རྒྱལ་རབས་གསལ་བའི་མེ་ལོང

མཛད་པ་པོའི ་ལོ་རྒྱུས།

ས་སྐྱ་བསོད་ནམས་རྒྱལ་མཚན་ནི་སྤྱི་ལོ1372ལོར་ཞ་ལུ་ཁང་གསར་དུ་འཁྲུངས་ཤིང་། རང་ལོ་བརྒྱད་ལ་སླེབས་དུས་ནས་གཞུང་ལུགས་མང་པོ་གསལ་ལ་རྒྱ་ཆེ་བའི་སྒོ་ནས་བཤད་ཐུབ་པས་སྙན་གྲགས་ཆེ་བར་གྱུར། ལོ་བཅུ་བདུན་ལ་མཁན་པོ་བསོད་ནམས་གྲགས་པ་དང་། སློབ་དཔོན་དཔལ་ལྡན་སེང་གེ་གཉིས་ཀྱི་དྲུང་དུ་རབ་ཏུ་བྱུང་ནས་མཚན་བསོད་ནམས་རྒྱལ་མཚན་དཔལ་བཟང་པོ་ཞེས་གསོལ། བུ་སྟོན་རིན་ཆེན་གྲུབ་དང་། རྒྱལ་སྲས་ཐོགས་མེད་བཟང་བོ། དཔང་བློ་གྲོས་བརྟན་པ་སོགས་བླ་མ་མང་པོ་བསྟེན་འཆད་རྩོད་རྩོམ་གསུམ་གྱི་མཛད་པ་སྤེལ་བ་ལས། ཚད་མ་དང་། ཕར་ཕྱིན། དབུ་མ། གསང་སྔགས་སོགས་རིག་གནས་དང་ཆོས་འབྱུང་གི་དཔེ་ཆའང་མང་པོ་བརྩམས་ཡོད་པ་རེད།

ནང་དོན་མདོར་བསྡུས།

དེབ་ཐེར་འདིའི་ནང་དོན་གཙོ་བོར་བསྐལ་པ་ཆགས་ཚུལ་དང་རྒྱ་གར་དུ་བསྟན་པ་བྱུང་ཚུལ། རྒྱ་ཧོར་གྱི་ཡུལ་དུ་དམ་ཆོས་དར་ཚུལ། ཁ་བ་ཅན་པའི་མི་རྒྱུད་གྲོལ་ཚུལ། བོད་རྒྱལ་པོའི་གདུང་རབས། བོད་སིལ་བུར་ཆད་ཚུལ། ཡུམ་བརྟན་དང་འོད་སྲུངས་ཀྱི་རྒྱལ་རྒྱུད། ལྷ་བླ་མ་ཡེ་ཤེས་འོད་ཀྱིས་ཇོ་བོ་རྗེ་གདན་དྲངས་ཚུལ་སོགས་བྲིས་ཡོད། དེའང་ཆེ་ས་ནས་དབྱེ་ན། བསྟན་བཅོས་འདི་ཁག་གསུམ་དུ་དབྱེ་རུང་སྟེ། ཁག་དང་པོ་རྒྱ་གར་དུ་བསྟན་པ་བྱུང་ཚུལ་དང་བསྟན་པ་ཕྱོགས་མཐར་སྤེལ་ཚུལ་སྐོར་དང་། ཁག་གཉིས་པ་བོད་ཀྱི་བཙན་པོའི་གདུང་རབས་དང་བཙན་པོ་སྲོང་བཙན་སྒམ་པོའི་མཛད་རྗེས་སྐོར། ཁག་གསུམ་པ་སྲོང་བཙན་སྒམ་པོའི་རྗེས་ཀྱི་རྒྱལ་རབས་ནས་ལྷ་བླ་མ་ཡེ་ཤེས་འོད་བར་གྱི་བཙན་པོ་སོ་སོའི་མཛད་འཕྲིན་སྐོར་བཅས་གསལ་བར་བཀོད་ཡོད།

དཀར་ཆག

མཆོད་བརྗོད།

བསྐལ་བ་ཇི་ལྟར་ཆགས་པ་ནས། རྒྱ་གར་གྱི་ཆོས་རྒྱལ་རིམ་པ་བྱོན་པ་དང་། སྟོན་པ་ཤཱཀྱ་ཐུབ་པ་འཇིག་རྟེན་དུ་བྱོན་ནས་དམ་པའི་ཆོས་དར་བའི་སྐོར།

སངས་རྒྱས་ཤཱཀྱ་ཐུབ་པའི་སྐུ་གསུམ་བཞེངས་པ་དང་རབ་ཏུ་གནས་པར་མཛད་པའི་སྐོར།

རྒྱ་ཧོར་གྱི་ཡུལ་དུ་དམ་པའི་ཆོས་དར་བ་དང་། རྒྱལ་པོའི་རྣམ་གྲངས་ཇི་ལྟར་བྱོན་པ་བསྟན་པའི་སྐོར།

