ཞང་ཞུང།

                                     ===== ལོ་ཙཱ་བ་ཆུང་ཚེ་རིང་ལགས་ཀྱི་བཀའ་དྲི་ལས་འཕྲོས་ཏེ་”རྒྱ་གར་”ཞེས་པའི་ཐ་སྙད་སྐོར་ལ་ཅུང་ཞིག་གླེང་བ། ===== 

ཁར་ཉིན་ངས་འཕྲུལ་སྒྲའི་དྲ་སྟེང་དུ་”རྒྱ་གར་”ཞེས་པ་བོད་སྐད་མ་རེད་ཅེས་པ་ཞིག་བྲིས་ཡོད་པར་བརྟེན། སྐུ་ངོ་མཆོག་ནས་བསམ་ཚུལ་གསར་པ་ཡིན་ན་ཟིན་བྲིས་སུ་བྲིས་ན་ལེགས་ཚུལ་གསུངས་པས། སྐུ་ངོ་མཆོག་གི་དགོངས་ཚུལ་དང་མཚུངས་པའི་བསམ་ཚུལ་གསར་པ་མིན་ཀྱང་ཅུང་ཞིག་འབྲི་ན་འདོད། སྤྱིར་བོད་ཀྱི་ལོ་རྒྱུས་སྨྲ་བ་རྣམས་ཀྱིས་རྒྱ་གར་ཞེས་པའི་ཐ་སྙད་འགྲེལ་སྐབས། ’རྒྱ་’ནི་བོད་དབུས་སུ་བརྩིས་པའི་མཐའ་ཡི་རྒྱ་ན་གནས་པས་ན་དེ་ལྟར་དང། ‘གར་’གྱོན་གོས་དཀར་བའི་ཆ་ནས་དང་། ཡང་ན་བོད་ནས་ལོགས་སུ་’གར’་ནས་ཡོད་པས་’རྒྱ་གར་’ཞེས་འབོད་ཅེས་བཤད་ཡོད་ཡོད། དེའང་བཤད་བྱ་གཙོ་བོ་”རྒྱ་གར་”ཞེས་པའི་ཐ་སྙད་དེ་རྒྱུ་མཚན་དང་ལོ་རྒྱུས་ལྡན་པའི་མིང་ཚིག་ཞིག་རེད་ཅེས་བཤད་ཆོག རྒྱུ་མཚན་ནི། རྒྱལ་ཁབ་ཅིག་གི་མིང་ཡིན་ན་ཕལ་ཆེར་འདྲ་འབྲེལ་སོགས་ཅི་རིགས་ལ་བཏགས་པར་ཁས་ལེན་ཐུབ་པ་ཞིག་རེད། ལོ་རྒྱུས་ཀྱི་ཐོག་ནས་བཤད་ན་ཨརྱན་ (Aryan) རིགས་ཀྱིས་རྒྱ་གར་གྱི་མི་རྣམས་ཤ་མདོག་དང་སྤྱོད་ལམ་སོགས་ལ་བརྟེན་ནས་རིགས་བཞི་རུ་ཕྱེས་ཡོད་པར་བཤད། དེའང་”ཤུ་དྷ་ར”(Shudhra) རིགས་ངན་དང། “བྲཧམན” (Brahmin) ༼བོད་པས་འདི་ལ་”བྲམ་ཟེ་”ཟེར་ཡང་དོན་དུ་འདིའང་བོད་སྐད་མ་རེད།༽ གཙང་རིགས་སམ་ཡོན་ཏན་ཅན་གྱི་རིགས། “ཀཱཤ་ཏྲི་ཡ” (Kashtriya) དམག་གི་རིགས། “ཝེཤ་ཡ” (Vaishya) ཚོང་པའི་རིགས་བཅས་སུ་ཕྱེས། མི་རིགས་འདི་དག་གོང་དུ་ཨརྱན་རིགས་ཀྱིས་དབང་བསྒྱུར་བྱས་པའི་ལོ་རྒྱུས་བཤད་རྒྱུ་ཡོད་པར་བརྟེན། ལོ་བརྒྱ་ཕྲག་མང་པོའི་གོང་དུ་ད་ལྟའི་རྒྱ་གར་འདི་ཉིད་ཀྱང་གོང་གི་ཨརྱན་རིགས་ཀྱི་སྟངས་འཛིན་འོག་ཏུ་གནས་ཡོད། སྤྱིར་ཐོག་མར་ཡུལ་གྱི་མིང་ལ་”སིན་དྷུ་” (Sindhu) སྟེ། ཆུ་བོ་ཆེན་པོ་སིན་དྷུའི་འགྲམ་ན་གནས་པས་ན་དེ་ལྟར་ཟེར། དེ་དང་མཚུངས་པར་ཨརྱན་གྱི་རིགས་རྣམས་ཐོག་མར་སིན་དྷུའི་རྒྱུད་ན་གནས་པས་མི་རིགས་ཀྱི་མིང་ལ་ཨརྱན་ཟེར་བར་སྣང། ད་ནི་གོང་གི་”ཨརྱན་” ཞེས་པ་དེ་བོད་སྐད་དུ་ཇི་ལྟར་འགྱུར་ཚུལ་སྐོར་ལ་ཅུང་གླེང་ན། སྤྱིར་ལེགས་སྦྱར་སྐད་དུ་”ཨརྱ་” ནི་བོད་སྐད་དུ་”འཕགས་”ཞེས་གོ་བ་དང་། “ཨརྱན་” ནི་”འཕགས་པའམ་འཕགས་པའི་”ཟེར་བ་ཡིན། དཔེར་ན། “ཨརྱ་ཝར་ཏ” (Āryāvarta) ནི་འཕགས་པའི་ཡུལ་ཏེ་རི་བོ་ཧི་མ་ལ་ཡ་ནས་ཝིན་དྷ་ཡའི་རི་རྒྱུད་བར་གྱི་ཨརྱན་རྣམས་ཀྱིས་བདག་ཏུ་བཟུང་བའི་ཡུལ་ཞིག་ལ་གོ་ཞེས་བཤད་ཡོད། དེ་དང་འདྲ་བར་བོད་པས་ཀྱང་”འཕགས་ཡུལ་”ཞེས་འབོད་ཀྱིན་པ་རེད། བོད་སྐད་དུ་ཐོག་མར་ལོ་ཙཱ་བ་རྣམས་ཀྱིས་ཡུལ་གྱི་མིང་བྲིས་སྐབས་ཡུལ་དེའི་སྐད་དོད་དམ་ཡང་ན་ཡུལ་མིང་དེའི་གོ་དོན་ལ་གཞི་བཞག་ནས་བྲིས་ཡོད་པ་ལས་བོད་རང་གི་བརྡ་དག་དང་མཚུངས་པའི་མིང་ཞིག་ཕར་འདོགས་མི་སྲིད་པ་ལྟ་བུ་རེད། ད་ནི་འདི་ལྟར་ཏེ། ཐོག་མའི་བོད་ཀྱི་ཡིག་མཁན་རྣམས་ཀྱིས་དབུ་མེད་སོགས་ཀྱི་སྟེང་དུ་”ཨརྱ་” ཡང་ན་ “ཨརྱ་ཝར་ཏ” ཞེས་བྲིས། ཕྱིས་སུ་རིམ་པར་ཨརྱ་ཡི་”ཨ་” མེད་པར་གྱུར་ནས་”རྱ་” གཅིག་པུར་ལྷག དེའང་ཡིན་ཏེ་ལེགས་སྦྱར་སྐད་དུ་ཨ་སྲོག་མེད་དུ་འགྲོ་བ་ཆེས་མང་། གོང་གི་ར་ཡ་བཏགས་དང་ད་ཡ་བཏགས་གཉིས་དབུ་མེད་སོགས་ལ་འབྲི་ཚེ་སྐབས་སྐབས་སུ་ཤིན་ཏུ་ནས་དབྱེ་འགྱེད་དཀའ་བར་འགྱུར་འགྲོ་བས་རིམ་པར་’རྒྱ་གར་’ཞེས་འབྲི་ཚེ་ད་ཡ་བཏགས་རྒྱ་སྟེ་དཔེར་ན་”དྱ་གར”ལྟ་བུར་བྲིས་ཡོད་པ་གསལ་པོར་སྣང། ལྷག་པར་དབུ་མེད་དུ་”རྒྱ་”ཡི་འཚབ་ལ་”དྱ་”བྲིས་པ་མང་པོ་མཐོང་རྒྱུ་ཡོད་ལ། འབྲི་ཚེ་མགྱོགས་པ་དང་སླ་པོ་ཡོད་པས་ཡིན། རྒྱ་གར་ཞེས་པའི་ཕྱི་མ་”གར་”ནི་གོང་ཞུས་ལྟར་དཀར་བའམ་ལོགས་སུ་གར་བར་འགྲེལ་ཡང། དོན་དུ་རང་གི་བསམ་ཚུལ་བྱས་ན་དེའང་བོད་སྐད་མིན་པའི་ཚོར་སྣང་བྱུང། རྒྱུ་མཚན་ནི་གོང་གི་”ཨརྱ་ཝར་ཏ་”ཞེས་པའི་ཕྱི་མ་”ཝར་ཏ་”ནི་”ཨ་ཝར་ཏ”ལས་བྱུང་སྟེ་གནས་ཁྱད་པར་ཅན་ལ་གོ ལེགས་སྦྱར་གྱི་”ཝ་”ནི་ཧོབ་ཏེ་བལྟ་ན་བོད་ཡིག་དབུ་མེད་ཀྱི་’ག་རྐང་པ་མེད་པ་’འདྲ་ཞིག་ཡོད་པས་”ཝར་””གར་”ལ་འགྱུར་མི་སྲིད་པ་མ་རེད་སྙམ། དེས་ན་བོད་པས་”རྒྱ་གར་”ཞེས་འབོད་པ་ནི་”ཨརྱ་ཝར་”ཞེས་འབོད་པ་དང་མཚུངས་ཀྱང་། ད་དུང་”འཕགས་ཡུལ་རྒྱ་གར་”ཞེས་བསྐྱར་ལྡབ་བྱེད་པ་ནི་ངལ་བའི་རྒྱུ་ལས་མ་འདས། ད་འོ་ན་གོང་གི་རྒྱ་ཡི་འགྲེལ་བཤད་དེ་རྒྱ་ནག་གི་རྒྱ་ལ་ཁྱབ་བམ་མི་ཁྱབ་ཟེར་ན། དེའང་ཡིན་ཆོག་སྟེ་སྔོན་རྒྱ་ནག་ལའང་ཨརྱན་རིགས་ཏེ་འཕགས་པའི་སྡེ་གྲངས་ལས་འདས་པ་ཡོད་པས་སོ། ལར་བོད་པ་ཚོར་གཞན་གྱི་སྐད་དོད་དང་མཚུངས་པའི་མིང་མང་པོ་ཞིག་ཨུ་ཚུགས་ཀྱིས་དོན་ཅན་གྱི་མིང་རེ་འདོགས་དགོས་ན་མཁས་པོ་ཡོད་པ་རེད། དཔེར་ན་དེང་གི་ཆར་”མ་ན་ལི”ལ་’མུན་ནག་གླིང་’དང། “མེཀ་ལོཌ་གྷནཇ་” ལ་’མེ་ལྷ་དགའ་འཁྱིལ། ཡང་ན། མི་གླ་དགའ་སྐྱིད་’། “ཅའོ་ར་ཏར་” ལ་’རྐྱང་རུ་བསྟར་’། “མ་ཇ་ནུ་ཀ་ཊི་ལ་“ ལ་‘མ་བྱུང་ཊི་ལ་’སོགས་མང་པོ་བཏགས་ཡོད་། ངོ་མ་སྙན་པོ་དང་གོ་རྒྱུ་ཡོད་པ་ཞིག་མི་འདུག་པས། འདི་ན་ཀུན་རྟོག་ཡིད་ཀྱི་སྒྱུ་འཕྲུལ་རྣམས། ། མ་སྦས་རང་སྣང་ལྷུག་པོར་བྲིས་པ་འདི། ། མཁས་པས་དཔྱོད་པའི་ཆ་རྐྱེན་མ་ལགས་ཀྱང། ། བདག་འདྲའི་བློ་དམན་རིག་ལམ་སྒོ་འགྱེད་ཡིན། །

