ལྷོ་ནུབ་མི་རིགས་སློབ་གྲྭ་ཆེན་མོ
༡ ངོ་སྤྲོད་མདོར་བསྡུས། རྩོམ་སྒྲིག
ལྷོ་ནུབ་མི་རིགས་སློབ་གྲྭ་ཆེན་མོ་ནི་རྩོམ་རིགས་དང་ལོ་རྒྱུས། ཚད་མ། དཔལ་འབྱོར་དོ་དམ། ཁྲིམས་ལུགས། རྩིས་རིག ཞིང་ལས་རིག་པ་སོགས་ཆེད་ལས་གང་མང་ཡོད་པའི་སྣ་འཛོམས་ཅན་གྱི་མཐོ་རིམ་སློབ་གྲྭ་ཆེན་མོ་ཞིག་ཡིན། སློབ་གྲྭ་འདི་སྤྱི་ལོ་༡༩༥༠ལོའི་ཟླ༧པར་ཐོག་མར་ཚུགས་པ་དང་སྤྱི་ལོ་༡༩༥༡ལོའི་ཟླ་༦པའི་ཚེས་༡ཉིན་དངོས་སུ་དབུ་བཪྙེས་བ། སློབ་གྲྭ་འདི་ནི་ཀྲུའུ་བོན་ལེའེ་དང་ཏུན་ཞོའོ་ཕེན་སོགས་འབྱོར་མེད་གྲལ་རིམ་གྱི་གསར་བརྗེ་པ་རྒན་རབས་རྣམས་ཀྱི་མཛའ་བརྩེའི་ཐུགས་ཁུར་འོག་ཀྲུང་གོ་གསར་པ་དབུ་འཛུགས་སྔ་བའི་མི་རིགས་སློབ་གླིང་ཞིག་ཡིན། རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་གིས་བདག་གཉེར་བྱེད་ཀྱིན་ཡོད།
༢ གནས་བབ། རྩོམ་སྒྲིག
སྤྱི་ལོ་༢༠༠༣ལོའི་ཟླ་༤པའི་ཚེས་༡༦ཉིན་རྒྱལ་ཁབ་སློབ་གསོ་པུའུ་ཡི་ཆོག་མཆན་ཐོབ་པ་བརྒྱུད་སློབ་གྲྭའི་མིང་ལྷོ་ནུབ་མི་རིགས་སློབ་གླིང་ནས་དངོས་སུ་ལྷོ་ནུབ་མི་རིགས་སློབ་གྲྭ་ཆེན་མོར་བསྒྱུར། ལོ་དེའི་ཟླ་དགུ་བར་རྒྱལ་སྲིད་སྤྱི་ཁྱབ་ཁང་སློབ་རྟགས་ཨུ་ཡོན་ལྷན་ཁང་གི་ཆོག་མཆན་ཐོབ་པ་བརྒྱུད་སློབ་གྲྭ་འདིར་འབུམ་རམས་པའི་སློབ་རྟགས་སྤྲོད་ཆོག་པའི་སློབ་གྲྭའི་གྲལ་དུ་བཞག
༢༠༠༣ལོར་སློབ་གསོ་པུའུ་ཡིས་བཀའ་བཅུ་བའི་སློབ་གསོ་བྱ་བའི་ཆུ་ཚད་བརྟག་དཔྱད་ཁྲོད་ཕུལ་བྱུང་གི་མཚན་སྙན་ཐོབ། སློབ་གྲྭ་འདི་ཚུགས་ནས་ལོ་ངོ་ལྔ་བཅུ་ལྷག་གི་རིང་ལ་མི་རིགས་ས་ཁུལ་ལ་ཕྱོགས་གང་ཐད་ཀྱི་ཤེས་ལྡན་མི་སྣ་༥༠༠༠༠ལྷག་བསྐྱེད་སྲིང་བྱས། སློབ་གྲྭ་འདིས་མི་རིགས་ས་ཁུལ་ཀྱི་བཅིངས་འགྲོལ་དང་སྲིད་དབང་འཛུགས་སྐྲུན། རྒྱལ་ཁབ་ཀྱི་མཐའ་མཚམས་བདེ་འཇགས། མི་རིགས་མཐུན་སྒྲིལ། མི་རིགས་ས་ཁུལ་གྱི་དཔལ་འབྱོར་འཕེལ་རྒྱས་དང་སྤྱི་ཚོགས་ཡར་རྒྱས་ཐད་ལ་བྱས་རྗེས་ཆེན་པོ་བཞག
