༺ས་སྐྱ་ལེགས་བཤད་༻

༄༅། །རྒྱ་གར་སྐད་དུ། སུ་བྷཱ་ཥི་ཏ་རཏྣ་ནི་དྷེ་ནཱ་མ་ཤཱསྟྲ། བོད་སྐད་དུ། ལེགས་པར་བཤད་པ་རིན་པོ་ཆེའི་གཏེར་ཞེས་བྱ་བའི་བསྟན་བཅོས། འཕགས་པ་འཇམ་དཔལ་གཞོན་ནུར་གྱུར་པ་ལ་གུས་པས་ཕྱག་འཚལ་ལོ། ། ལྷ་ཡི་མཆོག་དང་ཀླུ་དབང་གྲུབ་པ་རིག་འཛིན་གཙོ། ། དྲང་སྲོང་རྒྱས་པ་གྲོག་མཁར་བ་དང་རྐང་མིག་སོགས། ། ཀུན་ནས་དགའ་བའི་གཙུག་གི་ནོར་བུས་ཞབས་མཆོད་པ། ། འགྲོ་བའི་གཙོ་བོ་ཀུན་མཁྱེན་དེ་ལ་བདག་ཕྱག་འཚལ། ། རིག་པས་དཔྱད་ན་ཆོས་ལུགས་མི་འགལ་ཞིང་། ། འཇིག་རྟེན་བྱ་བ་ཀུན་ནས་ལེགས་བསྒྲུབ་པ། ། དམ་པ་རྣམས་ཀྱི་སྤྱོད་ཚུལ་ཅི་འདྲ་ཞིག ། བཤད་པ་འདི་ནི་ལེགས་བཤད་རིན་ཆེན་གཏེར། །

རབ་བྱེད་དང་པོ། མཁས་པ་བརྟག་པ།

མཁས་པ་ཡོན་ཏན་མཛོད་འཛིན་པ། །དེ་དག་ལེགས་བཤད་རིན་ཆེན་སྡུད། ། རྒྱ་མཚོ་ཆེན་པོ་ཆུ་བོའི་གཏེར། །ཡིན་ཕྱིར་ཆུ་བོ་ཐམས་ཅད་འབབ། །

སྐྱེ་བོ་ཡོན་ཏན་ཡོད་མེད་པའི། །བླང་དོར་བློ་གྲོས་ལྡན་པ་མཁས། ། རྡུལ་དང་འདྲེས་པའི་ལྕགས་ཕྱེ་རྣམས། །ཁབ་ལེན་རྡོ་ཡིས་ལེན་པར་ཤེས། །

ལེགས་བཤད་མཁས་པའི་བློ་གྲོས་ཀྱིས། །གོ་ཡི་བླུན་པོས་དེ་ལྟ་མིན། ། ཉི་མའི་འོད་ཟེར་ཤར་བ་ན། །འབྱུང་པོའི་བྱ་རྣམས་ལོང་བར་འགྱུར། །

ཤེས་རབ་ལྡན་པས་ཉེས་པ་དག །སེལ་བར་ནུས་ཀྱི་བླུན་པོས་མིན། ། ནམ་མཁའ་ལྡིང་གིས་དུག་ཅན་སྦྲུལ། །གསོད་པར་ནུས་ཀྱི་ཁྭ་ཏས་མིན། །

བློ་གྲོས་ཆེན་པོ་རྒུད་ན་ཡང་། །ལྷག་པར་བློ་གྲོས་སྟོབས་ལྡན་འགྱུར། ། རི་དྭགས་རྒྱལ་པོ་བཀྲེས་པ་ན། །གླང་ཆེན་སྤྱི་བོ་མྱུར་དུ་འགེམས། །

མཁས་པ་རྩད་ཅིང་མ་དྲིས་པ། །དེ་ཡི་བར་དུ་གཏིང་མི་དཔོགས། ། རྔ་ལ་དབྱུག་གུས་མ་བསྣུན་པ། །དེ་སྲིད་གཞན་དང་ཁྱད་ཅི་ཡོད། །

རིག་པ་ནང་པར་འཆི་ཡང་བསླབ། །ཚེ་འདིར་མཁས་པར་མ་གྱུར་ཀྱང་། ། སྐྱེ་བ་ཕྱི་མར་བཅོལ་བ་ཡི། །ནོར་ལ་རང་ཉིད་ལེན་པ་འདྲ། །

ཡོན་ཏན་ལྡན་ན་སྐྱེ་བོ་ཀུན། །མ་བསྡུས་པར་ཡང་རང་ཉིད་འདུ། ། དྲི་ལྡན་མེ་ཏོག་རྒྱང་རིང་ཡང་། །བུང་བ་སྤྲིན་གྱི་ཚོགས་བཞིན་འཁོར། །

མཁས་པ་ཡོན་ཏན་ཀུན་བསླབས་པ། །མཐར་ཕྱིན་གཅིག་གིས་འཇིག་རྟེན་གསལ། ། བློ་ངན་ཤེས་པ་མང་ན་ཡང་། །རྒྱུ་སྐར་བཞིན་དུ་གསལ་མི་ནུས། །

མཁས་པ་ཡོན་ཏན་དཔག་མེད་ཀྱང་། །གཞན་གྱི་ཡོན་ཏན་ཆུང་ངུའང་ལེན། ། དེ་ལྟར་རྒྱུན་དུ་སྤྱད་པ་ཡིས། །མྱུར་དུ་ཐམས་ཅད་མཁྱེན་པར་འགྲོ། །

མཁས་པ་ཤེས་རབ་ཀྱིས་བསྲུང་ན། །དགྲ་བོ་མང་ཡང་ག་ལ་ཚུགས། ། འཕགས་རྒྱལ་གྱི་ནི་བྲམ་ཟེའི་བུ། །གཅིག་པུས་དགྲ་བོའི་ཚོགས་ཀུན་བཅོམ། །

བློ་ཆུང་གྲོས་ཉེས་འཁྲུགས་པའི་ཚེ། །བློ་ལྡན་ཐབས་ཀྱིས་བདེ་བར་གསོ། ། ཆུ་ཀླུང་རྙོག་པས་ཆུད་གསན་པ། །ཆུ་མདངས་ནོར་བུས་དྭངས་པར་བྱེད། །

མཁས་པ་ཇི་ལྟར་ཐབས་རྡུགས་ཀྱང་། །བློན་པོ་འཇུག་པའི་ལམ་མི་འགྲོ། ། ཆར་འདོད་བྱེའུ་སྐོམ་ན་ཡང་། །ས་ལ་བབས་པའི་ཆུ་མི་འཐུང་། །

ཤེས་རབ་ལྡན་པ་མགོ་བསྐོར་ཡང་། །བྱ་བའི་ཆ་ལ་རྨོངས་མི་འགྱུར། ། སྲོག་ཆགས་གྲོག་མ་མིག་མེད་ཀྱང་། །མིག་ལྡན་གཞན་ལས་ལྷག་པར་མགྱོགས། །

བློ་གྲོས་ལྡན་པ་གཉིས་བགྲོས་ན། །བློ་གྲོས་ལེགས་པ་གཞན་འབྱུང་སྲིད། ། ཡུང་བ་དང་ནི་ཚ་ལ་ལས། །ཁ་དོག་གཞན་ཞིག་སྐྱེ་བར་འགྱུར། །

ཁོང་མཛངས་བསོད་ནམས་བསགས་པའི་མི། །གཅིག་པུ་ཡིན་ཡང་ཀུན་ལས་རྒྱལ། ། རི་དྭགས་རྒྱལ་པོ་སེང་གེ་དང་། །འཁོར་ལོས་སྒྱུར་ལ་གྲོགས་མི་དགོས། །

ཐབས་ལ་མཁས་ན་ཆེན་པོ་ཡང་། །བྲན་དུ་བཀོལ་བར་ག་ལ་དཀའ། ། མཁའ་ལྡིང་མཐུ་རྩལ་ཆེ་ན་ཡང་། །གོས་སེར་ཅན་གྱི་བཞོན་པར་འགྱུར། །

འཇིག་རྟེན་འདི་དང་ཕ་རོལ་གྱི། །བདེ་བ་བསྒྲུབ་པ་ཤེས་རབ་ཡིན། ། རྒྱལ་བུ་ཟླ་བའི་ཤེས་རབ་ཀྱིས། །བྲན་བཟང་འདི་དང་ཕྱི་མར་བསྐྱབས། །

དཔའ་ཞིང་མཐུ་རྩལ་ཆེ་ན་ཡང་། །མཁས་པ་མིན་པས་དཔའ་མི་ཐོབ། ། འབྱོར་པ་ཐོབ་པར་གྱུར་ན་ཡང་། །བསོད་ནམས་མེད་ན་ག་ལ་རྟག །

ཡོན་ཏན་སྐྱོན་གཉིས་སུས་ཀྱང་གསལ། །འདྲེས་པ་འབྱེད་ཤེས་མཁས་པ་ཡིན། ། ཆུ་ལས་འོ་མ་ངང་པས་ཕྱེ། །བ་ལས་འོ་མ་ཀུན་གྱིས་ལོང་། །

སྨྲས་ཤིང་བསྐུལ་བར་གྱུར་པ་ན། །དུད་འགྲོ་ལ་ཡང་གོ་བ་སྐྱེ། ། མ་བསྐུལ་གཞན་གྱིས་མ་སྨྲས་པར། །བསམ་པ་ཤེས་ན་མཁས་པ་ཡིན། །

བློ་དང་ལྡན་ན་མ་སྨྲས་ཀྱང་། །རྣམ་འགྱུར་ཉིད་ལས་བསམ་པ་གོ། ། བལ་པོའི་སེའུ་མ་ཟོས་ཀྱང་། །ཁ་དོག་ཉིད་ལས་བྲོ་བ་ཤེས། །

མཁས་པ་རང་གི་ཡུལ་ལས་ཀྱང་། །ཡུལ་ཁམས་གཞན་ན་མཆོད་པ་ཐོབ། ། ནོར་བུ་གཞན་དུ་བྲིན་པ་ཙམ། །རྒྱ་མཚོའི་གླིང་དུ་ག་ལ་བྲིན། །

མཁས་པ་སློབ་པའི་དུས་ན་སྡུག །བདེ་བར་སྡོད་ལ་མཁས་མི་སྲིད། ། བདེ་བ་ཆུང་ལ་ཆགས་པ་དེས། །ཆེན་པོའི་བདེ་བ་ཐོབ་མི་སྲིད། །

བློ་དང་ལྡན་ན་ཉམ་ཆུང་ཡང་། །སྟོབས་ལྡན་དགྲ་ཡིས་ཅི་བྱར་ཡོད། ། རི་དྭགས་རྒྱལ་པོ་སྟོབས་ལྡན་ཡང་། །རི་བོང་བློ་དང་ལྡན་པས་བསད། །

སེམས་ཅན་གཞན་དང་རྗེས་མཐུན་པའི། །སྤྱོད་པ་ཤེས་ན་མཁས་པ་ཡིན། ། དུད་འགྲོ་ཡིན་ཡང་རིགས་མཐུན་རྣམས། །ཁྱུ་གཅིག་ཏུ་ནི་མི་གནས་སམ། །

ངེས་པར་འབྱུང་བའི་བྱ་བ་འགའ། །མ་གྲུབ་པ་ན་དཔྱོད་པའི་ཚེ། ། མཁས་རྨོངས་གཉིས་ཀྱི་ཁྱད་པར་ཤེས། །གྲུབ་ནས་དཔྱོད་པ་བླུན་པོའི་ཚུལ། །

མཁས་པ་རྣམས་ཀྱིས་དཔྱད་པ་ཡི། །ཤེས་བྱ་ཤེས་ན་མཁས་པར་བགྲང་། ། བ་ལང་རྒན་གཞོན་དཔྱོད་པ་ལ། །བླུན་པོ་མཁས་ཀྱང་ཡོན་ཏན་མིན། །

རྒྱ་མཚོ་ཆུ་ཡིས་མི་ངོམས་ཤིང་། །རྒྱལ་པོའི་བང་མཛོད་ནོར་གྱིས་མིན། ། འདོད་ཡོན་སྤྱད་པས་མི་ངོམས་ཏེ། །མཁས་པ་ལེགས་བཤད་ཀྱིས་མི་ངོམས། །

ལེགས་བཤད་བྱིས་པ་དག་ལས་ཀྱང་། །མཁས་པ་རྣམས་ནི་ཡོངས་སུ་ལེན། ། དྲི་ཞིམ་བྱུང་ན་རི་དྭགས་ཀྱི། །ལྟེ་བ་ལས་ཀྱང་གླ་རྩི་ལེན། །

རབ་བྱེད་གཉིས་པ། ཡ་རབས་བརྟག་པ། རྟག་ཏུ་དམ་པའི་ཡོན་ཏན་རྣམས། །སྐྱེ་བོ་དམ་པས་ལྷག་པར་སྒྲོགས། ། མ་ལ་ཡ་ཡི་ཙན་དན་དྲི། །རླུང་གིས་ཕྱོགས་བཅུར་རྒྱས་པར་བྱེད། །

དམ་པ་དཔོན་དུ་བསྐོས་གྱུར་ན། །དོན་གྲུབ་པ་དང་བདེ་སྐྱིད་འཐོབ། ། ནོར་བུ་རྒྱལ་མཚན་རྩེར་མཆོད་ན། །ཡུལ་ཕྱོགས་དགེ་ཞེས་མཁས་རྣམས་སྒྲོགས། །

རྒྱལ་ངན་གཞན་གྱིས་གཙེས་པ་ན། །ལྷག་པར་ཆོས་རྒྱལ་དྲན་པར་འགྱུར། ། རིམས་ཀྱིས་བཏབ་པའི་སེམས་ཅན་རྣམས། །གངས་ཆུ་འབའ་ཞིག་ཡིད་ལ་བྱེད། །

སྡིག་སྤྱོད་རྒྱལ་པོས་གཙེས་པ་ན། །མི་དབང་ཆོས་རྒྱལ་ལྷག་པར་སྐྱོང་། ། འབྱུང་པོའི་གདོན་གྱིས་བཏབ་པ་ལ། །གསང་སྔགས་གྲུབ་པས་རྗེས་སུ་འཛིན། །

དམ་པ་སྡིག་པ་ཆུང་ཡང་སྤོང་། །དམན་རྣམས་ཆེན་པོའང་དེ་ལྟ་མིན། ། ཞོ་ལ་རྡུལ་ཕྲན་འབྱར་བ་སེལ། །ཆང་ལ་ཕབ་ཀྱང་ལྷག་པར་འདེབས། །

སྐྱེ་བོ་དམ་པ་རྒུད་གྱུར་ཀྱང་། །སྤྱོད་པའི་ཁྱད་པར་ལྷག་པར་མཛེས། ། མེ་ནི་ཐུར་དུ་ཁ་བསྟན་ཀྱང་། །མེ་ལྕེ་གྱེན་དུ་འབར་བ་མཐོང་། །

དམ་པ་རྒྱང་ན་གནས་ན་ཡང་། །འཁོར་འདབས་ཕན་པས་རིང་ནས་སྐྱོང་། ། མཁའ་ལ་སྤྲིན་ཆེན་འཁྲིགས་པ་ཡིས། །ས་ཡི་ལོ་ཏོག་ཁྱད་པར་འཕེལ། །

གསོན་ཚེ་སྙན་གྲགས་དགའ་བའི་རྒྱུ། །འཇིག་རྟེན་གཞན་དུ་བསོད་ནམས་དགའ། ། དེ་གཉིས་མེད་པའི་ནོར་ཙམ་གྱིས། །མཁས་རྣམས་དགའ་བ་བསྐྱེད་མི་ནུས། །

ཕྱི་རྗེས་རིང་དུ་ལྟ་བ་དང་། །བག་ཡོད་པ་ལ་བཟོད་སྲན་ཆེ། ། བརྩོན་འགྲུས་ཆེ་ཞིང་བརྟན་ལ་གྲིམས། །བྲན་གཡོག་ཡིན་ཡང་དཔོན་དུ་འགྱུར། །

སྦྱིན་ལ་རྟག་ཏུ་སེམས་སྤྲོ་བ། །དེ་ཡི་གྲགས་པ་རླུང་བཞིན་ལྡང་། ། ཕོངས་པ་སློང་བ་འདུ་བ་བཞིན། །འབུལ་བར་འདོད་རྣམས་དེ་བས་མང་། །

བྱིན་ནས་སླར་ཡང་མི་ལེན་ལ། །དམན་པའི་བརྙས་པ་དང་དུ་ལེན། ། ཕན་པ་ཆུང་ངུའང་མི་བརྗེད་པ། །བདག་ཉིད་ཆེན་པོའི་ཆེ་རྟགས་ཡིན། །

དམ་པའི་ཡོན་ཏན་སྦས་གྱུར་ཀྱང་། །འཇིག་རྟེན་ཀུན་ལ་ཁྱབ་པར་གསལ། ། སྣ་མའི་མེ་ཏོག་ལེགས་བཀབ་ཀྱང་། །དྲི་ཞིམ་ཀུན་ཏུ་ཁྱབ་པར་འགྱུར། །

རྒྱལ་པོ་རང་ཡུལ་ཆེ་བ་ཙམ། །དམ་པ་གང་དུ་ཕྱིན་པར་བཀུར། ། མེ་ཏོག་ཕལ་ཆེར་ཉིན་རེའི་རྒྱན། །གཙུག་གི་ནོར་བུ་གང་དུའང་མཆོད། །

ལྗོན་ཤིང་དུད་པ་འབྲས་བུ་མང་། །རྨ་བྱ་དུལ་བ་མཇུག་སྒྲོ་བཟང་། ། རྟ་མཆོག་དུལ་བ་འགྲོས་མགྱོགས་ཏེ། །དམ་པ་དུལ་བ་མཁས་པའི་རྟགས། །

དམ་པ་རྣམས་དང་ཕལ་པ་ལ། །བྱས་པ་མཉམ་ཡང་དྲིན་མི་འདྲ། ། ཞིང་ལ་ས་བོན་ཁྱད་མེད་ཀྱང་། །ལོ་ཏོག་ཁྱད་པར་དཔག་ཏུ་མེད། །

བདག་ཉིད་ཆེ་ལ་ཕན་བཏགས་ན། །ཅུང་ཟད་ཙམ་ལའང་འབྲས་བུ་འབྱིན། ། སྐྱུ་རུ་ར་གཅིག་བྱིན་པ་ལ། །ཆོས་རྒྱལ་བུ་དང་སྙོམས་ལ་ལྟོས། །

བཟང་པོའི་ཆོ་རིགས་སྤྱོད་པས་བསྲུང་། །སྤྱོད་པ་ཉམས་ན་རིགས་དོན་མེད། ། ཙན་དན་དྲི་བཟང་སྐྱེ་བོ་དགའ། །དེ་བསྲེགས་སོལ་བ་སུ་ཞིག་ལེན། །

ཆེན་པོ་རེ་ཞིག་རྒུད་གྱུར་ཀྱང་། །དེ་ལ་གདུང་བ་བསྐྱེད་མི་དགོས། ། ཟླ་བ་རེ་ཞིག་གཟས་ཟིན་ཡང་། །དེ་མ་ཐག་ཏུ་གྲོལ་བར་འགྱུར། །

ཆེན་པོས་དགྲ་ལ་བྱམས་བྱས་ན། །དགྲ་ཉིད་དེ་ཡི་དབང་དུ་འགྱུར། ། མང་པོས་བཀུར་བས་ཀུན་བསྐྱངས་པས། །ཀུན་གྱིས་རྒྱལ་པོར་དབང་བསྐུར་རོ། །

དམ་པ་ཇི་ལྟར་རྒུད་གྱུར་ཀྱང་། །སྡིག་དང་འདྲེས་པའི་ཟས་མི་ཟ། ། སེང་གེ་བཀྲེས་ཀྱང་མི་གཙང་བའི། །ངན་སྐྱུགས་ཟ་བར་མི་བྱེད་དོ། །

དམ་པ་སྲོག་ལ་བབ་ན་ཡང་། །རང་བཞིན་བཟང་པོ་ག་ལ་འདོར། ། ས་ལེ་སྦྲམ་ནི་བསྲེགས་བཅད་ཀྱང་། །དེ་ཡི་ཁ་དོག་ཉམས་མི་འགྱུར། །

སྐྱེས་མཆོག་རྣམས་ལ་དམན་པ་རྣམས། །ཁྲོ་ཡང་ལན་དུ་ག་ལ་ཁྲོ། ། ཅེ་སྤྱང་དྲེགས་པས་སྐད་འབྱིན་ཡང་། །རི་དྭགས་རྒྱལ་པོས་སྙིང་རྗེས་སྐྱོང་། །

བདག་ཉིད་ཆེ་ལ་སྐྱེ་བོ་རྣམས། །སྐྱོན་འཚོལ་འགྱུར་གྱི་དམན་ལ་མིན། ། འཕན་ཟེལ་རིན་ཆེན་ལ་ལྟ་ཡི། །མགལ་དུམ་ལ་ནི་སུ་ཞིག་སྤྱོད། །

བསྟོད་པས་དགའ་བར་མི་འགྱུར་ལ། །སྨད་པས་མི་དགར་མི་འགྱུར་ཞིང་། ། རང་གི་ཡོན་ཏན་ལེགས་གནས་པ། །སྐྱེ་བོ་དམ་པའི་མཚན་ཉིད་ཡིན། །

སྡིག་པ་དང་ནི་མཐུ་རྩལ་ལས། །བྱུང་བའི་ལོངས་སྤྱོད་ལོངས་སྤྱོད་མིན། ། ཁྱི་དང་བྱི་ལ་འགྲངས་ན་ཡང་། །ངོ་ཚ་བོར་བའི་རྣམ་ཐར་ཡིན། །