                                   ===== == དམུ་གཤེན་ལྷ་ཡི་གདུང་རྒྱུད་ཉི་མ་རྒྱལ་མཚན་གྱི་རྣམ་ཐར་མོས་ལྡན་ཐར་པའི་ལམ་འདྲེན་ཞེས་བྱ་བ == =====

[1b1]སྟོང་གསུམ་བོན་གྱི་འདུལ་ཞིང་པད་མོའི་ཚལ།། གསང་གསུམ་འོད་ཀྱིས་ངལ་མེད་སྐྱོང་མཛད་པ།། དུག་གསུམ་མུན་པའི་སྨག་སེལ་བསྟན་པའི་སྒྲོན།། ཁམས་གསུམ་འདྲེན་[1b2]མཆོག་ཉི་མའི་མཚན་ལ་འདུད།། དཔལ་དམ་པ་ཁྱེད་ཀྱི་མཛད་ཕྲིན་རྣམ་ཐར་མཆོག ། ཀུན་ཁྱབ་མཐའ་ལྟར་ཆོད་པར་ནུས་མིན་མོད།། རྒྱས་པ་ལོགས་སུ་གསལ་ཞེས་ཐོག་ཙམ་ལས།། [1b3]ལོག་བདུད་ཝ་མགོའི་དམོད་ངན་དོས་དྲག་དང་།། དུས་དབང་བོན་བསྟན་ཆ་ཕྲས་མི་སྣང་བའི།། མདོར་བསྡུས་ཨ་སྐོར་ཕྱག་བཞེས་ནང་གསལ་དང་།། ཞལ་གསུང་འཁྲུལ་མེད་འཁྲུངས་རབ་[1b4]བཅུ་དྲུག་སོགས།། སྐྱེས་ཆེན་དཔྱོད་ལྡན་ན་རིམ་བྱོན་རྣམས་ཀྱི།། ཞལ་འཁུན་རྣ་བ་སོན་པ་ཡིད་ཡུལ་དུ།། འཇགས་པ་ཅི་མཆིས་བདག་གིས་ལྷག་བསམ་གྱིས།། ཅུང་ཟད་ཙམ་ཞིག་ཡི་[1b4]གེར་འགོད་པ་ལ།། བླ་མ་ཡིད་དམ་མཁའ་འགྲོས་སྣང་བ་རྩོལ།། ཞེས་པ་དེ་ལ་ལོ་རྒྱུས་ཁོང་ནས་མ་དྲང་ན། ཡིད་མི་ཆེས་པའི་རྒྱུར་འགྱུར་བས། དཔལ་གསང་མཆོག་རྒྱལ་པོའི་ཐུགས་[2a1]ཀྱི་སྤྲུལ་པ། དམུ་དབང་ཉི་མ་རྒྱལ་མཚན་དེ་ཉིད། བསྟན་དང་འགྲོ་བའི་དོན་དུ་སྐུ་སྐྱེ་བ་བཅུ་དྲུག་བཞེས་པའི་ནང་། ཚན་བཅུ་གསུམ་ཀྱི་སྐབས་སུ། (འཁྲུངས་རབས་ལས་) གདན་སའི་[2a2]གནས་སུ་ཉེ་བར་འཁོད།། ཅེས་གསུངས་པ་དེ་བཞིན་ཅུང་ཟད་སྤྲོ་ན། དག་པ་ལྷའི་ཞིང་ཁམས་རྩ་གསུམ་ལྕོག་ཁ་ཞེས་པ་ནས། བོད་ཡུལ་དབུས་སུ་གཟིགས་པས་མི་ལུས་བཞེས་ནས་བསྟན་[2a3]འགྲོའི་དོན་བྱེད་དགོས་ཐུགས་ལ་འཁྲུངས་ཏེ། རྒྱལ་འཕགས་གོང་མ་རྣམས་ཀྱིས་བྱིན་གྱིས་བརླབས་པའི་གནས། དཔལ་དང་ལྡན་པ་དར་སྡིངས་སུ། ཡབ་དམུ་གཤེན་མཆོག་ལེགས་རྒྱལ་མཚན་[2a4]ཞེས། ཀླུ་གྲུབ་ཡེ་ཤེས་སྙིང་པོའི་རྣམ་སྤྲུལ་བརྒྱད་བྱུང་བ་ལས། འདི་ཉིད་བཞི་པའི་རྣམ་སྤྲུལ་ཡིན་ཏེ། གསང་སྔགས་ཐེག་པ་ཆེན་པོ་ལ་གྲུབ་པ་བསྙེམས་ཤིང་། གསས་ཁང་གསེར་སྒོའི་ཐིག་ལེན་[2a5]འཕར་ཐོག་སོགས་གསར་བསྐྲུན་མཛད་ཅིང་། གཞན་ཡང་བཤད་སྒྲུབ་ཀྱི་བྱ་བས་འགྲོ་དོན་འཕྲིན་ལས་རྒྱས་པའི་སྐྱེས་བུ་ཆེན་པོ་དེའི་གསང་ཡུམ་དངོས་ལ་མེད་པར་བཞུགས་པའི་ཞབས་དེར། མདོ་[2b1]ཁམས་སྨད་ནས་ཨ་ནེ་ཁམས་མོ་མཁའ་འགྲོའི་མཚན་རྟགས་དང་ལྡན་པ་ཞིག་དོན་དུ་རྒྱལ་བ་གཤེན་གྱི་བསྟན་པ་འཛིན་པར་དགོངས་ཀྱང་། འགྲོ་བའི་སྣང་ངོར་གནས་བསྐོར་གྱི་ཚུལ་དུ་སྟོད་གནས་གངས་[2b2]ཏི་སེ་མཇལ་དུ་ཕེབས་པའི་ཞོར་ལ། རྟ་སྒོའི་རྫུ་འཕྲུལ་ཕུག་ཏུ་རྟོགས་ལྡན་ནམ་མཁའ་བློ་ལྡན་མཇལ་བས། ནམ་མཁའ་བློ་ལྡན་གྱིས་གསེར་མང་པོ་རྩལ་ནས། ཨ་ནེ་ཁྱེད་ཡེ་ཤེས་[2b3]མཁའ་འགྲོའི་སྤྲུལ་པར་འདུག་པས། གནས་གངས་རི་མཚོ་གསུམ་བསྐོར་ལས། བཞད་དར་ལྡིངས་སུ་བྱོན་དང་ཁྱེད་ཀྱིས་བསྟན་པ་འཛིན་སྐལ་དེ་རུ་འདུག་གོ་གསུངས་ནས་ལུང་བསྟན་ཐོབ་ཅིང་། [2b4]དེ་ལྟར་ལུང་བསྟན་པ་ཇི་བཞིན་གངས་རི་བསྐོར་ཏེ་དར་སྡིངས་སུ་ཕེབས་ནས་བཞུགས་སོ།།

(འཁྲུངས་རབ་ལས་) དམ་པའི་ཐུགས་རྗེས་ཉེར་བཟུང་ནས།། ཞེས་པ་གཤེན་སྟོན་མཆོག་ལེགས་རྒྱལ་མཚན་གྱིས་ཀྱང་། ཡེ་ཤེས་[2b5]མཁའ་འགྲོའི་སྤྲུལ་པ་ཡིན་པར་མཁྱེན་ནས། དངོས་སྤྲུལ་དགོངས་པའི་བྱིན་གྱིས་བསླབས་ཏེ། སྲས་གཅིག་དགེ་མཚན་བཟང་པོ་བསམ་བརྗོད་ཀྱི་ཡུལ་ལས་འདས་པ་དང་བཅས་བལྟམས་ཀྱང་། བར་ཆད་[2b6]བྱུང་དོགས་ངོས་མ་བཟུང་བར། ཡུམ་སྲས་གཉིས་ཆར་གསང་སྦས་ཀྱི་ཚུལ་དུ། དབང་ལུང་ཁ་ཤས་གསན་ནས་བཞུགས་པ་ལ། སྲས་དགུང་ལོ་ལྔ་བཞེས་པའི་ཐོག་ཏུ། ཡབ་མཆོག་ལེགས་རྒྱལ་མཚན་[3a1]འགྲོ་དོན་རྫོགས་ནས་སྐུ་ཞིང་ཁམས་བརྗེས། དེ་ནས་དར་སྡིངས་ཀྱི་ལྷ་སྡེ་མི་སྡེ་ཀུན་གྱིས་རྒྱལ་རིགས་གཤེན་གྱི་འདུང་རབས་རྫོགས་སོ་བྱ་བའི་མྱ་ངན་གྱིས་སྨྲེ་སྔགས་བཏོན་པས། གཤེན་[3a2]མཆོག་ལེགས་རྒྱལ་མཚན་ཐུགས་ཉིད་བོན་དབྱིངས་སུ་ཐིམས་པ་སླར་བཞེངས་ཏེ། གསུངས་པ། ཁྱོད་རྣམས་དེ་ཙམ་གྱིས་མྱ་ངན་བྱེད་མི་དགོས་ང་ཡི་རྒྱུད་པ་སྟོང་པར་ག་ལ་སྲིད། སྲང་ཁ་བྱང་གི་ཨ་ནེ་ཁམས་[3a3]མོའི་བུ་དེ། ངའི་བུ་ཡིན་པས། དེ་ཡར་གདན་དྲོངས་དང་། བསྟན་པ་དང་འགྲོ་བའི་དོན་རླབས་ཆེན་འབྱུང་བར་འགྱུར་རོ། གསུངས་ཏེ་དགོངས་པ་བོན་དབྱིངས་སུ་ཐིམ་མོ། དེར་འདུས་རྣམས་ཀྱང་ངོ་མཚར་ཤིན་[3a4]ཏུ་ཆེ་བ་དང་། དད་གུས་ཀྱིས་བ་སྤུ་གཡོས་པར་གྱུར་ཅིང་། གཤེན་མཆོག་ལེགས་རྒྱལ་མཚན་སྐུ་འདས་པའི་སྡུག་བསྔལ་དང་། སྲས་བརྒྱུད་མ་ཆད་པའི་ལུང་བསྟན་པའི་དགའ་བ་དང་། དགའ་སྐྱོ་ཟུང་འབྲེལ་[3a5]གྱི་སྒོ་ནས། རེ་ཞིག་དགོངས་རྫོགས་བསྒྲུབ་པའི་ལས་ཀྱི་གཡེང་སྟེ། སྲས་གདན་འདྲེན་རྒྱུ་མ་བྱུང་ངོ་།།

