སྟོན་ཁ་ལགས །༼ སློབ་ཐོན་གྱི་སློབ་མར་འཕུལ་བ། ༽
འཆར་སྣང་གི་ཡོལ་བའི་དབུས་སུ།
དྲན་འཆར་ནི་སྟོན་རླུང་འདང་ཞིང།
བསིལ་བསིལ་སྟོན་གྱི་རླུང་བུས།
བདག་སེམས་དེ་རེ་འགར་ལྷིང་འཇག་སུ་བཏང།
ཡང་དྲན་ཤེས་སྟོན་གྱི་རླུང་བུ་ཡིས།
འདས་དོན་གྱི་ལོ་མ་བདག།
དལ་བུར་དྲན་སེམས་ཀྱི་ས་གཞིའི་ངོས་སུ་འབུད་ཤིང།
ང་ལ་དུས་ཀྱི་དྲན་སྐུལ་ཞིག་ཀྱང་སྣང་བྱུང།
མེ་ཏོག་དུས་ཀྱི་དྲི་ཞིམ་འཐུལ་འདྲའི།
བྱིས་དུས་ཀྱི་དཔྱིད་ཀ་དེ།
སྔ་ས་ནས་ཡོལ་ཟིན་ཞིང།
ཤེས་རིག་མདབ་མ་རྒྱས་འདྲའི་ན་ཆུང་གི།
དབྱར་དུས་དེ་ཡང་རྫོགས་ཟིན།
བསྐྱོད་དང་བསྐྱོད་བཞིན་པའི་སྟོན་ཁ།
ལོ་འབྲས་འབྲས་བུ་སྨིན་དུས་ཀྱི་སྟོན་ཁ།
ལྗོན་ཤིང་ལོ་མ་ཟགས་དུས་ཀྱི་སྟོན་ཁ།
ཁྱེད་ནི་སློབ་ཐོན་གྱི་དུས་འདི་དང་ཡོངས་སུ་མཚུངས་ཤིང།
ཁྱེད་ལ་འབྲས་བུའི་དུས་ཡང་བརྗོད་མཆོག་ལ།
ཁྱེད་ལ་རེ་བའི་དུས་ཡང་བརྗོད་མཆོག།
སློབ་ཐོན་གྱི་སློབ་མ་ཚོ།
ཁྱེད་རྣམས་ནི་སྟོན་མགོའི་འབྲས་ཤིང་དང་འདྲ་བར།
མེས་རྒྱལ་དང་མི་རིགས།
གདོང་དམར་སྤུན་ཟླ་ཚང་མའི་མ་འོངས་པའི་རེ་བ་མཅོལ་ཡུལ་ཡང་ཁྱེད་ཚོ་ཡིན་པས།
སློབ་ཐོན་གྱི་སློབ་མ་ཚོ།
ཁྱེད་ཚོས་ད་དུང་གཏི་མུག་དང་རོལ་རྩེད་ཁོ་ནར་མགོ་བོ་གཡེངས་ན་
ད་དུང་རེ་གུག་གི་དུས་ཚོད་ཨེ་ཡོད།
སློབ་ཐོན་གྱི་སློབ་མ་ཚོ།
ཁྱེད་ཚོས་མཇུག་མཐའི་དུས་འདིར་ཡང་སྔར་བཞིན་གཏི་མུག་གཉིད་ལ་ཡུར་ན།
སང་ཉིན་གྱི་བདག་པོ་སུ་ཡི་བྱེད་དམ།
ཕ་ཡུལ་འཛུགས་སྐྲུན་བྱེད་པོ་སུ་ཞིག་གིས་བྱེད་དམ།