འཁོར་ལ་ཕུན་སུམ་ཚོགས་གྱུར་ན། །རྗེ་དཔོན་ཉིད་ཀྱི་ཆེ་བ་ཡིན། ། རྟ་ལ་རྒྱན་དུ་བྱས་པ་དེ། །བདག་པོ་ཉིད་ལ་མི་མཛེས་སམ། །

ཇི་ལྟ་ཇི་ལྟར་རྗེ་དཔོན་གྱིས། །འཁོར་ལ་དྲིན་གྱིས་བསྐྱངས་གྱུར་པ། ། དེ་ལྟ་དེ་ལྟར་འཁོར་གཡོག་རྣམས། །རྗེ་དཔོན་ཉིད་ཀྱི་བྱ་བ་སྒྲུབ། །

བདག་ཉིད་ཆེན་པོ་གནས་པའི་སར། །མཁས་པ་གཞན་དག་སུ་ཡིས་བརྩི། ། མཁའ་ལ་ཉི་མ་ཤར་བ་ན། །རྒྱུ་སྐར་མང་ཡང་མཐོང་མི་འགྱུར། །

རབ་བྱེད་གསུམ་པ། བླུན་པོ་བརྟག་པ། སྐྱེ་བོ་ངན་པ་འབྱོར་ཐོབ་ཀྱང་། །ལྷག་པར་སྤྱོད་པ་ངན་པར་འགྱུར། ། འབབ་ཆུ་ཇི་ལྟར་ལྡོག་གྱུར་ཀྱང་། །ཐུར་དུ་འབབ་པ་ཁོ་ནར་འདོད། །

དམན་ལ་སྤྱོད་པ་བཟང་བྱུང་ཡང་། །དེ་ནི་བཅོས་མའི་རྣམ་ཐར་ཡིན། ། ཤེལ་ལ་ནོར་བུས་ཁ་བསྒྱུར་ཡང་། །ཆུ་དང་ཕྲད་ན་རང་མདོག་སྟོན། །

བླུན་པོས་བྱ་བ་ལེགས་གྲུབ་ཀྱང་། །སྟེས་དབང་ཡིན་གྱི་བསྒྲུབས་པས་མིན། ། སྲིན་བུའི་ཁ་ཆུ་དར་སྐུད་དུ། །འགྲོ་བ་མཁས་ནས་བྱུང་བ་མིན། །

ཆེན་པོས་འབད་ནས་བསྒྲུབས་པའི་གྲོས། །ངན་པས་སྐད་ཅིག་གཅིག་ལ་འཇོམས། ། ཞིང་པས་ལོ་ཟླར་འབད་པའི་ཞིང་། །སེར་བས་སྐད་ཅིག་རྡུལ་དུ་རློག །

ངན་པ་ཕལ་ཆེར་རང་གི་སྐྱོན། །གང་ཡིན་གཞན་ལ་འགོད་པར་བྱེད། ། ཁྭ་ཏས་མི་གཙང་ཟོས་པའི་མཆུ། །ས་གཙང་གཞན་ལ་འབད་ནས་འཕྱིད། །

བླུན་པོ་བྱ་བ་ལ་སྦྱར་ན། །དོན་ཉམས་དེ་ཡང་ཉམས་པར་འགྱུར། ། ཝ་སྐྱེས་རྒྱལ་པོར་བསྐོས་པ་ཡིས། །འཁོར་སྡུག་རང་ཡང་བསད་ཅེས་གྲགས། །

རྨོངས་པ་བདེ་བ་འདོད་བཞིན་དུ། །བྱ་བ་སྡུག་བསྔལ་འབའ་ཞིག་སྒྲུབ། ། གདོན་གྱིས་བཏབ་པའི་སྐྱེ་བོ་འགའ། །སྡུག་བསྔལ་སྤང་ཕྱིར་ལྕེབས་པ་མཐོང་། །

བློ་ངན་དྲང་པོ་ལ་ལས་རང་། །བརླག་འགྱུར་ལ་ལས་གཞན་ལ་གནོད། ། ནགས་ཀྱི་ཤིང་དྲང་རྩད་ནས་གཅོད། །མདའ་ཡི་དྲང་པོས་ཕ་རོལ་གསོད། །

རྟག་ཏུ་གཞན་དོན་མི་སེམས་པ། །དེ་ཡི་སྤྱོད་པ་ཕྱུགས་དང་མཚུངས། ། བཟའ་བཏུང་འབའ་ཞིག་དུད་འགྲོས་ཀྱང་། །བསྒྲུབ་པར་ནུས་པ་མ་ཡིན་ནམ། །

ཕན་དང་མི་ཕན་མི་དཔྱོད་ཅིང་། །བློ་དང་ཐོས་པ་མི་བསྒྲུབ་པར། ། ལྟོ་འགྲངས་འབའ་ཞིག་དོན་གཉེར་བ། །སྤུ་མེད་པ་ཡི་ཕག་པ་ཡིན། །

བླུན་པོའི་དབུས་ན་དགའ་ཞིང་བརྩེ། །མཁས་པའི་མདུན་ན་ཞུམ་ཞིང་འཛུར། ། ནོག་དང་ལྐོག་ཤལ་མེད་ན་ཡང་། །ཡ་སོ་ཅན་གྱི་བ་ལང་ཡིན། །

གང་ན་བཟའ་བཏུང་ཡོད་དེར་རྒྱུག །དགོས་པའི་བྱ་བ་བཅོལ་ཡང་འབྲོས། ། གཏམ་དང་བཞད་གད་ཤེས་ན་ཡང་། །མཇུག་མ་མེད་པའི་ཁྱི་རྒན་ཡིན། །

རྨིག་རྗེས་ཆུ་ཡིས་དགང་སླ་སྟེ། །མཛོད་ཆུང་ནོར་གྱིས་དགང་བ་སླ། ། ཞིང་ཆུང་ས་བོན་གདབ་སླ་སྟེ། །བློ་ཆུང་རིག་པ་མགུ་བ་སླ། །

དྲེགས་བཅས་བླུན་པོ་ཁས་ལེན་ཅན། །ཆེན་པོ་ཡིན་ཡང་ཉམས་པར་འགྱུར། ། གོམ་པ་གང་གི་ས་བྱིན་པས། །སྟོབས་ལྡན་གྱིས་ནི་ས་གསུམ་ཤོར། །

བློ་ཆུང་སེམས་ལ་ཁོན་འཛིན་ཅན། །གནོད་པ་བས་ཀྱང་རྣམ་འགྱུར་སྔ། ། ཁྱི་ངན་དགྲ་བོ་མཐོང་བ་ན། །རྨུགས་པའི་ཐོག་མར་ཀུ་ཅོ་འདོན། །

བླུན་པོས་བསགས་པའི་སྡུག་བསྔལ་ཉིད། །མྱོང་གི་སྤྱོད་པའི་བདེ་མི་མྱོང་། ། ཡང་ཡང་ཉུལ་ཞིང་ལྟ་བ་ཡི། །འཇུངས་པའི་ནོར་ནི་བྱི་བ་འདྲ། །

བླུན་པོའི་དྲུང་དུ་མཁས་པ་བས། །སྤྲེའུ་འཛིན་པ་ཁྱད་པར་འཕགས། ། སྤྲེལ་འཛིན་ཟས་དང་ནོར་གྱིས་མཆོད། །མཁས་པ་ལག་པ་སྟོང་པར་འགྲོ། །

ཡོན་ཏན་མེད་པའི་སྐྱེ་བོ་རྣམས། །ཡོན་ཏན་ཅན་ལ་ལྷག་པར་སྡང་། ། གངས་ཀྱི་ཡུལ་དུ་དགུན་སྐྱེས་པའི། །ལོ་ཏོག་ལྟས་ངན་ཡིན་ཞེས་སྒྲོགས། །

ཡོན་ཏན་ལོག་པར་སྦྱངས་པ་འགའ། །ལེགས་པར་སྦྱངས་པ་ཁྱད་དུ་གསོད། ། ལྦ་བ་མེད་ན་གླིང་ཕྲན་འགར། །ཡན་ལག་ཉམས་པའི་སྐྱོན་དུ་བྱེད། །

ཆོ་ག་ཉམས་པར་བྱེད་པ་རྣམས། །ཆོ་ག་ཚང་བར་བྱེད་ལ་བརྙས། ། ཙུ་ཏའི་ཡུལ་དུ་ཕྱིན་པ་ན། །རྐང་གཉིས་པ་ལ་མིར་མི་བརྩི། །

ཆོ་ག་ལོག་པར་བསྒྲུབ་པ་འགའ། །ཡང་དག་ཆོ་ག་བྱེད་ལ་གཤེ། ། སྐྱེས་བུ་ཁྱི་ཡི་མགོ་ཅན་རྣམས། །བཞིན་བཟང་བུད་མེད་ཡིན་ཞེས་བརྙས། །

ལོག་འཚོའི་ཟས་ནོར་རྙེད་པ་འགའ། །མཁས་པ་དབུལ་པོ་ཁྱད་དུ་གསོད། ། སྤྲེལ་རྒན་རྣམས་ཀྱིས་མི་བཟུང་ནས། །མཇུག་མ་མེད་ཅེས་བཞད་གད་བྱེད། །

དེས་ན་ལས་ཀྱིས་མནར་བས་ན། །མཁས་པ་བླུན་པོའི་ནང་དུ་འཁྱམས། ། རླུང་གིས་བདས་པའི་མ་ལི་ཀ །དྲི་ཞིམ་ཕྱག་བདར་ཁྲོད་ན་བརྫི། །

སྐྱོན་རྣམས་འབད་པས་འཛིན་བྱེད་ཅིང་། །ཡོན་ཏན་རྩ་ནས་མི་ཆགས་པ། ། སྐྱེས་བུ་ངན་པ་ཆུ་ཚགས་བཞིན། །ངན་པ་འཛིན་གྱི་བཟང་པོ་འཆོར། །

ལེགས་ཉེས་དཔྱོད་པའི་བློ་གྲོས་མེད། །མཁས་པའི་མདུན་སར་ཕྱིར་ཕྱོགས་སྐྲོད། ། ཟས་ནོར་ཁོ་ནའི་གཏམ་གྱིས་འདའ། །རྐང་གཉིས་པ་ཡི་ཕྱུགས་སུ་བཤད། །

བློ་ཆུང་མང་དུ་འདུས་ན་ཡང་། །བྱ་བ་ཆེན་པོ་བསྒྲུབ་མི་ནུས། ། རྩི་རྐྱང་མང་དུ་བསྡམས་ན་ཡང་། །ཁང་པའི་གདུང་མ་བཟོད་པར་དཀའ། །

མ་དཔྱད་པ་ལས་དོན་གྲུབ་པ། །བྱུང་ཡང་མཛངས་པར་སུ་ཞིག་བརྩི། ། སྲིན་བུ་དག་གིས་ཟོས་པའི་རྗེས། །ཡི་གེར་བྱུང་ཡང་ཡིག་མཁན་མིན། །

བློ་གྲོས་ཞན་པའི་འདོད་གཏམ་དང་། །ཅང་ཤེས་མིན་པའི་རྟ་མཆོག་དང་། ། གཡུལ་ངོར་ལྷུང་བའི་རལ་གྲི་རྣམས། །སུ་ཡི་གྲོགས་འགྱུར་ངེས་པ་མེད། །

ཤེས་རབ་མེད་པའི་བླུན་པོ་རྣམས། །མང་ཡང་དགྲ་ཡི་དབང་དུ་འགྲོ། ། གླང་ཆེན་སྟོབས་ལྡན་ཁྱུར་ལོངས་པ། །རི་བོང་བློ་ལྡན་གཅིག་གིས་བཏུལ། །

ཤེས་རབ་མེད་པའི་ལོངས་སྤྱོད་ཀྱང་། །ཕལ་ཆེར་རང་ལ་ཕན་པ་ཉུང་། ། འདོད་འཇོ་བ་ཡི་འོ་མ་ཡང་། །བེ་འུས་འཐུང་བ་བརྒྱ་ལམ་ཡིན། །

བླུན་པོ་རྣམས་ཀྱིས་མཁས་པ་ཡང་། །མཆོད་པར་འགྱུར་བའི་ངེས་པ་མེད། ། ཉི་མ་ཤིན་ཏུ་འོད་གསལ་ཡང་། །འབྱུང་པོའི་གདོན་རྣམས་མི་འབྲོས་སམ། །

བླུན་པོ་ལོངས་སྤྱོད་གསོག་རྣམས་ལ། །གཉེན་གྱི་བསམ་པ་ག་ལ་ཡོད། ། སྡིག་སྡུག་གཏམ་ངན་ཁོ་ན་ཡིས། །བྱི་བ་བཞིན་དུ་བསགས་ནས་འཆི། །

སྐྱེ་བོ་ངན་པའི་ཚོགས་ནང་དུ། །ཡོན་ཏན་ལྡན་ཡང་ག་ལ་འཁུར། ། སྦྲུལ་གདུག་གནས་པའི་ས་ཕྱོགས་སུ། །སྒྲོན་མེ་གསལ་ཡང་འོད་མི་འབྱིན། །

ལོངས་སྤྱོད་མོད་ཀྱང་ལས་ངན་གྱིས། །འཇུངས་པས་སྤྱོད་པའི་རང་དབང་མེད། ། རྒུན་འབྲུམ་སྨིན་པ་ཟ་བའི་ཚེ། །ཁྭ་ལ་མཆུ་ནད་རྒྱུན་དུ་འབྱུང་། །

རྒྱུན་དུ་གཞན་གྱིས་སྐྱོང་དགོས་པའི། །སྐྱེ་བོ་ནམ་ཞིག་ཅི་ནས་ཉམས། ། བྱ་རོག་གིས་ནི་བཟུང་བ་ཡི། །རུས་སྦལ་ས་ལ་ལྷུང་ཞེས་གྲགས། །

བཟང་ངན་མི་ཤེས་དྲིན་བྱས་བརྗེད། །ངོ་མཚར་གཏམ་ལ་མཚར་མི་འཛིན། ། མངོན་སུམ་མཐོང་བ་སླར་ཡང་འདྲི། །ཞུམ་ཞིང་རྗེས་འབྲང་བླུན་པོའི་རྟགས། །

དྲོད་ཆུང་ཁ་ཡིས་དགྲ་བོ་འདུལ། །རྒྱང་ནས་མཐོང་ན་ཅ་ཅོ་འབྱིན། ། འཐབ་སར་ཕྲད་ན་ཐལ་མོ་སྦྱོར། །རང་ཁྱིམ་སླེབས་ན་ང་རྒྱལ་སྨྲ། །

སྡར་མ་གྲོས་བྱེད་ཚེ་ན་དཔའ། །ཁྲལ་དགོས་པ་ན་ནོར་རྩིས་འདེབས། ། འགྲོ་དགོས་པ་ན་ནད་བུ་ལྡང་། །འཐབ་སར་རྒྱང་ནས་འབོད་ཅིང་བསྒོ། །

བློ་ཆུང་ཅུང་ཟད་རྒྱལ་བས་ངོམས། །གལ་ཏེ་ཕམ་ན་གཉེན་ལ་འཁང་། ། གྲོས་ལ་འཚོགས་ན་འཐབ་རྩོད་སློང་། །གསང་གྲོས་བྱས་ན་ལྐོག་ཏུ་སྨྲ། །

གཡུལ་ངོར་རྒྱན་ལ་བྱི་དོར་བྱེད། །དགྲ་དང་ཕྲད་ན་རང་ཕྱོགས་སྦེད། ། འགྲོགས་ན་དགྲ་བས་གཉེན་ཕྱོགས་འཇིགས། །མཚོན་ཆ་དགྲ་ཡི་ལག་ཆར་འཕེན། །

དཔུང་ཚོགས་འགྲོ་ན་མཇུག་སྡུད་ལ། །ལྡོག་ན་དེ་ཡི་སྣ་འདྲེན་བྱེད། ། བཟའ་བཏུང་མཐོང་ན་ནན་གྱིས་འཇུག །དཀའ་བ་མཐོང་ན་ཐབས་ཀྱིས་འབྱོལ། །

སྐྱེ་བོ་ངན་པའི་མཚན་ཉིད་ལ། །བརྗོད་རྒྱུ་དུ་མ་ཡོད་མོད་ཀྱང་། ། ངན་སྐྱུགས་ཁྲོན་པ་སུ་ཞིག་སློང་། །སྐྱུགས་པ་མཁས་པ་སུ་ཞིག་མྱོང་། །

མཆུ་བསྐྱོད་པ་ཡིས་བརྡ་སྤྲོད་ཅིང་། །སྨོས་པའི་ཚེ་ན་མིག་ཚུམས་བྱེད། ། རྣམ་ཐར་ཐོས་ན་འཁུན་འཆོར་བ། །གང་ལ་བྱུང་ཡང་ཐ་ཤལ་རྟགས། །

རབ་བྱེད་བཞི་པ། སྤེལ་མ་བརྟག་པ། དམན་པ་ལོངས་སྤྱོད་ཆེ་ན་ཡང་། །རིགས་ལྡན་རྒུད་པས་ཟིལ་གྱིས་གནོན། ། བཀྲེས་པ་སྟག་གི་ངར་སྒྲ་ཡིས། །སྤྲེའུ་ཤིང་གི་རྩེ་ལས་ལྷུང་། །

བླུན་པོའི་ཡོན་ཏན་ཁར་འབྱིན་ཏེ། །མཁས་པའི་ཡོན་ཏན་ཁོང་དུ་སྦེད། ། སོག་མ་ཆུ་ཡི་སྟེང་ན་འཕྱོ། །ནོར་བུ་སྟེང་དུ་བཞག་ཀྱང་འབྱིང་། །

ཡོན་ཏན་ཆུང་རྣམས་ང་རྒྱལ་ཆེ། །མཁས་པར་གྱུར་ན་དུལ་བར་གནས། ། ཆུ་ཕྲན་རྟག་ཏུ་ཀུ་ཅོ་ཆེ། །རྒྱ་མཚོ་ཅ་ཅོ་ག་ལ་སྒྲོགས། །

སྐྱེ་བོ་དམན་རྣམས་དམ་པ་ལ། །ཁྱད་གསོད་བྱེད་ཀྱིས་དམ་པས་མིན། ། སེང་གེས་ཝ་ཚོགས་ལེགས་སྐྱོང་གི། །ཝ་ཉིད་ཝ་ཡི་རིགས་ལ་འགྲན། །

དམ་པ་ཁྲོས་ཀྱང་བཏུད་ན་ཞི། །དམན་རྣམས་བཏུད་ན་ལྷག་པར་རེངས། ། གསེར་དངུལ་སྲ་ཡང་བཞུ་ནུས་ཀྱི། །ཁྱི་ལུད་བཞུས་ན་དྲི་ངན་འབྱུང་། །

མཁས་ལ་ཡོན་ཏན་ཀུན་ལྡན་ཏེ། །བླུན་པོ་ལ་སྐྱོན་འབའ་ཞིག་ཡིན། ། རིན་པོ་ཆེ་ལས་དགོས་དགུ་འབྱུང་། །སྦྲུལ་གདུག་ལས་ནི་ཉེས་ཀུན་བསྐྱེད། །

སྡིག་སྤྱོད་ནགས་ན་གནས་ཀྱང་ཉམས། །དམ་པ་གྲོང་ན་གནས་ཀྱང་དུལ། ། ནགས་ཀྱི་གཅན་གཟན་ཁྲོ་བ་དང་། །རྟ་མཆོག་གྲོང་གནས་དུལ་བར་མཐོང་། །

སྐྱེས་མཆོག་རང་གི་སྐྱོན་ལ་ལྟ། །སྐྱེ་བོ་ངན་པ་གཞན་སྐྱོན་འཚོལ། ། རྨ་བྱ་རང་གི་ལུས་ལ་རྟོག །སྲིན་བྱ་གཞན་ལ་ལྟས་ངན་གཏོང་། །

དམ་པ་དུལ་བས་རང་གཞན་སྐྱོང་། །ངན་པ་རེངས་པས་རང་གཞན་སྡུག ། འབྲས་ལྡན་ཤིང་གིས་རང་གཞན་སྲུང་། །ཤིང་སྐམ་རེངས་པས་རང་གཞན་སྲེག །

འབྱོར་པའི་དུས་ན་ཐམས་ཅད་གཉེན། །གལ་ཏེ་རྒུད་ན་ཀུན་ཀྱང་དགྲ། ། རིན་ཆེན་གླིང་དུ་རིང་ནས་འདུ། །མཚོ་བསྐམས་པ་ན་སུ་ཡང་སྤོང་། །

བླུན་པོ་འབྱོར་པ་ཐོབ་ན་བདེ། །སྐྱེས་མཆོག་ཐམས་ཅད་བྱིན་ན་བདེ། ། མཛེ་ཅན་ཕྲུགས་ན་བདེ་བར་འཛིན། །མཁས་པ་མཛེ་ལ་འཇིགས་པར་ལྟ། །

ཆེ་ལ་གནོད་བྱེད་གྲོགས་སུ་འགྱུར། །དམན་ལ་གནོད་བྱེད་གནོད་པར་འགྱུར། ། ནགས་མེ་རླུང་གིས་སྦོར་མོད་ཀྱི། །དེ་ཡིས་སྒྲོན་མེ་ཆུང་ངུ་གསོད། །

འདི་བཤེས་འདི་ནི་དགྲ་བོ་ཞེས། །བློ་གྲོས་ཆུང་རྣམས་སོ་སོར་འབྱེད། ། བློ་ཆེན་ཀུན་ལ་བྱམས་པ་ལ། །ཕན་བྱེད་གང་ཡིན་ངེས་པ་མེད། །

