Open main menu

Wikipedia β

བོད་ཀྱི་རྩོམ་རིག

    སྨག

མེ་ཟླུམ། ཕ་ཡུལ། ཁམས་རྟའུ།


ས་གཞི་རྡུལ་གྱིས་གང་བའི་སྲང་ལམ་གྱི་བར་ན།། སྨག་གི་ལྭ་བ་ནག་པོ་རྒྱབ་གོས་སུ་བྱས་ནས།། དགུན་གྱི་ཁ་བའི་ཁྲོད་དུ་རྐང་རྗེས་ཤིག་བྲིས་ཀྱང་།། གསེར་གྱི་སྒོ་ཆེན་དེ་ལ་ལྕགས་ཟྭ་ཞིག་བརྒྱབས་འདུག།

མིག་ཟུང་ལྷེམ་ལྷེམ་མཐའ་རུ་གཙང་བོ་དེ་འཁྱིལ་དུས།། སེམས་ཀྱི་ཕུགས་ན་སྡུག་གི་རྨ་ཁ་ཞིག་ཡོད་ཀྱང་།། སྔ་དང་མི་འདྲ་དོ་ནུབ་སྨྱུག་རྩེ་ཡི་མཆི་མ།། ལྷིང་ཞིང་འཇགས་པའི་ལྷ་ཁང་གྲུ་བཞི་ནས་ཤོར་སོང་།།

ཁུ་སིམ་མེ་ཏོག་འདབ་མའི་གྲིབ་བསིལ་ལ་རོལ་སྐབས།། རི་རྩེའི་སྨུག་པ་བན་བུན་ལུས་སྟེང་དུ་ཕོག་ན།། ཤང་ཤང་འབབ་པའི་རོལ་དབྱངས་སྙན་ངག་ཏུ་སྒོམ་བཞིན།། སྨག་གི་ས་ཆེན་འདི་ནས་རྒྱང་རིང་དུ་བུད་འགྲོ།

ཟླ་བའི་གུར་ཁྱིམ་མ་ཡལ་ཡར་སྔོན་གྱི་དུས་སུ།། བྱེ་མའི་ཐང་གི་དཀྱིལ་དུ་རས་གུར་ཞིག་ཕུབ་ནས།། ཚེ་ཟད་སྒྲོན་མེའི་འོད་ལ་རྒྱང་ལྟ་རེ་བྱེད་དུས།། མི་རྟག་ལུས་ཀྱི་ལམ་ལ་སྙིང་བོ་ཞིག་མ་ཚོར།།

ལས་ཀྱི་གཤོག་པའི་སྟེང་གི་སྐྱོ་གདུང་གི་རི་མོ།། གདོང་གི་མིག་གཉིས་བར་གྱི་མུ་ཏིག་གིས་བཀྲུས་ཀྱང་།། རྒྱང་རིང་ལམ་ཆེན་ངོགས་ཀྱི་འོད་དཀར་གྱི་གཞི་ཁྱིམ།། དབྱར་གྱི་འཇའ་ཚོན་བཞིན་དུ་རྟག་པ་རང་མི་འདུག།

སྨག་གི་རྟ་ཕོའི་འཚེར་སྒྲ་བར་སྣང་དུ་སྒྲོག་དུས།། སཱ་ལའི་ནགས་ཚལ་ཁྲོད་ཀྱི་རྨ་བྱ་ཡི་དགའ་སྐྱོ།། གསེར་གྱི་སྒོ་ཆེན་སྟེང་གི་ཁ་ཡིག་ལ་བྲིས་ནས།། འོད་ཀྱི་མཚོ་མོ་འཁྱིལ་སའི་གཞི་ཁྱིམ་དེར་འཕུར་འགྲོ།

2016/8/10 ཉིན་ནོར་གླིང་མཐོ་སློབ་ནས་བྲིས།