དུས་དེ་ཙམ་ན་སྟོད་ཕྱོགས་ནས་འབྲོག་པ་ཞིག་ཤི་བའི་ལམ་སྟོན་ཞུ་མི་དངོས་ཆས་འགའ་དང་། [3a6]ལུག་གི་བརྒྱ་འབུལ་གྱིས་མཚོན་པ་དང་བཅས་བྱུང་སྟེ། དེའི་ཐོག་ཏུ་སྲས་སྤྱན་དྲངས་། ཚོམས་ཆེན་གྱི་ཁྲི་ཐོག་ཏུ་བཞུགས་སུ་བཅུག འབྲོག་པ་རྣམས་ཀྱིས་ཚེ་འདས་དེའི་མིང་ཞུས་འབུལ་བ་[3b1]ཕུལ་མ་ཐག་ཏུ་གཤིན་པོ་བདེ་འགྲོའི་གོ་འཕང་ཐོབ་ཀྱང་། སྲས་སྐུ་ན་ཕྲ་བས་བསྔོ་བ་མི་མཁྱེན་པའི་ཚུལ་བསྟན་ནས། གང་ཡང་མ་གསུངས་བཞུགས་སྐད། སྦྱིན་བདག་རྣམས་ཀྱང་ཉེ་[3b2]འདབ་གནས་ཚང་དུ་ལོག སང་སྔ་མོ་ནས་ཞབས་ཕྱི་རྣམས་ཀྱི་འུར་ཐིང་ངེ་བོས་ནས་ལུག་རྣམས་བསད་འབྲོག་པས་མཐོང་ནས། ལྐོག་ལབ་དུ་ད་ལམ་ཅུང་རེ་མ་སོང་། གཤིན་པོ་ལ་དམིགས་པའི་[3b3]བྱང་ཆོག་ལྟར་མི་དགོས། བསྔོ་བ་ཙམ་ཡང་གསུང་མཁན་མ་བྱུང་། ལུག་དེ་རྣམས་ཀྱང་མ་ལུས་པ་བསད། གཤིན་པོའི་དོན་དུ་དགེ་བ་བསྒྲུབ་ཏུ་མ་ཡོང་བས། སྡིག་པ་གསོག་ཏུ་ཡོང་བ་འདྲ་ཞིག་[3b4]བྱུང་ཟེར་ནས། ཀུན་འགྱོད་པས་ཡིད་མུག་དད་ལོག་སྐྱེས་སོ། དེ་སྲས་གཤེན་ཉི་མས་མཁྱེན་ནས། ཞབས་འགྱུར་བ་རྣམས་ལ་གསུངས་པ། སྦྱིན་བདག་དད་ལོག་སྐྱེས་སོང་བས། ཁོ་རང་རྣམས་[3b5]ཡར་བོས། ལུག་མགོ་དེ་དག་ཀྱང་འཁོར་གཡབ་ཏུ་སྤུངས་གསུངས་ནས། གཤེན་ཉི་མ་ཚོམས་ཆེན་གྱི་ཐེམ་པའི་ཁ་རུ་བཞུགས་ཏེ། བསྔོ་བ་འདི་ཉིད་ཐོལ་བྱུང་དུ་གསུངས་པ། འགྲོ་ཀུན་[3b6]འཁོར་བའི་མཚོ་ལས་བསྒྲལ་བའི་ཕྱིར། ཅེས་ངེས་འདྲོངས་བསྐྱེད་བརྡའི་བསྔོ་སྨོན་ཚང་མ་གསུངས་ནས་སེ་གོལ་ཞིག་ཏོག་པར་མཛད་པས། ལུག་མགོ་ཀུན་གྱིས་སྤྱི་གཙུག་ནས་འོད་ཟེར་འཕྲོས་[4a1]ནས་བབས་སྒྲ་ཐག་གེ་ནམ་མཁར་ཐིམ་པས། ཞབས་འཁོར་སྦྱིན་བདག་དང་བཅས་པ་ཚང་མས་གསལ་ལེར་མཐོང་། གཤེན་ཉི་མ་དགུང་ལོ་ལྔའི་ཐོག་ཏུ་སྦྱིན་བདག་གིས་རྐྱེན་[4a2]སྦྱར་ནས་གསུང་ཞེས་བསྔོ་སྨོན་འདིའི་ཤམ་བུར་སྣང་བའང་དེའི་དོན་ནོ། དེ་ལ་ཕྱི་ནང་ཀུན་ཡིད་ཆེས་དད་པ་སྐྱེས། དུས་ད་ལྟ་ཡང་གཤིན་པོའི་བསྔོ་འབྲེལ་འཁོར་གཡབ་ཀྱི་ཀ་རིང་ལ་འདོགས་པ་དེའི་རྟེན་འབྲེལ་[4a3]ཆེད་ཡིན་པ་སྣང་ངོ་།

དེ་ནས་སྐུ་ཡོན་ཚང་མ་མ་བསླབ་རང་རྡོལ་དུ་མཁྱེན་ཏེ། དཀྱིལ་འཁོར་སྟོང་དང་དྲུག་བརྒྱ་དགོངས་དོན་ཐུགས་སུ་ཚུད་ཅིང་། འགྲོ་དོན་ལ་ཕེབས་གྲུབ་པའི་སྐུ་ཚད་ལོན་ཏེ་ཐོག་མར་བཞུགས་[4a4]སྒར་སྟོད་ཕྱོགས་སུ་ཕེབས་ནས། རྟ་སྒོའི་ཉེ་འདབས་ཤིག་ཏུ་བཞུགས་པས། འབྲོག་པ་ཞིག་ཤི་ནས་བྱང་ཆོག་ཞུས་པས། རྟོགས་ལྡན་ནམ་མཁའ་བློ་ལྡན་གྱི་ཐུགས་ལ། ཚེ་འདས་ཀྱི་རྣམ་ཤེས་འགུག་[4a5]གྲུབ་མིན་གཟིགས་དགོས་དགོངས་ནས། རྣམ་ཤེས་བཀུག་སྟེ་ཁོང་རང་གི་ཞལ་བུ་ཀ་པ་ལི་ཁ་སྦུབས་པའི་འོག་ཏུ་གཟིར་ནས་བཞུགས་པ་ལ། གཤེན་ཉི་མས་དེ་མཁྱེན་ཀྱང་ཏིང་ངེ་འཛིན་གྱིས་ག་[4a6]རུ་གཟིར་ལ་ཁྱད་པར་མི་འདུག་དགོངས་ནས་འགུག་པའི་སྐབས་སུ་དེ་ཁར་བཞག་པ་ལ། ནམ་མཁའི་བློ་ལྡན་གྱི་དགོངས་པར་འགུག་གྲུབ་མ་སོང་བས། སྤོར་ཡང་གྲུབ་མི་འགྲོ་འམ་དགོངས་པ་ལ། [4b1]གཤེན་ཉི་མས་སྤར་ཆོག་མཛད་སྐབས། ཕཊ་སྒྲ་དང་པོ་གཉིས་ལ་མཆོད་ཞལ་འགུལ་ཤིག་ཤིག་བྱེད་ཅིང་། གསུམ་པའི་དུས་སུ་ཐོད་ཞལ་རྒྱང་ལ་འཐོར་ནས། རྣམ་ཤེས་བོན་དབྱིངས་སྤྲོས་བྲལ་[4b2]གྱི་ཀློང་དུ་བསྟིམས་པ། རྟོགས་ལྡན་ནམ་མཁའ་བློ་ལྡན་ཡང་ཤིན་ཏུ་ཐུགས་དགྱེས་ནས། ཚེ་འདས་རྣམ་ཤེས་འདྲེན་པ་ལ། གཤེན་གྱི་གུར་སྒོ་མཐོང་བས་ཆོག་འདུག་གསུངས་པ་གྲགས་ཤིང་། ཉེ་[4b3]གནས་ལ་གཤེན་ཉི་མ་གདན་འདྲེན་ཞུ་རྒྱུ་ཡིན་པས། རྟ་སྒོའི་གཙང་འགྲམ་ན་བྱེ་མ་གང་ཐེག་ཅིག་ལོངས་ཤིག་གསུངས་པས། ཉེ་གནས་ཀྱིས་དེ་ལྟར་ལེན་དུ་ཕྱིན་ནས། བྱེ་མ་ཕད་[4b4]བུ་གང་ཁུར་བས། བྱེ་མ་ཇི་ལྕི་ལ་སོང་བ་དང་། ཉེ་གནས་ཀྱི་བསམ་པ་བླ་མས་ལོངས་ཤིག་གསུངས་ཕྱིར། མ་བླང་པས་ན་མ་བྱུང་། དེ་མིན་གཤེན་ཉི་མ་གདན་འདྲེན་པ་ལ། བྱེ་མས་[4b5]གང་ཡོང་སྙམ་སྟེ། ཅུང་ཟད་རེ་འབྱོ་བཞིན་ཁྱེར་བས། གཟིམ་ཕུག་ཏུ་སླེབ་དུས་ཁལ་གཅིག་ལྷག་ཙམ་ལས་མ་མུས། དེ་ལ་ནམ་མཁའ་བློ་ལྡན་གྱི་ཕྱག་གིས་སེ་གོལ་ཅིག་ཏོག་[4b6]པས་བྱེ་མ་གང་ཡོད་གསེར་དུ་གྱུར། ཉེ་གནས་ཀྱི་སེམས་ལ་བྱེ་མ་མ་བྱོ་བར་ཁྱེར་ན་དགའ་རྒྱུ་རེ་ཙ་བསམ་ནས་འགྱོད་དིང་ངེ་བ་ཞིག་བྱུང་སྐད། དེ་གཤེན་ཉི་མ་གདན་འདྲེན་དྲངས་ནས་དབང་ལུང་[5a1]ཞུས་ཤིང་བྱེ་མ་གསེར་དུ་བསྒྱུར་བ་གང་ཡོད་ཕུལ། གཤེན་ཉི་མས་ཀྱང་དབང་ལུང་ཇི་སྙེད་ཞུས་ནས། དྲིན་ཆེན་བླ་མ་རྣམ་གསུམ་ཡོད་པ་ལ་གཅིག་འདི་ཡིན་པར་བཤད་དོ།

དེ་ནས་[5a2]སྟོད་སྤྲེ་བའི་ཡུལ་དུ་ཕེབས། ཁྲོ་བོ་དཀར་པོའི་བརྡར་རྡོ་ལ། ཕྱག་གིས་བཅངས་པའི་རྗེས་དང་། འདྲ་སྐུའི་རྒྱབ་ཏུ་ཕྱག་སེལ་གྱི་རྗེས་བཞག་པ་སོགས་གྲུབ་རྟགས་དཔག་མེད་བསྟན། ཁྲོ་བོ་དཀར་པོས་ཀྱང་རྟ་ནོར་[5a3]གསེར་དངུལ་མང་པོ་དང་། གཤེན་རྩ་གཤེན་སྒེར་གྱི་ས་རིགས་ཚང་མ་ཕུལ།