ཡོན་ཏན་ལྡན་པ་ཡོན་ཏན་ལ། །དགའ་ཡི་ཡོན་ཏན་མེད་རྣམས་མིན། ། སྦྲང་རྩི་འཛིན་པ་མེ་ཏོག་ལ། །དགའ་ཡི་ཤ་སྦྲང་དེ་ལྟ་མིན། །

མཁས་པ་མཁས་པའི་ནང་ན་མཛེས། །བླུན་པོས་མཁས་པ་ཇི་ལྟར་གོ། ། ཙན་དན་གསེར་བས་རིན་ཆེ་བ། །བླུན་པོས་སོལ་བར་བྱས་ལ་ལྟོས། །

མཁས་པ་རང་གིས་དཔྱོད་ཤེས་ཀྱི། །བླུན་པོ་གྲགས་པའི་རྗེས་སུ་འབྲང་། ། ཁྱི་རྒན་ཀུ་ཅོ་འདོན་པ་ན། །རྒྱུ་མཚན་མེད་པར་གཞན་དག་རྒྱུག །

མཁས་པ་ཤིན་ཏུ་རྒུད་ན་ཡང་། །ལེགས་བཤད་གཏམ་གྱིས་གཞན་དགའ་བྱེད། ། བླུན་པོ་འབྱོར་པར་གྱུར་ཚེ་ཡང་། །རྩོད་པ་ཁོ་ནས་རང་གཞན་སྲེག །

ཁ་ཅིག་སྨྲ་བས་གྲུབ་པར་བརྩི། །ལ་ལ་མི་སྨྲ་དོན་ལ་འབད། ། ཁྱི་ངན་དགྲ་ལ་ཁུས་འདེབས་ཏེ། །ཆུ་སྐྱར་བྱི་ལ་སྒྲ་མེད་འཇབ། །

དམ་པ་རྒོལ་ཡང་ཕན་པ་སྒྲུབ། །སྐྱེ་བོ་ངན་པ་མཛའ་ཡང་གནོད། ། ལྷ་རྣམས་ཁྲོ་བས་སེམས་ཅན་སྲུང་། །གཤིན་རྗེ་འཛུམ་ཡང་ཕ་རོལ་གསོད། །

སྐྱེ་བོ་དམ་པ་རིན་ཆེན་བཞིན། །རྣམ་པ་ཀུན་ཏུ་འགྱུར་ལྡོག་མེད། ། སྐྱེ་བོ་ངན་པ་སྲང་མདའ་བཞིན། །ཅུང་ཟད་ཙམ་གྱིས་མཐོ་དམའ་བྱེད། །

བློ་མཐུན་རིང་ན་གནས་ཀྱང་ཕན། །མི་མཐུན་ཉེ་ན་ལྷག་པར་འབྲལ། ། འདམ་སྐྱེས་འདམ་གྱིས་མི་གོས་ལ། །དེ་ཉིད་ཉི་མས་རྟག་ཏུ་སྐྱོང་། །

ཇི་སྲིད་ངོ་ཚ་ཡོད་གྱུར་པ། །དེ་སྲིད་ཡོན་ཏན་རྒྱན་གྱི་མཆོག ། ངོ་ཚ་བརྒལ་ན་ཡོན་ཏན་ཉིད། །ཕྱོགས་སུ་བྱས་ཏེ་གཏམ་ངན་འཕེལ། །

དམ་པ་མ་བཅོལ་ལེགས་པར་སྟོན། །དམན་ལ་དྲིས་ཀྱང་ལོག་པར་ཤོད། ། རྒྱལ་བའི་སྲས་ལ་བརྙས་ཀྱང་བརྩེ། །འཆི་བདག་མཆོད་ཀྱང་གསོད་པ་ཡིན། །

གཅིག་ལ་ཕན་པར་འགྱུར་པ་ཡི། །བྱ་བ་གཞན་ལ་གནོད་པ་སྲིད། ། ཟླ་བ་ཤར་ན་ཀུ་མུད་ཏ། །ཁ་འབྱེད་འགྱུར་གྱི་པདྨོ་ཟུམ། །

ཉེས་པ་ལ་ལས་དོན་གྲུབ་པ། །བྱུང་ཡང་མཁས་རྣམས་ག་ལ་སྨོན། ། ལེགས་པར་བསྒྲུབས་ཀྱང་སྐྱོན་སྲིད་མོད། །དེ་ལ་མཁས་རྣམས་ཁྲེལ་བ་མེད། །

རྙེད་པ་ལ་ལ་རྙེད་པ་སྟེ། །རྙེད་པ་ལ་ལ་དགྲ་བོ་ཡིན། ། རྒོད་མ་མངལ་ལྡན་ནོར་འཕེལ་བྱེད། །དྲེའུ་མོ་སྦྲུམ་ན་འཆི་བ་རྙེད། །

དམ་པ་དབྱེ་དཀའ་འདུམ་སླ་སྟེ། །དམན་པ་དབྱེ་སླ་འདུམ་པ་དཀའ། ། ལྗོན་ཤིང་དང་ནི་སོལ་བ་ཡི། །གཅད་དང་སྦྱོར་བའི་ཁྱད་པར་ལྟོས། །

ཉམ་ཆུང་གྱུར་ཀྱང་ཟོན་བྱས་ན། །ཆེན་པོ་ཡིས་ཀྱང་གཞོམ་པར་དཀའ། ། ཆེན་པོ་ཡིན་ཀྱང་བག་ཕེབས་ན། །ཉམ་ཆུང་རྣམས་ཀྱིས་བརླགས་པ་མང་། །

ནོར་གྱིས་འབྱོར་ན་སྟོབས་ཀྱང་འཕེལ། །ནོར་མེད་པ་ལ་སྟོབས་ཀྱང་འབྲི། ། བྱི་བས་དབྱིག་ལྡན་ནོར་ཕྲོགས་པས། །བརྐུ་བའི་ནུས་པ་ཉམས་ཞེས་ཐོས། །

མི་གང་བསོད་ནམས་ལ་སྤྱོད་པ། །བཏང་ཡང་ལོངས་སྤྱོད་ཆར་བཞིན་འབབ། ། བསོད་ནམས་མེད་པའི་ལོངས་སྤྱོད་དེ། །བསགས་ཀྱང་སུ་ཡིས་ཟ་བ་སོམས། །

དམ་པ་རེ་ཞིག་རྒུད་གྱུར་ཀྱང་། །ཟླ་བ་བཞིན་དུ་ཡར་ངོ་འབྱུང་། ། དམན་པ་ལན་ཅིག་རྒུད་གྱུར་ན། །མར་མེ་བཞིན་དུ་མནལ་བར་འགྱུར། །

ཤེས་ལྡན་དགྲ་ལ་མིག་བསྲིངས་པས། །ཐ་མར་དགྲ་བོ་དབང་དུ་སྡུད། ། དྲོད་ཆུང་དགྲ་ལ་ལན་བྱས་པས། །དཀའ་བ་རྒྱུན་མི་འཆད་པ་ཐོབ། །

མཁས་པས་ཤིན་ཏུ་ཉམ་ང་བའི། །གནས་ལ་འཛུར་ན་དཔའ་རྟགས་ཡིན། ། སེང་གེས་ཁྱུ་མཆོག་གསོད་པའི་ཚེ། །རྭ་ལ་འཛུར་བ་ག་ལ་སྡར། །

རྣམ་པ་ཀུན་ཏུ་མི་དཔྱོད་པར། །དགྲ་ལ་མཆོང་བ་བླུན་རྟགས་ཡིན། ། མར་མེའི་འོད་ལ་འཛིངས་པ་ཡིས། །སྦྲང་བུ་དཔའ་བར་འགྲོ་འམ་ཅི། །

ངན་པ་རང་རྟེན་ཁྱད་པར་འཇོམས། །དམ་པ་གང་ལ་བརྟེན་པ་སྲུང་། ། སྲིན་བུ་རང་རྟེན་ཟད་ཟད་ཟ། །སེང་གེ་རང་གི་ཡུལ་འཁོར་སྲུང་། །

དམན་རྣམས་དགོས་པ་ཆུང་ངུ་གསང་། །གསང་དགོས་དགོས་པ་མེད་པར་སྨྲ། ། དམ་པ་དགོས་མེད་གསང་མི་འགྱུར། །གསང་དགོས་སྲོག་ལ་བབས་ཀྱང་སྲུང་། །

དམན་པ་འབྱོར་ན་དྲེགས་རྒྱུ་སྟེ། །དམ་པ་འབྱོར་ན་དུལ་བའི་རྒྱུ། ། ཝ་སྐྱེས་འགྲངས་ན་དྲེགས་པས་བརྒྱལ། །སེང་གེ་འགྲངས་ན་བདེ་བར་ཉལ། །

དམ་པ་དང་ནི་དམན་པ་ཡི། །སྤྱོད་པ་གཉིས་ཀ་གོམས་པའི་ཤུགས། ། བུང་བ་མེ་ཏོག་འཚོལ་བ་དང་། །ངང་པ་ཆུར་འཇུག་བསླབ་ཅི་དགོས། །

རྒྱལ་ངན་དགྲ་དང་ཕྲད་པ་ན། །རང་གི་འཁོར་ལ་ཆད་པ་གཅོད། ། དོན་མ་གྲུབ་པའི་བློན་པོ་འགའ། །རང་ཉིད་འགགས་ཏེ་འཆི་བ་ཡོད། །

ཆོས་རྒྱལ་དགྲ་དང་ཕྲད་པ་ན། །ལྷག་པར་འཁོར་ལ་བྱམས་པ་སྐྱེ། ། ན་བའི་བུ་ལ་ཁྱད་པར་དུ། །མ་ནི་གདུང་བ་སྐྱེ་བར་འགྱུར། །

སྐྱེ་བོ་དམ་པ་ངན་པ་དང་། །འགྲོགས་ན་ངན་པའི་ཤན་དུ་འགྱུར། ། གངྒཱའི་ཆུ་ནི་རབ་ཞིམ་པ། །རྒྱ་མཚོར་སླེབས་ན་བ་ཚར་འགྱུར། །

དམན་པས་སྐྱེ་བོ་མཆོག་བསྟེན་ན། །སྐྱེ་བོ་དམ་པའི་སྤྱོད་པ་འབྱུང་། ། གླ་རྩི་བྱུགས་པའི་གང་ཟག་ལ། །གླ་རྩིའི་དྲི་ཞིམ་འབྱུང་ལ་ལྟོས། །

ལྷུན་པོ་ཅིས་ཀྱང་མི་འགུལ་བ། །དེ་བཞིན་བདག་ཉིད་ཆེན་པོ་བརྟན། ། ཤིང་བལ་ཆུང་ངུ་གཡོ་བ་ལྟར། །དམན་པའི་སྤྱོད་པ་འགྱུར་ལྡོག་ཆེ། །

རབ་བྱེད་ལྔ་པ། ངན་སྤྱོད་བརྟག་པ། གཡོན་ཅན་སྙན་པར་སྨྲ་བ་ནི། །རང་དོན་ཡིན་གྱི་གུས་ཕྱིར་མིན། ། སྲིན་བྱ་སྙན་ནས་དགོད་པ་ནི། །ལྟས་ངན་གཏོད་ཀྱི་དགའ་ནས་མིན། །

ངན་པས་ཐོག་མར་ཚིག་གིས་འབྲིད། །བག་ཕེབས་གྱུར་ན་ཕྱི་ནས་བསླུ། ། ཉ་པས་ཟས་ཀྱིས་ཁ་བྲིད་ནས། །ཉ་རྣམས་གསོད་པར་བྱེད་ལ་ལྟོས། །

དམན་པ་ཇི་སྲིད་ཉམ་ཆུང་བ། །དེ་ཡི་བར་ལ་རང་བཞིན་བཟང་། ། དུག་གི་ཚེར་མ་མ་སྨིན་པའི། །བར་དུ་གཞན་ལ་འབིགས་མི་ནུས། །

ཡིད་ལ་བསམ་པ་གཞན་བྱས་ནས། །ཚིག་ཏུ་སྨྲ་བ་གཞན་བྱེད་པ། ། གཡོན་ཅན་ཞེས་སུ་གྲགས་པ་སྟེ། །བླུན་པོ་མཁས་པར་འཆོས་པ་ཡིན། །

ཧ་ཅང་གཡོ་སྒྱུ་མང་དྲགས་ན། །རེ་ཞིག་གྲུབ་ཀྱང་ཐ་མར་བརླག ། གཟིག་ལྤགས་བཀབ་པའི་བོང་བུ་ཡིས། །ལོ་ཏོག་ཟོས་མཐར་གཞན་གྱིས་བསད། །

ཤེས་རབ་ལྡན་ན་མངོན་སུམ་གྱི། །རྫུན་གྱིས་ཕ་རོལ་བསླུ་བར་ནུས། ། རྐུན་པོ་རྣམས་ཀྱིས་ཁྱིར་བཏགས་པས། །ར་སྐྱེས་ཁུར་བ་བྲམ་ཟེས་བོར། །

ཉེས་པ་མངོན་སུམ་བྱེད་བཞིན་དུ། །གཡོན་ཅན་ཚིག་གིས་ཕ་རོལ་བསླུ། ། ལྷ་ཆེན་སྨྲེ་སྔགས་ཤོར་བ་ལ། །སྡུག་བསྔལ་བདེན་པ་བསྒྲགས་སོ་ལོ། །

གཡོ་ཅན་ཚུལ་གཟོབ་ངག་འཇམ་ལ། །མ་བརྟགས་བར་དུ་ཡིད་མི་བརྟན། ། རྨ་བྱ་གཟུགས་མཛེས་སྒྲ་སྙན་ཡང་། །དེ་ཡི་ཁ་ཟས་དུག་ཆེན་ཡིན། །

གཡོ་ཅན་བཟང་པོའི་ཚུལ་བཟུང་ན། །ཕྱི་ནས་དོན་ལ་བསླུ་བ་ཡོད། ། རི་དྭགས་རྔ་མ་བསྟན་ནས་ནི། །ཁྲེལ་འདས་བོང་བུའི་ཤ་དག་འཚོང་། །

ངོ་ཚ་ཆུང་རྣམས་གཞན་ནོར་ལ། །བདག་གི་ཆེ་བ་སྒྲུབ་པ་ཡོད། ། མགྲོན་ལ་གྲོགས་ཀྱི་གོས་བཏིང་ནས། །བདག་གི་གུས་རྟགས་སྟོན་པར་བྱེད། །

གཏིང་ནས་ཉམས་པའི་ཁྲེལ་འདས་རྣམས། །རང་གི་གཏམ་ངན་ངོ་སོར་འཁྱེར། ། ཀཉྩའི་ཡུལ་གྱི་རྒྱལ་རིགས་འགའ། །ཕ་བསད་པ་ལ་རྒྱལ་རྔ་རྡུང་། །

བློ་ཆུང་རྣམས་ཀྱིས་ཕན་བཏགས་པ། །འགའ་ཞིག་གནོད་པ་ཆེན་པོར་འགྱུར། ། སྐྱ་ཀའི་ཕྲུ་གུས་མ་ཡི་སྤུ། །འཐོག་པ་དྲིན་ལན་ཡིན་པར་སྒོམ། །

གཞུང་ངན་གཞན་གྱི་བཀའ་དྲིན་ལས། །བྱུང་བ་རང་གི་ཆེ་བར་སྒོམ། ། ཀླུ་ཡིས་འབད་ནས་ཕབ་པའི་ཆར། །ཞིང་པ་རང་གི་དཔལ་དུ་རྩི། །

བློ་ངན་ལས་ལ་སྤྱོད་པ་ལ། །རང་གི་འབད་པས་ཐོབ་པར་སེམས། ། ཁྱི་རྒན་ཡ་རྐན་ཕུག་པའི་ཁྲག །རུས་པའི་བཅུད་དུ་བསྒོམས་ནས་འཆའ། །

མི་མཁས་པ་དག་གཉེན་བཅོམ་ནས། །འབྲེལ་མེད་གཞན་དག་གསོ་བར་མཐོང་། ། མགོ་བོ་བཅད་ནས་མཇུག་མའི་རྒྱན། །སྨྱོན་པ་མིན་པ་སུ་ཞིག་བྱེད། །

བླུན་པོས་དགོས་པའི་སར་མི་བྱིན། །མི་དགོས་པ་ལ་ལྷུག་པར་འཆོར། ། ཆུ་མིག་ངན་པ་དབྱར་འབབ་ཀྱི། །དཔྱིད་དུས་དགོས་པའི་ཚེ་ན་སྐམ། །

སྐྱེ་བོ་དམ་པ་ཞི་བ་ལ། །ངན་པ་ལྷག་པར་འཚེ་བར་བྱེད། ། སྣུམ་དང་ལྡན་པའི་སྡོང་བུ་ལ། །མེ་ལྕེ་ཆགས་ཀྱི་གཞན་ལ་མིན། །

རྩུབ་པས་རྩུབ་པ་ཐུལ་འགྱུར་གྱི། །ཞི་བས་འདུལ་བར་ག་ལ་ནུས། ། ཕོལ་མིག་བསྲེགས་དང་བཅད་པས་འདོན། །ཞི་ཆོས་དེ་ཡི་དུག་ཏུ་འགྱུར། །

རྒྱལ་པོས་ཆོས་བཞིན་ས་བསྐྱང་སྟེ། །མིན་ན་རྒྱལ་པོ་ཉམས་པའི་རྟགས། ། ཉི་མས་མུན་པ་མི་སེལ་ན། །དེ་ནི་གཟའ་ཡིས་ཟིན་པའི་རྟགས། །

སྡིག་སྤྱོད་རྗེ་བོར་བསྐོས་པ་དང་། །ཁང་པའི་ཡང་ཐོག་གྲུམ་པ་དང་། ། རི་རྩེ་ཤིན་ཏུ་ཞིག་པ་ཡི། །འོག་ན་གནས་རྣམས་རྒྱུན་དུ་སྐྲག །

གལ་ཏེ་རིག་པ་ཡོད་ན་ཡང་། །སྐྱེ་བོ་རང་བཞིན་ངན་པ་སྤང་། ། དུག་སྦྲུལ་ནོར་བུས་མགོ་བརྒྱན་ཡང་། །མཁས་པ་སུ་ཞིག་པང་དུ་ལེན། །

བསྙེན་དྲགས་རྒྱལ་པོ་བཞེད་བཞིན་དཀའ། །བཀྱེད་ན་ཐུགས་ཀྱིས་འཛིན་པ་དཀོན། ། བར་མར་གནས་པ་གཡང་ཟ་བས། །རྒྱལ་པོ་ལ་ལ་མེ་ཆེན་འདྲ། །

ཆུང་མ་ངན་དང་མཛའ་བོ་ངན། །རྒྱལ་པོ་ངན་པ་སུ་ཞིག་བསྟེན། ། གཅན་གཟན་གདུག་པའི་ནགས་ཁྲོད་དུ། །སེམས་ཤེས་རྟག་ཏུ་སྡོད་དམ་ཅི། །

དྲེགས་པས་ཡོན་ཏན་ཉམས་འགྱུར་ཞིང་། །འདོད་པས་ངོ་ཚ་ཉམས་པར་བྱེད། ། གཡོག་འཁོར་རྟག་ཏུ་སུན་ཕྱུང་ན། །རྗེ་དཔོན་ཉམས་པར་འགྱུར་བ་ཡིན། །

ཕན་པར་སྨྲ་བ་དཀོན་པ་སྟེ། །དེ་དག་བས་ཀྱང་ཉན་པ་དཀོན། ། སྨན་པ་མཁས་པ་རྙེད་དཀའ་སྟེ། །དེ་ཡི་ཚིག་བཞིན་བྱེད་པ་ཉུང་། །

ཧ་ཅང་རློམ་པ་ཆེས་དྲགས་ན། །སྡུག་བསྔལ་བརྒྱུད་མར་ཐོག་ཏུ་བབ། ། སེང་གེ་ང་རྒྱལ་ཆེས་པའི་རྒྱུས། །ཝ་ཡིས་ཁུར་པོ་བསྐུར་ཞེས་ཐོས། །

བྱ་རོག་དག་གིས་བསྐུངས་པ་དང་། །གཞུང་ངན་པ་ལ་ཕན་བཏགས་དང་། ། ཞིང་ངན་ས་བོན་བཏབ་པ་རྣམས། །རེ་བ་མང་སྟེ་སྤྱོད་པ་ཉུང་། །

མ་བརྟགས་པར་ནི་སུ་ལ་ཡང་། །ཡིད་ཆེས་པ་དང་བསྒོ་མི་བྱ། ། བག་ཕབ་པ་ལས་སྐྱོན་བྱུང་དང་། །གྲོས་བཏབ་པ་ལས་དགྲར་གྱུར་མང་། །

འཇིག་རྟེན་ངན་པ་མང་ཡོད་ཀྱང་། །སྐྱེ་བོ་ངན་འདྲའི་འཇིགས་པ་མེད། ། ངན་པ་གཞན་དག་བཅོས་རུང་གི། །སྐྱེ་བོ་ངན་པ་བཅོས་ན་འཇིག །

སྐྱེ་བོ་ངན་པ་ཡོན་ཏན་བརྒྱས། །ཕན་པར་བྱས་ཀྱང་མགུ་མི་ནུས། ། གང་ཞིག་བརྟེན་པ་དགྲར་འགྱུར་འདི། །སྐྱེ་བོ་ངན་པའི་ཁྱད་ཆོས་ཡིན། །

ངན་པ་ཇི་ལྟར་བཅོས་གྱུར་ཀྱང་། །རང་བཞིན་བཟང་པོ་འབྱུང་མི་སྲིད། ། སོལ་བ་འབད་དེ་བཀྲུས་ན་ཡང་། །ཁ་དོག་དཀར་བ་མི་སྲིད་དོ། །

