Wikipedia talk:སྐོར།

རྨས་སྐྱོན་ཤོར་བའི་སེམས་མགུར།། བེ་སྨྱོན།

ཆར་པ་ཟིལ་ཟིལ་འབབ་བྱུང་།། ཉི་འོད་ལྷེབ་ལྷེབ་འཚེར་བྱུང་།། ཆར་དང་ཉི་ཟེར་བར་ནས།། སྣ་ལྔའི་འཇའ་རིས་མཛེས་པ།།

ལྟ་ན་མིག་གི་ལོངས་སྤྱོད།། ཁ་དོག་སྣ་ལྔའི་འཇའ་ཚོན།། རེག་ན་འཇུ་ས་མེད་པ།། སྟོང་བསམ་སེམས་ཀྱི་ཆོས་ཉིད།།

མ་དག་འཁོར་བའི་གཡང་སར།། དྲུད་པའི་ཞགས་པ་འགུག་ཀྱོགས།། བསམ་མེད་བྱིས་པའི་རྡོག་སྣེ།། འཇའ་ཚོན་སྣེ་ལ་བཏེགས་སོང་།།

དམ་པའི་གསུང་གི་ཁུ་བྱུག། རྣ་བའི་ནགས་ཀླུང་རྩེན་ཀྱང་།། རྨི་ལམ་མགྲོན་པོར་སྒུག་པའི།། སེམས་ཀྱི་ཁྱེ་འུ་གཉིད་སོང་།།

རྨི་ལམ་རྨིས་མགོ་ཚུགས་ས།། རྒྱ་སྡེ་མི་ཚོགས་གསེབ་རེད།། ལས་འཕྲོ་ལམ་ཐུག་ཅིག་གིས།། སེམས་ཀྱི་བག་ཆགས་དཀྲུགས་སོང་།།

མི་ཚོགས་གསེབ་ནས་འཆར་བའི།། སེམས་སོང་ཟླ་བའི་ལྷ་མོའི།། ཟླ་འོད་སྙིང་ལ་ཟུག་པས།། སྙིང་གི་འཕར་རྩ་ལྡིངས་སོང་།།

མདའ་མཚོན་ཆར་པ་འབབ་ཀྱང་།། ལུས་ལ་རྨས་སྐྱོན་མ་ཕོག། བྱམས་པའི་ཟུར་མིག་གཅིག་གིས།། སེམས་ལ་རྨ་ཁ་བཟོས་སོང་།།

སྨིན་མའི་གཞུ་རྒྱུད་བཀུག་ནས།། ཟུར་མིག་ལྐོག་མདའ་རྣོན་པོ།། ལས་དབང་ཐེབ་འཛུབ་བར་ནས།། སྙིང་གི་འབེན་ལ་ཟུག་སོང་།།

ལུས་ལ་རྨས་སྐྱོན་ཕོག་ན།། གསོ་བྱེད་སྨན་ཞིག་ལོས་ཡོད།། རྨས་སྐྱོན་ཤོར་བའི་སེམས་པ།། གསོ་བའི་སྨན་སྦྱོར་མི་འདུག།

རང་སེམས་སོང་བའི་མི་དེ།། ཐེངས་གཅིག་མཇལ་རྒྱུ་བྱུང་ན།། སེམས་ཀྱི་རྨ་ཁའི་ནད་ལ།། རིན་ཆེན་རིལ་བུ་རང་རེད།།

སྒོམ་པ་ལྷ་དང་བླ་མ།། ཡིད་ལ་འཆར་རྒྱུ་མེད་པར།། མ་སྒོམ་སེམས་སོང་བུ་མོ།། རྨི་ལམ་ན་ཡང་འཁོར་གྱིན།།

སེམས་པ་ཁྱོད་ལ་སོང་སོང་།། དམ་པའི་ཆོས་ལ་སོང་ན།། ཡ་ཀི་དག་པའི་ཞིང་ཁམས།། འགྲོ་རྒྱུ་ཁག་པོ་མི་འདུག།

ཉིན་གསུམ་ཁྱོད་ལ་དུངས་པས།། མཚན་མོའི་རྨི་ལམ་དཀྲུགས་སོང་།། རྨི་ལམ་བྱིས་པའི་འཁྲུལ་སྣང་།། བདེན་པ་ཡིན་ན་དགའ་བ།།

ཁྱོད་ནི་མཚོ་ཁའི་མེ་ཏོག། ང་ནི་ནགས་ཀྱི་བུང་བ།། སེམས་དང་བསམ་པ་མཐུན་ཡང་།། མཇལ་བའི་དུས་དེ་ཁག་བ།།

དཔྱིད་ཉིན་རིང་པོའི་ནམ་ཟླ།། དཔྱིད་ཀྱི་རྒྱལ་མོས་གནང་བྱུང་།། དཔྱིད་མགོའི་མེ་ཏོག་པདྨ།། ཞལ་ཁ་ཕྱེ་བའི་དུས་རེད།།

དཔྱིད་གསུམ་དཔྱིད་ཀྱི་སྤང་ལྗང་།། ལྷ་ཡུལ་ལས་ཀྱང་སྤྲོ་བ།། དཔྱིད་ཀྱི་རྒྱ་སེར་མེ་ཏོག། ལྷ་མོའི་ཞལ་ལས་མཛེས་པ།།

ཡ་ཀི་ནམ་མཁའ་སྔོན་པོར།། སྤྲིན་དང་སྨུག་པ་ཡལ་སོང་།། བཅོ་ལྔའི་དུང་ཟླ་དཀར་པོ།། ཞལ་རས་གཞན་ལས་དཀར་བ།།

ཉི་མ་ནུབ་ནས་ནུབ་སོང་།། ཟླ་བ་ཤར་ནས་ཚེས་བྱུང་།། སྐར་མས་ཕྲ་ཚོམས་བཏབ་དུས།། བྱམས་པའི་ཞལ་རས་དྲན་བྱུང་།།

དུང་ཟླ་མཁའ་ལ་འཆར་སོང་།། ཟླ་འོད་ས་ལ་ཕོག་སོང་།། སྙིང་སྡུག་སྙིང་གི་ཐིག་ལེ།། སྙིང་གི་དཀྱིལ་ནས་དྲན་བྱུང་།།

ཞལ་རས་ཟླ་བ་དཀར་པོ།། ཐེངས་གཅིག་མཇལ་རྒྱུ་བྱུང་ན།། བཅོ་ལྔའི་དུང་ཟླ་དཀར་པོ།། མ་ཤར་ན་ཡང་འགྲིགས་སོང་།།

ཡ་ཀི་དག་པའི་ཞིང་ལ།། ཡིད་སྨོན་ཤོར་རྒྱུ་མི་འདུག། མ་ཀི་དམྱལ་བའི་ཡུལ་ལ།། ཞེད་སྣང་དེ་བས་མི་འདུག།

གཟུགས་པོ་བྱང་ལ་བསྡད་ཀྱང་།། སེམས་པ་ལྷོ་ལ་ཤོར་བྱུང་།། ལྷོ་རོང་ནགས་མའི་ཁུ་བྱུག། གསུང་སྐད་ཐེངས་གཅིག་སྐྱོན་དང་།།

ལྷོ་རོང་སྨྱུགས་མའི་ནགས་ཀླུང་།། དུས་བཞིའི་འགྱུར་བ་ཆེ་ཡང་།། ལྷ་ཤིང་ཤུག་པའི་ཁ་དོག། འགྱུར་ཡོང་བསམ་པ་མི་འདུག།

རྒྱང་རིང་ལྷོ་ལ་སྐྱེས་པའི།། ཧ་རི་ཙན་དན་སྡོང་པོ།། ལྷན་སྐྱེས་དྲི་བསུང་མངར་མོ།། ལྷོ་ཡི་རླུང་ལ་སྐུར་རོགས།།

རླུང་དང་ལྷག་པ་ལྡང་ནས།། ལྷོ་སྤྲིན་བྱང་ལ་དེད་ཀྱང་།། གནམ་གྱི་ཉི་ཟླ་སྐར་གསུམ།། སྤུར་འགྲོ་བསམ་པ་མི་འདུག།