དེ་ནས་གདན་ས་ཕེབས་ནས། རི་བོ་གླང་ཆེན་འགྱིང་འདྲའི་གནས། རི་རྒྱལ་དགོན་རྩེར་སྤྲུལ་པའི་གཙུག་ལག་ཁང་ཆེན་[5a4]མོ་དང་། བླ་བྲང་སྤེའུ་གཉིས་བཅས་ནོར་བུ་རྩེ་གསུམ་གྱི་ཚུལ་དུ་བཞེངས། གཞན་ཡང་གནས་འདིར་གྲྭ་ཁང་རེ་ཐེབས་ན། གཞན་དུ་གསས་ཁང་རེ་བཞེངས་པ་བས་ཀྱང་དགེ་འགྱུར་ཆེ་ཞིང་། མདོར་[5a5]ན་ས་ཁྱེམ་གང་རེ་དང་རྡོ་རྡོག་པོ་གཅིག་གི་འབྲེལ་བ་ཐོགས་པ་ཙམ་གྱི་མི་དེ་ཇི་ལྟར་སྡིག་ཆེ་ཡང་བྱ་ཕུག་རོན་ལས་གནས་ལུས་དམའ་བ་མི་ལེན་པ་གསང་མཆོག་ཐུགས་སྤྲུལ་གཤེན་ཉི་མས་[5a6]ཞལ་གྱི་བཞེས། ནང་རྟེན་གང་གི་བྱེ་མ་གསེར་དུ་བསྒྱུར་བའི་གསེར་ཕུད་ལ། བདུད་སྲིན་བགེགས་ཀྱི་ཟིལ་གནོན་དུ། གསང་མཆོག་མཐར་ཐུག་རྒྱལ་པོའི་སྐུ་བཞེངས། དེ་ནས་ཡང་སྔ་རབས་[5b1]འདས་པའི་སྟོན་པ་གཏོ་རྒྱལ་ཡེ་མཁྱེན་དགུང་ལོ་ལྔ་བའི་སྐུ་ཚད་དང་། ད་ལྟ་འདྲེན་པའི་སྟོན་པ་རྣམ་མཁྱེན་རྒྱལ་བ་གཤེན་རབ་དགུང་ལོ་བརྒྱད་པའི་སྐུ་ཚད་དབུའི་གཙུག་གཏོར་ན་རྒྱལ་བ་གཤེན་[5b2]རབ་ཀྱི་ཤ་རི་རམ་བྱ་ངང་པའི་སྒོ་ང་ཙམ་དང་། ཐུགས་ཀ་ན་རྒྱལ་པོ་ཀུན་དགའ་འོད་ཀྱིས་བཞེས་པའི་ནོར་བུ་དཀར་ལ་འཚེར་བ་བྱིན་རླབས་ཀྱི་དྲོད་ནུས་འབར་བས་སྐར་མ་རྒྱལ་གྱི་ཉ་ལ་ཆུ་འཁྱག་[5b3]དང་མར་ཞུ་བ། མཐོང་ཐོས་དྲན་རིག་འདྲེན་པ་སྨོན་ལམ་གང་བཏབ་འགྲུབ་པའི་རྟེན་མཆོག་ཁྱད་པར་ཅན་དང་། སླད་འབྱོན་གྱི་སྟོན་པ་ཐང་མ་མེ་སྒྲོན་དགུང་ལོ་བཅུ་པའི་སྐུ་ཚད་བཅས་ཀྱིས་གཙོར་[5b4]མཛད་པའི་སྐུ་རྟེན་སྟོང་ཁ་ལོང་ཙམ་བཞེངས་བཀོད་མཛད། ལྷག་པར་སྟོན་པ་གསུང་འབྱོན་ལ་ཕྱག་གདུབ་ཞབས་གདུབ་གསོལ་ནས། དབུ་རྒྱན་སྒྲོན་ཁར། ང་འདི་ཁ་རང་ལ་ཞོག་ཅིག་གསུངས་ནས། [5b5]གསུང་འབྱོན་པས། ཤིན་ཏུ་བྱིན་ཆེ་བའི་སྟོན་པ་གསུང་བྱོན་དུ་གྲགས་སོ།། །།

(འཁྲུངས་རབ་ལས་) འཆི་མེད་ཐུགས་སྤྲུལ་བླ་མ་དེས།། དབང་སྐུར་མིང་དང་གསང་མཚན་གསོལ།། དབང་བཞིན་འགྲོ་དོན་ལུང་[5b6]སྟོན་རྩལ།། ཅེས་པ་ནི། དྲིན་ཆེན་བླ་མ་རྣམ་གསུམ་གྱི་ནང་ཚན། རང་གྲོལ་བླ་མ་རྒྱལ་མཚན་དང་མཇལ་ནས། དབང་ལུང་ཁྲིད་གསུམ་མང་དུ་གསན་ཅིང་། མཚན་ཐོས་ཐར་པར་འདྲེན་པའི་[6a1]ལུང་བསྟན། ལུང་རིག་སྨྲ་བའི་དབང་པོ་བྱ་བཏང་གཡུང་དྲུང་ཡེ་ཤེས་ནས་ཀྱང་དབང་ལུང་མང་དུ་གསན་ནོ།

དེ་ནས་རྒྱལ་རོང་དུ་ཕེབས་པས། དམུ་རྗོ་ལྷ་གཉན་གྱིས་བཀའ་ཉན་ཕྲིན་ལས་[6a2]བསྒྲུབས། གནས་དེར་གཤེན་སྟོན་ཉིད་ཀྱི་ཞབས་རྗེས་དང་། གཟིམ་ཁྱི་མངོན་ཤེས་དང་ལྡན་པའི་རྗེས་བཅས་ཡོད་སྐད། དེ་ནས་རྒྱ་ནག་ཡུལ་གྱི་ཉེ་འདབས་དམ་ཅན་རྡོ་རྗེ་ལེགས་པ་རྒྱུ་བའི་ས་[6a3]གནས་སུ་ཞག་གཅིག་བཞུགས་པའི་ཚེ། སྲོད་ལ་གནམ་ལྕགས་ལན་གསུམ་བབ་པས། ཏིང་ངེ་འཛིན་གྱིས་གཟིར་ཏེ་ཐོ་རངས་ཁར། དམ་ཅན་དངོས་སུ་ལྡོང་གསོལ་ནས། གསང་བའི་བདག་པོ་ཁྱེད་ཀྱི་[6a4]བཀའ་བརྒྱུད་འཛིན་པའི་སློབ་བུ་ཐམས་ཅད་ལ་སྡོང་གྲོགས་བྱེད་དོ་ཞེས་དམ་བཅས། དེ་དུས་བསྐུལ་ཆུང་ཞིག་ཀྱང་མཛད་དོ།།

གཞན་ཡང་ཁམས་ཕྱོགས་ཀྱི་དད་ལྡན་ཐམས་ཅད་ཐར་པ་བདེ་བའི་ལམ་བཟང་ལ་བཀོད་[6a5]ནས། ཡར་ལོག་ཕེབས་ཁ་ཞིག་ལ། ལས་ལྡན་གྱི་ཨ་ནེ་རྒན་མོ་ཞིག་གིས། མཛོ་མོ་དཀར་མོ་གཅིག་ཕུལ་ནས། བདག་འཆི་དུས་ཁྱེད་སྐྱབས་འགྲོ་ལ་ཕེབས་རོགས་གནང་ཞུས་པས། དེ་ལྟར་[6a6]ཡོང་བ་ཞལ་གྱིས་བཞེས། དེ་ལ་ཞབས་ཕྱི་རྣམས་ཀྱི་བསམ་པ་ལ། ངེད་དཔོན་གཡོག་ནི་གཙང་ལ་ལོག་ཕེབས་རན་སོང་། དེ་ནུབ་སང་དགོང་ལ་ནི་ཨ་ནེ་འདི་འཆི་བ་མི་འདུག འདི་འཆི་བའི་སྔས་མགོར་[6b1]ཇི་ལྟར་བྱས་ན་ཕེབས། ད་ལམ་ཞལ་རྫུན་ཅིག་གནང་སོང་བསམ་པ་བྱུང་སྐད། དེ་ནས་དར་སྡིངས་སུ་ལོག་ཕེབས་ནས་ལོ་གཅིག་ཙམ་སོང་བ་དང་། ཨ་ནེ་རྒན་མོ་དེ་ནད་ཀྱིས་ཟིན་ནས་འཆི་ལ་གཏུག་[6b2]པས། གཤེན་ཉི་མས་མཁྱེན་ཏེ། ཞབས་འགྱུར་བ་རྣམས་ལ་གཟིམ་ཆུང་གི་སྒོ་ཞག་གསུམ་མ་དབྱེ་ཞིག ཞག་གསུམ་ནས་གཤང་ཆུང་ལོགས་ལ་བཏགས་པ་འདི་དཀྲོལ་བྱུང་བ་དང་ཤོག་ཅིག གསུངས་ནས་ཨ་[6b3]ནེ་རྒན་མོའི་ཐ་ཚིག་ལ་དགོངས་ནས། འདྲེན་དོན་ལ་བྱ་རྒོད་དུ་སྤྲུལ་ནས་ཕེབས་པས། ཨ་ནེ་དེ་ཀྱང་ཡིད་གཉིས་ཐེ་ཚོམ་མེད་པའི་གསོལ་བ་གདབ་ཅིང་། ནང་མི་རྣམས་ད་ངའི་བླ་མ་ཕེབས་[6b4]པའི་ཞལ་བཞེས་ཡོད་པའི་ལྟོས་ཤིག་ཟེར་བ་ལ། ནང་མི་རྣམས་ཀྱིས་བླ་མ་ནི་ཡབ་ཡུལ་དུ་ཕེབས་ནས་མེད་པ་ལ། ད་འདི་སུ་འབྱོན་བྱས་པས། ངའི་བླ་མས་མི་བསླུ་ཕེབས་པ་ཁག་ཐེག་མི་མེད་ཀྱང་[6b5]བྱ་འདྲ་བ་ཡོང་མཁན་མི་འདུག་གམ་ཟེར་བ་ལ། བལྟས་པས་བྱ་རྒོད་ཅིག་འཕུར་ནས་ཡོང་འདུག དེ་མིན་གང་ཡང་མི་འདུག་བྱས་པས། འོ་ན་དེ་ཡིན་པས་ནང་དུ་གདན་དྲོངས་ཤིག་ཟེར་ནས་ཤིའོ། དེ་ནས་ནང་[6b6]མི་རྣམས་ཀྱིས་བལྟས་པས། བྱ་རྒོད་ཇེ་དམའ་ཇེ་དམའ་སོང་ནས་ཐང་ལ་བབས་ཏེ། གཤེན་ཉི་མ་སྔར་མཇལ་བ་ནང་ལྟར་དངོས་སུ་ཕེབས་ནས། ཨ་ནེ་རྒན་མོའི་རྣམ་ཤེས་མཁའ་སྤྱོད་ཀྱི་གནས་སུ་[7a1]སྤར་ནས། མཐོང་མི་མཐོང་གི་བར་དེ་ཁར་གཤེགས། དེ་ནས་བྱ་རྒོད་དུ་སྤྲུལ་ནས་ཕེབས་སོ། ཞབས་འགྱུར་བ་རྣམས་ཀྱི་ཞག་གསུམ་སོང་བའི་སྔ་དྲོ་གཟིམ་སྒོ་དབྱེ་ཆོག་འོན་[7a2]སེང་བྱས་ནས་བསྡད་པ་དང་། གཤེན་ཉི་མ་རྣམ་རྒྱལ་ལྷ་ཁང་གི་རྒྱ་མཐོང་ལ་ཧ་གྱིས་ཕེབས་པས། གཤོག་རྩེ་གཤང་ཆུང་ལ་ཕོགས་པས་སྐད་གྲགས་པ་དང་། ཞབས་ཕྱི་རྣམས་ཀྱིས་གཟིམ་[7a3]སྒོ་ཕྱེ་སྔས་པའི་སྟབས་ཀྱིས། སྐུ་ལུས་བྱ་རྒོད་དུ་སྤྲུལ་པ་ཚང་མ་ཤིག་མ་གྲུབ་པར་སྒྲོ་ཐུལ་ཉིལ་ལེ་བཞུགས་པ་ཀུན་གྱིས་མཐོང་བས་སྐུ་ཚེ་ལ་ཅུང་ཟད་གནོད་པ་ཡིན་སྐད།

