ཐུན་མོང་མ་ཡིན་པའི་གཏོར་མ་
༄༅། །༧ཇོ་ནང་ཀུན་མཁྱེན་དོལ་པོ་སངས་རྒྱས་ཀྱིས་མཛད་པའི་«ཐུན་མོང་མ་ཡིན་པའི་གཏོར་མ་»ཞེས་བྱ་བའི་གཞུང་དང་ས་བཅད་སྦྲགས་མ་བཞུགས་སོ། །
༄༅། །༧ཇོ་ནང་ཀུན་མཁྱེན་དོལ་པོ་སངས་རྒྱས་ཀྱིས་མཛད་པའི་«ཐུན་མོང་མ་ཡིན་པའི་གཏོར་མ་»ཞེས་བྱ་བའི་གཞུང་བཟང་འདི་ཉིད་འཆད་པ་ལ་གསུམ་སྟེ།
༡༽ཐོག་མར་དགེ་བ་ཀླད་ཀྱི་དོན་དང་།
༢༽བར་དུ་དགེ་བ་གཞུང་གི་དོན་དང་།
༣༽ཐ་མར་དགེ་བ་མཛད་བྱང་སོགས་སྨོས་པའོ། །
དང་པོ་ཐོག་མར་དགེ་བ་ཀླད་ཀྱི་དོན་ལ་གཉིས་ཏེ།
༡༽བསྟན་བཅོས་ཀྱི་མཚན་སྨོས་པ་ནི།
༄༅། །ཐུན་མོང་མ་ཡིན་པའི་གཏོར་མ་བཞུགས།
༢༽མཆོད་པར་བརྗོད་པ་ནི།
ཨོཾ་ཨཱཿཧཱུཾ་ཧོཿ
༣༽མཆོད་འབུལ་ལ་བསྐུལ་བ་ནི།
དཀོན་མཆོག་མཆོད་པ་ལ་རྟག་ཏུ་བརྩོན་པར་བྱའོ། །
གསུམ་པ་བར་དུ་དགེ་བ་གཞུང་གི་དོན་ལ་དྲུག་སྟེ།
དང་པོ་དབུལ་བྱ་མཆོད་རྫས་དག་ཚུལ་བསྟན་པ་ནི།
དེ་ལ་མཆོད་རྫས་ནི་བསད་ཤ་རྣམ་པ་ཐམས་ཅད་དུ་སྤངས་པ། དཀར་གསུམ་མངར་གསུམ་ལ་སོགས་པ་སྡིག་པ་དང་མ་འདྲེས་པ་ཅི་འབྱོར་པ་རྣམས།
གཉིས་པ་ཇི་ལྟར་སྔགས་ཀྱིས་བྱིན་གྱིས་བརླབ་ཚུལ་བསྟན་པ་ནི།
ཨོཾ་ཨཱཿཧཱུཾ་ཧོཿ ཞེས་བདུད་རྩིར་བྱིན་གྱིས་བརླབས་ནས།
གསུམ་པ་ཡུལ་གང་ལ་འབུལ་ཚུལ་བསྟན་པ་ལ་བཅོ་ལྔ་སྟེ།
༡༽བླ་མ་དཀོན་མཆོག་རྣམས་ལ་འབུལ་ཚུལ་ནི།
བླ་མ་དཀོན་མཆོག་ནམ་མཁའ་གང་བར་རྟག་ཏུ་བཞུགས་པ་ཐམས་ཅད་ལ་འབུལ་ལོ། །
༢༽གཟུགས་གཞན་རྣམ་པར་སྣང་མཛད་ལ་འབུལ་ཚུལ་ནི།
གཟུགས་ལ་བཞུགས་པའི་གཟུགས་གཞན་རྣམ་པར་སྣང་མཛད་ལ་འབུལ་ལོ། །
༣༽ཚོར་བ་གཞན་རིན་ཆེན་འབྱུང་ལྡན་ལ་འབུལ་ཚུལ་ནི།
ཚོར་བ་ལ་བཞུགས་པའི་ཚོར་བ་གཞན་རིན་ཆེན་འབྱུང་ལྡན་ལ་འབུལ་ལོ། །
༤༽འདུ་ཤེས་གཞན་འོད་དཔག་མེད་ལ་འབུལ་ཚུལ་ནི།
འདུ་ཤེས་ལ་བཞུགས་པའི་འདུ་ཤེས་གཞན་འོད་དཔག་མེད་ལ་འབུལ་ལོ། །
༥༽འདུ་བྱེད་གཞན་དོན་ཡོད་གྲུབ་པ་ལ་འབུལ་ཚུལ་ནི།
འདུ་བྱེད་ལ་བཞུགས་པའི་འདུ་བྱེད་གཞན་དོན་ཡོད་གྲུབ་པ་ལ་འབུལ་ལོ། །
༦༽རྣམ་ཤེས་གཞན་མི་བསྐྱོད་པ་ལ་འབུལ་ཚུལ་ནི།
