རྒྱལ་མོ་རྔུལ་ཆུ

འབྱུང་ཁུངས།

རྒྱལ་མོ་རྔུལ་ཆའི་སྟོད་རྒྱུད་ཀྱི་ནག་ཆུ་དང་ཤག་ཆུ། སོག་ཆུ་སོགས་ཀྱི་མགོ་ཁུངས་ནི་གདང་ལ་རི་བོའི་ལྷོ་འདབས་ཡིན་ལ། ནག་ཆུ་དང་སོག་ཆུ་གཉིས་བོད་ལྗོངས་ཀྱི་འབྲི་རུ་རྫོང་ན་གཞི་གཅིག་ཏུ་འདྲེས་འདུག འདྲེས་མཚམས་དེའི་མན་ཆད་ལ་རྒྱལ་མོ་རྔུལ་ཆུ་ཞེས་འབོད།

བཞུར་ཡུལ།

རྒྱལ་མོ་རྔུལ་ཆུ་ནི་སོག་རྫོང་དང་དཔལ་འབར། སྟེང་ཆེན། ལྷོ་རོང་། དཔའ་ཤོད། མཛོ་སྒང་། རྒྱལ་མོ་ཚ་བ་རོང་སོགས་བརྒྱུད་ཅིང་ཡུན་ནན་ཞིང་ཆེན་ལ་བསླེབས་དུས་ལྷོ་ཕྱོགས་སུ་དཀྱོགས་ཏེ་ལི་སུའུ་རིགས་རང་སྐྱོང་ཁུལ་དང་། པའོ་ཧྲན་ས་ཁུལ། ཏའེ་ཧོང་ཏའེ་རིགས་དང་ཅིང་ཕོ་རིགས་རང་སྐྱོང་ཁུལ་སོགས་བརྒྱུད་ནས་འབར་མ་རྒྱལ་ཁབ་ཏུ་འབབ་བཞིན་ཡོད་ལ། འབར་མ་རྒྱལ་ཁབ་ཏུ་རྒྱལ་མོ་རྔུལ་ཆུའི་མིང་ལ་སར་ལྦུན་གཙང་བོ་ཟེར། སར་ལྦུན་གཙང་བོ་ནི་མའོ་ཐེན་མན་ཞེས་པའི་ས་ཁུལ་གྱི་ཉེ་འགྲམ་ནས་ཧིན་རྡུ་རྒྱ་མཚོའི་ནང་དུ་འབབ་བཞིན་ཡོད།

བཞུར་རྒྱུན་གྱི་རིང་ཚད།

རྒྱལ་མོ་རྔུལ་ཆུའི་བཞུར་རྒྱུན་གྱི་སྤྱིའི་རིང་ཚད་ལ་སྤྱི་ལེ ༣༢༠༠ དང་། བཞུར་ཡུལ་གྱི་རྒྱ་ཁྱོན་ལ་སྤྱི་ལེ་གྲུ་བཞི་མ་ཁྲི ༣༢.༥ཡོད། བོད་ཡུལ་དུ་རྒྱལ་མོ་རྔུལ་ཆུའི་བཞུར་རྒྱུན་གྱི་རིང་ཚད་ལ་སྤྱི་ལེ ༡༥༤༠ དང་། བཞུར་ཡུལ་གྱི་རྒྱ་ཁྱོན་ལ་སྤྱི་ལེ་གྲུ་བཞི་མ་ཁྲི ༡༢ ཡོད། རྒྱལ་མོ་རྔུལ་ཆའི་བཞུར་རྒྱུན་མགྱོགས་པ་མ་ཟད། བཞུར་ཡུལ་གྱི་ས་བབ་རྩུབ་ཅིང་གྲོག་རོང་མང་བས་ཆུ་བེད་ཐོན་ཁུངས་ཧ་ཅང་ཕུན་སུམ་ཚོགས་པའི་ཆུ་བོ་ཞིག་ཡིན།