སྐྱེ་བོ་ངན་པས་སུན་ཕྱུང་བའི། །ས་དེར་དམ་པ་མཐོང་ཡང་སྤོང་། ། སྦྲུལ་གྱིས་གཙེས་པའི་ས་ཕྱོགས་སུ། །གསེར་གྱི་ཉག་ཐག་མཐོང་ཡང་འབྲོས། །

མཆོད་པ་དམ་པ་ལ་བྱ་ཡི། །དམན་པ་མཆོད་ན་ཉེས་པའི་གཞི། ། འོ་མ་སྐྱེས་བུའི་བདུད་རྩི་སྟེ། །སྦྲུལ་ལ་བྱིན་ན་དུག་འཕེལ་ལོ། །

འབད་དེ་ཀུན་ནས་བསྟན་བྱས་ཀྱང་། །ངན་པ་བློ་དང་ག་ལ་འདྲེས། ། མཆིལ་པ་ཇི་ལྟར་གསོས་གྱུར་ཀྱང་། །བག་ཕེབས་འགྱུར་བ་མི་སྲིད་དོ། །

རྟག་ཏུ་འབྱེད་ལ་བརྩོན་པའི་མིས། །མཛའ་བོ་བརྟན་པོའང་ཕྱེད་འགྱུར་ཏེ། ། ཆུ་ཡིས་རྟག་ཏུ་བཅོས་གྱུར་ན། །བྲག་ལ་སེར་ག་མི་འབྱུང་ངམ། །

བདག་གིས་བསླུས་དང་ངན་བྱས་དང་། །མཁན་སློབ་གྲོགས་ཀྱི་སྐྱོན་བརྗོད་པ། ། རྫུན་ན་རྫུན་པས་ཡིད་བརྟན་མེད། །བདེན་ན་ལྷག་པར་འཇིགས་པ་སྐྱེ། །

མི་གང་བརྗོད་བྱ་མ་ཡིན་པ། །གཞན་གྱི་དྲུང་དུ་སུས་བརྗོད་པ། ། བདེན་ནམ་འོན་ཏེ་རྫུན་ཡང་རུང་། །མཁས་པས་དེ་ལ་བག་ཟོན་བྱ། །

གཞུང་ངན་ནོར་ལ་གཅེས་འཛིན་པ། །མཛའ་བཤེས་ཡིན་ཡང་ཡིད་མི་བརྟན། ། ཆེན་པོ་རྣམས་ལ་གསུག་ཟོས་ནས། །གཉེན་གྱིས་བརླགས་པར་བྱས་པ་མང་། །

གནོད་པའི་མཚན་མ་ཁར་འབྱིན་པའི། །དགྲ་བོ་དེ་དག་གཞོམ་པར་སླ། ། ཕན་པའི་བཟློག་རྟགས་ཁར་འབྱིན་པའི། །དགྲ་བོ་དེ་དག་ཇི་ལྟར་གཞོམ། །

རྨ་གཞན་མཁས་ན་འཚོ་སྲིད་ཀྱི། །ཉེས་པའི་ཚིག་རྨ་འདྲུབ་པ་མེད། ། ཁྭ་ཡིས་འུག་པ་རྨ་ཕབ་པས། །བསྐལ་པའི་བར་དུ་འགྲས་ལ་ལྟོས། །

སྙིང་ལ་ཁོན་དུ་དམ་བཟུང་ནས། །ཁ་ལ་ཚིག་བཟང་སྨྲའོ་ཞེས། ། དྲང་སྲོང་གདུག་པའི་གདམས་ངག་སྟེ། །དམ་པའི་ཚུལ་དང་འགལ་བ་ཡིན། །

དུག་གི་རྩ་བ་འདོན་པ་ལྟར། །དགྲ་བོ་རྩད་ནས་གཅོད་དོ་ཞེས། ། རྒྱལ་པོའི་ལུགས་ལས་འབྱུང་མོད་ཀྱི། །བུ་བཞིན་བསྐྱངས་ན་བུ་བཞིན་བྱེད། །

རང་དོན་འབའ་ཞིག་བསྒྲུབ་པ་ཡི། །མི་དང་འགྲོགས་པར་སུ་ཡིས་ནུས། ། སོ་ནམ་བརྩོན་པའི་ཞིང་གསེབ་ཏུ། །ལྡུམ་གཞན་སྨིན་པའི་གོ་སྐབས་དཀའ། །

མི་གང་བྱས་པ་མི་གཟོ་བ། །དེ་ལ་གྲོགས་བྱེད་ག་ལ་སྲིད། ། འབད་ཀྱང་འབྲས་བུ་མི་སྨིན་པའི། །ཞིང་ལ་སོ་ནམ་སུ་ཡིས་ནུས། །

གཟུ་ལུམ་དག་གིས་སྤྱོད་པ་ཡིས། །སྐྱེ་བོ་མྱུར་དུ་རྒུད་པར་འགྱུར། ། སྤྱི་བརྟོལ་ཅན་གྱི་གླང་རྒོད་ཀྱིས། །གཅད་བྱ་མྱུར་དུ་མི་གཅོད་དམ། །

དམན་ལ་ཇི་ལྟར་ཕར་བྱིན་ཡང་། །ཚུར་ལ་དགོས་ན་ག་ལ་སྟེར། ། སྐམ་པས་རྟག་ཏུ་བཟུང་ན་ཡང་། །ལྕགས་གོང་ཚུར་ལ་འཛིན་ནམ་ཅི། །

ངན་པས་གཞན་དོན་སྒྲུབ་བོ་ཞེས། །སྙད་བཏགས་ནས་ནི་སྡིག་ལ་སྦྱོར། ། གཞན་དོན་ལྟར་སྣང་སྒྲུབ་དོན་དུ། །མཁས་པ་སུ་ཞིག་རང་ཉིད་འཇོམས། །

བུ་ལོན་ལྷག་མ་དགྲ་བོའི་ཐེད། །ཁྲིམས་ངན་རྣམས་དང་གཏམ་ངན་དང་། ། རིགས་རྒྱུད་ངན་དང་སྤྱོད་ངན་རྣམས། །མ་སྤེལ་བར་ཡང་རང་ཉིད་འཕེལ། །

རབ་བྱེད་དྲུག་པ། རང་བཞིན་གྱི་ཚུལ་བརྟག་པ། བདག་ཉིད་དཔོན་དུ་བསྐོས་གྱུར་ན། །དེ་ཡི་བྱ་བ་ཤེས་པ་དཀོན། ། གཞན་ལ་ལྟ་བའི་མིག་ཡོད་ཀྱང་། །རང་ཉིད་བལྟ་ན་མེ་ལོང་དགོས། །

ཤེས་རབ་ཕྱོགས་གཅིག་ལྡན་པས་ཀྱང་། །བྱ་བ་ཀུན་ལ་མཁས་པ་དཀའ། ། ཤིན་ཏུ་གསལ་བའི་མིག་གིས་ཀྱང་། །སྒྲ་ལ་ཉན་པར་ནུས་མ་ཡིན། །

དྲང་པོར་སྨྲ་བ་སྐྱོན་བཅས་དང་། །འཁྱོག་སྨྲ་ཡོན་ཏན་ལྡན་པ་སྲིད། ། ལམ་དྲང་འགའ་ཞིག་ནོར་འཇིགས་ལ། །དུང་དཀར་གཡས་འཁྱིལ་བཀྲ་ཤིས་བྱེད། །

བསོད་ནམས་མེད་ན་ཡོན་ཏན་འགའ། །ཡོན་ཏན་ཉིད་ཀྱིས་རང་ཉིད་འཇོམས། ། མུ་ཏིག་འཛིན་པའི་ཉ་ཕྱིས་རྣམས། །མུ་ཏིག་ཉིད་ཀྱིས་སྲོག་དང་འབྲལ། །

ཡོན་ཏན་ལྡན་ཡང་བསྟེན་དྲགས་ན། །ཕལ་ཆེར་སྐྱོ་བ་སྐྱེ་བ་སྲིད། ། བུར་ཤིང་ཤིན་ཏུ་ཞིམ་པ་ཡང་། །རྒྱུན་དུ་བསྟེན་ན་ཕལ་ཆེར་འདོར། །

རང་བཞིན་བཟང་པོ་རྣམས་ལ་ཡང་། །རྒྱུན་དུ་གཙེས་ན་གནོད་སེམས་སྐྱེ། ། ཙན་དན་བསིལ་བ་ཡིན་མོད་ཀྱི། །གཙུབ་པར་གྱུར་ན་འབར་བར་འགྱུར། །

རྒྱལ་པོ་ཤིན་ཏུ་མང་མོད་ཀྱི། །ཆོས་བཞིན་སྐྱོང་བ་ཤིན་ཏུ་ཉུང་། ། མཁའ་ལ་ལྷག་གནས་མང་ན་ཡང་། །འོད་གསལ་ཉི་ཟླ་ལྟ་བུ་མེད། །

གང་ཞིག་གནོད་པ་བྱེད་ནུས་པ། །དེ་ཡི་ཕན་པ་བྱེད་པར་ནུས། ། མགོ་བོ་གཅོད་པར་ནུས་པ་ཡི། །རྒྱལ་པོས་རྒྱལ་སྲིད་སྦྱིན་པར་ནུས། །

བློན་པོ་བློ་ལྡན་དྲང་པོ་ཡིས། །རྗེ་དང་འབངས་ཀྱི་དོན་ཀུན་གྲུབ། ། མདའ་དྲང་མཁས་པས་འཕངས་གྱུར་ན། །གང་ལ་གཏད་པར་འཕོག་པ་ཡིན། །

རྒྱལ་པོ་ཉིད་ཀྱིས་མ་བརྩིས་ན། །ཐམས་ཅད་ཤེས་པའང་བཀུར་མི་འགྱུར། ། སྲོག་གི་དབང་པོས་མ་བཟུང་བའི། །མི་རོ་བཟང་ཡང་སུ་ཞིག་ལེན། །

མང་པོ་གཅིག་ཏུ་བློ་མཐུན་ན། །ཉམ་ཆུང་གིས་ཀྱང་དོན་ཆེན་འགྲུབ། ། སྲོག་ཆགས་གྲོག་མའི་ཚོགས་འདུས་པས། །སེང་གེའི་ཕྲུ་གུ་བསད་ཅེས་གྲགས། །

ཞུམ་བཅས་སྩོལ་བ་དོར་བའི་མི། །མཐུ་སྟོབས་ལྡན་ཡང་རྒུད་པར་འགྱུར། ། གླང་པོ་ཤིན་ཏུ་སྟོབས་ལྡན་ཡང་། །གླང་རྫི་ཆུང་ངུས་བྲན་བཞིན་འཁོལ། །

ང་རྒྱལ་རྩོལ་བ་ཆེར་བསྐྱེད་ན། །ཆེན་པོ་རྣམས་ཀྱང་ཟིལ་གྱིས་གནོན། ། དུང་དཀར་ཤིན་ཏུ་ལུས་ཆུང་ཡང་། །ཆུ་སྲིན་ཆེན་པོའི་གཤེད་མ་ཡིན། །

ཆེན་པོས་ང་རྒྱལ་བྱ་མི་དགོས། །ངན་པས་ང་རྒྱལ་བྱས་ཅི་ཕན། ། རིན་ཆེན་ཚིག་གིས་སྒྲོགས་མི་དགོས། །མཆིང་བུ་བསྒྲགས་ཀྱང་སུ་ཞིག་ཉོ། །

བདག་ཉིད་ཆེན་པོའི་འབྱོར་པ་རྟག །སྐྱེས་ངན་ཕུན་ཚོགས་རྒུད་ལ་ཉེ། ། ཉི་མ་རྒྱུན་དུ་འོད་འབྱིན་ཏེ། །ཟླ་བ་ཉ་བར་གྱུར་ནས་འབྲི། །

རྒྱལ་པོས་གོ་འཕང་བསྟོད་དྲགས་ན། །དེ་ཡི་ཐ་མ་བརླག་པའི་རྒྱུ། ། སྒོ་ང་མཁའ་ལ་འཕངས་གྱུར་ན། །ཆག་པ་ཉིད་ལས་གཞན་ཅི་འབྱུང་། །

སྐྱེ་བོ་ཕལ་ཆེར་རང་ཉིད་དང་། །མཐུན་པའི་རིགས་ཀྱིས་གནོད་པ་སྐྱེལ། ། ཉི་མའི་འོད་ཟེར་ཤར་བ་ན། །འོད་ཟེར་གཞན་རྣམས་བརླག་པར་འགྱུར། །

ཕན་བྱེད་དགྲ་བོ་ཡིན་ཡང་བསྟེན། །གཉེན་ཡང་གནོད་ན་སྤང་བར་བྱ། ། རྒྱ་མཚོའི་ནོར་བུ་རིན་གྱིས་ཉོ། །ཁོང་པའི་ཟུག་རྔུ་སྨན་གྱིས་འབྱིན། །

ནང་དུ་ཅུང་ཟད་འབྱོར་གྱུར་ན། །ཕྱི་རུ་དྲེགས་པའི་རྣམ་འགྱུར་སྟོན། ། ཆུ་ཡིས་ཡོངས་སུ་གང་བའི་ཚེ། །སྤྲིན་རྣམས་གཡོ་ཞིང་འབྲུག་སྒྲ་སྒྲོགས། །

ཡོན་ཏན་ཀུན་ལྡན་དཀོན་པ་ལྟར། །ཡོན་ཏན་ཅི་ཡང་མེད་པའང་དཀོན། ། སྐྱོན་དང་ཡོན་ཏན་འདྲེས་པ་ལས། །ཡོན་ཏན་གཙོ་ཆེ་མཁས་པས་བསྟེན། །

དང་པོ་ཉིད་ནས་དགྲ་བོ་དང་། །མཛའ་བོ་ཉིད་དུ་ངེས་པ་མེད། ། ཁ་ཟས་མ་ཞུ་དུག་ཏུ་འགྱུར། །དུག་ཀྱང་ཤེས་ན་སྨན་དུ་འགྱུར། །

གང་ན་ལས་མཐུན་ཡོད་དེ་འབྱོར། །ལས་ཀྱི་འདུ་འཕྲོ་མེད་དེ་རྒུད། ། ཁྱིམ་དུ་བཟུང་ཡང་མི་ཆགས་པའི། །ངང་པ་མཚོ་ལས་བསྐྲད་ཀྱང་འཁོར། །

མཁས་རྣམས་རིག་པ་ཡོན་གྱིས་སློབ། །བླུན་པོ་རིག་པ་བསླབས་ཀྱང་སྤོང་། ། ཕལ་ཆེར་ན་ལ་སྨན་ཟ་ཡང་། །ལ་ལ་གསོན་པོར་ལྕེབ་པ་ཡོད། །

རང་དབང་ཐམས་ཅད་བདེ་བ་སྟེ། །གཞན་དབང་ཐམས་ཅད་སྡུག་བསྔལ་ཡིན། ། ཐུན་མོང་བ་ནི་རྩོད་གཞི་སྟེ། །དམ་བཅས་པ་ནི་འཆིང་བའི་རྒྱུ། །

ནང་ན་ཡོན་ཏན་ཀུན་ལྡན་ཡང་། །ཆ་ལུགས་ངན་ན་ཀུན་གྱིས་བརྙས། ། པགས་བྱེའུ་མཁས་ཀྱང་སྤུ་མེད་པས། །འདབ་ཆགས་ཀུན་གྱིས་སྤང་ཞེས་གྲགས། །

གནས་མིན་ཧ་ཅང་དྲང་པོ་ཡང་། །རང་གཞན་གཉིས་ཀ་བརླག་པ་ཡོད། ། མདའ་ཡིས་ཕ་རོལ་གསོད་པའམ། །ཡང་ན་རང་ཉིད་འཆག་པར་འགྱུར། །

ཆར་དང་ཆུ་བོ་རྒྱ་མཚོར་འབབ། །བློ་དང་རིག་པ་མཁས་ལ་འགོ། ། ནོར་དང་སྐྱེ་བོ་རྒྱལ་པོས་སྡུད། །དྲོ་ཞིང་བརླན་པར་ནགས་ཚལ་སྐྱེ། །

དབྱར་གྱི་ཆུ་མིག་རྩྭ་ཡི་མེ། །སྤྲིན་པར་ཉི་མ་ཟླ་བ་ཉ། ། བློ་ངན་རིག་པ་ངན་དང་མཛའ། །དགོས་ཚེ་འབྱུང་བའི་ངེས་པ་མེད། །

བླུན་པོ་སྨྲ་བ་ཉུང་ན་མཛེས། །རྒྱལ་པོ་ལྐོག་ཏུ་འདུག་ན་མཛེས། ། སྒྱུ་མ་བརྒྱ་ལམ་མཐོང་ན་མཛེས། །ནོར་ཆེན་དཀོན་ན་རིན་ཐང་ཆེ། །

ཧ་ཅང་བྱམས་པ་ཆེ་དྲགས་ན། །དེ་ཉིད་འཁོན་པའི་རྒྱུ་རུ་འགྱུར། ། འཇིག་རྟེན་རྩོད་པ་ཕལ་ཆེ་བ། །འབྲེལ་བ་ཉིད་ལས་བྱུང་བ་མང་། །

ཤིན་ཏུ་རྩོད་པ་ཆེན་པོ་ཡང་། །ལྷག་པར་མཛའ་བའི་རྒྱུ་སྲིད་དེ། ། རྩོད་པ་བྱུང་བའི་མཐའ་ཕལ་ཆེར། །འདུམ་པར་གྱུར་པ་མང་བར་མཐོང་། །

སེར་སྣ་ཅན་གྱི་ནོར་རྣམས་དང་། །ཕྲག་དོག་ཅན་གྱི་གྲོགས་པོ་དང་། ། བློ་ངན་གྱི་ནི་རིག་པ་རྣམས། །ཡོད་ཀྱང་དགའ་བ་བསྐྱེད་མི་ནུས། །

བརྐམ་ཆགས་ཅན་ནི་ནོར་གྱིས་དགའ། །ང་རྒྱལ་ཅན་ནི་བསྟོད་པས་མགུ། ། བླུན་པོ་རང་དང་མཐུན་པས་དགའ། །དམ་པ་བདེན་པ་སྨྲ་བས་མགུ། །

སྐྱེ་བོ་ངན་པའི་ཡོན་ཏན་དང་། །སྨྲ་སྤོབས་ཞན་པའི་རིག་པ་དང་། ། རྗེ་དཔོན་ངན་པའི་བཀའ་དྲིན་རྣམས། །གཞན་ལ་ཕན་པའི་གོ་སྐབས་དཀའ། །

གང་ལ་ནོར་ཡོད་སྨྲ་བ་མཛེས། །ནོར་མེད་སྨྲ་བ་བདེན་ཡང་སྤོང་། ། མ་ལ་ཡ་ལས་བྱུང་གྱུར་ན། །སྡོང་དུམ་ཕལ་ལའང་རིན་ཐང་ཆེ། །

སྨྲ་མང་ཉེས་པ་འཛིན་པའི་རྒྱུ། །མི་སྨྲ་ཉེས་པ་སྤོང་བའི་གཞི། ། ནེ་ཙོ་སྨྲ་བས་གཟེབ་ཏུ་བཅུག །འདབ་ཆགས་ལྐུགས་པ་བདེ་བར་རྒྱུ། །

མི་གང་དགྲ་ལ་གཡོ་མེད་པས། །རྣམ་པ་ཀུན་ཏུ་ཕན་བཏགས་ན། ། དགྲ་ཡང་དེ་ལ་གཡོ་མེད་པས། །འདུད་པ་དངོས་པོའི་ཆེ་བ་ཡིན། །

སྟོབས་བྲལ་མི་ཡིས་ཁྲོས་ཅི་ཕན། །སྟོབས་ལྡན་དོན་ལ་ཁྲོ་ཅི་དགོས། ། དེས་ན་བྱ་བ་སྒྲུབ་པ་ལ། །ཁྲོ་བ་དོན་མེད་རང་སྲེག་ཡིན། །

སྦྱིན་པས་བསྡུས་ན་དགྲ་ཡང་འདུ། །སྦྱིན་མེད་གཉེན་ཡང་རིང་དུ་སྤོང་། ། བ་ཡི་འོ་མ་ཟད་པ་ན། །བེའུ་བཟུང་ཡང་འཆོར་བར་འགྱུར། །

བྱ་བ་འགའ་ལ་མཁས་པ་ཡིས། །གཞན་དག་ཤེས་པའི་ངེས་པ་མེད། ། ཆུ་ལས་འོ་མ་འབྱེད་ཤེས་པའི། །ངང་པས་གཟུགས་བརྙན་ཟས་སུ་སྒོམ། །

རྟག་ཏུ་བྱམས་པས་སྐྱོང་བ་ཡི། །རྗེ་བོས་བྲན་གཡོག་རྙེད་པར་སླ། ། པདྨའི་མཚོ་ལ་ངང་པ་དག །མ་བསྡུས་པར་ཡང་ངང་གིས་འདུ། །

ལོངས་སྤྱོད་ལྡན་པས་སྤྱོད་པ་དང་། །མཁས་པར་གྱུར་ནས་དུལ་བ་དང་། ། ཆེན་པོས་དམན་པ་ལེགས་སྐྱོང་བ། །གསུམ་པོ་གཞན་བདེ་རང་ལ་ཕན། །

བསོད་ནམས་ཤུགས་ཀྱིས་དོན་བསྒྲུབ་པ། །ཉི་མའི་འོད་བཞིན་ལྟོས་པ་མེད། ། འབད་པའི་ཤུགས་ཀྱིས་དོན་བསྒྲུབ་པ། །མར་མེའི་འོད་བཞིན་ཀུན་ལ་ལྟོས། །