རྒྱ་མཚོ་ཆེན་པོ་ཆུ་རེད།། རི་རྒྱལ་ལྷུན་པོ་ས་རེད།། མཚོ་དང་ལྷུན་པོ་བསྡེབས་ནས།། ནམ་མཁའ་དབྲལ་བསམ་མི་འདུག།

ང་དང་ཆུང་འདྲེས་བྱམས་པའི།། ཚིག་གསུམ་གཏམ་གྱི་རི་མོ།། སྣག་དང་སྨྱུ་གུས་མ་བྲིས།། སེམས་པའི་ངོས་ལ་བརྐོས་ཡོད།།

ཤོག་ཐོག་བྲིས་པའི་ཡི་གེ། མེ་ལ་བསྲེགས་ན་ཚིགས་འགྲོ། མ་བྲིས་སེམས་ཀྱི་རི་མོ།། བསྲེགས་ཀྱང་ཚིགས་ས་མ་རེད།།

ཉིན་མཚན་དུས་དྲུག་དྲན་པས།། ཉི་མ་ལོ་ལས་རིང་སོང་།། ལོ་ཟླ་ཞག་གི་འཁོར་ཕྱོགས།། སྒུག་ནས་ལོ་གསུམ་ཕྱིན་སོང་།།

སེམས་སོང་སེམས་ཀྱི་བུ་མོ།། མི་བརྟན་ནམ་མཁའི་འཇའ་རེད།། ནམ་ཟླའི་འགྱུར་འགྲོས་གཅིག་གིས།། མིག་གི་ལམ་ནས་ཡལ་སོང་།།

རྔོན་པ་རྔོན་ལ་ཕྱིན་ཤུལ།། ནམ་མཁའི་ཡིད་འཕྲོག་ལྷ་མོ།། ནོར་བཟང་རྒྱལ་པོས་བསླུས་ནས།། འཁྲིད་འགྲོ་བསམ་པ་མ་བྱུང་།།

རྟ་ཕོ་ཆགས་གིས་གསོས་ཀྱང་།། རྐང་ཐང་འགྲོ་དགོས་ཐུག་སོང་།། རྟ་ར་གྲུ་བཞིའི་ཕྱོགས་ལ།། ཞེན་པ་གཏིང་ནས་ལོགས་སོང་།།

ཞིང་ཁ་སོ་ནམ་བྱས་ནས།། རྩམ་པ་ཉོ་དགོས་ཐུག་སོང་།། གྲོ་ནས་སྲན་མའི་ས་བོན།། བཏབ་ཀྱང་ཕན་ཐོགས་མ་བྱུང་།།

སེམས་སོང་བྱམས་པ་མི་རེད།། བྱམས་པའི་སེམས་པ་ཆུ་རེད།། ཆུ་ལ་རི་མོ་བྲིས་ན།། བརྟན་པོ་ཆགས་ཐབས་མི་འདུག།

སྙིང་སྡུག་སྙིང་ལ་ཉར་ནས།། སྙིང་གི་རུས་པ་གཅོག་ན།། སྙིང་ཆུང་ཟུར་གསུམ་ནང་དུ།། ཉར་དང་མ་ཉར་མི་འདུག།།

ཉི་མ་ནུབ་ནས་བརྒལ་སོང་།། ཟླ་བ་སྤྲིན་པས་སྒྲིབ་སོང་།། མཚན་མོའི་གློག་འོད་འཁྱུག་པ།། སེམས་པ་སྐྱོ་རོགས་ཡིན་འགྲོ།།

ནམ་དུས་དགུན་ཁ་ཚེས་བྱུང་།། མཚོ་མོ་དར་ཁས་སྒྲིབ་སོང་།། ལྷ་བྱ་ངང་པ་སེར་པོ།། འཁོར་བའི་རེ་ཐག་ཆད་སོང་།།

ཐང་དཀར་རྒོད་པོ་བྱ་རེད།། གནམ་འཕང་གཅོད་ས་གནམ་རེད།། ཀྱུར་སེ་རླུང་དང་འགྲོགས་ནས་།། ནམ་མཁའི་དབྱིངས་ལ་འཕུར་འགྲོ།

གོས་ཆེན་མེ་ཏོག་དམར་པོ།། མིག་གི་ལོངས་སྤྱོད་ཙམ་རེད།། ལག་ཏུ་ལེན་མཁན་ཕྱིན་ན།། དམར་པོ་ཁྲག་གི་རྒྱུ་རེད།།

ལྡུམ་ར་བརྒྱ་ཕྲག་སྟོང་ཕྲག།། མེ་ཏོག་ཁྲི་མ་འབུམ་ཕྲག།། ཉམ་ཆུང་གསེར་སྦྲང་སེར་པོ།། སེམས་པ་སྐྱོ་དགོས་མི་འདུག།

དུས་བཞི་དུས་ཀྱི་ཁུག་པ།། ནམ་མཁའི་གློག་ལས་འཁྱུགས་པ།། ད་ལོའི་ནམ་ཟླ་ཡལ་ནས།། སང་ལོའི་དཔྱིད་མགོ་ཚེས་འོང།།

ནམ་ཟླ་རྗེས་མའི་དཔྱིད་ཀ།། དུས་ཀྱི་མགྲོན་པོར་སླེབས་དུས།། ཉམ་ཆུང་བུང་བའི་རྣམ་ཤེས།། མི་མངོན་དབྱིངས་ནས་བབ་འོང་།།

སྐྱེས་པ་ཕོ་ལུས་ལེན་ནས།། སེམས་ཤུགས་ཆགས་དགོས་མི་འདུག། རྟ་ཕོར་རྒྱུགས་ཤེད་ཡོད་ན།། ཐང་ལ་ཟད་མཐའ་མི་འདུག།།

ལྷ་སའི་ཁྲོམ་ནས་ཉོས་པའི།། སེར་པོ་གསེར་གྱི་ཚིགས་ཁོག། ད་ནི་འདོགས་ས་མེད་པས།། སྔོན་པོའི་ཆུ་ལ་གཡུགས་བཞག།།

འོག་ཕྱོགས་ཀླུ་ཡི་གྲོང་ནས།། བཞིན་བཟང་ཀླུ་མོ་ཞིག་དང།། ལས་འཕྲོ་མདུད་པ་ཐེབས་པའི།། གསོལ་བ་སྙིང་ནས་བཏབ་ཆོག།།

གཟུགས་པོ་མི་རྟག་འཇའ་རེད།། རྣམ་ཤེས་མི་སྡོད་རླུང་རེད།། ལུས་སེམས་ཁ་འཐོར་འགྲོ་བ།། འཇིག་རྟེན་འཁོར་བའི་ལས་རེད།།

ལས་ལ་གཟུར་ཐབས་མེད་ན།། སྲོག་ལ་གཡོལ་ཐབས་མི་འདུག།། ཚེ་མཇུག་གྱེས་མཇལ་ཞུ་ས།། མི་མངོན་ནམ་མཁའི་གནམ་ཡིན།།

བླ་དང་རྣམ་ཤེས་འཁོར་ས།། སུ་དང་གང་ཡང་མི་འདུག།། བདོས་བཅས་གཟུགས་པོ་གཡུཊ་ས།། མར་ཀི་གཙང་པོའི་ཆུ་ཡིན།།

༢༠༡༠།.༢ .༡༢

རྒྱལ་ཐང་སེམས་ཀྱི་ཉི་ཟླ་ལྗོངས།

                    རྒྱལ་ཐང་སེམས་ཀྱི་ཉི་ཟླ་ལྗོངས།

                                  (༡)