རྒྱལ་པོ་[7a4]བསམ་ཡས་བེ་དཀར་དམ་ལ་བཏགས་པའི་ལོ་རྒྱུས་ནི། དེ་སྔོན་བླ་རབས་གསུམ་བཞིའི་གང་ཙམ་ལ། དངུལ་ཆུ་རྒྱལ་སྲས་རིན་པོ་ཆེའི་མདུན་དུ། བེ་དཀར་གྱིས་ཆོ་འཕྲུལ་ཞིག་བསྟན་པས། [7a5]རྒྱལ་བའི་སྲས་པོས། ཁྱོད་འདྲེ་ངན་གྱི་ལུས་སུ་སྐྱེས་ཤིང་། སེམས་ཅན་གཞན་ལ་གནོད་སེམས་འབའ་ཞིག་འཆང་བ་སྙིང་རེ་རྗེ་དགོངས་ནས་བཤུམས་པས། བེ་དཀར་སྐྱེང་ནས་བྲོས་སོང་ངོ་། དེ་[7a6]རྗེས་གཤེན་ཉི་མ་བསྙེན་སྒྲུབ་ཐོག་མར་ཀུན་བཟང་ཨ་སྐོར་ལ་བཞུགས་མ་ཐག རྒྱལ་པོ་བེ་དཀར་གྱི་ཆོ་འཕྲུལ་བསྟན་ནས། མར་མེའི་སྟེང་དུ་ཀུན་བཟང་གི་སྐུ་འདྲ་བ་ཞིག་ཏུ་[7b1]བརྫུས་ནས་བསྡད་པ་མཆོག་སྤྲུལ་ཉི་མས་མཁྱེན་ནས། སྙིང་པོའི་གྲངས་ཚད་མ་སོང་བར། ཡི་དམ་ལྷ་ཞལ་ལྟས་ངན་ཡིན། གསུངས་ཏེ་ཞལ་དུ་གསོལ་ནས་ཐུགས་དམ་དུ་བཞུགས་པས། བེ་[7b2]དཀར་ཤིན་ཏུ་སྐྲག་སྟེ། བདག་གཏོང་བར་ཞུ། ཁྱེད་ཀྱི་ཞིང་འདིར་མི་ཡོང་ཞུས་ནས་དམ་བཅའ་ཕུལ། ཞལ་ནས་བཏོན་ཏེ་གཏོང་བར་མཛད། ཁོས་དམ་བཅའ་ཕུལ་བ་བཞིན་དུ། གཞན་མ་ལྷ་[7b3]འདྲེ་འཁོར་རྣམས་ལའང་འདི་དམོད་པ། དངུལ་ཆུ་ལ་མ་འགྲོ་ཞིག་བཙུན་ཆུང་ངུ་དགའ་བ་ཞིག་འདུག དར་སྡིངས་ལ་མ་འགྲོ་ཞིག་བཙུན་ཆུང་ལྟོགས་སླ་བ་ཞིག་འདུག ཅེས་ཟེར་ནས་[7b4]དར་སྡིངས་སུ་བེ་དཀར་གྱིས་གནོད་པ་མི་འབྱུང་བ་ཡང་དེ་ཙུག་ལགས་སོ།།