ཆེན་པོ་རྣམས་ལ་རྟེན་བཅས་ན། །དམན་པ་རྣམས་ཀྱང་ཆེན་པོ་ཐོབ། ། ལྗོན་ཤིང་ཆེ་ལ་བརྟེན་པ་ཡིས། །འཁྲི་ཤིང་རྩེ་མོར་ཕྱིན་ལ་ལྟོས། །

ཡོན་ཏན་ལྡན་ལ་སྐྱོན་ཡོད་ཀྱང་། །ཡོན་ཏན་དགའ་རྣམས་ཉེ་བར་བསྟེན། ། ཆར་གྱིས་མཁར་ལ་གནོད་ན་ཡང་། །འཇིག་རྟེན་པ་རྣམས་དགའ་བ་སྐྱེ། །

ཡོན་ཏན་མེད་ན་ཆ་ལུགས་ཀྱིས། །མཁས་རྣམས་དགའ་བ་བསྐྱེད་མི་ནུས། ། རྟ་མཆོག་འགྲོས་དང་མི་ལྡན་ན། །ཤིན་ཏུ་བརླིང་ཡང་རིན་ཐང་ཆུང་། །

ནོར་ལྡན་བླུན་པོའི་ནང་ན་མང་། །དཔའ་བོ་གཅན་གཟན་ཁྲོད་ན་མོད། ། ལེགས་བཤད་མཁས་པའི་ཁྲོད་འབྱིན་པ། །དམ་པ་འཇིག་རྟེན་འདི་ན་དཀོན། །

གང་དང་གང་ལ་དེ་ཡོད་པ། །དེ་ཡིས་དེ་ཡི་གྲགས་པ་ཐོབ། ། མཁས་པའི་གྲགས་པ་མཁས་པ་དང་། །དཔའ་བོས་དཔའ་བོ་ཐོས་པ་བཞིན། །

ཆེན་པོ་རྣམས་ཀྱི་མཆོད་བྱ་བ། །དམན་པ་རྣམས་ཀྱིས་བརྙས་པར་འགྱུར། ། དབང་ཕྱུག་ཆེན་པོའི་སྤྱི་བོའི་རྒྱན། །ཟླ་བ་ལྷ་མིན་ཟས་སུ་བྱེད། །

རིག་པ་གླེགས་བམ་ལ་གནས་དང་། །མ་བསྒྲུབས་པ་ཡི་གསང་སྔགས་དང་། ། བརྗེད་ངས་ཅན་གྱིས་བསླབ་པ་རྣམས། །དགོས་པའི་ཚེ་ན་སླུ་བ་མང་། །

བློ་ལྡན་ནོར་གྱིས་འབྱོར་ན་ཡང་། །ལེ་ལོ་ཅན་ལ་མཐོན་པོ་དཀའ། ། རྣ་བ་ཐོག་མར་སྐྱེས་ན་ཡང་། །རྭ་རྩེ་མཐོ་བ་མ་མཐོང་ངམ། །

ཁྱི་ཕག་རྣམས་ལ་དྲི་ཞིམ་དང་། །དམུས་ལོང་བ་ལ་སྒྲོན་མེ་དང་། ། མ་ཞུ་བ་ལ་ཁ་ཟས་དང་། །བླུན་པོ་རྣམས་ལ་ཆོས་ཅི་དགོས། །

ཡོན་ཏན་ཅན་དང་གསེར་བཟང་པོ། །གཡུལ་ངོར་དཔའ་དང་རྟ་བཟང་པོ། ། སྨན་པ་མཁས་དང་རྒྱན་བཟང་པོ། །གང་དུ་ཕྱིན་པ་དེ་རུ་བྲིན། །

བློ་དང་བརྩོན་འགྲུས་ཡོད་གྱུར་པ། །དེ་ཡིས་སྒྲུབ་པར་མི་ནུས་གང་། ། དགྲ་ངན་དཔུང་ཚོགས་བཅུ་གཉིས་པོ། །སྐྱ་སེང་བུ་ཡིས་བཅོམ་ཞེས་ཐོས། །

ཕལ་ཆེར་བུ་ཚའི་སྤྱོད་པ་ནི། །རིགས་རྒྱུད་སྔ་མའི་རྗེས་སུ་འབྲང་། ། ཁུ་བྱུག་ཕྲུ་གུ་བྱེའུ་ཁྲ་རུ། །འགྲོ་བ་བརྒྱ་ལམ་སྲིད་པ་ཙམ། །

རི་དང་ཆུ་བོ་གླང་པོ་རྟ། །ཤིང་དང་འོད་ཟེར་ནོར་བུ་རྡོ། ། སྐྱེས་པ་བུད་མེད་རིགས་གཅིག་ཀྱང་། །མཆོག་དང་དམན་པའི་ཁྱད་པར་ཡོད། །

བསོད་ནམས་ལྡན་པའི་ཚིག་ཙམ་ཡང་། །ཉམ་ཆུང་རྣམས་ཀྱིས་བཟོད་པར་དཀའ། ། གོ་ཌའི་རྒྱལ་པོའི་ཚིག་ཙམ་གྱིས། །རྒྱ་མཚོའི་རྒྱལ་པོ་བཅིངས་ཞེས་གྲགས། །

བྱ་བ་འབད་ནས་ཀུན་བསྒྲུབས་ཀྱང་། །འགྲུབ་པ་བསོད་ནམས་ཤུགས་ལ་རག ། ཚོང་པས་རྒྱ་མཚོར་མ་རྙེད་པའི། །ནོར་བུ་རྒྱལ་པོའི་མཛོད་ན་སྤྱོད། །

བླུན་པོའི་བྱམས་སྡང་རྟགས་ཀྱིས་གོ། །སྒྲིན་པོའི་བྱམས་སྡང་ལོག་པར་སྟོན། ། ཁྱི་རྒན་འཛུམ་ན་རྨུག་རྟགས་ཏེ། །གཤིན་རྗེ་འཛུམ་ན་གསོད་པའི་རྟགས། །

ནོར་གྱི་མཆོག་ནི་སྦྱིན་པ་སྟེ། །བདེ་བའི་མཆོག་ནི་སེམས་བསྐྱེད་པ། ། རྒྱན་གྱི་མཆོག་ནི་ཐོས་པ་སྟེ། །གྲོགས་པོའི་མཆོག་ནི་མི་བསླུ་བའོ། །

ནོར་གྱིས་མ་གདུང་སུ་ཞིག་ཡོད། །རྟག་ཏུ་བདེ་བར་བསྡད་པ་སུ། ། བདེ་དང་སྡུག་བསྔལ་ཐམས་ཅད་ཀྱང་། །དབྱར་དགུན་བཞིན་དུ་བརྗེ་བར་འགྱུར། །

ཉམ་ཆུང་རྣམས་ཀྱིས་ཆེན་པོའི་མིང་། །བཟུང་བ་ཙམ་ལ་གཞན་གྱིས་བསྲུང་། ། སོར་མོའི་ཕྲེང་བའི་མིང་བཟུང་ན། །ལོག་འདྲེན་ཕལ་གྱིས་བསྲུང་བར་བཤད། །

སེམས་ཅན་གང་དང་གང་འབྲེལ་བ། །བྱ་བ་སྔོན་གྱི་ལས་ཀྱིས་བྱེད། ། བྱ་རྒོད་འཕྱི་བ་ཁུར་བ་དང་། །སྲམ་གྱིས་འུག་པ་མཆོད་ལ་ལྟོས། །

ལོངས་སྤྱོད་གསོག་པར་འདོད་རྣམས་ཀྱིས། །འཕེལ་ན་གཏོང་བ་བསྲུང་བའི་མཆོག ། ཆུ་ཆེན་རྫིང་དུ་ལྡུགས་འདོད་ན། །འབྲིད་པ་བཞག་པ་རྫིང་གི་གསོས། །

རབ་བྱེད་བདུན་པ། མི་རིགས་པའི་ཚུལ་དཔྱད་པ། བྲན་གཡོག་ང་རྒྱལ་ཆེ་བ་དང་། །དཀའ་ཐུབ་ལྡན་པ་ཆས་གཟོབ་དང་། ། རྒྱལ་པོ་ཆོས་བཞིན་མི་སྤྱོད་པ། །གསུམ་པོ་ཚུལ་མིན་ཞུགས་པ་ཡིན། །

མི་ལྕོགས་བྱ་བ་རྩོམ་པ་དང་། །མང་དང་འཁོན་ཞིང་སྟོབས་ལྡན་རྩོད། ། བུད་མེད་ཡིད་རྟོན་ངན་དང་མཛའ། །ལྔ་པོ་མྱུར་དུ་བརླག་པའི་རྒྱུ། །

ནོར་མེད་ཟས་གོས་མཆོག་འདོད་དང་། །གཞན་ལ་སློང་ཞིང་ང་རྒྱལ་ཆེ། ། བསྟན་བཅོས་མི་ཤེས་རྩོད་པར་འདོད། །གསུམ་པོ་འགྲོ་བའི་བཞད་གད་ས། །

ཡུལ་བཟང་ཡོད་བཞིན་ཡུལ་ངན་ལ། །སྐྱེ་བོ་ངན་པ་ཕོངས་ཤིང་ཆགས། ། ཀིང་ཤུའི་མེ་ཏོག་ཤ་ཡིན་ཞེས། །ཤེ་སྤྱང་ལས་གཞན་སུ་ཞིག་རེ། །

ཆེན་པོ་རྣམས་ལ་དགྲ་བས་ཀྱང་། །རང་གི་འཁོར་གྱིས་གནོད་པ་མང་། ། སེང་གེ་ལུས་ཀྱི་འབུ་མིན་པ། །སྲོག་ཆགས་གཞན་གྱིས་ག་ལ་ཟ། །

རྗེ་བོས་བདག་ལ་གནོད་བྱེད་ན། །དེ་ལ་སྐྱོབ་པར་བྱེད་པ་སུ། ། སྣང་བས་གཟུགས་ལ་སྒྲིབ་བྱེད་ན། །དེ་ལ་ལྟ་བའི་ཐབས་གཞན་མེད། །

ཆོས་སྤྱོད་ཞི་བར་གནས་པ་ལ། །འཚེ་བྱེད་ཤིན་ཏུ་ཐ་ཤལ་ཡིན། ། རང་ལ་སྐྱབས་འོངས་བསད་པ་ལ། །དཔའ་བོ་ཡིན་ཞེས་སུ་ཞིག་སྒྲོགས། །

སྐྱེ་ངན་རང་ལ་མི་ཕན་ཡང་། །གཞན་ལ་གནོད་པར་བྱེད་པ་ཡོད། ། སྦྲུལ་གདུག་ཟས་སུ་རླུང་ཟ་ཡང་། །ཕ་རོལ་མཐོང་ན་མི་གསོད་དམ། །

འདོད་པ་བདེའོ་སྙམ་སེམས་ཀྱང་། །དེ་སྤྱོད་སྡུག་བསྔལ་ཁོ་ནའི་རྒྱུ། ། ཆང་འཐུང་བདེའོ་སྙམ་པ་དེ། །སྨྱོ་བ་བདེ་བར་བསྒོམ་པ་ཡིན། །

ཡོན་ཏན་ཅན་ལ་འཇིག་རྟེན་གུས། །ཡོན་ཏན་འབད་པའི་ཤུགས་ལ་གནས། ། འབད་ནས་ཡོན་ཏན་མི་བསྒྲུབ་པར། །གཞན་ལ་འཁངས་པས་ཅི་ཞིག་ཕན། །

མི་རྣམས་ཚེ་རིང་བ་ལ་སྨོན། །རྒས་པར་གྱུར་ལ་འཇིགས་པར་ལྟ། ། རྒས་ལ་འཇིགས་ཤིང་ཚེ་རིང་བར། །འདོད་པ་བླུན་པོའི་ལོག་ལྟ་ཡིན། །

གང་ཞིག་མཁས་པ་ཡོད་བཞིན་དུ། །དེ་ལས་ཡོན་ཏན་མི་ལེན་ན། ། མི་དེ་གདོན་གྱིས་བཏབ་པ་འམ། །ཡང་ན་ལས་གྱིས་མནར་བ་ཡིན། །

གང་ལ་ལོངས་སྤྱོད་ཡོད་བཞིན་དུ། །སྤྱོད་དམ་སྦྱིན་པར་མི་བྱེད་ན། ། མི་དེ་ནད་ཀྱིས་བཏབ་པ་འམ། །ཡང་ན་ཡི་དྭགས་མངོན་སུམ་ཡིན། །

ཆོས་ལུགས་ཤེས་ཀྱང་མི་སྒྲུབ་ན། །དེ་ཡི་ཆོས་ཀྱིས་ཅི་ཞིག་བྱ། ། ལོ་ཏོག་ཕུན་སུམ་ཚོགས་ན་ཡང་། །གཅན་གཟན་དགའ་བ་ག་ལ་སྐྱེ། །

ལས་ཀྱིས་མནར་བའི་སེམས་ཅན་ལ། །ལོངས་སྤྱོད་ཡོད་ཀྱང་སྤྱོད་མི་ནུས། ། བྱ་རོག་ལྟོགས་ཀྱང་བསྐུངས་མོད་ཀྱི། །འགྲངས་པར་ཟ་བ་ག་ལ་ནུས། །

སྤྱོད་དམ་སྦྱིན་པར་མི་ནུས་པའི། །ནོར་དེས་ཕྱུག་པོར་བསྒོམ་ན་ནི། ། རི་བོ་གསེར་དུ་བསྒོམས་པ་ཡིས། །ཕྱུག་པོ་བསྒྲུབ་པ་ཤིན་ཏུ་སླ། །

ཆོས་དང་ཆོས་མིན་སྨྲ་བ་ལ། །མཁས་པ་ཤིན་ཏུ་མང་ན་ཡང་། ། དེ་ལྟར་ཤེས་ནས་ཉམས་ལེན་པ། །འཇིག་རྟེན་འདི་ན་ཤིན་ཏུ་དཀོན། །

རིགས་གཟུགས་ལང་ཚོ་ལྡན་ན་ཡང་། །ཡོན་ཏན་མེད་ན་མཛེས་མ་ཡིན། ། རྨ་བྱ་སྤུ་སྡུག་ཡིད་འོང་ཡང་། །ཆེན་པོའི་རྒྱན་དུ་འོས་སམ་ཅི། །

སྣ་ཡི་ཚབ་དང་ཉོས་པའི་བུ། །གཡར་པོའི་རྒྱན་དང་བརྐུས་པའི་ནོར། ། སློབ་དཔོན་མེད་པའི་རིག་པ་རྣམས། །ཡོད་ཀྱང་གཞན་གྱིས་བརྩི་བ་མེད། །

མི་གང་བྱས་པ་མི་གཟོ་བ། །དེ་ནི་གཞན་པས་རང་ལ་གནོད། ། ལྟས་ངན་སྒྲུབ་པ་ཉེས་པ་འགའ། །དགྲ་ཡི་ཐོག་མར་རང་ལ་འབྱུང་། །

ལོངས་སྤྱོད་འགྲུབ་པར་མཐོང་ན་ཡང་། །གནས་མ་ཡིན་ལས་སུ་ཞིག་ལེན། ། ལུག་ཐུག་འཐབ་པའི་ཁྲག་བལྡགས་པས། །ཝ་སྐྱེས་མགོ་བོ་བཀས་ཞེས་ཐོས། །

འབྲེལ་བ་འགའ་ཡི་ངོར་བྱས་ནས། །གཞན་ལ་སྟེས་ཀྱིས་དོར་མི་བྱ། ། བརྒྱ་བྱིན་ཡིན་ཡང་འཁོར་འདབས་རྣམས། །ག་བུར་བཞིན་དུ་འབྲོས་པར་འགྱུར། །

རྒྱུན་དུ་འགྲོགས་པའི་གྲོགས་སྤངས་ནས། །གསར་བུ་འགའ་ལ་ཡིད་མི་བརྟན། ། འུག་པའི་རྒྱལ་པོས་བྱ་རོག་གི། །བློན་པོ་བསྟེན་པས་ཕུང་ཞེས་གྲགས། །

མི་ངན་འབད་པས་བསྟེན་བྱས་ཀྱང་། །རང་གི་མི་རུ་འགྲོ་བ་མེད། ། ཆུ་ནི་ཇི་ལྟར་བསྐོལ་གྱུར་ཀྱང་། །མེ་རུ་འབར་བ་མི་སྲིད་དོ། །

རྒྱུ་མཚན་བརྟགས་ནས་ཁྲོ་བ་ནི། །ཅུང་ཟད་རིགས་ཤིང་སེལ་བའང་ཤེས། ། རྒྱུ་མེད་པར་ནི་གང་ཁྲོ་བ། །དེ་ཡི་བསལ་ཐབས་སུ་ཡིས་ཤེས། །

དགྲ་བོའི་ནུས་པ་མ་བརྟགས་པར། །ཉམ་ཆུང་ན་ཡང་བརྙས་མི་བྱ། ། ཏ་ཌི་བྷ་ལ་བརྙས་པ་ཡིས། །ནམ་མཁའ་ལྡིང་གིས་རྒྱ་མཚོ་བཅོམ། །

བསོད་ནམས་འཛད་ན་ངན་སེམས་སྐྱེ། །རིགས་འཛད་པ་ན་བུ་ངན་སྐྱེ། ། ནོར་འཛད་པ་ན་བརྐམ་ཆགས་སྐྱེ། །ཚེ་འཛད་པ་ན་འཆི་ལྟས་འབྱུང་། །

རང་གིས་ངན་སྤྱོད་མ་བྱས་ན། །བརྒྱ་བྱིན་གྱིས་ཀྱང་སྨད་མི་ནུས། ། ཆུ་མིག་རང་ཉིད་མ་བསྐམས་ན། །ས་ཡིས་མནན་པས་ག་ལ་ཐུབ། །

བྱ་བ་མི་འདྲ་བརྒྱ་ཕྲག་རྩོམ། །མཐར་ཕྱིན་བྱ་བ་གཅིག་ཀྱང་མེད། ། བློ་རྒོད་ཕལ་ཆེར་གྲོང་བར་གྱི། །ཁྱི་རྒན་འདྲ་བར་རྒྱུན་དུ་འཁྱམས། །

ལས་ཀྱི་ཤུགས་ཀྱིས་ཁྲིད་པ་ན། །བློ་ཆེན་ལོག་པའི་ལམ་ནས་འགྲོ། ། མུ་སྟེགས་བྱེད་པའི་སྟོན་པ་མཆོག །དབང་ཕྱུག་སྨྱོན་པའི་བརྟུལ་ཞུགས་འཛིན། །

མི་གང་ཁྲིམས་ལས་གང་འདའ་བ། །རེ་ཞིག་རྒྱལ་ཡང་ཕམ་པ་ཡིན། ། ཆུ་སྐྱར་ཁྲིམས་ལས་འདས་པ་ཡིས། །ས་ཀུན་ཐོབ་ཀྱང་སེང་གེས་བསད། །

ཧ་ཅང་ཤེས་རབ་ཆེ་དྲགས་པའི། །བྱ་བ་མང་ན་བདག་ཉིད་བརླག ། རྒྱལ་པོ་དྲན་རྒྱ་ཆེ་བ་ཡིས། །རྒྱལ་སྲིད་ཉམས་པ་ཤིན་ཏུ་མང་། །

ཧ་ཅང་ལོངས་སྤྱོད་བསགས་དྲགས་པའི། །ནོར་ནི་རང་གི་གཤེད་མ་ཡིན། ། ཕུང་ཁྲོལ་ཕལ་ཆེར་ཕྱུག་པོ་ལ། །འབྱུང་གི་སྤྲང་པོ་བདེ་བར་རྒྱུ། །

ཧ་ཅང་མཐུ་རྩལ་ཆེ་དྲགས་ན། །ལྕེབ་པའི་སྟ་གོན་བྱེད་པ་ཡིན། ། གཡུལ་དུ་བསད་པ་ཕལ་མོ་ཆེ། །མཐུ་རྩལ་ཅན་ལ་བྱུང་བ་མང་། །

འབྱོར་དང་ཤེས་རབ་སྟོབས་ལ་སོགས། །བསོད་ནམས་ལྡན་ལ་གྲོགས་སུ་འགྱུར། ། བསོད་ནམས་མེད་ན་དེ་དག་ཀུན། །བདག་ཉིད་བརླག་པའི་རྒྱུ་རུ་འགྱུར། །

མཁས་པས་བྱ་བ་ཅི་བྱེད་ཀྱང་། །རང་གི་བསོད་ནམས་བརྟགས་ཏེ་བྱ། ། རྩོད་དུས་བསོད་ནམས་ཕུན་ཚོགས་པ། །སྐྱེ་བོ་བརྒྱ་ཡི་ནང་ནའང་དཀོན། །

རྫིང་ངན་ཆུ་ཡིས་ཁེངས་པ་ན། །ཕྱོགས་གཅིག་ཅི་ནས་འཇིག་པ་ལྟར། ། གང་ལ་ནོར་དང་ལྡན་གྱུར་པ། །དེ་ལ་རིགས་རྒྱུད་ཤིན་ཏུ་དཀོན། །

བུ་དང་ལྡན་ལ་ནོར་ཆེན་དཀོན། །དེ་དང་ལྡན་ན་དགྲ་བོས་འཇོམས། ། ཐམས་ཅད་ཕུན་སུམ་ཚོགས་གྱུར་ན། །མི་དེ་མྱུར་དུ་འཆི་བ་མང་། །

དེས་ན་མཁས་པས་བསོད་ནམས་གསོག །བསོད་ནམས་ཁོ་ན་ཕུན་ཚོགས་རྒྱུ། ། སུ་ཞིག་གང་ན་ཕུན་ཚོགས་པ། །དེ་ནི་བསོད་ནམས་བསགས་པའི་རྟགས། །