གངས་རི་ར་བས་བསྐོར་བའི་ཞིང་ཁམས། འཕགས་མཆོག་སྤྱན་རས་གཟིགས་ཀྱི་གདུལ་ཞིང་། གངས་ཅན་བོད་ཀྱི་གནས་མཆོག འཛམ་གླིང་ས་ཡི་ཡང་མཐོ་མཐོ་སྒང་བསིལ་ལྡན་ཞིང་ཁམས་སུ། སྤྱན་རས་གཟིགས་ཀྱི་རྣམ་སྤྲུལ་ཕ་སྤྲེལ་རྒན་བྱང་སེམས་དཔའ་དང་རྗེ་བཙུན་སྒྲོལ་མའི་རྣམ་སྤྲུལ་མ་བྲག་སྲེན་གདོང་དམར་གཉིས་འདུས་པ་ལས་འགྲོ་བ་མིའི་རིགས་གཞི་ནས་ཆགས་པར་ཆེས་སྔ་ཤོས་སུ་གྲགས་པ། ཆོས་དང་རིག་གནས་ཀྱི་ལོ་རྒྱུས་རིང་ཞིང་རང་བྱུང་ཁོར་ཡུག་གི་རྣམ་པ་ལ་འབག་བཙོག་གི་རྫས་ངན་གྱིས་ནམ་ཡང་མ་གོས་པའི་གནས་མཆོག་འདི་ལ་དབྱེ་ན། སྟོད་མངའ་རི་སྐོར་གསུམ་དང་སྨད་མདོ་ཁས་སྒང་དྲུག་བར་དབུས་གཙང་རུ་བཞིའང་ཡང་ན་མདོ་དབུས་ཁམས་གསུམ་དུ་གྲགས་པ་ལས་སྨད་མདོ་ཁམས་པའི་ཁོངས་གཏོགས། བོད་ཁམས་བྱིངས་ཀྱི་ཤར་ལྷོའི་ཕྱོགས་སུ་གཏོགས་པའི་རྒྱལ་ཐང་བསིལ་མོ་ལྗོངས་ནི་དེང་སྐབས་བདེ་ཆེན་བོད་རིགས་རང་སྐྱོང་ཁུལ་ཞེས་མིང་འདོགས་ཤིང་དེའི་མངའ་འོག་ཏུ་བསྡུས། དེ་ལའང་འཇོལ་བདེ་ཆེན་རྫོང་དང་འབའ་ལུང་རྫོང་རྒྱལ་ཐང་སེམས་ཀྱི་ཉི་ཟླ་རྫོང་གསུམ་དུ་ཕྱེ་བས་རྒྱལ་ཐང་རྫོང་གི་གནས་མཆོག་དེར་ཡུལ་བསྐོར་བས་ཤམ་བྷ་ལ་དང་སེམས་ཀྱི་ཉི་ཟླ་ཞེས་མིང་འདྲ་མིན་བཏགས་པ་དང་། དེང་སྐབས་འཛམ་གླིང་ཤར་ནུབ་དང་རྒྱ་ནགས་སོགས་ཕྱོགས་མཐའ་ཁག་ནས་གྲོ་འབུ་ཚང་ལ་འདུས་པ་བཞིན་མི་ཚོགས་འདུས་སྡོད་ཆེ་བའི་ཡུལ་བསྐོར་སྤྲོ་འཁྱམས་བྱ་ཡུལ་གྱི་གནས་མཆོག་ཞིག་ལ་གྱུར་ཟིན། དེ་ནི་ལོ་རྒྱུས་ཡུན་རིང་ལྡན་པའི་གནས་མཆོག་འདིར་མི་རྣམས་ཀྱིས་རིག་གནས་དང་སྒྱུ་རྩལ་ཐོན་ཁོངས་སོགས་ཧ་ཅང་ཕུན་སུམ་ཚོགས་པར་ཡིད་དབང་འཕྲོག་པ་ཡིན་ཞིང་། དེ་ཡང་ལོ་རྒྱུས་ཀྱི་དབང་དུ་བྱས་ན་གནས་འདི་ཉིད་ནི་མཐོ་མར་རྡོ་ཆས་དུས་རབས་ནས་མིའི་རིགས་འཚོ་གནས་བྱུང་ཡོད་པར་བྲག་བརྐོས་རི་མོ་སོགས་ཀྱིས་བདེན་དཔང་ཡོད་པར་བཤད་ཅིང་། ལྷག་པར་དུ་དུས་རབས་དང་པོ་གཉིས་པའི་ཡར་སྔོན་ནས་མིའི་རིགས་འཚོ་གནས་ཡོད་པ་ནི་༡༩༨༨ལོའི་ཉི་ཤར་བདེ་སྐྱིད་གྲོང་གི་ས་འོག་ནས་རྡོ་ཡི་རོ་སྒམ་རྙེད་སོན་བྱུང་བ་ལྟར་ན། མི་ལོ་༢༨༥༠་དང་༢༨༡༠་+༨༠འདས་ཟིན་པར་ཚན་རིག་པས་བདེན་དཔང་བྱས།

