Portal:མདུན་ངོས།

༄༅ །། སེམས་ཀྱིས་གདམས་པ། རང་སྡེ་གཅིག་པའི་ཕུ་ནུ་ཚོ་གླེང་ཚོམས་འདིར་གྲགས་འགུལ་མེད་པ་ཅི་ཡིན་ཞེས་པའི་འཕྲིན་ཐུང་དེའི་ལན་དུ་ཀུ་རེ་གྱི་ཚུལ་དུ་བྲིས་པ་ཡིན། བན་ཤུལ་འཁྱམ་བསེ་རུ། དུས་རབས་ཚན་རྩལ་གློག་གི་འགྱུ་བ་ལས།། ང་དང་ཁྱེད་ཅག་ལྷན་དུ་སྦྲེལ་བྱས་པའི།། སྐད་འཕྲིན་སྒྱུ་རྩལ་འཁྱུག་པའི་གདེང་ཀ་འདིར།། ཕུ་ནུ་ཡོངས་ལ་ཁམས་འདྲིའི་མཆིད་འདི་བཞེངས།།

ཚོགས་གཙོའི་ཞུ་མཆེད་ཕྱེ་ལེབ་སྒེག་མོའི་གར།། ཚོ་དྲུག་གླེང་ཚོམས་པད་མའི་ཚལ་དུ་རྩེན།། འཕྲིན་ལན་དྭངས་གསལ་ཟེའུ་འབྲུ་མངར་མོའི་བཅུད།། ས་འཁྱམས་བུ་ལོའི་ཁྱོར་བས་བཏེགས་ཏེ་འདྲེན།།

ཕར་ཕྱིན་དམ་བཅའ་བཞག་པའི་བླ་རྒན་ཚོགས།། ཐོས་བསམ་ཏིང་འཛིན་ལས་ལ་བྲེལ་ན་ཡོད།། རིག་པས་བརྡར་ཤ་གཅོད་པའི་ཞིབ་འཇུག་པ།། ངེས་དོན་ཚད་མའི་ལམ་བུ་སྙེགས་བཞིན་ཡོད།།

ཤེས་རིག་སློབ་ཆེན་འགྲིམས་པའི་བུ་རྒོད་དག། ཚན་རྩལ་གློག་གི་གར་འཇུས་ནས་ཡོད།། འབྱོར་ཕྱུག་ལས་ལ་བྲེལ་བའི་ཚོང་བ་དག། རང་རང་འཚོ་བའི་ཆེད་དུ་འདུར་བཞིན་ཡོད།།

བྱེ་སྣའི་གྲོང་གསེབ་ཉུལ་བའི་རི་ཤོར་དང་།། རང་སྣང་གང་དྲན་སྡོད་པའི་སྐྱ་སེར་ཚོགས།། གར་ཡོད་གར་སྡོད་ཅི་ཆ་མ་འཚལ་བས།། ད་ནི་རང་གིས་རང་ལ་གྲོས་ཞིག་འདེབས།།

རང་ཡུལ་རི་སྡེ་གཅིག་པའི་ཕུ་ནུའི་ཚོགས།། ལན་གཅིག་ལྷན་དུ་བསྡུས་པའི་གླེང་ཚོམས་འདིར།། དགོས་མེད་ཀུ་ཅོ་གང་སར་སྒྲོགས་པ་ལས།། ཅ་ཅོ་སྨྲ་བ་ཅུང་ཙམ་ཉུང་ན་ལེགས།།

རུ་སྡེ་གཅིག་པ་ཙམ་ཞིག་མ་ཡིན་པས།། ཤ་གཅིག་རུས་གཅིག་ཕུ་ནུ་མིང་སྲིང་བར།། ངེས་དོན་སེམས་ཀྱི་དོགས་གཞི་འདྲི་བ་ལས།། ངོ་ཚ་བོར་བའི་འཆལ་གཏམ་མེད་ན་བཟང་།།

ལྷད་མེད་བརྩེ་སེམས་འོ་མཚོ་སྐྱོམས་ན་དགའ།། ཕྱི་ཐག་གསེར་གྱི་ཨ་ལོང་སྦྲེལ་ན་དགའ།། ཡ་རབས་གུས་སྲོལ་མེ་ཏོག་བཞད་ན་དགའ།། མཛའ་མཐུན་ཞི་བདེའི་འོད་སྣང་འཕྲོས་ན་དགའ།།

གང་དྲན་ཐོལ་བྱུང་བྲིས་པའི་སྙིང་གཏམ་འདི།། འདིར་བཞུགས་སྤུན་མཆེད་ཡོངས་ལ་སྐྱེས་སུ་བཏེགས།། ཐུགས་དང་འགལ་བའི་ནོངས་པ་ཅི་མཆིས་པ།། བཟོད་པར་གསོལ་ལོ་སྙིང་ན་བཤགས་པར་བགྱི།།