རིན་པོ་ཆེ་རྒྱལ་ཚ།

（རྒྱལ་ཚ་རིན་ཆེན་མགོན་ཡང་ཞུ）ཁྲོ་ཕུ་བཀའ་བརྒྱུད་ཀྱི་སྲོལ་གཏོད་པ་པོ། རྗེ་འདི་ཉིད་རབ་བྱུང་གཉིས་པའི་ས་ཁྱི（༡༡༡༨）ལོར་ཡབ་གནུབས་ཀྱི་གདུང་རྒྱུད་དང་། ཡུམ་ལྷ་གཅིག་གི་སྲས་སུ་ཤབ་སྨད་འཇལ་དུ་སྐུ་འཁྲུངས། དགུང་ལོ་ལྔ་ནས་ཡིག་རྩིས་བསླབས། སྐུ་ཆུང་ངུའི་དུས་ནས་འཇིག་རྟེན་ལ་མི་མཉེས་ཤིང་ཆོས་ལ་དགྱེས་པ་ཞིག་ཡོད། སློབ་དཔོན་གན་ཆག་པ་དང། གནུར་ཉི་མ། རམ་སྡིམ་མ་བ། དགེ་བཤེས་རྩི་ཉན་སོགས་བླ་མ་མང་པོ་བསྟེན་ནས་ཆོས་མང་དུ་གསན། དགུང་ལོ་བཅུ་དགུ་པར་དབུས་སུ་ཕེབས་ཏེ་གཡོར་པོ་ལུགས་སྨད་དུ་པུ་ཧྲེངས་ལོ་ཙྭ་བའི་དངོས་སློབ་དམར་ཆོས་ཀྱི་རྒྱལ་པོ། མེས་སྟོན་ཀུན་སྙིང། རྔོག་མདོ་སྡེ་སོགས་བསྟེན། དགུང་ལོ་ཉི་ཤུ་རྩ་ལྔ་པར་རང་ཡུལ་དུ་བྱོན་ནས་ཆེ་སདོན་མཛད་ཅིང་། ཆོས་འགའ་རེ་ཡང་གསུངས། དེ་ནས་བྲག་དཀར་པོ་བ། ཞུ་དོན་མོ་རི་བ་སོགས་བླ་མ་མང་པོ་ལས་ཆོས་གསན། བླ་མ་དམར་གྱིས་ཕག་མོ་གྲུར་བརྫངས་པ་ལྟར་བྱོན་ནས་ཕག་མོ་གྲུ་པའི་སྐུ་མདུན་ནས་ཆོས་གདམས་ངག་མང་དུ་གསན་ཅིང་། དེར་ཕྱག་རྒྱ་ཆེན་པོའིརྟོག་པ་ཁྱད་པར་ཅན་འཁྲུངས། དགུང་ལོ་ལྔ་བཅུ་རྩ་བཞི་པར་དོན་མི་རིར་བྱོན་ནས་མཁན་པོ་ཞང་ཞི་མཛེས་ལས་བསྙེན་པར་རྫོགས། རབ་བྱུང་གསུམ་པའི་ལྕགས་ཡོས（༡༡༧༡）ལོར་ཁྲོ་ཕུ་དགོན་པ་བཏབ་ནས་དགེ་འདུན་ཉི་ཤུ་ཙམ་བསྡུས། དེ་ནས་བཟུང་ཁྲོ་ཕུ་བཀའ་བརྒྱུད་བྱ་བ་བྱུང་། མཐར་དགུང་ལོ་བདུན་བཅུ་རྩ་བརྒྱད་པ་རབ་བྱུང་གསུམ་པའི་ཤིང་ཡོས（༡༡༩༥）ལོར་སྐུ་གཤེགས།དུང་དཀར་ཚིག་མཛོད་ཆེན་མོ་༽ལས་བཏུས།