ད་ལྟའི་ཆར་ཡུན་ནན་ཞིང་ཆེན་གྱི་ཁོངས་སུ་བཅུག་པའི་བོད་རིགས་རང་སྐྱོང་ཁུལ་གཅིག་པུ་དེ་ཡིན། ཁུལ་སྲིད་གཞུང་ཡོད་སའི་ཤམ་ལྷ་ལ་རྫོང་གི་མིང་དངོས་ནི་རྒྱལ་ཐང་རྫོང་ངམ་རྡོ་དཀར་རྫོང་ཡང་ཟེར་ཞིང༌། ༢༠༠༡ལོར་ཤམ་བྷ་ལའི་རྫོང་ཞེས་ད་ལྟའི་མིང་འདིར་བསྒྱུར་བ་རེད། སྔོན་༧རྒྱལ་མཆོག་ལྔ་པ་ཆེན་པོ་དུས་ནས་རྒྱལ་ཐང་རྫོང་ཁག་ལྔ་དང་ཤོག་སུམ་ཅུ་སོ་དྲུག་བཅས་ཡོད་འདུག བདེ་ཆེན་བོད་རིགས་རང་སྐྱོང་ཁུལ་ཟེར་བ་འདི་ནི་ཕྱི་ལོ ༡༩༥༧ལོའི་ཟླ ༩ཚེས ༡༣ཉིན་གཞི་ནས་གསར་འཛུགས་བྱས་པ་ཡིན་ཞིང་། དེའི་ཁོངས་སུ་རྒྱལ་ཐང་དང་འབའ་ལུང༌། བདེ་ཆེན་ནམ་འཇོལ་བཅས་རྫོང་ ༣དང་ས་གནས ༢༧ གྲོང་བརྡལ ༣ ཤང ༧༥བཅས་ཡོད་པ་དང་སྤྱི་བསྡོམས་ས་ཁྱོན་སྤྱི་ལེ་གྲུ་བཞི་མ་ ༢༣༨༧༠ཡོད་ཟེར། དེའི་ནང་ཚན་ཤམ་བྷ་ལ་ནི་དེང་སང་ཟི་ཁྲོན་དང༌། ཡུན་ནན། བོད་ལྗོངས་གསུམ་འབྲེལ་མཚམས་སུ་ཡོད་ཅིང༌། འདབས་འབྲེལ་གྱི་ས་མཚམས་ཡང་ཤར་ཕྱོགས་སེང་ཆེན་རྡོ་སྤག་ལ་ཁ་ནས་གངས་དཀར་གླིང་པ་དང་། ཤར་ལྷོ་སྟོད་རྡོ་སྒོ་ལ་ཁ་ནས་རྨི་ལི། སྨད་ལ་མོ་མཚོ་སྒང་ལ་ཁ་ནས་ཐར་ལམ། དེ་བཞིན་ལྷོ་དང་ལྷོ་ནུབ་འབྲི་ཆུས་བར་དུ་ཆོད་པའི་འཇང་རྡོ་སྦག་ལ་ཁ་ནས་ས་དམ་༼ས་ཐང་༽འཁེལ། ནུབ་འབྲི་ཆུས་བཅད་པའི་ཀོང་རྩེ་རྭ་བ་དང་། ནུབ་བྱང་རོང་པ་སྒམ་འགྲམ་རྫ་ནག་ལ་ཁ་ནས་མནའ་སྔ་མར་དབུས་འགྱུར་ཆོས་ཀྱི་ཞིང་ས་བསྐྱོད་སྐབས་ཀྱི་འགྲོ་ལམ་ཡིན། བྱང་ཕྱོགས་གཏེར་མ་རོང་སྟོད་ལྟག་སྒོ་ལ་ཁའི་བར་འབའ་པ་དང་། བྱང་ཤར་མཚམས་སུ་གཏེར་མ་རོང་སྟོད་ཟངས་གླིང་ལ་ཁ་ནས་སྔོ་ཤོད་བྱ་རོ་ལ་ཁ་ཆ་འཕྲེང་༼འཕྱ་ཕྲེང༽དང་ས་འབྲེལ་ཆགས་ཡོད། ཡུལ་ལྗོངས་འདིའི་མཐོ་ཚད་རྒྱ་མཚོའི་ངོས་ལས་སྨི་༣༤༠༠ཡི་ངོས་སུ་ཆགས་ཤིང་། མི་གྲངས་ཀྱང་འབུམ་༡ལྷག་ཡོད། རྫོང་མཁར་དུ་མི་ཁྲི་ཚོ་བཞི་ལྔ་ཙམ་ཞིག་རྒྱུན་སྡོད་ཡོད་ཅིང། མི་འབོར་ཕལ་ཆེར་བ་རྣམས་གྲོང་སྡེ་སོ་སོར་གནས་ཡོད། དེ་ཡང་རྡོ་མཁར་རྫོང་པ་དང་། རོང་པ། ཡང་ཐང་། རྒྱད་སྡེ། རྒྱལ་ཞིང་། སྔོ་ཤོད། ནག་ག་རག གཏེར་མ་རོང་། ཙེ་ནེ། མགོ་པ། སྒྲ་རྩ། ཨ་ལ་གོ། ཧ་མོ་རྒྱབ་ཟུར། སྟག་རི་རྒྱབ། གཟིག་རི། གོང་སྤེལ། རྭ་དང་བེ་ནར། ཡུལ་གསར་ཐང་འགོ ཐང་སྟེང་། ཚུར་ཐང་རོང་མདོ། རྙེ་ཟུར་བཅས་རྒྱལ་ཐང་གི་མངའ་འོག་ཏུ་ཡོངས་གྲགས་ལ་སྡེ་ཁག་བཅུ་བདུན་ཞེས་བཤད་སྲོལ་ཡོད། དོན་དངོས་ཐོག་དེ་ཙམ་ལས་ལྷག་པ་ཡིན། འོན་ཀྱང་འདིར་སྡེ་ཁག་བཅུ་བདུན་ཕྱེ་བ་ནི་སུམ་རྩེན་གླིང་དགོན་པའི་ནང་གི་ཁམས་ཚན་བརྒྱད་ཡོད་པ་ནས་སོ་སོའི་ཁྱབ་འོག་ཏུ་སྡེ་ཇི་ཙམ་ཡོད་མེད་རྩི་ཚུལ་ཞིག་ཡིན་པ་འདྲ། སྡེ་ཁག་བཅུ་བདུན་གྱི་སེར་སྐྱ་ཡོངས་ཀྱི་གཙུག་གི་རྒྱན་དུ་གྱུར་པ་འདི་ཕྱི་གཉིས་ཀྱི་སྐྱབས་མགོན་ནི་ཟངས་འབུམ་མཆོག་སྤྲུལ་རྡོ་རྗེ་འཆང་དང་བཀའ་འགྱུར་རིན་པོ་ཆེ་རྣམ་གཉིས་ཡིན། ཁོང་རྣམ་པ་གཉིས་ནི་ལོ་རྒྱུས་རང་བཞིན་ཅན་གྱི་སྡེ་ཁག་བཅུ་བདུན་ཡོངས་ཀྱིས་གཙུག་ཏུ་བཀུར་བའི་ཡུལ་ལུང་སྤྱིའི་བླ་ཆེན་རྣམ་གཉིས་ཡིན། ཁོང་རྣམ་གཉིས་ཀྱི་མཚན་གནས་རྗེས་འབྲེལ་གྱི་གཟིམ་ཁང་གཉིས་ལ་སྒང་ཤག་དང་ཞབས་ཤག་ཞེས་དགོན་སྡེ་སྤྱིའི་ཆེ་མཐོང་གིས་མཚན་གནས་གསོལ་ཡོད། དེར་སུམ་རྩེན་གླིང་དང་རྒྱལ་བ་རིགས་ལྔའི་གནས་དང་རྫོང་མཁའི་ཇོ་ཁང་དང་ནགས་ཕག་མཚོ་དང་བས་མཐའ་མཚོ་ལ་སོགས་པའི་གནས་གྲགས་ཅན་མང་པོ་ཡོད། ༢༽ རྫོང་མཁར་གྱི་སྲང་ལམ་གཙོ་བོ་ཛམ་ཐང་ལམ་བརྒྱུད་ནས་ཕྱིན་ཚེ་ཛམ་ཐང་གནའ་མཁར་(རྡོ་དཀར་རྫོང་ཡང་ཟེར) ཡོད་ས་དེར་སླེབས་ཐུབ །རྒྱལ་ཐང་ལ་གནའ་བོའི་དུས་སུ་ཛམ་ཐང་ཟེར་ཞིང༌། དེ་དང་ལི་ཐང༌། འབའ་ཐང་བཅས་ནི་བོད་ཀྱི་རྒྱལ་པོའི་སྲས་གསུམ་གྱི་མངའ་རིས་ཡིན། 　རྒྱལ་ཐང་ཞེས་པའི་མིང་ཐོབ་ཚུལ་ལ་གནའ་བོ་བོད་ཀྱི་རྒྱལ་པོའི་དབང་རིས་ཡིན་ཞིང་ས་གཞི་འཁོད་སྙོམས་ལ་ཐ་གྲུ་རྒྱ་ཡངས་པའི་རྩྭ་ཐང་སྟེང་ལ་ཆགས་པས་ན་དེ་སྐད་གྲགས།　བོད་ཀྱི་དཔོན་དམག་རྣམས་རྒྱལ་ཐང་ནས་ལ་གཅིག་རྒྱག་པའི་ས་དེར་སླེབས་དུས་སྔ་དང་འདྲ་བའི་ཐང་ཡངས་པོ་ཞིག་མཐོང་བས་ཡ་མཚན་དང་བཅས་ཡང་འདིར་ཐང་ཅིག་འདུག་ཞེས་འབོད་པ་ལས་༼ཡང་ཐང༽ཞེས་པའི་མིང་དེ་གྲུབ་པར་གྲགས། དེ་ཡང་སྤྱི་ལོ་680ལོར། བོད་ཀྱི་བཙན་པོའི་རྒྱལ་རབས་ཀྱི་སྐབས་སུ་རུ་སྡེ་དྲུག་གི་ནང་ནས་དབུ་རུ་ཡི་ཁོངས་བཏོགས་བར་གྱི་དཔའ་བའི་སྡེའི་དམག་དཔོན་ནགས་ཤོད་ཀྱིས་དེའི་རུས་ཆེན་ལའི་སྟེང་དུ་རྡོ་ཡིས་མཁར་བརྩིགས། མཁར་གྱི་ཕྱི་ལ་ཡུལ་དེའི་ས་དཀར་རིགས་ཤིག་ཡོད་པ་དེ་བྱུགས་པའི་རྐྱེན་གྱིས་རྡོ་དཀར་རྫོང་ཞེས་མིང་དུ་ཆགས། དེ་མིན་འོ་ཆུའི་ངོགས་སུ་ཉི་འོད་རྫོང་བརྩིགས་པ་རེད། ཆིང་རྒྱལ་རབས་ཀྱི་སྐབས་སུ་རྡོ་དཀར་རྫོང་ཡུན་ནན་དང་ཐུ་བོད་གཉིས་ཉོ་ཚོང་བྱེད་སའི་ཚོང་འདུས་གལ་ཆེན་དང༌། ཇ་རྟའི་ཚོང་ལམ་འགྲིམ་སྐབས་ངེས་པར་དུ་བརྒྱུད་དགོས་པའི་ཡུལ་ཞིག་ཏུ་གྱུར། བར་སྐབས་སུ་གནའ་མཁར་ལ་གཏེར་མ་རོང་གི་རོང་སྡེ་བ་སོགས་ཆ་ཕྲེང་དང་གཏེར་མ་རོང་གི་ཇག་པས་གསོད་སྲེག་འཕྲོག་གསུམ་ཐེབས་ནས་ཉིན་བཞིན་ཉམས་རྒུད་དུ་གྱུར། 　　གནའ་མཁར་གྱི་དཀྱིལ་སྙིང་ནི་རུས་ཆེན་ལ་ཡིན་ཞིང་དེ་ལས་བྱང་སྒོ། གསེར་འབྲུག མཛོད་ཁང་བཅས་སྲང་ལམ་ཆེན་པོ་གསུམ་ཕྱིར་བསྲིངས་ཡོད།གཏོར་སྐྱོན་ཐེབས་ཚད་ཆེས་ཆུང་ཞིང་གཞི་ཁྱོན་ཆེས་ཆེ་བའི་བོད་ཀྱི་གནའ་མཁར་འདི་ཡུལ་སྐོར་བ་འགའ་རེས་ཤེས་རྗེས་དེའི་ལོ་རྒྱུས་ཀྱི་རིན་ཐང་གིས་ཡིད་འཕྲོག་པར་གྱུར་ཏེ་དེ་གར་གཞི་སྡོད་བྱས་པ་རེད། ད་ལྟ་གནའ་མཁར་གྱི་ཁང་གླར་གཏོང་བྱེད་ཀྱི་ཁང་པ་༤༠༠ལྷག་ཡོད་པ་ལས།ཁང་པ་༨༣ནི་འཛམ་གླིང་གི་ཡུལ་ལུང་ངེས་མེད་ནས་ཡོང་བའི་མ་དངུལ་གཏོང་མཁན་གྱིས་གླས་ཡོད་ཅིང༌། གནའ་མཁར་འདི་ཆང་ཁང་དང་ཁོ་ཧྥེ་ཁང་མང་བའི་ཡུལ་ཞིག་ཏུ་གྱུར་ཡོད། 　　གནའ་མཁར་དུ་སྤྱི་ལོ༡༧༤༢ལོར་བཞེངས་པའི་རྡོ་དཀར་ལྷ་ཁང་ཡོད།བཀའ་བསྟན་ལྷ་ཁང་དེ་ནི་བོད་རྒྱ་གཉིས་ཀྱི་བཟོ་ལུགས་ཟུང་དུ་སྦྲེལ་བའི་བཟོ་བཀོད་ཅིག་ཡིན་པ་དང་ནང་དུ་“སངས་རྒྱས་བསྟན་པ་ཀུན་གྱི་བླ་ན་བཀུར་”ཞེས་པའི་གོང་མ་གཡུང་ཀྲེང་གི་ཕྱག་བྲིས་ཡོད། བཀའ་བསྟན་ལྷ་ཁང་དེ་ནི་བོད་རིགས་རྣམས་ཀྱིས་གྲོས་ཁ་བསྡུར་ས་དང་འདུ་འཛོམས་བྱེད་ས།ཆོས་ལུགས་ཀྱི་ཆོ་ག་སྤེལ་ས་བཅས་རེད། འདུ་ཁང་ནང་དུ་ཆིང་རྒྱལ་རབས་སྐབས་ཀྱི་བོད་རིགས་ཀྱི་ལྷ་བྲིས་པ་ཚོས་བྲིས་པའི་ལྡེབས་རིས་ཡོད་པ་རྣམས་ཐིག་རིས་བྱང་ཆ་ལྡན་ལ་ཁ་དོག་མངོན་པར་བཀྲ། རི་མོའི་འབྲི་སྟངས་ཀྱི་ཐད་ནས་རྒྱ་རིགས་དང༌། པའེ་རིགས། འཇང་རིགས་བཅས་ཀྱི་ལུགས་ཀྱང་འདྲེས་ཡོད་པས་བོད་ཀྱི་ས་གནས་གཞན་དག་ཏུ་མཐོང་དཀོན་པ་ཞིག་རེད།

དགེ་ལྡན་སུམ་རྩེན་གླིང་ནི་བོད་གངས་ཅན་ལྗོངས་ཀྱི་མཐའ་མཚམས་སུ་གཞིས་ཆགས་པའི་རྒྱལ་ཐང་བསིལ་མོ་ལྗོངས་ཀྱི་དགོན་ཆེན་ཞིག་སྟེ། འཕགས་མཆོག་སྤྱན་རས་གཟིགས་མི་ཡི་རྣམ་པར་རོལ་བ། བྱང་ཕྱོགས་ཁ་བ་ཅན་གྱི་ལྷ་སྐལ་རྒྱལ་བ་སྐུ་ཕྲེང་རིམ་བྱོན་ལས་རྒྱལ་མཆོག་ལྔ་པ་ཆེན་པོའི་ཐུགས་དགོངས་ལྟར་གང་གི་ཐུགས་སྲས་འཕྱོང་རྒྱས་པ་དཔོན་སློབ་ངག་དབང་རྣམ་རྒྱལ་གྱིས་ཕྱི་ལོ་༡༦༧༩་ལ་ཕྱག་བཏབ་ཅིང་། ཕྱི་ལོ་༡༦༨༡ལོར་ལེགས་གྲུབ་བྱུང་བས་དགོན་འདིའི་ཕྱག་འདེབས་པ་པོ་དེ་ཉིད་དགོན་པའི་མཁན་ཁྲིར་དང་པོར་ཕེབས་ནས་དཔོན་སློབ་ཟུང་འབྲེལ་གྱིས་མདོ་སྔགས་ཀྱི་ཆོས་ཚུལ་དྲི་མ་མེད་པ་རྨང་ནས་གསོས་ཤིང་དར་རྒྱས་མཛད་པ་དང་། ༧གོང་ས་ལྔ་པ་ཆེན་པོ་རང་ཉིད་ཀྱིས་དངོས་སུ་རྒྱལ་ཐང་དགེ་ལྡན་སུམ་རྩེན་གླིང་ཞེས་མཚན་གསོལ་གནང་མཛད་ཅིང་། དེ་ཡང་རི་བོ་དགེ་ལྡན་པའི་ཆོས་རྒྱུད་འཛིན་པ་དང་གནས་ཁྱད་པར་ལྷ་ཡུལ་ལྟ་བུར་ཆགས་པས་སུམ་རྩེན་དང་ཐོས་བསམ་སྒོམ་གསུམ་སོགས་བྱ་བ་ལས་ཀྱི་གནས་ཡིན་པས་གླིང་ཞེས་རྗེས་གྲུབ་ཀྱི་མཚན་འདི་གསོལ་བར་ངེས་སོ། གཞུང་ས་དགེ་ལྡན་ཕོ་བྲང་པའི་ཆབ་སྲིད་ཀྱི་མངའ་ཐང་གོང་དུ་བཏེགས་པར་མཐའ་མཚམས་ཀྱི་ཡུལ་འདི་ནས་ཀྱང་སྲི་ཞུ་རྒྱ་ཆེར་བསྒྲུབས་ཡོད་ཅིང་། ལྷག་པར་དུས་སྐབས་དེར་བཀའ་རྒྱུད་པའི་དགོན་སྡེ་ཧ་ཅང་མང་བ་སྒང་ལ་ད་རུང་རྙིང་མ་སོགས་དགོན་སྡེ་མི་ཉུང་བ་ཞིག་ཡོད་པས་ཡོངས་གྲགས་སུ་དགོན་ཁག་བརྒྱ་དང་བརྒྱད་ཞེས་གྲགས་པ་དེ་དག་གིས་གྱེན་ལོགས་ཀྱི་ཉེན་ཁ་ཡང་ཆེ་བས་དབུས་ནས་བཀའ་ཡིག་ལན་དུ་མར་འབྱོར་བ་ལྟར་ཀརྨ་བཀའ་རྒྱུད་ཀྱི་དགོན་སྡེ་ཆེ་བ་གསུམ་དང་། དེ་བཞིན་འདབ་འབྲེལ་གྱི་འཕྱ་ཕྲེང་དང་འཇང་། དེ་བཞིན་ཆབ་མདོ་དང་བྲག་གཡབ་སོགས་ནས་ཀྱང་ཡོང་ཆོག་པའི་དགོན་སྡེ་ཧ་ཅང་ཆེན་པོ་ཞིག་གི་འཆར་གཞི་ལྟར་གྲུབ་ཡོད་ཅིང་། མདོར་ན་དགོན་ཁག་བརྒྱ་དང་བརྒྱད་ལས་གྲུབ་པའི་ཁམས་གསུམ་འགྲོ་བའི་བླ་མ་ཤར་རྒྱལ་བ་ཙོང་ཁ་པ་ཆེན་པོའི་རིང་ལུགས་འཛིན་པ། དཔལ་མཉམ་མེད་རི་བོ་དགེ་ལྡན་པའི་ཆོས་སྡེ་ཆེན་ཆེན་པོ་ཞིག་༧གོང་ས་ལྔ་པ་ཆེན་པོས་ཐུགས་སྐྱེད་སྨོན་ལམ་གྱི་སྟོབས་ལས་ལེགས་པར་གྲུབ་ནས་ད་བར་ལོ་ངོ་སུམ་བརྒྱ་ལྷག་གི་ལོ་རྒྱུས་ཡོད་པའི་བོད་རྒྱུད་ནང་བསྟན་གྱི་དགོན་སྡེ་ཆེ་བ་གྲས་ཤིག་ཏུ་གྱུར་ཡོད། ལོ་རབས་སྔོན་མར་དགོན་སྡེ་འདིར་དགེ་འདུན་པ་སྟོང་ཚོ་གཉིས་ལྷག་ཚོགས་མྱོངས་ཤིང་།  དེང་སྐབས་ཀྱང་དགེ་འདུན་སྡེ་སྣོད་འཛིན་པ་བརྒྱད་བརྒྱ་ཡས་མན་ཞིག་རྒྱུན་བཞུགས་གནང་བཞིན་ཡོད།  འདི་གའི་ཆོས་སྤྱོད་ཀྱི་བྱ་བ་གཙོ་བོ་ནི་དབུས་ཀྱི་གསང་ཆེན་དཔལྡན་སྟོད་རྒྱུད་གྲྭ་ཚང་གི་ཕྱག་སྲོལ་འཁྲུལ་མེད་གསང་སྔགས་ཀྱི་ཆོ་གའི་བསྐོར་ཡིན། གདན་ས་ཁག་ནས་སློབ་མཐོན་གྱིས་དགེ་བའི་བཤེས་གཉེན་དང་རབས་འབྱམས་པ་སོགས་མཁས་པ་གནམ་གྱིས་ས་གབ་པ་ལྟ་བུ་བྱོན་ཡོད།  མཁན་རབས་རིམ་བྱོན་ཡོངས་རྫོགས་ནི་དགེ་བཤེས་དང་རབ་འབྱམས་པ་རྣམས་ཡིན་ཞིང་།   དགོན་པའི་མགོན་བླ་གཙོ་བོ་ནི་འཕྱོང་རྒྱས་པ་ངག་དབང་རྣམ་རྒྱལ་གྱི་སྐུ་སྐྱེས་སྐྱབས་རྗེ་ཟངས་འབུམ་རྫོ་རྗེ་འཆང་སྐུ་ཕྲེང་རིང་བྱོན་དང་ཁྱབ་བདག་རྒྱལ་ཐང་བཀའ་འགྱུར་བ་རྣམ་གཉིས་ཡིན་ཞིང་།   དགོན་པའི་མ་ལག་དང་བཅས་པའི་ཆོས་ཕྱོགས་ཀྱི་བྱེད་སྒོ་ནི་གཙོ་བོ་གྲྭ་ཆང་རིན་པོ་ཆེ་དང་ཁམས་ཚན་བརྒྱད་ཡིན།  དགོན་པའི་དགེ་འདུན་མངས་ཀྱི་འཚོ་བའི་ཆ་རྐྱེན་མཁོ་སྒྲུབ་གནང་མཁན་སྤྱི་སོ་དང་རྒྱབ་ཤགས་གཉིས་ཡིན། དེང་སྐབས་དེ་གཉིས་ལོགས་སུ་བཙུགས་ཐུབ་མེད། དགོན་པའི་ཁོ་རྭ་ཁོར་ཡུག་ནི་ཤར་ན་ཁ་རི་གླང་ཆེན་འདྲའི་སྟེང་གཞི་བདག་དང་གནས་རིའི་རང་བཞིན་ཡིན། མདུན་ན་ལྷ་མོ་བླ་མཚོ་གཡུ་ཡི་མེ་ལོང་འདྲ་བའི་ནང་དགོན་པའི་སྣང་རྙན་གསལ་ལྷང་ལྷང་བཀྲ་ཞིང་གསེར་བྱ་ངང་མོ་སོགས་མཚོ་ལ་དགའ་འདབ་ཆགས་ཉ་མོ་སོགས་སྦྱིན་པའི་གནས་སུ་གྱུར་བ་དང་། ནུབ་བྱང་མཚམས་སུ་མཁའ་སྣ་རྒྱུད་ཀྱི་རི་གཞོངས་དེ་ནི་གྲྭ་སར་འགྲིམ་པའི་ཆོས་ལམ་ཡིན་པར་གྲགས།  རྒྱབ་རི་གནམ་སྔོན་པོ་ས་ལ་ལྷུང་འདྲ་བ་ནི་ཡུལ་ཁམས་བདེ་བའི་རྟེན་འབྲེལ་ཞེས་ཀྱང་གྲགས།

རུས་ཆེན་ལའི་སྤྱི་གླིང་དུ་ཡོད་པའི་ཀླུ་རྒྱལ་ལྷ་ཁང་ནི་ཐོག་སོ་གསུམ་དང་ལྡན་པའི་རྒྱའི་ལུགས་ཀྱི་བཟོ་བཀོད་ཅིག་ཡིན་ཞིང༌།དེ་ལས་གནའ་མཁར་ཧྲིལ་པོར་མར་བལྟས་ཆོག དེང་སྐབས་རི་རྩེ་རུ་མ་ཎི་འཁོར་ལོ་ཆེན་པོ་ཞིག་བཞེངས་ཡོད་པ་དང་དེའི་སྟེང་རྒྱ་མིའི་གུང་ཁྲེན་རིང་ལུགས་ཀྱི་མེས་པོའི་རྙན་རིས་འབུར་དོད་རྐོས་ཡོད་པ་དང་གུང་ཁྲིན་ལ་དགའ་ཞེན་བྱས་དགོས་པའི་སློབ་བྱ་མང་པོ་རྐོ་ཡོད་པས་ཏང་འཁོར་ཞེས་པའི་མིང་འདོགས་ཤིག་ཀྱང་བཏགས་ཅིང་། དེའི་རྐྱེན་གྱིས་དད་ལྡན་མང་ཚོགས་ཀྱིས་དད་མོས་མི་བྱས་ཤིང་ཡུལ་བསྐོར་བ་རྣམས་ཀྱིས་རྩེད་ཆས་ཙམ་གྱི་མཐོང་ལས་བྱས་ཀྱིན་མི་འདུག་ཟེར། ༣༽ རྒྱལ་ཐང་ནི་བོད་ཀྱི་མཐའ་མཚམས་སུ་གཞིས་ཆགས་པའི་ས་ཁུལ་ཞིག་ཡིན་ལ། དེར་ཤིང་སྣ་རྒྱ་ཕྲག་མང་པོ་སྐྱེད་བའི་ནགས་འཚལ་སྟུག་པོ་དང་ཆེད་དུ་གསོ་སྐྱོངས་བྱས་པ་ལས་ཀྱང་མཛེས་ཤིང་ལྟ་ན་སྡུག་པའི་མེ་ཏོག་གིས་ཡོངས་སུ་གང་བའི་སྦང་ལྗོངས། གསེར་ཟངས་སོགས་རིན་ཆེན་དངོས་པོའི་གཏེར་ཁ་མང་ཤིང་ཤ་མོ་རིགས་འདྲ་མིན་དང་དབྱར་རྩྭ་དགུན་འབུ་སོགས་སྨན་སྣ་འཛོམས་པ། རི་སྐྱེས་སྲོག་ཆགས་ནང་ནས་དེང་སྐབས་འཛམ་གླིང་ཡོངས་སུ་དཀོན་པའི་སྤྲེའུ་སེར་གདོང་ཅན་དང་ཁྲུང་ཁྲུང་རྐེ་ནག དོམ་ཁྲ་རབས་དེ་མིན་གླ་བ་དང་སྒོ་བ་ཤྭ་བ་མནའ་བ་སོགས་དང་། གཟིག་དང་དྲེལ་རི་ཕག་སྤྱང་ཀི་ཝ་མོ་རི་བོང་བཅས་རི་སྐྱེས་འོ་འཐུང་དང་ཤ་གཟན་རིགས་གྲངས་ལས་འདས་པ་ཡོད། ནོར་ཕྱུགས་ཀྱང་གཡག་དང་འབྲི་འཛོ་མོ་བ་ཕྱུགས། དེ་བཞིན་་ལུག་དང་འཛོ་རྟ་བཅས་མདོར་ན་མཐོ་སྒང་གི་མིའི་ལོངས་སྤྱོད་ཀྱི་ཆ་རྐྱེན་དུ་ཕུན་སུམ་ཚོགས། མི་རྣམས་ཀྱི་ཡིད་དབང་འཕྲོག་པའི་མཚོ་དང་ཚེའུ་སོགས་རང་བྱུང་གི་མཐོན་ཁོངས་ཕྱུགས་པའི་གནས་མཆོག་ཞིག་ཡིན། དེར་བརྟེན་ས་འདི་ལ་མི་རྣམས་ཀྱིས་རྒྱལ་ཐང་ནོར་བུའི་ས་ཆ་ཞེས་བསྔགས་པའི་གླུ་དབྱངས་ལེན། ལོ་རྒྱུས་ཐོག་དེ་གའི་མི་རྣམས་གྱིས་འཚོ་བའི་མཁོ་སྒྲུབ་ཐད་གཙོ་ཆེར་ཞིང་ལས་དང་ཤིང་བཟོ་ཐོན་རྫས་དང་རྫ་བཟོ་སྨྱུག་མ་སླས་ནས་སླེའུ་སོགས་མཁོ་སྤྱོད་ཆེ་བ་མང་པོ་བཟོ། དུས་ཀྱི་འགྱུར་འགྲོ་དང་སྟུན་འཛམ་གླིང་ཡོངས་སུ་མཚན་རིག་དར་ཁྱབ་སོང་བ་ལ་བརྟེན་ནས་དེ་གའི་མི་རྣམས་ཀྱི་འཚོ་བ་དང་ཐོན་སྐྱེད་གོང་དུ་འཕེལ་བ་དང་མི་དམངས་ཀྱི་འཚོ་བ་རྒྱུན་ཆད་མེད་པར་ལེགས་བཅོས་བྱུང་བ་དང་ཆབས་ཅིག ཤིང་བཟོས་ཡོ་བྱད་སོགས་ཀྱི་ཐོན་སྐྱེད་བྱ་བ་དེ་རིམ་བཞིན་བཟོ་རྩལ་ཐོན་རྫས་ཐོན་སྐྱེད་བྱེད་པར་གྱུར། ཤིང་བཟོ་ལྟ་བུ་ཞིག་ལ་མཚོན་ན་དེང་སྐབས་སྤྱོད་གོ་ཆོད་ལ་མཛེས་རྩལ་ལྡན་པའི་མི་རིགས་ཀྱི་ཤིང་བཟོས་བཟོ་རྩལ་ཐོན་རྫས་ཆེད་དུ་ཐོན་སྐྱེད་བྱེད་ཀྱིན་གདའ། ཤིང་ཕོར་གྱི་ཐོན་རྫས་ཀྱི་རྒྱུ་ཆ་ནི་ཤིང་སྟག་མ་དང༌། གསོམ་ཤིང་དམར་པོ། སེའུ་ཤིང་སོགས་མཐོ་སྒང་གི་ཤིང་སྡོང་རྩ་ཆེན་དག་ཡིན་ཁར། སྲོལ་རྒྱུན་གྱི་བཀྲག་རྩི་རྒྱག་སྟངས་སྤྱད་ནས་ཐོན་པ་ཡིན། ཐོན་རྫས་ལ་ད་བེར་བརྐོས་མ་ཡོད་ཅིང༌། དེའི་ནང་དུ་ནོར་བུ་འབྲུག་འཁྱིལ་དང༌། བྱ་འབྲུག་ཁ་སྤྲོད། བཀྲ་ཤིས་རྟགས་བརྒྱད། གངས་སེང་དཀར་མོ། རྒྱལ་སྲིད་སྣ་བདུན། དེ་བཞིན་ཚེ་རིང་རྣམ་དྲུག་། རི་དྭགས་བསེ་རུ། ཤྭ་བ་རྔ་རིང་སོགས་ཀྱི་རི་མོ་བརྐོས་པས་མི་རིགས་ཀྱི་ཐུན་མང་མ་ཡིན་པའི་ཁྱད་ཆོས་མངོན་ཡོད། བཟོ་བའི་ཁྱད་འཕགས་ཀྱི་ལག་རྩལ་ལས་གསོན་ཉམས་ལྡན་པའི་རི་མོ་དག་མིག་གིས་ལོངས་སུ་སྤྱོད་པར་མངོན། ཆ་སྒམ་མཆོད་གཤོམ་གྱི་ཐོག་ལ་བོད་བརྒྱུད་ནང་བསྟན་གྱི་མཆོད་འབུལ་གྱི་རི་མོ་སྣ་ཚོགས་བརྐོས་ཡོད། བོད་ཀྱི་མདུན་ཅོག་ངོར་“འབྲུ་སྣ་ཕུན་སུམ་ཚོགས་པ་”དང་“དཔལ་བེའུ་”སོགས་ཀྱི་རི་མོ་བརྐོས་ཤིང་། སྲོལ་རྒྱུན་འདི་དག་ནི་དུས་རབས་སྔོན་མ་ཡིན་ན་ཤེས་ཡོན་ལྡན་པའི་མཁས་པ་དང་ཕྱུག་པོ་དང་དཔོན་རིགས་ཀྱི་མཚོན་རྟགས་ཡིན་པའི་བཟོ་རྩལ་ཐོན་རྫས་ཡིན། དེང་སང་དགོས་པའི་ཡོན་ཏན་ལ་དམ་འདོད་མེད་པར་མི་དགོས་དཔོན་ཆས་སོགས་ཁྱིམ་ཚང་ཀུན་ལ་ཁྱབ་སྟེ། བོད་ཁང་ནང་དུ་མེད་དུ་མི་རུང་བའི་ཁྱིམ་ཆས་སུ་གྱུར་ནས་། དེ་བཞིན་བཟོ་གྲྭས་ད་དུང་རིན་གོང་དང་ཚད་གཞི། བཟོ་དབྱིབས་མ་འདྲ་བའི་ཤིང་ཕོར་དང། རྩམ་སྒམ། ཇ་ཕོར། མིག་མངས་ཀྱི་རྡེའུ་སྣོད། ཆང་བྱད་སོགས་ཐོན་རྫས་རིགས་སྣ་༢༠ལྷག་ཐོན་སྐྱེད་བྱེད་བཞིན་ཡོད། ༤