རྣམ་ཤེས་ལ་བཞུགས་པའི་རྣམ་ཤེས་གཞན་མི་བསྐྱོད་པ་ལ་འབུལ་ལོ། །
༧༽ཡེ་ཤེས་གཞན་རྡོ་རྗེ་སེམས་དཔལ་ལ་འབུལ་ཚུལ་ནི།
ཡེ་ཤེས་ཀྱི་ཕུང་པོ་ལ་བཞུགས་པའི་ཡེ་ཤེས་གཞན་རྡོ་རྗེ་སེམས་དཔལ་ལ་འབུལ་ལོ། །
༨༽མིག་གཞན་སའི་སྙིང་པོ་ལ་འབུལ་ཚུལ་ནི།
མིག་ལ་བཞུགས་པའི་མིག་གཞན་སའི་སྙིང་པོ་ལ་འབུལ་ལོ། །
༩༽རྣ་བ་གཞན་ཕྱག་ན་རྡོ་རྗེ་ལ་འབུལ་ཚུལ་ནི།
རྣ་བ་ལ་བཞུགས་པའི་རྣ་བ་གཞན་ཕྱག་ན་རྡོ་རྗེ་ལ་འབུལ་ལོ། །
༡༠༽སྣ་གཞན་ནམ་མཁའི་སྙིང་པོ་ལ་འབུལ་ཚུལ་ནི།
སྣ་ལ་བཞུགས་པའི་སྣ་གཞན་ནམ་མཁའི་སྙིང་པོ་ལ་འབུལ་ལོ། །
༡༡༽ལྕེ་གཞན་འཇིག་རྟེན་དབང་ཕྱུག་ལ་འབུལ་ཚུལ་ནི།
ལྕེ་ལ་བཞུགས་པའི་ལྕེ་གཞན་འཇིག་རྟེན་དབང་ཕྱུག་ལ་འབུལ་ལོ། །
༡༢༽ལུས་གཞན་སྒྲིབ་པ་རྣམ་སེལ་ལ་འབུལ་ཚུལ་ནི།
ལུས་ལ་བཞུགས་པའི་ལུས་གཞན་སྒྲིབ་པ་རྣམ་སེལ་ལ་འབུལ་ལོ། །
༡༣༽ཡིད་གཞན་ཀུན་ཏུ་བཟང་པོ་ལ་འབུལ་ཚུལ་ནི།
ཡིད་ལ་བཞུགས་པའི་ཡིད་གཞན་ཀུན་ཏུ་བཟང་པོ་ལ་འབུལ་ལོ། །
༡༤༽གཟུགས་གཞན་གཟུགས་རྡོ་རྗེ་མ་ལ་འབུལ་ཚུལ་ནི།
གཟུགས་ལ་བཞུགས་པའི་གཟུགས་གཞན་གཟུགས་རྡོ་རྗེ་མ་ལ་འབུལ་ལོ། །
༡༥༽སྒྲ་གཞན་སྒྲ་རྡོ་རྗེ་མ་ལ་འབུལ་ཚུལ་ནི།
སྒྲ་ལ་བཞུགས་པའི་སྒྲ་གཞན་སྒྲ་རྡོ་རྗེ་མ་ལ་འབུལ་ལོ། །
༡༦༽དྲི་གཞན་དྲི་རྡོ་རྗེ་མ་ལ་འབུལ་ཚུལ་ནི།
དྲི་ལ་བཞུགས་པའི་དྲི་གཞན་དྲི་རྡོ་རྗེ་མ་ལ་འབུལ་ལོ། །
༡༧༽རོ་གཞན་རོ་རྡོ་རྗེ་མ་ལ་འབུལ་ཚུལ་ནི།
རོ་ལ་བཞུགས་པའི་རོ་གཞན་རོ་རྡོ་རྗེ་མ་ལ་འབུལ་ལོ། །
༡༨༽རོ་གཞན་རོ་རྡོ་རྗེ་མ་ལ་འབུལ་ཚུལ་ནི།
རེག་ལ་བཞུགས་པའི་རེག་གཞན་རེག་རྡོ་རྗེ་ལ་འབུལ་ལོ། །
༡༩༽ཆོས་གཞན་ཆོས་ཁམས་རྡོ་རྗེ་མ་ལ་འབུལ་ཚུལ་ནི།
ཆོས་ལ་བཞུགས་པའི་ཆོས་གཞན་ཆོས་ཁམས་རྡོ་རྗེ་མ་ལ་འབུལ་ལོ། །
༢༠༽དེ་བཞིན་ཆོས་ཉིད་རྣམ་ཤེས་དྲུག་དང༌ཆོས་ཉིད་རེག་པ་དྲུག་དང༌ཆོས་ཉིད་ཚོར་བ་དྲུག་དང༌ཆོས་ཉིད་ཁམས་དྲུག་དང༌ཆོས་ཉིད་རྟེན་འབྲེལ་བཅུ་གཉིས་ལ་སོགས་པ་ཆོས་ཉིད་འོད་གསལ་བའི་ཡེ་ཤེས་ཀྱི་ལྷ་ཚོགས་ཐམས་ཅད་ལ་འབུལ་ཚུལ་ནི།
