་ཉིད་བཞུགས་པར་མཛད་པའི་དབོན་གྱི་ཕྱིར་ད་ཡང་བཞུགས་འཚལ་གསུངས་པའི་བཀའ་ལུང་གནང་ནས་འཛིན་པ་ལ་དེ་ཕྱིན་སྒོམ་སྡེ་ནང་ཡ་གཉིས་སུ་གྲགས་པར་གྱུར་པ་ཡིན་ནོ།། རྩ་བའི་གཉིས་པ་ཆོས་སྲིད་ཟུང་འབྲེལ་སྒོ་གྱི་ནས་རྒྱས་པར་བཤད་པ་ལ་གསུམ། ཧོར་གྱི་རྒྱལ་པོའི་སྤྱན་སྔ་རས་པ་དཀར་པོ་ལ་གནས་དྲུག་ཁྲི་སྐོར་བཅུ་གཉིས་ཕུལ་ཞིང་ཆོས་སྲིད་བསྐྱང་ཚུལ། དེ་ཡ་གཉིས་སུ་གྱུར་སྐབས་ཀྱིས་སྒོམ་སྡེ་ཚངས་གསར་པའི་ལོ་རྒྱུས་རྒྱས་པར་བཤད་པ་དང༌། སྒོམ་སྡེ་ནང་ཆེན་པའི་ལོ་རྒྱུས་རྒྱས་པར་བཤད་པའོ། །དང་པོ་ནི། དེའང་རྗེ་འགྲོ་བའི་མགོན་པོ་ཏི་ཤྲཱི་རས་ཆེན་གྱི་ཐུགས་སྲས་གཅིག་པུ་སྤྱན་སྔ་རས་པ་དཀར་པོ་ཞེས་བྱང་སྐྱོ་ལྡག་ན་སེར་གྱི་གོང་བ་ཆགས་་གིས་བཅག་ནས་བཞུགས་པའི་སྐབས། ས་ཧོར་མཆོད་ཡོན་འབྲེལ། ཧོར་ཁྲིམས་བོད་ལ་འཇག་དུས། ཧོར་སེ་ཆེན་རྒྱལ་པོའི་རྒྱལ་བུ་གཽ་པེ་ལ་ཞེས་པས་མདོ་སྨད་དུ་དམག་དྲངས་ནས་བྱོན་པ་ལ། ཆོས་རྗེ་རས་པ་དཔོན་སློབ་མཇལ་དུ་བྱོན་ནས་མཇལ་དར་སྤྱན་གཟིགས་རྒྱ་ཆེར་ཕུལ་ཏེ། འགྲོ་མགོན་ཏི་ཤྲཱི་སངས་རྒྱས་རས་ཆེན་གྱི་སྐུ་འབུམ་ཆེན་མོའི་རྩར་འདིར་གཙུག་ལག་ཁང་བཞེངས་པའི་བཀའ་ལུང་གནང་བར་ཞུས་པའི་སྐབས། ཆོས་རྗེ་རས་པ་དཀར་པོ་ལ་ཤིན་ཏུ་དད་པར་གྱུར་ཏེ། རྒྱལ་པོས་སྤྱི་བོར་བཀུར་ནས་ལྷ་ཆོས་ཀྱི་བླ་མ་དང༌། གུ་ཡི་གུང་པ་སྒོམ་པ་ཨའུ་མི་ཆོས་ཀྱི་དཔོན་དུ་བསྐོས། དེའི་དུས་སུ་གནས་དྲུག་ཁྲི་སྐོར་དུ་གྲགས་པ་ཆབ་འབངས་ཀྱི་ལྷ་སྡེར་ཕུལ། དེར་གནས་བཞི་དྲུག་ལ་རེ་རེར་ཁྲི་སྡེ་གཉིས་རེ་སྡོམ་ཁྲི་སྐོར་བཅུ་གཉིས་ཡོད་པར་གྲགས། གཙུག་ལག་ཁང་བཞེངས་པའི་བཀའ་ལུང་དང། ཁྲོ་ཐམ་ཆེན་མོ་གོས་དར་གསེར་དངུལ་སོགས་ཀྱི་མཐོང་གཟིགས་བླ་ན་མེད་པར་མཛད། དེ་ནས་གཙུག་ལག་ཁང་ཕོ་བྲང་ནང་སོ་ཆེན་མོ་གོང་སྨོས་བཞིན་རྒྱ་ཆེར་བཞེངས། དེ་ལས་གུང་སྒོམ་པ་ཨའུནི་རས་དཀར་བ་ལས་གདམས་པ་ཐམས་ཅད་གསན། གནས་དྲུག་ཁྲི་སྐོར་གྱི་ལས་ཀ་བཟུང༌། རྒྱལ་སྲིད་ཀྱི་མཛད་པ་རྒྱ་ཆེ། དྲུག་ཅུ་ཐམ་པ་ལ་གཤེགས། དེ་སྐབས་ལྷ་ནང་ཚུལ་གསུམ་བྱ་བར་གྲགས་པ་ནང་པ་ནི་རས་དཀར་བ་དང་ལུས་མེད་རྡོ་རྗེ་ཡབ་སྲས་ཡིན་ལ། ལྷ་པ་ནི་ཤཱཀྱ་རྒྱལ་བ་རུས་སུམ་པ་མགྲོན་རྡོག་རས་དཀར་བའི་མདུན་ནས་རབ་ཏུ་བྱུང༌། གདམས་པ་ཐམས་ཅད་གསན། ལྷ་ཁང་ཆེན་མོའི་ལྟག་ཏུ་ཁང་པ་ནང་སར་བ་བྱ་བ་བྱས་ཤིང་ལྷ་ཁང་གི་བདག་རྐྱེན་མཛད་པས་མིང་ནང་སོ་གསར་པ་ཟེར་ཞིང་ནང་སར་བར་གྲགས། ཚུལ་པ་ནི་ཤེས་རབ་དཀོན་མཆོག་སྟེ། རུས་མང་རྗེ་ཆུང་ངུ་ནས་རས་དཀར་བའི་མདུན་ནས་རབ་ཏུ་བྱུང་ཞིང་མཚན་ཤེས་རབ་དཀོན་མཆོག །མེ་རག་སྒང་གི་མལ་དུ་ཚུལ་ཁང་ནང་ཆུང་བར་གྲགས། དེར་གུ་ཡི་གུང་པ་སྒོམ་པ་ཨའུ་འདས་རྗེས་སུ། གོང་དུ་བྱོན་ནས་ཤེས་རབ་དཀོན་མཆོག་ལ་གསེར་ཡིག་ཤལ་མོའི་ལས་ཀ་དང༌། ཤཱཀྱ་རྒྱལ་བ་ལ་དངུལ་ཡིག་སྒོར་མོའི་ལས་ཀ་བླངས་ནས་རྒྱལ་ཁྲིམས་ཀྱི་ཞབས་ཏོག་མཛད། ཤེས་རབ་དཀོན་མཆོག་གིས་གསེར་འབུམ་དང་མཆོད་རྟེན་བཞེངས། ཤཱཀྱ་རྒྱལ་བས་ཇོ་བོ་གཡུ་མདོང་དང་དངུལ་འབུམ་སོགས་བཞེངས། ཚུལ་པའིདབོན་བརྒྱུད་ལ་ནང་ཆུང་བའི་གསེར་ཡིག་པ་རྣམས་བྱུང་ཞིང་ལྷ་པའི་དབོན་བརྒྱུད་ལ་ནང་སར་པའི་དངུལ་ཡིག་པ་རྣམས་བྱུང་བ་ཡིན་ནོ། དཔལ་རྡོར་ཤེས་རབ་ཡེ་ཤེས་ནི། རས་པ་དཀར་པོའི་མདུན་ནས་རབ་ཏུ་བྱུང༌། གདམས་པ་ཀུན་ཐུགས་སུ་ཆུད་པར་མཛད། རྫུ་འཕྲུལ་ཡོན་ཏན་ལ་མངའ་བརྙེས། ཙོང་ཀ་མེ་ཉག་ཡུལ་དང་ཧོར་གྱི་ཡུལ་དུ་བྱོན། རྒྱལ་པོའི་བླ་མཆོད་མཛད་ཅིང་འགྲོ་དོན་རྒྱ་ཆེར་འཕེལ། རས་དཀར་བའི་གདུང་འབུམ་ལ་གསེར་གསོལ་བ་དང༌། དེའི་མདུན་དུ་མཆོད་རྫས་ཀྱི་བྱེ་བྲག་ཁྱད་མཚར་མང་དུ་ཕུལ་བ་དང༌། གསང་བ་ལུས་མེད་རྡོ་རྗེའི་མདུན་དང་སྐུ་འབུམ་དགོན་དུ་འབུལ་སྐྱེལ་ཆེན་པོ་མཛད་ཅིང༌། སྒོམ་སྡེའི་དར་མོ་ཆེ་ཞེས་པའི་རྣམ་བཞག་ཡང་དེའི་དུས་ནས་བྱུང་བར་གྲགས། རྟགས་ངོ་མཚར་བཅས་སྐུ་གཤེགས། ཞང་སྒོམ་རས་པ་ནི་སྨར་པ་ཤེས་རབ་ཡེ་ཤེས་ཀྱི་སློབ་མ་ཡིན་ཅིང་སྨར་ཤོད་དགོན་ནས་རྫུ་འཕྲུལ་གྱིས་བྱོན་ཏེ་སྐུ་འབུམ་དུ་ཉི་མ་མ་ཤར་གོང་ཕེབས་པར་མཛད། རས་པ་དཀར་པོའི་དྲུང་ནས་ཆོས་དྲུག་ཕྱག་ཆེན་ལ་སོགས་ཁྲིད་རྣམས་གསན་ཅིང༌། ཏི་ཤྲཱི་ནས་བརྒྱུད་པའི་ཆོས་སྐོར་རྣམས་རྫོགས་པར་ཞུས་ཏེ་རྩ་བའི་བླ་མར་འཛིན་པ་བྱུང་ངོ། འདི་དག་གི་སྐབས་སུ་གདན་ས་སྐུ་འབུམ་དུ་བླ་མ་དགེ་བའི་བཤེས་གཉེན་དགེ་འདུན་པ་ཁྲི་ཕྲག་ལས་མི་ཉུང་ཞིང་ཕྱོགས་ཀྱི་མི་སྣ་སྐྱེ་བོ་ཕོ་མོའི་འདུ་བ་བསམ་གྱིས་མི་ཁྱབ་པའི་ཆོས་སྲིད་དང་ཆབ་སྲིད་ཆེར་རྒྱས་པའང་མདོ་ཁམས་སྒང་འདིར་འདི་ལས་ལྷག་པ་མ་བྱུང་ཞིང་དཔལ་ལྡན་འབའ་རོམ་པའི་བསྟན་པའི་རྩ་ལག་ཆེན་པོ་རྨད་དུ་བྱུང་བ་ཞིག་སྟེ་འདི་སྐབས་ཀྱི་མཚན་ལ་རས་ཚང་སྒོམ་སྡེ་ཞེས་ཡོངས་སུ་གྲགས་ཤིང་གྲུབ་པ་ཉིད་དོ། །དེར་མ་ཟད་རྩ་བའི་གདན་ས་བྱང་འབའ་རོམ་རི་བོ་ཆེར་དཔལ་དར་མ་དབང་ཕྱུག་ཀྱི་དབོན་བརྒྱུད་ཁྲི་འཛིན་རག་རིམ་བྱོན་ཚུལ་ནི། ཐོག་མར་དབོན་རྒན་རྒྱལ་བ་གྲགས་པས་འབའ་རོམ་གྱི་གདན་ས་མཛད། གཅུང་ཤེས་རབ་དབང་ཕྱུག་གིས་རྩི་ཀོ་མཛོ་དགོན་གྱི་གདན་ས་བསྐྱངས། དེ་ཡི་རྗེས་སུ་དབོན་བརྒྱུད་ཁྲི་འཛིན་བྱང་ཆུབ་རྒྱལ་མཚན། གཞོན་ནུ་ཤེས་རབ་ཆོས་དབང་ཕྱུག སེང་གེ་དཔལ། རིན་ཆེན་རྒྱལ་མཚན། ནམ་མཁའ་རྒྱལ་མཚན། དེ་རྗེས་དབོན་བརྒྱུད་གཉིས་སུ་གྱེས་པའི་གཅིག་ནི་ཚུལ་ཁྲིམས་རྒྱལ་མཚན། རིན་ཆེན་རྒྱལ་པོ༌། ཀུན་དགའ་དཔལ། གཅིག་ནི་ཆོས་ཀྱི་བློ་གྲོས། ཚུལ་ཁྲིམས་རྒྱ་མཚོ། ཤཱཀྱ་དཔལ་ཏེ་ཀ་དྲུག་དང་ཀ་བཞི་རུ་གྲགས་པ་རྣམས་བྱུང་ཞིང་དེ་དག་གིས་འབའ་རོམ་པ་དངོས་ཀྱི་གདན་ས་ཡར་མར་གཉིས་བསྐྱངས་བར་མཛད་དོ། །དེས་ནི་གནས་དྲུག་ཁྲི་སྐོརགྱི་ཆོས་སྲིད་ཀྱི་བྱུང་བ་མདོར་བསྟན་པའོ། ། ༈ གཉིས་པ་སྒོམ་སྡེ་ཚང་གསར་པའི་ལོ་རྒྱུས་རྒྱས་པར་བཤད་པ་ལ་གཉིས། གདན་ས་སྐུ་འབུམ་རྩར་བསྟན་པ་བསྐྱང་ཞིང་ཆོས་སྲིད་རྒྱས་ཚུལ་དང༌། གྲྭ་ནང་དུ་མཁར་པོ་ཆེར་འཕོས་ནས་ཆོས་དང་ཆབ་སྲིད་ཇི་ལྟར་བྱུང་ཚུལ་་ལོ། །དང་པོ་ནི། ལུས་མེད་རྡོ་རྗེའི་རིགས་དབོན་བྱང་ཆུབ་གཞོན་ནུའི་མཆེད་ཀྱེ་ལ་སངས་རྒྱས་དཔལ་གྱི་སྙིང་སྟོད་དུ་ཀཱེ་ཉི་མཁར་དཀར་སེར་གྱི་གཞིས་ཀ་བཏབ། ཆོས་དང་ཆབ་སྲིད་འཇིག་རྟེན་གྱི་མངའ་ཐང་རྨད་དུ་བྱུང༌། དེ་ལ་སྲས་བཞི་ཡོད་པའི་ཆེ་བ་དབོན་གྲགས་པ་བྱང་ཆུབ་བྱང་ཆུབ་གཞོན་ནུ་ལས་རབ་ཏུ་བྱུང་གདམས་པ་ཐམས་ཅད་གསན་གདན་ས་སྐུ་འབུམ་དུ་ཚངས་མང་གསར་བའི་ཁྲིར་ཕེབས་ཏེ་བསྟན་པའི་རྒྱལ་མཚན་འཛིན་པར་མཛད། དེ་འོག་དགེ་བཤེས་གྲགས་པ་ཚུལ་ཁྲིམས་ཡང་སྐུ་འབུམ་དུ་བཞུགས། དེ་འོག་ནམ་མེ་དངཨ་རིན་གཉིས་ཀྱིས་རྫོང་དཀར་སེར་གྱི་བདག་པོ་མཛད་ནས་མངའ་འབངས་བྱམས་པས་བསྐྱངས། ནམ་མེའི་སྲས་བཞི་ལས་བརྩོན་འགྲུས་རྒྱལ་མཚན་ནི། སྤྱན་སྔ་གྲགས་བཟང་ལས་རབ་ཏུ་བྱུང༌། མདོ་སྔགས་ཀྱི་ཆོས་རྣམས་གསན་གདན་ས་སྐུ་འབུམ་གྱི་ཁྲི་འཛིན་མཛད། དགེ་བཤེས་ཡོན་ཏན་བློ་གྲོས་སྐུ་འབུམ་དུ་བཞུགས། ཨ་འབུམ་ཨ་རིན་གཉིས་སྙིང་སྟོད་དུ་མཛད་ཁྱབ་རྒྱས། ཨ་རིན་ལ་སྲས་གཉིས་ཀྱི་ཆེ་བ་བཀྲ་ཤིས་རྒྱལ་མཚན་ཉིད་བརྩོན་འགྲུས་རྒྱལ་མཚན་ལས་རབ་ཏུ་བྱུང༌། ཡབ་མེས་ཀྱིས་གདམས་སྐོར་ཐུགས་སུ་ཆུད་པར་མཛད། ཚངས་གསར་པའི་གདན་ས་མཛད། སྲས་བླ་མ་སྐྱབས་ཀྱིས་སྙིང་སྟོད་ཀྱི་སྲིད་དབང་འཛིན། བླ་མ་སྐྱབས་ཀྱི་སྲས་གསུམ་ལས་བསོད་ནམས་རིན་ཆེན་དང༌། བསོད་ནམས་རྒྱལ་མཚན་སྐུ་མཆེད་གཉིས་བཀྲ་ཤིས་རྒྱལ་མཚན་ལས་རབ་ཏུ་བྱུང༌། ཆོས་དང་གདམས་པ་བུམ་པ་གང་བྱོའི་ཚུལ་དུ་གསན། གཉིས་ཀས་ཚངས་གསར་པའི་གདན་ས་མཛད། ཆོས་ཀྱི་གྲགས་པས་སྲིད་འཛིན་གྱི་མཛད་བཟང་རྒྱས། ཆོས་གྲགས་ཀྱི་སྲས་གཉིས་ལས་བསོད་ནམས་བློ་གྲོས་བསོད་ནམས་རིན་ཆེན་ལས་རབ་ཏུ་བྱུང༌། འབའ་རོམ་བརྒྱུད་པའི་ཆོས་དང་གདམས་ཟབ་ཐམས་ཅད་ཞུས། ཚངས་གསར་པའི་ཁྲི་འཛིན་མཛད། གཅུང་བསོད་ནམས་པས་སྙིང་སྟོད་དུ་ཆབ་སྲིད་དང་མངའ་འབངས་བསྐྱངས། སྐུ་མཆེད་འདི་གཉིས་ཀྱི་རྒྱལ་དབང་ཀརྨ་པ་དེ་བཞིན་གཤེགས་པ་རྒྱ་ནག་ནས་ཡར་ཕེབས་སྐབས། གདན་ས་སྐུ་འབུམ་དུ་སྤྱན་དྲངས་དངོས་པོའི་མཆོད་སྤྲིན་བསམ་མི་ཁྱབ་པ་ཕུལ། ཆོས་དང་གདམས་པས་སྨིན་པར་མཛད། བསོད་ནམས་ཀྱི་སྲས་བཞི་ལས་བསོད་ནམས་བཟང་པོ། བསོད་རིན་པ་གཉིས། བསོད་བློ་ལས་རབ་ཏུ་བྱུང༌། མདོ་སྔགས་ཀྱི་ཆོས་ཚུལ་རྒྱ་མཚོ་ལྟ་བུ་ལ་མངའ་བརྙེས། ཡབ་མེས་ཀྱི་ཀརྨ་པ་དེ་བཞིན་གཤེགས་པ་སྐུ་འབུམ་དུ་སྤྱན་དྲངས་སྐབས། བསོད་ནམས་བཟང་པོ་ལ་ཀན་ཏིང་གོ་ཤཱིའི་ལས་ཀ་གསེར་ཐམ་ཆེན་མོ་དང༌། དུང་དཀར་མོ་རྒྱང་གྲགས། བླ་བྲེ་ནམ་མཁའ་ཀུན་ཁྱབ། ཟངས་བཀྲ་ཤིས་ཁ་གྲོ་སོགས་དངོས་པོའི་གནང་སྦྱིན་རྒྱ་ཆེན་པོ་སྩལ། ཁུ་དབོན་གཉིས་ཆར་གདམས་ཁྲིད་ཟབ་མོའི་རྗེས་འཛིན་མཛད། བསྟན་དགོན་གྱི་མཛད་པ་དར་རྒྱས་འགྲན་ཟླ་བྲལ་བ་བྱུང༌། བསོད་ནམས་ཀྱི་སྲས་གསུམ་པ་ལྷ་དཔལ་ཐར་གྱི་ཁྱུང་མོ་བླངས་པས་བུ་གསུམ་བྱུང་བ་དང༌། སྲས་བཞི་པ་ཨ་འབུམ་གྱིས་གསེར་གཟའ་ཁབ་ཏུ་བཞེས་པར་བུ་གསུམ་དང༌། སྲས་གཞན་པ་རྡོ་བཅང་པ་ཞེས་པ་གཅིག་བྱུང་ཞིང༌། དེའི་སྐབས་སུ་མ་གཉིས་བུ་དྲུག་ཟེར་བའི་རྩོད་གླེང་བྱུང་བས་ལྷ་དཔལ་བུ་བརྒྱུད་སྐུ་འབུམ་དུ་སྤོས་ཤིང་དེ་ནས་རིམ་པར་རྫ་ཉིན་དུ་ཡོད་པའི་ཚངས་གསར་པ་རྣམས་ཡིན་ཞིང༌། ཨ་འབུམ་གྱི་སྲས་ནང་པ་རྡོ་བཅང་བ་ནི་ཆུང་ངུ་ནས་རྡོ་ཟན་ལྟར་བཅང་བའི་རྫུ་འཕྲུལ་མངའ་བ་དང༌། གསེར་གཟའི་བུ་སྤྱན་སྔ་ཆོས་སྐྱོང་དཔལ་ལྡན་གཉིས་ཀརྨ་པ་ཆོས་གྲགས་རྒྱ་མཚོས་རྗེས་སུ་བཟུང་ཞིང་གདམས་པ་ཕོག །གཽ་ཤྲཱི་བསོད་ནམས་བཟང་པོ་ལས་རབ་ཏུ་བྱུང༌། འབའ་རོམ་པའི་ཆོས་སྐོར་མ་ལུས་པ་གསན་བསམ་མཛད། ཆོས་སྐྱོང་དཔལ་ལྡན་ལ་གཽ་ཤྲཱིི་ལས་ཀ་ཕེབས། གསེར་བཟའི་སྲས་ཨ་ཞལ་ལམ་བསོད་ནམས་སྟོབས་ལྡན། ཉེར་རྐེའམ་བཀྲ་ཤིས་རྒྱ་མཚོ་ཞེས་སྐུ་མཆེད་འདི་གཉིས་ཀྱིས་སྙིང་ཐང་དུ་མཁར་སྔོན་གྱིས་གཞིས་ཀ་བཏབ། དེའང་གཏེར་སྟོན་རཏྣ་གླིང་པའི་གཏེར་ལུང་ལས། ཁམས་ཀྱི་སྤྱི་འབྱམས་ཞེས་བྱ་དེར༔ ཆོས་དབྱིངས་རྡོ་རྗེའི་སྐུ་རིང་ལ༔ གཏེར་སྟོན་མི་འགྱུར་རྡོ་རྗེ་འབྱོན༔ གནས་མཆོག་དེ་ཡི་གཏེར་རྣམས་འདོན༔ ཁམས་ཀྱི་གཏེར་ཁ་བརྒྱ་ལ་དབང༔ གནས་མཆོག་དེ་ཡི་གཡས་ཕྱོགས་ན༔ ཐང་ཆེན་མཎྜལ་ཕུལ་བ་འདྲ༔ དབུས་སུ་རི་རྒྱལ་ལྷུན་པོ་ནི༔ དུང་དཀར་གཡས་སུ་འཁྱིལ་འདྲ་ཡོད༔ རྒྱ་གར་བྱ་རྒོད་སྤུང་དང་འདྲ༔ པདྨ་ང་ཡིས་གནས་མཆོག་ཡིན༔ ང་ཡི་སྤྲུལ་པ་དཔག་མེད་ནི༔ གནས་མཆོག་དེ་རུ་རྒྱུན་མི་འཆད༔ རྡོ་རྗེ་ཞེས་བྱའི་སྐྱེས་བུ་འབྱོན༔ ཆོས་ཁྲིམས་རྒྱ་ཁྲིམས་བསྟན་པ་སྐྱོངས༔ གཞན་ཡང་སྤྲུལ་པ་དཔག་མེད་འབྱོན༔ དཔུང་སྨེ་ཅན་གྱི་ཧོར་དམག་བཟློག༔ པདྨ་རྒྱལ་པོ་ང་ཡི་ནི༔ སྤྲུལ་པ་བསམ་མི་ཁྱབ་པས་ནི༔ གནས་མཆོག་དེ་རུ་ཆོས་འཁོར་བསྐོར༔ དེ་ན་སྐྱེས་བུ་ནམ་མཁའམ༔ བདེ་གཤེགས་རྒྱ་མཚོ་ཞེས་བྱ་བ༔ པདྨ་རྒྱལ་པོ་ང་ཡི་ནི༔ སྐྱེས་བུ་དེ་ནི་བྱིན་གྱིས་བརླབས༔ ཆོས་ཁྲིམས་རྒྱལ་ཁྲིམས་གཉིས་ཀྱི་བསྟན་པ་བསྲུང་༔ ཞེས་ལུང་བསྟན་པ་བཞིན་ཕྱག་ན་རྡོ་རྗེའི་སྤྲུལ་པར་གྲགས་པ་ཉེར་རྐེ་ཉིད་ཀྱི་སྟོབས་ཤུགས་ཀྱིས་ཤར་མེ་ཉག་རིང་མོ། ལྷོ་ཨ་རིགས་ཁག་བཅུ། ནུབ་རྒྱ་ཆེན་བཅོ་བརྒྱད། བྱང་གསེར་ཁོག་ཚོ་བདུན་ཞེས་པ་མངའ་ཞབས་སུ་བསྡུས། འབངས་རྣམས་བྱམས་བརྩེས་སྐྱོངས། སྒ་ནས་གསེར་ཁྲལ་སྡུད། གསེར་གྱི་བཀའ་འགྱུར་བཞེངས༌། སླར་ཡང་མདོ་མང་བཞེངས། ཀརྨ་པ་རང་བྱུང་མཚོ་སྐྱེས་རྡོ་རྗེ་སྤྱན་དྲངས། ཆིབས་ཆེན་དམར་གྭས་གཙོས་པས་ཁྲི་རྭ་ཅན་གྱི་འབུལ་བ་ཟླ་མེད་པ་ཕུལ། སྒར་ཆེན་འཛམ་གླིང་རྒྱན་གྱི་གཟིམས་གུར་གནམ་སྔོན་སླེབ་མའི་རྒྱ་ཁྱོན་ཏེ་ཕོ་བྲང་སྐྱ་ལེབ་མ་ཞེས་པ་ཀ་བ་བརྒྱ་དང་བརྒྱད་ཀྱི་མལ་མཛད། ཉེར་ཞལ་གཉིས་ཀྱི་སྐུ་རིང་ལ་ཞེས་པའི་ཆོས་སྲིད་མངའ་ཐང་དཔེ་ཟླ་མེད་པ་བྱུང༌། ནང་པ་རྡོ་བཅང་པ་ཉིད་ཀརྨ་པའི་ཕྱག་ཕྱིར་འབྲང། ཕྱག་མཛོད་ཆེན་མོ་མཛད། རྩེ་ལྷ་སྒང་སོགས་སུ་བཞུགས། ཕྱིས་ཞལ་ངོ་རྣམས་ཀྱི་མནབས་ཁྲབ་ཟུར་དུ་མཛད་པས་ཁྲབ་དཀར་ཡིད་བཞིན་ནོར་བུ་སོགས་དེ་དུས་བྱུང༌། ཀརྨ་པས་འཇིག་རྟེན་གྱི་རྫོངས་དང་བཅས་གདན་སར་བསྐོས། ཉེར་རྐེ་ལ་སྲས་གསུམ་བྱུང་བའི་ཆེ་བ་བསོད་ནམས་དོན་འགྲུབ་རྡོ་བཅང་བ་སངས་རྒྱས་དབང་ཕྱུག་ལས་རབ་ཏུ་བྱུང༌། ཡབ་མེས་ཀྱི་གདམས་སྐོར་མ་ལུས་པ་གསན། ཞྭ་དམར་བཞི་པའི་སློབ་མ་བཀའ་བཅུ་པ་བདེ་ལེགས་རྒྱ་མཚོ་ལས་མདོ་རྒྱུད་རྒྱ་མཚོ་ལྟ་བུ་གསན་བསམ་ཕུལ་དུ་སོན་པར་མཛད། འབྲིང་བ་ནམ་མཁའ་རྒྱལ་མཚན་གྱིས་རྒྱལ་སྲིད་མ་ཉམས་པར་དར་རྒྱས་མཛད། ཆུང་བ་ལྷ་རྒོད་རྒྱལ་ནི། རཏྣ་གླིང་པའི་གཏེར་ལུང་ལས། བེར་ནག་ཅན་གྱི་སྤྲུལ་པ་ཞིག༔ ལྷ་རྒོད་ཞེས་བྱས་དམག་ཚོགས་ཐམས་ཅད་བཟློག༔ ཅེས་མགོན་པོའི་སྤྲུལ་པར་གྲགས་ཤིང་ཆོས་སྲིད་ལ་ཐོ་འཚམས་པ་ཐམས་ཅད་ཚར་བཅད། འདི་གསུམ་གྱི་ཀརྨ་པ་མི་བསྐྱོད་རྡོ་རྗེ་སྤྱན་དྲངས་ཤིང་དངོས་པོའི་བསྙེན་བཀུར་མཐའ་ཀླས་པ་ཕུལ། བསོད་ནམས་དོན་གྲུབ་ལ་གོ་ཤྲཱི་ལས་ཀ་བཅས་གདན་སརབསྐོས། ནམ་མཁའ་རྒྱལ་མཚན་གྱི་སྲས་མང་དུ་ཡོད་པར་གྲགས་ཤིང་གཙོ་ཆེ་བ་བཀྲ་ཤིས་དོན་འགྲུབ་ནི་བསོད་ནམས་དོན་འགྲུབ་ལས་རབ་ཏུ་བྱུང་ཞིང་འབའ་རོམ་གྱི་གདམས་སྐོར་ཐུགས་སུ་ཆུད་པར་མཛད། བཀྲ་ཤིས་རྣམ་རྒྱལ་གྱིས་སྙིང་ཐང་དུ་ཆོས་སྲིད་བསྐྱངས། འདི་རྣམ་པས་འཇིག་རྟེན་དབང་པོ་དགུ་པ་སྙིང་ཐང་དུ་སྤྱན་དྲངས། བསུ་བ་སེར་སྦྲེང་སྔོ་སྦྲེང་སོགས་བཀོད་པ་བླ་ལྷག་དུ་མཛད། ཡོད་དགུ་ཅོག་གི་འབུལ་བ་ཕུལ་ཞིང་རྗེས་སུ་བཟུང༌། །བཀྲ་ཤིས་དོན་འགྲུབ་ལ་གོ་ཤྲཱི་འཇའ་ས་ཕེབས་ཏེ་གདན་སར་བསྐོས། བཀྲ་ཤིས་རྣམ་རྒྱལ་ལ་སྲས་གཉིས་ཡོད་པའི་ཆེ་བ་བསོད་ནམས་རྒྱ་མཚོ་བཀྲ་ཤིས་དོན་འགྲུབ་ལ་རབ་ཏུ་བྱུང་ཞིང་གདམས་པ་ཕོག །མཚན་གོ་ཤྲཱི་བསོད་ནམས་རྒྱ་མཚོ་ཞེས་སྐུ་འབུམ་གྱི་ཁྲི་འཛིན་མཛད། སྲས་གཉིས་པ་བསོད་ནམས་འཕེན་དར་ཞེས་པ་སྲིད་འཛིན་མཛད་པའི་སྲས་རྡོོ་རྗེ་འབུམ་དང༌། ཀརྨ་ཆོས་རྒྱལ་གཉིས་ལས། ཀརྨ་ཆོས་རྒྱལ་བསོད་ནམས་རྒྱ་མཚོས་རྗེས་སུ་བཟུང་ཞིང་ཡབ་ཆོས་རྫོགས་པར་མཛད། རྡོ་རྗེ་འབུམ་གྱིས་སྙིང་ཐང་དུ་སྲིད་འཛིན་མཛད་རུང་འདི་སྐབས་བེ་རུ་ཕྱི་ནང་གི་ལྐོག་གཡོ་ངན་འཕྲུལ་གྱིས་སྨད་ཀྱི་བེ་རུའི་མི་ལོག་གིས་མདོ་སྨད་ཕལ་ཆེར་བཅོམ་ནས་ངན་སྟོབས་ཆེར་རྒྱས་པའི་དབང་གིས་དམག་འཁྲུགས་མཐའ་འཁྱོལ་བ་མ་བྱུང་བས། ལྕི་ལ་གོང་ཞེས་པར་རྒྱལ་ས་འཕོས་པར་མཛད། དེ་ཡན་ནི་གདན་ས་སྐུ་འབུམ་དང་སྙིང་ཐང་དུ་ཆོས་སྲིད་ཟུང་འབྲེལ་་དུ་བསྐྱངས་ཚུལ་ལོ། །གཉིས་པ་ནི། དེའང་ལྕི་ལ་གོང་དུ་རྫོང་མཁར་པོ་ཆེར་གྲགས་པ་བརྩེགས་ནས་ཚངས་གསར་གྲྭ་ནང་ཞེས་པར་ཆོས་སྲིད་བྱུང་ཚུལ་མདོར་བསྡུས་ནི། རྡོ་རྗེ་འབུམ་གྱི་སྲས། ལྷ་སྲུང༌། བདེ་མཆོག། ཀྱཻ་རྡོར། དགེ་བཤེས་བཞི་དེ་ལས་ལྷ་སྲུང་ནི། སྔགས་རིགས་འཛིན་པའི་ཚུལ་མཛད་ཅིང༌། ཀྱཻ་རྡོར་ནི་ཀརྨ་ཆོས་རྒྱལ་ལས་རབ་ཏུ་བྱུང༌། ཀརྨ་བསྟན་སྐྱོང་ཞེས་མཚན་གསོལ། གཉིས་ཀས་མདོ་སྔགས་ཀྱི་ཆོས་མ་ལུས་པ་ལ་གསན་སྦྱངས་མཛད། ཁྱད་པར་ཡབ་མེས་ཀྱི་བདེ་མགོན་ལྷ་གསུམ་ལ་རྩེ་གཅིག་ཏུ་བསྙེན་བསྒྲུབ་ལ་ཐུགས་བསྒྲིལ། ལྷག་པར་ལྷ་སྲུང་གིས་རྔམ་རྩ་དང་ཟམ་སོའི་བྲག་དང༌། ལྕི་རཱ་ཛ་རྫོང་དང་ཇོ་མོ་གཡུ་སྒྲོན་སོགས་སུ་རི་འགྲིམ་མཛད། ཝ་རྫོང་བྲག་ལ་ཕར་འཕུར་ཚུར་འཕུར་མཛད་དེ། དགེ་བསྙེན་བར་བློན་དམ་ལ་བཏགས། བྲག་ལ་སྐུ་རྗེས་དང་ཞབས་རྗེས་བཞག །སྐུ་ཚེའི་སྨད་ལ་གཡག་གི་མགོ་ཞེས་པར་རྫོང་བརྩེགས་ཏེ་དཔལ་མགོན་པོའི་བསྒྲུབ་པ་ལ་རྩེ་གཅིག་ཏུ་ཐུགས་དམ་མཛད་ནས་གྲུབ་རྟགས་མངོན་དུ་གྱུར། བསྟན་དགྲ་བེ་རུ་མཐའ་དམག་ནུས་མཐུས་ཚར་བཅད། མཐར་རྫོང་གཡག་གི་མགོར་སྒོ་བཅད་མཛད་ནས་བཞུགས་པའི་དགུང་ལོ་གྱ་བདུན་རབ་ལོ་བཅུ་གཅིག་ཆུ་སྟག་ལ་འཇའ་ལུས་འགྲུབ། དེ་ཉིད་དུ་འོག་མིན་རྣམ་སྣང་མཛད་ཀྱི་དུར་ཁྲོད་དུ་ལས་མགོན་དབུ་སྨུག་གི་སྐུར་བཞེངས་པ་གནམ་ཆོས་མི་འགྱུར་རྡོ་རྗེ་ལ་གནས་གཏེར་གྱི་སྒོ་ནས་སྒྲུབ་ཐབས་ལས་ཚོགས་བཅས་འདས་རྗེས་སུ་བབས། ཀརྨ་བསྟན་སྐྱོང་གིས་ཇོ་མོ་གཡུ་སྒྲོན་སོགས་སུ་རི་ཁྲོད་རྩེ་གཅིག་ཏུ་མཛད་ཚངས་གསར་པའི་འབྲོག་སྒར་དུ་སྔགས་སྡེ་ཡང་མཛད། གྲུབ་པ་བརྙེས། དགེ་བཤེས་པ་ཉིད་དབུས་སུ་ཕེབས་ལྔ་པ་རིན་པོ་ཆེ་ལ་གཙུག་ཕུད་ཕུལ། མཚན་བློ་བཟང་རྒྱལ་མཚན་དུ་གསོལ། གདན་ས་འབྲས་སྤུང་དུ་ཆོས་ཞུགས་མཛད། སོག་རྒྱལ་ལ་ཨུ་ཇིང་ཐེ་ཇིའི་འཇའ་ས་དང༌། ཆོ་ལོ་དཀར་སེར་གྱི་ཐམ་ཀ་ཐོབ། ལྔ་པ་རིན་པོ་ཆེའི་མདུན་ནས་ཤེ་བམ་ཉི་ཁྱབ་མ་ཕེབས། སླར་རང་རྫོང་མཁར་པོ་ཆེར་གཏན་ཆགས་སུ་བཞུགས། ཆོས་སྲིད་ཆབ་སྲིད་ཀྱི་མཛད་ཁྱབ་འདི་པ་ཆེ་བར་བྱུང༌། ལྷ་སྲུང་གི་སྲས་གཉིས་བྱུང་བའི་ལྷ་འབུམ་ནི། འབྲོག་སྒར་ལྕི་ཉིན་སྟོད་དུ་མཛད། ཁུ་བོ་བླ་མ་བསྟན་སྐྱོང་ལས་གདམས་པ་ཐུགས་ཆུད་མཛད་ནས་སྡེ་སྲིད་ཀྱང་བསྐྱངས། རྡོ་རྗེ་དབང་ཕྱུག་གིས་རྫོང་མཁར་པོ་ཆེའི་ཆོས་སྲིད་ཀྱི་ཁྲི་འཛིན་བཛད། མངའ་ཐང་ཡང་དཔེ་མེད་པ་བྱུང༌། དེ་ལ་སྲས་གཉིས་ཀྱི་ཀརྨ་མཁར་ཆེའི་རྫོང་འཛིན་མཛད། ཀརྨ་ཚངས་དབྱངས། ཀརྨ་བསྟན་སྐྱོང་ཁུ་དབོན་གཉིས་ཀྱིས་ཀརྨ་པ་ཆོས་དབྱིངས་རྡོ་རྗེ་དང༌། དྲུང་སི་ཏུ་པ་སོགས་མཇལ། དངོས་འབུལ་རྒྱ་ཆེར་མཛད། ཆོས་དང་ཆབ་སྲིད་ཟུང་འབྲེལ་དུ་བསྐྱངས། དེ་ནས་ཚངས་གསར་ཀརྨའི་སྲས་ཀརྨ་ངག་དབང་དར་རྒྱས་དང༌། རིན་ཆེན་ལྷུན་གྲུབ་གཉིས་ལྕི་སྲིབ་སྟོད་མདོ་ཐང་ཁར་གཏན་ཆགས་ཤིང༌། རྫོང་མཁར་པོ་ཆེར་བློ་བཟང་རྒྱལ་མཚན་གྱི་སྤྲུལ་སྐུ་ཁྲི་བཞག་བྱས་པས་སྲིད་ཁྲི་འཛིན་པ་སྟེ། མཚན་བློ་བཟང་བསྟན་འཛིན་དབང་ཕྱུག་ཏུ་གྲགས། ཚངས་གསར་རིན་ཆེན་ལྷུན་གྲུབ་ནི། ཁུ་བོ་བླ་མ་ཀརྨ་ཚངས་དབྱངས་ལས་འབའ་རོམ་ལས་བརྒྱུད་པའིཆོས་ཡོད་དགུ་ཅོག་དང་ཕྱག་ལེན་རྣམས་མ་ཉམས་པར་སློབ་པར་མཛད། ཤོར་ཕུ་བླ་མ་ཀརྨ་དཔལ་འབྱོར་ལས་མ་མགོན་གཉིས་ཀྱི་རྒྱུད་དང་གདམས་སྐོར་བེ་བུམ་རྣམས་ཞུས་ཏེ་ཐུགས་ཉམས་སུ་བཞེས། མོ་ཁད་ལྷ་རྩེ་དང༌། བྱང་གཉན་གྱི་མགུར་རྣམས་སུ་རི་འགྲིམ་དང་རྗེས་སུ་འཇོ་ར་མཁར་དཀར་ཞེས་པའི་དགོན་བཏབ། ཁམས་ཀུན་དགའ་བསྟན་འཛིན་གཡེར་ཆེན་སྒར་དུ་མཇལ། གུ་རུའི་དུས་སྟོན་ཚེས་བཅུ་ཆེན་མོའི་བཀའ་བབ་ཏུ་དབུགས་དབྱུང༌། དེ་ནས་བརྩམས་བྱང་ཁམས་སྟོད་དུ་ཚེས་བཅུའི་གར་འཆམ་སྒོ་ནས་འགྲོ་རྣམས་སྨིན་གྲོལ་ལ་བཀོད། དགེ་རྒྱལ་དུ་ཡོལ་གཉེན་གྱི་བྱིས་དང༌། ལྕི་སྟོད་གོ་ཝེ་བྱིས་གཉིས་འཛུག་པའི་སྐབས་ཆུ་ཕར་ཚུར་གྱི་བྲག་ཁར་བྱིས་ཐག་གི་འགྱིང་ཕུར་བཙུག་པ་སོགས་རྫུ་འཕྲུལ་བསམ་མི་ཁྱབ་པ་མཛད། མཐར་མཁར་དཀར་དུ་དགུང་གྲངས་རེ་གཉིས་པ་མེ་ལུག་ལ་སྐུ་གཤེགས། ཀརྨ་ངང་དར་གྱིས་ལྷ་གཟིགས་བཟའ་ཆོས་འཛོམས་ཁབ་ཏུ་བཞེས་པའི་སྲས་བསོད་ནམས་སྟོབས་རྒྱལ། ངག་དབང་ཕྲིན་ལས། ངག་དབང་རྣམ་རྒྱལ། བསོད་ནམས་ཡེ་ཤེས། ལྕམ་སྲིང་བསམ་ལུ་རྣམས་འཁྲུངས། ངག་དབང་ཕྲིན་ལས། ངག་དབང་རྣམ་རྒྱལ། བསོད་ནམས་ཡེ་ཤེས་སྐུ་མཆེད་འདི་གསུམ་ལ་སྲས་ནོར་བུ་རྩེ་གསུམ་དུ་གྲགས་ཤིང༌། ཀརྨ་པ་ཡེ་ཤེས་རྡོ་རྗེ་ལ་རབ་ཏུ་བྱུང༌། གསང་སྔགས་གསར་རྙིང་གི་ཆོས་སྐོར་མ་ལུས་པ་གསན་ཏེ་ཐུགས་སྲས་དམ་པ་རྣམས་སུ་གྱུར། ཁོ་བོ་བླ་མ་རིན་ཆེན་ལྷུན་གྲུབ་ནས་འབའ་རོམ་པའི་ཆོས་སྐོར་དང་ཡབ་མེས་ཀྱི་ཆོས་སྐོར་མཐའ་དག་ཐུགས་སུ་ཆུད་པར་མཛད། ངག་དབང་ཕྲིན་ལས་ཀྱི་བླ་ཁྱབ་དགོན་བྱང་ཆུབ་ཆོས་གླིང་བཏབ། ངག་དབང་རྣམ་རྒྱལ་གྱིས་དཔལ་ཁའི་བདེ་མོ་བཀྲ་ཤིས་ཆོས་གླིང་དང༌། བསོད་ནམས་ཡེ་ཤེས་ཀྱིས་གནམ་དགོན་ཐུབ་བསྟན་རྣམ་དག་གླིང་བཏབ། སོ་སོའི་བསྟན་དགོན་གྱི་འཛིན་སྐྱོང་སྤེལ་གསུམ་དང༌། གྲུབ་པའི་གོ་འཕང་མངོན་དུ་མཛད། ཁྱད་པར་བསོད་ནམས་ཡེ་ཤེས་ནི་ལས་མགོན་གྱི་སྤྲུལ་པར་གྲགས་ཤིང་ཞྭ་དམར་པའི་སྐུ་རྐྱེན་བསལ། དེ་ནས་འདི་གསུམ་གྱི་སྤྲུལ་བརྒྱུད་རིམ་པར་བྱོན་པ་ཡིན། དབོན་བསོད་ནམས་སྟོབས་རྒྱལ་གྱིིས་ལྕི་སྲིབ་ཀྱི་སྲིད་འཛིན་མཛད་པའི་སྲས་བསོད་ནམས་རྒྱལ་བ། དོན་འགྲུབ་རྒྱལ་བ་གཉིས་བྱོན་པ་ཡིན། ལྕམ་མོ་བསམ་ལུ་ནི་ནང་ཆེན་དཀོན་མཆོག་རྒྱལ་པོའི་ཆུན་མར་བྱོན་པ་ལགས། དེ་ནས་ངག་སྤྲུལ་གཉིས་པ་ཨ་མགོན་མཁྱེན་རབ་དབང་ཕྱུག། རྣམ་རྒྱལ་གཉིས་པ་ཚངས་གསརཀརྨ་བསྟན་འཛིན། བསོད་ཡེས་གཉིས་པ་སེར་རྩ་ཀརྨ་ཚུལ་ཁྲིམས་མཐར་ཕྱིན་ཏེ། འདི་གསུམ་ཀརྨ་པ་བྱང་ཆུབ་རྡོ་རྗེའི་རྗེས་སུ་བཟུང་ཤིང་སྒྲུབ་བརྒྱུད་ཀརྨ་ཀཾ་ཚང་གི་ཆོས་སྐོར་དང༌། མདོ་སྔགས་ཀྱི་ཆོས་ཚུལ་རྣམས་ཞུས། དབོན་གུ་རུ་དྷརྨ་ཙཀྲ་ལས། འབའ་རོམ་པའི་གདམས་སྐོར་རྣམས་ཕལ་ཆེར་གསན། མདོ་ཁམས་དཔལ་སྤུངས་སུ་སི་ཏུ་ཆོས་ཀྱི་འབྱུང་གནས་ཀྱི་ཞབས་པད་རྩེ་གཅིག་ཏུ་བསྙེན་ནས་ཆོས་ཀྱི་བདུད་རྩི་ཟབ་མོས་ཐུགས་ཚིམ་པར་བཞེས། སོ་སོའི་གདན་ས་བསྐྱངས་ནས་མཛད་ཕྲིན་རྒྱས། དཔོན་བསོད་ནམས་རྒྱལ་བ་འགྲམ་ཁར་གཏན་ཆགས་པར་མཛད་པའི་སྲས་ཀརྨ་དོན་གྲུབ། བསོད་ཡེས་གསུམ་པ་ཀརྨ་ཡེ་ཤེས་སྙིང་པོ་རིན་ཆེན་དབང་རྒྱལ། བསྟན་པ་རྣམ་རྒྱལ་ཡེ་ཤེས་དབང་ཕྱུག་རྣམས་བྱོན། དོན་གྲུབ་རྒྱལ་བ་མདོ་ཐང་ཁར་བཞུགས་པར་སྲས་མ་བྱུང་བར་ཡེ་ཤེས་དབང་ཕྱུག་ཡར་བྱོན་ནས་བཞུགས། ཀརྨ་དོན་གྲུབ་གྱི་སྲས་ཟུར་པ་ཁྲི་རྒྱལ་ཞེས་པ་རྫ་ལྷུག་ཏུ་ཟུར་བཞུགས་མཛད། གོང་དུ་སྨོས་པའི་ཚངས་གསར་མཁར་པོའི་ཆེའི་ཁྲི་འཛིན་བློ་་བཟང་བསྟན་དབང་གི་སྤྲུལ་སྐུ་ཧ་ར་ཚང་དུ་འཁྲུངས་པ་མཁར་ཆེན་སྤྲུལ་སྐུར་གྲགས་ཤིང་ཁྲི་བསྐོས་མཛད། ཚངས་གསར་ལྷ་འབུམ་གྱིས་ལྕི་ཉིན་སྟོད་ར་རུག་མདར་སྦྲ་མཁར་མཛད་པའི་སྲས་ཚངས་གསར་ཀརྨ་ཞེས་པ་བྱུང༌། འདི་སྐབས་ལྕི་སྟོད་སྨད་གཉིས་སུ་གྱེས་པའི་སྡེ་ཁག་ལ་ཚངས་གསར་ཡུལ་འབྲོག་གཉིས་ཟེར། ཀརྨའི་སྲས་གཞུང་དུ་ཡོད་པ་ཚངས་གསར་དུང་རྒྱལ་ཡིན་ལ། ཟུར་པ་ཞིག་ཡོད་པ་དོན་གྲུབ་སྟེ། ཟུར་སྡེ་ཕྱེ་ནས་རྫ་གྲབ་མདར་བཞུགས་ཤིང་སྲས་མེད་པའི་འཕྲོས་ལ་སྡེ་རོ་མ་ཞེས་པ་བྱུང༌། མདོར་བསྡུས་ན་ལྕི་ཉིན་ཤོག་གསུམ་མར་གྲགས། དུང་རྒྱལ་གྱི་སྲས་རྣམ་རྒྱལ་རྡོ་རྗེ་དང་ཕུན་དབང་གཉིས། དེ་སྲས་དཔོན་ཨོར་ཆོས་དང་བླ་ཆུང་པད་འགྲོ་རྣམས་སོ། །ལྕི་སྲིབ་ལའང་དོན་གྲུབ་རྒྱལ་བ་མདོ་ཐང་ལ་བཞུགས་པ་དང༌། བསོད་ནམས་རྒྱལ་བ་འགྲམ་ཁར་བཞུགས་པ་སྟེ་གཉིས། བསོད་ནམས་རྒྱལ་བའི་སྲས་ཀརྨ་དོན་གྲུབ་ཀྱི་སྲས་ཟུར་པ་ཚངས་གསར་ཁྲི་རྒྱལ་ཞེས་རྫ་ལྷུག་ཏུ་བཞུགས་པ་ལྕི་སྲིབ་སྟོད་སྨད་བར་གྱི་སྡེ་ཁག་སྟེ། མདོར་ན་ལྕི་ཉིན་སྲིབ་གཉིས་ལ་ཚངས་གསར་ཁག་ལྔ་ཤོག་དྲུག་ཏུ་གྲགས་པ་ཕྱིས་སུ་བྱུང་ཞིང་ས་མི་ཆུད་མཚམས་ཡང་སྨད་ནས་སྒམ་ལ་སྦྲུལ་མཁར། སྐད་རྒྱལ་ནེ་བྲོ་རྐེས་རྒྱལ་སེ་ཕོམ། ཡོག་རྒྱལ། བྲེ་གུ་ལ་བཙས་ནག་པོ། ཀ་མདའ་ཁྲ་མོ། གོ་ཝེ་རི་དམར། སྟག་ལུང་ལ་བཙས་དཀར་པོ་བཅས། བླ་དགོན་རྣམས་གོང་མ་རྒྱ་སོགས་གཞུང་གསུམ་གྱི་སྐུ་རིམ་པ་དང༌། དཔོན་རབས་རྣམས་གོང་མ་སེ་ཆེན་གན་གྱི་དུས་ནས་བརྩམས། ཡོན་མིང་ཆིང་ཤུན་གྱི་དུས་རྒྱལ་པོ་དང་ཁྲི་དཔོན་སྒེར་བཙན་རང་དབང་ཅན་ཡིན་པར་གདའ། ༈ དེ་ནས་བླ་རབས་བྱོན་པའི་ཚུལ་ནི། བསོད་ཡེས་གསུམ་པ་ཀརྨ་ཡེ་ཤེས་སྙིང་པོས་ཀརྨ་པ་བཅུ་གསུམ་བདུད་འདུལ་རྡོ་རྗེ་བསྙེན། ངག་ཕྲིན་གཉིས་པ་ལས་ཡབ་ཆོས་སྐོར་གསན། གནམ་དགོན་གྱི་གདན་ས་མཛད། ངག་ཕྲིན་གསུམ་པ་སྐྱིལ་ཚ་བ་ཀརྨ་ཆོས་དབྱིངས་རང་གྲོལ་ལམ། ཡེ་ཤེས་རོལ་པ་རྩལ་དང་རྣམ་རྒྱལ་སྐུ་ཕྲེང་གསུམ་པ་གཉིས་སི་ཏུ་པདྨ་ཉིན་བྱེད་ཀྱི་ཞལ་དཀྱིལ་བསྙེན། དཔལ་སྤུངས་སྒྲུབ་ཁང་དུ་བཞུགས༌། མཁས་གྲུབ་རྨད་དུ་བྱུང་ནས་གདན་ས་རྣམས་བསྐྱངས། རྣམ་རྒྱལ་སྐུ་ཕྲེང་བཞི་པ་ཨ་མྱེ་ལ་འཁྲུངས་པ་ཉིད་གདན་སར་ཕེབས་ཤིང་འཛིན་སྐྱོང་སྤེལ་བ་སོགས་མཛད་དེ་སྐུ་གཤེགས། རྣམ་རྒྱལ་སྤྲུལ་སྐུ་ལྔ་པ་སངས་རྒྱས་གྲགས་པ་ཉིད་བདེ་མོ་དགོན་གྱི་གདན་ས་ཞབས་པད་རྡོ་རྗེའི་ཁྲིར་ད་ལྟའང་འགོད་བཞིན་པའོ། ། ༈ གཞན་ཡང་ལྕི་རཱ་ཛ་རྫོང་དུ་སྔོན་དཔལ་རྒྭ་ལོ་དེར་བཞུགས་སྒྲུབ་པ་མཐའ་ཕྱིན། ས་ཆེན་ཀུན་སྙིང་གི་གདུང་འབུམ་བཞེངས་མཛད། སྐུ་ཡང་དེར་གཤེགས་པས་རྒྭ་ལོའི་གདུང་འབུམ་ཡང་དེར་བཞུགས། ཕྱིས་སུ་ཚངས་གསར་བླ་མ་རྣམས་ཀྱིས་སྒྲུབ་གནས་མཛད་པས་ཚངས་གསར་རྫོང་མགོ་ཚང་ཞེས་དགོན་གནས་གཅིག་ཡིན། ཚངས་གསར་ཀརྨ་བསྟན་སྐྱོང་གི་གུར་སྒར་ཕུབ་པར་ཕྱིས་འབྲོག་པ་ཚང་གི་བླ་བརྒྱུད་རྣམས་ཀྱི་གདན་ས་མཛད་པས་ཚངས་གསར་ལྷ་ལམ་དགོན་དང༌། སྔགས་བརྒྱུད་དར་རྒྱས་རྒྱ་མཚོ་དཔལ་སྤུངས་སྒྲུབ་བླར་ཕེབས་ནས་ཡར་བྱོན། ཝ་རྫོང་པད་སྤུངས་སར་དགོན་མཛད། དབོན་སྤུག་ཆུང་ཞེས་པས་ཤུལ་འཛིན། སྔགས་སྤྲུལ་ངག་དབང་གྲགས་པ་སོགས་བྱོན་ཞིང་དགོན་པའི་མིང་ཚངས་གསར་ཆོས་གླིང་དགོན་ཞེས་པ་དང༌། གནམ་དགོན་གྱི་དགོན་ལག་རཀྵའི་མངོན་སྤྲུལ་ཀརྨ་ལུང་རིགས་རྣམ་རྒྱལ་གྱིས་རྟ་ཡུམ་གནས་སུ་སྨིན་གྲོལ་དགོན་ཞེས་པ་བཏབ་དར་རྒྱས་ཅུང་ཟད་བྱུང་ཞིང་ །དབོན་བླ་མ་ཀརྨ་བཤད་སྒྲུབ་ཀྱིས་འཛིན་སྐྱོང་མཛད་པ་སྟེ་དེ་རྣམས་གྲངས་སུ་འདྲེན་པ་ཡིན་ནོ། །ལྕི་ཉིན་ཡུལ་པ་མཁར་ཆེའི་བསྟན་བདག་ཧ་ར་བླ་མས་གདན་ས་མ་འཁྱོལ་ནས་རྟེན་གསུམ་གཙོ་ཆེ་ནང་ཆེན་དུ་འཁྱུགས་ཤིང་ཕལ་མོ་ཆེ་འཐོར་ཟགས་སུ་བྱུང་བར་གྱུར། གསེར་དངུལ་གྱི་བཀའ་འགྱུར་ནི་འབྲོག་པའི་དགོན་ལྷ་ལམ་དགོན་དུ་ཡར་ཉར་ཚགས་བྱས་པར་འདུག །འཕྲོས་ཡུལ་པའི་རྫོང་ཞིག་ཅིང་སྡེ་དུད་ཀྱི་མགོ་འཛིན་མ་ངེས་པ་འགའ་ཤས་ཡང་བྱུང་བར་སྣང་ངོ། བསོད་ཡེས་སྐུ་ཕྲེང་བཞི་པ་ཀརྨ་བསོད་ནམས་ཆོས་འཕེལ་ལམ། འཆི་མེད་རྡོ་རྗེ་དང༌། ངག་ཕྲིན་བཞི་པ་བསམ་གཏན་རྒྱ་མཚོ། གཏེར་སྲས་སྤྲུལ་སྐུ། གསང་སྔགས་རྣམས་སྐུ་མཆེད་དེ། འདི་རྣམས་ཚངས་གསར་འབྲོག་པ་དཔོན་ཨོ་རྒྱན་ཆོས་འཕེལ་གྱི་སྲས་ཡིན་ལ་ཡུམ་དཀོན་མཆོག་དཔལ་སྒྲོན་ཞེས་གཏེར་ཆེན་མཆོག་གླིང་སྲས་མོ་སྟེ། འདི་རྣམས་ངག་ཕྲེང་གསུམ་པའི་དབོན་བླ་མ་ཆོས་དབང་དང༌། སྤམ་ཚངས་གསར་བླ་མ་ཨ་ཡུ་དེ་ཝ། གཅོད་བླ་བསོད་ནམས་རྒྱལ་མཚན་སོགས་ལས་འབའ་རོམ་དང་ཡབ་མེས་ཀྱི་ཆོས་སྐོར་ཚང་མ་གསན། ཀརྨ་པ་ཐེག་མཆོག་རྡོ་རྗེ་དང་མཇལ། གདམས་ཁྲིད་དབང་བསྐུར་ཡང་ནོད། གདན་སར་བཞུགས་པ་དང་རི་ཁྲོད་བརྟེན་པ་རེས་མོས་མཛད། ཕྱིས་བསམ་གཏན་རྒྱ་མཚོ་རྒྱལ་དབང་མཁའ་ཁྱབ་རྡོ་རྗེའི་དབུ་བླར་བྱོན། གཏེར་གསར་ཡོངས་རྫོགས་དབང་བསྐུར་ཕུལ། འཆི་མེད་རྡོ་རྗེ་འབྲུག་པ་རིན་པོ་ཆེ་ཐམས་ཅད་མཁྱེན་པའི་དབུ་བླ་མཛད། གསར་རྙིང་ཆོས་སྐོར་མང་དུ་ཕུལ། ནང་ཆེན་སྟོད་དུ་རྒྱལ་བཀའི་ལུང་སྤེལ། དབོན་བརྒྱུད་ཐུགས་སྲས་པདྨ་འཇིགས་མེད། ཀརྨ་ཨོ་རྒྱན།་་་་་་་་་ཆོས་དབང་སྤྲུལ་སྐུ། བསོད་རྒྱམ་སྤྲུལ་སྐུ།་་་་་་་་་་་བསྟན་འཛིན་རྡོ་རྗེ་སོགས་བྱོན། དབོན་པདྨ་འཇིགས་མེད། སྲས་འགྱུར་མེད་རྡོ་རྗེ་ཞེས་པ་ད་ལྟ་འདིའོ། ། ༈ ལྕི་སྲིབ་མདོ་ཐང་དཔོན་བརྒྱུད་ཡེ་ཤེས་དབང་ཕྱུག་སྲས་དོན་གྲུབ་ཕུན་ཚོགས། དེ་སྲས་ཀརྨ་དབང་རྒྱལ། ཨོ་རྒྱན་རྣམ་རྒྱལ། ཨོ་རྒྱན་དར་རྒྱས་གསུམ། དེ་སྲས་ད་ལྟ་བླ་མ་དབུ་སྨུག་ཞེས་པ་འདི་དག་གོ། །རྫ་ལྷུག་དཔོན་ཁྲི་རྒྱལ་སྲས་མགོན་པོ་སྟོབས་རྒྱལ་ཀརྨ་བཟང་གཉིས། དེ་སྲས་བླ་མ་བསྟན་འཛིན་ཆོས་དར། དེ་སྲས་འགའ་ཡོད་པ་མི་སྣང་ཞིང༌། ཀརྨ་བཟང་སྲས་ཟུར་པ་འདུལ་བ། དེ་སྲས་ཨོ་རྒྱན་ཉི་མ་འདི་དག་དང༌། །འགྲམ་དཔོན་བསྟན་འཛིན་རྣམ་རྒྱལ་དང་རིན་ཆེན་དབང་རྒྱལ་ཟུང་གི་སྲས་མགོན་པོ་བསྟན་གྲགས་སྤྲུལ་སྐུ། བསྟན་དབང་སྤྲུལ་སྐུ་གཉིས། དེ་གཉིས་སྔགས་འཆང་དུ་བཞུགས་པའི་སྲས་ཀུན་ཁྱབ་ཡེ་ཤེས་སོགས་འགའ་བཞུགས་པའོ། །དེ་ལྟར་ཕོ་བྲང་ནང་སོ་ཆེན་མོའི་ཁྲིར་ཕེབས་པའི་གསང་བ་ལུས་མེད་རྡོ་རྗེ་ནས་བདག་ཅག་གི་དཔལ་མགོན་བླ་མ་འཆི་མེད་གྲུབ་པའི་རྡོ་རྗེ་ཡན་བླ་བརྒྱུད་དང་དབོན་བརྒྱུད་བར་མ་ཆད་པར་བྱོན་པ་ཐམས་ཅད་ཀྱང་རྡོ་རྗེའི་རིག་པ་འཛིན་པ་ཁོ་ན་སྒྲུབ་བརྒྱུད་འབའ་རོམ་པའི་ལྷ་ཆོས་མི་ཆོས་ཡ་བྲལ་དུ་མ་སོང་བའི་གྲུབ་པའི་ཕྲེང་བ་ཤ་སྟག་གོ། གསུམ་པ་ནང་ཆེན་པའི་གདུང་བརྒྱུད་དང་གདན་སར་བཞུགས་པའི་རིམ་པ་རྒྱས་པར་བཤད་པ་ལ་གཉིས། གདན་ས་སྐུ་འབུམ་དུ་ཆོས་སྲིད་རྒྱས་ཚུལ་དང༌། ཅུང་ཟད་འཕོ་འཆུག་བྱུང་ཚུལ་སྐོར་རྣམས་སོ། །དང་པོ་ནི། ནང་ཆེན་པའི་གདུང་བརྒྱུད་དང་གདན་སར་བཞུགས་པའི་རིམ་པ་ལ། ཡོན་ཏན་དཔལ་གྱི་སྣག་དབོན་སྤྱན་སྔ་ཆོས་ཀྱི་རྒྱལ་མཚན་ཏེ། གདུང་ནི་མིའུ་རུས་དྲུག་གི་ནང་ནས་ཨ་ལྕགས་འབྲུ། འབྲུ་ལ་ཆེ་དྲུག་དང་ལྡངས་དྲུག །ཡ་མེད་གཉིས་དང་བརྒྱད་ཀྱིས་ཁྱད་པར་དུ་འཕགས་པ་ཡིན། དེ་ལྟ་བུའི་འབྲུ་བཙན་པོ་དེས་ཏྲེ་རབ་ཁ་མི་ཡི་གནས་གཞི་ཟེར་བ་དེ་བཟུང་བ་ཡིན། དེའང་ཏྲེ་ལ་ཉིན་མོ་དང་སྲིབ་མོ། རྩེ་བ་དང་ཤོད་པ། སྟོང་པ་དང་མེད་པ། ཚོང་འདུས་མཎྜལ་སྟེང་དང་བདུན་ཡོད། འབྲུ་རྗེ་དེ་ལ་ལས་ཀ་ཐོབ་པའི་མི་གསུམ་ཡོད་དོ། ཐང་ཆེན་ཨ་འབར་བྱ་བས་ཁྲི་སྐོར་བཅུ་གཉིས་དཔོན་པོ་བྱས། དཀར་ཆུང་ཉི་མ་བྱ་བས་སྡང་དགྲ་ཆམས་ལ་ཕབ། ཀྱེ་ཧུ་འཁོར་ལོ་བཟང་པོས་རྒྱ་ནག་རྒྱལ་པོའི་ནང་བློན་བྱས། འཁོར་ལོ་བཟང་པོའི་བུ་ནོར་བུ་བཟང་པོ། དེའི་བུ་གཞོན་ནུ་བཟང་པོ། དེའི་བུ་ལྷན་པ། དེའི་བུ་སྤྲོས་མཆོག །དེའི་བུ་ལྷ་མཆོག །དེའི་བུ་ཡུལ་པ། དེའི་བུ་བཙུན་པ། དེའི་བུ་དགུ་ཡོད་པ་དེའང༌། གཅེས་དང་ཡག་དང་མཛེས་དང་གསུམ། ལོད་པོ་ཀླུ་བཙན་གཉན་པ་དྲུག །ཨ་ཆེན་བེ་ཡམ་སྡེ་བ་དགུ། དེ་ལས་མཛེས་པའི་བུ་རྩང་ཀུན་དེའི་བུ་ཁྱབ་པ། དེའི་བུ་ཡུལ་སྲུང༌། དེའི་བུ་དྲག་པོ། དེའི་བུ་ཐོག་འཕེན། དེའི་བུ་ཀརྨ་དྲག། དེའི་བུ་སྤྲིན་ཕྱུག། དེའི་བུ་ཐང་པོ། དེའི་བུ་བརྟན་པ། དེའི་བུ་འབབ་པ། དེའི་བུ་ཏིང་ཆེན། དེའི་བུ་ཀརྨ་མཛེས། དེའི་བུ་སེང་གེ་གྲགས༌། དེའི་བུ་དམག་དཔོན་འོད་ཟེར། དེའི་བུ་ཨ་མྱེ་མགོན་ཡག། དེའི་བུ་གསེར་གཡུ་ངང་གྲགས། དེའི་བུ་ལེགས་པ་དབང་ཕྱུག། དེའི་བུ་བློ་གྲོས་འོད་ཟེར། དེའི་བུ་དྲག་པོའི་གོ་ཅན། དེའི་བུ་རྨ་བྱ་མཛེས་པ། དེའི་བུ་ཞི་བ། དེའི་བུ་མ་ལྷ། དེའི་བུ་མངའ་བདག །དེའི་བུ་རྗེ་བོ། དེའི་བུ་ཆོས་འཕགས། དེའི་བུ་མདོ་མང༌། དེའི་བུ་སྡེ་ལྔ། དེ་ལ་བུ་བཞི་ཡོད་པ་ནི། ཨ་སྟག༌། སེང་འཕེན། འབྲུག་སྲས། རྒོད་པོ་འབར། ཨ་སྟག་གི་བུ་ཐང་ཆེན་བསོད་རྒྱལ། དེའི་བུ་ཤེར་འོད། དེའི་བུ་ལ་འབར། སེང་གེ་འཕེན་གྱི་བུ་ཁྲི་དཔོན་ལ་གྲགས། དེའི་བུ་བཙན་པོ། དེའི་བུ་སྐར་ཆུང་ཉི་མ། འབྲུག་སྲས་བུ་ཀྱེ་ཧུས་སངས་རྒྱས་དབང་ཕྱུག །དེའི་བུ་ཡོན་འབྱུང༌། དེའི་བུ་དཔོན་དཀར་དང་འཁོར་ལོ་བཟང་པོ་གཉིས། རྒོད་པོ་འབར་གེི་བུ་དོན་ཡོད་ཚུལ་ཁྲིམས་འོད་ཟེར། དེའི་བུ་ལྕག་ལ་ཡག །དེའི་བུ་ཞབས་དཀར་པོ་དང་དར་མ་གཉིས། ཞབས་དཀར་པོའི་བུ་དགེ་མཐོན། དེའི་བུ་ཁྲི་དར་སེང་གེ། དེས་གླིང་ཟ་ཨ་རྡོར་མ་བླང་བ་ལ། ཏྲེ་བོ་ཨ་ཀླུ་ཨ་ཀླུས་ཆེན་ཆུ་གཉིས་བཞག་པའི་ཆེན་མ་མཛོ་རོག་བཟའི་བུ་རྡོ་རྗེ་འཕགས་དང་རྡོ་རྗེ་བསྟན་གཉིས་ཀྲེ་རབ་ཁ་ན་བཞུགས། ཆུན་མ་འབེ་བཟའ་དཀར་མོ་ཁབ་ཏུ་བཞེས་པ་ལ་སྐུ་མཆེད་བདུན་བྱུང་བའི་ཆེ་བ་ས་སྐྱ་དཔོན་ལེགས་བྱ་ཡུལ་བ་ཨ་ཡུལ་བ་ཏྲེ་བོ་ཆོས་རྒྱལ་མཚན་ཚོང་དཔོན་ཁམ་ཐར་བཀྲ་ཤིས་དཔལ་བྱང་རྒྱལ་བའོ། །དེ་ལས་ཆོས་རྒྱལ་མཚན་ནི་བྱང་ཆུབ་མགོན་པོའི་དྲུང་དུ་རབ་ཏུ་བྱུང༌། མཚན་ཆོས་ཀྱི་རྒྱལ་མཚན་དུ་གསོལ། འབའ་རོམ་ནས་བརྒྱུད་པ་ཐམས་ཅད་གསན། འདི་དུས་ཧོར་གྱི་རྒྱལ་པོ་ཐོ་གན་ཐི་མུར་གྱིས་ཧོར་དང་རྒྱ་ནག་གཉིས་ཀའི་རྒྱལ་པོ་མཛད་དུས། ཏྲེ་བོ་ཆོས་ཀྱི་རྒྱལ་མཚན་ནང་ཆེན་ནང་གི་གདན་ས་ལ་བཞུགས་པའི་འཇའ་ས་བླང་བ་ཡིན། དེ་ནས་ཅི་མ་འགོར་བར། གོང་མ་རྒྱལ་པོ་ཡབ་སྲས་ཧོར་ཡུལ་དུ་བྲོས་ཤིང་རྒྱ་ནག་རྒྱལ་པོ་ཐའི་བུའི་རང་གི་རྒྱལ་ས་བླང་ནས་རྒྱལ་པོ་མཛད་པར་འདུག་མཆན། ས་སྐྱ་ནས་ནང་ཆེན་ནང་གི་ཁྲི་ལ་ཆོས་རྒྱལ་མཚན་བཞུགས་དགོས་གསུངས་པའི་བཀའ་ཤོག་ཇ་འདྲེན་དང་ཁྱེད་རས་ཚང་སྒོམ་སྡེ་དང་རབ་ཁ་བ་གཉིས་ལ་གཏོག་པའི་ལྷ་ཁང་དགོན་པ་བུ་སློབ་ཡོན་བདག་འཁོར་ཁ་སྡེ་རིས་རྣམས་ཀྱི་ངེས་རྒྱུར། སྤྱན་སྔ་ཆོས་ཀྱི་རྒྱལ་མཚན་གོང་གི་འཇའ་ས་དང་བཀའ་ཤོག་རིམ་པའི་ལུང་བཞིན་དུ། ནང་ཆེན་ནང་གི་ཁྲི་ལ་བཞུགས་རྒྱུ་ཡིན་པས། འདི་པས་དབང་བའི་ལྷ་ཁང་དང་དགོན་པར་འཚེར་མ་འབབ་ཞེས་པ་ལ་སོགས་པའི་བཀའ་ཤོག་བྱུང་སྟེ། ལྕགས་ཕོ་བྱི་བའི་ལོ་ལ་ཆོས་རྒྱལ་མཚན་ནང་ཆེན་ནང་གི་ཁྲི་ལ་བཞུགས་ཏྲེ་རབ་ཁ་ཡན་གྱི་ཁྲལ་འུ་ལག་སྐུ་འབུམ་དགོན་དུ་སྡུད། འཁོར་འབངས་ཐམས་ཅད་བྱམས་པས་སྐྱོང༌། ཆོས་སྲིད་ཐམས་ཅད་ནམ་མཁའ་དང་མཉམ། དཔོན་ཨ་ཡུལ་གྱིས་རྒྱལ་སྲིད་ཀྱི་མཛད་པ་རྒྱ་ཆེ། སྲས་ཀུན་དགའ་འབུམ་དང་ནམ་མཁའ་རྒྱལ་མཚན་གཉིས། ནམ་མཁའ་རྒྱལ་མཚན་ཆོས་ཀྱི་རྒྱལ་མཚན་མདུན་ནས་རབ་ཏུ་བྱུང་ཞིང་གདམས་པ་ཐམས་ཅད་གསན་ནས་གདན་ས་མཛད། ཀུན་དགའ་འབུམ་གྱི་སྲས་སེང་གེ་དཔལ། མགོ་པ་ཡོན་ཏན་རྒྱ་མཚོ། སྤྱན་སྔ་དཔལ་ལྡན་རྒྱ་མཚོ། བསམ་འགྲུབ་རྒྱ་འཚོ་དང་བཞི། འདི་དུས་ཀརྨ་པ་དེ་བཞིན་གཤེགས་པ་རྒྱ་ནག་ནས་ཡར་ཕེབས། སྐུ་འབུམ་དགོན་དུ་སྤྱན་དྲངས། དགེ་འདུན་པ་སྟོང་ཕྲག་གཉིས་གསུམ་ཙམ་གྱི་བསུ་བ་དང་བཅས་ཏེ་ནང་སོ་ཆེན་མོར་ཕེབས། བླ་དབྱེ་ཆེན་མོར་ནང་ཡ་གཉིས་དང་འདུས་པའི་ཚོགས་ལ་སེམས་ཁྲིད་ཀྱི་ཆོས་འཆད། འཇིག་རྟེན་དངོས་པོ་བགྲང་གིས་མི་ནུས་ཙམ་ཕུལ། བསམ་འགྲུབ་རྒྱ་མཚོ་རབ་ཏུ་བྱུང༌། ཀརྨ་ཀུན་དགའ་དཔལ་བཟང་པོའི་མཚན་དང༌། གསེར་གྱི་ཐམ་ཁ་ཆེན་པོའི་ཐམ་ཁའི་ཁ་རིས་ལ། ཀྭན་ཏིང་ཙིང་ཀྱའི་ཤིན་ཧུའི་ཤེ་གཽ་ཝེ་ཤྲཱི། བོད་སྐད་དུ་བཀྲོལ་ན། སྤྱི་བོ་ནས་དབང་བསྐུར་བ་ཆེན་པོ་རྒྱལ་ཁམས་ཀྱི་བླ་མ་ཆོས་ཁྲིམས་འཆའ་བའི་རྒྱལ་པོ་ཞེས་སོ། གསེར་ཐམ་འདི་གོང་ནས་ཀརྨ་པས་མི་ཆེན་བཅུ་གསུམ་གྱི་ལས་ཀ་བསྣམས་པ་ལས་གཉིས་ནང་ཡ་གཉིས་དང༌། གཞན་རྣམས་འབྲི་གདན་སོགས་ལ་གནང་བ་ཡིན་ཏེ། འབྲི་གུང་པ་ལ་གནང་བའི་ཐམ་ཁའི་ཁ་རིས་ལ། ཆེན་ཀྱའུ་ཧྭ་ཝང། བོད་སྐད་དུ་བསྟན་པ་སྤེལ་བའི་རྒྱལ་པོ་ཞེས་དང༌། གདན་ས་མཐིལ་དུ་གནང་བའི་ཐམ་ཁའི་ཁ་རིས་ལ། ཆེན་ཧུ་ཝང། བོད་སྐད་དུ་སྤྲུལ་པ་སྤེལ་བའི་རྒྱལ་པོ་ཞེས་དང༌། གོང་མ་ཆེན་པོའི་ཏའི་མིང་རྒྱལ་པོས། ཀརྨ་པ་ལ། ལུགས་གཉིས་ཀྱི་བདག་པོ་བླ་མ། གཞུའུ་ལའི་ཏའི་བའུ་ཧྭ་ཝང༌། བོད་སྐད་དུ། ཁྱེད་ཡིན་པས། བོད་ཀྱི་བསྐོ་འཇའ་ཐམས་ཅད་ཁྱེད་ཤེས་སུ་ཆུག །ཅེས་སོགས་གཞན་གྱི་བསྐོ་འཇའ་ལས་ཁྱད་པར་འཕགས་ཤིང་ཆེ་བ་ཡིན། མཆན། ལས་ཀ་དང༌། གོས་ཆེན་དེང་ཕོན་ལས་གྲུབ་པའི་བླ་བྲེས། སྟག་མགོ་ནོར་བུ་གསུམ་པ་སོགས་འཇིག་རྟེན་གྱི་གནང་བ་རྒྱ་ཆེན་པོ་དང་བཅས་ཏེ་གདན་སར་བསྐོས། ལུགས་གཉིས་ཀྱི་བཀའ་ཁྲིམས་བཟུང་བའི་གོ་གནས་གནང་ནས༌། སངས་རྒྱས་ཀྱི་བསྟན་པའི་ཞབས་འདེགས་རླབས་པོ་ཆེ་དགོས་པ་དང་ཡར་ཕྱིན་གཅིག་གིས་གཅིག་ལ་འཚེ་བ་མི་བྱེད་པའི་བཀའ་ཁྱབ་གནང་ལྷ་ཁང་དང་དགོན་པའི་འཛིན་སྐྱོང་དཔེ་མེད་མཛད། གསེར་གྱི་བཀའ་བསྟན་འགྱུར་བཞེངས། ངོ་མཚར་བའི་ལྟས་དང་བཅས་ཏེ་གཤེགས། སེང་གེ་དཔལ་གྱི་སྲས་གྲགས་པ་རྒྱལ་མཚན་དེའི་སྲས་ཀྱི་རྣམ་གྲངས་ལ། ཞང་ལྷ། ཀུན་དགའ་རྒྱ་མཚོ། ཆོས་དཔལ་བཟང་པོ། འོད་ཟེར་བཟང་པོ་དང་བཞི། ཆོས་དཔལ་བཟང་པོ་ཀུན་དགའ་དཔལ་བཟང་པོའི་དྲུང་དུ་རབ་ཏུ་བྱུང༌། སྔར་སྲོལ་གྱི་གདམས་པ་ཐམས་ཅད་རྫོགས་པར་གསན་གདན་ས་མཛད། ཞང་ལྷའི་སྲས། གཅོད་པ་རྒྱལ། གྲགས་པ། སངས་རྒྱས་གྲགས་པ་གསུམ། སངས་རྒྱས་གྲགས་པ་ཆོས་དཔལ་བཟང་པོ་ལས་རབ་ཏུ་བྱུང༌། འབའ་རོམ་ནས་བརྒྱུད་པའི་ཡབ་མེས་ཀྱི་གདམས་པ་ཐམས་ཅད་གསན། སྟག་ལུང་དུ་བྱོན། ངག་དབང་གྲགས་པ་དང་མཇལ། གདམས་པ་སྤྱི་དང་ཁྱད་པར་མགོན་པོ་ཕྱག་བཞི་པའི་སྐོར་མ་ལུས་པ་གསན། ལོ་བཅུ་གཉིས་སུ་བཞུགས། ཕུང་བྱེད་ནོར་བུ་གཟི་འབར། ཡ་གསུམ་སྟོད་མའི་རྫོང་དང་བཅས་གདན་སར་བསྐོས། སྒྲུབ་པ་དང་ཉམས་ལེན་གཙོར་མཛད། གཅོད་པ་རྒྱལ་གྱི་སྲས་གོ་ཤྲཱི་ཆོས་དཔལ་གྲགས་པ་དང༌། ཆོས་སྐྱོང་སྐྱབས་གཉིས། འདི་གཉིས་ཀྱིས། ཀརྨ་པ་ཆོས་གྲགས་རྒྱ་མཚོ་དཔལ་གཞུང་དུ་སྤྱན་དྲངས། ཁྲི་རྭ་ཅན་གྱི་འབུལ་བ་བྱས། དབང་ཁྲིད་རྫོགས་པར་གནང༌། གོ་ཤྲཱི་ལས་ཀ་དང་ཤེལ་ཐམ་ཟང་ཟིང་གི་གནང་སྦྱིན་བཅས་གདན་སར་བསྐོས།་་་་གོ་ཤྲཱི། ཆོས་དཔལ་གྲགས་པ་དང༌། ཚངས་གསར་རྡོ་བཅང་བ་་རྣམ་གཉིས་དཔེ་མེད་ཐུགས་མཐུན་པོ་བྱུང་ཅིང་སྒོམ་སྡེ་སྐུ་མཆེད་ཅེས་སྒར་ཆེན་དུ་ཟློ་བར་བྱུང༌། མཆན། ཆོས་སྐྱོང་སྐྱབས་ཀྱི་་་་ཁ་ངག་ལ། བེ་རི་ཆུང་ཤེས་ཀྱི་ཕ་མེས་བེ་རི་སེང་གེ་མི་ལོག་སྨད་ནས་དགེ་ལྡན་པ་འཁྲུགས་ནས་འདི་པའི་སྐུ་རིང་ལ་སྐུ་འབུམ་དགོན་དུ་ཕྱིན། བཀའ་ཁྱབ་བཟང་པོ་མཛད་ནས་རེ་འཛིའི་ས་གནང༌། ཁོ་རང་ཚོ་དེར་བསྡད་པ་ལ་སྐྱིད་པོ་བྱུང་སྟེ། ཁ་བཤད་ལ། ཞྭ་སེར་ཅན་གྱི་སྤྱུག་པ་ཡིན། བེར་སེང་ཅན་གྱི་བཀའ་དྲིན་ཡིན། ཟློ་བ་བྱུང་ཟེར། བེ་རིའང་ནང་ཆེན་པའི་བློན་པོ་དྲག་ཤོས་ཡིན། མཆན། སྲས་དཀར་བཟའ་ལ་འཁྲུངས་པ་ནི། ནམ་མཁའ་བཟང་པོ། ཆོས་སྐྱོང་བཟང་པོ། བསོད་ནམས་བཟང་པོ། བཀྲ་ཤིས་བཟང་པོ་དང་བཞི། ནམ་མཁའ་བཟང་པོ་ཡ་གསུམ་སྟོད་མའི་རྒྱལ་པོ་མཛད། ཆབ་སྲིད་མངའ་ཐང་ཆེར་རྒྱས། སྒོམ་སྡེ་ཡ་གསུམ་སྟོད་མར་གྲགས། གཏན་ཆགས་ས་སྟག་ལུང་ཕོ་མདོའི་ཡ་གསུམ་ཐང་ཡིན། ས་ཡི་ཆོད་མཚམས་ཡང་སྟོད་ནས་བྱང་ནམ་མཚོའི་སྲིབ་ཆེན་སྒེར། སྨད་ནས་ཤག་གི་སྦང་ངུ་ཟམ་ཁ་ཡིན། ནམ་མཁའ་བཟང་པོའི་སྲས་སེང་གེ་རྒྱལ་མཚན། སངས་རྒྱས་རྒྱལ་མཚན་གཉིས། དེ་ལས་སེང་གེ་རྒྱལ་མཚན་གྱིས་མངའ་འབངས་ཆོས་བཞིན་དུ་བསྐྱངས། སྒོམ་སྡེ་སྟོད་མ་སྲིད་འགྲན་ཟླ་བྲལ་བར་བྱུང༌། གོང་གི་བཀྲ་ཤིས་བཟང་པོའི་སྲས་་་་་ཧོར་མོས་སྲས་་་་་་་་གུར་མགོན་དང༌། རིན་མགོན་གཉིས། རིན་མགོན་གོ་ཤྲཱི་ཆོས་དཔལ་གྲགས་པ་ལས་རབ་བྱུང་མཛད༌། བརྒྱུད་པའི་གདམ་པ་མ་ལུས་གསན་བཞེས་མཛད། ནང་སོ་ཆེན་མོའི་ཁྲིར་བཞུགས་གུར་མགོན་གྱིས་སྐུ་འབུམ་དུ་སྡེ་སྲིད་བསྐྱངས། སྐུ་མཆེད་འདི་གཉིས་ཀྱི་རྒྱལ་དབང་བྱང་ཆུབ་རྡོ་རྗེ་སྤྱན་དྲངས། འབུལ་བ་དཔག་མེད་ཕུལ། གུར་མགོན་སྲས་གཉིས་ལས་བསོད་ནམས་དཔལ་ལྡན་ལ་གཽ་ཤྲཱིའི་ལས་ཀ་གནང། ཆོས་ཁྲིར་མངའ་གསོལ། ཀུན་དགའ་གྲགས་པའི་སྲས། ཀུན་དགའ་རྒྱལ་པོ༌། བསོད་ནམས་རྣམ་རྒྱལ༌། བསོད་ནམས་ཚེ་རིང་དང་གསུམ། བསོད་ནམས་རྣམ་རྒྱལ་ཞྭ་དམར་ཆོས་ཀྱི་དབང་ཕྱུག་གིས་རྗེས་སུ་བཟུང༌། ཀྭན་ཏིང་གོ་ཤྲཱིའི་ལས་ཀ་གནང་ཆོས་ཁྲིར་འཁོད། ཀུན་དགའ་རྒྱལ་པོའི་ཐུགས་དམ་ལ་གསེར་དངུལ་གྱི་འབུམ་རྒྱས་འབྲིང་བསྡུས་གསུམ་བཞེངས། དེ་སྲས་བློ་གྲོས་རྒྱལ་པོ་དང༌། ངོམ་བཟའ་མར་རབ་ལོ༼༡༠༽ས་ཕག་ལ་འཁྲུངས། གོ་ཤྲཱི་ཀརྨ་རབ་བརྟན་གཉིས་བྱོན།་་་་་་་་་ཆུ་ཡོས་ལ་འཁྲུངས། བློ་གྲོས་རྒྱལ་པོས་དགོན་གསར་འཛུག་བཅུ་གསུམ་ཙམ་གྱི་སྦྱིན་བདག་དང་མངའ་ཞབས་རྣམས་དགེ་བཅུའི་ཁྲིམས་ལ་བཀོད། འབྲི་གུང་ཞབས་དྲུང་སྤྱན་དྲངས། འབུལ་བ་དཔག་མེད་དང་དབང་ལུང་མང་དུ་ཞུས། ཐ་དད་ཀྱི་དགེ་འདུན་རྣམས་ལ་བསྙེན་བཀུར་དང་མཛོད་དང་བང་བ་ཐམས་ཅད་ཕྱོགས་མེད་དུ་འགྱེད། དབུས་སུ་ཕེབས་ཏེ་རྒྱལ་དབང་ཀརྨ་པ་ཆོས་དབྱིངས་རྡོ་རྗེ་ཡབ་སྲས་དང་ཇོ་ཤཱཀ་རྣམ་གཉིས་སོགས་ལྷ་བླ་མ་ཐམས་ཅད་མཇལ། རྗེ་བཙུན་ཆོས་ཀྱི་རྒྱལ་མཚན་ལ་ཆོས་འབྲེལ་ཞུས། སོ་ལྔ་དྲུག་ལ་གནམ་དུ་གཤེགས། ཀརྨ་རབ་བརྟན་ནི། འོག་མིན་ཀརྨ་ན་སི་ཏུ་ཆོས་ཀྱི་རྒྱལ་མཚན་དགེ་ལེགས་དཔལ་བཟང་པོའི་ཞབས་དྲུང་དུ་ཕེབས། མཆོད་པའི་ཡོ་བྱད་བསམ་གྱིས་མི་ཁྱབ་པ་ཕུལ། གོའི་ཤྲཱིའི་ལས་ཀ་དང་དབང་ཁྲིད་མང་དུ་གནང༌། རྒྱལ་སར་བཏོན། མཚན་ཡང་ཀེན་དེང་གུའི་ཤྲཱི་ཀརྨ་རབ་བརྟན་ལྷུན་གྲུབ་དཔལ་བཟང་པོ་ཞེས་དང༌། དངོས་པོ་གནང་སྦྱིན་རྒྱ་ཆེན་བསྩལ། བསྟན་པ་སྤྱི་དང༌། སྒོས་དྭགས་བརྒྱུད་ཀྱི་བསྟན་པ་སྤེལ་དགོས་པའི་བཀོད་ཁྱབ་དུ་མ་གནང༌། དེའི་དུས་སུ་གཏེར་སྟོན་འཇའ་ཚོན་སྙིང་པོའི་ལུང་བསྟན་ཨ་མའི་ལྐོགས་ཡིག་ལས། སྣང་ཞིག་ཞེས་པའི་སྟག་འཕྲུ་ཅན་དང་ནི༔ ཞང་བློན་ཁྲ་མོའི་སྤྲུལ་པ་བེ་ཞེས་དོན་ཡོད་གཉིས༔ ཡོན་མཆོད་སྡེབས་ནས་སངས་རྒྱས་བསྟན་པ་གཤིག །ཅེས་བདུད་ལུང་ནག་པོ་ཐེམ་མེད་ནས་བསྟན་པའི་སྨར་ཁམས་ནས། བེ་རུ་སྨད་མའི་བུ་བེ་རུ་དོན་ཡོད་དུ་གྲགས་པ་དང༌། བོན་རྙིང་མའི་བླ་མ་སྣང་ཞིག་ཟླ་བ་རྒྱལ་མཚན་ཞེས་པ་གཉིས་མཆོད་ཡོན་ཟུང་འབྲེལ་བྱས་ནས་ནང་བསྡེབས་ཏེ་ཆབ་མདོ། བྲག་ཡབ། སྡེ་དགེ་སོགས་མདོ་ཁམས་ཀྱི་ཡུལ་ལྗོངས་ཕལ་ཆེར་རྡོ་སྒྱོགས་ཀྱི་འཕྲུལ་འཁོར་བཅས་ནས་མངའ་འོག་ཏུ་བཙུད་པ་དང་ཡུལ་ནས་བཏོན། སྣང་ཞིག་བོན་པོའི་ངག་ལ་ཉན་ནས་སྤྱིར་སངས་རྒྱས་ཀྱི་བསྟན་པ་དང༌། དགོས་སུ་དགེ་ལྡན་པར་སྡང་ཚབ་ཆེ་བར་བྱས་ཤིང༌། བླ་དགེ་སུམ་བརྒྱ་ཟིན་པ་ཙམ་བཀྲོངས། བོད་ཁམས་ཡོངས་རྫོགས་བོན་རྙིང་མར་བསྒྱུར་རྒྱུའི་རེ་བ་བྱས་རྐྱེན་རེ་ཞིག་ཁམས་ཕྱོགས་ཀྱི་ཁྲིམས་སྲིད་ཉམས་ཏེ། སྡེ་ཤོག་རེ་ལ་དཔོན་ཕྲན་རེ། ལུང་ཆུང་རེ་ལ་ཚོ་རྒན་རེ། རི་འབུར་རེ་ལ་རྫོང་ཆུང་རེ། སྡེ་ལ་དཔོན་མེད། དཔོན་ལ་ཁྲིམས་མེད། ཚོ་ཆེན་གྱི་ཚོ་ཆུང་ཟ། ཤེད་ཡོད་ཀྱི་ཤེད་མེད་བརྡུང༌། རྫིའུས་ཁ་ཆེམ་འཇོག །ཆུ་ལེན་གྱི་དགྲ་ཆས་སྤྲད་དགོས་གྱུར་པའི་སྐབས། སྐུ་འབུམ་དགོན་དུ་བེ་རུའི་དམག་སླེབས། ཡུན་རིང་འཁྲུགས་ཤིང་མཐའ་མ་འཁྱོལ་བས་ས་བཙན་བཟུང་དགོས་བྱུང་སྐབས། སྔོན་གྱི་དུས་བླ་མ་འབའ་རོམ་པའི་ཡོན་བདག་ཙི་གླུ་མཁར་བ་ལ་བེ་རུའི་མི་ལོག་བྱུང་སྐབས། ཏི་ཤྲཱི་རས་པ་འཁྲུགས་པ་བཟླུམ་ལ་བྱོན་ནས་འཁྲུགས་པ་ཟླུམ། དེར་མ་འོངས་པ་ན་སྐོར་ཞིག་བེ་རུ་སླེབས་ཡོང་བས་ད་ལྟ་བཞིན་འཐབས་པས་མི་ཐུབ་པས་ཆུ་གསུམ་འདུས་པའི་མདོ་རུ་བྲོས། ཞེས་ལུང་བསྟན་པ་བཞིན་ལྕི་གསང་རྫོང་མགོར་སྒར་བཏབ། ཉིད་ཀྱང་སྟོད་ཕྱོགས་སུ་བྱོན་ཏེ་ལྷ་ལྡན་ཇོ་བོ་རིན་པོ་ཆེ་མཇལ། གཞན་ཡང་དབུས་ཕྱོགས་ཀྱི་རྟེན་བླ་མ་མང་དུ་མཇལ་ཞིང་བཞུགས། སླར་ཡང་རབ་ལོ་བཅུ་གཅིག་ཡོས་ཟླ་བ་ལྔ་པའི་ནང་བེ་རུའི་ཐོག་དཔུང་ཚོགས་རྣམས་བཏེགས་སྐབས། འབྲུག་མདོ་ཁམས་པའི་ཕྱག་མཛོད་གོ་འཇོ་གཉེར་རྒོད་མ་དང་བཀའ་བསྒྲོས་ཏེ་སོག་དམག་གི་སྣ་དྲངས། བེ་རུ་རྒྱལ་པོ་དམག་དཔོན་མི་བརྒྱ་རྟ་བརྒྱ་དང་བཅས་པ་ཡུ་མེད་དུ་བཏང་ཞིང༌། བསྟན་འཛིན་ཆོས་རྒྱལ་གྱིས་ནང་ཆེན་གནས་དྲུག་ཁྲི་སྐོར་གྱི་ས་སྡེ་སྔར་བཞག་སོར་གནས་དགོས་པའི་ཤེ་བམ་གནང་ཆ་དཔག་མེད་མཛད། སྐད་རིགས་མི་གཅིག་པའི་སྡེ་མང་པོ་མངའ་འོག་ཏུ་བསྡུས། ཆོས་སྲིད་ནམ་མཁའ་དང་མཉམས། འདི་ལྟར་གསུངས་ཏེ། སྔར་དྲུང་པ་སི་ཏུ་རིན་པོ་ཆེས། དཔོན་འདི་ལ་ཧུར་པོ་ཧུར་པོ་ཡོང་བའི་རིགས་སུ་འདུག་ཞེས་གསུངས་མྱོང་བ། བདག་གིས་དེང་སང་སྡིག་པ་འདི་ལྟ་བུ་བྱེད་པ་དེ་དགོངས་པ་རེད། ཞེས་གསུངས་པ་ཐོས་ལ་ཐུགས་དམ་ལ་མདོ་སྐལ་གཉིས་བཞེངས། ལུགས་གཉིས་ཀྱི་མཛད་པ་ནང་ཆེན་པའི་བླ་རབས་དང་རྒྱལ་རབས་ལ་འདི་སྟོབས་ཆེ་བར་གྲགས། དགུང་ལོ་ཞེ་ལྔ་ལ་གནམ་དུ་གཤེགས། དེའི་སྲས་བཀྲ་ཤིས་དར་མ་བསྟན་སྲུང་སྟེ། འཇིག་རྟེན་པའི་བྱ་བ་ཆེད་དུ་མི་བསྒྲུབ་དགེ་བའི་ཐུགས་དང་ལྡན། བློ་གྲོས་རྒྱལ་པོའི་སྲས་ནོར་བུ་སྟེ་དེའང་སྲིད་ཁྲི་འཛིན་པ་ནི། ཡབ་གཤེགས་དུས་དགུང་གྲངས་དགུ་སོན་པ་ཙམ་ཡིན་པས་ནང་ཆེན་ཨ་ཉོག་རྒྱལ་པོར་གྲགས། འདི་དུས་རྒྱལ་བ་ལྔ་པ་ཆེན་པོ་དང༌། སོག་རྒྱལ་གུ་ཤྲཱི་ཧན་མཆོད་ཡོན་གྱིས་བོད་དབང་བསྒྱུར་སྐབས་ཡིན་སྟབས། དབུས་སུ་མཇལ་བཅར་ཞུས་པའི་ཐོག་བདག་རྐྱེན་ལེགས་པོ་གནང་ཞིང༌། བློ་བཟང་དབང་གྲགས་ཞེས་པའི་མཚན་དང༌། བྱང་ཕྱོགས་དབང་བསྒྱུར་རྒྱལ་པོའི་སྐུ་ཞབས་ཞེས་པའི་ཆོ་ལོ་སྩལ། ཕོ་བྲང་པོ་ཏ་ལ་གསར་བཞེངས་ལ་སྲི་ཞུ་བསྟབ། རིས་མེད་ཀྱི་བསྟན་འཛིན་མཆོག་རྣམས་ལས་ཆོས་ཀྱི་བདུད་རྩི་བཞེས། ཁྱད་པར་འབྲི་གུང་པ་ལྷོ་དཀོན་མཆོག་ཕྲིན་ལས་རྣམ་རྒྱལ་དབུ་བླར་སྤྱན་དྲངས། མཚན་མི་དབང་རིན་ཆེན་རྣམ་རྒྱལ་དུ་གསོལ། ལྷོ་མི་གཡེལ་ཕུག་གི་གདན་ས་བཞེངས། གནམ་ཆོས་མི་འགྱུར་རྡོ་རྗེ། ཀརྨ་ཆགས་མེད་ལྷན་དུ་གསང་རྫོང་ནོར་བུ་ལྷ་རྩེརགདན་དྲངས་ཤིང་གཙུག་ཏུ་བཀུར། རིས་མེད་ཀྱི་བསྟན་དགོན་འཛིན་སྐྱོང་སྤེལ་བ་དང༌། མངའ་འབངས་བྱམས་བརྩེའི་བསྐྱངས་བ་སོགས། མདོར་ན་ཆོས་རྒྱལ་འདི་ཉིད་ལུགས་གཉིས་ཀྱི་མཛད་ཁྱབ་ཆེ་བར་མངོན། མཐར་དགུང་གྲངས་ཞེ་བདུན་ལ་སྐུ་གཤེགས་ཤིང་རྟེན་སྐུ་དང་རིང་བསྲེལ་ཚེམས་ལ་དུང་དཀར་སོགས་བྱོན། ཆོས་རྒྱལ་དེ་གཉིས་ཀྱིས་བེར་བཟའ་ཁབ་ཏུ་བཞེས་པའི་སྲས་དཀོན་མཆོག་རྒྱལ་པོ་ཞེས། ཆུང་ནས་ཐུགས་སྒམ་ཞིང་ལུགས་གཉིས་ཀྱི་སྤྱོད་བཟང་ཡ་རབ་དྲ་མའི་ཕུལ་དུ་སོན། ལང་ཚོ་དར་ལ་བབ་ནས་དཔའ་རྩལ་སྟོབས་ཤུགས་འགྲན་ཟླ་བྲལ་བར་གྱུར། དེའི་བཙུན་མོ་གཉིས་བླངས་པའི་ཆེན་མ་གསེར་བཟའ་ལ་སྲས་གཉིས་ཡོད་པའི་ཆེ་བ་ཚེ་དབང་ཕྲིན་ལས་མཐར་ཕྱིན། ཆུང་དཔལ་ལྡེའུ་བཙན་ཞེས་པ་དང༌། ཆུན་མ་ཚངས་གསར་ཀརྨ་ངང་དར་གྱི་སྲས་མོ་བསམ་ལུ་ཁབ་ཏུ་བཞེས་པའི་སྲས་རྡོ་རྗེ་ཚེ་དབང་དང་སྲས་མོ་གཅིག་འཁྲུངས། དེའི་དུས་སུ་རྒྱས་དམ་མེ་ཉག་ཟེར་བའི་སྡང་དགྲ་འདུལ་ཕྱིར་སོག་རྒྱལ་པོ་ཧན་གྱི་སྲས། བ་དུར་ཐ་ཇིས་གཙོས་བོད་སོག་གི་དམག་མདོ་སྨད་ཕྱོགས་སུ་བྱོན་གདོང༌། དཀོན་མཆོག་རྒྱལ་དང་སྡོམ་པ་འབུམ་ཚ། ཤེ་ཁེ་ནག་འཛི་སོགས་ཀྱི་གཙོས་དམག་དཔུང་བཅས་ཆས་ཏེ། བསྟན་དགྲ་ངོ་མ་ནང་ཆེན་དམག་གིས་བཏུལ་བའི་བདག་རྐྱེན་དུ་གཞུང་ས་རྩེ་ཤོད་བྱང་ཕྱོགས་རྒྱལ་པོར་བཅས་པས་བཀའ་རྟེན་འཇའ་ས་སྔར་ལས་ཁྱད་འཕགས་གནང་བ་བཅས་སྙན་གྲགས་ཤིན་ཏུ་རྒྱས། འོན་ཀྱང་གསང་རྫོང་དུ་མེ་དགྲའི་གནོད་པར་བརྟེན་སྐུ་ངོས་རྣམས་དང་ལས་ཟོག་རྟེན་གསུམ་ཤེ་བམ་སོགས་འགང་ཆེན་རིགས་ཁ་ཤས་ལས། རྫོང་དང་རྒྱུ་ནོར་ཐམས་ཅད་ཞུགས་ཀྱིས་ཟིན། མེ་ཡི་མ་གོས་པ་ཐུབ་པ་མེ་ཐུབ་མ། ཏྲེ་བོའི་ཁྲི་དམར། ཕྱག་རྔ་གསང་བ་ལྷ་འབོད། རྗེ་བཙུན་མི་ལའི་མགུར་འབུམ། གསེར་ཟའི་ཇོ་འཁོར་རྣམས་ལོ་རབས་ལྔ་བཅུ་པའི་སྐབས་སུའང་དངོས་སུ་མཇལ་རྒྱུ་ཡོད། དེ་ནས་རེ་ཞིག་སྦྲ་གུར་ལ་བསྟན་ནས་ཕྱིས་གཡེར་ཆེན་སྒར་དུ་གཏན་ཆགས་པས་ནང་ཆེན་སྒར་ཞེས་ཐོགས། དཀོན་མཆོག་རྒྱལ་པོའི་སྲས་ཚེ་དབང་མཐར་ཕྱིན། ཨོ་རོད་རྒྱལ་པོའི་སྲས་བསྟན་འཛིན་དྭའི་ཆིང་ཁོང་གི་མདུན་སར་ཕེབས། ཨུ་ཇིང་ཐེ་ཇི་ཆོ་ལོ་དང་འཇའ་ས་ཤེ་བམ་སྩལ་ནས་མདོ་སྟོད་ཡུལ་ཁམས་སྤྱིའི་རྗེ་བོར་ལུང་བབས། དེ་རྗེས་ལྷ་ལྡན་གཙོས་དབུས་ཕྱོགས་ཀྱི་རྟེན་མཇལ་བར་བྱོན། སྐྱབས་མགོན་སྐལ་བཟང་རྒྱ་མཚོ་དང༌། མི་དབང་བསོད་ནམས་སྟོབས་རྒྱལ། བཀའ་མདའ་རྩིས་དྲུང་སོགས་མཇལ། དངོས་པོའི་འབུལ་ནོད་གྱ་ནོམ་པ་བགྱིས། བློ་བཟང་དཔལ་འབར་གྱི་ཆོ་ལོ་དང་བཅས། ཤེལ་བམ་སྔ་ཕྱི་ལེ་ཚན་རྣམས་ཀྱི་རྒྱབ་གནོན་གནང༌། ཁམས་པ་ངག་དབང་ཀུན་དགའ་བསྟན་འཛིན་གྱིས་རྗེས་སུ་བཟུང་ཞིང་ཡང་ཟབ་ཚེས་བཅུའི་སྒྲུབ་ཆེན་གྱི་ཡོན་བདག་གཞི་ལེན་གྱི་གཡེར་ཆེན་སྒར་དང༌། རྫ་བ་རུ་བ་སྒར་སོགས་ལ་འཛུགས་པའི་མཐུན་སྦྱོར་མཛད་ཅིང༌། རྗེ་བླ་མས་རཏྣའི་གཏེར་བྱོན་གུ་རུའི་སྐུ་ཚབ། མཚན་བརྒྱད་ཞལ་ཐང་བརྒྱད་གུ་རུའི་རྣམ་ཐར་ཐང་སྐུ་དགུ་མནབ་བེར་སོགས་བསྩལ་ནས། མ་འོངས་པར་ཚེས་བཅུ་འཛུགས་པའི་ལུང་བསྟན་གནང༌། མཆེད་ཟླ་ཆུང་བ་རྡོ་རྗེ་ཚེ་དབང་སྲུང༌། རྒྱལ་རབས་བཅོ་བརྒྱད་ཀྱི་དུས་སུ་མཆིལ་སྐེ་ལ་སྒར་ས་བཏབ། གུ་རུས་དེ་སྐབས། བོད་ཡུལ་ཧོར་གྱི་དབང་དུ་བྱེད༔ ཅེས་ལུང་བསྟན་པ་ལྟར། སྔ་མ་སོག་པོས་བོད་ཀྱི་བདག་པོ་བྱས་པ་དང་ཧོར་དང་སོག་པོ་དོན་མཚུངས་པས། ལྷག་པར་སོག་མན་ཇུའི་རིགས་ཀྱི་རྒྱལ་པོ་ཤུན་རྩིས་རྒྱ་ནག་དང་སོགས་པོ་ཁ་ཇུ་ར་དུ་ཀར་སོགས། ཧོར་ཁ་ཐོ་གོར་གྱིས་མཚན་སོག་པོའི་ཡུལ་གླིང་ཐམས་ཅད་མངའ་འོག་ཏུ་བཙུད་ནས་ལོ་དགུ་ཙམ་ལོན་པ་ན། རང་ཅག་བོད་ཡུལ་པ་གསན་ཏེ། ཤུན་ཙིའི་སྲས་གཡུང་ཏྲིང་ཁྲི་ལོ་གཉིས་ཐོག་ཏུ་ཡུ་ནན་ཐི་ཐུའི་དམག་དང་མི་སྡེ་སྤྱི་ཁྱབ་ཀྱི་དཔོན་པོ། ཧོ་ཏཱ་ལོ་ཡན་དམག་ཁྲི་ཕྲག་བཅས་བཏང་ནས། སོག་པོའི་སྡེ་བོད་ཁམས་ཀྱི་སྐྱེ་བོ་སེམས་ཆུང་ལ་བསམ་པ་བཟང་བ་ཐམས་ཅད་མངའ་འོག་ཏུ་བསྡུས། སྙིང་དགྲ་ལ་ཞེ་ངན་པ་རྣམས་ཁྲིམས་ལ་སྦྱོར་གསུངས་པའི་ལུང་བབས་པས། ཟུར་ཆག་ཏུ་མཐིང་གདུག་དཱ་ལོ་ཡན་ཞེས་པ་ ་་་་རབ་ལོ་བཅུ་གཉིས་ནང༌། འབྲུག་ལོར་ཆབ་མདོར་བྱོན་ནས་མདོ་ཁམས་སྒང་དྲུག་གི་དགོན་ཚང་སྒེར་བཙན་ཐམས་ཅད་དེར་བསྡུས། ནང་ཆེན་རྒྱལ་པོ་རྡོ་རྗེ་ཚེ་དབང་ཤོག་གསུངས་པའི་ཀོ་ཀི་སླེབས་ཀྱང་ཟླ་བ་གསུམ་རིངས་མ་སོང༌། དེ་ནས་ཨ་ཤག་རྡོར་མགོན་དྲུང་འཁོར་མང་ཙམ་བཅས་བཏང་ནས། ཁོས་ལོ་རྒྱུས་ཀྱི་སྙན་སྒྲོན་ཞུས་ཤིང༌། རྒྱ་དཔོན་ནས་གཞན་དང་མི་འདྲ་བའི་གཟིགས་སྐྱོང་ཀྱིས་ཆིང་ཧུའི་མཚན་གསོལ་ཞིང༌། སྔོན་ཆོད་ལས་མ་གཡོས་པའི་ས་སྡེ་སོ་སོར་གནས་ཆོག་རྒྱུ་དང༌། བཀའ་རྟེན་ཤེ་བམ། དྭངས་ཤེལ་གྱི་ཏོག་བཅས་གནང༌། མངའ་འོག་གི་ཤོག་ཆེན་བཅོ་བརྒྱད། ཤོག་ཕྲན་བཅོ་ལྔ་གྲགས་པའི་དཔོན་པོ་རྣམས་ལ་བེ་ཧུ་དང་བེ་ཅང་གི་ཆོ་ལོ་ཏོག་དཀར་སེར་ཁེར་ཁེམ། སོ་སོའི་འཆང་རྒྱུ་ཁྲིམས་ཡིག་གོང་སྔོན་སྤར་མ་རེ་བཙལ་དཔྱ་ཁྲལ་སྔར་སོག་པོ་ལ་དགོས་པའི་རྟ་ནོར་ལུག་གསུམ་གྱི་མི་གྲངས་བཅས་མཚོ་སྔོན་པོའི་ཁ་ནས་འོང་བའི་སོག་སྡེ་ཆོས་འཁོར། རྡོ་རག་ཇུ་མུར་བ་ཡན་སོགས་མགོ་བཏགས། སོག་རུ་མའང་སྔར་བཞིན་གནས་དགོས་པའི་རྒྱབ་གནོན་བཙལ། དེར་མ་ཟད་དེམ་ཆུ་ཉེར་ལྔ། ཨ་ཁྲོ་ཚོ་བདུན། རྒྱ་སྡེ་ཁག་གསུམ། ཨ་རིག་བཅས་ཀྱི་སྤྱི་དཔོན་ལ་གང་བསྐོ་ཁྱོད་བོད་ཀྱི་དཔོན་པོ་རྣམས་གྲོས་གྱིས་གསུངས་པར། དཔོན་ཆེན་རྣམས་ཀྱི་སོ་སོ་ནས་འདུག་མོས་ཆེ་ཡང༌། ཨ་ཤག་རྡོར་མགོན་གྱིས་སྤྱི་རྗེ་ཉི་མའི་གོང་ཁེབས་ཀྱི་ཤེ་བམ་འཇའ་ས་དྲིལ་བསྒྲགས་བྱས་པས་སུས་ཀྱང་བྱ་ཐབས་བྲལ་ཞིང་མངའ་འོག་ཏུ་ཆུད། དེ་དག་གི་མིང་རག་ཙམ་སྨོས་ན། གྲཱའུ་མེར་རྒན་ཐཱ་ཇེ་བེ་ཧུ་ཅང༌། དགེ་རྒྱལ་སྨད་མ་བེ་ཧུ་ཅང༌། རོང་པོ་བེ་ཧུ་ཅང༌། རག་ཤུལ་བེ་ཧུ་ཅང་ཏེ་དཔོན་ཆེན་ཁག་བཞི། ཟུར་མང་བེ་ཧུ་ཅང༌། ར་སྡ་བེ་ཧུ་ཅང༌། བུ་ཆེན་བེ་ཧུ་ཅང༌། ཁྲི་འདུ་བེ་ཧུ་ཅང༌། ཞེའུ་བེ་ཧུ་ཅང༌། ཉ་མཚོ་བེ་ཧུ་ཅང༌། གུ་ཚ་བེ་ཧུ་ཅང༌། སུ་རུག་བེ་ཧུ་ཅང༌། འབྲོང་སྟོད་བེ་ཧུ་ཅང༌། འབྲོང་སྨད་བེ་ཧུ་ཅང༌། དགེ་རྒྱལ་སྟོད་མ་བེ་ཧུ་ཅང༌། བར་མ་བེ་ཧུ་ཅང༌། ཡག་ར་བེ་ཧུ་ཅང༌། བེ་རུ་ཆུང་ཤུལ་བེ་ཧུ་ཅང༌། ཡུལ་ཤོས་བེ་ཧུ་ཅང༌། ཆུ་ལེན་ཏོལ་ཏོའི་བེ་ཅང༌། དུམ་པ་བེ་ཅང༌། གྲྭའུ་ནན་ཤལ་བེ་ཅང༌། ཧར་ཤུལ་བེ་ཅང༌། རྒྱལ་བཟང་བེ་ཅང༌། དགེ་འདུས་བེ་ཅང་སོགས་དེམ་ཆུ་ཉེར་ལྔ། ཨ་འཁྲོ་བེ་ཧུ་ཅང༌། ཨ་ཡུང་བེ་ཅང༌། ཨ་ཤག་བེ་ཅང༌། རླེས་ཡུ་བེ་ཅང༌། ཡེ་རྒྱལ་བེ་ཅང༌། ལྷ་རྩེ་བེ་ཅང༌། བསྟན་པ་བེ་ཅང་བཅས་ཨ་འཁྲོ་ཚོ་བདུན། མོང་གོ་ཇིན་བེ་ཧུ་ཅང༌། ཡང་ཤར་བེ་ཧུ། ཁང་ན་བེ་ཅང་བཅས་རྒྱ་སྡེ་ཁག་གསུམ། ཁྱོན་སྡོམ་ཚོ་པ་སུམ་ཅུ་སོ་ལྔ་ཞེས་གྲགས། སྔར་ཡང་ཤར་ཁ་ན་གཅིག་ཏུ་བགྲངས་ཤིང༌། ཨ་རིག་བརྩིས་པའི་རྒྱ་སྡེ་ཁག་གསུམ་ཟེར་སྐད་ལ། ཕྱིས་ཨ་རིག་ཟི་ལིང་གི་ཉེ་སར་ཡོད་ཅིང་ས་ཐག་རིང་བས་བདག་མ་ཐོབ་ཀྱང༌། ཁོང་ཚོས་ངེད་ནང་ཆེན་རྡོ་རྗེ་ཚེ་དབང་གི་མངའ་འོག་ཡིན་ཟེར་སྐད་ཐོས་སོ། །དེའང་ཉི་ཤུ་རྩ་ལྔའི་ཤོག་ནས་ལབ་དང་སྐྱོ་བྲག་གོང་མའི་སྐུ་རིམ་དགོན་ཡིན་པས་བརྩི་རྒྱུ་མེད་པ་དང༌། ཤོག་ཆེན་བཅོ་བརྒྱད་ཀྱི་བེ་ཧུ་ཁག་བཞི་དང༌། བེ་ཅང་ཉེར་ལྔའི་གྲྭར་ཚངས་གསར་དང༌། རྟ་རྣ་བ་གཉིས་བརྩི་རྒྱུ་མེད་པ་ཆིང་ཇ་གོ་ཆེ་ཚྭོ་དཱ་ལོ་ཡན་ནས་བཅད་པ་རེད། ས་མུ་ཆོད་མཚམས་ནི་ཉེར་ལྔའི་ས་མཚམས་ཤར་ནས་འདན་ཁྲ་བོ་ལ། ལྷོ་ནས་ཇོ་ལ་བརྩས་ནག་པོ། ནུབ་ནས་སོག་ཕ་ཝང་གཡང་འཛོམ། བྱང་ནས་མཚོ་སྔོན་པོ་ཚུན་ཡིན། རི་ཆེ་ནང་ཆེན་ས་མཚམས་འཛི་གཡག་ནག་འཕྲང༌། དཔག་ཤོད་ས་མཚམས་ལྕགས་ཟམ་ཁ། རག་ཤུལ་ནང་ཆེན་ས་མཚམས་རྩི་ཆུ། ཟུར་མང་ནང་ཆེན་ས་མཚམས་རྡོ་དགོན། དགེ་རྒྱས་ཆུ་མིག་མར་ཁུ་བཅས་ཡིན། སྤྱིར་མི་དབང་རྡོ་རྗེ་ཚེ་དབང་འདི་ཉིད་སྨྲ་བ་ཉུང་ཞིང་བརྗིད་ཆེ་བ། ཐུགས་ཟབ་བརླིངས་གཏིང་མི་དཔོག་པར་བཞུགས། མཛད་ཚུལ་ལའང་ཁྱམས་གཤིས་བྲིས་མཁན་བརྒྱ་ནས་བཀའ་འགྱུར་དངུལ་བྲིས་དང་བསྟན་འགྱུར། མཁས་གྲུབ་བླ་མ་མང་པོའི་གསུངས་སོགས་པོ་སྟི་འབུམ་ཕྲག་ལྷག་ཙམ་བཞེངས། གཅེན་པོ་ཐའི་ཇིའི་གསེར་སྡོང༌། ཙན་དན་གྱི་གུ་རུ་མཚན་བརྒྱད། རྩ་བའི་བླ་མ་ལྷོ་རིན་པོ་ཆེའི་འཁྲུངས་རབས། གསེར་ཟངས་གནས་བརྟན་བཅུ་དྲུག །ཚེ་དཔག་སྣང་བརྙན་བརྒྱ་ཕྲག །བདེ་གཤེགས་སོ་ལྔ་སོགས་རྟེན་བཞེངས་མཐའ་ཡས། གོང་མའི་ཕྲིན་ལས་པ་ཟི་ལིང་རྡོ་རྒན་ཨམྦྷན་ནས་ཡང་བསྐྱར་དུ་ནང་ཆེན་ཆིང་ཧུ་རྡོ་རྗེ་ཚེ་དབང་ཞེས་བོད་སྐྱོང་མདོ་ཁམས་ཆོལ་ཁའི་རྗེ་བོར་དྲིལ་བསྒྲགས་མཛད་པས་སྟོབས་དཔལ་ཆེར་རྒྱས། དེའི་བཙུན་མོ་གདོང་བཟའཆེ་ཆུང་གཉིས་བསུས་པར་སྲས་གསུམ་བྱུང་བར་གྲགས། སྲས་ཆེ་བ་དཀོན་མཆོག་དཔལ་འབྱོར་ཚེ་བརྟན་ཞེས་དགུང་ལོ་བཅུ་དྲུག་ནས་ཁྲིམས་སྲིད་འཛིན། ཤར་ཕྱོགས་གོང་མ་ཆེན་པོའི་ལུང་གི་ཆིང་ཧུ་དཀོན་མཆོག་དཔལ་འབྱོར་ཝང་ཚེ་བརྟན་ཞེས་པའི་མཚན་དང་ཤེས་འཕྲུ་བཅས་གནང་ཞིང་བཀུར་བཟོས་མཐོ་བར་བསྔགས། སྒམ་པོ་པ་བཟང་པོ་རྡོ་རྗེ། འབྲུག་པ་མི་ཕམ་ཕྲིན་ལས་ཤིང་རྟ་རྣམས་སྤྱན་དྲངས་ཤིང་བསྙེན་བཀུར་དཔེ་མེད་མཛད། ཡུལ་སྡེ་བྱམས་པས་སྐྱོང་བ་སོགས་ལུགས་གཉིས་དགེ་བར་བསྐྱང༌། དེ་སྲས་རག་བཟའ་ལ་སྲས་གསུམ་བྱུང་བའི་ཆེ་བ་དོན་གྲུབ་ཚེ་བརྟན་དགུང་གྲངས་བཅུ་གསུམ་དུ་ཟི་ལིང་ཨཾ་བྷན་མཇལ་དུ་བྱོན། ཆིང་ཧུ་དོན་གྲུབ་ཚེ་བརྟན་ཞེས་ཏོག་ཁེར་གམ་སྩལ། རྒྱ་དང་གོརྵ་འཁྲུགས་སྐབས་གོང་མའི་ལས་དོན་རྒྱ་ཆེར་འགྲུབ། དེའི་སྲས་དགེ་རྒྱལ་བེ་རིའི་དཔོན་མོ་ལ་འཁྲུངས་པ་བསོད་ནམས་ཆོས་འཕེལ་ཞེས་ཆུང་ནས་ཆོས་ལ་ཐུགས་གཞོལ། དབུས་སུ་རྒྱལ་བ་ལུང་རྟོགས་རྒྱ་མཚོ་མཇལ། འཇའ་ས་ཤེ་བམ་བསྩལ་ཅིང་སྣེ་ལེན་བཟང་པོ་མཛད། གོང་མའི་ཕྱིང་སང་ཇ་གོ་ཆེ་ནང་སྒར་དུ་བྱོན་ཏེ་ཏོག་ཁེལ་གམ་བཅས་གོ་གནས་ཕུལ། མངའ་འབངས་དགེ་བཅུའི་ཁྲིམས་ལ་བཀོད། དེའི་སྲས་གྲྭའུ་དཔོན་མོར་འཁྲུངས་པ་མི་དབང་དཀོན་མཆོག་ལྷ་རྒྱལ་ཞེས་ཐུགས་རྗེ་ཆེན་པོའི་སྤྲུལ་པར་གྲགས་ཤིང་ཡིག་དྲུག་དུང་ཕྱུར་ལྔ་སོགས་བཟླས་པ་གྲངས་མང་ཐེམས། རྒྱལ་ཁམས་རི་རྒྱ་ཀླུང་རྒྱ་བསྡམས། ཞི་དྲག་གི་སྒོ་ནས་བདེ་འཇག་མཛད། འདིའི་གཅེན་པོ་འཁྲུལ་ཞིག་མཆོག་སྤྲུལ་དང༌། གཅུང་ཨ་ལྡེའུ་སྤྲུལ་པ་ཆོས་རྒྱལ་དོན་འགྲུབ་ལྷ་རྒྱལ་བཅས་བྱོན་ཞིང་ཚེས་བཅུ་དགོན་དབུ་ཡི་མཆོད་གནས་སུ་གྱུར། འདིའི་རྒྱ་རབས་གོང་མ་རྣམས་ཀྱི་དུས་དབུ་བླ་ཁག་བཞི་ཞེས་བྱུང་བའང༌། ལྷོ་དཀོན་མཆོག་ཕྲིན་ལས་རྣམ་རྒྱལ། མགར་བསྟན་འཛིན་ཕུན་ཚོགས། འཁྲུལ་ཞིག་ཕྲིན་ལས་རྒྱ་མཚོ། བྱམས་མེ་ཀརྨ་བསམ་གཏན་བཅས་ལ་དགོན་སྡེ་རེ་བྱུང་བའི་སྐྱེ་ཕྲེང་རིམ་བྱོན་དབུ་བླར་ཕེབས་ཤིང༌། སླར་འདི་ཉིད་ཀྱི་དབུ་བླར་གྲུབ་དབང་ཚོགས་གཉིས་རིན་པོ་ཆེ་བྱོན། འདི་པའི་སྐུ་ཚེའི་སྟོད་ཆར་རྫ་དཀར་མོ་སྙིང་ཐང་སུ་ཆིང་ཇར་གོ་ཆེ་ཏྭ་དྭ་ལོ་ཡན། ཙང་ཡན་ཚོ་དྭ་ཡན། སྲི་ཀོ་ཡན། བློ་བཟང་ལོ་ཙཱ་བཅས་བབས་ནས། དེམ་ཆི་ཉེར་ལྔ། ཨ་ཁྲོ་ཚོ་བདུན། རྒྱ་སྡེ་ཁག་གསུམ་བཅས་ཚོ་ཁག་སོ་ལྔ། ནང་ཆེན་ཆིང་ཧུ་བེ་ཧུ་བཅས་ཆོལ་སྒར་བསྡུས་ནས་ཚོགས་འདུ་ཞིབ་རྒྱས་སུ་གནང༌། དེ་ལྟའི་མི་དབང་དཀོན་མཆོག་ལྷ་རྒྱལ་གྱི་སྲས་གུ་ཚའི་དཔོན་མོར་འཁྲུངས་པ་ཆིང་ཧུ་དབང་དྲག་ཚེ་རིང་ལྷ་རྒྱལ་དུ་འབོད་པ་བྱོན། འདི་པའི་སྐུ་ཚེ་རིལ་པོར་ཆོས་ལ་ནན་ཏན་མཛད་ནས་བཞུགས་པ་ལས། སྐུ་ཚེའི་སྨད་ལ་སྒོམ་སྡེ་ཉམས་སད་པའི་ཚོད་དཔག་ཀྱིས་དེབ་ཅི་ཉེར་ལྔའི་ས་ཁུལ་ལེན་རྩིས་ཀྱིས་བོད་གཞུང་གིས་དྲག་པོའི་དཔུང་འཇུག་རབ་རྒྱལ་ཆུ་སྤྲེལ་ལོར་བྱས་ཏེ་སྐྱེ་རྒུ་མདོ་བར་བཀབ་ཀྱང༌། སླར་ཟི་དམག་བསྐུལ་རྐྱེན་བོད་དམག་ཕམ་ཉེས་གྱུར་ནས་སླར་ལོག །རྒྱལ་པོ་འདི་ཉིད་བཞུགས་ཚུལ་མཁས་པས་གནོད་སྐྱོན་མ་བྱུང་བ་ཞེས་ཐུགས་སྒམ་པའི་ཚད་དུ་སོན། ཐུགས་སྙིང་རྗེ་ཆེ་བས་ཆུ་བྱ་ངང་པ་སོགས་ཀྱིས་ཁྲིམས་ཞུས་བྱུང་བར་གྲགས། སྐུ་མཆེད་གྲུབ་དབང་ཚོགས་གཉིས་མཁས་བཙུན་བཟང་པོའི་རྣམ་ཐར་འཛིན་ཞིང་ཚེས་བཅུ་དགོན་དུ་གཙུག་ལག་གསར་བསྐྲུན་མཛད། རྒྱལ་པོ་འདིའི་སྲས་ར་ཟླ་གཟར་བཀྲ་ཤིས་ཚེ་དབང་རྡོ་རྗེ་རབ་ཚེས་ལྕགས་ཕག་ལོར་སྐུ་འཁྲུངས། མཆེད་ཚངས་དབྱངས་མཆོག་སྤྲུལ། ལྷོ་ཆགས་མེད། ལྕམ་སྲིང་རྣམ་སྲས་དབང་མོ་རྣམས་བྱུང་ཉིད་སྐུ་ཆུང་ངུ་ནས་འཇམ་དབྱངས་བསྙེན་པ་དུང་ཕྱུར་གསུམ་འགྲུབ། བཙུན་མོ་སྡེ་དགེའི་སྲས་མོ་གཡུ་སྒྲོན་གྱིས་སྒྲོལ་མ་ཉེར་གཅིག་གིས་རྟེན་བརྟེན་པ་བཞེངས། སྲས་སྐུ་མཆེད་གསུམ། ལྕམ་སྲིང་གཉིས་བྱོན། ཡབ་རྒྱལ་རྒན་རབ་རྒྱལ་ས་སྤྲེལ་ལ་གཤེགས། འཕྲོས་ཡུམ་སྲས་རྣམས་ཞལ་འཛོམ་དགེ་བར་བཞུགས་སོ། ། སྤྱི་དོན་གསུམ་པ་དོན་རྒྱུད་བྱེ་བྲག་ཏུ་གྱུར་པའི་གསེར་ཕྲེང་གིས་ཟུར་རྒྱན་པ་ལ་དགོན་རི་ཁག་བཅོ་བརྒྱད་སོགས་བཤད་པ་དང་པོ་ཉིན་དགོན་པ་ནི། དེའང་གསང་བ་ལུས་མེད་རྡོ་རྗེའི་སློབ་ཆེན་དབང་དང་རབ་གནས་ཀྱི་བཀའ་བབས་རྒྱལ་སྲས་ལྷ་པ་ཚུལ་ཁྲིམས་སེང་གེ་ནི། སྐུ་འཁྲུངས་ཡུལ་ཟླ་བརྒྱུད་ཀྱེ་ཡེ་རུས་ཆེན་སྨུག་པོ་གདོང༌། གདོང་ལ་རིགས་བཞི་ལས་འཛོད་དུ་ཉ་ཡག །ཡབ་རྡོ་རྗེ་རྒྱལ་པོའི་སྲས་སུ་འཁྲུངས། སྤྱན་སྔ་ལུས་མེད་རྡོ་རྗེ་ཀྱེ་ལ་ཁར་ཕེབས་སྐབས་མཇལ་བས། ལྷ་རྗེ་ཁྱོད་ཐུགས་རབ་ཆེ་བས་ང་ཡི་ཆགས་ཕྱི་བ་གྱིས་གསུངས་པས་དད་པ་སྐྱེས། རིན་པོ་ཆེའི་དབུ་མཛད་མཁན་སློབ་གྲངས་ཚང་བའི་དབུས་་རབ་བྱུང་བསྙེན་པར་རྫོགས། མཚན་ཚུལ་ཁྲིམས་སེང་གེ་དགྱེས་རྡོར་གྱི་དབང་ཞུས་སྐབས་གསང་མཚན་བདེ་བའི་རྡོ་རྗེར་གསོལ། སངས་རྒྱས་རས་ཆེན་ནས་བརྒྱུད་པའི་ཆོས་དྲུག་ཕྱག་ཆེན་རྣམས་ཉམས་འོག་ཏུ་ཆུད་པར་མཛད། དབུས་སུ་བྱོན་ནས་རྔོག་དང་ཤངས་པའི་བཀའ་བརྒྱུད་རྣམས་ལ་གཏུག་ཅིང་རྒྱུད་སྡེ་ནི་གུ་ཆོས་དྲུག་སོགས་གསན། རྟོགས་ལྡན་རྣལ་འབྱོར་རས་ཆུང་སོགས་དབུས་གཙང་བླ་མ་རྣམས་ལས་སྦྱོར་དྲུག་ལམ་འབྲས་རྫོགས་ཆེན་རྣམས་ཞུས་ནས་ཉམས་རྟོགས་དཔེ་མེད་པ་འཁྲུངས། སྐུ་འབུམ་དུ་ཕྱི་རྟེན་ཇོ་སྐུ། ནང་རྟེན་གསེར་འབུམ་ལྷ་ལུང་འབུམ་ཆུངསོགས་བཞེངས་པའི་བདག་རྐྱེན་མཛད། ལྷ་བྲིས་སྐབས་ཡེ་ཤེས་མཁའ་འགྲོས་མཚལ་ཕུལ། དབོན་བྱང་གཞོན་པ་ནང་སོ་ཆེན་མོའི་ཁྲི་བཀོད་མཛད། གྲུབ་ཐོབ་གླིང་རས་པའི་སྤྲུལ་པར་གྲགས། ཉིན་དགོན། ཀིལ་སྣ། རྡོ་གོང༌། ཡེ་གང༌། སྟག་རྩེ། མངྒའི་ཕུག་ལྷ་བཟང༌། ཀོ་མཛོ་བྲག་སོགས་ལ་རི་འགྲིམས་མཛད། འབྲི་ཟླ་བར་གྱི་འགྲོ་རྣམས་སྨིན་གྲོལ་ལ་བཀོད། བདུན་ཅུ་དོན་བདུན་ལ་ཉིན་དགོན་དུ་སྐུ་གཤེགས་གདུང་རིང་བསྲེལ་གྱི་ཕུང་པོར་གྱུར། སློབ་མ་དབོན་ཚུལ་ཡེ་བ། ཚུལ་བྱང་བ་བྱ་བྲལ་ཡེ་ཤེས་གྲགས། གྲུབ་ཐོབ་སྔོན་པོ་རས་པ་ཐུགས་རྗེ་སྐྱབས་སོགས་མང་པོ་བྱོན། གདན་ས་བ་ནི་བྱ་བྲལ་ཡེ་ཤེས་གྲགས་ཡིན། ཚུལ་བྱང་བ་ཡང་དེར་བཞུགས་ཤིང་གདན་ས་མཛད། དེ་རྗེས་ཧོར་བླ་མ་སོགས་རིམ་པར་བྱོན་རྗེས་ཤོར་ཕུ་དང་ཉ་ཡག་གཉིས་སྤོ་ལན་མཛད་པར་སྣང༌། ཤོར་སྟོད་ཀ་ཡེ་ཁར་ཉ་ཡག་ཡུལ་དགོན་བཏབ་ཅིང་ཤོར་ཕུ་ཉིན་དགོན་དུ་གཏན་ཆགས་པར་གདའ། གང་ལྟར་ཉ་ཡག་དགོན་དུ་བསྟན་དགོན་འཛིན་སྐྱོང་ཆད་མེད་བྱོན་ཀྱང་གསལ་ཆ་མ་འཚལ་རུང༌། ཕྱིས་སུ་འཇམ་སྤྲུལ་ཉི་སྤྲུལ་ཞེས་པ་བྱུང་ཞིང་ཆོས་ལུགས་ས་སྐྱ་པར་འགྱུར་བ་མ་གཏོགས་ཡུལ་འབྲོག་གཉིས་སུ་དགོན་པ་ད་ལྟ་བར་ཡོད་པ་སྟེ་ཉིན་དགོན་པའི་སྐབས་སོ། ། གཉིས་པ་རྒོད་ཚང་པ་ནི། དེའང་གསང་བ་ལུས་མེད་རྡོ་རྗེའི་སློབ་ཆེན་ཕྱག་རྒྱ་ཆེན་པོའི་བཀའ་བབས་དངུལ་རྫོང་པ་ཤཱཀྱ་རྡོ་རྗེ་སྟེ། གདུང་རཀྴི་ཡིན་ཞིང་མཁས་པ་བྱུང་ཆུབ་རྡོ་རྗེ་མོང་སེ་ར་སྣར་བཞུགས་པའི་དྲུང་དུ་ཕེབས་ནས་ཆོས་ཕྱི་ནང་གསང་གསུམ་མང་དུ་ཞུས། ཁྱད་པར་དུ་ལུས་མེད་རྡོ་རྗེའི་སྙན་པ་ཐོས་ནས་སྐུ་འབུམ་དགོན་དུ་ལུས་མེད་རྡོ་རྗེ་དང་མཇལ་རབ་བྱུང་མཛད། མཚན་ཤཱཀྱ་རྡོ་རྗེར་གསོལ། དབང་དང་གདམས་པ་ཐམས་ཅད་རྫོགས་པར་ཞུས་ནས་དེ་ཉིད་དུ་འཇག་སྤྱིལ་མཛད་དེ་བསྒོམས་པས་ཉིན་མཚན་དབྱེར་མེད་ཀྱི་རྟོགས་པ་འཁྲུངས། ཕྱག་རྒྱ་ཆེན་པོའི་བཀའ་བབས་སུ་གྲགས། དེ་ནས་བདག་བཟུང་ཅན་གྱི་དགོན་པ་མ་བརྩེགས་ནས་ཁྲ་ཐེར་ལ་བརྟེན་ནས་རི་ཁྲོད་འགྲིམ་པའི་དམ་བཅའ་ཕུལ་ནས་བྱོན། འབྲི་ཟླ་བར་གྱི་འབྲོག་པ་དང་སྒ་པའི་སྟོད་རྣམས་སུ་ངེས་མེད་དུ་འགྲོ་དོན་མཛད་ཅིང་གདུལ་བྱ་བསྐྱངས། མཐར་དོན་བདུན་ལ་སྒ་སྟོད་དུ་སྐུ་གཤེགས་ཞུགས་སུ་ཕུལ་བས་རིང་བསྲེལ་ཁ་དོག་ལྔ་བྱོན་ཟླ་གཅིག་ཙམ་དུ་འཇའ་དང་མེ་ཏོག་གི་ཆར་བབས། སློབ་ཚོགས་མཐའ་ཡས་ཀྱང་དེར་བཞུགས་དབོན་ཚུལ་ཁྲིམས་རྒྱལ་མཚན་ཏེ། དབྱི་ལུང་དང་འདམ་ལུང་གཉིསཀྱི་བར་རྒོད་ཚང་ཁ་བྱ་བར་སྒར་པ་བཞུགས་ནས་བསྒྲུབ་པ་དང་འགྲོ་དོན་མཛད་པས་མིང་རྒོད་ཚང་པར་གྲགས། ཕྱིས་སུ་སྒོམ་སྡེའི་གདན་དྲངས་ནས་ལྷ་དོག་ཟླ་ནང་སོགས་འགྲོ་དོན་ཆེར་རྒྱས། མཐར་རྒོད་ཚང་ཁར་སྐུ་གཤེགས། སློབ་མ་ཀུན་དགའ་བློ་གྲོས་སོགས་མང་དུ་བྱོན། གདན་ས་བ་ནི་དབོན་ཡོན་ཏན་བཟང་པོ་དང་ཀུན་དགའ་བཟང་པོས་མཛད་ཅིང་དབོན་བརྒྱུད་ནི་ཚུལ་ཁྲིམས་བཟང་པོ་སོགས་ཀྱི་རིམ་པར་གདན་ས་བསྐྱངས་ནས་ཕྱིས་ཀྱི་བར་ཙམ་ཡོད་པར་སྣང་བ་སྟེ། རྒོད་ཚང་པའི་སྐབས་སོ། ། གསུམ་པ་བེའུ་རུ་བ་ནི། འགྲོ་མགོན་ཏི་ཤྲཱི་རས་པའི་ཞབས་ཟིན། ཚ་རོང་བ་ཤེས་རབ་རྡོ་རྗེ་ཞེས། གདུང་བམ་རི་གཟི་པ། ཡབ་བེའུ་རུ་ཆོས་གྲགས་ཀྱི་སྲས་སུ་མདོ་སྨད་ཀྱི་ཕ་བོང་གུར་དཀར་ཞེས་པར་སྐུ་འཁྲུངས་པས་གུར་དཀར་བར་གྲགས། སྐུ་ཆུང་ནས་ཏི་རས་ཀྱི་སྤྱན་སྔ་བ་མཛད། རབ་ཏུ་བྱུང་བའི་མཚན་ཤེས་རབ་རྡོ་རྗེར་གསོལ། ཆོས་ཕྱི་ནང་གསང་གསུམ་གྱི་སྒྲོ་འདོགས་ཆོད་པར་མཛད། རས་གུར་གཉིས་ཟེར་བའི་མཚན་མཉམ་པོར་འདྲེན་པ་བྱུང་རུང༌། ཕྱིས་་སུ་དམུ་ཆུའི་བསྙུང་གཞི་དྲག་པོར་བྱུང་བར་ཁམས་གཞི་ཡིན་དགོངས་ནས་དབུས་གཙང་དུ་འབྱོན་པའི་ལམ་མགོ་རུའི་ཁེ་ནང་དུ་བྱོན་ནས་བཞུགས་པར་རས་པ་དཀར་པོས་བཤོལ་མཛད་པས། ངའི་ནད་འདི་བླ་མ་སྤྲུལ་པའི་སྐུ་དེ་མ་བཞུགས་ཕྱིན་འདི་ཕྱོགས་ལ་སེལ་ནུས་པ་ནི་མེད། དེ་ལན་རེ་ཞིག་དབུས་གཙང་དུ་སེལ་ནུས་པ་ཡོད་དམ་སྙམ་ནས་འགྲོ་བ་ཡིན་གསུངས་པས། རས་དཀར་བས་བླ་མ་རིན་པོ་ཆེ་མི་བཞུགས་ཀྱང་གདམས་པ་ཟབ་མོ་དེ་དག་བདག་ལ་བདོག་པས་འདི་སེལ་བ་ལ་དཀའ་བ་མི་འོང་གསུངས་ནས་སྟན་དཀར་པོ་གཅིག་གི་སྟེང་དུ་བཞུགས་སུ་བཅོལ་ནས། རྟེན་འབྲེལ་དང་བྱིན་རླབས་མང་དུ་མཛད་ཅིང་འཁྲུལ་འཁོར་དམིགས་པ་བསྟན་ནས་འཁྲུལ་འཁོར་མཛད་པས་དམུ་ཆུའི་ནད་ཐམས་ཅད་བ་སྤུའི་བུ་ག་ནས་སྔོ་ཆིལ་ཆིལ་ཐོན་ནས་དེ་ཉིད་དུ་སྙུན་ལས་གྲོལ། དེ་ནས་སྐུ་འབུམ་རྩར་ཕེབས་ནས་མཆེད་གྲོགས་ལ་དད་པ་དཔག་མེད་འཁྲུངས་ནས་སླར་གདམས་ངག་ཐམས་ཅད་ལ་དཔྱིས་ཕྱིན་པར་མཛད་དེ་རྩ་བའི་བླ་མར་འཛིན་ཅིང་བསྙེན། གྲུབ་པ་བརྙེས་ནས་གདན་ས་དེ་རང་དུ་གཤེགས། སློབ་བརྒྱུད་དབོན་ཨ་རོམ་སངས་རྒྱས་ཡེ་ཤེས་ཞེས་པ་ཉིད་བེའུ་རི་དཀར་ལྕོགས་གི་རི་ཁྲོད་དུ་བསྒྲུབ་པ་མཛད་ཅིང་ཚོགས་བདག་དངོས་སུ་གྲུབ། དབོན་བརྒྱུད་ཤེས་རབ་གྲུབ་དང༌། རིན་ཆེན་ཀླུ་སོགས་བྱོན་པ་སྟེ། དེ་དག་རྩོད་མེད་ཀྱི་སྔགས་པ་ནུས་པ་ལ་དབང་ཐོབ་པ་ཡིན་ལ་དེ་ནས་རིམ་པར་བརྒྱུད་པ་ལ་ནང་ཆེན་པའི་སྔགས་པར་གྲགས་ཤིང༌། ཕྱིས་ཡུག་གི་བེའུ་རུ་དགོན་དང༌། དཔལ་ཁའི་བླ་ཆེ་ཆུང་ཞེས་པ་ས་སྐྱ་པར་གྱུར་པ་འདི་རྣམས་དང༌། བེའུ་རུའི་དབོན་པོ་ཡང་ད་བར་ཡོད་སྐད་བཅས་བེའུ་རུའི་བའི་སྐབས་སོ། ། བཞི་པ་དགོན་སར་བ་ནི། མཁས་པ་བྱང་ཆུབ་རྡོ་རྗེ་ཞེས་ཆོས་རྗེ་རས་པ་དཀར་པོའི་མདུན་དུ་རབ་ཏུ་བྱུང༌། མཚན་བྱང་ཆུབ་རྡོ་རྗེ་གསོལ། སངས་རྒྱས་རས་ཆེན་ནས་བརྒྱུད་པའི་གདམས་སྐོར་ཆོས་སྤྱི་དང་བྱེ་བྲག་མ་ལུས་པ་ཐུགས་སུ་ཆུད་པས་མཁས་པའི་སྙན་པ་ཐོབ། སྒྲུབ་པ་རྩེ་གཅིག་ཏུ་མཛད་པས་ཡོན་ཏན་གྱི་སྒོ་དུ་མ་དང་ལྡན་ཞིང༌། དུས་རེས་ཞིག་གི་ཚེ་མཛེ་ཕོ་བཅུ་གསུམ་ཁྲིད་ནས་ཀེ་མཛོ་རྡོ་རྗེ་ཐོག་འབེབས་ཀྱི་མགོར་བྱོན་ནས་བཞུགས་པ་ལ། ནུབ་གཅིག་རས་པ་དཀར་པོ་ཨང་རག་གྱོན་པ་གཅིག་གིས་སྣ་དྲངས་པའི་མི་མ་ཡིན་མང་པོ་ནམ་མཁའ་ལས་བྱུང་ནས་ཆོ་འཕྲུལ་སྣ་ཚོགས་བསྟན་ཅིང་ཐོག་དང་སེར་བ་ཆེན་པོ་ཕབ་པས་མཛེ་ཕོ་གཅིག་མལ་དུ་བསད། བཅུ་གཉིས་པོ་དེ་ཉིད་དུ་ཕན་པར་གྱུར། དེ་ནས་མོན་སེར་སྣར་བྱ་བར་དགོན་པ་བཏབ་ཅིང་འགྲོ་དོན་རྒྱ་ཆེར་བྱུང༌། མགོན་པོ་ཕྱག་བཞི་པ་དངོས་སུ་འགྲུབ། དེའང་མཁས་གྲུབ་ཆེན་པོ་བྱང་དཔལ་བྱང་རྡོར་གཉིས་ཟེར་ནས་ལུས་མེད་རྡོ་རྗེ་དང་མཚན་མཉམ་དུ་འབོད་པ་བྱུང༌། སློབ་ཚོགས་ནི་སྣག་དབོན་ཤཱཀྱ་ཡེ་ཤེས་སྐུ་མཆེད་རྣམས་ཡིན་ཞིང༌། རུས་དབོན་ནི་སློབ་དཔོན་གྲགས་རྡོར་བ་ཡིན་ཏེ་དེ་དག་ཀྱང་ཆོས་སྐྱོང་གཙོ་འཁོར་གྱི་ཞལ་གཟིགས་ལན་མང་བྱུང་ཞིང༌། སྔགས་གྲུབ་རྩོད་མེད་དུ་གྲགས་པ་དང༌། དབོན་སློབ་དཔོན་མངྒ་ལ་ཀིརྟི་ཞེས་པ་དེ་དག་ནས་བརྒྱུད་པ་ལ་ཚངས་གསར་པ་དང་སོ་རག་པའི་སྔགས་བརྒྱུད་རྣམས་བྱུང་བ་སྟེ་དགོན་སར་བའི་སྐབས་སོ། ། ལྔ་པ་རྣ་རོང་པ་ནི། རླུང་སེམས་གཉིས་མེད་ཀྱི་གྲུབ་རྟགས་བརྙེས་པ་གཟི་དྷུ་རས་པ་སྟེ། ཆོས་རྗེ་རས་དཀར་བའི་ཞབས་ལ་བཏུད། གསང་བ་ལྷན་གཅིག་སྐྱེས་པའི་དབང་བཀའ་ཟབ་མོ་ཕྱག་རྒྱ་ཆེན་པོ་དང༌། ཐབས་ལམ་ནཱ་རོ་ཆོས་དྲུག་གི་སྐོར་མ་ལུས་པ་གསན་ནས་སྐུ་ཚེའི་སྟོད་ལ་རི་ཁྲོད་ངེས་མེད་དུ་སྒྲུབ་པ་མཛད། སྨད་ཆར་རྩིའི་ཡོས་སུ་ལྷུན་གྲུབ་གླིང་ཞེས་པའི་གདན་ས་བསྐྱངས། གདན་ས་བ་སེང་གེ་རས་པ་སོགས་བྱུང་ཞིང༌། བུ་ཆེན་ནམ་མཁའ་རས་པ་ཚུར་བྱོན་ཏེ་རྣ་བ་རོང་གི་རོག་སོག་རྫོང་དུ་དགོན་བཏབ་ནས་གྲྭ་པ་བསྐྱང་བ་ལ། གདན་ས་བ་གཞོན་ནུ་རྡོ་རྗེ་དང༌། མཛོ་མཐའ་རས་པ། སྟག་སྒྲ་རས་པ་སོགས་མང་དུ་རིམ་པར་བྱོན་པ་སྟེ་རྣ་རོང་བའི་སྐབས་སོ། ། དྲུག་པ་སྟོང་ནག་ནི། སྤྱན་སྔ་བྱང་གཞོན་པའི་སློབ་ཆེན་བློ་གྲོས་རྡོ་རྗེ་སྟེ། སྐུ་འཁྲུངས་ཡུལ་ལྕི་རྒྱུད་སྟོང་རོང་མཆིག་ནག་གི་རྫོང་ནག་ཅེས་པར། ཡབ་ཚབ་ཤི་སེང་གེ་དཔལ་གྱི་སྲས་སུ་འཁྲུངས། ཁོང་སྐུ་ན་གཞོན་པར་ཡབ་ཀྱི་རྫོང་གཞི་ལ་མ་ཆགས་པར་བན་བྲོས་ལ་ཚངས་གསར་ནང་དུ་བྱོན། སྤྱན་སྔ་བྱང་ཆུབ་གཞོན་ནུ་ལས་རབ་ཏུ་བྱུང༌། མཚན་བློ་གྲོས་རྡོ་རྗེར་བཏགས། ཡི་དམ་རྡོ་རྗེ་ཕག་མོ་གཙོར་གྱུར་པའི་རྒྱུད་སྡེའི་དབང་བཀའ་རྣམས་དང༌། ཕྱག་རྒྱ་ཆེན་པོ་དང་ཆོས་དྲུག་གི་ཐབས་གྲོལ་གྱི་གནད་རྣམས་ལེགས་པར་གསན་སྦྱང་མཐར་ཕྱིན་པར་མཛད། དེ་ཉིད་དུ་སྒོམ་སྡེ་ཚངས་གསར་པའི་བྲང་ཁང་ཆེན་མོའི་ཕྱོགས་གཅིག་ཏུ་འདག་སྦྱར་མཛད་ནས་ལོ་བདུན་དུ་བསྒོམས་པས་རྡོ་རྗེ་རྣལ་འབྱོར་མ་ཞལ་གཟིགས། གཏུམ་མོའི་དྲོད་ཆེན་འབར་དགུན་སྒང་ཁ་བ་བབས་པར་སྐུ་ལུས་ཀྱི་སྟེང་འདོམ་སྐོར་དུ་སྒྲུབ་ཁང་ཁར་ཁ་བ་མེད་པ་སོགས་གྲུབ་པའི་ཚད་དུ་སོན། དེ་ནས་དབུས་སུ་བྱོན་ནས་རྒྱ་བྲག་ཆོས་རྗེ་ལས་ཞི་བྱེད་གསན་པ་སོགས་གྲུབ་བརྙེས་མང་དུ་བསྟེན། ཁྱད་པར་དུ་ཀརྨ་པ་རང་བྱུང་རྡོ་རྗེ་མཇལ། ཕྱག་རྫོགས་ཟུང་འཇུག་གི་གདམས་པ་ཞུས། བྱང་འབའ་རོམ་དུ་རྒྱལ་ཚབ་ཆོས་ཀྱི་ཁྲིར་ལོ་ཤས་བཞུགས། མར་བྱོན་ནས་ཇོ་མོ་གཡུ་སྒྲོན་ཀུ་སྐྱོ་ཇབ་དང་རྫ་ཉིན་ལ་ཆིང་སོགས་སུ་གཅིག་རི་ཁོ་ནར་མཛད། མཐར་ཟླ་ཉིན་ལ་ཆིང་དུ་སྐུ་གཤེགས། གདུང་ཞུགས་སུ་ཕུལ་བས་འཇའ་མི་འདྲ་བ་མང་པོ་པུར་ལ་ཟུག་ཤིང་རིང་བསྲེལ་གྲངས་མེད་བྱོན། གདུང་རྟེན་ཆ་གསུམ་དུ་བསྒོས་ཏེ་བཞེངས་པར་གྲགས། སློབ་མ་ལ་རིགས་དབོན་དབང་རྒྱལ། དབོན་ཚུལ་བློ་བ༌། ལྷ་རས་པ། ལྕི་རས་པ། ཇབ་པ་བ། སྟག་གེ་རས་པ། གསག་གེ་རས་པ། བསོད་ནམས་དཔལ། མེ་གནས་བཟོད་པ། མེ་གནས་ཞི་བ་སོགས་མང་བར་བྱོན། རིགས་དབོན་དབང་རྒྱལ་གྱིས་ལྕི་སྟོད་དུ་འབྲོག་དགོན་དང་ཀུ་སྐྱོའི་རི་དགོན་ཟུང་འབྲེལ་མཛད། དབོན་ཚུལ་བློ་ལ་ཆིང་གི་གདན་སར་བཞུགས། དབང་རྒྱལ་གྱི་སློབ་མ་རིགས་དབོན་ཀུན་དགའ་སྟེ་སྐྱོ་བྲག་ཆོས་རྗེ་ལས་རབ་ཏུ་བྱུང༌། དབང་རྒྱལ་ལས་གདམས་པའི་ཕུ་ཐག་བཅད་ནས་ཀུ་སྐྱོའི་གདན་ས་བསྐྱངས། དབོན་བདེ་ཆེན་ནི་དབང་རྒྱལ་ལས་གདམས་པ་གསན་ནས་ལྕི་སྟོད་འབྲོག་དགོན་དུ་བཞུགས། དེ་ནས་དབོན་བརྒྱུད་རིམ་བྱོན་རྗེས་འབྲོག་དགོན་དུ་འབྲོང་བླ་ཀརྨ་རིན་ཆེན་དབང་རྒྱལ་ལམ་བསྟན་འཛིན་རབ་རྒྱས་ཞེས་པ་བྱོན། དམ་པ་དེ་ཉིད་ནི་ཀརྨ་པ་བཅུ་གསུམ་བདུད་འདུལ་རྡོ་རྗེ་དང་སི་ཏུ་བསྟན་པའི་ཉིན་བྱེད་ཀྱི་ཞབས་ཟིན་ཐུགས་སུ་བྱོན་པའི་སྲས་སུ་གྱུར། སྨན་རྩིས་སོགས་རིག་གནས་དང་ནང་དོན་རིག་པའི་སྐོར་སོགས་མཁས་གྲུབ་རྨད་དུ་བྱུང༌། གདན་ས་བསམ་ཉི་ཟླ་ཁར་མཛད། ཁྱད་པར་འབྲོང་སྨན་སྙིང་ཐིག་ཞེས་པའི་སྲོལ་ཚུགས། སློབ་བརྒྱུད་ཕྲིན་ལས་རྣམ་རོལ་ཐུབ་བསྟན་སྙིང་པོ་སོགས་མང་དུ་སྤྲུལ་བརྒྱུད་བྱོན་ཞིང་གདན་ས་གཉིས་ཡོད་པ་ལ་བླ་ཆེ་ཆུང་དུ་གྲགས་པ་ད་ལྟ་ཡོད་བཞིན་པ་སྟེ་སྟོང་ནག་པའི་སྐབས་སོ།། བདུན་པ་ཇབ་པ་ནི། རྟོགས་ལྡན་བཟོད་པ་སྟེ་སྟོང་ནག་རས་པ་བློ་གྲོས་རྡོ་རྗེ་ལས་རབ་ཏུ་བྱུང༌། གདམས་པ་ཡོངས་སུ་རྫོགས་པར་མཛད་དེ་སྐུ་ཡི་ཉེ་གནས་ཡུན་རིང་དུ་ཞབས་ཏོག་ཕུལ། ཞི་བར་གཤེགས་ནས་ཇབ་ཀྱི་སྒྲུབ་ཕུག་ཏུ་མཚམས་བཅད་མཛད། དེ་ནས་དཔལ་གྱི་ཇབ་དགོན་བཏབ་ནས་གདུལ་བྱ་ཆེ་འུར་དེའི་སློབ་མ་ཇབ་པ་ངག་དབང་སྟེ། རྟོགས་ལྡན་བཟོད་པ་ལས་སྨིན་གྲོལ་མཐར་ཕྱིན་པ་མཛད། དེ་རྗེས་ཇབ་པ་བླ་མ་དཔལ་འབྱོར་ཞེས་པ་སོགས་བྱོན་ཞིང་ཕྱིས་ཀྱི་བར་རྒྱུན་མ་ཆད་པར་སྣང་བ་སྟེ་ཇབ་པའི་སྐབས་སོ། ། བརྒྱད་པ་སྐྱོ་བྲག་པ་ནི། ལྷ་རས་པ་བརྩོན་འགྲུས་དཔལ་བ་སྟེ་སྐུ་འཁྲུངས་ཡུལ་ལྕི། གདུང་མཆོག་པོའམ་ལྷའི་གདུང༌། ཚངས་གསར་པའི་སྤྱན་སྔ་གྲགས་བྱང་བ་དང༌། སྟོང་ནག་རས་པ་བློ་གྲོས་རྡོ་རྗེ་གཉིས་ཀ་ལ་ཐུག་གདམས་པ་ཐམས་ཅད་གསན། སྐྱོ་ཁོ་ཉིན་ཕུག་རྔ་རོང་སོགས་སུ་སྐུ་ཚེ་དང་བསྒྲུབ་པ་མཉམ་མཐར་ཉིན་ཕུག་ཏུ་སྐུ་གཤེགས་པའི་གདུང་འབུམ་ཡོད། སློབ་ཚོགས་མང་དུ་བྱོན་པའི་ནང་ནས་མཆོག་ཏུ་གྱུར་པ་གླང་རས་གྲགས་པ་རྒྱལ་མཚན་ཏེ། ཉང་རལ་ཉི་མ་འོད་ཟེར་གྱི་གཏེར་ལུང་ལས། རྫོང་ཆེན་ཀུན་གྱི་ཡ་གྱལ་སེང་གེ་རྫོང྄༔ མཁའ་སྤྱོད་ས་ལ་ཆགས་པའི་སྐྱོ་བྲག་པ༔ རྡོ་རྗེ་འཆང་དངོས་མི་ཡི་ཚུལ་བཟུང་བའི༔ བསྟན་པ་འཛིན་པའི་རྒྱལ་མཚན་མིང་ཅན་འབྱུང༔ ཞེས་གསུངས་པ་བཞིན། གླང་རས་པའི་སྐུ་འཁྲུངས་ཡུལ་རྫ་བརྒྱུད་ཤེལ་ཚ། ཡབ་གླང་རིན་ཆེན་བླ་མ། སྟག་གི་ལོ་ལ་སྐུ་བལྟམས། སློབ་དཔོན་སྟོང་ནག་རས་པ་དང༌། ཀརྨ་པ་རོལ་པའི་རྡོ་རྗེ་ལས་བསྐྱེད་རྫོགས་གདམས་སྐོར་དང་རྫོགས་ཆེན་མཁའ་འགྲོ་སྙིང་ཐིག་སོགས་མང་དུ་གསན། ཁྱད་པར་ལྷ་རས་པ་ལས་གདམས་ངག་ཐམས་ཅད་རྫོགས་པར་གསན། འཇམ་དབྱངས་ཀྱི་སྤྲུལ་པར་གྲགས། ཤེ་ཕྲོམ་རྒྱམ་རྒྱལ་སྐྱོ་ཁོ་ཉིན་ཕུག་སོགས་ལ་ལོ་ཉི་ཤུ་བཞུགས། དེ་ནས་མཁའ་འགྲོའི་ལུང་བསྟན་ངོ་མཚར་བ་བྱུང་སྟེ། མཁའ་འགྲོ་མ་ཝ་ལ་སྤྲུལ་ནས་ཆའུ་ཁྱེར་སོང་བ་སྐྱོ་བྲག་མགོ་ཡི་བྲག་ཐོག་ལ་བཞག་འདུག་པ་གཟིགས་ནས་མཁའ་འགྲོའི་དགོན་པར་ཞབས་ཀྱིས་བཅག་པའི་རྟེན་འབྲེལ་དུ་གོ་ནས་སྐྱོ་བྲག་མགོ་ཡི་དགོན་བཏབ། སྐུ་གསུང་ཐུགས་རྟེན་མང་བར་བཞེངས། དོན་གསུམ་སྟག་གི་ལོ་ལ་སྐུ་གཤེགས། རྟེན་ཐུགས་ལྗགས་སྤྱན་གསུམ་དང་རིང་བསྲེལ་མཐའ་ཡས། སློབ་མ་མང་དུ་མཆིས་ཀྱང་གཙོར་ཆེ་བ་དྲུང་རྨ་སེ་དང་བསོད་ནམས་བཟང་པོ་གཉིས་ཡིན་ཞིང༌། དེའང་གྲྭ་སྟོད་ཨོ་རྒྱན་གླིང་པའི་གཏེར་ལུང་ལས། བོད་ཡུལ་ཁམས་ཀྱི་སེང་རྫོང་དུ༔ བྲམ་ཟེ་མདའ་བསྣུན་ས་ར་ཧ༔ དངོས་བྱོན་གྲུབ་པའི་མཆོག་བརྙེས་པ༔ བསོད་ནམས་མཚན་ཅན་འབྱུང་བར་འགྱུར༔ ཞེས་གསུངས་པ་ལྟར་སྐུ་འཁྲུངས་ཡུལ་ཀོ་རོག་དར་ལུང༔ གདུང་འདན་མ་ཆུ་ཕོ་བྱི་བའི་ལོ་ལ་སྐུ་འཁྲུངས། ཚངས་གསར་བསོད་ནམས་རིན་ཆེན་ལས་རབ་ཏུ་བྱུང༌། མཚན་བསོད་ནམས་བཟང་པོར་གསོལ། ཀརྨ་པ་དེ་བཞིན་གཤེགས་པ་ལས་ཆོས་མང་དུ་ཞུས། གླང་རས་པ་ལས་ཕྱག་ཆེན་ཆོས་དྲུག་གི་སྐོར་གསན། ཞབས་ཏོག་རྒྱ་ཆེན་བསྒྲུབ་པས་ཉམས་རྟོགས་གོང་དུ་འཕེལ། རྡོ་རྗེ་འཇིགས་བྱེད་སོགས་ཡི་དམ་མང་པོ་ཞལ་གཟིགས། གཏོར་མར་བདུད་རྩི་བབས། སྐྱོ་བྲག་མགོ་ནས་ཆབ་ཏི་གསེར་ཕུག་ཏུ་འཕུར་བའི་རྫུ་འཕྲུལ་ལན་མང༌། སྒོམ་རོ་གཅིག་རྟོགས་པ་འཁྲུངས། བདུན་ཅུ་དོན་བརྒྱད་ལ་སྐུ་གཤེགས། སྐུ་གདུང་ཤ་རི་རམ་དུ་གྱུར། སློབ་མ་མང་པོའི་ནང་ནས། རིན་ཆེན་བཟང་པོ། བསོད་དབང་བ། བཀྲ་ཤིས་དབང་ཕྱུག་སོགས་བྱོན་པའོ། །ཆོས་རྗེའི་སློབ་མ་རིན་ཆེན་བཟང་པོ་ནི། གདུང་འབའ་རེ་ཡིན་ཏེ། ཉིད་ཀྱི་གསུངས་ལས། འབའ་ལ་རེ་བའི་གདུང་བརྒྱུད་ཞེས་བྱ་འདི། གནམ་མཚོའི་གླིང་དུ་གླང་ཆེན་དཔལ་སེང་གིས། ཕྱག་རྡོར་དྲེགས་འདུལ་བསྒྲུབས་ནས་གྲུབ་པ་ཐོབ། ཉིད་ཀྱི་གདུང་བརྒྱུད་དེ་ཕྱོགས་བྱུང་བ་ལ། ཏིང་འཛིན་གྲུབ་པ་ཐོབ་པ་མང་དུ་འབྱུང༌། དེ་ནས་དཔལ་ཆེན་རྒྭ་ལོ་གནས་དེར་ཕེབས། དབང་ཆེན་གྲགས་པ་ཞེས་པའི་སྔགས་པ་དེ། རྗེས་སུ་བཟུང་ནས་བདེ་མགོན་ཐུགས་དམ་མཛད། འབའ་རོམ་བྲག་ཏུ་དར་མ་དབང་ཕྱུག་མཇལ། ཕྱག་རྒྱ་ཆེ་དང་ཆོས་དྲུག་སྦྱོར་དྲུག་ཞུས། དེ་སྲས་དཔལ་ཆེན་ལེགས་ལྡན་བཟང་པོ་དེས། རིན་ཆེན་སྤུངས་པར་མགོན་པོ་ལོ་བདུན་བསྒྲུབ། ཀུན་གྱིས་བཀུར་བས་གདུང་བཙུན་སྒོམ་ཆེན་ཞེས། སྒོམ་པས་གཉུག་མ་འབའ་ཞིག་གནས་པ་ཡི། གདུང་རྒྱུད་བཟང་བས་ཀུན་གྱི་རེ་ཆེ་བས། དེ་ཕྱིར་ཏི་ཤྲཱི་རས་ཆེན་ལུང་བསྟན་ལས། ཁྱོད་ནི་ཁམས་ཀྱི་སྐྱོ་ནམ་བྲག་ཅེས་སུ། ཇོ་ཞེས་རི་བོ་བིལ་བའི་དབྱིབས་པ་རུ། ལྕགས་ཀྱི་བྱ་ཁྱུང་ནམ་མཁར་ལྡིང་འདྲའི་གནས། གཡས་རི་ཧཱུྃ་ཡིག་གཡོན་རི་རྨ་བྱའི་གདོང༌། མདུན་དུ་ལྕགས་ཀྱི་སེང་གེ་ཉལ་བའི་བྲག །ཁྱུང་གི་སྒོང་ང་འདྲ་བའི་དོག་སར་སོང༌། རིག་འཛིན་སུམ་ཅུའི་གདུལ་བྱའི་ཞིང་སར་འགྱུར། ཞེས་དང༌། ཏི་ཤྲཱི་རས་པ་ཆེན་པོའི་རྡོ་རྗེའི་ལུང་བྱང་ལས། ཨོ་རྒྱན་སྦས་གནས་སེང་གེ་རྫོང་འདི་རུ། འགྲོ་དོན་རྒྱུན་མི་འཆད་པའི་གནས་ཀྱི་བདག །གྲགས་པ་གསུམ་དང་བཟང་པོ་ལྔ། རྒྱ་མཚོ་བཞི་དང་སྙིང་པོ་བདུན། འོད་ཟེར་གསུམ་དང་སེངྒེ་གཉིས། ཡེ་ཤེས་གཉིས་དང་སངས་རྒྱས་གསུམ། ཀརྨ་ཆོས་དང་ཕུན་ཚོགས་མིང༌། རིག་འཛིན་སུམ་ཅུའི་གདུལ་བྱ་སྐྱོང༌། ཞེས་བསྟན་པ་ལྟར་གྱི་གདུང་བརྒྱུད་དེའང་ལྕི་རྒྱུད་དབྱེ་ནེ་གསེར་ཁང་དུ་ཡབ་འབའ་རེ་དཔོན་རྒོད་མའི་སྲས་གཡུང་དྲུང་སྐྱབས་ཏེ་དེ་ལ་སྲས་གསུམ་བྱོན་པའི་ཆེ་བ་མི་ལ་རས་པའི་སྤྲུལ་པ་འབའ་རེ་རིན་ཆེན་བཟང་པོ་སྐྱོ་བྲག་ཆོས་རྗེ་ལས་གདམས་པ་ཐམས་ཅད་གསན། རྫ་དགོན་བཏབ། རོ་གཅིག་གི་རྟོགས་པ་འཁྲུངས། སྐྱོ་བྲག་གི་གདན་ས་མཛད། འགྲོ་དོན་རྒྱ་ཆེ་བར་བྱུང་ཞིང་བདུན་ཅུ་ལ་སྐུ་གཤེགས། རིང་བསྲེལ་ཁ་དོག་ལྔ་ལྡན་དད་པའི་རྟེན་དུ་བཞག །གཅུང་བསོད་ནམས་དབང་ཕྱུག་སྐྱོ་བྲག་ཆོས་རྗེའི་རྗེས་སུ་བཟུང་བཛྲ་ཀིརྟིའི་སྤྲུལ་པར་གྲགས། ཀརྨ་པ་མཐོང་བ་དོན་ལྡན་མཇལ། དབང་ཆོས་མང་དུ་ཞུས། སྐྱོ་བྲག་གི་གདན་ས་མཛད། རེ་གཅིག་ལ་སྐུ་གཤེགས། རྐང་གི་ཕུག་ཏུ་རྡོ་རྗེ་ཕག་མོའི་སྐུ་བྱོན། དེའི་དབོན་ཆོས་འོད་ཟེར་ནི་བསོད་ནམས་བཀྲ་ཤིས་ཀྱི་སྲས་སུ་འཁྲུངས། གྲུབ་ཐོབ་རམ་ནེ་ཆོས་གཡུང་གི་སྤྲུལ་པར་གྲགས། ཁོ་བོ་བླ་མ་དང་འབྲུག་ཚ་བཀྲ་ཤིས་དབང་ཕྱུག་ལས་གདམས་པ་ཐམས་ཅད་གསན། སྐྱོ་བྲག་མགོར་གཙུག་ལག་ཁང་དང༌། བྱམས་ཆེན་བཀའ་འགྱུར་སོགས་བཞེངས། རྡོ་ཕུ་ན་ལྷ་ཁང་ལོག་བྲིས་རྟེན་མཆོད་འགྲན་ཟླ་བྲལ། མངོན་མཁྱེན་གྲུབ་རྟགས་ཚད་མེད། དྲུག་ཅུ་རྩ་ལྔ་ལ་གཤེགས། དབུ་བུམ་རིལ་ལ་རྒྱུད་སྡེའི་ལྷ་ཚོགས་བྱོན། དེའི་སློབ་མ་རིགས་དབོན་ཀུན་དགའ་སྙིང་པོ་ཁུ་བོའི་བླ་མ་ལས་གདམས་པ་ཞུས། ཀརྨ་པ་མི་བསྐྱོད་ཞབས་ལ་གདམས་པའི་ཕུ་ཐག་བཅད། གདན་ས་མཛད། མཐུ་དང་རྫུ་འཕྲུལ་ལ་མངའ་བརྙེས། ཞེ་དགུ་ལ་གཤེགས། ཐུགས་ལྗགས་རིང་བསྲེལ་སོགས་བྱོན། དེའི་དབོན་ཀུན་དགའ་རྒྱ་མཚོ་ནི། ཁུ་བོ་བླ་མ་ལས་གདམས་པ་རྫོགས་པར་མཛད། མགོན་པོ་ཕྱག་བཞི་པ་དངོས་སུ་འགྲུབ། གདན་ས་མཛད་ང་གཉིས་ལ་སྐུ་གཤེགས། གདུང་ལ་བྱོན་པ་གྲངས་མང༌། དེའི་དབོན་སྐྱོ་བྲག་བསྟན་འཛིན་བཟང་པོ་ནི། རཏྣ་གླིང་པའི་ལུང་བསྟན་ལས། སྤྱན་རས་གཟིགས་མགོན་མི་ཡི་ཚུལ་བྱོན་པ༔ བསྟན་འཛིན་མིང་ཅན་ཁམས་ཀྱི་ཕྱོགས་ནས་འབྱོན༔ ཡི་གེ་དྲུག་པའི་ཆོས་སྒྲས་སྟོང་གསུམ་གང༔ མཐོང་ཐོས་འབྲེལ་ཚད་བདེ་བ་ཅན་དུ་འདྲེན༔ ཞེས་པ་ཐུགས་རྗེ་ཆེན་པོའི་སྤྲུལ་པར་གྲགས་ཤིང་གྲུབ་པ་སྟེ། དབང་འཕགས་ཀྱི་སྲས་སུ་འཁྲུངས། ཁུ་བོ་བླ་མ་ལས་གདམས་ངག་བུམ་པ་གང་བྱོའི་ཚུལ་དུ་གསན། སི་ཏུ་ཆོས་ཀྱི་གོ་ཆ་དང༌། ཟུར་མང་ལེགས་བཤད་སྒྲ་དབྱངས་ལས་སྙན་བརྒྱུད་མ་ལུས་པ་གསན། མེ་བྱི་ལ་རྫ་མོ་དགོན་དུ་མ་ཎི་བུམ་སྒྲུབ་རྒྱུན་འཛུགས་མཛད། རྟེན་བཞེངས་བསམ་ལས་འདས་པ་གྲུབ། བརྒྱད་ཅུ་ཐམ་པ་ལ་སྐུ་གཤེགས། དབུ་བུམ་རིལ་རིང་བསྲེལ་ཅན་བྱོན། དེའི་སློབ་མ་སྐྱོ་བྲག་ཀརྨ་རྒྱལ་མཚན་དང་ཀརྨ་ཡེ་ཤེས་གཉིས་ལས་གདན་ས་བ་ཀརྨ་ཛྙཱ་ན་ནི། རཏྣ་གླིང་པའི་གཏེར་ལུང་ལས། ཕྱག་རྡོར་ཐུགས་སྤྲུལ་འགྲོ་བ་ཐབས་ཀྱི་འདུལ༔ ཡེ་ཤེས་མིང་ཅན་ཁམས་ཀྱི་ཕྱོགས་སུ་འབྱུང༔ ཞེས་ལུང་བསྟན་པའི་ཕྱག་ན་རྡོ་རྗེ་དངོས་བྱོན་དེ་ཉིད་དཔོན་ཝེར་ལུ་དང་ཡུམ་འབྲོང་བཟའ་སྐྱིད་མོ་གཉིས་ཀྱི་སྲས་སུ་འཁྲུངས། ཀརྨ་པ་དབང་ཕྱུག་རྡོ་རྗེ་མཇལ་འབུལ་བ་རྔམས་ཆེན་ཕུལ། གསུང་ཆོས་གདམས་པ་ཡང་ཞུས། ཁྱད་པར་དུ་ཁོ་བོ་བསྟན་འཛིན་བཟང་པོ་དང་འབྲུག་ཚ་སངས་རྒྱས་སོགས་ལས་ཕྱག་རྒྱ་ཆེན་པོ་དང༌། ཆོས་དྲུག་ཟབ་ལམ་ལ་གསན་སྦྱང་མཐར་ཕྱིན་པར་མཛད། གསང་བ་སྔགས་ཀྱི་རྣལ་འབྱོར་པ་བདེ་མགོན་གཉིས་ཀྱི་སྙིང་པོ་ལ་དུང་ཕྱུར་རེ་འགྲུབ། འབྱུང་བ་ལ་རང་དབང་བསྒྱུར་བས་ཆགས་ཐོགས་མེད་པར་གཤེགས། གྲུབ་པའི་གོ་འཕང་མཐོན་པོར་བྱོན། དེ་སྐབས་གུ་ཤྲཱི་ཧན་གྱིས་བེ་རུ་དོན་ཡོད་བཅོམ་ཕྱིར་མདོ་སྨད་དུ་དམག་དྲངས་སྐབས་སྐྱོ་བྲག་རྩེ་འདིར་རྗེ་བློ་བཟང་གྲགས་པའི་སྐུ་ལྡེབས་བྲིས་དང༌། རྡོ་རྗེ་འཇིགས་བྱེད་ཀྱི་སྐུ་སྡེར་བཟོ་བྱིན་ཅན་རྣམས་མཇལ་བར་བརྟེན། འདི་ནི་རི་བོ་དགེ་ལྡན་པར་ཤིན་ཏུ་གུས་པའི་དགོན་གནས་ཡིན་པར་དོན་གྱིས་གསལ་བས། འདིའི་བླ་དགོན་ལ་མཇལ་ཞུས་དང་བཀུར་སྟི་ཕུལ་ཏེ། སྔོན་གྱི་ཐོབ་ཐང་སྡེ་སྲིད་གང་ཡོད་ལ་ཉམས་དམན་མི་ཆོག་པའི་ཐས་ཇིའི་ཆོ་ལོ་དཀར་སེར་ཁེར་གེམ་རྣམས་ཐོབ་ནས་སྐྱོ་བྲག་དགོན་གྱི་ཆོས་སྲིད་གྲུ་བཞི་ལམ་མེར་ཡོད་པའང་ཀརྨ་ཛྙཱ་ན་ཉིད་ཀྱི་ནུས་སྟོབས་ཡིན་པར་གོར་མ་ཆག །དེའང་སྟོད་ནས་འབྲི་སྤྱི་ཇོ་གསུམ། བར་ནས་གཤོ་སྲི་མཁར་གསུམ། སྨད་ནས་དབའ་རུ་ཀ་གསུམ་སོགས་ཤོག་ཆེན་དཔོན་པོ་དགུ་ཡི་ཁ་ཞབས། སྟོད་ནས་མ་སང་རྫ་རྒྱལ་ཕྱིན་བཅད། སྨད་ནས་ལྷོ་ཡི་རོང་སྒོ་ཡན་བཅད། ལ་གཅིག་འབམ་གྱི་ཕར་བཅད། སྐྱ་མཛོའི་སག་མེ་ཚུན་བཅད་ཀྱིས། ལྷ་སྡེ་ལྔ་བརྒྱ་དང་དྲུག་ཅུའི་མཆོད་སྡེ་མངའ། འབངས་ཇི་སྲིད་སོར་གནས་གཏན་ཆགས་མཛད། དེའི་དབོན་དོན་དམ་སྙིང་པོ་སྟེ་བསླབ་གསུམ་རྒྱན་གྱིས་སྤྲས་ཤིང༌། ཁུ་བོ་བླ་མ་ལས་ཡབ་མེས་ཀྱི་གདམས་སྐོར་འབའ་རོམ་པའི་སྙན་བརྒྱུད་རྣམས་གསན་བཞེས་མཛད་དེ་གྲུབ་བརྙེས་ཉམས་འོག་ཏུ་ཚུད་པར་མཛད། དེ་རྗེས་ཀརྨ་ཚེ་བརྟན་ཕྱག་རྒྱ་ཆེན་པོའི་རྟོགས་པ་མངོན་དུ་གྱུར། དེ་རྗེས་དུང་དཀར་རས་ཆེན་རླུང་སེམས་གཉིས་མེད་ཀྱི་གྲུབ་རྟགས་ཐོན། རྫུ་འཕྲུལ་སྣ་ཚོགས་ལ་མངའ་དབང་བསྒྱུར་བའི་གྲགས་སྙན་ས་གསུམ་ན་ཁྱབ་པ་སྟེ། འདི་ཡན་གྱི་གདན་རབ་འབའ་རེ་བའི་དབོན་རྒྱུ་ཁོ་ནས་འཛིན་པར་སྣང་ཞིང༌། འདི་ཕྱིན་ནི་སྤྲུལ་བརྒྱུད་དབོན་རབས་འདྲེས་མར་བྱུང་ཞིང་སོ་སོའི་རྣམ་ཐར་སྨོས་ཀྱི་མི་ལོངས་པས་ཟུང་འཇུག་བརྒྱུད་པའི་མཚན་ཐོ་ནི་དུང་དཀར་རས་ཆེན་རྗེས་སྐྱོ་བྲག་བསྟན་པའི་སྙིང་པོ། དཔལ་ཆེན་ལུང་རིག་རྒྱ་མཚོ། དབོན་སྲས་ཚེ་དབང་བདུད་འདུལ། དགེ་བཤེས་དགེ་ལེགས་དཔལ་གྲུབ། དུང་དཀར་ངེས་དོན་ཆོས་འཛིན། བསྟན་སྙིང་བསྟན་འཛིན་རྣམ་རྒྱལ། དུང་དཀར་སྒྲུབ་བརྒྱུད་ཆོས་དབྱིངས། གསལ་བྱེད་ཆོས་གྲུབ་སེང་གེ། ཀརྨ་ཚོགས་གཉིས་འོད་ཟེར། གསང་བདག་བདུད་འཇོམས་རྡོ་རྗེ། ཀརྨ་བསྟན་འཛིན་ཆོས་འཕེལ། ཀརྨ་བཀའ་བརྒྱུད་བཀྲ་ཤིས། དུང་དཀར་ཐེག་མཆོག་འོད་ཟེར་བར་དུ་བྱོན་པ་སྟེ། མདོར་ན་གནས་དང་གང་ཟག་ཡ་མ་བྲལ། ཆོས་བརྒྱུད་དང་དབོན་བརྒྱུད་སོར་མ་ཉམས། རྟེན་དམ་རྫས་ལ་འཕོ་འཕྱུགས་མ་བྱུང་བའི་དོན་བརྒྱུད་སྐྱོ་བྲག་པའི་སྐབས་སོ། ། དགུ་པ་ཤོར་ཕུ་པ་ནི། སྟོང་ནག་རས་པའི་སློབ་མ་ལྕི་རས་རིན་ཆེན་རྒྱལ་མཚན་ཏེ། ཨ་ཕྱུག་གི་སྲས་སུ་འཁྲུངས། གདུང་ནི་འབྲུ། བྱང་ཆུབ་གཞོན་ནུ་ལས་རབ་ཏུ་བྱུང༌། བློ་གྲོས་རྡོ་རྗེ་ལས་ཕྱི་ནང་གི་གདམས་པ་ཐམས་ཅད་རྫོགས་པར་གསན། ཉམས་རྟོགས་པ་ཁྱད་པར་ཅན་འཁྲུངས། དཔོན་སློབ་ལྷན་ཅིག་པར་རྗེ་ཀརྨ་པ་རང་བྱུང་རྡོ་རྗེའི་ཞབས་དྲུང་དུ་ཕག་མོ་ལ་སོགས་པའི་གདམས་པ་ཞུས། དབ་ཀྱི་ཇོ་མོ་གཡུ་སྒྲོན་སོགས་སུ་གཅིག་རི་ཡུན་རིང་དུ་མཛད། གྲུབ་པ་བརྙེས། ངོ་མཚར་བའི་ལྟས་དང་བཅས་ཏེ་གཤེགས། དེའི་དབོན་ཤེས་རབ་རིན་ཆེན་ནི། ཁུ་བོ་ལ་གདམས་པ་ཐམས་ཅད་རྫོགས་པར་གསན། ཀརྨ་པ་རོལ་པའི་རྡོ་རྗེའི་མདུན་དུ་བསྙེན་པར་རྫོགས། ཤོར་ཕུའི་རི་པ་ནང་ཀ་ཡེ་གྲུ་གུ་སོགས་སུ་གཅིག་རི་ལོ་མང་པོར་མཛད། མཆོག་གི་དངོས་གྲུབ་བརྙེས། གྲུ་གུ་སོགས་གཞི་བདག་མང་པོ་དམ་ལ་འདོགས་པར་མཛད། དེ་ཕྱིན་ཆད་ནས་ཤོར་ཕུ་བ་ཞེས་པའི་མཚན་དུ་གྲགས། གྲུ་གུའི་ཞོརདུ་གཤེགས། རྟེན་རེིང་བསྲེལ་མང་དུ་བྱོན། དེའི་དབོན་པོ་་་་་གང་ལྟར་ན་ཤོར་ས་བཞི་དང་གོལ་ས་གསུམ་ལ་སོགས་སྤངས་ཤིང་གསང་ཆེན་རྡོ་རྗེ་ཐེག་པའི་སྒོར་ཞུགས་ཏེ། དེའི་གོང་ན་འདི་ཞེས་བྱ་བ་གཞན་མེད་པ་སྟེ་ཕུ་ཐག་ལེགས་པར་ཆོད་པས་ན་ཤོར་ཕུ་དང༌། གསང་བ་ལྟར་ན་ཞི་བདེའི་གོ་འཕང་འདོད་པ་སྟེ་ཕྱི་རོལ་གྱི་བཟུང་བ་ཐམས་ཅད་རང་སེམས་སུ་འདོད། དེ་དོན་དམ་པར་རྟོགས་ཀྱང་ཀུན་རྫོབས་སུ་ངེས་པའི་དོན་བྱེད་ནུས་པར་འདོད་པའི་ཤོར་ས་ཐམས་ཅད་སྤངས་ཏེ། ཡོད་མིན་མེད་མིན་བརྗོད་བྱ་བརྗོད་བྱེད་སྤྲོས་པའི་མཐའ་ཐམས་ཅད་དང་བྲལ་བ་མཁའ་ཁྱབ་ཀློང་ཡང་ཨེ་ཝཾ་ཟུང་འཇུག་ཕྱག་རྒྱ་ཆེན་པོའི་དོན་རྟོགས་ཤིང་ཕུ་ཐག་ཆོད་པས་ཤོརཕུ༌། མཆན། ཤེས་རབ་རྒྱལ་མཚན་ནི། ཡབ་དབང་རྒྱལ་གྱི་སྲས་སུ་འཁྲུངས། ཁུ་བོ་ལས་གཅོད་སྐོར་སོགས་གདམས་པ་མང་དུ་གསན། མེར་ཆེན་གྱི་ཞོལ་དུ་སྒྲུབ་སྡེའི་རི་དགོན་མཛད། སློབ་མ་ཡང་བློ་གྲོས་རྒྱལ་མཚན་སོགས་འགའ་ཞིག་བྱུང༌། ལྟས་བཟང་པོ་དང་བཅས་ཏེ་དེ་ཉིད་དུ་གཤེགས། ཤོར་ཕུ་ལྷུན་གྲུབ་པ་ནི། ཕག་གྲུའི་སློབ་མ་ཤེས་རབ་ཡེ་ཤེས་ཀྱི་སྤྲུལ་པ་སྟེ། སྐུ་ཚེའི་སྟོད་དུ་སྒོམ་སྡེ་ཚངས་གསར་པའི་བློན་པོ་མཛད། ཕྱིས་ཀརྨ་པ་དེ་བཞིན་གཤེགས་པའི་དྲུང་ནས་རབ་ཏུ་བྱུང༌། ཁུ་བོ་ལས་འབའ་རོམ་བཀའ་བརྒྱུད་ཀྱི་གདམས་པ་ཐམས་ཅད་རྫོགས་པར་གསན། མེར་ཆེན་དང་རིན་ཆེན་གླིང་གི་སྒྲུབ་སྡེའི་རི་དགོན་མཛད་ནས་དེར་བཞུགས་ཏེ། ཐུགས་དམ་ཁྱད་པར་ཅན་འཁྲུངས། ལྟས་བཟང་པོ་བཅས་དགོན་དེ་ཉིད་དུ་གཤེགས། སློབ་མ་ཡང་བྱ་བྲལ་འོད་ཟེར་དང་ཟུར་མང་གི་རྨ་སེ་རྟོགས་ལྡན་གྱི་འབའ་རོམ་པའི་ཆོས་སྐོར་གསན་པ་སྟེ་མང་དུ་བྱོན། བཀྲ་ཤིས་དཔལ་ནི་ཡབ་བླ་སྐར་མའི་སྲས་སུ་འཁྲུངས། ཁུ་བོ་ལས་ཡབ་མེས་ཀྱི་གདམས་པ་ཐམས་ཅད་རྫོགས་པར་གསན། ཀརྨ་པ་དེ་བཞིན་གཤེགས་པ་དང་མཐོང་བ་དོན་ལྡན་ལ་སོགས་ལས་བཀའ་ཆོས་ཞུས། ཐུགས་དམ་བཟང་པོ་དང་བཅས་ཏེ་གཤེགས། ཁྲོ་བོའི་སྲས་བཀྲ་ཤིས་རྒྱལ་མཚན་ནི། ཁུ་བོ་ལ་སྒོམ་སྡེའི་ཆོས་སྐོར་ཐམས་ཅད་གསན། ཀརྨ་པ་ཆོས་གྲགས་རྒྱ་མཚོ་དང་མཇལ། ཀོང་པོ་ཚེ་རས་པ་ཞེས་པ་ལས་ཕྱག་ཆེན་དང༌། ཨ་སེང་པའི་ལམ་འབྲས་སྦྱོར་དྲུག་གསན། རྡོ་རྗེ་འཇིགས་བྱེད་ལ་སོགས་མངོན་སུམ་དུ་བཞེངས་ནུས་པ་ཙམ་གྱིས་བསྐྱེད་རིམ་ལ་མངའ་བརྙེས། སྐུ་ཚེ་མཐར་ཕྱིན་ཏེ་གཤེགས། དབུ་བུམ་རིལ་དང་རིང་བསྲེལ་སོགས་བྱོན། སློབ་མ་གནམ་ཐེལ་ཕུ་པ་ལ་སོགས་བྱོན། བཀྲ་ཤིས་རྒྱལ་མཚན་པ་ནི་མགོན་པོ་འོད་ཟེར་གྱི་སྲས་སུ་འཁྲུངས། སྐུ་གནས་ཕྲ་མོའི་དུས་སུ་ཁུ་བོ་ལས་དབང་བསྐུར་འབའ་ཞིག་གསན། དྭགས་པོ་བཀྲ་ཤིས་འོད་ཟེར་གྱི་དྲུང་དུ་བསྙེན་པར་རྫོགས། མཚན་བཀྲ་ཤིས་རྒྱལ་མཚན་དུ་གསོལ། ཟུར་མང་བློ་གྲོས་རྒྱལ་མཚོ་ལས་ཕྱག་ཆེན་དང༌། སི་ཏུ་ཆོས་ཀྱི་གོ་ཆ་ལས་ཕྱག་ཆེན་ཆོས་དྲུག་དང་རྡོ་རྗེ་ཕྲེང་བ། རྒྱ་སྟོན་ནམ་མཁའ་རྡོ་རྗེ་ལས་མགོན་པོ་བྱ་རོག་མའི་སྐོར་སོགས་མང་དུ་གསན། ལྷ་མོ་དུད་སོལ་མ་ཕོ་ཉར་འགྱེད། དགུང་ལོ་གྱ་བཞི་ལ་གཤེགས། རིགས་དབོན་ཀརྨ་སྙན་གྲགས་ཏེ། ཆོས་སྐྱོང་བཀྲ་ཤིས་ཀྱི་སྲས་སུ་ཁྱི་ལོ་ལ་འཁྲུངས། དགུང་ལོ་ལྔ་ནས་གཏོར་མ་ཆ་བཅུ་གཏོང་བ་དང༌། ཡི་གེ་ཚིག་མེད་མཁྱེན། ཁུ་བོ་བླ་མ་བཀྲ་ཤིས་རྒྱལ་མཚན་ལས་འབའ་རོམ་ནས་བརྒྱུད་པའི་ཆོས་ཡོད་དགུ་ཅོག་གསན། བདེ་མཆོག་དང་མགོན་པོ་སོགས་ལ་ཐུགས་དམ་གྱི་མཐིལ་མཛད་དེ་ལུང་བསྟན་ཐོབ། རྒྱལ་དབང་ཀརྨ་པ་དབང་ཕྱུག་རྡོ་རྗེ་ལ་ཡོད་དགུ་ཅོག་ཕུལ་ཞིང་དེ་ཉིད་ཀྱི་དྲུང་ནས་རབ་ཏུ་བྱུང༌། མཚན་ཀརྨ་སྙན་གྲགས་དཔལ་བཟང་པོ། རྗེ་བཙུན་ཆོས་ཀྱི་རྒྱལ་མཚན་གྱི་ཞལ་ནས། ཆོས་ཀྱི་གོ་ཆའི་ཕྲིན་ལས་ཀྱི་སྤྲུལ་པ་ཡིན་པར་བཀས་གནང༌། བླ་མ་བསྟེན་པ་ལའང༌། ཡང་དག་པར་རྫོགས་པའི་སངས་རྒྱས་འཇིག་རྟེན་དུ་ཞལ་བསྟན་པ་ལྔ། བསྟན་པ་ཡོངས་རྫོགས་ཀྱི་དགེ་བའི་བཤེས་གཉེན་ཆེན་པོ་བཞི། ཡང་དག་དགེ་བཤེས་གསུམ་སོགས་བསྟེན། དེ་དག་ལས་འོང་བའི་ཆོས་ཡོད་དགུ་ཅོག་ལ་མ་གསན་པ་གཅིག་ཀྱང་མེད། སྐྱོ་བྲག་ཀུན་དགའ་རྒྱ་མཚོ་ལས། འབའ་རོམ་ནས་བརྒྱུད་པའི་ཆོས་ཡོད་དགུ་ཅོག་གསན། དེང་ཐོག་ཀུན་དགའ་རྒྱལ་མཚན་ལས། ལྷ་མོ་དུད་སོལ་མའི་སྐོར་གསན། ཚིག་ལ་མ་ལུས་ཤིང་དོན་ལ་རྟོགས་པ་བླ་མ་འདི་ཙམ། འོག་མིན་ཀརྨའི་གདན་ས་ལོ་བརྒྱད་ཙམ་དུ་མཛད། ལྷ་སྟེང་གི་གཙུག་ལག་ཁང་ལོག་བྲིས་དང་བཅས་པ་བཞེངས། གཏོར་མ་ལས་བདུད་རྩི་བབས། བདུད་རྩི་ཁོལ་བ། སྒྲོལ་མའི་ལུང་བསྟན་སོགས་བྱུང༌། ཉིན་གཅིག་ང་རང་གི་ལྷ་མོ་དེ་དགའ་འདུག་པས་ད་ལོ་འཆི་བ་ཡིན་པ་འདྲ་གསུངས་ནས་དོན་དགུ་ལ་གཤེགས། འཇའ་དང་འོད་ཀྱིས་ནམ་མཁའ་ཁེངས། ཞག་ཞེ་དགུའི་ཉིན་མོ་ཡང་དེ་བཞིན་དུ་བྱུང༌། བསྟན་བཅོས་ཀྱང་མང་དུ་མཛད། ཀརྨ་རབ་གསལ་ནི། ལྷ་ཚངས་པའི་སྐྱེ་བ་འགྲོ་དོན་སྤྱན་རས་གཟིགས་དང་མཉམ། གདུང་རྒྱུད་ཡོད་སྐབས་ལ། སྡོམ་བྲག་ཉིན་དགོན་དུ་ཡུལ་འདྲེ་དམ་ལ་བཏགས། དབོན་ཀརྨ་དཔལ་འབྱོར་ནི། ཀརྨ་རབ་གསལ་ལས་བརྒྱུད་པའི་གདམས་སྐོར་མ་ལུས་པ་གསན། གཞན་ཡང་མཁས་གྲུབ་ཀརྨ་ཆགས་མེད་ལ་གསང་སྔགས་གསར་རྙིང་གི་ཆོས་སྐོར་གསན་ཞིང་སློབ་བརྒྱུད་དབོན་བུདྡྷ་ཀིརྟི། ཚངས་གསར་རིན་ཆེན་ལྷུན་གྲུབ་སོགས་བྱུང༌། འདི་ཕྱིན་ཤོར་ཕུའི་དབོན་བརྒྱུད་དང་སྤྲུལ་བརྒྱུད་འདྲེས་མར་བྱུང་བའི་བརྒྱུད་པའི་མཚན་སྨོས་པ། ཀརྨ་དཔལ་འབྱོར། བུདྡྷ་ཀིརྟི། ངག་དབང་རྣམ་རྒྱལ། ཀརྨ་ཆོས་དབྱིངས་བཟང་པོ། ཀརྨ་ངག་དབང་ཡོན་ཏན། ཀརྨ་ཕྲིན་ལས་རབ་རྒྱས། ཀརྨ་ཁྱབ་བདག །ཀརྨ་འཆི་མེད་རྣམ་རྒྱལ། ཀརྨ་དོན་བརྒྱུད་བསྟན་པ་རབ་རྒྱས། ཀརྨ་ངེས་དོན་མདོ་སྔགས་བསྟན་འཛིན་ཞེས་ད་ལྟ་བར་བྱོན་པ་སྟེ་ཤོར་ཕུ་པའི་སྐབས་སོ། ། བཅུ་པ་ཕུག་པ་བ་ནི། རྒྱལ་སྲས་ལྷ་པའི་རུས་དབོན་ཏེ། བྱིས་པའི་དུས་ནས་འཇིག་རྟེན་གྱི་བྱ་བ་ལ་བློ་མི་འཇུག །ཆུང་ངུའི་དུས་ནས་སློབ་གཉེར་མང་དུ་མཁྱེན། སྒོམ་སྡེའི་ཆོས་སྤྱོད་རྣམས་བློ་ལ་བཟུང་ཞིང་དེ་དག་འབད་དེ་མཁས་པར་མཛད། དེ་ནས་དགུང་ལོ་བདུན་པར་རྒྱལ་སྲས་ལྷ་པ་རིན་པོ་ཆེའི་མདུན་ན་རབ་ཏུ་བྱུང༌། མཚན་ཚུལ་ཁྲིམས་ཡེ་ཤེས་སུ་གསོལ། བདེ་མཆོག་དང་ཀྱེ་རྡོར་སོགས་ཀྱི་དབང་བསྐུར་རྣམས་ཞུས། གསང་མཚན་ཆོས་དབྱིངས་རྡོ་རྗེ་བཏགས། ཆོས་དྲུག་དང་ཕྱག་ཆེན་སོགས་ཀྱི་གདམས་ཁྲིད་ཞུས་ནས་བསྒོམ་པས་གོ་ཉམས་བཟང་པོ་འཁྲུངས། དེ་ནས་སྒ་སྟོད་གནམ་ལུང་གི་ར་འོག་ཕུག་བྱ་བར་སྔོན་གཙང་པ་མི་བདུན་སོགས་གྲུབ་པ་ཐོབ་པའི་གནས་དེ་ཉིད་དུ་དགུང་ལོ་དགུ་ནས་བཅོ་བརྒྱད་བར་འདག་ཆར་མཛད། མཁྱེན་རྟོགས་ཡོན་ཏན་གྱི་རྩལ་རྫོགས། གྲུབ་པའི་སྙན་པ་ཕྱོགས་ཐམས་ཅད་དུ་ཁྱབ་ཅིང་སློབ་དཔོན་ཕུག་པར་གྲགས། དེ་ནས་འབྲེ་མདའི་མི་སྡེ་རྣམས་ཆོས་དང་དབང་ཁྲིད་ཀྱིས་ཚིམ་པར་མཛད་ནས་རྩི་ཆུའི་ཚུར་ཁར་བྱོན། རོ་ལོ་ཁར་བན་རྒན་རྣམས་ལ་ཆོས་ཀྱི་འཁོར་ལོ་བསྐོར། མི་སྡེ་རྣམས་ལ་དབང་ཁྲིད་མཛད་ནས། སླར་རོ་ལོ་ཕུག་ཏུ་ལོ་བཅུ་གཅིག་ལ་འདག་སྦྱར་ལ་བཞུགས། དེ་ནས་ཁ་རོང་འཇའ་མོས་གདན་དྲངས་རྩི་པ་རྣམས་དབང་ཁྲིད་ཀྱི་ཚིམ་པར་མཛད། ཀོ་མཛོའི་ཕུག་ཏུ་བཞུགས་ནས་འབལ་སེར་བཙན་གསུམ། ནག་གསང་ཚོ་བརྒྱད། བྲོས་པ་ཤ་ད་སོགས་རྩི་ཟླ་བར་གྱི་འགྲོ་མང་སྨིན་གྲོལ་ལམ་ལ་བཀོད། དེ་ནས་ཀིལ་སྣའི་གདན་སར་བྱོན། དགེ་འདུན་པ་རྣམས་ལ་ཞལ་ཏ་ཞིབ་ཏུ་མཛད་ནས་དགུང་གྲངས་དྲུག་ཅུ་རྩ་གསུམ་ལ་སྐུ་གཤེགས། གདུང་དང་རིང་བསྲེལ་དཔག་མེད་བྱོན། བུ་ཆེན་བྱོན་ཚུལ་ལ་དབོན་ཚུལ་ཁྲིམས་རྒྱལ་མཚན། རྟོགས་ལྡན་གཞོན་ནུ་འབྱུང་གནས། ཀུན་དགའ་ཚུལ་ཁྲིམས། སངས་རྒྱས་མཐའ་ལྟོས། སེར་ཡེ་རས་པ། གུང་པ་རྣལ་འབྱོར་སོགས་བྱོན། ར་འོག་ཕུག་གི་གདན་ས་དངོས་འཛིན་པ་ཀུན་དགའ་ཚུལ་ཁྲིམས་ཏེ་བསྟན་དགོན་གྱི་འཛིན་སྐྱོང་སྤེལ་གསུམ་འགྲན་ཟླ་བྲལ་བར་མཛད། སློབ་ཚོགས་ཕལ་ཆེར་ཡང་དེར་བཞུགས། དེ་རྗེས་དབོན་ཚུལ་གྲགས་ཀྱིས་གདན་ས་བསྐྱངས་ཞིང་རི་དགོན་རྣམས་ཕན་ཚུན་སྐྱོངས་རིས་ཀྱི་ཕྱིས་ཀྱི་བར་བྱུང་བ་སྟེ་ཕུག་པའི་སྐབས་སོ། ། བཅུ་གཅིག་པ་རོ་ལོ་བ་ནི། ཕུག་པ་ཚུལ་ཡེའི་སློབ་མ་སྟེ་རབ་ཏུ་བྱུང་བའི་མཚན་ཚུལ་ཁྲིམས་རྒྱལ་མཚན། ཕུག་པ་བ་ལས་གདམས་པ་རྫོགས་པར་གསན་ནས་སྒྲུབ་པ་ལ་མི་ཚེ་བསྐྱལ། རོ་ལོའི་གཙུག་ལག་ཁང་དང་བླ་མ་རིན་པོ་ཆེའི་འདྲ་འབག་དངུལ་སྐུ་ཆེན་མོ་བཞེངས། གྲྭ་ཚོགས་ཀྱང་ཆེར་འདུས་འགྲོ་དོན་རླབས་ཆེན་མཛད། སློབ་མ་ལ་རིགས་དབོན་དབུ་སེ། ཀུན་དགའ་གཞོན་ནུ། ཚུལ་གྲགས་པ་སོགས་བྱོན། དེ་རྗེས་དབུ་སེ་བ་གདན་ས་མཛད་པའི་སློབ་མ་གཅུང་ཚུལ་ཁྲིམས་བློ་གྲོས་ཀྱི་གདན་ས་མཛད་པ་ལ། ཀརྨ་པ་དེ་བཞིན་གཤེགས་པ་དང༌། ཚངས་གསར་བསོད་བློ། རླང་རས་གྲགས་རྒྱལ་བ། ཤོར་ཕུ་ལྷུན་གྲུབ་སོགས་ཀྱི་སློབ་མར་གྱུར་པ་མེ་ཉག་རྣལ་འབྱོར་བློ་གྲོས་རིན་ཆེན་གྱིས་རོ་ལོའི་བན་རྒར་རྣམས་བསྡུས་ཏེ་ཟུར་མང་དུ་སྤོ་བར་མཛད། རོ་ལོའི་དངུལ་སྐུ་ཆེན་མོ་ཡང་ཟུར་མང་དུ་བཞུགས་པ་མཇལ་དུ་ཡོད་ཅིང༌། ཀརྨ་སྙན་བརྒྱུད་དང་འབའ་རོམ་གསེར་ཆོས་ཟུང་འབྲེལ་དུ་བསྐྱངས་བ་སྟེ་རོ་ལོ་པའམ་ཟུར་མང་གི་སྐབས་སོ། ། བཅུ་གཉིས་པ་ཤར་པ་ནི། སློབ་དཔོན་ཕུག་པའི་སློབ་མ་སྟེ། མདོ་ཁམས་སྨད་ནས་སྐུ་འཁྲུངས་པ་ཡིན་ཞིང༌། སྨར་ཚང་གི་ཆོས་རྗེ་འོད་ཟེར་བླ་མ་དང་མཇལ་ནས་ཆོས་མང་དུ་གསན། ཁོང་ལ་སློབ་དཔོན་བདུན་ཡོད་པ་སྟེ། ཕུག་པ་ཚུལ་ཁྲིམས་ཡེ་ཤེས་ཀྱི་སྙན་པ་ཐོས་ནས་ཀིལ་སྣའི་རི་ཁྲོད་དུ་བྱོན། དུང་དཀར་རྒྱ་སྒམ་ཇ་སིག་ཕྱག་རྟེན་ཀྱང་དཔེ་མེད་ཕུལ། མཇལ་ཙམ་གྱི་ལས་འཕྲོ་སད་ནས་ཆོས་ལ་ཐང་ལྷོད་མ་བྱུང་བླ་མས་ཀྱང་སྣོད་ལྡན་གྱི་སློབ་མར་དགོངས་ནས་གདམས་པ་ཐམས་ཅད་རྫོགས་པར་ཚངས་སྤྲུགས་སུ་གནང༌། ལོ་དྲུག་ཏུ་བླ་མའི་དྲུང་དུ་བསྒོམ། བླ་མ་རིན་པོ་ཆེའི་ལུང་བསྟན་བཞིན་དུ་རྔ་རོང་གི་དགོན་འདེབས་པ་ལ། ཀ་ཐོར་མདའ་ནས་ཡར་ཕེབས། མི་རྒན་པོ་ཞིག་གིས་དེ་ཉིད་དུ་ཞིང་རྨོ་ཞིང་མཚན་བརྗོད་འདོན་པ་དང་འཕྲད། བླ་མས་མི་དེ་ལ་ལུང་པ་འདི་ལ་མིངཅི། བྱ་བྲལ་ངས་དགོན་ཆུང་གཅིག་ཨི་ཐེབས་སྙམས་ནས་ཡོང་བ་ཡིན་གསུངས་པས། མི་དེས་ཀྱང་ཞིང་རྨོ་བ་དང་འདོན་པ་བྱེད་བཞིན་པ་ལ་དར་གཅིག་ཅི་མ་ཞུས་ནས། ཆོས་ཀྱི་རྒྱལ་མཚན་ལེགས་པར་འཛུགས། ཞེས་པའི་མཚམས་དེ་རུ་བཞག་ནས་བླ་མ་ཁྱེད་གང་ནས་བྱོན། ཕུ་ཡ་ཀི་ན་དགོན་པ་བཟང་པོ་གཅིག་ཡོད་ཞེས་ལེགས་པའི་ཚིག་དུ་མ་ཞུས། བླ་མས་མཉེས་པའི་གླེང་བསླང་མང་དུ་བྱས་ནས་ཕུ་དེར་ཕེབས་ཏེ་རྔ་རོང་གི་དགོན་བཏབ་གྲྭ་པ་བསྐྱངས་བས་ལོ་གཅིག་ལ་དགེ་འདུན་པ་ལྔ་བཅུ་ཙམ་བྱུང༌། དེ་རྣམས་ཀྱིས་སྒྲུབ་པ་གཙོ་བོར་མཛད་པའི་དམ་བཅའ་གནང༌། སྙིང་ཐང་སྟོད་དུ་བཀྲ་མདོ་དགོན་བཏབ། གཙུག་ལག་ཁང་གསེར་གྱི་་གཎྜི་ར་དང་ལོག་བྲིས་གསེར་སྐུ་ལྡེར་སྐུ་སོགས་བསམ་གྱིས་མི་ཁྱབ་པ་དང་རྨ་ཁྱིམ་གྱི་རི་དགོན་མཛད་པ་སྟེ། བདུན་ཆུ་དོན་གཉིས་ལ་གཤེགས། སེམས་ཅན་ལ་ཕན་ཐོགས་པའི་སློབ་མ་ཤ་སྟག་བྱུང་ཞིང་བརྒྱུད་འཛིན་ནི་རིགས་དབོན་བསོད་ནམས་གྲགས་པ་སྟེ། བླ་མ་ལ་གདམས་པ་ཐམས་ཅད་གསན། མངོན་ཤེས་དང་སྐུ་ལུས་སྤྲུལ་བསྒྱུར་ལ་ཐོགས་པ་མེད། རྔ་རོང་དང་བཀྲ་མདོའི་གདན་ས་མཛད། ཞི་བར་གཤེགས་དུས་ལྷ་རྣམས་ཀྱིས་མཆོད་རྫས་ཐོགས་ཏེ་མངོན་སུམ་དུ་མཆོད་པ་བྱུང༌། དེའི་རིགས་དབོན་གྱི་བརྒྱུད་པ་ལ། བླ་མ་མཁས་གྲུབ་དུ་མ་བྱུང་སྟེ་ཤར་པའི་སྐབས་སོ། ། བཅུ་གསུམ་རྒིས་སྣ་བའམ་ཀིལ་སྣ་བ་ནི། སློབ་དཔོན་ཕུག་པའི་དངོས་སློབ་སྟེ། སྐུ་འཁྲུངས་ཡུལ་རྩི་བརྒྱུད་ཀོ་མཛོ་དང་ཉེ་བའི་སར་ཡབ་མགྲོན་རྡོག་རྒྱལ་བ་ཡེ་ཤེས་ཡུམ་བོ་ལྕོགས་ཞེས་པ་ཆུ་སྟག་ལ་སྐུ་བལྟམས། ཕུག་པ་རིན་པོ་ཆེའི་མདུན་དུ་རབ་ཏུ་བྱུང་བའི་མཚན་གཞོན་ནུ་འབྱུང་གནས། མདོ་སྔགས་ཀྱི་ཆོས་ཚུལ་རྣམས་དང༌། བླ་མེད་ཀྱི་ཐབས་གྲོལ་གདམས་པ་ཡོངས་སུ་རྫོགས་པར་གསན། སྒྲུབ་པ་རྩེ་གཅིག་ཏུ་མཛད་པས་གྲུབ་པ་ཐོབ། ཡིག་དྲུག་དུང་ཕྱུར་དྲུག་འགྲུབ། བྲག་མགོ་ནས་ཕར་ཚུར་འཕུར་བ་སོགས་མཛད། ཀིལ་སྣ་དེ་ཉིད་དུ་གདན་ས་བསྐྱང་ཞིང་རྟོགས་ལྡན་རིན་པོ་ཆེ་ཞེས་པའི་མཚན་སྙན་ཕྱོགས་མཐར་ཁྱབ། དགུང་གྲངས་བདུན་ཅུ་ལ་མྱ་ངན་ལས་འདས། ཞུགས་ལ་ཕུལ་ཚེ་ལྷ་ཀླུ་མི་ཡི་མཆོད་པ་ཕུལ། རྟེན་རིང་བསྲེལ་དུང་གཡས་འཁྱིལ་་སོགས་བྱོན། སློབ་མ་ཡང་རི་པ་བརྩོན་འགྲུས་འབྱུང་གནས་སོ་རག་སེང་གེ་འབུམ་པ། མཛོ་མོ་བ་ཆོས་བཟང༌། སྟག་བན་ཆོས་རིན། རིན་ཆེན་ཤེས་རབ། ཚུལ་གྲགས་པ། རྟོགས་ལྡན་དམར་ཡུ། བསོད་རྒྱལ་བ་སོགས་མང་དུ་བྱོན། གདན་ས་བ་ནི། མཛོ་མོ་བ་དང་ཚུལ་གྲགས་པ་སོགས་ཀྱི་མཛད་ནས་དེ་རྗེས་ཚན་གཅིག་ཚ་བ་སྒང་དུ་བྱོན་ནས་ཚ་བ་བང་ཆེན་དགོན་ཞེས་པ་བཏབ། ཚུལ་ཁྲིམས་རྒྱ་མཚོ་ཞེས་པས་རྒིས་སྣ་འབྲོག་དགོན་བཏབ་པ་སོགས་ཀྱི་བརྒྱུད་པ་ད་ལྟ་བར་ཡོད་པ་སྟེ་ཀིལ་སྣ་བའི་སྐབས་སོ། ། བཅུ་བཞི་པ་སོ་རག་པ་ནི། དེའང་སོ་རག་སེང་གེ་འབུམ་པ་སྐུ་འཁྲུངས་ཡུལ་རྫ་རྒྱུད་མོ་ཐོང་ཐང་རུས་འབྲོང་པ། ཡབ་ཨ་མཆོད་ཁྲ་མོ། ཡུམ་ཉ་སྒྲོན། རྟོགས་ལྡན་གཞོན་ནུ་འབྱུང་གནས་ལས་གདམས་པའི་ཕུ་ཐག་བཅད། གྲུབ་པ་ཐོབ། མི་མ་ཡིན་མང་པོས་ཆོས་ཞུས། བླ་མས་ཁྱོད་ཀྱི་གདུལ་བྱ་ཆམ་གྱི་མགུལ་ན་ཡོད་གསུངས་པས་དེར་བྱོན་ནས་ལྕགས་ཕོ་འབྲུག་ལ་སོ་རག་གི་དགོན་བཏབ། ལྷ་ཁང་དང་བཀའ་བསྟན་འགྱུར་བཞེངས། ལོ་གསུམ་ནས་དགེ་འདུན་སུམ་བརྒྱ་དང་རས་པ་ལྔ་བཅུ་ཙམ་བྱུང༌། ལྷ་འདྲེ་མང་པོ་དམ་ལ་བཏགས། སློབ་མ་སོ་རག་མཁར་པ་ཚུལ་ཁྲིམས་འབྱུང་གནས་ཀྱི་གདན་ས་མཛད། དེ་རྗེས་སུ་སོ་རག་ཕུག་པ་ཚུལ་ཁྲིམས་གྱིས་གདན་ས་བསྐྱངས། དེ་ནས་སོ་རག་བྱ་བྲལ་བ་སྟེ་ཤིན་ཏུ་དར་རྒྱས་ཆེ་བར་བྱུང་ཞིིང་ཕྱིས་སུ་ཡུལ་འབྲོག་དགོན་གཉིས་བྱུང་སྟེ་ཡུལ་དགོན་གྱི་བླ་མ་ནི་ཡང་དབེན་མཁན་ཆེན་དུ་གྲགས་པ་འདི་ཡིན་ལ་དེ་དག་སོ་རག་པའི་སྐབས་སོ། བཅོ་ལྔ་པ་ཁོ་བ་ཕུག་པ་ནི། དེའང་ཤེས་རབ་འོད་ཟེར་ས་མོ་ཕག་ལ་འཁྲུངས། རྟོགས་ལྡན་གཞོན་ནུ་འབྱུང་གནས་ལས་རབ་ཏུ་བྱུང༌། གདམས་པ་ཐམས་ཅད་རྫོགས་པར་གསན། ཡོན་ཏན་དུ་མ་དང་ལྡན། དགུང་ལོ་ལྔ་བཅུ་ལ་རྫ་སྟོད་ཁོ་བའི་དགོན་བཏབ། ལོ་བཅུ་བཞི་ལ་འཚོགས་པ་བསྐྱངས། དྲུག་ཅུ་རེ་གསུམ་ལ་གཤེགས། རིགས་དབོན་བསོད་ནམས་སེང་གེ་སྟེ་ཁོ་བ་ཕུག་པ་ལས་རབ་ཏུ་བྱུང༌། དབང་ཁྲིད་ཐམས་ཅད་རྫོགས་པར་གསན། ལྕགས་གླང་ལོ་ཁོ་བའི་གདན་ས་མཛད། ལྷ་ཁང་ཆེན་མོ་དང་ཐུབ་པའི་ལྡེར་སྐུ་སོགས་བཞེངས། ལོ་སུམ་ཅུ་རྩ་ལྔར་བསྐྱང་བས་དགོན་པ་དར་བར་བྱུང༌། ང་དྲུག་ལ་གཤེགས། དེ་རྗེས་རིགས་དབོན་མང་དུ་བྱོན་པ་སྟེ་ཁོ་བའི་སྐབས་སོ། ། བཅུ་དྲུག་པ་རི་ཕ་བ་ནི། སྤྲུལ་སྐུ་བརྩོན་འགྲུས་འབྱུང་གནས་འཁྲུངས་ཡུལ་ལྕི་ཡི་དབེ་ཁུ། རུས་ཁྱུང་པོ། ཡབ་སྲུང་བ་དཔལ། ཡུམ་བཀྲ་ཤིས་བྱམས། བྱ་ལོ་ལ་འཁྲུངས། ཀརྨ་པ་རོལ་པའི་རྡོ་རྗེའི་དྲུང་ནས་རབ་ཏུ་བྱུང༌། ཚངས་གསར་བཀྲ་ཤིས་རྒྱལ་མཚན་དང༌། རིན་པོ་ཆེ་གཞོན་ནུ་འབྱུང་གནས་ལས་གདམས་པ་ཐམས་ཅད་གསན། ལོ་ཉི་ཤུ་རྩ་ལྔར་གཅིག་རི་མཛད། མངོན་པར་ཤེས་པ་ལ་ཐོགས་པ་མེད། ཀིལ་སྣའི་གདན་སར་བཞུགས། རྡོ་རྗེའི་མགུར་སོགས་བསྟན་ཆོས་མང་དུ་མཛད། རེ་དྲུག་ལ་གཤེགས། རིང་བསྲེལ་མང་དུ་བྱུང༌། སློབ་མ་ནི་གཞོན་ནུ་སེང་གེ་ཚངས་གསར་བསོད་ནམས་བློ་གྲོས། རིགས་དབོན་སངས་རྒྱས་གྲགས། ཁྲི་དོག་བསོད་ནམས་ཡེ་ཤེས། སྐྱོ་བྲག་རིན་ཆེན་བཟང་པོ་སོགས་བྱུང༌། བླ་མ་ཚུལ་ཁྲིམས་གྲགས་པ། ཡུལ་རྩིའི་འབེ་ཤག་གོང༌། མགོན་པོ་རྒྱལ་གྱི་སྲས་སུ་འཁྲུངས། ཀརྨ་པ་རོལ་པའི་རྡོ་རྗེ། སྟག་ལུང་པ། རོ་ལོ་ཚུལ་ཁྲིམས་རྒྱལ་མཚན། གཞོན་ནུ་འབྱུང་གནས་སོགས་ལས་གདམས་པ་གསན། གདན་ས་མཛད། དྲུག་ཅུ་རེ་གསུམ་ལ་གཤེགས། གདན་ས་བ་གཞོན་ནུ་སེང་གེ་རི་ཕའི་དངུལ་མོ་ཁར་བཞུགས། སློབ་བརྒྱུད་རིི་ཕ་དམར་རིལ་བ་སོགས་བྱོན་ཞིང་དེ་དག་ལྕི་རི་བ་སྟེ་རི་ཕའི་སྐབས་སོ། །