(ཨ་སྐོར་ཕྱག་བཞེས་ལས་) སྔགས་བླ་བདུད་རྒྱལ་ལོག་ལྟ་ཅན།། ཁ་ཤས་དངོས་སྤྲུལ་དག་གིས་བཏུལ།། ཅེས་གསུངས་པ་ནི། རོང་མཚོ་སྡེ་པ་ཟེར་བའི་[7b5]བཙན་ཕྱུགས་དང་ལྡན་པ་ཞིག་གིས། སྤྱིར་ཡང་གཤེན་ལ་ལོག་ལྟའི་སྐུར་འདེབས་སྣ་ཚོགས་བྱེད་ཅིང་། སྒོས་སུ་དར་སྡིངས་ཀྱི་ཕུ་རུ་ཡོད་པའི་སྐུ་ཐར་རྣམས་རྐུ་འཕྲོག་བྱས་པར་བརྟེན་ནས། [7b6]ཚར་མ་བཅད་ན། བསྟན་པ་ལ་གནོད་དོགས་ཀྱིས། བོན་སྐྱོངས་དམག་དཔོན་མན་ཆད་མངོན་སྤྱོད་དྲག་པོའི་ཕྲིན་ལས་ལ་བསྐུལ་བས། སྲོད་འཁོར་ཞིག་ལ་དམག་དཔོན་སྐུ་གཉེར་གྱི་[8a1]མདུན་དུ་དངོས་ཕེབས་ནས་སྐུ་གཉེར་འུ་ཅག་ད་འགྲོ་གསུངས་ཏེ། སྐུ་གཉེར་ཆིབས་རྒྱབ་ལ་བསྐྱོན་ནས་ཕེབས། གཙང་འགྲམ་དུ་ཕེབས་པ་དང་མིག་བཙུམས་ཤིག་གསུངས། སྐུ་[8a2]གཉེར་གྱིས་མིག་བཙུམས་པས། ཆུ་ཕ་གར་ཕེབས་པས། རོང་མཚོ་སྡེ་པའི་ཁྱི་རྣམས་སྐད་དི་རི་རི་བྱུང་བ་ལ། དམག་དཔོན་གྱིས་སྐུ་གཉེར་ཁྱོད་ཀྱིས་ཁྱི་སྔགས་ཤེས་སམ་གསུངས་པས། ཁྱི་སྔགས་ཤེས་ཏེ་[8a3]ཟན་ཞིག་དགོས་ཞུས་པ་ལ། རོང་མཚོ་ནས་མགོན་ཁང་གི་རྒྱ་སྐར་ལ་ཕྱག་བརྐྱང་ནས་རྒྱུན་གཏོར་ཞིག་བཞེས་ནས་གནང་། དེ་ལ་སྔགས་བཏབ་ནས་ཁྱི་རྣམས་ལ་སྦྱིན་པས་ཁྱི་སྐད་འཆག [8a4]དེ་ནས་དམག་དཔོན་གྱིས་རུ་ཏྲའི་སྲོག་སྙིང་དངོས་སུ་དམར་ཙ་རེ་བསྣམས་ནས་ལོག་ཕེབས་པས་ཁོའི་ལྷ་རྣམས་ཀྱིས་རྗེས་སུ་དེད་པས། གདོང་ནག་མའི་ཆིབས་ཆད་ཚུལ་བསྟན་པས། དམག་དཔོན་[8a5]གྱིས་མཁར་ཁྲ་བོར་ལྟོས་ལ་སོངས་གསུངས་ཏེ་དགེ་སྡེངས་སུ་ཕེབས། གདོང་ནག་ནམ་མཁའ་ལྡིང་དགེ་སྡིངས་སུ་གནས་པ་དེ་ལྟར་ཡིན་སྐད། དེ་ནས་དར་སྡིངས་ཀྱི་ས་མཚམས་བརྒལ་དོགས་[8a6]ཀྱིས། ཨ་བསེ་རྒྱལ་བས་ཞལ་གྱི་མཆེ་བ་གཙེགས་ཤིང་ཕྱག་མདུང་བཙུགས་ནས། འདིས་ཡན་ལ་ཤོག་སྒྲོལ་བ་ཡིན་ནོ་གསུངས་པས། དེ་ཡན་ལ་རང་ལྷ་རྣམས་ཡོང་མ་ནུས་པར་ཕྱིར་ལོག [8b1]ཚོན་འོག་ཏུ་ཤོར་བ་མ་གཏོགས། ལྷོ་སྒོའི་ནང་ཁུགས་སུ་སྲོག་སྙིང་བརྡབས་ཤུལ་ཡང་དངོས་སུ་གསལ་ལོ། དེ་ཚེ་གཤེན་སྟོན་གྱི་ཐུགས་ལ་འདི་དགོངས་པ། ད་ལྟ་ང་ལ་དགོས་པ་མ་མཆིས་[8b2]ཀྱང་། བསྟན་པའི་དགྲ་བགེགས་སྦྱོར་སྒྲོལ་མ་སྤྱད་ན། སྤྱོད་པའི་དམ་ཚིག་དག་ལ་འགལ་བར་བཤད། དེ་ཡང་ཡེ་སངས་རྒྱས་རྒྱུད་ལས། དྲག་པོར་བསྒྲུབ་པ་གསང་མཆོག་རྒྱལ་པོ་ཡི།། ཐུགས་རྗེ་[8b3]རོལ་པའི་སྐུར་བསྟན་དཔལ་མགོན་ཚོགས།། བྱད་ཕུར་ལོག་རྒོལ་ངན་པ་འདུལ་བའི་ཕྱིར།། འདུལ་དཀའི་སེམས་ཅན་ལས་ངན་གྲངས་མང་ཀུན།། ཡེ་ཤེས་དབྱིངས་ན་བཞུགས་པས་ཡོངས་མི་འདུལ།། [8b4]ངེད་ནི་བདུད་དང་ཉོན་མོངས་བགེགས་ལ་དཔའ།། ལས་ངན་ལོག་པའི་སེམས་ཅན་འཁྲུལ་ཟིན་ལ།། སངས་རྒྱས་བཀའ་བས་རྒྱག་པའི་མཚོན་ཆ་གཉན།། བསྟན་པའི་མ་ཟིན་ལོག་པའི་མཐའ་[8b5]འཁོབ་ལ།། སྟོན་པས་བཀའ་བས་བརྡུང་བའི་གྱད་མིར་འཇིགས།། ཉོན་མོངས་འཁོར་བར་འཁྱམས་པའི་ལས་ངན་ལ།། ཀུན་བཟང་ཉིད་བས་ལས་ཀྱི་གཤིན་རྗེ་གཙོ།། སྣང་བ་མ་དག་འགྲོ་[8b6]བའི་བློ་ཡུལ་དུ།། དོན་དམ་ཉིད་བས་ཀུན་རྫོབ་ཟ་བྱུས་རྩི།། དེ་དང་དེ་འདྲ་མ་ལུས་འདུལ་བའི་ཕྱིར།། དགྲ་བགེགས་འདུལ་བའི་ལས་མཁན་དག་ཏུ་བསྐོས།། ཞེས་པ་ལྟར་མ་འོང་ཕྱིར་དུ། ལས་[9a1]སྦྱོར་སྦྱིན་སྲེག་དཔལ་མགོན་དྲག་བླུག་རྣོ་མྱུར་དང་ལྡན་པ་མཛད་དོ།། དེ་ནས་སྡེ་སྲིད་གཙང་པ་ཞེས་པའི་མི་རྗེ་ཞིག གཞིས་རྩེའི་རྫོང་དུ་བཞུག་སྐབས། སྔགས་བོན་འཚོགས་[9a2]ནས་སངས་རྒྱས་བསྟན་པ་སྤྱིའི་ཞབས་བརྟན་དང་། སེམས་ཅན་བདེ་ཐབས་བཅས་ལ། བར་ཆད་བགེགས་བཟློག་རང་རང་གི་གཞུང་ལུགས་དང་བསྟུན་ནས་མཛད་སྲོལ་ཡོད་པ་གྲུབ་རྗེས། གཤེན་[9a3]སྟོན་ཉི་མས་གཙོར་མཛད་པའི་བོན་པོ་རྣམས་གཡས་གྲལ་དུ་བཞུགས། མུས་ཆེན་ཝ་མགོས་གཙོས་པའི་སྔགས་པ་རྣམས་གཡོན་གྲལ་དུ་བསྒྲིགས་ནས་ཡོད་པ་ལ། མི་རྗེ་དེས་རྩེ་འཇོའི་[9a4]ཚུལ་དུ་འདི་སྐད་ཞུས་པ། གཤེན་ཉི་མ་ནི་བླ་མའི་གཙོར་གྱུར་ཐུགས་རྗེ་དང་བྱིན་རླབས་མཐུ་ནུས་དང་ལྡན་པ་ཞིག་ལགས། དེ་བཞིན་མུས་ཆེན་ཝ་མགོ་ཡང་། སྔགས་ལ་ཡོད་ན་མེད་ན་ཞིག་[9a5]ཡིན་སྟབས། ཁྱེད་གཉིས་ཀྱིས་གྲུབ་རྟགས་རེ་འཇོག་པ་གནང་དགོས་ཞུས་སོ། དེ་ལ་གཤེན་ཉི་མས་མི་ཡོང་གསུངས་ཀྱང་། མུས་ཆེན་ཝ་མགོས་ཞུས་པ། འོ་ལེགས་སོ། བདག་ཅག་བླ་མ་[9a6]ལ་གྲུབ་རྟགས་མེད་ན་དོན་མེད་ཡིན། གྲུབ་རྟགས་བཞག་ཆོག་ཟེར་ནས། རྟ་འདྲ་བའི་དར་ཚོན་ཉིལ་ལེ་བ་ཞིག་བཏོན་བྱུང་བ་ལ། གཤེན་ཉི་མས་དེ་ཡི་ལན་དུ་འབྲང་འདྲ་བའི་དར་ཚོན་ཉིལ་[9b1]ལེ་བ་ཞིག་སྟོན་པར་མཛད་དོ། འབྲང་གིས་རྟ་བསད་པ་འདྲ་བ་ཞིག་བྱུང་། དེ་ལ་ཁོ་ཅུང་ཟད་ཁྲོས་ནས་ཕུ་དུང་གཉིས་པོ་སྤྲུལ་ལས་བྱུང་བས། སྦྲུལ་ནག་པོ་འཇིགས་སུ་རུང་བ་གཉིས་བཏོན་ཏེ། གཤེན་ཉི་མའི་[9b2]སྐུ་གཡས་གཡོན་ལ་འཁྲིལ་བྱུང་བ་ལ། འཇིགས་པའི་ཚུལ་གྱིས་སྐུ་གཟན་སྤྲུགས་པས། སྐུ་གཟན་ལས་མེ་འབར་ནས། སྦྲུལ་གཉིས་གཞོབ་ཐུལ་གྱིས་སོང་། དེ་ལ་ཝ་མགོ་ཤིན་[9b3]ཏུ་ངར་ལངས་ཤིང་ཁྲོས་ནས་འདི་སྐད་ཞུས། ང་ཡིས་གྲུབ་རྟགས་བསྟན་པ་ཁྱོད་ཀྱིས་གསོད་ཤག་བྱས་བྱུང་བས། ཉི་མ་དེ་རིང་ནས་བཟུང་འོ་ཅག་གཉིས་མཐུ་དང་མན་ངག་ཚད་དོ་ཟེར་ཏེ་ཧར་གྱིས་[9b4]ལོངས་ནས་སོང་། ཁོ་རང་ཁྱིམ་དུ་གཞན་སུ་མེད་པར་ཨ་མ་དེས་མཚམས་གཡོག་བྱས་ནས་མཐུ་སྒྲུབ་ཀྱིན་བསྡད། གཤེན་ཉི་མ་དེ་ལམ་དུ་བཞུགས་པ་ལ། ཟླ་བ་གཅིག་ཙམ་སོང་བ་དང་ཁོ་[9b5]རང་གི་སྒྲུབ་ཁང་ལ་མེ་འབར་བ་ཙམ་གྱི་སྔགས་ནུས་བྱུང་། གཤེན་ཉི་མ་ཡང་བསྒྲུབ་པ་ནི་མཛད་ཤག་རེ་དེ་རྟགས་ནི་གང་ཡང་མི་འདུག་སྙམ་ནས། ཁྱད་གསོད་ཀྱི་ཡི་གེ་འདི་ལྟར་ཕུལ། ཇ་[9b6]ནག་པོ་བརྒྱབ་པ་ལ་མདོག་དམར་པོ་བབ་འདུག འདི་བཙུན་ཆུང་ཉི་མའི་མཐུ་རྟགས་ཨེ་ཡིན། བ་ནག་མོ་བཞོས་པས་འོ་མ་དཀར་པོ་དོན་འདུག འདི་ཡང་བཙུན་ཆུང་ཉི་མས་མཐུ་[10a1]རྟགས་ཡིན་ནམ། དེ་མིན་མཐུ་ནུས་ཀྱི་རྟགས་ནི་གང་ཡང་མི་འདུག་ཟེར་བ་ཕུལ། དེ་ལའང་ལན་དང་མི་མཉེས་པ་གང་ཡང་མེད་པར་བཞུགས་པའི་ཞག་ཁ་ཤས་ཤིག་[10a2]ནས། ཁོའི་མཐུ་རྟགས་སུ་འབྲོང་ཤིན་ཏུ་ཆེ་བ་ཞིག་ཡོང་ནས། མགོན་ཁང་གི་སྒོ་ར་རྡོར་གྱིན་འདུག་པ་ལ། གཤེན་ཉི་མས་ཕྱག་སིལ་ཐོད་པར་འཕངས་ནས་མཐུ་འབྲོང་དེ་རུ་བཏུལ། དེ་[10a3]ནས་གཤེན་ཉི་མས་དགོངས་པ་ལ། ང་ལ་ཁོས་མཐུས་ཚུགས་པར་མི་འགྱུར་ཀྱང་། བསྟན་པའི་དགྲེགས་མ་བསྒྲལ་ན། གཤེན་གྱི་རིགས་བརྒྱུད་ལ་ཕུག་ཆར་གནོད་པ་ཙམ་དུ་མ་ཟད། གསང་སྔགས་ཀྱི་དམ་[10a4]ཚིག་ལ་འགལ་དོགས་དགོངས་ནས། བཀའ་སྲུང་རྣམས་བསྟན་དགྲ་སྒྲོལ་བའི་ལས་ལ་བསྐུལ་མ་ཐག་ཏུ། ཐོག་མར་དམག་དཔོན་ཕེབས་པས། ཁོའི་སྔགས་ནུས་ཀྱིས་མེ་རི་མེ་དཔུང་གིས་ལུང་པ་བཀང་[10a5]ན་ཕེབས་པ་མ་བྱུང་བར་ལོག་ཕེབས་པ་ལ། སྲིད་རྒྱལ་གྱིས་བཀྱོན་ཚུལ་ད་ལྟའང་སྐུ་རྟེན་ལ་གསལ། དེ་ནས་སྲིད་གསུམ་མངའ་དབང་མ་གཅིག་སྲིད་པའི་རྒྱལ་མོ་ཕེབས་བས་མེ་རི་མེ་དཔུང་ཡང་རང་ཞི་[10a6]ལ་སོང་སྟེ། ཝ་མགོ་སྐད་ཅིག་ལ་སྒྲོལ་བར་གྲུབ་ཀྱང་། ཁོ་ལ་མངོན་ཤེས་དང་མཐུ་ནུས་ཇི་ཡོད་ཉམས་སོད་བཞེས་པར་དགོངས་ནས། ཁོའི་མ་ཆུ་བཅུ་བ་ལ། ཤ་བ་མ་བུ་བདུན་དར་ཚོན་ཁྲ་[10b1]དཔུང་ངེ་བས་བརྒྱན་པ་བྲོ་འཁྲའ་ཏུ་བཅུག་ནས། དེ་ལ་ལྟད་མོར་གཡེངས་སྐབས། ཁོའི་མ་རུ་སྤྲུལ་ནས་ཚོད་མ་ཞིག་བརྣམས་ནས་ཕེབས་པས། ཁོ་བསྙན་པ་སྐྱེལ་བཞིན་འདུག་པ་ལ། [10b2]ཚོད་མ་རྫོགས་པར་གནང་རྗེས་འདི་སྐད་གསུངས། ངའི་བུ་ཁྱོད་གཤེན་ཉི་མ་མཐུ་བསྒྲུབ་ཀྱིས། ཉམས་ཀྱང་རྒུད། ཤིག་ཀྱང་བརྒྱབ་འདུག་གསུངས་ནས། ཁོའི་སྣང་བར་བྲང་ནས་ཤིག་གཅིག་[10b3]བླངས་སོང་བསམ་པ་ལ། དོན་དུ་སྲོག་སྙིང་ཞལ་དུ་བཞེས་ནས་ཡོལ་སྒོར་ལ་ཕྱག་ཕྱིས་ནས་ཕེབས་སོང་། དེ་དང་མཉམ་དུ་ཤ་བ་མ་བུ་འདྲོགས་ནས་མི་སྣང་བར། མ་དེས་ཚོད་མ་བགྱངས་སོང་བསམ་[10b4]སྟེ། ལ་འུར་བསྐོལ་ནས་ཁྱེར་བས། ཁོ་ན་རེ། ཨ་མ་ཅི་ཡིན་ཚོད་མ་འཐུངས་ཚར་ཟེར་བ་ལ། མ་དེས་ང་ཤ་བ་མ་བུ་བདུན་རྩེད་བྲོ་འཁྲབ་པ་ལ་ལྟད་མོར་ཡེངས་ནས་ཚོད་མ་བཀའ་འགྱངས་སོང་[10b5]ཟེར་རོ། ཝ་མགོ་ཨ་ཁ་ཁ། འོ་ན་སྲིད་རྒྱལ་ཤོར་བ་ཡིན་འདུག ཡོལ་བ་དེ་ལ་ལྟོས་དང་ཟེར། མས་ཡོལ་བར་བལྟས་པས། ཡོལ་བ་ཁྲག་གིས་ཚོས་འདུག་བྱས་པ་ལ། འོ་ན་མ་བྱུང་། [10b6]ད་ངའི་ཕྲེང་བ་འདི་མིད་ཐུབ་ནས། བརྒྱུད་པ་འདུ་འདྲ་ལ་སྟོང་འགྲོ་བས་མིད་ཨེ་ཐུབ་བལྟ་དགོས་ཟེར་ཏེ། ཕྲེང་བ་ཁྱུར་ཁྱུར་དུ་མིད་པས་སྲིད་པའི་རྒྱལ་མོས་མདོ་འཛིན་ཕྱག་གིས་བཟུང་ནས་མིད་མ་[11a1]ཐུབ་པར་ཁོ་ཤིན་ཏུ་ཡིད་མུག་ནས་སྨོན་ཚིག་ངན་པ་འདི་སྐད་སྨྲས། ད་ལམ་ཁོང་ཉིད་ང་ཡིས་མ་ཐུབ་ཀྱང་།། ང་གཟུགས་གསོབ་བཅོས་ཁ་འདི་ཚེ་མས་རྒྱོངས།། དར་སྡིངས་ཕྱོགས་[11a2]སུ་ཁ་བསྟན་བཞག་པ་ན།། སྙིགས་མའི་དུས་སུ་བསྟན་གནོད་བར་ཆད་སྡང་།། གང་ཞེས་ནོར་སྐྱོང་འཁྱམས་པའི་ངང་ཚུལ་ཅན།། འཇིག་རྟེན་ཕལ་ལ་འགྲོ་བ་འགའ་སྲིད་པའི།། ཟུར་ཉམས་[11a3]འབྱུང་ངོ་ང་ཡི་དམོད་མཐུར་ངེས།། ཞེས་ཟེར་ནས་དབུགས་ཆད་དོ། །མ་སོགས་ཁོའི་སྡེ་རིགས་རྣམས་ཀྱིས་ཁ་ཆེམས་བཞིན་བྱས་ནས་ཡོད་པ་ལ། དུས་རེ་ཞིག་ཙམ་ནས། ཁམས་པ་གནས་བསྐོར་བ་བོན་[11a4]ལུགས་ཤིག་གིས། གསོབ་དེས་གཤེན་ཚང་གི་བསྟན་པ་ལ་གནོད་པར་གོ་ནས། དེར་གནས་ཀྱི་མི་རྣམས་ལ་འདི་སྐད་སྨྲས། ང་དོ་ནུབ་གནས་བཞག་ལ་འདིར་སྡོད་ཆུག་བྱས་ནས་བསྡད་དེ། [11a5]མཚན་གུང་ལངས་ནས་གསོབ་ཀྱི་རྐེ་བཅད་ནས་ཆུ་ལ་བསྐྱུར། ཡང་དེ་ཡོད་རྣམས་ཀྱིས་ར་གན་ལ་མགོ་བོའི་དབྱིབས་བཅོས་ཏེ། དར་སྡིངས་སུ་ཁ་བསྟན་ནས་དུས་ད་ལྟ་ཡང་ཡོད་སྐད། དེ་ནས་[11a6]གཤེན་ཉི་མས་ཁོའི་ཁ་ནོན་ཏུ། གཡུང་དྲུང་བཀོད་ལེགས་ཀྱི་མཆོད་རྟེན་སྐུ་འབུམ་བཀྲ་ཤིས་དོན་ལྡན། མཐོང་བ་ཙམ་གྱིས་གྲོལ་བའི་བྱིན་ཆེན་དམ་པ་བཞེངས་བཀོད་མཛད། མཐའ་སྐོར་[11b1]དུ་དབུ་ལོ་གཏོར་བ་ལ་ལྗོན་ཤིང་འཁྲུངས། དེ་ནས་བཟུངས་སྟེ་ལོ་ལྟར་གྱི་ཁྲོ་བོ་ངོ་མཚར་རྒྱས་བཟློག་གི་གཏོར་ཟོར་དེའི་ཕྱོགས་སུ་འཕང་སྲོལ་དང་། ལྷག་པར་ཁྲོ་ཕུར་བཙུགས་སྐབས་ཝ་མགོ་སྟོངས་[11b2]ཤུལ་དུ་ཛོ་དམར་མངོན་སུམ་དུ་དམར་ཆི་ལེ་བབས་ནས་གྱང་དུམ་གོག་པ་སོགས་དུས་ཕྱིས་འབྱུང་ཡང་ཡོང་གི་ཡོད་སྐད་དོ།། །།