རྫུན་གྱིས་ཕ་རོལ་བསླུས་སོ་ཞེས། །སྙམ་ན་རང་ཉིད་བསླུས་པ་ཡིན། ། ལན་ཅིག་རྫུན་དུ་སྨྲ་བ་དེས། །བདེན་པ་སྨྲས་ཀྱང་དོགས་པ་སྐྱེ། །

ལེགས་ཉེས་རྣམ་པར་མི་དཔྱོད་པར། །ཁྲོས་ཤིང་ཕ་རོལ་གནད་འབེབས་པ། ། ཆུང་མ་བསད་པའི་ཐི་བ་ལྟར། །གྲོགས་དང་བྲལ་བའི་མྱ་ངན་ཐོབ། །

མ་འོངས་པ་ལ་མི་དཔྱོད་པར། །བྱུང་བའི་ཚེ་ན་འབད་དེ་བཙལ། ། ཆུ་དང་ཕྲད་ན་ལྷམ་ཕུད་ཀྱི། །མ་ཕྲད་པ་ན་ག་ལ་ཕུད། །

ཕུགས་སུ་བསྒྲུབ་པར་མི་ནུས་པའི། །བྱ་བ་ལེགས་ཀྱང་འཇུག་མི་རུང་། ། ཁོང་པའི་ནང་དུ་མི་འཇུ་བའི། །ཁ་ཟས་ཞིམ་ཡང་སུ་ཞིག་ཟ། །

རྩོལ་བ་དོར་ནས་འདུག་པ་ལ། །འདི་ཕྱི་གཉིས་ཀ་འགྲུབ་མི་འགྱུར། ། འབད་པ་མེད་ན་ཞིང་བཟང་ཡང་། །ལོ་ཏོག་ཐོབ་པར་མི་འགྱུར་རོ། །

གནས་མ་ཡིན་པའི་དུལ་དྲགས་ན། །ཐམས་ཅད་ཀྱིས་ནི་བཀོལ་བར་འགྱུར། ། ཤིང་བལ་སྟན་དུ་བྱེད་མོད་ཀྱི། །ཡལ་ག་སུ་ཞིག་སྟན་དུ་འདིངས། །

བྱ་བ་ངན་དང་མི་འགྲུབ་པ། །ཕ་རོལ་བསྒོ་ཡང་བྱེད་ན་བླུན། ། སྦྱར་དུག་ཉོ་ལ་སུ་ཡིད་རྟོན། །ཐམས་ཅད་སྦྱིན་ཞེས་སུས་སྨྲ་ནུས། །

ནོར་རྣམས་གསོག་ཅིང་མི་སྤྱོད་པ། །རང་བསྲེག་བུད་ཤིང་གསོག་པ་ཡིན། ། བུང་བ་སྦྲང་རྩི་མི་ཟ་བ། །གཞན་གྱིས་ཁྱེར་ན་ལྕེབ་པར་རྩོམ། །

རབ་བྱེད་བརྒྱད་པ། བྱ་བ་བརྟག་པ། བློ་ལྡན་བྱ་བ་ཅུང་ཟད་ཀྱང་། །རྒྱུན་དུ་གྲོས་ཀྱིས་བསྒྲུབ་པར་བྱ། ། གྲུབ་པར་གྱུར་ན་ལྟ་ཅི་སྨོས། །མ་གྲུབ་ན་ཡང་མཛེས་པའི་རྒྱུ། །

སེམས་ཅན་མོས་པ་སྣ་ཆོགས་པས། །ཐམས་ཅད་མགུ་བ་སུས་ཀྱང་དཀའ། ། རང་ཉིད་ཡོན་ཏན་ལྡན་བྱས་ན། །ཐམས་ཅད་དགའ་བ་དེ་ལ་ཉེ། །

ཤིན་ཏུ་རྒས་པར་གྱུར་ཚེ་ཡང་། །ཐོས་པ་མང་དུ་གསག་པར་བྱ། ། ཕྱི་མར་ཐོས་པས་ཕན་པ་ཙམ། །སྦྱིན་པ་ཡིས་ཀྱང་ག་ལ་ཕན། །

ཡོན་ཏན་ཀུན་རྫོགས་སྐྱེ་བོ་བསྟེན། །ཡང་ན་ཐ་མལ་འགྲོགས་པ་བདེ། ། བུམ་པ་ཆུ་ཡིས་གང་བ་འམ། །ཡང་ན་སྟོང་པར་ཁུར་བ་སླ། །

ཡོན་ཏན་ཅུང་ཟད་བསླབས་པའི་མི། །སུ་ཞིག་གིས་ནི་བསྟེན་པར་ནུས། ། ཆུས་ཕྱེད་གང་བའི་བུམ་པ་དེ། །མགོ་ལ་འཁུར་བ་སུ་ཡིས་ནུས། །

མི་གང་སྐྱེ་བོ་དམ་པ་དང་། །དམན་པའི་ཁྱད་པར་ལེགས་ཤེས་ནས། ། དེ་ཡི་བྱ་བ་བསྒྲུབ་ཤེས་པ། །ཕུན་སུམ་ཚོགས་པའི་གཞི་ཆེན་ཡིན། །

བློ་གྲོས་ལྡན་པས་ལེགས་བསྐྱངས་ན། །སྐྱེ་བོ་དམན་པའང་མཆོག་ཏུ་འགྱུར། ། སློབ་ཤེས་དག་གིས་ནེ་ཙོ་ལ། །བསླབས་ན་འདོན་པ་ཤེས་པར་འགྱུར། །

ཉམས་སྟོབས་ཆུང་བའི་སྐྱེ་བོས་ཀྱང་། །ཆེན་པོ་གཞན་ལ་བསྟེན་ན་འགྲུབ། ། ཆུ་ཡི་ཐིགས་པ་ཉམ་ཆུང་ཡང་། །མཚོ་དང་འདྲེས་ན་སྐེམ་མི་ནུས། །

རང་ལ་བློ་གྲོས་མི་ལྡན་ན། །བློ་ཆེན་གཞན་ལ་ལེགས་པར་འདྲི། ། ལག་པས་དགྲ་བོ་མི་གསོད་ན། །མཚོན་ཆ་ལེན་པར་མི་བྱེད་དམ། །

གནོད་པར་བྱེད་པའི་དགྲ་བོ་ཡང་། །ཐབས་དང་ལྡན་ན་གྲོགས་སུ་འགྱུར། ། དུག་ཆེན་ལུས་ལ་གནོད་མོད་ཀྱི། །སྦྱོར་བ་ཤེས་ན་སྨན་དུ་འགྱུར། །

རིགས་པས་རྙེད་པའི་ཟས་ནོར་བླང་། །མི་འོས་གཞན་ལ་རློམ་སེམས་སྤང་། ། ཤིང་ཏོག་ཤིང་རྩེ་ལས་བླང་གི། །དེ་ལས་ཐལ་ན་ས་ལ་ལྷུང་། །

མཁས་པས་སྒྲིམ་པར་མི་བྱེད་པ། །དེ་ཡི་བར་ལ་ཉེས་པ་འབྱུང་། ། བློ་དང་ལྡན་པས་རབ་བསྒྲིམས་ན། །ཉེས་པ་འབྱུང་བའི་གོ་སྐབས་དཀའ། །

ཇི་སྲིད་རང་སྟོབས་མ་རྫོགས་པར། །དེ་ཡི་བར་དུ་དགྲ་རྣམས་བཀུར། ། ནུས་པ་རྫོགས་ནས་གང་རིགས་པ། །བྱ་ཞེས་བསྟན་བཅོས་གཞན་དག་སྨྲ། །

དགྲ་བོ་སྙན་པར་སྨྲ་ན་ཡང་། །བློ་དང་ལྡན་པས་ཡིད་མི་བརྟན། ། ཆུ་སྐྱར་བྱི་ལ་དེས་པ་ཡིས། །ཕ་རོལ་གསོད་ལ་རྟག་ཏུ་བརྩོན། །

ཡུལ་གྱི་བདག་པོར་ཞེ་སྡང་ཡང་། །དེ་ལ་དགའ་བས་བསྟེན་ཏེ་བསྡད། ། ས་ལ་རྐང་པ་འདྲེད་གྱུར་ན། །ས་ཉིད་ལ་ནི་བརྟེན་པ་བཞིན། །

ཧ་ཅང་འདོད་ལ་བརྐམ་པ་ཡིས། །སྐྱེ་བོ་མྱུར་དུ་བརླག་པར་འགྱུར། ། མཆིལ་པའི་ཤ་ལ་ཆགས་པ་ཡིས། །ཉ་རྣམས་དེ་མ་ཐག་ཏུ་གསོད། །

མཆོད་འོས་པ་དང་འཁོར་རྣམས་ཀྱང་། །རྟག་ཏུ་སྦྱིན་པས་བསྡུ་བར་བྱ། ། མཆོད་གཏོར་ལ་ནི་ལྷ་རྣམས་དང་། །ཡི་དྭགས་བར་དུ་མགུ་བས་བསྲུང་། །

ཆེན་པོ་རྣམས་ཀྱིས་རྩེད་མོ་དང་། །བདེ་དང་ཟས་ལ་ཆགས་པ་སྤང་། ། འདོད་ལ་ཆགས་པའི་ལེ་ལན་གྱིས། །འབོད་གྲོགས་ལང་ཀར་བསད་ཅེས་གྲགས། །

བྱམས་རྩོད་གཉིས་ཀ་ཆེན་པོ་དང་། །བྱ་ཡི་དམན་དང་ནམ་ཡང་མིན། ། ཉོ་ཚོང་རིན་ཆེན་ལ་བྱ་ཡི། །སྦྱར་དུག་ལ་ནི་དེ་ལྟར་མིན། །

དཔྱ་བ་མང་ཕྱིན་རྒྱལ་པོའི་མཛོད། །ཧ་ཅང་མི་བསྡུ་ཉུང་ངུས་ཁེངས། ། གྲོག་མཁར་སྦྲང་རྩི་ཡར་ངོ་ཡི། །ཟླ་བ་ཉུང་ངུ་ཉུང་ངུས་གང་། །

རྗེ་བོས་འབངས་ལ་མི་གནོད་པར། །རིགས་པའི་ལམ་གྱི་དཔྱ་རྣམས་བསྡུ། ། ས་ལའི་ཤིང་ལས་སྤོས་ཀྱི་བཅུད། །གཟགས་པ་མང་ན་བསྐམ་པར་འགྱུར། །

རྗེ་བོ་ལྷག་པར་དེས་པ་དགོས། །རྒྱུ་མཚན་ཆུང་ངུས་ཁྲོ་མི་རུང་། ། སྦྲུལ་ལ་ནོར་བུ་ཡོད་ན་ཡང་། །སེམས་ཤེས་སུ་ཞིག་དྲུང་དུ་སྡོད། །

གང་ཞིག་ནོར་འདོད་སྐྱེ་བོས་ཀྱང་། །ཆོས་ཉིད་གཙོ་བོར་བསྲུང་བར་བྱ། ། ཆོས་ལས་ཉམས་པའི་ནོར་ཙམ་ནི། །འཇིག་རྟེན་འདིར་ཡང་ག་ལ་རྟག །

ཧ་ཅང་བྱམས་ཐལ་གཉེན་ལའང་མིན། །ཤིན་ཏུ་གནོད་ཆེ་དགྲ་ལའང་མིན། ། གཉེན་ལ་རེ་བ་འཁོན་གཞི་སྟེ། །གནོད་ལན་ཀུན་གྱིས་བསྒྲུབ་པར་སླ། །

འཇམ་པོས་འཇམ་པོ་འཇོམས་བྱེད་ཅིང་། །འཇམ་པོས་རྩུབ་པོའང་འཇོམས་པར་བྱེད། ། འཇམ་པོས་ཀུན་འགྲུབ་དེ་ཡི་ཕྱིར། །འཇམ་ཉིད་རྣོ་ཞེས་མཁས་རྣམས་སྨྲ། །

སུ་ལའང་བདག་གི་དགྲ་ཡིན་པ། །འགའ་ཡང་བདག་ལ་མི་བྱསས་ཞེས། ། མི་བྱམས་ན་ཡང་དེ་མི་བསྒྲག །བསྒྲགས་ན་དེ་ཉིད་འབྱེད་པའི་སེལ། །

ངོ་ཚ་ཁྲེལ་ལ་མི་ལྟ་ཞིང་། །མཆོད་དང་བརྙས་པའི་ཁྱད་མི་ཤེས། ། ཟས་དང་ནོར་ལ་ཆགས་ལྡན་པ། །དེ་འདྲའི་གནས་སུ་བསྡད་མི་བྱ། །

ཡུལ་གཞན་ལེགས་པར་མ་བརྟགས་པར། །སྔ་མའི་གནས་ནི་འདོར་མི་བྱ། ། རྐང་པ་ཡ་གཅིག་མ་བཙུགས་པར། །གཉིས་ཀ་བཏེགས་ན་འགྱེལ་བའི་རྒྱུ། །

རང་སྤྱོད་འབད་པས་སྦ་བར་བྱ། །ཕལ་ཆེར་གསལ་བར་བསྟན་པས་ཉམས། ། སྤྲེ་འུ་ཟློས་གར་མི་བྱེད་ན། །མགུལ་དུ་ཐག་པ་ཅི་སྟེ་འདོགས། །

ཉེས་པ་མངོན་སུམ་མཐོང་ན་ཡང་། །གནས་མ་ཡིན་ལ་སྨྲ་མི་བྱ། ། ལྟས་ངན་མཐོང་ན་སྨྲ་བ་པོའི། །ཐོག་ཏུ་འབྱུང་ཞེས་འཇིག་རྟེན་སྒྲོགས། །

གཞན་ལ་བརྙས་པར་འགྱུར་བ་ཡི། །ནོར་དང་ཟས་ཀྱིས་ཅི་ཞིག་བྱ། ། ཁྱི་ཕག་མི་གཙང་ཟ་བ་ལ། །མཁས་པ་སུ་ཞིག་ཡིད་སྨོན་བྱེད། །

ཕ་རོལ་གནད་དུ་འབེབས་པའི་ཚིག །དགྲ་བོ་ལ་ཡང་སྨྲ་མི་བྱ། ། བྲག་ཆ་བཞིན་དུ་རང་ཉིད་ལ། །དེ་མ་ཐག་ཏུ་ལེ་ལན་འབྱུང་། །

གལ་ཏེ་དགྲ་ལ་གནོད་འདོད་ན། །རང་ཉིད་ཡོན་ཏན་ལྡན་པར་བྱ། ། དེ་ཡིས་དགྲ་ཡང་སེམས་སྲེག་ཅིང་། །རང་ཡང་བསོད་ནམས་འཕེལ་བར་འགྱུར། །

མི་བསྲུན་འགྲོ་ལ་བྱམས་སེམས་བསྐྱེད། །རྩུབ་སྤྱོད་ཁོ་ནས་གདུལ་བར་བྱ། ། རང་གི་ལུས་ལ་ཕན་འདོད་རྣམས། །གཏར་དཔྱད་ཀྱིས་ནི་ནད་རྣམས་འདོན། །

གནོད་པར་བྱེད་པ་ཆུང་ངུ་ཡང་། །མྱུར་དུ་བསལ་ལ་འདུམ་པར་བྱ། ། ཡུར་བ་ཆུང་ངུའི་རྗེས་ཞུགས་ནས། །འོད་པ་ཆེན་པོ་མ་མཐོང་ངམ། །

མཁས་པས་བྱ་བ་མ་ཡིན་པའི། །བྱ་བ་ཤེས་ཀྱང་མི་བྱའོ། ། གླང་པོས་དགྲ་སྡེ་བཅོམ་པ་ཡིས། །རྒྱུན་དུ་རྒྱལ་པོས་བཅིངས་ལ་ལྟོས། །

རང་ཕྱོགས་སྡང་ཡང་སྤང་མི་བྱ། །དགྲ་བོ་བྱམས་ཀྱང་འཁུ་མི་བྱ། ། བྱ་རོག་བྱ་རོག་གིས་འཚེ་ཡང་། །ཉིན་མོ་ལོང་བ་བསྟེན་ན་ཕུང་། །

བྱ་བ་ཆེ་ཆུང་གང་བྱེད་ཀྱང་། །མཁས་པས་རྟག་ཏུ་བསྒྲིམས་ཏེ་བྱ། ། སེང་གེས་རི་བོང་གླང་ཆེན་གཉིས། །གསོད་པའི་ཚེ་ན་སྒྲིམ་ལྷོད་མེད། །

ཡོན་ཏན་ལྡན་པ་མི་བཀུར་བའི། །གནས་དེར་མཁས་པ་སུ་ཞིག་སྡོད། ། ཆུ་ཤེལ་མེ་རྡོར་བྱེད་པ་ཡི། །ཡུལ་དེར་ཆུ་ཤེལ་འཚོང་ངམ་ཅི། །

མཁས་པས་གཞན་ལ་བཤད་པ་འམ། །ཡང་ན་ཞི་བའི་ནགས་སུ་བསྒྲུབ། ། ནོར་བུ་སྤྱི་གཙུག་རྒྱན་བྱེད་དམ། །མིན་ན་རྒྱ་མཚོའི་གླིང་ལ་གནས། །

བདག་བས་མཐོ་བའི་དམ་པ་ལ། །བསྙེན་ན་བདག་ལ་ཕན་པ་སྒྲུབ། ། ལྷུན་པོའི་ངོས་ལ་གནས་པ་ཡི། །བྱ་རྣམས་གསེར་དུ་སྣང་བར་འགྱུར། །

ཆེན་པོ་ཕྲག་དོག་ལྡན་པ་ལ། །བརྟེན་ན་ཆེན་པོ་ཐོབ་མི་འགྱུར། ། ཉི་མའི་འོད་ལ་ཉེ་བ་ཡིས། །ཟླ་བ་མར་ངོར་གྱུར་ལ་ལྟོས། །

མི་གང་མཛའ་བ་མི་བརྟན་པ། །དེ་དང་འགྲོགས་པར་སུ་ཞིག་འཐམ། ། ནམ་མཁའི་འཇའ་ཚོན་མདོག་མཛེས་ཀྱང་། །རྒྱན་དུ་རེ་ན་བླུན་པོ་འཁྲུལ། །

བདག་ཉིད་གང་ལ་མི་དགའ་བ། །གཞན་ལ་ཀུན་ཏུ་དེ་མི་བྱ། ། གཞན་གྱིས་ཅུང་ཟད་གཙེས་པའི་ཚེ། །རང་ལ་བསམ་པ་ཅི་འབྱུང་སོམས། །

གང་ཞིག་བདག་ཉིད་གང་དགའ་བ། །དེ་ཉིད་གཞན་ལ་སྦྱར་བྱས་ན། ། གཞན་གྱིས་བདག་ལ་གང་དགའ་བ། །དེ་ཡི་ཚུལ་གྱིས་མཆོད་པར་གྱུར། །

དམུ་རྒོད་རྣམས་དང་མཛའ་བ་དང་། །རྩོད་པ་གཉིས་ཀ་མཁས་པས་སྤང་། ། འགྲས་པ་དང་ནི་འདྲིས་པའི་ཚུལ། །གཉིས་ཀ་བཏེག་ལ་བྱར་མི་རུང་། །

དམ་པ་དག་ལ་བརྟེན་པ་དང་། །མཁས་པ་བདག་ལ་འདྲི་བ་དང་། ། གཞུང་བཟང་པ་དང་འགྲོགས་པ་ནི། །སུ་ལ་ཡོད་པ་རྒྱུན་དུ་བདེ། །

དུས་སུ་མ་བབ་པ་ཡི་གཏམ། །གང་སྨྲས་དེ་ལ་ཀུན་གྱིས་བརྙས། ། མང་པོ་སྨྲ་བའི་གཏམ་ཚིག་ལས། །སྨྱོན་པར་རྗེས་སུ་མི་དཔོག་གམ། །

ཉམ་ཆུང་རྣམས་ཀྱིས་རང་ཉིད་ཀྱི། །སྨྲ་བ་ཐམས་ཅད་འཁྲུལ་བར་བསམ། ། དེ་ལྟར་གོ་ནས་མི་སྨྲ་བའི། །མི་ལ་གཞན་གྱིས་བཀུར་བ་ཉེ། །

ཡུལ་དང་དུས་ལ་བབ་པའི་ཚེ། །རབ་ཏུ་བསྒྲིམས་ཏེ་ལན་འགའ་སྨྲ། ། ལེགས་བཤད་ཡིན་ཡང་མངས་གྱུར་ན། །ཚོང་ཟོང་ལྷག་བཞིན་བྲིན་མི་འགྱུར། །

རང་སྐྱོན་མཁས་པ་རྣམས་ཀྱིས་ཀྱང་། །སྐྱོན་དུ་གོ་བ་ཤིན་ཏུ་དཀའ། ། མང་པོས་བདག་ལ་དེ་སྒྲོགས་ན། །སྐྱོན་ཅན་ཡིན་པར་རྗེས་སུ་དཔོག །

གོ་ཡང་སྐྱོན་དེ་མི་འདོར་ན། །མི་དེ་གདོན་གྱིས་བཏབ་པ་ཡིན། ། ད་དུང་གཉེན་པོ་མི་འཇུག་ན། །མི་ཡིན་སྙམ་དུ་མ་སེམས་ཤིག །

ཅུང་ཟད་བསམ་པ་ཡོད་རྣམས་ཀྱིས། །སྐྱོན་དེ་བརྣགས་ལ་གདོན་པར་བྱ། ། དེ་ལྟར་གཉེན་པོ་སྤྱོད་པ་ཡི། །མི་དེ་གོང་ནས་གོང་དུ་འགྲོ། །

བློ་དང་ལྡན་པའམ་བྱམས་ཀྱང་རུང་། །བསྒོ་བ་ཉན་པའམ་དཔའ་ཡང་རུང་། ། གཞན་གྱི་བྱ་བ་མི་ཤེས་ཀྱང་། །དེ་དང་དེ་ཡི་སྤྱོད་པས་བསྐྱང་། །

མི་བསྲུན་པ་ཡི་འབྲེལ་བ་དང་། །རིང་ནས་འགྲོགས་ཀྱང་སྤངས་ན་བདེ། ། རྟག་ཏུ་འགུལ་བའི་སོ་བཟང་ཡང་། །བཏོན་ན་བདེ་ཞེས་རྒད་པོ་སྨྲ། །

རྒྱུན་དུ་འཁང་ཞིང་འཁོར་བ་ཡི། །འབྲེལ་བ་ཅུང་ཟད་བྱིན་ལ་བསྐྲད། ། སྦྲུལ་གྱིས་ཟིན་པའི་རྨ་དག་ནི། །གཅོད་མ་ནུས་ན་སྲོག་དང་འབྲལ། །

གལ་ཏེ་ཆེན་པོ་ཐོབ་གྱུར་ན། །ཕྲན་ཚེགས་གཞན་ལ་སེར་སྣ་སྤང་། ། ཡུལ་འཁོར་དབང་དུ་འདུ་བ་ན། །དབྱིག་ལ་སེར་སྣ་བྱེད་དམ་ཅི། །

མཁས་པ་ལོངས་སྤྱོད་གསོག་འདོད་ན། །ཆ་ཤས་སྦྱིན་པ་སྲུང་བ་ཆེ། ། ཁྲོན་པའི་ཆུ་ནི་འཕེལ་འདོད་ན། །འཆུ་བ་ཉིད་ནི་གདམས་ངག་ཡིན། །

གང་ཞིག་ཕུན་སུམ་ཚོགས་འདོད་ན། །དེ་ཡིས་འདུ་འགོད་མང་དུ་བྱ། ། འདུ་འཛི་སྡུག་བསྔལ་རྒྱུར་མཐོང་ན། །ཕུན་སུམ་ཚོགས་པའི་རེ་བ་ཐོངས། །

བྱ་བ་གང་ཞིག་བསྒྲུབ་ན་ཡང་། །སྐྱོན་དང་ཡོན་ཏན་གཉིས་གཉིས་སོམས། ། གཉིས་ཀ་མཉམ་ཡང་སྤང་དགོས་ན། །ཉེས་པ་ཤས་ཆེ་སྨོས་ཅི་དགོས། །

མཁས་པ་དྲང་པོ་གུས་པས་བསྟེན། །མཁས་པ་གཡོ་ཅན་ཤེས་ན་གཟབ། ། རྨོངས་པ་དྲང་པོ་བྱམས་པས་བསྐྱང་། །རྨོངས་པ་གཡོ་ཅན་མྱུར་དུ་སྤང་། །

ནོར་དང་གཡོ་འཁོར་མེད་ན་ཡང་། །མཛའ་བོ་བློ་ལྡན་གྲོགས་ཡོད་ན། ། དུད་འགྲོས་ཀྱང་ནི་དོན་གྲུབ་ན། །མི་ཡི་འགྲོ་བས་སྨོས་ཅི་དགོས། །

གང་ཞིག་ཤེས་པའི་བྱ་བ་བསྒོ། །མི་ནུས་པ་ལ་འགའ་མི་སྦྱར། ། ཆུ་ལ་ཤིང་རྟས་མི་བགྲོད་དེ། །ཐང་ལ་གྲུ་ཡིས་ཇི་ལྟར་བགྲོད། །

ཡུན་རིང་འཁོན་པའི་དགྲ་བོ་དང་། །མཛའ་བ་བྱེད་ཀྱང་བསྲེ་མི་བྱ། ། ཤིན་ཏུ་ཁོལ་བའི་ཆུ་ཡིས་ཀྱང་། །མེ་དང་ཕྲད་ན་མི་གསོད་དམ། །

གཞུང་བཟང་ངོ་ཚ་ཁྲེལ་ཡོད་ན། །དགྲ་བོ་ལ་ཡང་ཡིད་བརྟན་རུང་། ། གཞུང་བཟང་དགྲ་ལ་སྐྱབས་སོང་བས། །སྲོག་གི་བར་དུ་བསྐྱབས་པ་ཐོས། །

རང་ལ་ངན་སེམས་མེད་ཅེས་ཏེ། །ཕལ་པ་ཀུན་ལ་ཡིད་མི་བརྟན། ། རི་དྭགས་རྒྱུན་དུ་སེམས་བཟང་ཡང་། །མཆེ་བ་ཅན་རྣམས་ཟས་སུ་བསྒོམ། །

བླུན་པོ་ལོག་པའི་ལམ་འགྲོ་ན། །བླུན་པོ་ཉིད་དུ་གོ་བས་ཆོག ། མཁས་པ་ལོག་པའི་ལམ་འགྲོ་ན། །རྒྱུ་མཚན་གང་ཞིག་དཔྱད་དགོས་སོ། །

མཁས་པས་ལོངས་སྤྱོད་ལྷག་པར་སྤྱད། །མི་སྟེར་ན་ཡང་འཕྲོག་པ་མེད། ། ལོངས་སྤྱོད་ཉམས་པའི་ས་ཕྱོགས་སྤང་། །མི་འཕྲོད་ན་ཡང་གཉའ་སྐྱིས་འཇོམས། །

རང་གིས་ལེགས་པར་ཤེས་ན་ཡང་། །བྱ་མ་ཐམས་ཅད་གྲོས་ཀྱིས་བསྒྲུབ། ། མི་གང་གྲོས་ལ་མི་དགའ་བ། །འགྱོད་པ་རིན་གྱིས་ཉོ་བ་ཡིན། །

ཉམ་ངའི་གྲོས་དག་བྱེད་པ་ན། །མཛའ་ཡང་གསུམ་དུ་གྲོས་མི་བྱ། ། རོ་ལངས་སྒྲུབ་པའི་གྲོགས་ངན་ན། །ཐོག་མར་སྒྲུབ་པོ་ཟ་བར་འགྱུར། །

ལེན་ཤེས་སྙོམས་པར་གཏོང་ལ་མཁས། །དུལ་ཞིང་ཀུན་གྱི་ངོ་བསྲུང་བ། ། འཇིགས་མེད་བྱས་པ་ཆུད་མི་གཟན། །མི་དེ་འདོད་ན་ས་ཀུན་ཐོབ། །

གལ་ཏེ་དགྲ་བོ་སྐྱབས་འོང་ན། །དེ་ལ་མཆོད་ནས་སྙན་པ་བརྗོད། ། ཁྭ་ཏས་བྱི་བ་ལ་བརྟེན་ནས། །བདེ་བ་ཐོབ་ཅེས་སྔོན་རབས་སྨྲ། །

གྲོགས་པོ་ངན་དང་ཐོས་པ་ངན། །རྟོག་པ་ངན་དང་བྱ་བ་ངན། ། མཁས་པ་རྣམས་ཀྱིས་མི་བྱ་སྟེ། །བྱེད་ན་བླུན་པོ་གུད་ན་མེད། །

ལེགས་པར་བརྟགས་ནས་བྱེད་པ་ལ། །བྱ་བ་ཉམས་པ་ག་ལ་སྲིད། ། མིག་ལྡན་བརྟགས་ནས་འགྲོ་བ་ན། །གཡང་སར་གོམ་པ་འདོར་རམ་ཅི། །

རང་གཞན་གཉིས་ཀ་འཕེལ་འགྱུར་བའི། །ཡོན་ཏན་སློབ་ན་མཁས་པའི་རྟགས། ། རིག་པ་འགའ་ཞིག་མདའ་མཁན་ལྟར། །ཤེས་པ་ཉིད་ན་ཆོ་འབྲང་འཇིག །

རང་ཉིད་ཅིས་ཀྱང་མཐོ་འདོད་ན། །གཞན་ལ་ཕན་པ་འབའ་ཞིག་གྱིས། ། བྱད་ལ་བྱི་དོར་བྱེད་པ་རྣམས། །སྔོན་དུ་མེ་ལོང་མི་འབྱིད་དམ། །

ཕ་རོལ་ཅི་ནས་གཞོམ་འདོད་ན། །རང་གི་ཡོན་ཏན་འབད་པས་སྒྲུབ། ། དགྲ་བོ་གསོད་པར་འདོད་པ་རྣམས། །མཚོན་ཆ་འབད་ནས་སྒྲུབ་ལ་ལྟོས། །

གཡོན་ཅན་ཚིག་ལ་དྲོན་འཇུག་པས། །དྲང་པོས་དེ་ལ་བརྟག་དཔྱད་དགོས། ། བསླུས་རྗེས་ཁོ་བོ་དྲང་ངོ་ཞེས། །རང་ལ་བསྟོད་པས་ཅི་ཞིག་ཕན། །

གཡོན་ཅན་སོགས་ལ་གཡོ་སོགས་དང་། །དྲང་པོ་སོགས་ལ་དྲང་པོ་སྟེ། ། མི་བརྟན་པ་ལ་བརྟན་དགོས་ཞེས། །བྱ་བ་སྔོན་གྱི་ཡིག་ཚངས་ཡིན། །

མཁས་པས་རྟག་ཏུ་དགྲ་ལ་ཡང་། །གཉེན་དེས་རྐྱེན་དུ་བྱས་ན་ལེགས། ། དེ་ཡིས་འདུམ་ལ་མི་ཕན་ཡང་། །ངེས་པར་གནོད་སེམས་འཇིལ་བའི་སྨན། །

ཚིག་ངན་བརྗོད་པས་འཇིག་རྟེན་ན། །འདོད་པ་འགྲུབ་པ་མི་སྲིད་ཀྱིས། ། ཡིད་ལ་རང་འདོད་བསྒྲུབ་ན་ཡང་། །ངག་གིས་ཀུན་དང་མཐུན་པར་གྱིས། །

རང་དང་གཞན་གྱི་དོན་གྲུབ་ན། །འཇམ་རྩུབ་ཇི་ལྟར་བྱས་ཀྱང་རུང་། ། ཐབས་ལ་མཁས་པའི་སྤྱོད་པ་ལ། །གཡོ་སྒྱུ་ཐུབ་པས་མ་གསུངས་སོ། །

ཐ་མར་ཤིན་ཏུ་ཕན་པའི་གྲོས། །འཕྲལ་ལ་སྡུག་ཀྱང་མཁས་པས་བསྟེན། ། རྒས་ཤིང་གདུངས་ན་ཡོན་ཏན་རྣམས། །བུ་གཅིག་པ་ལ་མཁས་རྣམས་སློབ། །

ལོངས་སྤྱོད་ཧ་ཅང་སྤེལ་དྲགས་ན། །དེ་ལ་རྒུད་པ་ཤིན་ཏུ་ཉེ། ། ཆུ་ཡིས་ཤིན་ཏུ་གང་བ་ཡི། །རྫིང་བུ་སྟོང་ངམ་ཡང་ན་འབྲལ། །

སྐྱེ་བོ་འགའ་ལ་ཕན་པའི་ལས། །ལ་ལས་དེ་ལ་འཇུག་མི་རུང་། ། སྒོག་སྐྱ་རླུང་ལ་ཕན་མོད་ཀྱི། །མཁྲིས་པའི་ནད་ལ་དུག་ཏུ་འགྱུར། །

ཉམ་ཆུང་རྟག་ཏུ་བསྐྱང་དགོས་དང་། །འགྲོགས་ན་ཆེན་པོ་ཉམས་དོགས་ཡོད། ། ཞུན་མར་སྣོད་དུ་བཞག་གྱུར་ན། །སྣོད་ལ་བྱི་བས་མི་རྨུག་གམ། །

ངན་པ་རྣམས་ལ་བརྟེན་བྱས་ན། །ངན་པའི་ཤན་གྱིས་རང་ལ་གནོད། ། ཡུར་བའི་ཆུ་ལ་བརྟེན་པ་ཡི། །ཉ་རྣམས་ཞིང་ལ་འགྲེམས་ལ་ལྟོས། །

གཞུང་ངན་བདག་ལ་བརྟེན་འཆའ་ན། །དེ་ལ་ཅུང་ཟད་བྱིན་ཏེ་བསྐྲད། ། ཁྱིམ་དུ་ལྟས་ངན་བྱུང་གྱུར་ན། །ནོར་ལས་ཕྲིས་ཏེ་བཟློག་པ་དགོས། །

དམ་པ་གཞན་དུ་འགྲོ་ན་ཡང་། །བསྙེན་བཀུར་བྱས་ཏེ་ཉེ་བར་བཞག ། ནོར་བུ་རིན་ཆེན་རྟག་མཆོད་ན། །བཀྲ་ཤིས་དཔལ་དང་བསམ་པ་འགྲུབ། །

དམན་པའི་སྐྱེ་བོ་བསྟོད་དྲགས་ན། །ཕྱི་ནས་དེ་ཉིད་ཁྱད་དུ་གསོད། ། མཁའ་ལ་མི་གཙང་གཏོར་གྱུར་ན། །འཐོར་བ་པོ་ཡི་སྤྱི་བོར་བབ། །

སྐྱེ་བོ་བློ་ལྡན་མགོ་སྨད་ན། །སྨོད་བྱེད་ཉིད་ལ་ཉེས་པ་འཕོག ། མར་མེ་ཐུར་དུ་ཁ་བསྟན་ན། །སྟོན་པ་པོ་ཡི་ལག་པ་སྲེག །

གང་དང་གང་གི་གནས་ཡིན་པར། །དེ་དང་དེ་ཡི་གནས་སུ་བཞག ། གཙུག་རྒྱན་རྐང་པར་མི་གདགས་ཏེ། །རྐང་པའི་རྐང་རྒྱན་སྤྱི་གཙུག་མིན། །

བྱ་བ་ཆེན་པོ་སྒྲུབ་པའི་ཚེ། །འབད་པ་ཡིས་ནི་གྲོགས་བཟང་བསྟེན། ། ནགས་ཚལ་ཆེན་པོ་མེས་བསྲེག་ན། །རླུང་ཞིག་ཅི་ནས་གྲོགས་སུ་དགོས། །

བྱམས་པས་ཁྱབ་པའི་ཚིག་སྨྲ་བ། །བསྒྲུབ་སླ་གཞན་དགའ་སྡུད་པའི་མཆོག ། ནོར་གྱིས་མགུ་བར་སུ་ཡིས་ནུས། །ལུས་སྲོག་བཏང་ཡང་ཕྱེད་མི་ཚིམ། །

ཕོངས་ཀྱང་གདུང་བར་མི་བྱ་སྟེ། །འབྱོར་ཡང་དགའ་བས་དྲེགས་མི་བྱ། ། ལས་ཀྱི་འཕེན་པ་རྒྱང་རིང་བས། །སྐྱིད་སྡུག་སྣ་ཚོགས་ད་གདོད་འབྱུང་། །

རབ་བྱེད་དགུ་པ། ཆོས་བརྟག་པ། འགྲོ་མགོན་སངས་རྒྱས་བཞུགས་བཞིན་དུ། །སྟོན་པ་གཞན་ལ་གུས་བྱེད་པ། ། ཡན་ལག་བརྒྱད་ལྡན་ཆུ་འགྲམ་དུ། །བ་ཚྭའི་ཁྲོན་པ་བརྐོ་བ་ཡིན། །

དངོས་པོ་གང་དང་གང་ལ་ཡང་། །གོམས་ན་དཀའ་བ་ཅི་ཡང་མེད། ། བཟོ་ཡི་རིག་བྱེད་སྦྱངས་པ་ལྟར། །དམ་ཆོས་དཀའ་བ་མེད་པར་འགྲུབ། །

གང་ཞིག་ཉུང་ངུས་ཆོག་ཤེས་པ། །དེ་ཡི་ལོངས་སྤྱོད་ཟད་མི་ཤེས། ། ཆོག་ཤེས་མེད་པར་འཚོལ་བ་ལ། །སྡུག་བསྔལ་ཆར་བཞིན་རྒྱུན་དུ་བབ། །

ནམ་དགོས་ཚེ་ན་ལེན་པ་ཡི། །ནོར་ནི་སྦྱིན་པར་ཐུབ་པས་གསུངས། ། བསགས་པའི་ནོར་ནི་སྦྲང་རྩི་ལྟར། །ནམ་ཞིག་གཞན་གྱིས་སྤྱོད་པར་འགྱུར། །

འཇིག་རྟེན་འདི་ན་བུན་བཏང་བས། །དངོས་པོ་ཐོབ་པའི་ངེས་པ་མེད། ། སློང་ལ་བྱིན་ན་འབད་མེད་པར། །ཆུང་ཡང་བརྒྱ་འགྱུར་ཐོབ་པ་ཡིན། །

འཇུངས་ལ་ཕྱུག་པོ་མི་སྲིད་ཅིང་། །གཏོང་ལ་དབུལ་པོ་མི་སྲིད་པས། ། འཇུངས་པ་ནོར་དད་ཆུང་བ་དང་། །གཏོང་བ་ནོར་ལ་རྔམས་པ་འདྲ། །

བྱིན་ན་དབུལ་གྱུར་དོགས་པ་ཡིས། །འཇུངས་པས་སྦྱིན་པ་མི་གཏོང་ལ། ། སེར་སྣས་ངེས་པར་ཕོངས་འགྱུར་བས། །བློ་ལྡན་ཅུང་ཟད་རྙེད་པ་གཏོང་། །

བཞག་ན་ནོར་བསྐྱེད་མི་འཕེལ་བས། །ཚོང་པས་ཟོང་རྣམས་འགྲེམས་པ་ལྟར། ། བསངས་ན་དབང་ཕྱུག་མི་ཐོབ་པས། །མཁས་པས་ཚོང་བཞིན་ཕྱོགས་བཅུར་སྟེར། །

བྱེ་བ་སྟོང་ཕྲག་གཏེར་ཡོད་ཀྱང་། །སུ་ཞིག་ལ་ཡང་གཏོང་མི་བྱེད། ། དེ་དག་འཇིག་རྟེན་འདི་དབུལ་ཞེས། །ཐོས་མང་རྣམས་ཀྱིས་དེ་སྐད་བཤད། །

རིགས་རྒྱུད་རྒུད་ཀྱིས་དོགས་པས་ན། །བློ་ཆུང་ཅུང་ཟད་རྙེད་པ་གསོག ། མཁས་པ་རིགས་རྒྱུད་མཐོ་ཐོབ་ཕྱིར། །གསུག་བཞིན་གཞན་ལ་སྦྱིན་པ་གཏོང་། །

རིགས་རྒྱུད་ཕྱུག་པོར་བྱ་སྙམ་ནས། །རང་ཉིད་བཙོངས་ནས་བུ་ལ་སྟེར། ། བུ་ངན་ཕ་ལ་རྒོལ་བཞིན་དུ། །ནོར་རྣམས་བརླགས་ནས་ཁྱི་བཞིན་འཁྱམས། །

ཇི་ལྟར་ཕ་མ་བུར་བྱམས་ཀྱང་། །དེ་ལྟར་བུ་ཚས་ཕ་མ་མིན། ། ཕ་མས་བུ་ཚ་བསྐྱངས་བསྐྱངས་ནས། །ཕ་མ་རྒས་ནས་བུ་ཚས་བརྙས། །

ནོར་གསོག་འཇུངས་པའི་ཕྱུག་པོ་དང་། །དགོས་སར་གཏོང་བའི་ཕྱུག་པོ་གཉིས། ། རང་དང་རིགས་རྒྱུད་གཉིས་ཀ་ལ། །འཇིག་རྟེན་གཞན་གྱི་བྱེ་བྲག་འབྱེད། །

སྲིད་པའི་ཁོལ་པོར་གྱུར་པ་རྣམས། །སྲོག་དང་བསྡོས་ནས་ནོར་ཕྱིར་འབྲེང་། ། ཆོག་ཤེས་ཅན་གྱིས་ནོར་རྙེད་ཀྱང་། །དེས་པ་བཞིན་དུ་གཞན་ལ་སྟེར། །

བདོག་པ་བཏང་བས་སྦྱིན་པ་རྫོགས། །དེ་ལ་ཁྲོ་ན་བཟོད་པ་འཕེལ། ། ཚིམ་ན་རྗེས་སུ་ཡི་རང་བསྒོམ། །དེས་ན་སྦྱིན་པ་ཆོས་ཀྱི་མཆོག །

སྡུག་བསྔལ་རྒྱ་མཚོའི་སྣོད་གྱུར་པའི། །ལུས་འདི་དགྲ་དང་འདྲ་མོད་ཀྱི། ། བློ་དང་ལྡན་པས་འཁོལ་ཤེས་ན། །འདི་ལ་བསོད་དམས་རྟེན་དུ་རུང་། །

སྐད་ཅིག་འཇིག་པའི་ཚེ་ལ་ཡང་། །དགེ་བའི་བག་ཆགས་རིང་དུ་ཁྱེར། ། རླུང་གིས་བསྒོས་པའི་ཙན་དན་དྲི། །རིང་དུ་ཐུལ་ཡང་དགའ་བ་བསྐྱེད། །

ཡུན་རིང་བདེ་བ་སྤྱད་སྤྱད་ཀྱང་། །འབྲལ་བའི་སྡུག་བསྔལ་ལྷག་པར་ཆེ། ། རང་དབང་མེད་པར་འཆི་དགོས་པ། །འདི་ལ་རྟག་འཛིན་དེ་དག་བརླག །

གཉེན་བཤེས་ཀུན་གྱིས་མཐའ་བསྐོར་ཏེ། །བཅོམ་བསྐྱུངས་མིག་རྩ་ཤིན་ཏུ་ཞན། ། གང་ཕྱོགས་འགྲོ་བའི་གཏོལ་མེད་པ། །དེ་ཚེ་དགེ་བ་གཞན་རྣམས་ཕུང་། །