རང་ཅག་རྣམས་ཀྱི་འདྲེན་པ་དང་ཐུགས་རྗེ་བླ་ན་མ་མཆིས་པ་སྐྱབས་རྗེ་ཟངས་འབུམ་རྡོ་རྗེ་འཆང་དཔལ་བཟང་པོ་མཆོག་ནི་སྔོན་བདག་ཅག་གི་སྟོན་པ་ཤྭཀྱ་ཐུབ་པ་འཇིག་རྟེན་དུ་བྱོན་ནས་འགྲོ་བ་སེམས་ཅན་ཐམས་ཅད་ཐར་པ་མྱང་ངལ་ལས་འདས་པའི་གོ་འཕངས་ལ་འགོད་པའི་ཕྱིར་མཛད་པ་བཅུ་གཉིས་ལ་སོགས་བསྟན་པའི་སྐབས་ན་སྟོན་པའི་འཁོར་གྱི་དབུས་ནས་ཤེས་རབ་ཀྱི་མཆོག་ཉན་ཐོས་ཤ་རིའི་བུ་དང་།  འཕགས་ཡུལ་གྱི་པཎ་གྲུབ་ཆེན་པོ་རྣམས་ཀྱིས་རྒྱལ་བའི་བསྟན་པ་རིན་པོ་ཆེ་འཇིག་རྟེ་ན་ཉི་མ་ལྟ་བུའི་གསལ་བར་མཛད་པའི་དུས་སུ་གྲུབ་ཆེན་ཏེ་ལོ་པ་ཆེན་མོ་དང་པཎྜི་ཏ་ཙནྜ་གོ་མི་སོགས་ཀྱི་སྐྱེ་བ་བཞེད། བོད་དུ་སྟན་པ་སྔ་དར་སྐབས་བོད་ཀྱི་རྗེ་འབངས་ཉེར་ལྔའི་ནང་ཚན་ཤུད་བུ་དཔལ་སེང་སོགས་དང་། ཕྱི་དར་སྐབས་དགེ་བའི་བཤེགས་གཉེན་ཆེན་པོ་པོ་ཏོ་བ་དང་། ཁམས་གསུམ་ཆོས་ཀྱི་རྒྱལ་པོ་ཤར་རྒྱལ་བ་ཙོང་ཁ་པ་ཆེན་པོའི་དངོས་སློབ་སྤྱན་སྔ་བ་བློ་གྲོས་རྒྱལ་མཚན་དང་། བྲག་སྒོ་རང་འབྱམས་སོགས་ཀྱི་སྐུ་རྒྱུད་འཛིན་ཅིང་། ལྷག་པར་བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གྱི་ཆབ་འབངས་སུ་གཏོགས་པ། བོད་ཁམས་སྐྱེ་རྒུ་ཡོངས་ཀྱི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་རྒྱལ་མཆོག་ལྔ་པ་ཆེན་པོའི་ཐུགས་སྲས། འཕྱོངས་རྒྱས་པ་དཔོན་སློབ་ངག་དབང་རྣམ་རྒྱལ་གྱིས། ཆོས་སྡེ་ཆེན་པོ་དགེ་ལྡན་སུམ་རྩེན་གླིང་ཕྱག་བཏབ་ཅིང་མཁན་ཁྲིར་ཕེབས་པ་ནས་བཟུང་རྒྱལ་ཐང་ལྷ་སྡེ་མི་སྡེ་ཡོངས་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་ནས་མཚན་ཡང་དཔོན་སློབ་ཞེས་གསོལ་ཞིང་། དེ་ཡང་གསེར་ཀོང་རྡོ་རྗེ་འཆང་མཆོག་གིས་མཛད་པའི་ཟངས་འབུམ་རིན་པོ་ཆེའི་འཁྲུངས་རབས་གསོལ་འདེབས་ལས། ༼ཁྱབ་བདག་ཁྲི་ཆེན་ཡང་སྟིང་རྣམ་རྒྱལ་དཔལ།། གྲུབ་པ་མཆོག་བརྙེས་བློ་བཟང་འཕྲིན་ལས་དང་།།  ལྔ་པའི་ཐུགས་སྲས་ངག་དབང་རྣམ་པར་རྒྱལ།། འགྲོ་འདྲེན་དམ་པ་གསུམ་ལ་གསོལ་བ་འདེབས།།༽ ཞེས་གསུངས་པ་ལྟར་དེ་ནས་དཔོན་སློབ་ངག་དབང་རྣམ་རྒྱལ་མཆོག་གི་སྐྱེ་རབས་ཕྲེང་བ་རིམ་བྱོན་ལས་ཁྲི་ཆེན་དགེ་འདུན་ཚུལ་ཁྲིམས་དང་གྲུབ་པའི་དབང་ཕྱུགས་བློ་བཟང་འཕྲིན་ལས་དཔལ་བཟང་པོ་དང་། སྤང་རྟོགས་ཀྱི་་ཡོན་ཏན་ལ་མངའ་བརྙེས་པ་དཀོན་མཆོག་འཕྲིན་ལས་རྒྱ་མཚོ་དང། དམ་པ་འདི་ཉིད་ནི་རྒྱལ་ཐང་རྫོང་གི་ནུབ་ཕྱོགས་སུ་ལེ་དབར་ལྔའི་མཚམས་ཀྱི་ཟངས་འབུམ་ཡུལ་དུ་སྐུ་འཁུངས་ཤིང་།  དུས་དེ་ནས་བཟུང་ཟངས་འབུམ་རྡོ་རྗེ་འཆང་ཞེས་པའི་མཚན་དེ་ཐོབ་ཅིང་། རྗེ་འདི་ཡིས་གནང་བའི་ཟངས་འབུམ་སྒྲོལ་མ་ཞེས་པའི་རྗེ་བཙུན་སྒྲོལ་མའི་སྐུ།  གསུང་རང་བྱོན་མ་ཞིག་སྔར་རྒྱལ་ཐང་དགའ་ལྡན་སུམ་རྩེན་གླིང་དུ་ཡོད་པར་གྲགས། དཀོན་མཆོག་འཕྲིན་ལས་རྒྱ་མཚོའི་སྐྱེས་སྤྲུལ་རིགས་བརྒྱའི་ཁྱབ་བདག་དཀོན་མཆོག་འཇིགས་མེད་རྒྱ་མཚོ་༼ཁོང་ནི་ཡང་ཐང་ཞེས་པའི་ཡུལ་དེར་སྐུ་འཁྲུངས༽དང་།  ཞྭ་སེར་བསྟན་པ་གསལ་བྱེད་ངག་དབང་བློ་བཟང་བསྟན་འཛིན་རྒྱ་མཚོའང་།  མཚན་གཞན་ངག་དབང་བློ་བཟང་བསྟན་འཛིན་ཆུ་གཏེར་༼དམ་པ་འདི་ནི་རྒྱལ་ཐང་རྫོང་གི་ཉེར་འཁྲིས་ཀྱི་བྲག་སྣ་ཞེས་པའི་གྲོང་ཚོ་ནང་འཁྲུངས༽་དང་།  སྙིགས་དུས་འདིར་བསྟན་འགྲོའི་དཔལ་མགོན་དུ་ངེས་དོན་གྱི་མཆོག་སྤྲུལ་རྣམ་པར་རོལ་བའི་རྗེ་བཙུན་ཐུབ་བསྟན་ཚུལ་ཁྲིམས་དཔལ་ལྡན་རྒྱལ་མཚན་གྱི་བར་བྱོན་ཞིང་།  དེ་དག་ཐམས་ཅད་ཀྱང་བསྟན་འགྲོ་སྤྱི་དང་སྒོས་ཤར་རྒྱལ་ཐང་པའི་སྐྱེ་འགྲོ་ཡོངས་དང་།  གཞན་ཡང་ཆོས་འབྲེལ་དངོས་ཐོབ་ཀྱི་སྐལ་ལྡན་གདུལ་བྱ་རྣམས་ཀྱི་ཐོགས་མེད་ནས་བསགས་པའི་སྡིག་སྒྲིབ་དག་ཅིང་།  གཏན་གྱི་བདེ་བར་འགོད་པའི་ཆེད་དུ་བྱོན་པ་ཁོ་ནའོ།  འདིར་བཀོད་པའི་རྣམ་ཐར་ནི་ཟངས་འབུམ་རྡོ་རྗེ་འཆང་གི་སྐུ་ཡི་གསང་གསུམ་གྱི་མཛད་པ་རྒྱ་མཚོ་ལྟ་བུ་ལས་ཆུ་ཐིག་ཙམ་ཞིག་དད་ལྡན་བསོད་ནམས་བསགས་པའི་ཞིང་དུ་སྦྱར་བའོ།།