(འཁྲུངས་རབས་ལས་) དེང་སང་གངས་ཅན་ཞིང་ཁྲོད་འདིར།། ཐུགས་རྗེ་སྟོབས་ལྡན་ཁོ་[11b3]བོ་ཙམ།། ཞེས་གསུངས་པ་ནི། དེའི་དུས་སུ་གཡུང་དྲུང་བོན་གྱི་བླ་མ་མཁས་ཤིང་གྲུབ་པ་བསྙེམས་པའི་འགྲོ་དོན་ཇི་སྙེད་བཞུགས་ཀྱང་། དེ་དག་ཐམས་ཅད་ཀྱི་ནང་ནས་འགྲན་ཟླ་དང་བྲལ་བ་གསང་བ་མཆོག་[11b4]གི་ཐུགས་སྤྲུལ་དམུ་དབང་གཤེན་སྟོན་ཉི་མ་དང་། སྨན་རིའི་མཉམ་མེད་ཤེས་རབ་རྒྱལ་མཚན་གཉིས་ལགས་ཤིང་། དེ་གཉིས་ཐོག་མར་མཇལ་སྐབས། རྩལ་འགྲན་གྲུབ་རྟགས་མཛད་པ། [11b5]གཤེན་ཉི་མ་མདོ་དྲི་མེད་གཟི་བརྗིད་ལས། རྣམ་མཁྱེན་རྒྱལ་བ་གཤེན་རབ་ཀྱིས་གཟིགས་ཚད་ལྔ་ལ་དགོངས་པའི་ནང་ཚན། རིགས་ལ་གཟིགས་པ་སྤྱིར་མི་ལ་རིགས་མང་དུ་མཆིས་ཀྱང་། [11b6]མི་རྒྱུད་ལྷ་ལས་གྲོལ་བའི་ཁྲི་ཤེས་དཀར་པོའི་ཐུགས་ཀྱི་སྲས་མཆོག གསས་ལྔ་མཁའ་འགྱིང་དང་དྲུག་གི་བྱིན་གྱིས་བརླབས་པའི་གདུང་རྒྱུད་ཀྱི་རྒྱལ་པོ་དྲུག་སྟེ། དེའི་ནང་ནས་ཀྱང་ཁྱད་པར་དུ་དཔག་[12a1]པ་དམུ་རིགས་གཤེན་ལྷའི་གདུང་རྒྱུད་དོ། ཞེས་པ་ལྟར་རྒྱལ་རིགས་དམུའི་གདུང་ལས་གྲོལ་བ་དང་། གསང་མཆོག་ཐུགས་སྤྲུལ་དུ་སོང་བས་ན་ནམ་མཁར་འཕུར་བ། རྟ་བདུན་[12a2]གྱི་ཉེ་འདབས་རླུང་གི་སྤུ་གྲི་རིག་གཅོད་ཀྱི་བར་གཤེགས་ཐུབ་པ་དང་། དེའི་ཡན་ཆད་ལ་འོད་ཟེར་གྱིས་འཚིག་སྟེ་ཕེབས་སྟབས་མེད་པས། དབུ་ཞྭ་ཡར་འཕངས་པས་འོད་ཟེར་གྱིས་འཚིག་འགྲོ་བ་དང་། [12a3]ན་བཟའ་ཉི་མའི་ཟེར་ལ་བཀལ་ཀྱང་སྲོང་ངེར་འདུག་པ་སོགས་བྱུང་སྐད། མཉམ་མེད་ཆེན་པོ་དེ་ལས་དམའ་བ་ལས་འཕུར་མ་གྲུབ་ཅིང་། ན་བཟའ་ཉི་ཟེར་ལ་བཀལ་ཀྱང་མི་ཐེག་པའི་ཚུལ་[12a4]གྱིས་ལྡེམ་གུག་བྱས་སྐད། དེ་རྗེས་གཤེན་ཉི་མ་སྟོད་གངས་རི་མན་ཆད་ནས། སྨད་རྒྱ་ནག་ཡན་ཆད་ལ་འགྲོ་དོན་ཁོ་ནར་གཤེགས་ཤིང་། སྤྱན་གཅིག་ཤེས་རབ་རྒྱལ་མཚན་སྨན་རི་རང་དུ་བཞུགས་ནས། [12a5]ཕྱི་ཚུལ་ནང་ཁྲིམས་བསྙེན་སྒྲུབ་སོགས་སྒྲིབ་སྦྱོང་ཚོགས་གསོག་ཁོ་ན་མཛད་ཅིང་བཞུགས་སོ། དུས་ནམ་ཞིག་ཙམ་ནས། གཉིས་པོ་མཇལ་ནས་སྔོན་མ་ལྟར་རྩལ་འགྲན་གནང་བས་[12a6]མཉམ་མེད་ཆེན་པོ། བྱང་ཆུབ་བསྒྲུབ་ལ་བརྩོན་པའི་སྟོབས་ཀྱིས་གཤེན་ཉི་མའི་གྲུབ་རྟགས་གོང་འཁོད་བཞིན་གྲུབ། གཤེན་ཉི་མ་འགྲོ་དོན་གདུལ་བྱ་ཁོ་ན་ཕེབས་པའི་དཀོར་སྒྲིབ་བཞེས་ཚུལ་[12b1]གྱིས་མཉམ་མེད་ཆེན་པོའི་གྲུབ་རྟགས་གོང་གསལ་ཙམ་ལས་མ་གྲུབ་པའི་ཚུལ་བསྟན། དེ་ཡང་དོན་གཤེན་ཉི་མ་དཔལ་གསང་མཆོག་རྒྱལ་པོའི་སྤྲུལ་འགྲོ་དོན་དུ་ཕེབས་པ་དང་། མཉམ་[12b2]མེད་ཆེན་པོ་སློབ་དཔོན་གཙུག་གཤེན་རྒྱལ་བའི་སྤྲུལ་པ་འགྲོ་དོན་དུ་ཕེབས་པ་ཡིན་པས་ན། སངས་རྒྱས་འགྲོ་བའི་དོན་དུ་ཕེབས་པ་ལ་དཀོར་སྒྲིབ་ཀྱིས་གོས་པ་དང་འབྱུང་བ་སོགས་མི་མངའ་ཡང་། དཀོར་བག་ཆགས་[12b3]ཆེས་ན་སྔོན་མ་བཟང་ཡང་རྗེས་སུ་ཞན་ཚུལ་དང་། སྒྲིབ་སྦྱོང་ཚོགས་གསོག་ལ་འབད་ནུས་ན། ཐོག་མར་ངན་ཡང་རྗེས་སུ་བཟང་བ་ཡོང་ཚུལ་སྐྱེས་ཆེན་དམ་པ་གཉིས་ཀྱིས། ཕྱི་རབས་རྣམས་ལ་[12b4]རྒྱུ་འབྲས་བསླུ་བ་མེད་པའི་ངེས་འབྱུང་བདེན་པས་དཔེར་བསྟན་པ་ཙམ་མོ།། །།

དེ་ནས་དུས་མི་རིང་བ་ཞིག་ནས། དམུ་རྒྱལ་ཉི་མའི་དགོངས་པའི་གཟིགས་སྣང་དུ། གནས་དམ་པ་མཁའ་སྤྱོད་ཀྱི་ཞིང་[12b5]ཞིང་ཁམས་སུ། དཔའ་བོ་རིག་འཛིན་མཁའ་འགྲོ་ཀུན་འདུས་ནས་ངོ་མཚར་ཤིན་ཏུ་ཆེ་བར་གཟིགས་ཏེ། ཅི་ཡིན་ཐུགས་ལ་འཁྲུངས་ཏེ་སྐུ་དངོས་སུ་གཟིགས་མོ་ཕེབས་པས། སྔོན་གྱི་ཨ་ནེ་རྒན་མོ་མཁའ་[12b6]སྤྱོད་ཀྱི་ཞིང་དུ་དྲངས་པ་དེ། སྒོ་སྲུང་མཁའ་འགྲོའི་ཚུལ་དུ་འདུག་པས་ཞལ་མ་ཚོ་བར། ཁྱེད་ཤ་ཁྲག་གི་ཕུང་པོ་མ་བཞག་པར་མཁའ་སྤྱོད་དུ་ཕེབས་པ་མི་ཡོང་ཞུས་པ། དེ་ལ་ལན་དུ། ང་ཤ་ཁྲག་[13a1]གི་ཕུང་པོར་གནས་ཀྱང་། ང་བདག་གཟུང་འཛིན་གྱིས་མ་གོས་པར་སྐྱོན་མེད་གསུངས་ཏེ་ནང་དུ་ཕེབས། རིག་འཛིན་མཁའ་འགྲོ་ཀུན་འདུས་ནས་འཚོགས་ཀྱི་འཁོར་ལོ་བསྐོར་ཅིང་། དབུས་སུ་[13a2]ཁྲི་མཐོ་དམའ་ཅུང་ཟད་ཡོད་པ་གཉིས་འདུག་པ་ལ། ཁྱེད་རྣམས་ཚོགས་འཁོར་བསྐོར་ནས་སུ་འབྱོན་པ་ཡོད་གསུངས་པས། སྨན་རིའི་སྤྱན་གཅིག་པ་ཤེས་རབ་རྒྱལ་མཚན་སྐུ་སྐྱེ་བར་བརྗེས་ནས་ཕེབས་[13a3]པ་ཡོད་པའི་དེས་ཡིན་གསུངས། ཁྲི་གཉིས་འདུག་པས་གཅིག་ཏུ་སུ་བཞུགས་གསུངས་པས། གཤེན་ཉི་མ་སྐུ་ལུས་ཤ་ཁྲག་གི་ཕུང་པོ་མ་བཞག་པར་ཕེབས་པའི་བཞུགས་པ་ཡིན་གསུངས་ཏེ། [13a4]རིག་འཛིན་མཁའ་འགྲོ་རྣམས་ཀྱིས་གསོལ་འདེབས། བོན་ཉིད་ཆེན་པོ་གསུངས་ཀྱིན་འདུག་པ་ལ། གཤེན་ཉི་མས་སྐུ་ལུས་བྱ་རུ་སྤྲུལ་པའི་དང་སྒྲོའི་ནང་དུ་གསོལ་འདེབས་བྲིས་ནས། སྨན་རིར་ཕེབས་[13a5]པས། མཉམ་མེད་ཞིང་བརྗེས་ཚར་ནས་མ་མཇལ། མི་མཇལ་བའི་རྒྱུ་མཚན་ཡང་། ཁྱོད་ལའང་ང་མི་དགོས་པའི་དཔེ་བཞིན་ལ་དགོངས་པ་ཡིན་སྐད། དེ་ནས་གསོལ་འདེབས་སྨན་རིར་[13a6]སྤྱོད་ནས་བསྣམས་པ་སྨན་རིར་རྩལ། རྡོ་གཅལ་ལ་མོས་རྟེན་ཞབས་རྗེས་བཞག་ནས་གདན་སར་ཕེབས་སོ།