༣ སློབ་གསོ རྩོམ་སྒྲིག
སློབ་གྲྭའི་སྤྱིའི་རྒྱ་ཁྱོན་ལ་མུའུ་༡༦༠༠ལྷག་ཡོད། སློབ་གྲྭ་འདི་ལ་སློབ་ཁུལ་གསུམ་ཡོད་དེ། སློབ་ཁུལ་ཪྙིང་པ་དང་སློབ་ཁུལ་གསར་པ། ཞི་བདེ་གླིང་སློབ་ཁུལ་བཅས་དང་། གཞན་སློབ་གླིང་༡༨ ཚན་ཁག་༡ པུའུ་༢ཡོད། རིག་ཁག་སྣ་༩ཡོད་པ། བཀའ་བཅུ་བའི་ཆེད་ལས་༤༧ཡོད་པ། ལྷ་རམས་པའི་ས་ཚུགས་༢༨ཡོད་པ། ཆེད་ལས་སློབ་རྟགས་༢ འབུམ་རམས་པའི་ས་ཚུགས་༡བཅས་ཡོད། མིག་སྔར་སློབ་གྲྭ་འདིའི་སློབ་མའི་མི་གྲངས་ཁྲི་༢ལྷག་ཡོད། དགེ་བཟོ་བ་༡༤༠༠ལྷག་ཡོད། སློབ་གྲྭ་འདི་ལ་ཚན་རིག་ཞིབ་འཇུག་ནུས་པ་ཆེན་པོ་ལྡན་ཏེ། སློབ་གྲྭར་ལྷོ་ནུབ་མི་རིགས་ཞིབ་འཇུག་གླིང་དང་ནུབ་བརྒྱུད་གསར་སྤེལ་ཆེན་མོ་ཞིབ་འཇུག་སོའོ་དང་བཅས་པའི་ཞིབ་འཇུག་ལས་ཁུངས་༢༠ལྷག་ཡོད། ལྷག་པར་དུ་མི་རིགས་རིག་གནས་ཞིབ་འཇུག（་བོད་དང་ཡོས་རིགས་འཇང་རིགས་དང་མོའོ་རིགས་ཀྱི་ཞིབ་འཇུག）དང་མི་རིགས་དེ་གའི་སྐད་ཡིག་བརྡ་འཕྲིན་ཞིབ་འཇུག་ཐད་རྒྱལ་ནང་གི་དེ་སྐོར་ཀྱི་རིག་གཞུང་ཞིབ་འཇུག་ཁྲོད་དུ་སྐད་གྲགས་ཆེན་པོ་ལྡན། དཔེ་སྐྲུན་བྱས་ནས་རྒྱལ་ཁབ་ཕྱི་ནང་ལ་འགྲེམས་སྤེལ་བྱེད་པའི་རིག་གཞུང་དཔེ་དེབ་སྐོར་ལ་ལྷོ་ནུབ་མི་རིགས་སློབ་གྲྭ་ཆེན་མོའི་རིག་གཞུང་དུས་དེབ་ཡོད། དེ་མིན་སློབ་གྲྭ་ནང་ཁུལ་གྱི་དུས་དེབ་སྐོར་ལ་ཡོས་རིག་པ་ཞིབ་འཇུག་དང་བོད་རིག་པ་ཞིབ་འཇུག་བཅས་ཡོད། མི་རིགས་ལྔ་བཅུ་ལྷག་གི་དགེ་སློབ་རྣམས་འདྲ་མཉམ་སྒོས་མཐུན་སྒྲིལ་བཟང་བ་དང་། ཕན་ཚུན་དབར་ལ་བརྩི་བཀུར་ཆེ་བ། འདྲ་མཉམ་ངང་ཐུན་མོང་གི་འཕེལ་རྒྱས་ལ་འབད་པ། སློབ་གྲྭའི་ནང་མི་རིགས་སོ་སོའི་སྐད་ཡིག་དང་ཡུལ་སྲོལ་གོམས་གཤིས་བཅས་ལ་བརྩི་འཇོག་ཆེན་པོ་ཐོབ་ཡོད་པ། སློབ་གྲྭས་ད་ལྟ་“ བཅུ་གཅིག་ལྔའི་འཆར་འགོད”སྒྲུབ་བཞིན་པའི་སྒང་ཡིན་ལ། མ་འོངས་བའི་དུས་ན་སློབ་གྲྭ་འདི་ཉིད་རྒྱ་ཁྱོན་ཚད་རན་པ་དང་མ་ལག་ངེས་ཅན་ཡིན་པ། སྤྱི་ཚོགས་ལ་ཁ་ཕྱོགས་ཆེ་བ་དང་ཚན་ཁག་སྣ་མང་མཉམ་པོར་འཕེལ་རྒྱས་ཡོད་པ། སྤུས་ཚད་མཐོ་བ་དང་གྲུབ་འབྲས་མངོན་གསལ་ལྡན་པ། དེ་མིན་སྤྱི་ཚོགས་ཐོག་སྐད་གྲགས་ཆེ་བའི་དེང་རབས་ཅན་གྱི་མི་རིགས་སློབ་གྲྭ་ཆེན་མོ་ཞིག་ཏུ་འཛུགས་སྐྲུན་པར་བརྩོན་ལེན་བྱེད་ཀྱིན་ཡོད།
༤ བོད་རིག་པའི་ཞིབ་འཇུག་སློབ་གླིང་། རྩོམ་སྒྲིག
བོད་རིག་པའི་ཞིབ་འཇུག་སློབ་གླིང་བོད་ཀྱི་སྐད་ཡིག་དང་རྩོམ་རིག་ཆེད་ལས་ནི་ཐོག་མར་སྤྱི་ལོ་༡༩༥༢ལོར་དབུ་ཚུགས་ཤིང་། ལོ་ངོ་ལྔ་བཅུའི་རིང་ལ་ཆེད་ལས་འདིས་མི་རིགས་ས་ཁུལ་ལ་བོད་ཀྱི་སྐད་ཡིག་དང་རྩོམ་རིག བོད་རྒྱ་སྐད་གཉིས་ཕྱོགས་ཀྱི་མཐོ་རིམ་ཆེད་ལས་མཁས་པ་གང་མང་གསོ་སྐྱོང་བྱས་པ་དང་དེའི་ཁྲོད་ཀྱི་མི་སྣ་ཁ་ཤས་རྒྱལ་ཁབ་ཕྱི་ནང་གི་ཆེད་མཁས་མིང་གྲགས་ཅན་དུ་ཆགས་ཡོད། བོད་རིག་པའི་སློབ་གླིང་འདི་ད་ལྟ་འཕེལ་རྒྱས་ཆེན་པོར་སོང་སྟེ་ཉིན་ཧྲིལ་བོའི་ལམ་ལུགས་ཀྱི་དངོས་གཞིའི་སློབ་མ་གསོ་སྐྱོང་བྱེད་པ་དེ་གཙོ་བོར་བཟུང་བ་དང་གཞན་ཆེད་ལས་སློབ་མའི་སློབ་གསོ་དང་ཞིབ་འཇུག་སློབ་མའི་སློབ་གསོ། ཕྱི་རྒྱལ་སློབ་མའི་སློབ་གསོ།མི་ཆེན་སློབ་གསོ། ཡུན་ཐུང་སྦྱོང་བ་སློབ་གསོ། མཉམ་འབྲེལ་སློབ་སྒྲུབ་བྱེད་པ་སོགས་རྣམ་པ་མི་འདྲ་བའི་སྒོ་ནས་སློབ་སྒྲུབ་བྱེད་པའི་སྡེ་ཁག་ཅིག་ཡིན། མིག་སྔར་བོད་རིག་པའི་སློབ་གླིང་ནང་དུ་བོད་ཀྱི་སྐད་ཡིག་དང་རྩོམ་རིག་ཆེད་ལས། དེ་མིན་བོད་རྒྱ་སྐད་གཉིས་ཀྱི་ཆེད་ལས། བོད་རྒྱ་སྐད་གཉིས་ཀྱི་གློག་ཀླད་ཆ་འཕྲིན་ལྟེ་གནས། བོད་རྒྱ་དབྱིན་སྐད་གསུམ་གྱི་ཡུལ་སྐོར་ཆེད་ལས། བོད་རྒྱ་སྐད་གཉིས་སློབ་ཁྲིད་ལྟེ་གནས་བཅས་འདུས། འདི་དག་རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་དང་ཟི་ཁྲོན་ཞིང་ཆེན་གྱི་གཙོ་གནད་རིག་པར་གཏོགས། བོད་རིག་པའི་སློབ་གླིང་ཡོངས་ལ་དགེ་བཟོ་བ་བསྡོམས་པའི་༢༢ཡོད་ལ། དེའི་ཁྲོད་དུ་སློབ་དཔོན་ཆེན་མོའི་གོ་ས་ཡོད་མཁན་མི་༢དང་སློབ་དཔོན་གཞོན་པའི་གོ་ས་ཡོད་མཁན་མི་༡༣ཡོད། དགེ་རྒན་ནང་དུ་རབ་འབྱམས་པའི་སློབ་རྟགས་ཡོད་མཁན་མི་༣དང་ཧྲོ་ཧྲི་ཞིབ་འཇུག་སློབ་མའི་སློབ་རྟགས་ཡོད་མཁན་མི་༩ཡོད།
| ཀྲུང་དབྱང་མི་རིགས་སློབ་ཆེན | པེ་ཅིན |
|---|---|
| བོད་ལྗོངས་མི་རིགས་སློབ་ཆེན། | ལྷ་ས |
| ནུབ་བྱང་མི་རིགས་སློབ་ཆེན | ལན་ཀྲུ |
| མཚོ་སྔོན་མི་རིགས་སློབ་ཆེན། | ཟི་ལིང |
༥ སློབ་མ རྩོམ་སྒྲིག
བོད་རིག་པའི་སློབ་གླིང་ཡོངས་ལ་དངོས་གཞིའི་འཛིན་གྲྭ་༨ཡོད་པ་དང་སློབ་མ་བསྡོམས་༢༩༦ཡོད། ཞིབ་འཇུག་སློབ་མ་༣༧ཡོད། གཞན་ད་དུང་མི་ཆེན་བོད་ཀྱི་སྐད་ཡིག་དང་རྩོམ་རིག་གི་ཆེད་སྦྱོང་ཆེད་ལས། དེ་མིན་བོད་ཀྱི་སྐད་ཡིག་དང་རྩོམ་རིག་གི་རང་སྦྱོང་ཡིག་ཚད་གཏོང་བའི་ཆེད་སྦྱོང་འཛིན་གྲྭ་ཆེན་མོ་ཁག་ཅིག་ཀྱང་ཡོད། འདིར་སློབ་མ་བསྡོམས་པའི་༤༠༠ལྷག་ཡོད།བོད་རིག་པ་ཞིབ་འཇུག་གླིང་དུ་བོད་ཀྱི་སྐད་ཡིག་རྩོམ་རིག་དང་། བོད་ཀྱི་ལོ་རྒྱུས་དཔལ་འབྱོར། བོད་ཀྱི་རིག་གནས་མཚན་ཉིད་རིག་པ་བཅས་ཀྱི་སློབ་དཔྱོད་ཁང་གསུམ། བཀའ་འགྱུར་བསྟན་འགྱུར་དང་བོད་ཀྱི་ནང་བསྟན་ཆོས་ལུགས་ཞིབ་འཇུག་ཁང་། སློབ་ཁྲིད་དང་སྲིད་འཛིན་ཀྱི་གཞུང་དོན་ཁང་།དཔྱད་གཞིའི་ཡིག་རིགས་ཁང་བཅས་ཡོད། ཚན་ཁག་ནང་དགེ་རྒན་དང་ལས་བཟོ་ཁྱོན་བསྡོམས་མི་གྲངས་༢༧ འཆད་ཁྲིད་དགེ་རྒན་༡༠ དགེ་རྒན་ལས་རོགས་པ་༢བཅས་ཡས་ཡོད། ད་དུང་སྐད་ཆེད་ལས་ཀྱི་ཁ་ཕྱོགས་ལྔ་ཡོད། བོད་རིག་པ་ཞིབ་འཇུག་གླིང་གིས་བོད་རིགས་ས་ཁུལ་གྱི་དེང་རབས་ཅན་གྱི་འཛུགས་སྐྲུན་གྱི་དགོས་མཁོ་དང་འཚམས་པའི་སློབ་ཁྲིད་དང་། ཞིབ་འཇུག་ཡིག་བསྒྱུར། དོ་དམ་སོགས་བྱེད་མཁན་ཤེས་ཡོན་ལྡན་མི་སྣ་གསོ་སྐྱོང་བྱ་རྒྱུ་དམིགས་ཡུལ་གཙོ་བོ་བྱས་ཏེ། བོད་ལྗོངས་གཙོ་བོ་བྱས་ཐོག བོད་རིགས་ས་ཁུལ་ཡོངས་ནས་སློབ་གྲྭ་བ་བསྡུ་རྒྱུ་ལག་ལེན་བསྟར་གྱི་ཡོད། སྤྱི་ལོ་༡༩༩༤ལོར་བོད་ཀྱི་ཤེས་རིག་ཆེད་ལས་དངོས་སུ་བཙུགས་པ་དང་། ལོ་དེ་རང་ལ་རྒྱལ་ཁབ་སློབ་ཨུད་ཀྱི་ཆོག་མཆན་ཐོབ་པ་ལྟར་བོད་ཀྱི་ཤེས་རིག་ཞིབ་འཇུག་སློབ་མའི་ཡོན་ཚད་ཐོབ་ཐང་གི་སྤྲོད་གནས་བཙུགས་ཡོད་ཅིང་། དངོས་གཞིའི་སློབ་མའི་རྨང་གཞིའི་སློབ་ཚན་གཙོ་བོ་དང་ཆེད་ལས་སློབ་ཚན་གཙོ་བོའི་གྲས་སུ། སུམ་རྟགས་དང་།། དེང་རབས་ཀྱི་བོད་སྐད། ཏོན་ཧོང་ནས་ཐོན་པའི་བོད་ཡིག་ཡིག་ཆ། བོད་ཡིག་རྩོམ་རིག་ལོ་རྒྱུས། གྲུབ་མཐའ། དུས་རབས་རིམ་བྱུང་གི་རྩོམ་ཡིག་གཅེས་བསྡུས། བོད་ཀྱི་ལོ་རྒྱུས་ཡིག་ཚགས་གཞུང་ཡིག བོད་ཀྱི་དཔལ་འབྱོར། བོད་ཀྱི་གནའ་རྫས་རྟོགས་ཞིབ། ནང་བསྟན་རྩ་བའི་གཞུང་ལུགས། ཚད་མ་རིག་པ། གནའ་རབས་རྒྱ་ཡིག དེང་རབས་ཀྱི་རྒྱ་སྐད། གནམ་རིག་སྐར་རྩིས། དབྱིན་སྐད་དང་རྩིས་འཁོར། བོད་ཀྱི་རིག་གནས་སྒྱུ་རྩལ་དང་། བོད་ལྗོངས་སློབ་གསོ། ཕྱི་རྒྱལ་གྱི་བོད་ཀྱི་ཤེས་རིག་སྐོར། བོད་བརྒྱུད་ནང་བསྟན་ཆོས་ལུགས། ཡིག་བསྒྱུར། སུམ་རྟགས་སོགས་ནི་ཆེད་ལས་མི་སྣ་གསོ་སྐྱོང་བྱེད་པའི་ཁ་ཕྱོགས་ཡིན། ཕྱོགས་མཚུངས་བོད་ཀྱི་ཤེས་རིག་ལ་དགའ་ཞེན་བྱེད་མཁན་མི་རིགས་གཞན་དག་གིས་སློབ་མ་དང་། ཕྱི་རྒྱལ་གྱི་སློབ་མ། བོད་ཀྱི་ཤེས་རིག་དང་འབྲེལ་བ་ཡོད་པའི་ཟབ་སྦྱོང་སློབ་མ་རྣམས་བསྡུ་བཞིན་ཡོད།
- ↑ ལྷོ་ནུབ་མི་རིགས་སློབ་གྲྭ་ཆེན་མོ