ངན་སོང་གསུམ་གྱི་ནད་རྣམས་ནི། །མ་བྱུང་བ་ནས་གསོ་བར་བྱ། ། གནམ་ལྕགས་མགོ་ལ་བབ་པ་ལྟར། །ཐོག་ཏུ་བབས་ན་ཅི་བྱར་ཡོད། །

མཛའ་བཤེས་ཀུན་དང་བྲལ་བ་དང་། །ངེས་པར་འཆི་བ་ཤེས་བཞིན་དུ། ། ད་དུང་བདེ་བར་གཉིད་ཕེབས་པ། །བདག་ཉིད་སྙིང་ལ་ཅི་ཞིག་ཞུགས། །

གང་གིས་བརྩོན་པར་མི་ནུས་ཀྱང་། །ཅི་ནས་ངན་འགྲོར་མི་ལྟུང་བྱ། ། དཔའ་བོས་དགྲ་སྡེ་མ་བསད་ནའང་། །རང་ཕྱོགས་གསོད་པར་བྱེད་དམ་ཅི། །

འཕྲལ་དུ་ཅུང་ཟད་སྡུག་ན་ཡང་། །རྒྱུན་དུ་བདེ་བ་མཁས་པས་བསྟེན། ། གཏར་བསྲེག་དག་གིས་ནད་འདོན་པ། །སྨན་པ་མཁས་པའི་གཞུང་ལུགས་ཡིན། །

གལ་ཏེ་གཞན་དག་ཕུན་ཚོགས་པས། །བདག་གི་ཡིད་ལ་མི་བཟོད་ན། ། དེ་ཡིས་རང་འབྱོར་འཇོམས་པའི་ཕྱིར། །རང་ལ་ཕྲག་དོག་བྱེད་པར་ཟད། །

གནོད་པ་བྱ་ཕྱིར་དགྲ་འཇོམས་ན། །ཁྱེད་ཀྱིས་ཁྲོ་བ་ཁོ་ན་ཆོམས། ། ཁྲོ་བས་འཁོར་བ་ཐོག་མེད་ནས། །བདག་ལ་གནོད་པ་མཐའ་ལས་འདས། །

གལ་ཏེ་དགྲ་ཀུན་བརླག་འདོད་ན། །བསད་པས་དེ་ཀུན་ག་ལ་འཛད། ། རང་གི་ཁྲོ་བ་གཅིག་བཅོམ་པས། །དགྲ་ཀུན་ཅིག་ཅར་བསད་པ་ཡིན། །

མཐུ་ཆེན་གཟུ་ལུམ་སྤྱོད་པ་ལ། །ཁྲོས་ན་རང་ལ་ལྷག་པར་གནོད། ། དམ་པ་ཉེ་བར་ཞི་བ་ལ། །ཁྲོ་བར་བྱ་རྒྱུ་ག་ལ་ཡོད། །

སྡོང་བུ་གཅིག་ལས་སྐྱེས་པ་ཡི། །རྩྭ་རྣམས་རླུང་གིས་ཕྱོགས་བཅུར་སྟོར། ། དེ་བཞིན་ལྷན་ཅིག་སྐྱེས་པ་ཡིས། །སྐྱེ་བོ་ལས་ཀྱིས་སོ་སོར་འབྲལ། །

སྔོན་ཆད་མ་མཐོང་འབྲེལ་བར་འཐམ། །དེ་ནས་སླར་ཡང་གཞན་འགྲོ་བའི། ། མི་དེ་བདག་དང་ཅིར་འབྲེལ་ན། །ཤི་ནས་མྱ་ངན་ཆེན་པོ་བྱེད། །

རང་དོན་འབད་པས་བསྒྲུབ་འདོད་ན། །དེ་ཡིས་དང་པོར་གཞན་དོན་སྒྲུབས། ། རང་དོན་ཁོ་ན་གཙོར་བྱེད་པ། །དེ་ཡིས་རང་དོན་འགྲུབ་མི་སྲིད། །

མི་གང་གཞན་དོན་གཙོར་བྱས་ན། །གཡོ་ཅན་རང་དོན་སྒྲུབ་པ་འདྲ། ། རང་དོན་འབའ་ཞིག་གཙོར་བྱེད་པ། །གཞན་མགོ་འདོན་ཕྱིར་དྲང་པོ་འདྲ། །

བློ་ལྡན་ཚེ་འདི་བསྒྲུབ་ན་ཡང་། །ཆོས་ཀྱིས་བསྒྲུབ་ན་བདེ་བར་འགྲུབ། ། དམ་པ་རྣམས་དང་ཆོམ་རྐུན་གྱི། །ཕུན་སུམ་ཚོགས་པའི་ཁྱད་པར་ལྟོས། །

མི་རྣམས་ཚེ་ཐུང་དེ་ཡི་ཕྱེད། །མཚན་མོ་གཉིད་ལོག་ཤི་དང་འདྲ། ། ན་རྒས་སྡུག་བསྔལ་སྣ་ཚོགས་ཀྱིས། །ཕྱེད་པོའང་བདེ་བར་སྤྱད་དུ་མེད། །

སྐྱེ་བོ་ཀུན་གྱི་དྲུང་སྡོད་པའི། །འཆི་བདག་གལ་ཏེ་མངོན་སུམ་མཐོང་། ། བྱ་བ་གཞན་དག་ལྟ་ཅི་སྨོས། །ཟ་བར་དྲན་པའི་ནུས་པ་མེད། །

ཁྱོད་ཀྱིས་བྱ་བ་ཟིན་ནམ་ཞེས། །འཆི་བདག་སྡོད་པར་མི་འགྱུར་གྱིས། ། ངེས་པར་བྱ་དགོས་ཡོད་ན་ནི། །དེ་རིང་ཉིད་དུ་བརྟུན་ལ་གྱིས། །

བདག་གིས་བྱ་བ་མ་ཟིན་པས། །རེ་ཞིག་དེ་རིང་ཁྱོད་བཞུགས་ཞེས། ། མཆི་མས་བརྣངས་ཏེ་གསོལ་བཏབ་ཀྱང་། །འཆི་བདག་བཅོས་སུ་ག་ལ་རུང་། །

འདུ་འཛི་སྤངས་པ་བདེ་བ་སྟེ། །མིན་ན་བཟང་པོ་རྣམས་དང་འགྲོགས། ། དུག་སྦྲུལ་གསོ་བ་གང་ལ་རུང་། །གསོ་ན་བཟླས་བརྗོད་བརྩོན་པར་བྱ། །

སེམས་ནི་རྣམ་པར་གཡེངས་པ་ལ། །དམ་ཆོས་སྒྲུབ་པའི་གོ་སྐབས་མེད། ། ཉེ་བར་ཞི་བར་གནས་པ་ལ། །སེམས་ནི་ལས་རུང་ཤིན་ཏུ་ཉེ། །

དམིགས་པ་ཀུན་ལ་རབ་མཁས་ཤིང་། །ཏིང་ངེ་འཛིན་གྱིས་སེམས་དུལ་བ། ། འཕགས་པའི་ཆོས་ལ་རབ་སྦྱངས་པ། །ཡོན་ཏན་ཀུན་གྱི་ཞིང་ས་ཡིན། །

བླུན་པོ་སློབ་པ་ངོ་ཚར་འཛིན། །མཁས་རྣམས་མ་བསླབས་ངོ་ཚར་འཛིན། ། དེས་ན་མཁས་པ་རྒས་གྱུར་ཀྱང་། །ཕྱི་མའི་དོན་དུ་རིག་པ་སློབ། །

ཤེས་རབ་མེད་པའི་རྒྱུ་མཚན་གྱིས། །བླུན་པོ་ཡོན་ཏན་མི་སློབ་ལོ། ། བརྟགས་ན་ཤེས་རབ་མེད་ཉིད་ཀྱིས། །བླུན་པོས་འབད་པ་ལྷག་པར་དགོས། །

སྐྱེ་བ་སྔ་མར་མ་བསླབས་པས། །ཚེ་འདིར་བླུན་པོར་མཐོང་ནས་ནི། ། ཕྱི་མར་བླུན་པོར་སྐྱེ་དོགས་པས། །ཚེ་འདིར་དཀའ་ཡང་འབད་དེ་མཉན། །

བསྒོམས་ན་ཐོས་པ་མི་དགོས་ཞེས། །བླུན་པོ་བློ་རྒྱ་ཆུང་ངུ་སྨྲ། ། ཐོས་པ་མེད་པར་བསྒོམ་པ་ཙམ། །འབད་ཀྱང་དུད་འགྲོའི་སྒྲུབ་ཐབས་ཡིན། །

རྒྱུ་འབྲས་བསླུ་བ་མེད་པ་འདི། །ཐམས་ཅད་མཁྱེན་པའི་ཁྱད་ཆོས་ཡིན། ། མ་བསླབས་པ་ལ་ཀུན་མཁྱེན་དུ། །འགྲོ་ན་རྒྱུ་འབྲས་ག་ལ་བདེན། །

ཐོས་པ་མེད་པའི་བསྒོམ་པ་དེ། །རེ་ཞིག་གྲུབ་ཀྱང་མྱུར་དུ་འཇིག ། གསེར་དངུལ་ལེགས་པར་བཞུ་ན་ཡང་། །མེ་དང་བྲལ་ན་སྲ་བར་འགྱུར། །

ཤེས་རབ་ཀྱིས་ནི་གཏིང་བརྟགས་ནས། །ཉེས་རྒྱུ་སྤོང་བ་སྒོམ་པ་ཡིན། ། ལུས་ཀྱི་དྲི་མ་བཀྲུས་པ་ལྟར། །བསྒོམས་ཀྱང་རིང་ཞིག་ལོན་ནས་ལྡོག །

རྒྱུ་འབྲས་ཕུལ་བྱུང་མ་ཚོགས་པར། །བདག་མེད་རྟོགས་ཀྱང་འཚང་མི་རྒྱ། ། ཐབས་མཆོག་དག་གིས་མ་བསྒྲུབས་པའི། །བདེན་པར་མཐོང་ཡང་དགྲ་བཅོམ་མིན། །

དེས་ན་ཆོས་རྣམས་ལེགས་རྟོགས་ཏེ། །ཏིང་ངེ་འཛིན་ལ་སེམས་བཞག་ན། ། ཉེས་པ་བག་ཆགས་དང་བཅས་པ། །གང་གིས་སྤངས་པ་རྫོགས་འཚང་རྒྱ། །

གང་ལ་བློ་གྲོས་མི་ལྡན་ན། །བསྟན་བཅོས་ལེགས་ཀྱང་སུ་ཞིག་ལེན། ། ནོར་བུས་སྤྲས་པའི་གསེར་གྱི་རྒྱན། །མཛེས་ཀྱང་བ་ལང་ག་ལ་བལྟ། །

མཁས་པ་རྣམས་ཀྱིས་ལེགས་བཤད་ཀུན། །ཤིན་ཏུ་བདེན་པར་གོ་བཞིན་ཏུ། ། དེ་དོན་ཉམས་སུ་མི་ལེན་ན། །བསྟན་བཅོས་ཤེས་ཀྱང་ཅི་ཞིག་བྱ། །

རང་ལ་དགོས་པའི་བསྟན་བཅོས་རྣམས། །ཉི་མ་རེ་རེར་ཚིག་རེ་བཟུང་། ། གྲོག་མཁར་དང་ནི་སྦྲང་རྩི་ལྟར། །རིང་པོར་མི་ཐོགས་མཁས་པར་འགྱུར། །

ལེགས་པར་སྤྱོད་ལ་འཇུག་འདོད་ན། །ཅི་ནས་འདི་ཡི་ཁ་མཉན་ཏེ། ། དམ་པ་ཀུན་ཏུ་སྲན་བཙུགས་ནས། །སྲོག་ལ་བབས་ཀྱང་ལུགས་བཞིན་བསྐྱང་། །

དེ་ལ་འབད་པས་གཞུང་ལུགས་ནས། །འབྱུང་བཞིན་གཉེན་པོས་བསྒྲུབ་ནུས་ན། ། མཁས་རྣམས་རྫུན་པ་མི་གསུང་གིས། །འདི་ཡི་ཕན་ཡོན་ཕྱི་ནས་ལྟོས། །

སྔོན་ཡང་འདི་བཞིན་སྤྱད་རྣམས་འཕེལ། །ད་ལྟ་ན་ཡང་དེ་ལྟར་མཐོང་། ། གཏན་ཚིགས་བཟང་པོ་འདི་ཡིས་ནི། །མ་འོངས་རྣམས་ཀྱང་ཕུན་ཚོགས་འཐོབ། །

བློ་ལྡན་རང་གིས་ཤེས་ན་ཡང་། །མཁས་པའི་གཞུང་ལུགས་གུས་པས་བལྟ། ། རིན་ཆེན་ཤིན་ཏུ་བཟང་པོ་ཡང་། །མ་བཙོངས་བར་དུ་རིན་ཐང་ཆུང་། །

ནགས་ཚལ་ཤིན་ཏུ་མང་མོད་ཀྱང་། །ཙན་དན་ས་མཆོག་སྐྱེ་བ་ཉུང་། ། དེ་བཞིན་མཁས་པ་མང་ན་ཡང་། །ལེགས་བཤད་འབྱུང་བ་ཤིན་ཏུ་དཀའ། །

རྟ་མཆོག་འགྲོ་བའི་ཚེ་ན་ཤེས། །གསེར་དངུལ་བཞུ་ན་ཤེས་པར་འགྱུར། ། གླང་ཆེན་གཡུལ་ངོར་ཤེས་འགྱུར་ཏེ། །མཁས་པ་ལེགས་བཤད་རྩོམ་ན་ཤེས། །

གང་ཞིག་འཇིག་རྟེན་ཐམས་ཅད་ཀྱིས། །རང་ལ་ཚད་མར་བྱེད་འདོད་ན། ། དེ་ཡིས་གཞུབ་འདི་ལེགས་བརྟགས་ཏེ། །གཉེན་པོ་བསྐྱེད་ལ་འབད་དེ་བསྒྲུབ། །

འཇིག་རྟེན་བྱ་བ་ལེགས་ཤེས་པ། །དེ་ཡིས་དམ་པའི་ཆོས་ལུགས་འགྲུབ། ། དེས་ན་ཆོས་ལུགས་སྤྱོད་པ་དེ། །བྱང་ཆུབ་སེམས་དཔའི་རྣམ་ཐར་ཡིན། །

 ལེགས་པར་བཤད་པ་རིན་པོ་ཆེའི་གཏེར་ལས་ཆོས་བརྟག་པ་ཞེས་བྱ་བ་རབ་ཏུ་བྱེད་པ་དགུ་པའོ། །

འཚོ་བྱེད་ཟས་སུ་སྒྲོ་བཏགས་ནས། ། སྨན་གྱིས་ནད་ཆེན་གསོ་བ་ལྟར། ། འཇིག་རྟེན་ལུགས་ཀྱི་རྗེས་འབྲངས་ནས། ། བདག་གིས་དམ་པའི་ཆོས་འདི་བསྟན། ། ཐོས་པ་རྒྱ་མཚོའི་གླིང་ལས་ལེགས་འཁྲུངས་ཤིང་། ། བློ་གྲོས་ཀླུ་ཡི་དབང་པོས་ལེགས་བཟུང་བའི། ། དཔལ་ལྡན་ལེགས་པར་བཤད་པའི་རིན་ཆེན་གཏེར། ། བློ་གསལ་བློ་ཡི་བང་མཛོད་དགང་བ་དང་། ། མཁས་པ་རྣམས་ཀྱི་འདོད་དགུ་བསྒྲུབ་པའི་ཕྱིར། ། ཤཱཀྱའི་དགེ་སློང་ཀུན་དགའ་རྒྱལ་མཚན་དཔལ། ། བཟང་པོས་དགེ་བའི་ཡིད་ཀྱིས་ལེགས་བརྟགས་ནས། ། ཕྱོགས་རྣམས་གསལ་བར་བྱ་ཕྱིར་འདི་ཕྱེའོ། ། དེ་ལས་བྱུང་བའི་དགེ་བ་དྲི་མ་མེད། ། བསིལ་ཟེར་བྱེད་པའི་འོད་ལྟར་རབ་གསལ་བས། ། སྐྱེ་བོའི་སྙིང་གི་མུན་པ་ཕྱིར་བསལ་ཏེ། ། བློ་གསལ་བློ་ཡི་ཀུ་མུད་རྒྱས་གྱུར་ཅིག ། ཤེས་བྱ་ཀུན་ལ་རབ་སྦྱངས་པས། ། ཐམས་ཅད་མཁྱེན་པ་ཐོབ་པའི་ཕྱིར། ། དེས་ན་བདག་གི་བསྟན་བཅོས་འདི། ། རྫོགས་པའི་སངས་རྒྱས་ཐོབ་ཕྱིར་བྱས། །


ལེགས་པར་བཤད་པ་རིན་པོ་ཆེའི་གཏེར་ཞེས་བྱ་བའི་བསྟན་བཅོས་ཡུལ་བྱང་ཕྱོགས་ཀྱི་རྒྱུད་ཁ་བ་ཅན་གྱི་ལྗོངས། བྱང་ཆུབ་སྙིང་པོ་རྡོ་རྗེའི་གདན་ལས་ དཔག་ཚད་བརྒྱ་བགྲོད་པའི་གནས། གཙང་ལ་སྟོད་གྲོམ་པ་དཔལ་ས་སྐྱའི་གཙུག་ལག་ཁང་ན་གནས་པ། འཇམ་པའི་དབྱངས་ཀྱི་ཐུགས་ཀྱི་འོད་ཟེར་གྱི་ བློའི་པདྨོའི་ཟེའུ་འབྲུ་ཅུང་ཟད་ཁ་བྱེ་བས། སྒྲ་དང་། ཚད་མ་དང་། སྙན་ངག་དང་། སྡེབ་སྦྱོར་དང་། ཚིག་གི་རྒྱན་དང་། བདེ་བར་གཤེགས་པའི་གསུང་རབ་ ཀྱི་དོན་ཡོངས་སུ་གྲགས་པ་ཕལ་མོ་ཆེ་ཐོས་ཤིང་རྟོགས་ནས་ཁོང་དུ་ཆུད་ཅིང་འདྲིས་པར་བྱས་པས། ལུང་དང་། རིགས་པ་དང་། མན་ངག་གི་གནད་ཕྱིན་ ཅི་མ་ལོག་པར་བློ་གྲོས་ཀྱི་སྣང་བ་ཐོབ་པ། འཆད་པ་དང་། རྩོམ་པ་དང་། རྩོད་པ་ལ་སོགས་པའི་ཚུལ་ལ་སྤོབས་པ་དགེ་བ་ཅན། ཤཱཀྱའི་དགེ་སློང་རིགས་པར་ སྨྲ་བ་ཀུན་དགའ་རྒྱལ་མཚན་དཔལ་བཟང་པོ་ཞེས་བྱ་བས། དཔལ་ས་སྐྱའི་དགོན་པར་ལེགས་པར་སྦྱར་པ་རེ་ཞིག་རྫོགས་སོ།། །།མངྒ་ལམ།


དགའ་བསུ་ཞུ! Welcome!

ཀ་ཡེ། Phurpu་ལགས། ཁྱེད་རང་ལྦེ་ཁེ་བོད་ཡིག་མ་རུ་ཕེབས་པར་welcome་དང་ཁྱེད་ཀྱིས་བཞག་པའི་བྱས་རྗེས་ལ་སྙིང་ཐག་པ་ནས་བཀའ་དྲིན་ཆེ་ཞུ། ངའི་རེ་བར་ཁྱེད་རང་གནས་འདི་ལ་དགའ་ཞེན་དང་རྒྱུན་དུ་ཕེབས་པར་ཞུ། གཤམ་དུ་གསལ་བ་ནི་གསར་ཞུགས་མཁན་དག་ལ་ཉེ་བར་མཁོ་བའི་སྦྲེལ་མཐུད་ཡིན།

ཁྱེད་ཀྱིས་འདི་རུ་རྩོམ་སྒྲིག་མཛད་པར་སྤྲོ་པོ་ཡོང་རྒྱུ་དང་ལྦེ་ཁེ་བ་ཞིག་བྱ་རྒྱུ་ནི་ངའི་རེ་བ་ཡིན། དེ་བས་གླེང་མོལ་ཤོག་ངོས་ཀྱི་སྟེང་དུ་མིང་ཐོ་བཀོད་འདོད་ན་རླབས་རིས་བཞིའི་(~~~~)རྟགས་བཀོལ་ན་ཁྱེད་ཀྱི་མིང་དང་ཟླ་ཚེས་རང་འགུལ་གྱིས་སྦྱར་ཡོང་། གལ་ཏེ་ཁྱེད་ལ་རོགས་རམ་དགོས་ན་ en:Wikipedia:Where to ask a questionརུ་ཕེབས་ནས་དྲི་བ་འདོན་ཆོག་པ་ལས་གཞན་ངའི་གླེང་མོལ་ཤོག་ངོས་སུ་ང་ལ་དྲི་བ་འདོན་པའམ་ཡང་ན་{{helpme}} རང་གི་གླེང་མོལ་ཤོག་ངོས་སུ་བཞག་ན་ཅུང་མི་འགོར་བར་མི་གཞན་ཞིག་གིས་ཁྱེད་ལ་ལན་འདེབས་ངེས། ཁྱེད་རང་ཕེབས་པར་ཡང་བསྐྱར་དུ་དགའ་བསུ་ཞུ།--Viskonsas ༡༨:༠༧, ༢༤ ཟླ་བདུན་པ། ༢༠༠༨ (UTC)Reply

"https://bo.wikipedia.org/w/index.php?title=User_talk:Phurpu&oldid=136401"ལས་སླར་རྙེད་སོང།