འཕགས་པ་པདྨ་ལ་འཁྲུངས་པ་ལས། ཡི་གེ་དྲུག་པའི་ཕན་ཡོན་བསྟན་པའི་བསྟན་ཡོད།

འཕགས་པ་སྤྱན་རས་གཟིགས་ཀྱིས་ཁ་བ་ཅན་པའི་སེམས་ཅན་རྣམས་སྨིན་གྲོལ་ལ་འཁོད་པའི་སྐོར།

རྟའི་རྒྱལ་པོར་སྤྲུལ་ནས་སེམས་ཅན་གྱི་དོན་མཛད་པའི་སྐོར།

བོད་ཀྱི་མི་བརྒྱུད་སྤྲེའུ་དང་བྲག་སྲིན་མོ་ནས་ཆད་པའི་སྐོར།

བོད་རྒྱལ་པོའི་གདུང་རབས་དང་པོ་ཇི་ལྟར་བྱོན་པ་བསྟན་པའི་སྐོར།

འཕགས་པ་སྤྱན་རས་གཟིགས་ཀྱི་སྐུ་ལ་འོད་ཟེར་བཞི་འཕྲོས་པ་ལས། ཆོས་རྒྱལ་འཁྲུངས་པའི་སྐོར།

བློན་པོ་ཐོན་མིས་རྒྱ་གར་ནས་ཡི་གེ་བསྒྱུར་བ་ལས། རྒྱལ་པོས་དགེ་བ་བཅུའི་ཁྲིམས་བཅས་པའི་སྐོར།

རྒྱལ་པོའི་ཐུགས་དམ་གྱི་ལྷ་རྒྱ་གར་དང་། བལ་བོའི་ཡུལ་ནས་སྤྱན་དྲངས་པའི་སྐོར།

བལ་མོ་བཟའ་ཁྲི་བཙུན་གདན་དྲངས་པའི་སྐོར།

རྒྱ་མོ་བཟའ་ཀོང་ཇོ་གདན་དྲངས་པའི་སྐོར།

མཐའ་འདུལ་ཡང་འདུལ་གྱི་ལྷ་ཁང་དང་། འཕྲུལ་སྣང་ར་མོ་ཆེ་རྣམས་ལེགས་པར་བཞེངས་པའི་སྐོར།

ལྷ་ས་གཉིས་དང་། མཐའ་འདུལ་ཡང་འདུལ་གྱི་གཙུག་ལག་ཕན་པ་དང་བདེ་བ་འབྱུང་བའི་ཕྱིར། གཏེར་སྦས་པ་དང་བོད་འབངས་ཐམས་ཅད་ཆོས་ལ་བཀོད་པར་མཛད་པའི་སྐོར།

རྒྱལ་པོ་ཡབ་ཡུམ་གྱི་མཛད་པ་ཡོངས་སུ་རྫོགས་ཏེ། རང་བྱོན་བཅུ་གཅིག་ཞལ་གྱི་ཐུགས་ཀར་ཐིམ་པའི་སྐོར།

དབོན་སྲས་མང་སྲོང་མང་བཙན་གྱི་སྐོར།

འདུལ་སྲོང་མང་པོ་རྗེ་རླུང་ནམ་འཕྲུལ་གྱི་རྒྱལ་པོའི་སྐོར།

ཁྲི་ལྡེ་གཙུག་བརྟན་མེས་ཨག་ཚོམ་གྱི་སྐོར།

ཆོས་རྒྱལ་ཁྲི་སྲོང་ལྡེ་བཙན་གྱི་སྐོར།

སྲས་མུ་ནེ་བཙན་པོའི་སྐོར།

སྲས་མུ་ཏིག་བཙན་པོ་དང་ཁྲི་ལྡེ་སྲོང་བཙན་སད་ན་ལེགས་འཇིང་ཡོན་གྱི་སྐོར།

སྲས་ལྡེང་ཁྲིའི་སྐོར།

མངའ་བདག་རལ་པ་ཅན་གྱི་སྐོར།

ཁྲི་གླང་དར་མ་དབུ་དུམ་བཙན་གྱི་སྐོར།

མངའ་བདག་འོད་སྲུངས་དང་མངའ་བདག་ཡུམ་བརྟན་གཉིས་ཀྱི་སྐོར།

ཡུམ་བརྟན་གྱི་རྒྱལ་བརྒྱུད་རྣམས་ཀྱི་སྐོར།

སླར་ཁམས་ནས་སངས་རྒྱས་ཀྱི་བསྟནཔ་དར་བའི་སྐོར།

འོད་སྲུངས་ཀྱི་རྒྱལ་བརྒྱུད་རྣམས་ཀྱི་སྐོར།

ལྷ་བླ་མ་བྱང་ཆུབ་འོད་ཀྱིས་ཇོ་བོ་རྗེ་གདན་དྲངས་པའི་སྐོར།

ཡ་ཚེའི་རྒྱལ་རྒྱུད་སྐོར།

ཡར་ལུང་ཇོ་བོའི་རྒྱལ་བརྒྱུད་ཀྱི་སྐོར།

དཔྱད་གཞི་ཡིག་ཆ

1  [null ས་སྐྱ་བསོད་ནམས་རྒྱལ་མཚན་གྱིས་བརྩམས་པའི 《རྒྱལ་རབས་གསལ་བའི་མེ་ལོང》 མི་རིགས་དཔེ་སྐྲུན་ཁང་། 2015ལོའི་ཟླ4པའི་པར་ཐེངས་དང་པོ། ཤོག་གྲངས1-2ན་གསལ།]

2  [null རྨེ་རུ་ཡུལ་ལྷ་ཐར་གྱིས་རྩོམ་སྒྲིག་བྱས་པའི 《བོད་ཀྱི་གནའ་རབས་ལོ་རྒྱུས་དཔྱད་བརྗོད་དང་ལོ་རྒྱུས་རིག་གཞུང་གི་ཤུལ་བཞག་ཡིག་ཆ་ཞིབ་འཇུག》 བོད་ལྗོངས་མི་དམངས་དཔེ་སྐྲུན་ཁང་། 2015ལོའི་ཟླ12པའི་པར་ཐེངས་དང་པོ། ཤོག་གྲངས351-361ན་གསལ།]

[[༡]]