གཞན་ཡང་མཛད་ཕྲིན་བཟང་པོ་བསམ་གྱིས་མི་ཁྱབ་ཅིང་། ཉི་མའི་[13b1]བཀའ་འབུམ་པོ་ཏི་བཅུ་གཉིས་ཙམ་ཡོད་པ་གྲགས་ཤིང་། ཕྱི་རབས་ཀྱི་མོས་རྟེན་འདྲ་སྐུ་ལ། ཕྱག་གིས་ཞུལ་ཞུལ་གནང་བས་ཕྱག་དྲགས་ནག་པོ་ཐོགས་པ་ལ་རྗེས་སུ་གསེར་ཆབ་ཕུལ་ཀྱང་[13b2]མི་བཞེས་པར། ང་འདི་ག་རང་ལ་བཞག་ན་བྱིན་ཆེ་ཞེས་པའི་གསུང་བྱོན་པ་དང་། གཤེན་གྱི་བསྟན་དང་དེ་འཛིན་སྐྱེས་བུ་རྣམས་ལ་དགོངས་ཏེ། གསང་འདུས་ངོ་བོ་གཤེན་དམ་པ་རྒྱལ་ཚབ་ཀྱི་[13b3]གསོལ་འདེབས་ལས། དམུ་རྒྱལ་བརྒྱུད་དང་གཤེན་སྲས་མཆོག་རྣམས་ལ།། དབྱིངས་ནས་ཐུགས་རྗེའི་བྱིན་རབས་ཆར་ཕོབ་ཅིག ། བརྒྱུད་པ་སྨིན་གྲོལ་ནུས་པའི་དབང་སྐུར་ཅིག ། སྐུ་གསུང་[13b4]ཐུགས་ཀྱི་རབ་ཏུ་གནས་པར་མཛོད།། ལོག་འདྲེན་ཅིས་མི་ཐུབ་པའི་རྒྱལ་གདབ་རྩོལ།། བདག་གཞན་རྒྱུད་ཁྲོལ་ཤེས་པ་འབར་བར་མཛོད།། བསྟན་པ་དར་རྒྱས་ཡུན་དུ་གནས་པར་མཛོད།། [13b5]དོན་གཉིས་གྲུབ་པ་མཐར་ཕྱིན་ཉིད་དུ་རྩོལ།། ཅེས་པ་གསོལ་འདེབས་སྨོན་ཚིག་གསུངས་པ་དང་། རྣམ་རྒྱལ་ལྷ་ཁང་དུ། གཤེན་རབ་རྣམ་པར་རྒྱལ་བའི་ཞལ་གཟིགས་ཤིང་། གཤེན་གྱི་[13b6]བཀའ་སྐྱོང་སྡེ་བཞི་དང་། ལྷ་ཆེན་སོ་གཅེན་མིག་དགུ་ལ་སོགས་དཔལ་མགོན་བརྒྱ་དང་རྩ་བརྒྱད་བཀའ་ཉན་བྲན་དུ་བཀོལ་ཅིང་། ཅི་གསུང་གི་ལས་བསྒྲུབ་པ་དང་། ཕྱག་རྫས་རྐུན་ཤོར་ངོས་[14a1]རྫས་ཀྱི་རྗེས་སུ། གཅེན་ལྷ་མི་རུ་བརྫུས་ནས་ཕེབས་པ་དང་། འབྲུག་ཁང་དུ་སྔོན་མོ་འབྲུག་མགོ་ཞལ་བསྟན་ཅིང་ཕྲིན་ལས་བསྒྲུབ་པ་ཞལ་གྱིས་བཞེས། ཞལ་གཟིགས་ནང་[14a2]ལྟར་གྱི་ཞལ་འབགས་གཤེན་ཉི་མའི་ཕྱག་བཟོ་འཁྲུལ་མེད་བྱིན་རླབས་དང་ལྡན་པ་བཞུགས་ཤིང་། སྒོ་མཆོར་ཐིམ་ནང་གི་རྡོ་ལ་ཞབས་རྗེས་བཞག་ནས། འདིས་ཡན་ལ་འདྲེ་གདོན་[14a3]མི་ཡོང་བ་དང་། རྣམ་པར་ཤེས་པར་འཛུལ་ཚད་ངན་སོང་དུ་མི་ལྟུང་པར་ཞལ་གྱིས་བཞེས་སོ། གཞན་ཡང་མ་རྒྱུད་རྒྱལ་བ་རྒྱ་མཚོའི་ཞིང་ཁམས་སུ་ཕེབས་ནས། དབང་བསྐུར་ལུང་བསྟན་[14a4]ཐོབ་ཚུལ་མཇལ་སྣང་ལུག་གུ་རྒྱུད་ཀྱི་གཏེར་ཕྲེང་དང་། ལྷ་མོ་བཟང་བཟའ་རིང་བཙུན་དང་དྲིས་ལན་མཛད་ཅིང་། གཟུངས་ཐག་ནོར་བུའི་རྟོགས་བསྒྲིལ་གྱི་བྱུང་བཤད་སོགས། མ་རྒྱུད་དབང་[14a5]ལུང་མ་ཐོབ་པར། བལྟ་མི་རུང་བའི་བཀའ་གཉན་སྟབས་ཀྱིས་འདིར་མ་བྲིས་སོ།།

སྐུའི་ཞིང་བཀོད་བརྗེས་དུས་ཀྱང་། དབྱར་གྱི་དྲེ་ཆུང་བོལ་ནུབ་ཙམ་ལ་བརྒལ་བའི་འཚེར་བ་ཙམ་ཡང་[14a6]མེད་པར། འདའ་དགའ་འཆི་བྲོད་གསུངས་ཤིང་། ནམ་མཁའ་འཇའ་འོད་ཀྱིས་ཁེངས་ཤིང་མེ་ཏོག་གི་ཆར་བབས། དགོངས་དབྱིངས་སྐད་ཅིག་མ་ལ་མཁའ་སྤྱོད་གསང་བའི་གནས་མཆོག [14b1]གཡུང་དྲུང་བཀོད་པ་བརྡལ་པའི་ཞིང་ཁམས། མཁའ་འགྲོ་རྒྱ་མཚོའི་དབུས་སུ། མ་རྒྱུད་གསང་བའི་བོན་བསྐོར་དུ་གཤེགས་སོ། རྗེས་འཇུག་རྣམས་ཀྱི་མོས་རྟེན་ཏུ། ཞི་ཁྲོའི་ལྷ་རྟེན་ཡིག་འབྲུ་[14b2]བསམ་འདས་དང་། ལྷག་པར་སྐུའི་རྟེན་ཏུ་ཀུན་ཏུ་བཟང་པོ། གསུང་རྟེན་རྫོགས་སྐུ་མཁའ་འགྱིང་། ཐུགས་རྟེན་གཡུང་དྲུང་བཀོད་ལེགས་ཀྱི་མཆོད་རྟེན་དང་། གདུང་ཤ་རི་རམ་གསེར་མདོག་ལ་ཨ་[14b3]ཡིག་འབུར་དུ་དོད་པ་སོགས་བསམ་གྱིས་མི་ཁྱབ་པ་རང་བྱོན་ཏུ་འཁྲུངས། བསྟན་དང་འགྲོ་བའི་རྩ་ལག་རྒྱལ་བ་གཉིས་པའི་མཆོག་སྤྲུལ། མཚན་ཐོས་པ་ཙམ་གྱིས་མཆོག་པའི། བོད་[14b4]ཁ་བའི་ལྗོངས་ཀྱི་འདྲེན་སྟོན། གཡུང་དྲུང་བོན་གྱི་བསྟན་པའི་སྲོག་ཤིང་། གཤེན་ཉི་མ་རྒྱལ་མཚན་གྱི་རྣམ་ཐར་འབྲིང་པོའི་ཚུལ་འདི་ནི། དམུ་རྒྱལ་གོང་མ་མཚུངས་མེད་ལུང་རྟོགས་ཀྱི་[14b5]གཤོག་རླབས་མངའ་བའི་ཁྱུང་ཆེན་རིམ་བྱོན་གྱི་རྗེས་འཇུག་པ། བདག་འདྲ་ཐོས་མེད་སྦུང་ཆུང་བྷྲ་མ་ར།ß ལ་ཅོ་འདྲི་བ་མི་འགྱུར་གཙུག་ཕུད་དབང་རྒྱལ་དུ་འབོད་པས། དད་འདུན་མོས་པའི་[14b6]སྒོ་ནས་ཡི་གེ་བཀོད་ཀྱང་། བསླབ་སྦྱང་གི་ཡོན་ཏན་ཆ་ཕྲ་བའི་སྐྱོན་གྱིས། ནོར་འཁྲུལ་ར་ཆོད་དུ་གྱུར་པ་ཅི་མཆིས། བླ་མ་ཡིད་དམ་མཁའ་འགྲོའི་སྤྱན་སྔར་མཐོལ་ལོ་བཤགས་ཤིང་། འདི་བཞེངས་[15a1]དགེ་བའི་རྩ་བ་གང་ལགས་པ་དེས། གཡུང་དྲུང་བོན་གྱི་བསྟན་པ་རབ་ཏུ་དར་བ་དང་། དེ་འཛིན་པའི་སྐྱེས་བུ་གནས་འདི་དང་ཕྱོགས་གང་དང་གང་དུ་བཞུགས་པ་ཚང་མའི་སྐུ་ཚེ་ཞབས་[15a2]པད་བརྟན་ཅིང་། འགྲོ་དོན་ཕྲིན་ལས་རྒྱས་པ་དང་། མ་གྱུར་འགྲོ་བ་ཀུན་ཀྱང་བདེ་སྐྱིད་ཀྱི་དཔལ་ལ་ལོངས་སུ་སྤྱོད་ཅིང་། རྣམ་པར་དཀར་བའི་དགེ་ཚོགས་གོང་ནས་གོང་དུ་འཕེལ་བ་དང་། མཐར་ཡང་[15a3]བླ་མེད་གཡུང་དྲུང་གི་སྙིང་པོ་འཐོབ་པའི་རྒྱུ་རུ་བདག་གིས་བསྔོ་ཞིང་། བསྔོ་པ་ཇི་བཞིན་འགྲུབ་པར་གྱུར་ཅིག །

སྨྲས་པ། ཐོས་པ་(བྱ་བ་བརྗོད་པ་མཐའ་གསལ་)ཙམ་གྱིས་རྣམ་པར་གྲོལ་བྱེད་པའི།། མོས་ལྡན་ཐར་[15a4]པའི་ལམ་ལ་འདྲེན་པ་འདི།། གཤེན་སྟོན་མི་འགྱུར་གཙུག་ཕུད་དབང་རྒྱལ་གྱིས།། དཔྱད་གསུམ་རྣམ་པར་དག་པས་བསྐྲུན་ལས་བྱུང་།། ཀུན་མཁྱེན་ཉི་མའི་(མཐའ་དག་གཟུགས་ཅན་)མཛད་མཚོར་རྗེས་དཔག་གི ། [15a5]གྲུ་གཟིངས་ལ་བརྟེན་རྣམ་ཐར་ཡིན་ནོར་འདི།། དད་པའི་བྱི་དོར་བགྱིས་ཏེ་སྤྱི་བོ་ཡི།། གདུགས་དཀར་རྩེར་བཀོད་སྨིན་གྲོལ་བསམ་དགུ་བསྙིལ།། འདིར་འབད་(བསྡུས་ཤིང་མ་བསྟུན་པའི་གཟུགས་ཅན་)དགེ་ཚོགས་ནག་ཀླུང་ཏུག་པའི་ཁྲོད།། བླ་མེད་གཤེན་[15a6]བསྟན་ཨ་ཤྭ་ཐ་ཡི་ལྗོན།། བོན་སྲིད་ལོ་འདབ་རབ་རྒྱས་ཕན་བདེ་ཡི།། གྲིབ་བསིལ་སྣུམ་པོས་འགྲོ་ཀུན་ཉེར་མཚོར་ཤོག །

ཅེས་བྱ་བ་འདི་ནི་ཡི་གེའི་འདུ་བྱེད་པའས་ཐོལ་གཏམ་དུ་བགྱིས་ཏེ། རྫོགས་མཚམས་ཀྱི་ཚིགས་སུ་བཅད་པའོ།། བཀྲ་ཤིས།