རྣམ་ཤེས་དྲུག་དང༌། རེག་པ་དྲུག་དང༌། ཚོར་བ་དྲུག་དང༌། ཁམས་དྲུག་དང༌། རྟེན་འབྲེལ་བཅུ་གཉིས་ལ་སོགས་པ་ཆོས་ཐམས་ཅད་ལ་བཞུགས་པའི་ཆོས་ཉིད་འོད་གསལ་རྣམ་པ་ཐམས་ཅད་པ་ཡེ་ཤེས་ཀྱི་ལྷ་ཚོགས་ཐམས་ཅད་ལ་འབུལ་ལོ། །
བཞི་པ་གཏོར་མ་འབུལ་སྐབས་དམིགས་རིམ་ཇི་ལྟར་གསལ་གདབ་ཚུལ་ནི།
སྙམ་དུ་བསམ་ཞིང་ངག་ཏུ་ཡང་བརྗོད་པས། ལྷ་ཐམས་ཅད་ཀྱིས་ལོངས་སྤྱོད་པར་བསམ་ཞིང་མཉེས་པར་གྱུར་ཅིག །ཅེས་ཀྱང་བརྗོད་དོ། །
ལྔ་པ་འདི་ནི་ཐུན་མཚམས་རྣལ་འབྱོར་གྱི་ཡ་གྱལ་ཟས་ཀྱི་རྣལ་འབྱོར་གྱི་ཉམས་ལེན་དུ་བསྟན་པ་ནི།
འདི་ནི་ཁ་ཟས་ཀྱི་རྣལ་འབྱོར་ཟབ་མོ་མདོར་བསྡུས་པའོ། །
དྲུག་པ་སླར་ཡང་མཆོད་ཡུལ་རྒྱས་པར་སྤྲོས་ནས་གསལ་བཏབ་ཚུལ་ནི།
རྒྱས་པར་ན་སྐྲ་ལ་བཞུགས་པའི་སྐྲ་གཞན་དང༌། བ་སྤུ་ལ་བཞུགས་པའི་བ་སྤུ་གཞན་ལ་སོགས་པ་གཞན་རིགས་ཀྱི་དབྱེ་བ་རྒྱས་པར་ཤེས་པ་རྣམས་ཀྱིས་མང་པོ་དཔག་ཏུ་མེད་པ་ཚད་མེད་པ་ཡང་གསལ་བཏབ་ནས་མཆོད་པ་འབུལ་ཞིང༌། འདོད་དོན་གསོལ་བ་ཡང་གདབ་བོ། །སྨོན་ལམ་འདིའང་བཏབ་བོ། །
གསུམ་པ་ཐ་མར་དགེ་བ་མཇུག་གི་དོན་གསུམ་ལ་གཉིས་ཏེ།
༡༽མཛད་བྱང་སྨོས་པ་ནི།
ཁ་ཟས་ཀྱི་རྣལ་འབྱོར་འདི་ནི། རྒྱལ་ཁམས་པས་བཀོད་པའོ།། །།
༢༽སྨོན་ཚིག་བརྗོད་པ་ནི།
མངྒ་ལཾ། བྷ་ཝན་ཏུ།
(མ་དཔེ་ནི་འབྲས་གནས་བཅུའི་དཔེ་རྙིང་ཕྱི་ལ། ༤༢༡ སྤར་མ་དང་འཛམ་ཐང་པར་མ་ཡིན།)
ཞེས་པའང་གནས་མཆོག་ཝཱ་རཱ་ཎ་སཱིར་ཁྲ་འགུ་བཛྲ་བིདྱཱ་གཙུག་ལག་སློབ་གཉེར་ཁང་དུ། ཕྱི་ལོ་༢༠༢༠ ཟླ་༩ སྤྱི་ཚེས་༢༦ དང་བོད་ཚེས་༡༠ ཉིན་མོའི་དུས་བཟང་དང་སྟབས་བསྟུན་ཏེ་ཐུན་མཚམས་སུ་གུས་དོལ་པོ་པ་གཞན་སྟོང་འཇིགས་མེད་གུ་ཡངས་ནས། ༧ཇོ་ནང་ཀུན་མཁྱེན་དོལ་པོ་སངས་རྒྱས་ཀྱིས་མཛད་པའི་«ཐུན་མོང་མ་ཡིན་པའི་གཏོར་མ་»ཞེས་བྱ་བའི་གཞུང་བཟང་འདི་ཉིད་ལ་ས་བཅད་སྟབས་བདེ་ཞིག་ཁ་སྣོན་བགྱིས་པའི་དགེ་རྩའི་མཐུས། རྫོགས་ལྡན་ལུགས་ཀྱི་བདེ་གཤེགས་སྙིང་པོའི་ཆོས་ཚུལ་རྣམས་མ་ནོར་བར་ཇི་བཞིན་ཡོངས་སུ་རྫོགས་པར་བདག་གཞན་ཀུན་གྱིས་རྟོགས་ཤིང་། མཐར་གཞན་སྟོང་ཨེ་ཝཾ་མ་ནིང་གི་གོ་འཕང་ཆེན་པོ་འཐོབ་པར་སྨོན་ནོ།། །།